La Ciulla

La Ciulla, Napoli, Agnolo Vocola, 1728

a cura di Giuseppe Castagna

paratesto ATTO PRIMO ATTO SECONDO ATTO TERZO Apparato

ATTO PRIMMO

SCENA PRIMMA

MARCONE, e NARDO mmocca a la Taverna.

A DUE

Venga, chi vo’ scialà

Allerta oje cannacchiune:

No po’ de trippa è lesta:

Mo’ metto la menesta:

Stofato, e maccarune

Nn’avimmo nquantetà.

Venga, chi vò scialà.

MARCONE

E biva, e biva Nardo.

NARDO

Mo’ mone vedarraje

Li sciaqquante, e sguazzune

Venire a ’lengua ncanna a buonecchiune.

MARCONE

Orsù fegliule, è tardo: (parla dinto.)

Mo’ vedarrite chiena ssa Taverna.

Vota l’arrusto; oje cuoco

Sso pegnato coverna,

Non fa mancà lo ’fuoco a lo tejano.

Priesto la scopa mmano,

Scopate buono nterra:

Ncigna ssa mangiaguerra, oje cacciavino.

NARDO

Si Patro’? lo festino

De lo nguadejo de figleto,

Pe quanno s’è appontato?

MARCONE

Sarrà pe tutta craje.

Ma tu non saje, ch’io puro so’ nsorato?

Che ’dice?

NARDO

All’ora ’bona

(Mò’ che ncapo te miette na corona!)

Ma dimme prita toja

De sso nguadejo che ’faje

Figleto nne sta ntiso?

MARCONE

E tu non saje

Catammaro, cetrulo

Ca figlemo è nzorato,

E Lisa pe mogliere l’aggio dato?

E po lo ’fare, e sfà stace a mme sulo;

Figliemo che mme mporta? manco sale;

Vuoje che te dica.

NARDO

Sì.

MARCONE

Si’ n’anemale.

NARDO

Lo Cielo te nce dia.

Forza, figlie, e contiento.

Ma la Zita, chi è?

MARCONE

La Zita; è la ’malan che di te dia.

Mme si’ no frusciamiento,

La capo mm’aje storduta.

NARDO

Ca lo dice che d’è?

MARCONE

Ciulla è mogliere a mmene ll’ajo scomputa.

NARDO

Ciulla! la schiava toja?

MARCONE

Sine sine.

Chella bella faccella.

Chella nennella bella.

Chillo schiecco d’ammore.

Chella ch’è la Reggina de sto core.

NARDO

(Uh! trippa a li morsiente!)

Io menn’allegro.

MARCONE

Via

Vattenne a la taverna, e chiamma gente.

NARDO

Venga, chi vo’ scialà;

Allerta; oje cannacchiune:

No po’ de trippa è lesta:

Mo’ metto la menesta.

Stofato, e maccarune

Nn’avimmo nquantetà.

Venga chi vo’ scialà.

SCENA II

MARCONE, e COLA.

MARCONE

O viatisso, chi non sente ammore!

Veo ca, n’aggio arrecietto,

Da che ’me nnammoraje...

COLA

Tata; bonnì te venga.

MARCONE

E addove vaje?

COLA

Vorria (ma chi lo ’sape

Si la sciorte lo ’bole)

Spassareme no poco;

Ca sto chino de pene, a ’buonecchiune.

E ’borria fa

MARCONE

Nocchiune

Siente a mmene; sso fuoco,

Che t’abbruscia lo pietto,

Mo’ mo’ s’astutarrà.

COLA

De che manera.

MARCONE

Tu pe tutta stasera

Avarraje arrecietto.

COLA

Lo bbolesse lo cielo,

Che mme potesse arreposà no poco.

So’ no piezzo de jelo;

Stongo dinto a lo fuoco.

So’ no nzierto de guaje,

Tata non pozzo cchiù.

MARCONE

Figlio, che d’aje?

Qua pena te da mpaccio?

Qua trommiento t’affanna?

Qua affanno te trommenta?

Quale so’ ssi dolure?

COLA

Io no lo saccio.

MARCONE

Leva chess’ammoina.

Grelleja allegramente.

Ca già l’ora è becina...

COLA

Ahjemmè!...

MARCONE

Si’ nzallanuto, o non ce siente?

Dico, ca la sia Lisa mo’ mo’ vene

Pe ’fare na scialata a sto ciardino.

