Lo Masillo

Lo Masillo, Napoli, Camillo Cavallo, 1712

a cura di Stefania Napolitano

paratesto ATTO PRIMO ATTO SECONDO ATTO TERZO Apparato

ATTO I

SCENA I

MASILLO, ch’aggiusta la barracca, e M. AMBROGIO, ch’apre la bottega del Caffè.

MASILLO

Mpastammo sta farina:

Sbrigammoce, ch’è tardo:

Pocca mo’ vedarrammo priesto priesto

A l’addore venire ssi gagliune,

E fare a secozzune,

Pe magnare polenta stammatina.

Damme no po’ de lardo:

Miette fuoco a sto riesto.

O bene mio ch’addore,

Che danno ste saucicce, Compa’ Meo;

Se nne pò torna cierto

N’arrusto de feletto, e de lacierto.

Ponno da morte nvita

No muorto sorzetà,

Tanto so’ bone.

È cosa saporita:

Venga chi vo’ scialà,

C’ha sfazione.

AMBROGIO

Masillo mio buon giorno.

MASILLO

Bonnì, bonnì si Ambruoso.

AMBROGIO

Molto per tempo, amico.

MASILLO

Saccio lo mutto antico,

Che n’ommo, ch’è solliceto non pote

Ire de facce a la pezzentaria:

Mperzò potronaria,

No mm’è piaciuta maje;

E tu meglio de me cierto lo saje.

AMBROGIO

È vero, ed io ne godo;

Ed il tuo gran giudizio ammiro, e lodo.

SCENA II

LILLO Cotrufo Iodece a Contratto, e li stisse.

LILLO

Pe deggerire

Le fremme mpietto;

Vorria pegliare

Non saccio che.

AMBROGIO

Caldo caldo pigliatelo il Caffè.

LILLO

Te nne vuo’ ire

Ca si no jetto

Mo’ lo magnare,

E quanto nc’è.

MASILLO

Pigliate no scagliuozzo, o Segnore.

LILLO

Non saccio che Caffè mme vaje trovanno.

Chiù de tuesseco è amaro;

Ll’aggia chi voglia, ch’io no ll’aggio a caro.

AMBROGIO

È bevanda gradita;

E ti sa dar la vita.

LILLO

Mme farria vommecare li stentine.

AMBROGIO

È cosa forestiera, e tu la sprezzi?

Non sarai tu perdio Napoletano.

LILLO

So’ de Napole nato a ssa Doana.

So’ Ghiodece a contratto: e co la pena,

Sacci’acconcià quatt’ova a no pejatto.

Mme chiammo lo Si Lillo;

Mme canosce Masillo.

MASILLO

Viene paglietta mio:

Accostate cca sotta;

Ca puoje co poco spicce

Farete na panzata de saucicce.

LILLO

Cierto lo boglio fare;

E sso Caffè lassare a chi lo bole.

AMBROGIO

Dunque non è più vero,

Che volevi la flemma digerire?

LILLO

E ca non saje che dire.

MASILLO

Non perdimmo chiù tiempo,

Curre si vuoje scialare.

LILLO

Eccome ccane.

MASILLO

A magnare, a magnare

AMBROGIO

(Mangia fin tanto che potrai scoppiare. (Mente Masillo dà da mangiare a Lillo.)

Sono stato sollecito ad aprire

Più per veder Prudenza,

Che per vender la roba di bottega;

Or ve’ s’Amore avea poco che fare

A farmi innamorare

D’una Vedova ingrata,

Che del mio mal si ride, o non mi guata.

Sprezzami pur tiranna,

Che ’l core innamorato

Mai sempre t’amerà

Fido, e costante.

La pena che m’affanna

Mi tiene sconsolato;

Ma troverà pietà

Chi serve amante.) (e se n’entra.)

MASILLO

Che te pare si Iodece a contratto:

Non te va dint’ l’ossa ssa cardata?

Ma da po che tu aie vippeto, che magne.

E comme so’ storduto!

Addo si’, nzallanuto?

Zompa co quatto rana a la taverna:

Fatte dà na garrafa d’amarena:

Dillo da parte mia a Iacuaniello;

Di’ ca serve pe mme; sta ncellevriello.

LILLO

Che te sia beneditto quanto latte

Te dette mamma toia; mme faie scialare.

