| | |
| | |
| | La Ciulla, Napoli, Agnolo Vocola, 1728 |
| | a cura di Giuseppe Castagna |
| |
| |
| |
|
| |
| | ATTO III |
| |
| | SCENA I |
| |
| | LISA, e ZEZA da la casa parlanno dinto. |
| |
| | LISA |
| | Quanno te straccquarraje sciorte mmardetta |
| | De dareme trommiente abbuonnecchiune; |
| | Scumpela scumpe mo’, scumpe, nocchiune. |
| | ZEZA |
| 1210 | Lassa sta la cauzetta, |
| | Sbrigame sso felato; ch’io mo’ torno; |
| | Sta attiento vi’... |
| | LISA |
| | La scomperraje no juorno? |
| | ZEZA |
| | Sia Lisa mia, che d’è? staje marfosella; |
| | Staje de malo colore, |
| 1215 | Parla voccuzza bella. |
| | LISA |
| | Ah, ca sento sto core |
| | Tutto fuoco, e ferute, e abbampa, e allumma, |
| | Ca sta mmiezo a le pene, e se consumma. |
| | Pato pe ’Cola, oh! Dio! |
| 1220 | Né lo move a piatà, lo chianto mio. |
| | ZEZA |
| | Sta allegramente, e lassa fa a lo Cielo. |
| |
| | SCENA II |
| |
| | TORE, e li stisse. |
| |
| | TORE |
| | Si’ ’de vreccia, o de jelo, |
| | O Lisa, che non siente |
| | Li chiante, e li lamiente |
| 1225 | D’uno, che pe tte mmore; |
| | Parlo co ttico; aje core, o non aje core? |
| | ZEZA |
| | (O la bella canzona!) |
| | TORE |
| | E mmanco mme respunne? |
| | LISA |
| | Ora mo’ sona! |
| | TORE |
| | Donca accossine, o perra |
| 1230 | Respunne a chi te chiamma? |
| | E buoje vedè cca nterra |
| | Muorto ciesso cadere uno, che t’amma? |
| | Puoje vedè sto fraciello? |
| | LISA |
| | Campa, ma no pe mmene. |
| | ZEZA |
| | (O poveriello!) |
| | LISA |
| 1235 | Non c’è pe tte na stizza de piatate, |
| | Scumpe, scumpe, no ’chiune... |
| | TORE |
| | La puoje scompire tune, |
| | Co ttanta canetate |
| | ZEZA |
| | Sio Tore agge pazienzeja; |
| 1240 | Sia Lisa... |
| | LISA |
| | E già concruso; |
| | ZEZA |
| | Non tanta contenenzeja! |
| | TORE |
| | Piatà, bella piatà. |
| | ZEZA |
| | (Comm’è pecciuso.) |
| | TORE |
| | E si piatà non siente |
| | D’uno che pe tte mmore: |
| 1245 | O lo core aje de vreccia, o non aje core! |
| |
| | Armata de sdigno, |
| | O bella spiatata, |
| | Chi t’amma fedele, |
| | Tu fuje, e pecché? |
| 1250 | Chest’arma n’abbenta, |
| | Pe chi la trommenta; |
| | Tu spriezze crudele, |
| | Chi more pe tte. |
| |
| | SCENA III |
| |
| | LISA, e ZEZA. |
| |
| | ZEZA |
| | Sia Li’? votta sse mmescole, |
| 1255 | Li nnammorate a tommola, |
| | Te chiovono bbon’ora. |
| | LISA |
| | Cola mio, ddove si’? non spunte ancora? |
| | ZEZA |
| | E no cchiù mmone, scumpela, |
| | Ch’è briogna, diaschence! |
| | LISA |
| 1260 | Ah Zeza si sapisse, |
| | Perché mm’affrio, e chiagno, |
| | È cierto, c’accossì non parlarrisse. |
| | ZEZA |
| | Lo ssaccio, e me nne fragno; |
| | Tu pe Cola te sfricole, |