COLA

E che mme mporta chesto!

MARCONE

Po nuje tanno lo riesto

Appontarrimmo meglio,

E lo nguadejo farrimmo

Tu co Lisa, io co Ciulla scialarrimmo.

Che ’serve ca chiagne,

Ca strille e te fragne;

No stare chiù affritto,

Sopporta, sta zitto,

E spera a lo Cielo,

Ch’avimmo a gaudè.

100

Io puro mme sento,

Ca n’aggio cchiù abbiento:

So’ fatto no jelo:

No piezzo de jaccio.

Ca chiagno che faccio?

105

Ca strillo che d’è?

SCENA III

COLA sulo.

COLA

E comme potarraje

Zoffrì tanto dolore,

A core affritto; o annegrecato core.

Si l’affanne li guaje:

110

Li delure; li stiente:

Le ’gelosie; le ’pene:

Li fpaseme; e trommiente

Chiovono ncuollo a mmene, a Cielo apierto. (s’appoia a no pizzo.)

SCENA IV

CIULLA, e lo stisso da banna.

CIULLA

Marcone crede cierto

115

Ch’a mme s’ha da pegliare;

Ma lo core mme dice

Ciulla spera chi sa.

COLA

(Ahjemmè nfelice!)

CIULLA

(Cca sta la gioja mia! cca sta lo core!)

COLA

Chi mme conzolarrà?

CIULLA

Chi pe tte more.

COLA

120

Ciulla mia, damme ajuto,

Ca pe tte...

CIULLA

Core mio

COLA

Io già so’ ghiuto.

CIULLA

Che d’aje? parla, spapura.

COLA

Te perdo nenna mia.

CIULLA

N’avè a paura.

COLA

Mo’ Patemo m’ha ’ditto

125

Ca Lisa mme vo’ dare,

Ca isso vole a tte.

CIULLA

Non dubbetare.

Quanno lo mare abbenta;

Lo Sole n’ha sbrannore;

Tanno de te sto core

130

Se potarrà scordà.

Qua pena te trommenta?

Si nne puoje sta securo,

E ’te responno puro,

Caro non dubbetà.

SCENA V

COLA sulo.

COLA

135

Tu parte Ciulla, mia, Ciulla tu parte!

E lasse chisto core

Nfra dubbejo, nfra speranza, e nfra dolore.

Chi sa, si sarraje mia?

Chi sa, si t’avarraggio?

140

Ah! ca la gelosia

Sempe se fa sentì de no lenguaggio.

So’ da cchiù ’biente

Varca sbattuta;

Né chi mm’ajuta

145

Trovà se pò.

Già cresce ll’onna

De li trommiente,

Già mme zeffonna

Perzo mme vo’.

SCENA VI

ZEZA co lo tammurriello, MENELLA co le castagnette, e LISA.

ZEZA

150

O lo bello conzierto! che farrimmo.

LISA

Gran gusto nce sarrà, quanno nc’è Cola.

MENELLA

Si te lo ’credo cierto.

LISA

Ncignammola da mo’. (a Menella.)

ZEZA

Zitto fegliola.

MENELLA

Comme si’ pontegliosa! (a Lisa.)

ZEZA

155

E n’auta voto mo’?

LISA

Quanto è sostosa

Non aje propeo creanza. (a Menella.)

ZEZA

Via scompitela mone.

MENELLA

(Uh! ca mo’ schiatto.)

Siente a mme; la valanza (a Lisa.)

Tu no la tiene justa;

160

Tore, pe tte speresce.

Tore, pe tte patesce.

E tu...

LISA

Menella mia mme si’ na susta.

MENELLA

E tu despriezze a Tore,

E ’baje appriesso a Cola;

165

E de lo fa nn’aje core?

ZEZA

Oje fegliola: fegliola.

Vi’ ca vene Marcone; leva mano (a Menella.)

MENELLA

Non parlo cchiù so’ lesta.

A non di’ na parola nfi’ a dimano.

SCENA VII

MARCONE, NARDO co lo calascione, e le stesse.

MARCONE

170

E qua fortuna è chesta

Sia Lisa; sia Menella, Zeza mia.

Avere io mo’ vorria

Na cosa de segnore

Pe ’farve compremiente.

LISA

175

Vafta sso bello core.

Nuje non volimmo niente.

MENELLA

Ssa grazea va’ no schiavo.

