Opera Buffa Napoli 1797 - 1750
  
  
 Lo Masillo, Napoli, Camillo Cavallo, 1712
 a cura di Stefania Napolitano
 
 
 
paratesto ATTO PRIMO ATTO SECONDO ATTO TERZO Apparato
 
 ATTO II
 
 SCENA I
 
 PORDENZEJA, LILLO, e RITA da la casa de Pordenzia.
 
 PORDENZIA
 Eh scumpela mo’ Lillo,
 Non tanta zeremoneje.
 LILLO
 Sì ca scordà me pozzo
 Ll’obbreco, che te tengo,
700De chello che mm’aie fatto, e che mme faje.
 RIENZO
 Si Lillo, e quanto saje.
 PORDENZIA
 Sempe te miette nnante, trevellessa (A Rita.)
 Avimmo fatto nzo che s’è potuto: (a Lillo.)
 E pegliare nne puoje lo buon’ammore.
 LILLO
705È stata na cardata de Segnore.
 RITA
 E n’ata vota. Non ce delleggiare?
 PORDENZIA
 Vi’ si vuoje appilare. (a Rita.)
 Aje fatto penetenzia co nnuje. (a Lillo.)
 Chi te dace, quant’ave,
710E fa chello che pote
 RITA
 Ad auto n’è tenuto.
 LILLO
 Tu cana mm’aje feruto. (sotta voce a Rita.)
 PORDENZIA
 Appila t’aggio ditto, ch’esce feccia. (a Rita.)
 Quanno tuorne da cca? (a Lillo.)
 RITA
715(Benemio ca mme face pazzejà.)
 LILLO
 Rita mme faje morì. (a Rita.)
 PORDENZIA
 Manco te nne vuo’ ghì? (a Rita.)
 Che mme respunne? (a Lillo.)
 LILLO
                                         No nne passa stasera.
 RITA
 Che bella razia ch’aje: che bella cera. (sotta voce a Lillo.)
 PORDENZIA
720Rita: statt’a bedè. (minacciandola.)
 Non te scordà de me. (a Lillo.)
 LILLO
 
    Cara, bella, tu mpietto mme staje.
 A tte dico, deh ntiennem’a sisco;
 Ca co ttico io spero gaudè.
725   Si tu sola mm’aie puosto nfra guaie
 Cuouto mm’aie, canazza a lo bisco,
 No defrisco lo voglio da te. (se nne va Lillo dice quest’aria a Rita, e Pordenzia la crede per sé: ma di quando in quando s’accorge che Lillo parla a Rita: e volgendosi a Rita: questa destramente finge di guardare in altra parte.)
 
 PORDENZIA
 Ora vamme decenno,
 Ca no mme so scordata:
730Chessa chi te l’ha data?
 RITA
 Che cosa? no nte ntenno.
 PORDENZIA
 Comme faie la storduta. Ssa rezzola.
 RITA
 No cierto cappanera.
 PORDENZIA
 E tu piglie dall’uommene, sprovera,
735Figlia de na Uh che mm’è stato mmocca.
 RITA
 Parla mamma; ca sempe dice buono.
 PORDENZIA
 Deciteme chi è chisso?
 Me mm’è scordato.
 PORDENZIA
 Masillo pe fortuna?
 RITA
                                      No, n’è isso.
740Si t’aggio ditto, ch’è no cappanera.
 Comme lo buoie sentire.
 PORDENZIA
 Ah malerva, trammera.
 
    Si resciuta
 Bella scola, ch’aie pegliata.
745   Ah berruta,
 No lo cride
 Si non vide,
 Mamma toja desperata.
 
 RITA
 (O ca strille, o ca cante,
750Aggio da fare peo. E si lo cielo (sempre da parte.)
 No sta co mmico sempe ntrovolato
 Io t’aggio da levà lo nnammorato.)
 PORDENZIA
 Che nfruceche, che dice ntra li diente.
 RITA
 Ca tu te piglie collera pe niente.
 
755   Quanno sarrà lo juorno,
 Che mme darraje recietto
 Dillo na vota di’: potta de nnico.
    Chiù d’uno mme va attuorno,
 E tu pe cchiù despietto,
760Faje nfenta non sentì, si te lo dico.
 
