| |
| |
| La Carlotta, Napoli, A spese de lo Mpressario, 1726 |
| a cura di Mariapia Giardullo |
|
|
|
|
|
| ATTO PRIMMO |
|
| SCENA PRIMMA |
|
| Anticammera co tavolino da jocare ’ntiempo de notte, dove stanno jocanno a no tavolino CARLOTTA, FELICE, e no Personaggio finto: a n’auto, LIVIA, BETTINA, e n’auto Personaggio finto, e a n’auto SILVANO puro, co n’auto finto jocanno a Schiacche. |
|
| LIVIA |
| Copp’è trejunfo. |
| BETTINA |
| Fruscia co sse sole. |
| Tre co chesta nn’aje fatte. (a Livia.) |
| CARLOTTA |
| Nce lo bole: |
| Si avisse trejonfato, (a Felice.) |
| Non s’avarria pigliato |
5 | Chisto ssa poglia, che non va’ no callo. |
| SILVANO |
| Eh tu te vuo’ pigliare sto cavallo, |
| Ma non te resce. (a lo Compagno.) |
| FELICE |
| Joca si nn’aje voglia, (a Carlotta.) |
| E statte zitto. |
| LIVIA |
| Spate: O bella poglia! |
| BETTINA |
| Che nce vuo’ fa si chisto joca fiacco, |
10 | Che te trejonfa sopramano. (a Livia.) |
| SILVANO |
| Schiacco. (a lo Compagno.) |
|
| SCENA II |
|
| MACCHIONE, e po CASIMIRO. |
|
| MACCHIONE |
| Segno’ fora nce sta no Posteglione, |
| Che v’addimmanna. |
| SILVANO |
| A mme no posteglione! |
| E chi lo manna? |
| MACCHIONE |
| Ammene? che nne saccio. |
| SILVANO |
15 | Va di’ che trasa. Joca uscia pe mmene. |
| Chi sarrà chisto! (va Silvano a ricevere Casimiro.) |
| CARLOTTA |
| Joca, |
| Si vuo’ jocà no poco cchiù polito. |
| SILVANO |
| Signor mio reverito (a Casimiro.) |
| Favoresca ussoria. (s’assettano.) |
| CASIMIRO |
20 | Io songo Aurelio Marmi: |
| Che commo da ste lettere |
| Potarrà uscia conoscere, |
| Vengo a godè la sciorte, |
| D’essere figlio de lo Si Silvano. |
25 | Ecco leggite. Primmo |
| Mperrò vorria vasareve la mano. |
| SILVANO |
| Nò figlio, int’a ste braccia |
| T’accoglio e te recevo int’a sto core. |
| CASIMIRO |
| No no, così hà da essere Signore. (nce la vasa.) |
| FELICE |
30 | Entro a denare. |
| CASIMIRO |
| Ancora no ll’aje viste. (Silvano legge le lettere.) |
| CASIMIRO |
| Sciorte già che faciste |
| Cagnare la valice |
| D’Aurelio co la mia, |
| Mme vogl’ire spassanno, |
35 | Co sti Segnure, e seguità sto nganno. |
| BETTINA |
| So’ poche ssi trejunfe a palo luongo. |
| CARLOTTA |
| Che d’è? lo Gnore legge? è no frostiero. |
| (Le sta rente!) menate vuje le carte, |
| Ca mo’ ve sto servenno. (s’auza da lo tavolino.) |
| FELICE |
| E già ch’è chesto, |
40 | Io vogl’j dinto a scrivere |
| No viglietto a la Casa. |
| CASIMIRO |
| Felicissimo. (s’auza Felice e trase dinto.) |
| Gnore che d’è? chi è chisto? |
| SILVANO |
| Chist’è lo figlio de lo Conte Marmi, |
| Che te vene a Sposà: N’è brutto giovane. |
45 | Non potea fa na botta |
| Meglio pe tte! |
| CASIMIRO |
| (Chesta sarrà Carlotta.) |
| LIVIA |
| O Macchione smicciasse ste cannele. |
| SILVANO |
| Te piace! (a Carlotta.) |
| CARLOTTA |
| Non troppo. |
| SILVANO |
| Sie verruta. |
| S’aje quarche cosa ncapo stuta stuta. (Macchione stuta na Cannela.) |
| BETTINA |
50 | A Palazzo a Palazzo. |
| MACCHIONE |
| Lo Patrone m’hà ditto stuta stuta. |
| Ed io aggio stutato. |
| BETTINA |
| O chesta è corejosa. |
| CASIMIRO |
| Io mperrò v’aggio d’avisà na cosa. |
| A lo benire; a Roma aggio trovato |
55 | No pazzo che pretenne |
| Esse creduto Aurelio; e ca voleva |
| Venì cca, pe guastà sto matremmonio. |
| SILVANO |
| Ah ah ah ah, che benga ca sta frisco. |
| CARLOTTA |
| (Non me vace a lo genio.) |
| SILVANO |
60 | Chest’è Carlotta mia (s’auza Casimiro.) |
| CASIMIRO |
| Segnora perdonateme, |