MASILLO

Magna, ca po se penza de pagare.

Dimme si te piace ssa sauciccia?

N’è cosa da Segnore;

E mme ne pagarraie schitto l’addore.

LILLO

La sauciccia è na gran cosa,

Quann’è fresca, ed è addorosa.

MASILLO

Quann’è cauda, animalone.

LILLO

No mme siente: si’ n’anchione.

MASILLO - LILLO

100

No nne saie nveretà.

LILLO

Te la pappe a poco a poco.

MASILLO

Quann’è sciuta da lo fuoco.

LILLO - MASILLO

E te siente addecreà.

MASILLO

È benuto lo vino a tiempo a tiempo.

105

Sciaqqua, ch’è auto chesso che guarnacca.

LILLO

A la salute toia.

MASILLO

Prode te faccia.

Scioscia, ch’è cosa degna.

E che fitta che fa lo gioja mio.

Sciala Si Lillo, videne lo funno.

110

No nn’è proprio azzellente.

LILLO

È doce nveretate; ed è razzente.

Ma che t’aggio da dà, si mme vuo’ bene?

MASILLO

Chello che par’a ttene.

LILLO

Ma puro: di’ che mporta?

MASILLO

115

So cinco de sauciccie: e te se danno

Propeto ncapetania.

Nn’aie duie de pane, e quatto de scagliuozze:

Quatto de lagremosa:

L’abbaco è bella cosa;

120

Che fanno ntutto ntutto

Quindece rana.

LILLO

Buono.

Ma no mme trovo ncuollo

Manco no cavalluccio.

MASILLO

Io faccio ca pazzie.

125

Cca non se fa credenza.

LILLO

Pe mo’ n’aggio na maglia:

Aspettame no poco, ca mo’ vao

Faccio no contrattiello, torno, e pao.

MASILLO

Non saccio che contratto vaie trovanno.

130

No la facimmo longa:

Paga, priesto, no cchiune.

LILLO

Tu vuo’ fa costiune.

A n’ommo comm’a me, no cappa negra,

Che te pote servire

135

A mill’accasejune,

Fare sta scortesia?

MASILLO

Si na vota te chiammo, arrasso sia,

Te pagarraggio ncoppa.

LILLO

Ma i’ ch’aggio da fare,

140

Si n’aggio no cavallo pe pagare?

MASILLO

Lassa ssa cappetella.

LILLO

Ah gioja mia; e che parlà che faje.

Pozz’ì a la Curia senza farraiuolo?

Senza la cappa n’ommo comm’a mmene!

MASILLO

145

E truffato vogli’essere da tene?

LILLO

Avierte comme parle,

Ca so’ n’ommo norato.

MASILLO

E paga bello mio mo’ ch’aje magnato.

LILLO

Leva le mano: testemmonia vosta.

MASILLO

150

Pisceme mo l’aruta.

SCENA III

PORDENZIA da la casa, e li stisse.

PORDENZIA

Che d’è, ched è ssa baja?

MASILLO

S’ha magnato sso gioja quant’i’ aveva

E mo’ me dice, ca non ha denare.

LILLO

Ma no ntaggio negato de pagare.

MASILLO

155

Via su: vatte sbriganno

Stutammo sto lucigno.

LILLO

Pe mo’ n’aggio na maglia, t’aggio ditto.

PORDENZIA

Agge pacienzia; aspetta,

Ca te dà sfazione.

MASILLO

160

Pacienzia nn’aggio si mme dà lo pigno.

LILLO

No nn’aggio che te dare.

PORDENZIA

Orassù piglia cca:

Te vasta sta rezzola?

MASILLO

Mme vasta cierto: ma mme daje parola,

165

De pagare pe isso?

PORDENZIA

Eccome cca: non dobetà Masillo.

MASILLO

Io non parlo pe tte, parlo pe Lillo. (E se ne trase.)

LILLO

Pordenzia, mm’aje legato.

PORDENZIA

No nc’è de cchè, Sio Lillo.

170

Tune mm’aje ncatenata;

Pe te Lillo chest’arma è sbentorata.

LILLO

Comme? che t’aggio fatto?

PORDENZIA

Vi’ comme faje Zi Meo.