 PORDENZIA
 Te voglio dà recietto
 E quanto vaje cercanno.
 Va saglietenne ncoppa a fatecare.
 RITA
 Avisse ditto, mamma, a pecceiare. (e se nne trase alla casa.)
 PORDENZIA
765Vedite cacciottella:
 Mme stace a fa l’ammore co Masillo?
 Quanno ll’aggio prommesa a lo Notare.
 Mo’ lo vorria trovare;
 Ca sbrecato che mm’aggio
770Sto taluorno de figliema:
 Voglio penzà tantillo,
 De fa lo matremmonio co Lillo.
 
 SCENA II
 
 M. AMBROGIO, e PORDENZEIA.
 
 AMBROGIO
 
 Di sua bocca a un sol sorriso
 Va in brodetto l’alma mia. (Mente Pordenzeia va vedenno pe le quinte si vede lo Notaro.)
 
 PORDENZIA
775(Che brava ncontratura!) (Accorgendosi di M. Ambrogio.)
 AMBROGIO
 
 O mia somma ventura:
 Di tua bocca a un sol sorriso
 Va in brodetto l’alma mia.
 Vagheggiando il tuo bel viso
780Io mi metto in bizzarria.
 
 PORDENZIA
 Si’ pazzo, o staje ncarrozza?
 AMBROGIO
 Fa conto che per te son pazzo affatto.
 PORDENZIA
 E tu fatte legare ment’è chesso.
 AMBROGIO
 Ah che tu m’hai legato, io tel confesso.
 PORDENZIA
785Va trova Masto Giorgio, ca te scioglie.
 AMBROGIO
 Tu m’hai legato, e tu scioglier mi puoi.
 PORDENZIA
 Se pò sapere tu da me che buoie?
 AMBROGIO
 Pietà sol da te voglio.
 PORDENZIA
 Io non venno piatà: tu stai nn’arrore.
 AMBROGIO
790Dunque sprezzi crudel, chi  per te more?
 PORDENZIA
 Si n’aie auta cannela,
 Va coccate a lo scuro.
 Puo’ ghì pe ss’ate fere
 A Lucca mme te parze de vedere. (e se nne va.)
 AMBROGIO
795Chi la dura la vince, si suol dire:
 Né l’arbore mai cadde a i primi colpi,
 Già son’entrato in danza,
 Mi bisogna ballare;
 E Norina perciò vo’ maritare. (e se n’entra.)
 
 SCENA III
 
 RIENZO, e LUCCIO.
 
 RIENZO
800Oh chesta sì ch’è bella.
 Io dico, si vuo’ stende li scapizze
 De Nora che mme piglio nfra di sere.
 E tu dice ca Nora t’è mogliere!
 LUCCIO
 Volete, che vel dica zorfeggianno,
805O sonanno, o cantanno?
 Vel dirraggio con questa zenfonia.
 Zuruzù, Zuruzù, Nora è la mia.
 RIENZO
 E mme la vuo’ tu mo’ far’a cantare?
 Siente chesta si è bella,
810Non saccio si ceccone, o tarantella.
 
    Si tu cride Nora avè
 Ll’aie sgarrata, non se pò.
 Ca lo patre la vo’ dà.
 A mme sulo, a nullo cchiù.
815   Sso morzillo n’è pe tte,
 Te dich’io, ntiennelo mo’.
 Ca si nnante vuo’ passà,
 Te sarrà ditto, cu cù.
 
 LUCCIO
 Di grazia piano piano.
820Sentiamolo da Nora,
 A chi vol pe marito.
 Che ti par? va squisito?
 RIENZO
 Tutto va buono: ma lo patre è chillo,
 Che s’ha da contentare.
 LUCCIO
825Ma pure farrà bene,
 Dicotella sentir la ’ntenzione.
 RIENZO
 Faccio chello che buoie.
 LUCCIO
                                             Al paragone.
 
 SCENA IV
 
 LEONORA in finestra, e gli stessi.
 