| Si accossì male nnordene, |
| Ve so’ comparso nnanze. |
| CARLOTTA |
| Nnanze a mene, |
| De tutte le manere uscia sta bene. |
| SILVANO |
65 | Iateve a reposare. |
| A lo quarto che v’aggio destenato, |
| Ca dimano matino venarrite |
| A la Caccia co nuje, si ve piace. |
| CASIMIRO |
| Ve sarraggio a servì. Ma vuje segnora |
70 | Pare che ve mostrate |
| De me poco contenta. |
| CARLOTTA |
| N’è lo vero. |
| SILVANO |
| E ca se piglia scuorno. |
| CASIMIRO |
| Accossì spero |
|
| Spero de non vedè |
| Turbate mai cchiù no, |
75 | Ss’vuocchie, che sso’ pe mme |
| Stelle d’Ammore. |
| Co tutto, cà pe mo’, |
| Negano a mme piatà, |
| Puro trafitto già. |
80 | M’anno lo core. |
|
| SCENA III |
|
| SILVANO, CARLOTTA, LIVIA, e BETTINA. |
|
| SILVANO |
| Vuje state co lo musso? |
| Donca lo genio vuosto hà da dà legge |
| A li commanne de no Patre? Pazza. |
| O t’aje da piglià chisto, |
85 | O ll’Arma aje da sperà sotta a na mazza. |
| LIVIA |
| Strilla lo si Silvano! |
| CARLOTTA |
| Vuje mme distevo vita, |
| E buje la morte dare mme potite: |
| Io ve so’ serva, e figlia, |
90 | Ma nquanto a li marite, |
| Ogn’una co ssé stessa se consiglia. |
| LIVIA |
| Sì Silvano ch’è stato, |
| Che d’è sta defferenzia? |
| SILVANO |
| Niente, niente. |
| BETTINA |
| Sia Carlotta, che ncè? |
| CARLOTTA |
| Bettina mia, |
95 | Lo Gnore ave na certa frenesia. |
| Da mme dà pe marito chi non voglio. |
| BETTINA |
| Chisto è no brutto mbruoglio? |
| SILVANO |
| Da la volontà mia |
| Depennarrà porzia la toja; e quanno |
100 | Chesto non fosse buono, io lo commanno. |
| CARLOTTA |
| Commannà lo potite, |
| Ma è libero lo core. |
| SILVANO |
| Sempe a lo Patre ave da sta soggetto. |
| CARLOTTA |
| Ma no nquanto a l’Amore. |
| SILVANO |
105 | O a l’amore, o a lo sdigno, io sempe songo |
| No Patre che commanna, e tu si’ figlia. |
| CARLOTTA |
| Ma nquanto a maretarese, |
| Ogn’una co sé stessa se consiglia. |
|
| A nullo soggetto |
110 | Vo’ stare lo core; |
| ma libero mpietto. |
| Vo’ dire sì, e nò. |
| Non nasce l’affetto |
| Da forza, o rigore; |
115 | Lo genio, e l’amore |
| Commanne no vo’. |
|
| SCENA IV |
|
| SILVANO, LIVIA, BETTINA e MACCHIONE. |
|
| LIVIA |
| Chi è sto Sposo si è lizeto? |
| SILVANO |
| È Aurelio figlio de lo Conte Marmi, |
| Che da n’anno lo Patre |
120 | À trattato co me sto matremmonio, |
| E mo’ chesta l’hà bisto, e no lo vole. |
| MACCHIONE |
| Segno’ lo compatesco, |
| Ca a mme puro succede |
| Lo stisso co Bettina. |
| SILVANO |
125 | Va a la forca sciaurato. |
| BETTINA |
| No, lassatelo stare Si Silvano, |
| Ca chisto ve farrà passà la collera. |
| LIVIA |
| Stateve allegramente, |
| Ca chesto non è niente. |
| BETTINA |
| Di’ Macchione, |
130 | Comme dice ca non te voglio bene, |
| Quann’io moro pe ttene. |
| SILVANO |
| Ora vide, che genio ch’à Bettina |
| De pazzejà co chisto. |
| LIVIA |
| Comme ntoscia lo Viecchio: Isso non sape |
135 | Ca mo’, chi sa fa buono lo buffone |
| Arriva addove vole. |
| BETTINA |
| Aggraziatone. |
| SILVIA |
| Manco la vuo’ fornire? (a Macchione.) |
| BETTINA |
| No si Silvano mio, lassalo dire, |
140 | Siente Sia Livia. |
| LIVIA |
| Ah ah aggio da fare, |
| Pigliate guste tune. (se ne trase.) |
| BETTINA |
| Commo vuo’: Via Macchione. |
| SILVIA |
| Mme sento abbottà tanto de premmune. |
| MACCHIONE |
|
145 | O bello spruoccolo, |
| Che st’arma smafare, |
| Famme no vruoccolo |
| Mo’ me nne sciulio, |
| Tieneme tie’. (Bettina le fa carizze.) |
150 | Damme no pizzeco, |