| 1265 | Già mme ll’aje ditto. |
| | LISA |
| | Sine. |
| | ZEZA |
| | E ’saccio, ca porzine |
| | Chillo pe Ciulla spanteca! |
| | LISA |
| | Cossì non fosse (ahiemmè.) |
| | ZEZA |
| | Donca saje tune, |
| | Ca chillo non te vole? |
| | LISA |
| 1270 | Ah! ca troppo lo ssaccio. |
| | ZEZA |
| | E che ’buoje cchiune; |
| | Si’ ’pazza a quatto sole, |
| | Si a Tore non vuoje ’bene; |
| | Ca Cola sore mia, non sta pe ttene. |
| | LISA |
| 1275 | Canosco ch’è no sgrato; |
| | Sì: canosco, ca Cola è tradetore: |
| | Ch’è no core mperrato; |
| | Ma dinto a chisto core, |
| | Ch’è tutto fuoco; oh Dio; |
| 1280 | Lo retratto nce sta, de Cola mio. |
| |
| | SCENA IV |
| |
| | ZEZA, e po MARCONE, che caccia NARDO da la Taverna. |
| |
| | ZEZA |
| | Uh quanto fa l’ammore, |
| | Quanta pene nce dà sso cecatiello! |
| | E le ’prova sto core poveriello. |
| | Ma a chessa ch’è ncocciosa nce lo bbole! |
| | MARCONE |
| 1285 | Va vattenne a mmalanno, |
| | O te faccio zompà tutte sse mmole; |
| | Quanno t’abbie, quanno |
| | Te lo rumpe lo cuollo lazzarone? |
| | ZEZA |
| | (Sento strellà Marcone.) |
| | NARDO |
| 1290 | Vecconce cca: va buono, |
| | Nc’è autro de lo ’buosto? |
| | ZEZA |
| | Ih! comme pare bello. |
| | MARCONE |
| | Sfratta, sfratta da ccane, facce tuosto. |
| | NARDO |
| | Tune nce curpe Zeza, a tutto chesto. |
| | ZEZA |
| 1295 | Tu propeo, mme faje ridere. |
| | NARDO |
| | Me nne vao? che facimmo? |
| | MARCONE |
| | Abbia suzzo schefienzea. |
| | NARDO |
| | Mo’ troppo m’aje frusciato, |
| | E mme la faje scappare la pacienzea. |
| | ZEZA |
| 1300 | No cchiù malecreato. |
| | MARCONE |
| | Che bbuoje, che te ncotogna! |
| | NARDO |
| | Che ncotognà, na cufece, |
| | Ca si t’abbio no cavoce, |
| | Te sbotto ssa zampogna. |
| | MARCONE |
| 1305 | A cano a mme ssa ngiurea! |
| | ZEZA |
| | Non vi’, ca stace chino, |
| | E non ce vede proceta |
| | Sso ’birbo malandrino. |
| | NARDO |
| | Tu porzì vecchia fuceta. |
| | ZEZA |
| 1310 | Uh! mara me, che ha ditto! |
| | Marco’, dammole ncuollo, |
| | Facimmone zoffritto a sta pedata. |
| | NARDO |
| | Vecchia sfatta: Guallecchia, |
| | Venitemella a fa na secotata. |
| |
| | SCENA V |
| |
| | MARCONE, e ZEZA. |
| |
| | MARCONE |
| 1315 | Vattenne, ca no juorno, |
| | Mme la paghe ssa ngiureja. |
| | Chiammareme guallecchia, che tte pare? |
| | ZEZA |
| | Puro ca chessa è ’cosa, che ’pò essere; |
| | Ma a me direme vecchia, |
| 1320 | Chessa è ’na vera nfameja. |
| | MARCONE |
| | Chessa è na nfameja cierto, |
| | Pocca pe quanto veo, |
| | Io creo, ca t’allecuorde quatto peste. |
| | ZEZA |
| | M’allecordo... uh che pinolo, |
| 1325 | Mo’ me nn’aje fatto scennare. |
| | MARCONE |
| | Ma songo cose cheste, |