ZEZA

Viva lo sio Marcone!

NARDO

O ’bravo, o bravo!

MARCONE

Porta cca sso stromiento

180

Nardo; e curre de pressa,

Addo sorema Cicia, e chiamma Ciulla,

E torna cca cod’essa.

Non ghì treccano; vola

E mo’ che passe, dà na voce a Cola.

NARDO

185

Mo’ vao, veccome lesto.

LISA

Si curre, va l’avisa.

NARDO

Gnorsì: (è propejo bona ssa sia Lisa). (se nne vace.)

MARCONE

Vuje fegliole, nfra tanto,

Ve potite spassà, pe sto ciardino. (vanno tutti dinto a lo ciardino.)

SCENA VIII

TORE, e li ditte.

TORE

190

Quanto te ntenno, e quanto

Te canosco, chi si’ fauzo destino.

LISA

Ch’aje trovato; Menella? (Menella s’accosta addo Lisa.)

MENELLA

Vide sia Lisa mia

Na bella lacertella.

ZEZA

195

Na lacertella ne? tienela forte.

TORE

Ma vecco Lisa mia,

Chella, pe cchine campa, pe cchi more

Sto core affritto, e sto scasato core.

Signure, ve so’ schiavo. (s’azzecca.)

MARCONE

200

Sio Tore: bemmenuto,

Te nce voglio a sto spasso.

TORE

Ve sarraggio fervenno... Si no passo

Tu daje o Lisa mia, io te so’ appriesso. (chiano a Lisa.)

MENELLA

Lo bbide, ca pe tte, mo’ more ciesso.

MARCONE

205

Zeza, pe cortesia

Canta na canzoncella.

ZEZA

Ve servo sio Marcone

MARCONE

E abballarà Menella.

MENELLA

Signorsine.

LISA

Via Zeza va decenno

210

Su: na bella canzona. (a Marcone.)

ZEZA

No ceccone ncignammo. Sona.

MARCONE

Sona.

ZEZA

Saporetella mia, saporetella

Che spasso, e gusto che te voglio dare.

Si’ aggrazejata, si’ freccecarella.

215

Na bona sciorta non te pò mancare.

LISA

E brava ssa canzona?

MARCONE

Va quanto va’ no schiavo.

TORE

Cierto ch’è stata ’bona.

MENELLA

E ’biva, e ’bravo.

SCENA IX

NARDO co na cocozza, CIULLA, li stisse, po COLA.

NARDO

Vecco cca la sia Ciulla.

CIULLA

220

Scusateme sia Lisa, sia Menella.

Si mme so’ ntrattenuta.

LISA - MENELLA

Sinche sia Ciulla mia, la ’bemmenuta.

MARCONE

Viva voccuzza bella!

Aje ditto propejo bravo.

COLA

225

Io porzì mme ve ’ncrino.

LISA

(Core mio)... (Lisa a Cola.)

COLA

(Ciulla bella)... (Cola a Ciulla.)

TORE - ZEZA - MENELLA

Schiavo.

COLA

Schiavo.

MARCONE

Nzeccate cca ’becino. (a Zeza.)

NARDO

Scialammo; allegramente.

ZEZA

Via priesto, a la conzierto, oje bella gente.

LISA

230

Ncigna lo sio Marcone.

MENELLA

E nnuje cantammo appriesso.

NARDO

Dalle co sso taccone

Ca io sono sto fravuto. (a Marcone.)

TORE

(Già resto ciesso.)

COLA

(Io già so’ ’nzallanuto.)

CIULLA

235

Priesto.

MARCONE

No rescegnuolo

Pe ve servire, addeventà vorria.

MENELLA - LISA - MARCONE - ZEZA

Sta jornata sarrà la gioja mia.

COLA - CIULLA - TORE

Sta jornata sarrà la morte mia.

MARCONE

Miettete la scarpetta

240

E miettetela mo’.

TUTTE

Miettete &c.

MARCONE

Si no chisso pedillo

Nenna mia, fe pò allordà.

TUTTI

Si no. &c.

MARCONE

245

La scarpetta... (mente se canta Cola vace a piglià no sciore.)

TUTTI

La scarpetta.

MARCONE

Miettetella.

TUTTI

Miettetella.

MARCONE

Nenna cara, nenna bella

No mme fa cchiù penejà.

TUTTI

Nenna &c.

LISA - MENELLA - ZEZA

250

Viva Marcone.