| Vi’ ca mme struoppie, |
| Manca sta mutria. (Bettina le mette foca.) |
| Chia’ ca mme strangole, |
| So’ muorto, ajemmè. |
|
| SCENA V |
|
| SILVANO, e BETTINA. |
|
| BETTINA |
155 | Ah, ah comm’è gustuso. |
| SILVANO |
| Donca tu mo’ nc’aje gusto |
| A pazzeà co chisto? |
| BETTINA |
| Tutto lo gusto mio. |
| SILVANO |
| Gusto propio de femmena: |
160 | E nce mancano uommene, |
| Ricche, galante, belle, |
| Giuvene, e attempatielle |
| Pe te spassà, che te buo’ fa co chisto! |
| BETTINA |
| Ancora non aje visto |
165 | Lassà lo piro pe lo rafaniello? |
| Lo buono senp’è buono; |
| Ma chello che piace è buono, e bello. |
| SILVANO |
| Ma non è buono avere male genio. |
| BETTINA |
| Male genio non eje |
170 | Lo dà gusto a sé stessa. |
| SILVANO |
| Lo dà gusto a sé stessa |
| E buono, si se fa co la raggione. |
| BETTINA |
| Che raggione? lo core |
| Se sape già ca gode |
175 | La liberta: non vo’ raggione Ammore. |
| SILVANO |
| ,, Donca tu si’ ncocciata già co chisto? |
| BETTINA |
| ,, Pe nsi’ a mo’ schitto chisto me peace, |
| ,, (Lo voglio fa schiattare.) |
| SILVANO |
| ,, Ma quanno t’avarraje da maretare |
180 | ,, Po te nn’aje da scordà. |
| BETTINA |
| ,, Pacienzia tanno. |
| SILVANO |
| ,, E tanno po canosciarraje Bettina |
| ,, Chi è Silvano: pò essere |
| ,, Che io te sia marito. |
| BETTINA |
| ,, No no, fatte passare st’appetito. |
| SILVANO |
185 | ,, E si nce sta la forza, |
| ,, La mogliere sdegnata, |
| ,, Darrà ad autre mollica, e a isso scorza. |
| SILVANO |
| Ah ca tu mme vuo’ fa Bettina mia, |
| Morì senza speranza. |
| BETTINA |
| Arrasso sia. |
190 | Lo spera Si Silvano |
| Non se nega a nesciuno. |
| La femmena s’arriva chiano chiano! |
| SILVANO |
|
| Sì, chiano chianillo, |
| Faccella d’argiento, |
195 | Tormiento |
| E delietto |
| De st’arma, e sto pietto, |
| Sso bello mossillo |
| Io spero gaudè. |
200 | Ah tu si’ n’incanto |
| Vocchella cianciosa; |
| Sì, famme ’n fratanto, |
| No chillo de Sposa, |
| Fammillo che d’è? |
|
| SCENA VI |
|
| LIVIA, BETTINA, e po MACCHIONE. |
|
| BETTINA |
205 | O Sia Livia. |
| LIVIA |
| Bettina, |
| Aggio dato a rentennere a Macchione, |
| Ca tu lo vuo’ scannare, |
| Pecché isso de te ne ha ditto male. |
| BETTINA |
| O bravo! mo’ che bene |
210 | Lo voglio fa sortejere, |
| Ma aje visto che pazzia, |
| S’ha puosto ncapo mo’ lo Si Silvano! |
| LIVIA |
| Eh, figlia mo’ le cose |
| Che succedeno a nuje povere Giuvane |
215 | Se nne ponno fa storie. |
| BETTINA |
| Veccot’uno, che benne protezzione, |
| Che appena che t’ha bisto |
| Già de la casa se vo’ fa patrone: |
| O puro no milordo guappetiello, |
220 | Che abbotta de menacce, |
| Vo’ che se tenga mente a isso schitto, |
| E tu abbesogna che lo finge, e zitto. |
| LIVIA |
| È bero, a signo tale, |
| Che a li tiempe che correno, |
225 | L’avere bona grazia, |
| Pare che sia fortuna, ed è disgrazia. |
| MACCHIONE |
| Sia Bettina vedite ch’è buscia |
| Chello che v’anno ditto |
| BETTINA |
| A lazzarone guitto, |
230 | Scumma de malandrine, |
| Io te voglio taglià sti cannarine. |
| MACCHIONE |
| Chest’è mpostura io |
| BETTINA |
| Tu vaje dicenno |
| Ca io so’ chest’e chella, |
| E ca faccio, e ca dico. |
| MACCHIONE |
235 | No pe lo juorno d’oje, |
| Pozza morì nfiglianza. |
| Si maje |
| BETTINA |
| Vi’ c’arroganza. |
| LIVIA |
| Sia Bettina fornitela |
| Ca po la cosa vace troppo nnante. |
| MACCHIONE |
240 | Che troppo nnante e arreto, |
| Mo’ mme sagliano li (le vo’ dà co lo stelletto.) |