LILLO

Io cierto no nte ntenno,

175

Ched’aje? che passe? addove aggio da jre?

PORDENZIA

Ah Lillo, Lillo, tu mme faje morire.

LILLO

Tu te lamiente a tuorto.

SCENA IV

RITA da la fenesta, e li stisse.

RITA

(Ancora sta cca Mamma.)

PORDENZIA

Mo’ te lo dico: sacce ca la sciamma,

180

Che mm’abbruscia sto core,

Non se pò sopportà.

RITA

(Mara mene, e che sento!)

LILLO

E non se pò sapè che guaje tu passe?

PORDENZIA

Gnorsì: ma si tu vuoje,

185

Tu sapere lo puoje.

LILLO

Parla, spapura,

Dimme ched’aje;

Si nce so’ guaje,

So’ cca pe tte.

190

Si n’aje denare,

Non dobetare,

N’avè appaura

Fidat’a mme.

PORDENZIA

Ora Lillo de st’arma:

195

Si’ tu chillo che puoje

Contentare sto core ascevoluto;

Che pe l’ammore tujo spanteca, è ghiuto.

LILLO

(Secotejammo a fare lo storduto.)

Io non te saccio ntennere che dice.

200

T’abbesogna caccosa, t’aggio ditto?

Parla, ca si’ servuta,

Si m’avesse da venne sta cammisa.

RITA

(Che mamma e bona sia squartata, e accisa.)

PORDENZIA

Lillo mio pe caretà

205

A Pordenzia che patesce,

Che speresce,

No defrisco dalle tu. (E se nne va.)

RITA

Mo’ lo siente, e nne vvoje cchiù.

LILLO

Io de te aggio piatà:

210

Ma che buoje, dimmello su. (E se nne va)

RITA

(Vi che ghjoja è chesta, sciù.)

Tiene speranza Rita

Ca mammata sto mese te mmarita:

E cca n’ommo de penna te vo’ dare,

215

No famuso Notare;

S’essa pensa pe essa, e non pe ttene.

Nce vo’ pacienzia, e zitto:

E bedere, e crepare;

E de lo nguadio mio no nne parlare.

220

So’ nata

Sbentorata:

Pe mme

No ncè

Piatà,

225

Pacienzia nce vo’.

Ammore,

Chisto core.

Lo vide comme sta;

Forniscela tu mo’.

SCENA V

Nota’ LUCCIO, e RITA primmo da la fenesta.

LUCCIO

230

Un quanco mi trattengo (da dinto.)

Priesto priesto, e mo’ vengo.

RITA

Sento parlare lo Notare mio.

LUCCIO

A rivederci, addio:

Quanti taccoli c’aggio: (esce.)

235

Sopportar più non posso,

Che dolce dolce m’han zucato un’osso.

RITA

Zì zì?

LUCCIO

Chi chiamma?

RITA

Songo io, bonnì.

LUCCIO

Come deggio fo a lei profunno inchino.

RITA

Non servono ste cose cchiù co mmico.

LUCCIO

240

Comme commana lei. (Oimè che ntrico.)

RITA

Accostateve ccane.

LUCCIO

Ecco m’accosto.

(Uh che brutto malanno.)

RITA

A te schitto penzanno,

Arrepuoso non trovo; e te nne staje?

LUCCIO

245

Songo tanta li guaie,

Che ’l mio mestier m’apporta;

Che ’l vivere m’accorta.

RITA

Che serve sso parlà, non saccio comme.

Si Luccio, gioja mia,

250

Parlate che ve ntenna.

LUCCIO

Così conviene ad un Notar di penna.

RITA

A Rita che pe te spanteca, e more,

Penzare dovarisse.

LUCCIO

L’auto giorno tel disse,

255

Che ciò non può succedere;

E vostra Signoria no lo bo’ credere.

RITA

Vi’ comme ll’aje stampata ssa boscia

LUCCIO

Non mi dite accossì Signora mia:

Pocca tu mm’aie chiavata

260

A questo cor na frezza;

Che mi fa indebolì.

RITA

Che bella pezza.

LUCCIO

Comme, comme, che dite?

RITA

Ca si fosse accossì,

Cierto te vedarria sempe da cca.

LUCCIO

265

Ma mammeta non vole in verità.