| | Che a mme poco ’me mportano; |
| | Lassamen’hì, covernate. |
| | ZEZA |
| | Te vorria di’ doje chiacchiare. |
| | MARCONE |
| 1330 | N’è tiempo mo’, ca figliemo, |
| | Mme fa sta mmalorato. |
| | ZEZA |
| | Che t’è socciesso? |
| | MARCONE |
| | Nne ll’aggio cacciato. |
| | ZEZA |
| | Aje fatta na gran prova, |
| | Va stirate lo vraccio, siente a mmene. |
| | MARCONE |
| 1335 | Zeza, si ’me vuoje ’bene, |
| | Vi’ si lo vide, parlale, |
| | Di’, che se piglia Lisa, |
| | Che fornesca ssa museca. |
| | ZEZA |
| | Si lo vedo, te servo core mio. |
| | MARCONE |
| 1340 | Ca io già nzallanuto, |
| | Non saccio cchiù che ffa, si so’ storduto. |
| |
| | Sto comme a no ’ncantato, |
| | Storduto, nzallanuto; |
| | Chi mme vo’ di’ ch’è stato, |
| 1345 | Chi mme sa ’dare ajuto, |
| | Trovare non se pò. |
| | L’ammore, e quanto fa! |
| | Ciulla mme dà martiello, |
| | Figliemo mme trommenta, |
| 1350 | Chest’arma cchiù n’abenta, |
| | Non arreposa no; |
| | Ah ca lo cellevriello, |
| | Mme sento già sbotà! |
| |
| | SCENA VI |
| |
| | ZEZA sola. |
| |
| | ZEZA |
| | Ora, va cride a uommene! |
| 1355 | Io quanno mme penzava, |
| | Ca Marcone pe mme jeva speruto: |
| | Ca Nardo mme voleva. |
| | Mme veo fore crapa ciento miglia; |
| | E chello ch’è lo ppeo, |
| 1360 | Non pozzo asciare nullo, che mme piglia. |
| |
| | Allo tiempo, che mmo’ simmo, |
| | Volè bene, è nna pazzia; |
| | Ca non saje; arrasso sia; |
| | De qual ommo te fedà. |
| 1365 | Tutte so’ de na manera, |
| | Songo tutte de na pasta, |
| | Vonno schitto... Vasta, vasta, |
| | Io non saccio mormorà. |
| |
| | SCENA VII |
| |
| | LISA, e COLA. |
| |
| | LISA |
| | Addonca? |
| | COLA |
| | T’aggio ditto, |
| 1370 | Ca pace te puoje dare; |
| | Ca n’aggio core, e non te pozzo ammare. |
| | LISA |
| | Vorria sapere schitto |
| | Si no juorno sperà pozzo confuorto? |
| | COLA |
| | Lisa lassame sta, ca già so’ muorto. |
| | LISA |
| 1375 | Siente... |
| | COLA |
| | No cchiù, no cchiù parlà d’ammore; |
| | Ammare non te pò, chi non ha core. |
| | LISA |
| | Siente Cola, chiagnenno, |
| | Appriesso te jarraggio, pe nfi’ a ’tanto, |
| | Trova da te crudele, |
| 1380 | Na stizza de pietà, sciummo de chianto. |
| |
| | E si st’amare lagreme, |
| | Manco a piatà te moveno; |
| | Straccia sto pietto, accideme, |
| | Ca puro, è caretà. |
| 1385 | A lo mmacaro, sienteme, |
| | Votate caro, e bbideme, |
| | Vide chi t’amma chiagnere, |
| | E mmuovete a piatà. |
| |
| | SCENA VIII |
| |
| | COLA, e NARDO. |
| |
| | COLA |
| | Nce so’ pe mme cchiù guaje, |
| 1390 | Cchiù trommiente, cchiù affanno!... |
| | NARDO |
| | E addo’ mme stea stepato sso malanno!... |
| | COLA |
| | O Nardullo cca staje? |
| | NARDO |
| | Pe servì a Lossoria, mo’ che sto a spasso. |