| BETTINA |
| Muore birbante. |
| LIVIA |
|
| Ah Bettina no lo fare |
|
| BETTINA |
|
| N’accort’auto: Lazzarone |
| Muore |
|
| MACCHIONE |
| Tiene: con passione. (a Bettina.) |
|
| BETTINA |
|
245 | Io lo voglio crivellare. |
|
| MACCHIONE |
|
| No, non fare, |
| Ca n’è bero Sia Betti’. |
|
| BETTINA |
|
| Io pe tte lo lasso j. |
|
| LIVIA |
|
| Io non saccio che te di’. (a Macchione.) |
|
| BETTINA |
|
250 | (Io so’ morta de la risa.) |
|
| LIVIA |
|
| (Ed io puro.) |
|
| MACCHIONE |
|
| Vi’ ch’assisa, |
| E mo’ rideno porzì. |
|
| LIVIA |
|
| (Mbrosolea?) |
|
| BETTINA |
|
| Che staje a di’? |
| Oje tu propio vuo’ morì. |
|
| SCENA VII |
|
| MACCHIONE, AURELIO, e FELICE, ch’esce dall’auta porta. |
|
| MACCHIONE |
255 | Ora veda ussoria che guaje è chisto! |
| AURELIO |
| Bel giovene dov’è lo Si Silvano? |
| MACCHIONE |
| Mo’ ve lo chiammo? (chesto comm’è stato.) |
| FELICE |
| Che nc’è Macchione? |
| MACCHIONE |
| Oh! sto desperato. (trase.) |
| AURELIO |
| (Aimè che bedo? chesta |
260 | Non è Felice, chella |
| A chi dez’io parola de sposarela? |
| Oh che ntuppo.) |
| FELICE |
| (Che bedo, chist’è Aurelio |
| Venuto pe sposarese Carlotta, |
| Mme tenemente, e pare |
265 | Che se voglia annasconnere de mene: |
| Me nce voglio fa nnanze.) |
| AURELIO |
| (Abbesogna che fegna |
| De non essere Aurelio: ca so’ guaje.) |
| FELICE |
| (Oh sto briccone fegne; a nuje.) Si Aurelio? |
| AURELIO |
270 | Alessandro, Segnora, |
| Pe servirla me chiammo. Aurelio è fratemo, |
| E comme ca nc’assemegliammo nzieme |
| Uscia piglia sto sbaglio. |
| FELICE |
| Eh Aurelio, Aurelio! |
| Non te serve a pigliarla pe sto vierzo. |
275 | Tu si’ benuto pe sposà Carlotta, |
| Ma ll’aje sparrata: no la faje sta botta. |
| AURELIO |
| Fosse ussoria la Sia Felice fuorze? |
| FELICE |
| Che non me canoscite? |
| Segnorsì so’ Felice. |
| AURELIO |
280 | No, sacciate Segnora, |
| Ca Fratemo perdette la valice, |
| Addo’ steano le lettere, |
| E nfra ll’aute na poleza |
| De cinco milia scute, |
285 | Che le dette lo Gnore |
| Pe se spusare cca la Sia Carlotta, |
| Isso mo’ va cercanno de riavere, |
| Si se pò lo perduto, |
| E da po comme disse |
290 | Attennere a Ussoria |
| La parola già data. |
| FELICE |
| E bia via, |
| Ca chesto n’è lo vero. |
| AURELIO |
| No, chist’è lo pensiero |
| Ch’a Fratemo, e ve prega, |
295 | Che Silvano non penetra sta cosa, |
| Pe quanto avite a caro esserle sposa, |
| Che d’è no responnite, |
| Tanto ncredula site? |
| FELICE |
|
| Credere te vorria, |
300 | Ma dinto a st’arma mia |
| Mme sta decenno Ammore, |
| Ca si’ no ngannatore, |
| E me confonne. |
| Cossì lo marenaro |
305 | Se fida de lo maro, |
| Ma po si nce la fa, |
| Chiù fede no le dà, |
| Non crede all’onne. |
|
| SCENA VIII |
|
| AURELIO Sulo. |
|
| AURELIO |
| Sciorte non te vastava |
310 | D’averme fatto perdere le lettere, |
| Che mme faje trovà chesta, |
| De la quale me nn’era già scordato, |
| Pe farme morì propio desperato? |
| Si Silvano non crede |
315 | Ca so’ Aurelio; aggio perzo |
| Le denare, e la sposa: |
| Si lo crede e lo dice, |
| E peggio assaje, ca mme vorrà felice, |
| Ch’aggio da fare? Addove s’è beduto |
320 | No ntrico cchiù mbrogliato? Io so’ perduto. |
|
| Passaggiero che sperzo se vede |
| Mmiezo all’ombre de scura foresta, |
| Vota, gira, se parte, se resta, |
| E la strata trovare non sa. |
325 | Cossì appunto a chest’arma succede |
| Nfra li ntriche de tant’accidente, |
| Se despera, resolve, se pente; |