RITA

Che mamma vaje decenno.

Aspettame no poco, ca mo’ scenno. (e se nne trase pe scennere.)

LUCCIO

Non saccio che mme fare cchiù con questa

Ll’aggio mprommesso, è bero.

270

Ma che nce pozzo fare,

Si la Sia Nora, chesta Fiorentina

Di questo core fa justo tonnina.

Essa mm’ha puosto questa lengua in bocca.

Mme fa parlà toscano,

275

Pe girele cchiù a bierzo, e azzò me ntenna.

Me corresponne, ed amma

E dice che pe mme si coce, e infiamma.

Ora penzammo a dà parole a chesta.

Seguiteggiammo a dir che la sua Mamma

280

L’altr’jeri m’ordinò con voce espressa

Che non pensi più a essa.

Ll’aggio ditto, ed è ben fatto

Farle gliottere sta nnorchia.

S’essa ncoccia, piatto piatto

285

Nce lo dico; e se non sporchia.

RITA

Addonca Nota’ Luccio,

Non vole mamma mia

LUCCIO

Signora sì, che mi dicette un giorno

E non ti pigli scorno,

290

Figliema zanneggiare?

Non se pò segnore cchiù sopportare.

S’un’altra volta schitto

Tu passerai per quinci,

Perderò la pacienza;

295

E ti farrò beder chi sia Pordenza.

RITA

Aimmene, aimmè lo core:

Movitev’a piatà d’una che more. (s’abbannona mbraccia de Luccio.)

LUCCIO

Ched’è? che t’è socciesso? è indeboluta.

Va la trova; è già ghiuta.

SCENA VI

LEONORA in finestra, e detti.

LIONORA

300

(Vedessi il mio Notajo. Oimè che miro.

Rita in braccio di Luccio!)

LUCCIO

Sapesse comme fare,

Pe farele quaccosa

A farla revenire. O manco male,

305

Per quella via lo Miedeco mo’ passa.

O Si Rienzo, Si Rienzo;

Ajuto a sto descenzo.

SCENA VII

RIENZO Miedeco, e li stisse.

RIENZO

Che bole llossoria?

LUCCIO

Vide sta poveraccia

310

Addebboluta, e co la morte nfaccia.

RIENZO

Mo’ quanto la tastejo no pocorillo.

LIONORA

(Va ti fida a parole.)

RIENZO

Sbatte poco lo core.

LIONORA

(Ingrato, mancatore.)

RIENZO

315

Sponta mpietto no poco,

Azzò de resperare aggia cchiù lluoco. (Mentre Luccio sponta no poco mpietto a Rita.)

LIONORA

(Questo ancor mi mancava di vedere.)

RIENZO

Lo puzo jappe jappe formecheja.

Non se pò dice simpeca:

320

Cchiù priesto è no delliquio.

Chiammance no colleggjo.

Ca trovarraje comme te dice Rienzo;

Non comme dice tu, moto, o descenzo.

LUCCIO

Non saccio che collegio vaje trovanno

325

Se conosciate il male,

Falle presto un rimedio manuale.

RIENZO

Recipe recipe,

Dice Galeno

A carte quinnece,

330

No po’ de bauzamo,

Ca priesto priesto

Pò sorzetà. (Luccio appoia Rita a Rienzo, e corre pe lo bauzamo.)

Poverella fegliola,

Sta morta, e mme fa puro cannavola

335

Quaccosa ch’aspettava l’è mancata:

O s’è graveta, cierto l’è benuto

Golìo de quacche cosa contra tiempo.

Uh zitto, ca mme pare che revene.

RITA

Aimmè.

RIENZO

Ched’aje?

RITA

Lo core.

RIENZO

340

Mo’ mmo’ t’alleggeresco lo dolore

Co no buono remmedio, e sarraje

Nne n’attemo sanata.

RITA

Mara me sbentorata.

Luccio mio addov’è?

RIENZO

Chi, lo Notare?

RITA

345

Lo Notaro gnorsì.

RIENZO

Non dobbetare;

Ca t’è ghiuto a pegliare no remmedio

Pe te fa arrevenire.

LIONORA

(E l’ascolto, e non moro.)

RITA

E buje chi site?