 LIONORA
 (Qui l’amante e ’l rivale:
 Qualche cosa sarà.)
 RIENZO
830Vecco Nora nfenesta
 LUCCIO
 Noi restiamo accossì.
 RIENZO
                                         Cossì se resta.
 LUCCIO
 A i belli piedi tuoi, becco so’ io
 RIENZO
 (Sì becco veramente.)
 Non parlarmi a la mano.
835O inzuccherata mia dolce Sia Nora,
 Pe sapere da voi s’è ghionta l’ora
 Del gaudimento mio.
 RIENZO
 E lo stisso dich’io. Sulo nci’agghiogno,
 Ca Pateto accossì bole, e commanna;
840E te suppreco io ncrenato nterra.
 Saccio, ca si’ fegliola abbediente,
 Né nce riebbreche niente.
 LIONORA
 O bel fiore d’Abrile.
 RIENZO
 O rosa spampanata.
 LUCCIO
845Bella cchiù che no è fra stelle il Sole.
 RIENZO
 Decite di parole,
 O laura nzoccarate.
 LUCCIO
 Sperate sì, sperate. (all’uno, e all’altro.)
 RIENZO
 Che nne dice tu mo’ Nota’ sproposeto?
 LUCCIO
850Che nne dicite voi Si miniscalco?
 RIENZO
 Ca Marzo te nn’ha raso.
 LUCCIO
 Ca può ire addoranno un’altro vaso.
 LIONORA
 Tu il mio Sposo sarai. (a tutti e due.)
 LUCCIO
 Ora che dir potrai?
 RIENZO
855Cierto ch’ha ditt’a mme:
 Pocca lo patre sujo contento nn’è.
 LIONORA
 
 A te dico.
 
 RIENZO
 
                     Gnoressì.
 
 LIONORA
 
 Non intendi.
 
 LUCCIO
 
                           Dice a me.
 
 LIONORA
 
 A te voglio.
 
 RIENZO
 
                        Eccome cca.
 
 LIONORA
 
860A te sprezzo.
 
 LUCCIO
 
                          Siente vi’?
 
 LIONORA
 
 T’abborrisco.
 
 RIENZO
 
                           Dice a tte.
 
 LIONORA
 
 Vanne via.
 
 LUCCIO
 
                       Vattene va. (E se ne trase Nora.)
 
 LUCCIO
 A buon’intenditor poco parole.
 RIENZO
 Mme pare ch’averria ntiso no surdo.
 LUCCIO
865Ora frate, fenimmo queste baje.
 Sempe che trovarraje,
 Che Nora a te t’accetta,
 Io vogli’essere mpiso ed appiccato.
 Vogli’essere squartato.
870Essa ha già dato a me fede di Sposo.
 Tu ll’aje già nteso co l’arecchie vostre.
 Perzò s’avite sal ne la cocozza,
 Lasciat’andar chi mal con voi s’accozza.
 
    Tu ci perdi le parole.
875La mia bella
 Sia Norella
 Non ti vuole.
 E se ti dice sì,
 Ti gabba affè.
880   È innamorata,
 Appassionata:
 Se vuoi saper di chi,
 Squaglia pe mme. (E se n’entra.)
 
 RIENZO
 Chisto troppo se fidate: e chisto è signo,
885Ca Nora le vo’ bene, e sta securo
 De poterel’avè pe st’ata via
 Cchiù corta de la mia.
 Che bo’ fare lo patre,
 S’essa dice, non voglio?
890Aimmene, aimmè che mbruoglio.
 Ah, ca troppo aggio visto,
 Ca co isso la cana sgargejava;
 E a mme, mme delleggiava.
 
    Nora bella mme sento morì
895Si nce penzo ca mm’aje da lassà.
    Si lo core de st’arma tu si’
 Senza tene no pozzo campà. (E se nne va.)
 
 SCENA V
 
 PORDENZIA, e LILLO.
 
 PORDENZIA
 Commanna, t’aggio ditto,
 Si t’accorre quaccosa:
900Parla mo’ su; no la tenè annascosa.
 
 SCENA VI
 
 RITA affacciata da parte, e li stisse.
 