NARDO - CIULLA - TORE

E ’biva.

MARCONE

Scusate, ca non saccio

Dicere meglio.

TUTTI

E ’biva.

MARCONE

Sta mmiezo a tanta quaglie, mme dà mpaccio.

COLA

Ciulla mia, chisto sciore

255

Miettete mpietto e penza, (nfra loro.)

Ca spine sempe da la rosa, e ammore.

LISA

Che ’beo, mo’ na scajenza

Mmattere nce farraggio.

MARCONE

Accossì s’è appontato. (a Zeza.)

LISA

260

Porta sto schiore cca.

ZEZA - MENELLA

Che d’è?

MARCONE - NARDO - TORE

Ch’è stato.

LISA

Po di’ a chell’arma sgrata,

Ca Lisa pe ’despietto (a Ciulla.)

Sfronna ssa rosa; e nterra la sbalanza;

Dille, ca le vorria straccià lo pietto;

265

E dille che se mmezza de crejanza.

CIULLA

Chiano no cchiù, non tanto.

TORE - MARCONE - NARDO

Sapessemo, che d’ è?

ZEZA - MENELLA

Tu si’ no ncanto. (a Lisa.)

LISA

Fauzo, crudele, sgrato;

Ccossì se tratta ne? (a Cola.)

COLA

270

Mussillo nzuccarato

La gioja mia tu si’. (a Ciulla.)

TORE

(Oh Dio! so desperato.

Cielo fa tu pe mme.)

CIULLA

No sciore, che mm’ha ’dato,

275

Te face sta accossì? (a Lisa.)

COLA - CIULLA

Vedereme patire,

Affritto,

Affritta,

E lo ’puoje fare ne?

TORE - LISA

280

Mme voje vedè morire

cana di’. (Tore a Lisa.)

Dimmello

cano di’. (Lisa a Cola.)

SCENA X

MARCONE, ZEZA, MENELLA e NARDO.

MARCONE

Chesso che d’è?

MENELLA

Ch’è stato? (a Zeza.)

ZEZA

Io mme vedo confosa! (a Nardo.)

NARDO

Ed io mbrogliato.

MARCONE

Chi se nfada, chi chiagne,

285

Chi strilla, chi se fragne,

Sapisse lo perché? (a Zeza.)

ZEZA

’Saje niente tune?

MENELLA

Nardo lo ssa... (a Menella.)

NARDO

So’ pazze abbuonecchiune.

MARCONE

Dice buono lo mutto,

Ca dopo’ lo contiento,

290

Vene lo chianto, e sconceca lo ttutto.

ZEZA

È ’bero chesto lloco

MARCONE

Ah! ca non pozzo cchiù, cresce lo ’fuoco.

ZEZA

E quale è lo trommiento,

Che te nfada accossine?

MARCONE

295

Tu si’ propeo redicola.

Nne vuoje fa anchire tutte sse bbecine.

Io pe Ciulla mme sfrecolo

M’afferra tiro, e ’panteco,

So’ chino de campiseme.

300

Malanne, e parafiseme.

So’ fatto miezo stuoteco

Sto pe mmorire tiseco

Songo a fatto storduto.

NARDO

(Benemio bella storeja.)

MENELLA

(È già mpazzuto.)

ZEZA

305

Chiano, non tanta fureja;

Siente no poco, siente,

Io puro sto a ssi guaje.

MARCONE

Tu puro nnammorata?

ZEZA

E che nce faje.

310

Si tu peccije, io chiagno.

Si tu chiagne, io m’arraggio

La rezza mme la magno,

Repuoso cchiù non aggio.

Sto mmiezo a li delure;

315

E chello ch’è lo peo,

Nuje nnammorate scure,

Non asciammo pietà, pe ’quanto veo.

MARCONE

De chi si’ nnammorata?

ZEZA

De ssa faccella bella, nnargentata.

MARCONE

320

O che te vaa no cancaro

Brutta vecchia ’mardetta.

ZEZA

Puozze morì de subeto

Viecchione scontrafatto.

MENELLA

O la bella pareglia!

NARDO

325

Via levate ssa joja.

Tu si’ la terrejaca; e tu l’aloja.

ZEZA

Siente cca. siente cca.

MARCONE

Da me, ch’ ’buoje

Lassame ghì co li malanne tuoje. (se nne vace.)