RIENZO

Lo Miedeco song’io, fegliola mia;

350

E me rentenno d’ogne malatia. (Torna Luccio co lo bauzamo.)

LUCCIO

Addora cca non dobetà de niente.

RITA

Te rengrazio de tanta compremiente.

RIENZO

Odoribus squisitis sustentate,

Che non deliquiat ista poverella.

RITA

355

T’accresca sanetate

Lo Cielo, e puro Ammore.

Pe chesto che mm’aje fatto,

Te pozza fa scialare.

LIONORA

(Son nata a sospirare.)

LUCCIO

360

Va saglietenne ncoppa,

E statte allegramente,

Ch’io farò tostamente,

Che mammata s’acconci a boglia mia.

RIENZO

Gnorsì: mo’ va te cocca:

365

E no sta a la sopina.

LUCCIO

Dice bene lo Miedeco

Di freddo non pigliar, pocca n’è buono

Va ca son’io pe tte; né t’abbannono.

RITA

Co sta speranza schitto,

370

De quanto tu mm’aje ditto,

Me pozzo conzolà.

Ma che, si non soccede,

Sto core affritto cede.

Va trovalo addo’ va. (e se nne trase.)

RIENZO

375

Mme pare ca pe chessa vaje pe ll’aria.

LUCCIO

Gnornò, llossoria sbaria.

RIENZO

Lo mutto d’Arestotele no nganna:

Che l’arma sta addov’amma; e ment’a chessa

La simpeca è benuta;

380

Tu già tenive ll’arma addeboluta.

LUCCIO

Eh che fallisce, ciò non va per nosco.

RIENZO

Che d’è: te piglie scuorno

De di’, ch’a na fegliola puort’ammore?

So’ nnamorato i’ puro, e mme nne grolio

385

Vecco l’attiempo llà la fata mia:

Ammico vavattenne, ncortesia.

LUCCIO

Nnammorato è de Nora! a sto pontone

Io nne voglio veder chello, che nneje.

RIENZO

Devota alleverenzia a llossoria

390

Te fa chi t’amma, e te vo’ bene assaje.

Chi se ncricca tra Miedece valiente

Nnaz’attene se sconocchia; e non sa niente.

LIONORA

(Luccio spia in quel canto: or questo è il tempo

Di vendicarmi del tuo tradimento.)

RIENZO

395

Patrona mia: vi’ ca nonn’aggio abbiento,

Penzanno sempe a buje.

LIONORA

Eccomi pronta

Comandi, ch’io non ho maggior diletto

Che soddisfare al mio, e al vostro affetto.

LUCCIO

(Oh canchero, mmalora, o Dei che sento!)

RIENZO

400

Donca avite piatà d’uno che more?

LIONORA

Disponete del mio fedele amore.

RIENZO

A chisso sciore

De ssa bellezza,

Vespa d’ammore

405

Songo pe tte.

Volite dare

De ssa docezza

O laure care

A Rienzo ne?

LIONORA

410

Parlate con mio padre:

Che d’esser voi mio sposo

Non resterà per me, s’egli il consente. (e se n’entra.)

RIENZO

Pe sse parole toie parto contente. (e se nne va.)

LUCCIO

Perfida, mancatora, indegna, ingrata,

415

Così tratti il mio core,

Che per te si squaquiglia, abbruscia, e more?

Tradire a Notar Luccio,

Ch’oggi è il primo Notar, ch’abbian le Curie

Pe no barbiero, pe no sagliemmanco

420

Ch’io portarelo sdegno al lato manco!

SCENA VIII

LEONORA che torna alla finestra, e LUCCIO.

LIONORA

Mira, mirami bene,

Ingannatore ingrato.

LUCCIO

Il motto mi convene.

Cornuto, e mazzeggiato.

LIONORA

425

Perché ancora sei qui saper vorrei?

Forse pensi, pretendi,

Trappolarmi di nuovo?

LUCCIO

Trasetenne sfacciata

A lavar la colata.

430

Aggio ntiso a bastanza;

Il tradir ne le donne è solo usanza.

LIONORA

Tu m’ingannasti traditor, crudele,

Spergiuro, mentitor, finto, infedele. (e se n’entra, chiudendogli la finestra sul viso.)

LUCCIO

Chi la sente suppone,

435

Che lei tenga ragione; ma se nganna.