 RITA
 (Mamma parla co Lillo? Ausolejammo.)
 LILLO
 Troppo t’aggio da dicere:
 Ma la paura ch’aggio,
 Che no mme dice no, mme fa sta muto.
 PORDENZIA
905Commanna torno a dire.
 LILLO
                                                Ah, so feruta.
 PORDENZIA
 Maramene. E chi è stato?
 LILLO
 È chello ch’è lo peo,
 Ca la feruta è tanto penetrante,
 Che non pò ghì cchiù nnante.
910M’ha toccato lo core.
 Pordenzia mia, già Lillo se ne more.
 PORDENZIA
 Ora bona pozz’essere. Ched’aje?
 Parla, benaggia craje.
 LILLO
 Tu mme puo’ dà remmedio: tu schitto
915Conzolare mme puoje sto cor’affritto.
 RITA
 (Lillo parla pe mmene:
 E co Mamma la sgarra.)
 PORDENZIA
 Spapura via, no cchiù.
 LILLO
 Pordenzia tu me sfuorze a spapurare,
920E mme la faje sgarrare.
 RITA
 (Lo core te lo dice.
 Fa curto Lillo, ca la sgarre cierto.)
 PORDENZIA
 (Non pozzo tenè cchiune.)
 Che buo’ sgarrà, s’io sola
925Aggio remmedio pe lo male tujo.
 LILLO
 Gnorsì te ll’aggio ditto,
 Ca conzolà tu puoje sto cor’afritto.
 
    Conzolame, ca puoje:
 Tu lo puo’ fa si vuoje;
930E po lassa fa a mme.
    Mme sento ascevolì.
 Rita mme fa morì:
 Vide ca squaglio, aimmè.
 
 RITA
 (Quanta nn’aggio cagnate:
935Ma chisso mm’è trasuto
 Tanto dinto a sto pietto,
 Che si no ll’aggio, n’aggio maje recietto.)
 PORDENZIA
 Oh Si Lillo, Si Lillo:
 Si isso, o non si’ chillo,
940Che no ntennive lo parlare mio:
 Che non sapive nzocche foss’Ammore.
 LILLO
 La sciamma int’a sto core
 Tu nce ll’aje posta.
 PORDENZIA
                                     E comme?
 LILLO
 Tanto mm’aje ditto, e ditto.
945Pensi nfi’ che mm’aje ncappato a lo mastrillo.
 PORDENZIA
 Oh Si Lillo, Si Lillo.
 Comm’io t’aggio ncappato,
 Si pe Rita tu faje lo spantecato?
 LILLO
 Comme? Da tante juorne,
950Che d’ammore me parle, e de nzorare,
 No nn’aje ntiso ca Rita
 Ha da esse la Zita?
 RITA
 (E biva Lillo affè.)
 PORDENZIA
 E mente chesso nc’è,
955Pecché tanta paura
 De dire sì, a nzò ch’io te pregava.
 LILLO
 Non saccio di’ pecché tremmo, e tremmava,
 Fuorze pecché mme pare
 De no la mmeretà na figlia toja.
 PORDENZIA
960La mmierete sopierchio:
 Ma Rita è troppo tennera pe ttene:
 Tu la vorrisse avere comm’a mmene.
 
    Siente Lillo ch’aje da fa,
 S’aje golio de te nzorà.
965   Lassa ghì sse peccerelle,
 Moscarelle.
 Pigliat’una che t’aiuta
 Comm’a mme fatta, e schenuta,
 Ca te sape covernà. (e se nne va.)
 
 RITA
970Zi, Zi, Si Li’, Si Lillo?
 LILLO
                                         Oh fata mia.
 RITA
 Lillo: se pò sapè che baie facenno?
 LILLO
 Vao comm’a palommella
 Attuorno a ssa cannela.
 RITA
 O quanto che saje dicere.
 LILLO
975E tu quanto saie fare,
 Co ss’uuocchie che mme fanno pazzejare.
 RITA
 
 È lo vero ca mammema ù?
 
 LILLO
 
 È lo vero, e no poco de cchiù.
 È lo vero ca mammeta ù?
 
 RITA
 
980È lo vero, e no poco de cchiù.
 