SCENA XI

ZEZA, NARDO, e MENELLA.

ZEZA

Va te rumpe lo cuollo, viecchio sfatto.

330

S’era miso ngrannezza...

NARDO

Che nce faje.

MENELLA

Oje Zia de sso vecchione

No nne parlare cchiù si mme vuoje bene.

MARCONE

(Mme pare ca la ntenne!)

ZEZA

(Ma ascimmo da sso ntrico.) (a Nardone.)

335

Tu furrisse pe mmene;

Che dice?

NARDO

Co chi ll’ave? (a Menella.)

MENELLA

L’ha co ttico.

NARDO

(Spassammoce tantillo.)

O vruoccolo scioruto...

Nennella mia, nennella...

ZEZA

340

Mussillo mio, mussillo.

Mme voje?

NARDO

So’ rresoluto.

Si’ lesta

ZEZA

So’ ’lestissema ll’aje ntiso.

NARDO

Ma io non voglio a tte.

ZEZA

Che fusse acciso...

Tu mo’, te lo credive,

345

Ca chest’arma pe tte stava speruta.

NARDO

(E mmanco l’ha scomputa!)

ZEZA

E perzò mme decive

Non voglio, e sto partito,

Era ’buono pe ttene,

350

Ca a mmene non ’me manca lo marito.

Mo’ che songo resoluta,

De pigliareme marito,

Chi mme vo’, ch’auze no dito, (verzo Nardo.)

Vide vi’, che te nne pare!

355

Tutte quante so’ cioncate,

Non c’è nullo, che mme vo’.

E perzò Menella mia

A tte ’boglio mmaretare.

Chi te vole, che sternuta. (Nardone sternuta.)

360

Oh: saluta... sarva uscia;

Tutte stanno acciammorrate!

Ll’aggio ntiso, no cchiù mmo’.

SCENA XII

NARDO, e MENELLA.

MENELLA

Che tte pare Menella?

La vuoje cchiù grazejosa.

MENELLA

365

Cierto, ch’è cosa bella, ed è gostosa.

NARDO

Ora nuje, che facimmo?

MENELLA

E che avimmo da fare,

Vallo decenno su.

NARDO

Mo’ lo ddecimmo.

Tu mme puoje conzolare.

MENELLA

370

(Già sse vace scoprenno.)

NARDO

Io, e tu simmo duje

Non saccio si mme pische.

MENELLA

Io non te ntenno.

NARDO

Se vede ca si’ nzemprece; aggio ditto,

Ca tu ntretella mia

375

Mme faje ascevolire.

Oh... sie’...

MENELLA

Si pazzo ne?

NARDO

Curre

MENELLA

Che ’buoje da me, lassame ghire.

NARDO

Vi’ ca tu mme faje esse presentuso.

MENELLA

Birbante schefenzuso

380

Pigliate chisso, e fguazza. (le dà no schiaffo.)

NARDO

Bon’ora amme no schiaffo mala razza.

MENELLA

E si n’abbasta chesto

Vieneme attuorno, ’ch’avarraje lo riesto.

NARDO

Saje, che dice, chi ntenne;

385

Na mano quanno è ghianca, non affenne.

Manella bella,

Mm’ha addecrejato,

Sto schiaffetiello,

Che tu mm’aje dato.

390

Si mme vuoje bene

Nzeccate a mmene

Dammenne cchiù.

Da cca nzi’ a craje,

Dà sempe schiaffe

395

Zuffete, zaffe,

Ca si lo ffaje

Io so’ contento,

De n’avè ciento.

Contale tu.

SCENA XIII

MENELLA sola.

MENELLA

400

Va va colanno ’buono

Brutto puorco sedunto.

Tiente, che smorfeja bella!

Trovate chiuso, e pierdete st’accunto.

Ch’era pazza Menella,

405

Che se volea piglià no vozzacchione,

No ntontaro nzertone.

N’arreme nnante, ca te vengo appriesso.

E non si’ muorto ciesso.

Io voglio lo marito aggrazejato,

410

Che sia ’bello, vezzarro, e stia mporpato.

Sì songo fegliola,

Non songo sciaurata,

So’ stata a la scola,

Sto ’bona mparata,

415

E n’ommo a lo ’bisco,

Lo saccio ncappà.

Pe ’fare l’ammore

Nce vo’ no squasillo,

E dicere core,

420

Mo’ a chisto, mo’ a chillo;

Mo’ gioja, mo’ bello,

Ca comm’a n’auciello

Se jetta a lo bisco,

Ne ’pote scappà.