| | COLA |
| | So’ ’cose, che s’aghiustano, n’è niente. |
| 1395 | Ma siente, mme vuoje fare no piacere? |
| | NARDO |
| | Lossoria nce commanna. |
| | COLA |
| | Vuoi saglì a do Zia Cicia, e addo Zia Cianna? |
| | NARDO |
| | Sì Segnore nce saglio; e che ’bolite? |
| | COLA |
| | Saglie ncoppa... |
| | NARDO |
| | Decite. |
| | COLA |
| 1400 | E di’ a Ciulla, ca io, |
| | La stongo cca aspettanno. |
| | NARDO |
| | Mo’ ve servo volanno, è piso mio. |
| |
| | SCENA IX |
| |
| | COLA sulo. |
| |
| | COLA |
| | Vecco, ca già ve lasso, |
| | O Ciulla, o Tata, o Ammice; |
| 1405 | Già corro... e chi no passo |
| | Po ’movere da cca! Cola che ddice? |
| | Ah! sì te sento, o core, |
| | Sì: te sento, e te ntenno; |
| | Tu mme vutte, e mme tiene |
| 1410 | Penzanno a lo dolore, |
| | Che t’attocca partenno: |
| | E ’penzanno a le ’pene, |
| | Ch’aje da patì si resto. Ah! si te creo: |
| | Sì: st’arma trommentata |
| 1415 | Lo ssa, ca ll’uno è tristo, e ll’autro è ’peo. |
| | Ogne speranza, ogne confuorto, è ghiuto; |
| | Chest’utema parlata |
| | A Ciulla voglio fa... |
| |
| | SCENA X |
| |
| | NARDO, e lo stisso. |
| |
| | NARDO |
| | Già so’ benuto. |
| | COLA |
| | E mbe’? Ciulla, ch’ha ditto? |
| 1420 | Scenne mo’? |
| | NARDO |
| | Sì mo’ vene, |
| | Ma vene pe mme schitto, |
| | Pocca essa pe ttene |
| | Uh comme sta nzorfata, arrasso sia! |
| | Ma io ll’aggio appracata, |
| 1425 | E mmo’ scenne a parlà co Llossoria. |
| | COLA |
| | Su, vattenne; ca io |
| | Obbrecato te resto assaje, assaje; |
| | Sta vita sta pe tte. |
| | NARDO |
| | Che mme la frio? |
| | E ’denare no nn’aje, |
| 1430 | Pe mme da quaccosella? |
| | COLA |
| | Vavattenne Nardullo, |
| | Ca po... lassa fa a mme... vasta... farrimmo... |
| | NARDO |
| | Tu staje peo de me, già lo ssapimmo. |
| |
| | Lo Nnammorato, |
| 1435 | Che n’ha fellusse, |
| | Che sta scasato; |
| | Maje guste, e spasse |
| | Non pò sperà: |
| | Ca li quibusse, |
| 1440 | Fanno fracasse |
| | Pe fa gaudè. |
| | Sì nc’è l’agresta, |
| | La caccia è lesta; |
| | Si n’aje no chiallo, |
| 1445 | Faje sempe fallo; |
| | Te puoje stepà, |
| | Cridelo a mme. |
| |
| | SCENA XI |
| |
| | COLA, e po CIULLA. |
| |
| | COLA |
| | Ecco Ciulla, che bbene; |
| | Allestate a zoffrì, povero core. |
| | CIULLA |
| 1450 | Veccome, tradetore. |
| | Che ’te pare? so’ essa? |
| | So’ chella Ciulla stessa, |
| | Che tu sgrato aje lassata |
| | Affritta, e sconzolata? |
| | COLA |
| 1455 | Tu dice chesto a mme? tu t’allamiente? |
| | CIULLA |
| | Sì ca nn’aggio ragione... |
| | COLA |
| | Non parlammo de chesto: e saccie schitto |
| | Ca Cola cca se trova |
| | Pe te di’... |
| | CIULLA |
| | Che buo’ dire?... |
| | COLA |