 LILLO
 
 Ma Lillo tuio,
 Lo fatto sujo
 Lo sape fa.
 
 RITA
 
 La gelosia,
985Speranza mia
 Mme fa tremmà.
 
 LILLO
 
 Non dobetà
 Ca Lillo more
 Sulo pe tte.
 
 RITA
 
990Comme lo core
 Sta mpietto a mme,
 Pensalo ttu.
 
 LILLO
 
 È lo vero, &c.
 
 SCENA VII
 
 PORDENZIA sola.
 
 PORDENZIA
 Non pò esse, che Rita nci’accontenta:
995Se piglia la rezzola da Masillo,
 E po l’ammore mme vo’ fa co Lillo!
 Pordenzia, ca si’ n’asena, e perdoname.
 Da Masillo se piglia la rezzola
 Pe te lo scorcogliare,
1000E po co Lillo se vo’ mmaretare.
 Ma comme prega a mme pe Nota’ Luccio
 Po s’accosta a Masillo,
 Mo’ spanteca pe Lillo!
 Rita è fegliola de fa chesso e auto.
1005È figlia a tte Pordenzia. Ora tornammo
 A trovà lo Notare.
 Chisso s’ha da pegliare;
 Ca lo Notare po me fa avè Lillo.
 Zitto zitto, Masillo.
1010Scanagliammo pajese.
 
 SCENA VIII
 
 PORDENZIA, e MASILLO.
 
 PORDENZIA
 Masillo, schiavo tujo.
 Eccote li denare,
 E damme la rezzola.
 MASILLO
 Eccola cca. Mmalora, (fegne de cercà dint’a le sacche.)
1015No mme la trovo ncuollo;
 Perduta l’avarraggio.
 PORDENZIA
 Masillo, io rido, e poco voglia nn’aggio.
 MASILLO
 Tienete li denare, e bi’ che riesto
 Nce vo’, ca te lo dongo, eccome cca.
 PORDENZIA
1020Tu si’ pazzo, o sbarie nveretà.
 Voglio la robba mia,
 Che denare, e sdenare vaje trovanno.
 MASILLO
 Ora chist’è malanno. E si no ll’aggio.
 PORDENZIA
 Tu dimme che nn’aje fatto?
 MASILLO
1025L’avarraggio perduta, t’aggio ditto.
 PORDENZIA
 E no nte vuoje sta zitto.
 Ll’aje realata a Rita, n’è lo vero?
 MASILLO
 Io te dico ca none.
 PORDENZIA
 Appila bosciardone.
1030Ll’aggio visto co st’uuocchie;
 E mo’ mme staje a bennere papocchie.
 MASILLO
 Ma fa cunto, ch’a Rita ll’aggia data.
 Ll’avarria fatto, ca le voglio bene.
 Saje si la pozzo tenere grassosa,
1035Ca cchiù de n’auto mme manejo quaccosa.
 PORDENZIA
 
    Te lo puo’ levà da chiocca,
 Ca Rita mia,
 N’ha sfrenesia,
 De se sta lloc’a bocca,
1040E fa scagliuozze.
    Si’ lo primmo de lo munno:
 Ricc’a funno;
 A figliema non mancano di tozze. (e se nne va)
 
 MASILLO
 Ente ciantella, guitta, pedocchiosa. (mmiero Pordenzia, da po che se n’è ghiuta.)
 
 SCENA IX
 
 Mess. AMBROGIO, che s’accorge, che Masillo dice a Prudenza.
 
 AMBROGIO
1045Cos’è? cos’è? sta cosa?
 MASILLO
 N’è niente si caffè.
 AMBROGIO
 Dimmel’a me cos’è?
 MASILLO
 Fonnachera, trammera: a mme st’affrunto. (verso Prudenza.)
 AMBROGIO
 Prudenza in che t’ha offeso?
1050Dillo ad Ambrogio, dillo.
 Sai s’io t’amo, Masillo.
 MASILLO
 
    Aimmè lassame sta,
 O Dio lassame ghì.
    Sto mmalorato,
1055Sto correvato:
 No la pozzo passà
 Cierto accossì. (e se nne va.)
 