Pocca propio co st’occhi,

E co st’arecchie ancora,

Aggio visto, e sentito

Quant’ha ditto, e n’ha fatto,

440

Co fareme sto tratto.

Ah che se chiù nci penso

Chiù nel mio cor l’affanno

S’ingrossa, e si fa poi duolo tiranno.

Vo’ lasciarla: Signorsì;

445

Ma ’l mio cor dice gnornò.

M’ha feruto:

M’ha traduto:

No la voglio chiù sentì;

Ahimè, ca non se pò.

SCENA IX

MASILLO, ch’esce da la barracca.

MASILLO

450

Non fa cchiù lo storduto

Ammore ncancaruto.

Lo bide comme sta sto core affritto?

E tu comm’a no cuorno

Cchiù ntuoste, ed aje delietto

455

De sentì sto taluorno,

No mme fa cchiù penare:

Valla priesto scompenno;

Pocch’è tanta la sciamma,

Che m’abbruscia sto pietto;

460

Che notte, e ghiuorno no me dà recietto.

È lo maro, e trova carma,

Ed io schitto n’aggio abbiento.

Mme sdellanzano chest’arma

Lo dolore, e lo tromiento.

465

Ma chi sa, tozzolammo.

Tentammo n’ata vota;

Vedimmo commme jammo.

O Sia Rita, Sia Rita? (e tozzola.)

SCENA X

RITA da la fenesta, e MASILLO.

RITA

Chi mme chiamma?

MASILLO

No scuro nnammorato, uno che t’amma.

RITA

470

(Comm’è benut’a tiempo.

Lo Si Notaro sta non saccio comme.

O no lo vole Mamma.

Chisto more pe mmene.

Si n’è ommo de penna, è ricco a funno;

475

E chi ha denare è nobele a sto munno.)

MASILLO

Che state nfrocecanno nfra de vuje?

RITA

(Tenimmoce a di ramme,

Ca si uno se rompe l’auto resta.)

MASILLO

Rita, se pò sapè, che cosa è chesta?

RITA

480

Gioja mia, che cosa?

MASILLO

Gioja mia mme decite!

N’avisse fatt’arrore?

I’ no mmereto cierto sto faore.

RITA

Vuo’ dicere tu mone,

485

Ca t’averria da amare na Regina,

E no na femmenella

Comm’a mme poverella.

Ma dimme: a chi tu puorte ssa rezzola? (Abbedendose de la rezzola, che tene mpigno da la mamma, e porta nfelata a la centa.)

MASILLO

Ah, chesta? a nullo cierto.

RITA

A qua’ fegliola,

490

A portarela mo’ t’jere abbejato;

E co mmico vuo’ fa lo spantecato?

MASILLO

Ssa cosa da la chiocca levatella.

Chesta sta cca pe ttene;

Cala lo panariello, e pigliatella.

RITA

495

I’ te resto obbrecata;

Pocc’a me non commene

Peglià na cosa a aute mprommettuta.

MASILLO

No cchiù: damme sso gusto.

No mme dà sso desgusto.

RITA

500

Comme vuoje, te rengrazejo. (Mente Rita cala lo panariello.)

MASILLO

Non c’è de cchene: e sacce,

Ca tu si’ de sto core

La dommena e patrona;

Ed ogn’auta perzona

505

Cierto se pò quitare.

RITA

No cchiù; Masillo no mme zannejare.

A tanta compremiente,

Che tu mme faje, Masillo,

Non saccio che te dà.

MASILLO

510

E ca so’ poco e niente,

Docissemo mossillo;

Appriesso aggio da fa. (e se nne trase.)

SCENA XI

LUCCIO, e LILLO.

LILLO

Che ti smaggini io sia

Ommo di quatt’a grana, o cinqu’a mazzo?

LILLO

515

Uscia è lo catapano de l’afficio,

E lo quatto dell’arte, all’arte nosta.

Ma sso parlà tosquano,

Te fa tenè da tutte pe pacchiano.

LILLO

E non vuoi star tre pass’arreto in Curia

520

A far Sicopia, a studiar l’afficio:

O vvoje che te dia ncoppa a lo jodicio

Un punio tale che ti pozza uccidere?

LILLO

Vi’ ca mo’ faje si Masto, e mme faje ridere.