| E confosa consiglio non hà. |
|
| SCENA IX |
|
| LIVIA, MACCHIONE, e po BETTINA. |
|
| LIVIA |
| Ah, ah, ah, ah. si’ corejuso proprio. |
330 | Donca na bona parte, |
| De chille che me vanno linte e pinte |
| Pe sse conversaziune, |
| So’ strafalarie. |
| MACCHIONE |
| Strafalariune, |
| Che conforme te mostrano, |
335 | Li guante e li puzille, |
| Le potisse vedere li vorzille; |
| Se pegliarriano scuorno |
| De j scarfanno segge notte e ghiuorno. |
| LIVIA |
| E di’ ca n’è lo vero. Tu faje buono |
340 | Ca vaje comm’a n’Antuono, |
| Ed Aje Bettina che te vole bene. |
| MACCHIONE |
| Che bene à fatt’attene, |
| Chella starria pe coffeà n’Aserzeto. |
| LIVIA |
| No no ll’aggio ntiso io, |
345 | Ch’a jhere sola sola, |
| Diceva: addove si’ Macchione mio! |
| MACCHIONE |
| Mme repasse sia Livia. |
| LIVIA |
| Non pe cierto. |
| MACCHIONE |
| Che contiento. (abballa sulo.) |
| LIVIA |
| Che pazzo. |
| BETTINA |
| Te Macchione, |
| Ch’abballa! Bravo bravo! |
350 | Sia Livia mme n’allegro. |
| LIVIA |
| So’ ncappata |
| Co Macchione. |
| MACCHIONE |
| O Bettina sbisciolata. |
| BETTINA |
| Addio: e ment’è chesto. |
| Potimmo fare nziemo no balletto. |
| LIVIA |
| E chi sape Abballà! |
| BETTINA |
| Ve mparo io: |
355 | Via dateve la mano. |
| MACCHIONE |
| A nuje ch’è borpa. |
| BETTINA |
| Mettete da sta parte: Addove vaje! |
| Quale mano le daje: (Macchione se mette a mano dritta.) |
| Dalle la mano ritta. |
| MACCHIONE |
| Qual’è la mano ritta. |
| LIVIA |
360 | Comme manco la saje! |
| MACCHIONE |
| E sì ca so’ lo primmo, |
| Che non sape qual’è la mano manca, |
| O la deritta soja. |
| BETTINA |
| Dice buono: via su la reverenza. |
365 | Che faje? (Macchione vota le spalle a Livia.) |
| LIVIA |
| Oh che te venga la scajenza. |
| BETTINA |
| Una a l’audienza e ll’auta a la compagna. |
| A nuje, e una. |
| MACCHIONE |
| E lesta magna magna. (Abballano.) |
| BETTINA |
| Che faje ah ah tu mme faje mpazzire. |
| LIVIA |
| Bene mio ca mo’ schiatto. |
| MACCHIONE |
370 | Voglio fa lo Canareo. |
| LIVIA |
| Facimmo lo Canario a gusto tujo. |
| MACCHIONE |
|
| Canareo bello e cucurucù. |
| Quanno si’ becchia no mmale cchiù. |
|
| LIVIA |
| Macchio’ mo’ si’ na bestia. |
| MACCHIONE |
375 | Tutte simm’accossì. |
| BETTINA |
| Chist’è spassetto. |
| MACCHIONE |
| Voglio fa co ossoria mo’ no balletto. |
| BETTINA |
| Sì te voglio dà gusto. |
| MACCHIONE |
| Mo’ vedarraje che sape fa sto fusto. (abballanno Bettina e Macchione.) |
| LIVIA |
| E biva veramente. |
| MACCHIONE |
380 | E chi non dice viva, |
| Le pozzano cadè tutti li diente. |
| BETTINA |
| Lassamenn’ire dinto, |
| Ca mm’aje fatto stracquare. (parte.) |
| MACCHIONE |
| Aspè mo’ te nne vaje. |
| LIVIA |
385 | Lassala j. |
| MACCHIONE |
| Mannaggia quanno maje. |
| LIVIA |
| Ne chi erano chille scarfa seggie, |
| Che stevano a sto luoco? |
| MACCHIONE |
| Songo gente de juoco. |
| LIVIA |
| Ruppole ruppole vuo’ dire, chiste, |
390 | Che banno notte, e ghiuorno |
| Attuorno a cierte brave jocature |
| Facenno li traffine, |
| Pe s’abbuscare cinco, o sei carrine. |
| MACCHIONE |
| Appunto. |
| LIVIA |
| E si non fosse pe sta cosa, |
395 | Cride, ca non sarria |
| Cresciuta tanto la Milordaria. |
|
| Si non fosse pe lo juoco, |
| Pe l’ammice e pe li priegge; |
| Negrecate scarfasegge, |
400 | Comme potarriano fa! |
| Vedarrisse p’ogne luoco |
| Melordielle reformate, |
| Parte farese sordate |
| Parte ll’acqua j a zappà. |
|
| SCENA X |
|
| Anticammera. |