| | Ascota, e zitto. |
| 1460 | Pe te di’, ca so’ lesto, |
| | Pe mme partì, pe ghiremenne... |
| | CIULLA |
| | E addove? |
| | COLA |
| | A morì, ca co chesto |
| | Tu libbera te truove |
| | A gaudere co ’patemo; io lontano |
| 1465 | Da no core nfedele |
| | Morarraggio contente... |
| | CIULLA |
| | Chesto de cchiù? crudele!... |
| | COLA |
| | Appila, e siente. |
| | CIULLA |
| | Che bboglio sentì ’chiune; |
| | Io so’ l’affesa, e ttune |
| 1470 | La fauzetà annascunne. |
| | COLA |
| | Bravo a chesto nne simmo? |
| | CIULLA |
| | Lassa parlà a mme primmo, e po respunne. |
| | A mme, co sse rechieppe! |
| | A Ciulla co st’assisa? |
| 1475 | Che servono ste zeppe; |
| | Di’ chiaro ca co Lisa |
| | Te nne vuoje ghire; e pe coprì st’arrore |
| | Vuoje... |
| | COLA |
| | Che so’ fatto a ttene?... |
| | CIULLA |
| | Lassa parlare a mmene, o ngannatore. |
| 1480 | Ma chi maje pò di’ tanto |
| | (Ahjemmene!) si lo chianto, |
| | Che dde sto core, è bivo sango, vole, |
| | Che mme morano ncanna le pparole. |
| | COLA |
| | Tu chiagne? lassa a ’mene |
| 1485 | No trivolo vattuto, |
| | Ch’io so’ stato traduto. |
| | CIULLA |
| | Tu traduto? e da chi? |
| | COLA |
| | Da chi; da tene. |
| | CIULLA |
| | O cielo, e tu sti tuorte |
| | Le zuffre, e le compuorte? |
| 1490 | Ora parla co mmico, |
| | Te nne vuo’ ghire? |
| | COLA |
| | Cierto. |
| | Sì ca spierto, e ’demierto |
| | Me nne jarraggio. |
| | CIULLA |
| | Ed io vengo co ttico. |
| | COLA |
| | Tu? |
| | CIULLA |
| | Sine; pe te dare |
| 1495 | Prova de chillo ammore, |
| | Che tu non cride. |
| | COLA |
| | E propejo lo bbuoje fare? |
| | CIULLA |
| | Te parlo co lo core, |
| | E coll’arma porzine; |
| | E ’pone pe la via, |
| 1500 | Tutto potimmo di’. |
| | COLA |
| | Sì gioja mia. |
| | CIULLA |
| | Mme conzola sta sciorta. |
| | COLA |
| | Sciorte non pozzo avè meglio de chesta; |
| | Vi’ ca da l’autra porta |
| | ’Me nne vengo, e tte piglio. |
| | CIULLA |
| | Ed io sto lesta; |
| 1505 | Ch’accossì la scompimmo. |
| | COLA |
| | Ciulla: nfra n’autro ’poco, nce vedimmo. |
| |
| | Parto, ma chisto core |
| | Mpigno d’ammore, o bella, |
| | Lo lasso mpietto a tte. |
| 1510 | Tu saje ca si’ la stella, |
| | Che st’arma mme reschiara, |
| | E senza tene, o cara; |
| | Pace non c’è pe mme. |
| |
| | SCENA XII |
| |
| | CIULLA sola. |
| |
| | CIULLA |
| | Va Cola mio, va viene |
| 1515 | A Ciulla, che t’aspetta, e non trecare; |
| | Va caro, e ’torna a mmene; |
| | Non mme fare patì, coll’aspettare. |
| | E tu ammore nfratanto, |
| | Dimme, qua nnammorato, |
| 1520 | È chillo, che non stace trommentato. |
| |
| | Sento ammore, che mme dice: |
| | È felice chillo core, |
| | Che non pate gelosia; |