SCENA XIV

TORE, e LISA.

LISA

425

Quanta trommiente, e guaje,

O Cielo puoje mannare a na fegliola.

TORE

Lisa mia, tu che d’aje?

Sienteme a lo ’macaro na parola.

Saccie...

LISA

No cchiù; la sciorta...

TORE

430

Mme connanna a morì?

LISA

No: a mme vo’ morta.

TORE

Morta te vo’ e pecchene?

LISA

Perché mme va strobbanno li contiente.

TORE

No, vole muorto a mmene,

Pocca mme va crescenno li trommiente.

LISA

435

Avit’autro, che di’?

TORE

Sacce, ch’ammore

Mm’abbruscia chisto core.

E pe ttene...

LISA

No cchiù; vasta accossì.

TORE

Non vide, ca so’ ghiuto.

Lisa mia.

LISA

Tu che ’buoje?

TORE

Confuorto ajuto,

440

Piatà pocca pe tte mme vao strujenno,

Pietà d’uno, che more

LISA

Io non te ntenno.

TORE

Cara chiss’uocchie belle,

Che so’ doje vive stelle

Mme strujeno sto core.

445

(Tu, che lo ssaje ammore,

Parlale tu pe mme.)

Te parlano pe mmene

Li chiante, e li trommiente.

O cana, e tu non siente,

450

E agghiugne pene a ppene,

È buono chesto ne?

SCENA XV

LISA sola.

LISA

Qua tempesta d’affanne,

Nfra no maro de pene,

Co lo viento de nganne

455

Se sceta ncuollo a ttene

O core desperato;

Si ajuto tu non aje, si’ già ’barato.

N’è stato Cola chillo, che lo sciore

Donaie a Ciulla?... è ’bero.

460

Addonca isso è nno sgrato, e tradetore.

Che nne dice, Oh! penziero?

Ah! ca n’aggio cchiù senzo

Veo, ca mme mbroglio cchiù, quanto cchiù penzo.

Nfra tanto affanno; oh Dio!

465

Chi mme soccorrarà?

Povero core mio

Non c’è pietà pe tte.

Da n’ommo tradetore,

Che ’pozzo cchiù sperà!

470

Che spero cchiù ’bedè?

SCENA XVI

MARCONE, e CIULLA.

MARCONE

O Ciulla, ecco lo juorno,

Che pazzejanno ammore,

Già vola da cca a tuorno,

Tutto chino de grazeje, e de sbrannore.

475

Chesta è chella jornata,

Che accocchià nce dovimmo.

CIULLA

(O Ciulla sbentorata.)

MARCONE

E chine de dellietto, scialarrimmo.

Na cosa mme despiace.

CIULLA

480

Qual è?

MARCONE

Ca li contiente,

Cola mme va ’strubbanno.

CIULLA

E comme?

MARCONE

Siente.

Tu lo ssaje, ca co Lisa

Isso ha da nguadejare.

CIULLA

Lo ssaccio. (o maramene!)

485

E mmo’, che d’è?

MARCONE

Che d’è! no lo bbo’ fare.

Ma vecco llà... mo’ vene, e non m’ha ’bisto;

Io ccane m’annasconno;

E azzò faccia lo nguadeo

490

Prealo tune.

CIULLA

(Ahimmè che mbruoglio è chisto!)

SCENA XVII

COLA, e CIULLA.

COLA

Ciulla mia...

CIULLA

Cola siente

Vedarraje sta jornata

Nfra gusto, e nfra contiente

Ciulla; e Marcone...

COLA

Sine

495

Te vedarraggio a ’patemo accocchiata.

CIULLA

Tu vedarraje vecine

Doje sciaccole allommate ed una sciamma.

COLA

Che ’bedarraggio cchiù?

CIULLA

(Cierto non m’ama!)

Io porzì vedarraggio

500

Lisa, e Cola gaudere (ah non sia maje.)

Vedarraggio de cchiù.

COLA

Che ’bedarraje?

Mme vedarraje de scuoglio

De Lisa alli lamiente.

CIULLA

Pateto accossì ’bole.

COLA

Ed io non voglio.

505

(O tradetora!)

CIULLA

Siente

Te preo si mme vuoje bene,

Non mme strubbà lo gusto de sto pietto.