| SILVANO, AURELIO, e CARLOTTA. |
|
| SILVANO |
405 | Ah, ah, Uscia donca è lo figlio |
| De lo si Conte Marmi. È Aurelio Uscia? |
| AURELIO |
| Io songo Aurelio Marmi. |
| SILVANO |
| Ah, ah, ah. |
| CARLOTTA |
| A che serve sto ridere? (a Silvano.) |
| AURELIO |
| Venga a mme sso birbante, |
410 | Che de lo nomme mio se va vestenno, |
| Venga, venga sso guitto, |
| Ca co le mmano meje, |
| Lo voglio fa smentì de quant’à ditto. |
| SILVANO |
| Ora vide che specie c’hà sto pazzo? (a Carlotta.) |
| CARLOTTA |
415 | Che pazzo? Non pò essere che chillo |
| Sia no Latro, e che chisto aggia raggione? |
| SILVANO |
| Ora vi’ la bonora! |
| CARLOTTA |
| Chisto m’hà genio assaje, già me nnammora. |
| SILVANO |
| Or io vao a chiammare |
420 | Chi m’hà dato le lettere. (trase.) |
| AURELIO |
| Chest’è la meglio cosa, che può fare. (a Silvano.) |
| Segnora sta desgrazia |
| Che mme succede, è degna |
| De compassione? o no? |
| CARLOTTA |
| (Che bella grazia!) |
425 | Ve compatesco tanto; |
| Che si maje chesta cosa |
| Non se mettesse nchiaro, |
| Io nn’avarria dolore. |
|
| SCENA XI |
|
| FELICE da parte, e li stisse. |
|
| AURELIO |
| Lloco no nce reparo. |
430 | Io songo Aurelio, io chillo |
| Destenato a recevere l’onore |
| D’esserve servo e sposo. |
| FELICE |
| (Ah ingannatore!) |
| AURELIO |
| Perché non responnite! ajemmè parlate! |
| Co chiarezza segnora; |
435 | E si genio non v’aggio, |
| Io mo’ lasso ogne mpegno, |
| E me nne torno à mettere nviaggio. |
| CARLOTTA |
| De chesto me reservo, |
| A parlarne dimano. |
| AURELIO |
| (Oh quanto è bella!) |
| FELICE |
440 | (Che nfammo! vo’ ngannare a mmene e a chella.) |
| AURELIO |
| A lo mmanco vorria, |
| Sentire da ssa vocca, |
| O la gran sciorte, o la desgrazia mia. |
| CARLOTTA |
|
| Te vedo, te sento, |
445 | Sospiro, e te dico, |
| Ca tu. (che tromiento!) |
| Non pozzo parlà. |
| Sbrogliato sto ntrico, |
| Cchiù meglio dirranno, |
450 | Sta pena st’affanno, |
| De te che sarrà. |
|
| SCENA XII |
|
| AURELIO, e FELICE. |
|
| AURELIO |
| Chesta pare che già pe me patesca. |
| FELICE |
| Siente nfammo pò essere, |
| Che sta mpresa che tiente, non te resca. |
| AURELIO |
455 | Che dice? (Oh confusione!) |
| FELICE |
| Io songo Aurelio, io chillo. (repreca le stesse parole d’Aurelio.) |
| Destenato a recevere l’onore, |
| D’esserve servo, e sposo. (Ah ingannatore!) |
| AURELIO |
| Ma io |
| FELICE |
| Chiude ssa vocca, |
460 | E resuorvete mo’, che buo’ che dica? |
| Ca si’Aurelio? Gnorsì, io lo dirraggio, |
| Ma porzì mostrarraggio |
| Li vigliette, che a me sgrato screviste, |
| Quanno fede me diste |
465 | De matremonio, e sposa. Vuo’ che dica |
| Ca si’ Alesandro? lo dirraggio, e tanno |
| Te scoprarraje pe no mpustore. Parla? |
| Che buo’ che faccia? |
| AURELIO |
| Oddio!... |
| Di’, ca songo ma no... sa che, buo’ dire? |
470 | (Io mme sento morire.) |
| Di’ ca non so’ sì parla, |
| Di’ ca songo Alesandro, |
| Ca so’ Aurelio, ca so’ no desperato. |
| Ca so’ n’arma de nfierno |
| FELICE |
475 | Sì penza a case tuoje, penzace sgrato. (trase.) |
|
| SCENA XIII |
|
| AURELIO, SILVANO, e CASIMIRO. |
|
| AURELIO |
| Ajmmè, che strano mbruoglio |
| È chisto addo’ me trovo? e che resolvo? |
| Io sto dinto a lo fuoco. |
| CASIMIRO |
| È fuorze chillo? |
| SILVANO |
| Appunto, eccolo lloco. |
| CASIMIRO |
480 | (Sciorte, jutame tu.) Ne patron mio? |
| Chi jate addimmannanno? |
| AURELIO |
| O appunto appunto a te vao cercanno. |
| Dimme a mme; tu chi si’? Comme te chiamme. |