| | Ma responne st’arma mia, |
| 1525 | Ca trovare non se pò. |
| | Chi de core vole ’bene, |
| | Maje sperà pote arrecietto; |
| | Tene sempe no sospetto; |
| | E lo trova addo’ non vo’. |
| |
| | SCENA XIII |
| |
| | MENELLA, e po NARDO. |
| |
| | MENELLA |
| 1530 | Bene mio, ca scomputo |
| | Aggio d’arravogliare sso felato! |
| | Steva tanto mbrogliato, |
| | Che m’ha fatto sbotà le cellevrella! |
| | NARDO |
| | Oje Menella? Menella? |
| | MENELLA |
| 1535 | Che d’è? d’addo’ si asciuto? |
| | Comme vaje accossine? |
| | NARDO |
| | Jastemmarria la stoppa, |
| | Zieta, la conocchia, e tte porzine. |
| | MENELLA |
| | Tu te faje de coppa? te so’ schiava. |
| 1540 | Orzù bonnì covernate. |
| | NARDO |
| | La scusa è propeo brava, |
| | Già, che te la vuoje cogliere. |
| | MENELLA |
| | Cca, che mme stongo a bennere? |
| | NARDO |
| | Gnornò; ma non è termene |
| 1545 | Chiantà no gentelorgano, |
| | Si mbe’ scaduto pe la mala pratteca. |
| | MENELLA |
| | Nardo, tu mme faje ridere! |
| | NARDO |
| | E ttune, mme faje chiagnere addavero; |
| | Io pe l’ammore tujo, |
| 1550 | Nne so’ stato cacciato da Marcone; |
| | Mme so’ arreddutto comme già mme vide; |
| | E tu ncagno de mme conzolare; |
| | Mme repasse, m’aburle, e te nne ride? |
| | MENELLA |
| | E che t’aggio da fare? |
| | NARDO |
| 1555 | Famme no smajamiento. |
| | No squaso; di carizze. |
| | Damme no pezzechillo, che sacc’Io! |
| | MENELLA |
| | Ne; quanto arrive, e mpizze, core mio. |
| | NARDO |
| | E già! Mo’ sto decotto; vago sbriscio. |
| 1560 | Senz’arte, e fenza parte. |
| | Ssto faglio de denare... |
| | MENELLA |
| | Donca, posa le ’carte, |
| | Ca a lo juoco d’ammore |
| | Chi ha sto faglio; premera non pò fare. |
| | NARDO |
| 1565 | Lo ssaccio sì, lo ssaccio, |
| | Ca co ’binte legiteme so trova |
| | Chi non refonne, e sbena. |
| | MENELLA |
| | E chi ha la vorza asciutta. |
| | NARDO |
| | Bravo Menella mia, tu la saje tutta. |
| | MENELLA |
| 1570 | (Repassammonce chisto!) |
| | Ora sienteme mo’, che ’boglio fare. |
| | NARDO |
| | Va decenno. |
| | MENELLA |
| | Aggio visto |
| | Ca si cca voglio stare, |
| | Non mme pozzo piglià niente de sfizzejo; |
| 1575 | Perzò me nne vogl’ire a trovà mammema, |
| | Che stace dinto Napole; lo ssaje? |
| | NARDO |
| | E llà tu che nce faje? |
| | MENELLA |
| | Aggio concruso |
| | De mme fare milorda, |
| | Co ’bestireme a ll’uso; |
| 1580 | Po non so’ canosciuta a lo paese, |
| | E co quatto parole ntoscanese, |
| | Che ’puro t’arremmedejo; |
| | Co ’mettireme ntuono; |
| | Co ttico primmo primmo, |
| 1585 | Me nce voglio piglià piezze de gusto. |
| | NARDO |
| | E lo ssaje fare? |
| | MENELLA |
| | Lassa fa a sto fusto. |
| |
| | Quanno mme vederraje; |