 AMBROGIO
 Ferma: dove ne vai? è già volato.
 Vorrei saper ch’è stato,
1060Per pigliar di Prudenza le difese,
 Ed obbligarla ad essermi cortese.
 Ma, se non erro, il Medico qui viene,
 E mi sembra, che stia ancor turbato.
 
 SCENA X
 
 RIENZO, e M. AMBROGIO.
 
 RIENZO
 (Cagnar’a mmene pe no sgrazeiato.
 AMBROGIO
1065Signor Lorenzo, addio.
 RIENZO
 O schiavo patro’ mio.
 AMBROGIO
 Ti veggio in viso un non so che d’affanno.
 RIENZO
 Ammico sto penzanno. (Voglio fegnere.)
 A no cierto malato,
1070Ch’arrasso sia, le sta p’ascì lo sciato.
 AMBROGIO
 Ah ah, mi fate ridere.
 Voi certo il primo Medico sarete,
 Che degl’infermi passione avete.
 RIENZO
 A lo Colleggio ditto mme trovava,
1075Ca sto malato propio non moreva.
 AMBROGIO
 E sel dicevi morto, e si sanava?
 RIENZO
 Io tanno l’accedeva.
 AMBROGIO
 O bene in verità.
 RIENZO
 Dico, ch’io l’accedeva
1080S’avesse ntale caso pricolato.
 AMBROGIO
 Or via lasciam’andar ogni ammalato:
 Ed in vece di morte, e infermità,
 Parliam di sanità, di far figliuoli.
 Già volete mia figlia?
 RIENZO
1085Io troppo la vorria, s’essa me piglia.
 AMBROGIO
 Come? che dici?
 RIENZO
                                 Signorsì: ca essa
 Ten’auto ncapo, e bo’
 AMBROGIO
                                         Non so che dici.
 La può tener il capo a che che sia.
 Ch’io sono il capo, e voglio a casa mia.
1090Io la farò calare,
 E vi farò sposare.
 RIENZO
 
 Ajutame Ammore,
 Ca mo’ lo puo’ fa. (mentre Ambrogio batte da sua casa.)
 
 SCENA XI
 
 LEONORA prima in finestra, poi in iscena, ed i già detti.
 
 LIONORA
 Chi è là? chi è là? chi batte?
 AMBROGIO
1095Norina cala giù, ch’io qui t’attendo.
 LIONORA
 Adesso adesso scendo.
 RIENZO
 
 Lo siente sto core,
 Che strilla piatà. (Finisce l’aria mentre sta calando Leonora.)
 
 LIONORA
 Eccomi padre caro.
 AMBROGIO
1100Io voglio o cara figlia
 RIENZO
 Schiavo de Vossoria.
 AMBROGIO
 La fe’ di sposo, questi or or ti dia.
 LIONORA
 Come! Quando! che dite!
 Mio dolcissimo padre (Ginocchiandosegli avanti.)
 AMBROGIO
1105Non c’è come, né quando.
 Mi sei tu figlia; ed io così comando.
 LIONORA
 
    Son figlia, è vero:
 Di me il pensiero,
 A voi si dà.
1110Ma di forzarmi il cor
 Non lo pensate.
    Il cor ch’è mio,
 Nutre un desio
 Di libertà.
1115E usandomi rigor
 Voi v’ingannate. (se n’entra in casa.)
 
 RIENZO
 Che dice mo’ Si Ambruoso:
 N’è comme te dich’io?
 AMBROGIO
 Eh che dovrà obbedire a un cenno mio.
 RIENZO
1120Lo Cielo accossì boglia.
 Ma si chessa non vole
 Non ce servono fatte, né parole.
 AMBROGIO
 
 Tu vedrai quel che dich’io,
 Se sarà più pertinace
1125Al voler del genitor.
 
 RIENZO
 A mme dice lo core,
 Ca farraje, e sfarraje senza fa niente:
 E lo Notaro ne sarrà contente. (se ne va.)
 AMBROGIO
 
 Così fosse al caso mio;
1130Ch’io trovar potessi pace
 Al mio male al mio dolor. (e se n’entra.)
 