| CASIMIRO |
| Quanta sodesfazione (a Silvano.) |
485 | Aggio da dà a no pazzo. |
| SILVANO |
| Agge pacienzia. |
| CASIMIRO |
| Io songo Aurelio Marmi |
| AURELIO |
| Tu Aurelio Marmi tu? |
| CASIMIRO |
| Sì mio Signore. |
| AURELIO |
| Ah briccone mpostore! |
| Si no stisse cca dinto; te vorria |
490 | Taglià ssa lengua |
| ,, E fa chillo strapazzo |
| ,, Che te mmierete. |
| SILVANO |
| ,, È pazzo? (a Casimiro.) |
| CASIMIRO |
| ,, È pazzo, è pazzo. (a Silvano.) |
| AURELIO |
| ,, Torname mo’ le lettere, |
| ,, E la valice mia. |
| CASIMIRO |
495 | ,, Vide addove t’è data la pazzia! |
| AURELIO |
| ,, A mme pazzia, a nfammo |
| ,, Vuo’ che a botta de Schiaffe |
| ,, Te faccia confessà, ca si’ no latro? |
| CASIMIRO |
| ,, A mme Schiaffe, a mme latro? chesta spata. |
| SILVANO |
500 | ,, Fremma, chiano. |
| AURELIO |
| ,, Pozzo vedere cchiù sciorte spiatata? |
| SILVANO |
| ,, Va te retira, craje |
| ,, Venute da la Caccia |
| ,, Li denare avarraje. (a Casimiro.) |
| AURELIO |
| ,, Che denare? Si’ pazzo Si Silvano? |
| SILVANO |
505 | ,, Carlotta è toja, e te nne do la mano. (a Casimiro.) |
| AURELIO |
| ,,Che dice? (a Silvano.) |
| CASIMIRO |
| ,, Io ve rengrazio, (a Silvano.) |
| ,, Ma si da chesta casa tu no sfratte, (a Aurelio.) |
| ,, Si pe bedè Carlotta |
| ,, Passe maje, da cca sotta. |
| SILVANO |
510 | Oddio che d’è? fermate. |
| CASIMIRO |
| Io briccone? Io mpostore? |
| Chi si’ tu, chi songh’io |
| Sapere te farrà sto vraccio mio. |
|
| Co la ponta de sta spata, |
515 | E lo sango de sso pietto; |
| Vedaraje cca nterra scritto, |
| Io chi songo,e chi si’ tu! |
| Sta mmenzione, ch’aje trovata |
| Non te resce birbo, guitto: |
520 | Levatenne da ss’appretto |
| Né penzarence maje cchiù. |
|
| SCENA XIV |
|
| SILVANO, e AURELIO. |
|
| AURELIO |
| Chest’è troppo Destino: Ah Si Silvano |
| De te stisso la mano |
| Tu non canusce? |
| SILVANO |
| (Vide che addimmanna?) |
| AURELIO |
525 | Che addimmanna! Te liegge; (le dà le lettere soje stesse.) |
| Vi’ so’ cheste le lettere |
| Che a lo Gnore aje tu scritto? È chesta vide |
| la mano propia toja? Fuorze non cride |
| A tte stisso? respunne? |
| SILVANO |
530 | Aimmè, chesto che d’è che mme succede! |
| AURELIO |
| Se crede a no birbante: (legge Silvano le lettere.) |
| E a n’ommo comm’a mme non se dà fede? |
| ,, Non dare passo nnante |
| ,, Co sso latro Silvano, |
535 | ,, Ca sott’a sto bastone |
| ,, Isso hà da confessà ch’è no briccone. |
| SILVANO |
| ,, Uscia faccia favore |
| ,, D’aspettà tutta craje: anze ve prego |
| ,, De venire co nnuje porzì a na caccia, |
540 | ,, Ch’avimmo preparata |
| ,, Ca po ssa cosa spero |
| ,, Priesto priesto vederela aggiustata. |
| AURELIO |
| Io nne voglio fa piezze. |
| SILVANO |
| Ah figlio mio |
| Pe mmo’ statte cojeto, |
545 | Lassalo ì, fa commo te dich’io. |
| AURELIO |
| A chi non me dà mpaccio, |
| Io fastidio non dongo, |
| Ma co sto malantrino, che pretenne |
| Ch’io sia stimato pazzo |
550 | Perché cerco d’avè le robbe meje; |
| Io nne voglio vedè chello che nn’eye. (trase.) |
| SILVANO |
| Ora vi’ la scajenza |
| Si potea fare cchiù? chisto mme pare |
| Che parla co raggione, |
555 | Ma chill’autro n’hà tuorto! ch’ confusione. (trase.) |
|
| SCENA XV |
|
| LIVIA, e BETTINA. |
|
| LIVIA |
| Donca sti duje Signure, |
| Che Carlotta pretenneno |
| Tu già pigliaste muolo, |
| Ca l’uno è pazze, o ll’auto è marejuolo. |
| BETTINA |
560 | Ma lo secunno, ch’è arrevato mone |
| Pare ch’aggia raggione! |