| | Veftir tutt’a la moda, |
| | L’abito con la coda, |
| 1590 | Il servitor d’avanti, |
| | Da dietro il cicisbe’ |
| | Con due milordi accanto |
| | Di sera, e di matina |
| | Girar per la Città; |
| 1595 | Tu che farraje che? |
| |
| | NARDO |
| |
| | Signora Milordina |
| | Appriesso te jarraggio, |
| | Cercannote piatà. |
| |
| | MENELLA |
| |
| | Ma jo responnarraggio; |
| 1600 | Bel giovane chi sei? |
| | E vada vada lei, |
| | Il cicisbeo dirà. |
| |
| | NARDO |
| | E io a lei, e lui, |
| | Nne votto a tutti dui, |
| 1605 | Chesto ve pozzo fa. |
| |
| | SCENA XIV |
| |
| | ZEZA, COLA, e CIULLA. |
| |
| | ZEZA |
| | Site pazze addavero! |
| | E addo’ volite ghire? |
| | COLA |
| | Spierte pe chisto munno. |
| | ZEZA |
| | Vi’ ca quarche zeffunno, |
| 1610 | Mmattere nce farrite? |
| | CIULLA |
| | Pò venire |
| | Chello, che se nne sia. |
| | ZEZA |
| | Che dice figlia mia, agge jodizejo. |
| | Vi’ ca a qua precepizejo |
| | Vuje ve jate accostanno!... |
| | COLA |
| | Io già te sento; |
| 1615 | Ma saje, che te responno, |
| | Ca si moro co Ciulla, io so’ contento. |
| | ZEZA |
| | E tu sia Ciulla? |
| | CIULLA |
| | Accidere mme ponno |
| | Cchiù priesto, che mme fa lassare Cola. |
| | ZEZA |
| | Già ch’è accossì; pigliateve ssa scola. |
| 1620 | Nguadeateve mone, |
| | E ghiatevenne int’a la casa mia; |
| | Cca venarrà Marcone; |
| | Io le dico ca vuje site sposate; |
| | Si chillo se contenta, jammo ’buono; |
| 1625 | Si no, chiano chianillo, |
| | Neanche ncigna a scurà, ve la sfelate. |
| | CIULLA |
| | ’Me piace lo penziero. |
| | COLA |
| | E bba de truono. |
| | Chest’è la mano; Ciulla. |
| | CIULLA |
| | Cola; chest’è la mano; |
| 1630 | Già simmo nguadejate. |
| | ZEZA |
| | Trasitevenne, e bbona sanetate. |
| |
| | SCENA XV |
| |
| | ZEZA, e MARCONE. |
| |
| | ZEZA |
| | Uh! che farrà lo viecchio, arrasso sia! |
| | MARCONE |
| | Ne Zeza, Zeza mia, vamme decenno |
| | Aje veduto cchiù figliemo? |
| | ZEZA |
| | Gnorsine. |
| | MARCONE |
| 1635 | Che t’ha ditto? |
| | ZEZA |
| | Chiagnenno |
| | Lo povero fegliulo mme decette. |
| | Raccommanname a Tata; e se nne jette. |
| | MARCONE |
| | Donca già s’è partuto? |
| | ZEZA |
| | E ’pe non ghire sulo, |
| 1640 | S’è accocchiato co Ciulla, e se nn’è ghiuto. |
| | MARCONE |
| | Comme! co Ciulla! Cola? |
| | ZEZA |
| | Sine, sine, |
| | Pe chesso isso fujeva |
| | De sposà la sia Lisa, |
| | Ca pegliarese Ciulla pretenneva. |
| | MARCONE |
| 1645 | E mmo’? |
| | ZEZA |
| | Tutte li chiajete so’ fenute, |
| | Ca so’ sposate, e se nne so’ fojute. |
| | MARCONE |
| | Cola... Ciulla... fojute! |
| | Figlio, addo’ staje, respunne... |
| | Ciulla... addo’ si’? che ’faje... |
| 1650 | Zeza... tu mme confunne... |