 SCENA XII
 
 PORDENZEIA, e LUCCIO.
 
 PORDENZIA
 Comme dice tu mo’,
 Ca no mme facci’attenne la parola?
 LUCCIO
 Non saccio di che parli.
1135E perciò non so dar, degna resposta.
 PORDENZIA
 Vide che faccia tosta!
 Comme? no t’allecuorde l’appontato?
 LUCCIO
 Il tempo antico ora è di già passato?
 PORDENZIA
 Quanta vote pe Rita
1140Mme si’ benut’attuorno
 A fa lo giurgiuleo:
 Mo’ comme no mme ntienne, e faje zi meo.
 LUCCIO
 
    Mi fai ridere, e de voglia
 Bella donna nveretà.
1145   Questo cor, ch’era nchiajato
 Ncatenato,
 Staci’asciuoto, senza doglia,
 E si gode libertà.
 
 PORDENZIA
 No nnè comme la cunte Si Notare,
1150A na figlia de mamma zannejare.
 Si ll’aje data parola attiennencella.
 LUCCIO
 Non si mantien parola femmenella.
 PORDENZIA
 Ente piscia portella, pezzentone.
 LUCCIO
 Non vuoj portà rispetto ad un Notare,
1155Che ha fatto cchiù cautele, ed istrumenti
 Polise, e testamenti,
 Che non so’ arene al lido, acqua a lo mare.
 PORDENZIA
 Co mmico aje tu da fare:
 E nc’è ssa Vecaria,
1160Pe dà castico a sa forfantaria.
 
 SCENA XIII
 
 RITA, e LEONORA dalle finestre, ed i già detti.
 
 RITA
 Che rommore ncè lloco?
 LIONORA
 (Che grida strepitose.)
 PORDENZIA
 Non siente che mme dice sso Segnore?
 RITA
 Che cosa dice?
 PORDENZIA
                              Ca non vo’ cchiù a ttene.
 RITA
1165Comm’io volesse a isso.
 È agresta, mamma, è agresta.
 LUCCIO
 Ma non mme dà fastidio a li denti.
 PORDENZIA
 Sta zitto, non parlare, ommo da niente.
 RITA
 Mamma lassalo ire,
1170Ca si be’ mm’addotasse,
 No lo voglio vedere, né sentire.
 PORDENZIA
 Che dice tune: ll’ha da fa pe forza.
 LUCCIO
 Sta forza chi la fa?
 PORDENZIA
 Chi pote a sta Cetà.
 LUCCIO
1175Donnicciuola non sai tu chi son’io.
 LIONORA
 (In tropp’impegno veggio or l’amor mio.)
 PORDENZIA
 
    Mo’ ncoppa a no carrino
 Te voglio fa votà.
    Te cride ca Pordenzia
1180Nonn’ave canoscenzia,
 E non se pò ajutà.
 
 LUCCIO
 Mi chiavarrai di naggio entro il pertugio.
 RITA
 Schefienzia, che dice?
 Si parle che te ntenno, io te responno.
1185E te faccio sentire
 LIONORA
 (Non posso più patire)
 Averti come parli villanella.
 RITA
 O la gran Segnorella,
 Che mme chiamma vellana.
 LIONORA
1190Che forse è cosa strana?
 RITA
 O vellana fetente, pedocchiosa,
 Vajassa, perchiepetola zellosa.
 La capo te lav’io senza sapone.
 LUCCIO
 Leva l’accasione, Sia Norella.
1195Non ti convien pigliartela con ella.
 RITA
 
 Facce storta.
 
 LIONORA
 
 Contrafatta.
 
 RITA
 
 Crepa schiatta.
 
 LUCCIO
 
 Hai da far con Nora sì.
 
 RITA
 
1200Via mo’ fatt’a ttenè.
 
 RITA
 
 Comm’è bella.
 
 LIONORA
 
 Che musino?
 
 RITA
 
 La sia bella.
 
 LIONORA
 
 Bel visino.
 
 RITA
 
1205Donna Nora.
 
 LIONORA
 
 Va in malora.
 
 RITA
 
 Si se picca.
 