LUCCIO

Ah mpiso sediteccio, forfantone.

LILLO

525

Sì Ma’, vascia le mmano.

LUCCIO

Mbreiacone.

SCENA XII

Messer AMBROGIO, ed i già detti.

AMBROGIO

Cos’è, cos’è, che avete?

LUCCIO

O Caro Ser’Ambroso:

Avite vuje maje visto

Il discipolo star sopra del Masto?

AMBROGIO

530

Certo che no.

LILLO

Sentite.

LUCCIO

E ba in malora.

LILLO

A la Curia v’aspetto

LUCCIO

Adesso adesso

Veneraggio tantosto.

LILLO

Gnorsì comme volite: a gusto vvosto. (E se nne va.)

LUCCIO

Sig. mio caro; io v’aggio da parlare.

AMBROGIO

535

M’avete a commandare.

LUCCIO

Soppricareve sempre.

Uscia tene na figlia grannicella.

AMBROGIO

Eh, così non l’avessi.

LUCCIO

E pecché questo?

AMBROGIO

Perché al tempo che corre,

540

L’aver Donne a guardare,

È un brutto aver che fare.

LUCCIO

E pocca il canoscite

Vuje potite ordinar, che si marite.

AMBROGIO

Non potete dir meglio: ma per ora

545

Non son comodo a farlo.

LUCCIO

E quando sia quel giorno?

AMBROGIO

Io non lo so

LUCCIO

Ma puro?

AMBROGIO

Quand’avrò ritrovato

Huomo che mantenere

550

La possa, com’è nata.

LUCCIO

E ment’è questo Uscia sarrà arrevata.

AMBROGIO

La mia Norina

E vistosina.

Mostra rigore,

555

Ma tutto è amore,

Fa de la schiva,

Ed è gioliva;

O fortunato

Chi la godrà.

560

Perciò ritroso

Sto per lo Sposo.

E a dirti il vero,

Corre il pensiero;

E ancor trovato

565

Posa non ha. (E se n’entra.)

LUCCIO

Credo che m’abbia ntiso, e a n’altra botta.

Fia che st’arvolo caggia.

Ma mi crucia l’arraggia,

Che Nora ami quel Medico scasato.

570

Gnorantaccio, malnato.

SCENA XIII

LEONORA in finestra, e LUCCIO.

LIONORA

(Di nuovo il disleale

Qui d’intorno s’aggira.

LUCCIO

Ecco l’infame che m’occhieggia, e mira.

LIONORA

Buon’huomo, badi pure a’ fatti suoi.

LUCCIO

575

Uscia a me guardeggia;

Né so da me che chieggia.

LIONORA

Aspetta, aspetta un poco,

Che si farà in finestra,

La tua Rita amorosa;

580

Quella ch’è sol di te ben degna Sposa.

LUCCIO

Che Rita tu mi nnomini:

Non sai che noi altri omini

Siam costanti vie più che ferro e acciaro

Non comm’a tte più mobile del maro.

LIONORA

585

Quella Rita dich’io,

Che poc’anzi abbracciasti,

Soccorresti, toccasti.

Infido, traditor, bugiardo amante;

Non t’arrossisci comparirmi avante?

LUCCIO

590

Ah, ah, t’aggio capita.

Donca se qua se trova

Na donna addeboluta,

Meza morta, sbenuta,

Che stace pe cadè de faccia nterra;

595

No la pozzo agiutare;

E pe piatà non se pò sollevare?

LIONORA

Dunque fu sol pietade, e non fu amore?

LUCCIO

Dunque si’ tu crudel, tradetoresca,

Ch’aje tradito il mio cor ch’arde com’esca.

SCENA XIV

RIENZO da dinto cantanno, e li stisse.

RIENZO

600

No ncè sdamma accossì bella,

Comm’è Nora nveretà.

LUCCIO

Adesso, ecco che bene

Chi spasema pe ttene,

Chisto d’Uscia è digno,

605

Ca te pò fa na cura a n’abbisogno.

Uscia l’ami ch’è Miedeco valente. (e se nne va.)

LILLO

Ferma. Dove ne vai. Egli è innocente

RIENZO

È na rosa moscarella,

Che mme face pazzeià.

610

O sbrannore azzellente, io te saluto.