COLA

(Fegnarraggio di sine pe ’despietto.)

Già, che la voglia toja, o Ciulla, è chesta

510

Io già so’ rresoluto

Lisa da mme pigliare...

SCENA XVIII

MARCONE e li stisse.

MARCONE

E Lisa è lesta.

Lo matremoneo, è fatto;

Lisa è pe tte.

COLA

Qua Lisa... ahiemmè... mo’ schiatto.

Tata si tu sapisse

515

L’affanno de sto core;

De me tu n’havarrisse

Na stizza de piatà.

Ma si mbe’ da mme vuoje

Conzuolo a sto dolore,

520

Manco tu fa lo ’puoje;

Perché non me saje ntennere,

Né io pozzo parlà.

SCENA XIX

MARCONE, e CIULLA.

MARCONE

Lo fovierchio contiento l’ha stonato.

Allegramente Ciulla, allegramente;

525

Lisa è ’pe Cola, tu si’ ’pe mmene.

CIULLA

A! sgrato.

MARCONE

Che d’è? tu si’ strodduta, o non ce siente?

S’è accordato te dico; e ’pe tutt’oje

Nuje lo nguadejo facimmo;

O me nne faje vottà li vische tuoje?

CIULLA

530

Gnorsì ntiso l’avimmo.

MARCONE

E perché staje ngrognata?

CIULLA

Penzo

MARCONE

Che pienze che?

CIULLA

So’ ’desperata.

Penzo, ca chiagne

La palombella;

535

Si lo palummo,

L’ave lassata;

E comm’a chella...

Oh Dio! no cchiù.

E si se fragne

540

La sbentorata,

Io mme consummo...

Penzalo tu.

SCENA XX

MARCONE e po NARDO, e po ZEZA,e MENELLA.

MARCONE

Ente che percopia!

Non parlarria accossì no dottorone.

545

Va e penza lo mmalan, che di te dia.

NARDO

Fa facce fio Marcone.

MARCONE

Lazarone frustato,

E che creanza è chesta?

NARDO

N’è niente, aggio abburlato, (già se mpesta.)

MARCONE

550

Schefenzuso catammaro, nzertone,

Mo’ te voglio agghiustare lo jeppone. (va a piglià na mazza.)

NARDO

Vi’ quanta nne decite...

Uh bonora la mazza.

Gente ajutate cca.

ZEZA

Che d’è?

MENELLA

Che avite?

MARCONE

555

Sso guattaro, sso smocco, malarazza... (a Nardo.)

NARDO

Gnornò ssa coccovaja...

ZEZA

Chesso, che bbene a ddi’; leva ssa baja.

MENELLA

A Zia, che nne vuo’ fare de ssi mpacce.

ZEZA

Voglio sapè ch’ è stato? (Zeza leva la mazza a Marcone e la jetta.)

MARCONE

560

Aggio mannato no malanno nviento

NARDO

Ed io nce ll’aggio rebbattuto nfacce.

ZEZA

Via scompitela mone. (caccia lo cortiello e Zeza lo tene.)

MENELLA

Tienelo Zia mia vi’ lo cortiello.

Si’ sopierchio Nardullo.

NARDO

565

Lassame ghì Menella, (vo’ caccià lo cortiello e Menella lo tene.)

Ca mo’ caccio lo mio, e la fenesco.

ZEZA

Stipa su lo cortiello (Marcone stipa lo cortiello.)

Lassalo ghì a sso guitto.

MARCONE

Pe tte lo ffaccio.

NARDO

Io pe ll’ammore tuio

570

Non te lo smerzo comm’a ’manechitto.

MARCONE

Schefienzea mbreacone...

ZEZA

Vozzacchio, vastasone... (a Nardo.)

MENELLA

Vecchione sgavenato... (a Marcone.)

NARDO

Vecchiumma scontrafatta...

A QUATTRO

575

Arraggia, crepa, e schiatta.

ZEZA - MENELLA

Me nn’aggio da pagà.

NARDO - MARCONE

Redimmoncenne ah! ah!

ZEZA

Campierchio malenato... (a Nardo.)

MARCONE

Verruta trevellessa... (a Menella.)

MENELLA

580

O maro te scasato... (a Marcone.)

NARDO

O mara te sberressa...

MARCONE - ZEZA

Te voglio conzolà.

NARDO - MENELLA

Redimmoncenne ah! ah!