| | Tornate tutte duje |
| | A conzolà no viecchio sbentorato. |
| |
| | SCENA XVI |
| |
| | LISA, TORE, e li stisse. |
| |
| | LISA |
| | Sio Marcone, che d’è? |
| | TORE |
| | Zeza, ch’è stato? |
| | ZEZA |
| | Chiagne lo sio Marcone, |
| 1655 | Ca lo figlio co Ciulla s’è sposato. |
| | LISA |
| | (Sposato ha Ciulla! uh! mara me.) |
| | TORE |
| | (Che gusto!) |
| | MARCONE |
| | Figlio viene, ca Ciulla |
| | È la toja; te sia data; |
| | Figlio, figlio, addo’ si’? |
| |
| | SCENA XVII |
| |
| | COLA po CIULLA, e li stisse. |
| |
| | COLA |
| | Veccome, Tata; |
| 1660 | Veccome, a piede tuoje, |
| | Fanne de me, che bbuoje... |
| | MARCONE |
| | Auzate Cola; addov’è Ciulla? |
| | CIULLA |
| | Veccome. |
| | MARCONE |
| | Su nnante a mme, accocchiateve, |
| | E gaudite contiente, si a sto core |
| 1665 | Le coce cchiù no figlio, ca l’ammore. |
| | ZEZA |
| | E tu sia Lisa pigliate |
| | Lo sio Tore, forniscela, |
| | Ch’aggio parlato a ’pateto, |
| | E nne sta contentissemo. |
| | LISA |
| 1670 | Già, ch’è accossì, facimmolo. |
| | ZEZA |
| | Priesto sio Tore azzeccate. |
| | TORE |
| | Chest’è la mano... |
| | LISA |
| | Ecco la mia... |
| | ZEZA |
| | Scompitela. |
| |
| | SCENA URTEMA |
| |
| | MENELLA, NARDO, SCERVECCHIA, e li stisse. |
| |
| | MENELLA |
| | Co ’salute, allegrezza, e figlie mascole. |
| | NARDO |
| | Lo Cielo ve nce mproseca. |
| | SCERVECCHIA |
| 1675 | Songo arrevato propejo, |
| | A ’bedè fa sse nozzole! |
| | ZEZA |
| | Nepote mio ’bellissemo, |
| | Circolo mio scioruto, |
| | Singhe pe sempe tu lo ’bemmenuto. |
| | MARCONE |
| 1680 | Addov’è stato? |
| | ZEZA |
| | A Puortece. |
| | SCERVECCHIA |
| | Pe ve servire nzoleto. |
| | NARDONE |
| | Già ch’è tiempo de nguadejo, |
| | Faciteme piacere |
| 1685 | Fareme de Menella pe mogliere. |
| | CIULLA |
| | Sine, ca se la mmereta. |
| | COLA |
| | Zeza tu si’ contenta? |
| | LISA |
| | Menella che nne dice? |
| | MENELLA |
| | Io nne so’ contentissema. |
| | ZEZA |
| 1690 | Scervecchia che tte pare? |
| | SCERVECCHIA |
| | Nardo, è no ’buono giovane; |
| | Nce la potimmo dare. |
| | NARDO |
| | Parente obbrecatissemo. |
| | SCERVECCHIA |
| | Non c’è de che accocchiateve. |
| | ZEZA |
| 1695 | E nnuje sio Marcone, |
| | Che ’facimmo? nce stammo! |
| | MARCONE |
| | Pe nce spassà lo tiempo |
| | No palicco ped’uno nc’abbuscammo. |
| | ZEZA |
| | Orzù fegliule mieje; |
| 1700 | Non perdite cchiù ’tiempo, jatevenne; |
| | Già che ’site accocchiate. |
| | E lo Cielo ve dia |
| | Figlie, gusto, contiente, e ’sanetà. |
| | TUTTE |
| |
| | Viva ammore, viva, viva, |
| 1705 | E la ’bella federtà. |
| | Vence tutto, e a ’tutto arriva, |
| | Chi se fida d’aspettà. |
| |
| |
| |
| |
| |
| |
| |
| |