LIONORA

Non sei più mio, no no, io ti rifiuto.

RIENZO

Mmalora: e perché chesso!

LIONORA

Perché non fai per me.

RIENZO

Mo’ moro ciesso.

LIONORA

Non giova il sospirare,

615

Mentre te non desio;

E già t’ho detto, che non sei più mio.

Son cieca a’ tuoi martiri:

Son sorda a’ tuoi sospiri,

Non posso amarti no.

620

Non veggio i tuoi tormenti,

Non sento i tuoi lamenti,

Io cor per te non hò. (e se n’entra.)

RIENZO

Va te fida e na femmena.

Cride a chelle parole belledisseme.

625

O quanto disse buono lo saccente;

Faemina nulla bona;

Pocca chesse so’ nate,

Pe fa morì a nui’aute desperate.

SCENA XV

PORDENZIA, e RIENZO.

PORDENZIA

Chi vo’ bottune pe le cammise,

630

A buon mercato le boglio dà.

Pegliatevelle, ch’a tre tornise,

Va la dozana, veccole cca.

Vuoie fa spesa fratiello,

Ca tengo belle cose.

635

Ched’è, tu no respunne?

Chess’è mala creanza;

Tengo robbe a l’ausanza.

RIENZO

Vattenne gioia mia, ca no sto cca.

PORDENZIA

Chi vo’ bottune pe le cammise;

640

A buon mercato le boglio dà.

Vide che robba tengo, videtella.

RIENZO

(Oh, chisso è frosciamiento.)

Vattenne core mio, vattenne va.

PORDENZIA

Pegliatevelle, ch’a tre tornise.

645

Va la dozzina, veccole cca.

RIENZO

No m’ammoinare cchiù, ca sto marfuso.

PORDENZIA

A Napole nc’è st’uso,

De dicere a chi venne:

Te vuo’ accattà sta cosa.

RIENZO

650

Oh, comme si’ schiattosa.

PORDENZIA

È robba de Segnore.

RIENZO

E puro llà tornammo.

Zia mia, mm’aje zucato.

PORDENZIA

Agge crejanza, avierte comme parle.

655

A mme dicere Zia? Che Segnoriello.

RIENZO

Te venga lo scartiello: fuss’accisa.

PORDENZIA

Fusse scoppettejato,

Mpiso, acciso, squartato.

RIENZO

Che buo’ da mene, testemmonia vosta

660

Che bo’ sta fattocchiara.

PORDENZIA

Ah figlio de janara; oje Rita, Rita.

RIENZO

Vattenne, o mo’ te ntommeco li rine.

PORDENZIA

Rita, Rita, addo’ sine.

SCENA XVI

RITA da la fenesta, MASILLO da la barracca, e li stisse.

RITA

Chi mme chiamma.

PORDENZIA

Vide sso perucchella,

665

Che trattare mme vo’ da pezzentella.

RITA

A Mammema pezzente,

Pezzentone, scasato, strutto, zanne,

Paglietta sfatto, brutto varvajanne.

MASILLO

Zitto, ched’è; n’è niente.

RITA

670

Ora vide chi parla?

Non t’aggio mmedecato poco nnante?

PORDENZIA

Avierte comme parle cornotone;

Che figliema tenesse qua’ bobone?

RIENZO

M’aje medecato fuorze cacche male;

675

Saut’e tozza, anemale.

Rengrazia lo Cielo

Ca nce stace Masillo lloc’a bascio.

MASILLO

Non c’è de che. Fornite, ch’è breogna.

PORDENZIA

Vreogna è chi se frusta; pezzentone.

RITA

680

O pezzente, stracciata,

Ciantella, pidocchiosa, annerecata.

RITA

Vuoie che scenna, e te ncotogna

Zuca nzogna.

RIENZO

Vajassella schefenzosa

685

Vrenzolosa.

PORDENZIA

Frabuttone, brutto boja.

MASILLO

Su fornitela ssa joja,

Ch’è breogna a contrastà.

PORDENZIA

Marranchino, si’ nquesito

690

Spilacito.

RIENZO

Roffejana, troffajola

Marejola.

RITA

Acceditelo sso mpiso.

Fuss’acciso.

MASILLO

695

Zitto tune non parlà.