| LIVIA |
| Po’ esse ch’annevvine, |
| Ma a direte lo vero |
| Me pareno due belle malantrine. |
| BETTINA |
565 | Dice la verità; tutte li giuvene |
| Mo’ pare ch’anno perzo lo jodizio; |
| Perché bonno arrivare |
| Addo’ non ponno, e banno a precepizio. |
| LIVIA |
| Lassele fare; Ammore ch’è fraschetto |
570 | Se ncè vo’ piglià gusto co ssì tale. |
| BETTINA |
| Ma da po co lo tiempo |
| Le fa pagà nteresse, e capitale. |
|
| Ammore è peccerillo, |
| Pazzeja co chisto, e chillo, |
575 | Ma po no juorno sbota |
| E te le sciacca |
| Ma nce lo bo’ co chiste, |
| Perché so’ tanto triste, |
| Che ognuno se revota |
580 | Pe na tacca. |
|
| SCENA XVI |
|
| MACCHIONE, e li stisse. |
|
| LIVIA |
| O Macchione? Bettina torna siente, |
| Vi’ Macchione, addimmannale quaccosa. |
| BETTINA |
| Macchione mio, se vede veramente |
| Ca m’ame poco, o niente. |
| MACCHIONE |
585 | Poco ò niente? fa cunto |
| Ca me te magnarria |
| Comm’a na pizza doce. |
| LIVIA |
| Ma chi vo’ fa l’ammore |
| Abbesognante che regala e dona: |
590 | N’è lo vero Bettina? |
| BETTINA |
| Tanto bello. |
| MACCHIONE |
| Comm’io vuo’ che regala? |
| E tu a mme che me daje? |
| BETTINA |
| E che te voglio dà, te voglio bene. |
| MACCHIONE |
| E che buo’ ch’io te dia, te corresponno. |
| LIVIA |
595 | No no, p’essere amato |
| Abbesogna che spienne. |
| MACCHIONE |
| Ma si so’ allevrecato, |
| Che buo’ da me? na cufece? |
| BETTINA |
| Negr’isso poveriello! |
| LIVIA |
600 | No, dammole no poco de martiello. |
|
| La femmena vo’ bene |
| A chi le porta, e proje, |
| Chi frisole non tene |
| L’ammore non pò fa. |
605 | Può chiagnere, e pregare |
| Ca priediche a li gruoje, |
| Quanno non haje che dare, |
| D’ammore non parlà. |
|
| SCENA ULTIMA |
|
| MACCHIONE, e BETTINA. |
|
| BETTINA |
| Te ll’aje sentuto. |
| MACCHIONE |
| Addonca |
610 | Perché n’aggio denare |
| Chiù l’ammore co mmico non può fare? |
| BETTINA |
| Chest’è l’ultema usanza, agge pacienza. |
| MACCHIONE |
| Ma stace nn’uso puro |
| L’ammoreggià ncredenza, e te l’appuro. |
| BETTINA |
615 | Eh chi compra ncredenza |
| Semp’hà la peo robba. |
| MACCHIONE |
| Lassame te toccare a lo mmacaro |
| Co la pontella cca de sto detillo |
| Ssa mano. |
| BETTINA |
| Vattenne ca mo’ strillo. |
| MACCHIONE |
620 | Oddio |
| BETTINA |
| Ah mamma mia, |
| Venite cca (strilla forte.) |
| MACCHIONE |
| Che malor’hà Ussoria? |
| Testemmonia vosta, |
| Ca chesta s’è sonnata. |
| BETTINA |
| La mano m’aje toccata. |
| MACCHIONE |
| Maje tale cosa. |
| BETTINA |
625 | Ah, ah, ah (che scena curiosa.) |
| Sulo pe ssa parola |
| Te voglio fa scannare. |
| MACCHIONE |
| O maro mene, |
| Sia Betti’ no lo fare |
| Te guarde ll’arma. |
| BETTINA |
| Pe sta vota sulo |
630 | Io te perdono. |
| MACCHIONE |
| E mme vorraje cchiù bene? |
| BETTINA |
| Che bene si’ mpazzuto! |
| Io me spasso, co ttico, |
| E tu locco che si’; te ll’haje gliottuto? |
| MACCHIONE |
|
| Pe tte so’ cuotto. |
|
| BETTINA |
|
635 | Si’ no marmotto. |
|
| MACCHIONE |
|
| Pe tte so’ fritto. |
|
| BETTINA |
|
| Ruonto adderitto. |
|
| MACCHIONE |
|
| Pe tte so’ strutto. |
|
| BETTINA |
|
| Comme si’ brutto. |
|
| MACCHIONE |
|
640 | Si’ bella tu. |
|
| BETTINA |
|
| Co mmico tu. |
|
| MACCHIONE |
|
| Pe tte me strujo. |
|
| BETTINA |
|
| Ed io te fujo. |
|
| MACCHIONE |
|
| Pe tte pazzejo. |
|
| BETTINA |
|
645 | Ed io pazzejo. |
|
| MACCHIONE |
|
| Bettina mia, |
| Non pozzo cchiù. |
|
| BETTINA |
|
| Arrassosia |
| Non ne fia cchiù. |
|
|
|
|