 LIONORA
 
 Va t’impicca.
 
 RITA
 
 Bella facce, villa, vi’.
 
 LIONORA
 
1210Che bel muso, vello, ve’.
 
 LUCCIO
 Tutt’è la rabbia, che la rode, e smacena,
 Ma si avite giodizio
 Ve ne potrete ridere.
 LIONORA
 Ben così credo anch’io:
1215Ma non sai Luccio mio,
 Che son contro di noi il Cielo e ’l fato?
 LUCCIO
 Aimmè, che sarà mai? che fu? ch’è stato?
 LIONORA
 Il crudo genitore.
 Vuol, che ’l Medico sposi; ed oggi appunto
1220Han conchiuso il trattato.
 LUCCIO
 O me tapin scasato,
 E comme facerrimmo?
 LIONORA
 Io già penso, e ripenso,
 E ’l rimedio non trovo.
 LUCCIO
1225Io diciarrei na cosa.
 LIONORA
                                       E che sarebbe?
 LUCCIO
 Fuggiamo, e ghiammonencene da qua.
 LIONORA
 Ottimo in verità. Ma il modo, il come.
 LUCCIO
 Vestitevi da huomo, e appalorciammo
 Mentre dorme lo Gnore,
1230S’è vero, che per me vi pogne amore.
 
 SCENA XIV
 
 RIENZO, LUCCIO, e LEONORA.
 
 RIENZO
 (E semp’attuorno cca sto moscheglione
 La spia voglio fa da sto pontone.)
 LIONORA
 Non ho le vesti, e poi non posso uscire,
 Se mio padre, ch’è un huom pien di sospetto,
1235La notte tien le chiavi a capo il letto.
 LUCCIO
 A chesso nce pens’io.
 Vi porterò le chiavi, o ’l chiavettiero.
 LIONORA
 Approvo il tuo pensiero.
 LUCCIO
 
    Jammoncenne mia cara, mia bella
1240Ca volimmo godere, e scialà.
    Vado,e torno, e a cca n’altra sghizzella
 Ognincosa vi voglio portà.
 
 RIENZO
 Che bole gnefecare
 Sta cosa de portà no chiavettiero!
1245Non saccio a che penzare.
 So’ mmiezo nzallanuto.
 No mme vuoje dare ajuto,
 Pe no momiento, o Ammore.
 Ma mme parla lo core,
1250E mme dice: nne vuo’ sapè lo vero,
 Fignete chiavettiero.
 
 SCENA XV
 
 LILLO, e MASILLO.
 
 LILLO
 Te dico ca la figlia, e no la mamma
 M’ha puost’int’a lo core tale sciamma,
 Che tutto m’ha allummato;
1255E si n’aggio soccurzo, io so’ barato.
 MASILLO
 Addonca vaje appriesso
 A ssa fegliola ne?
 LILLO
 Masillo, accossi è.
 
    Chessa è chella
1260Che me fella,
 Che mm’adaccia,
 Mme spetaccia,
 Che mme fa
 Sparpatejà.
1265   Masillo mio si vuoje,
 Ajutame, ca puoje,
 Agge de me piatà.
 
 SCENA XVI
 
 PORDENZIA, e li stisse
 
 PORDENZIA
 Masillo, si ccane?
 MASILLO
 A lo commanno mio.
1270Ched’è? te veo lesta,
 E ce quaccata festa da guardare?
 LILLO
 Pordenzia te so’ schiavo.
 PORDENZIA
 Mo’ so’ co tico. Tu no mme deciste, (secretamente a Masillo.)
 Ca figliema volive pe mogliere?
 MASILLO
1275Cierto ca ll’aggio ditto,
 E non credeva de te fa vreogna.
 PORDENZIA
 Non serve: parlà d’auto: quanno vuoje
 Facimmo li capitole.
 MASILLO
                                        So’ lesto.
 LILLO
 (Annevina che parlano nfra lloro.)
 PORDENZIA
1280Sacce ca piglie chi ha le mano d’oro.
 MASILLO
 Saccio, ch’è figlia a ttene, e tanto va.
 LILLO
 Sso trascurzo è fornuto?
 PORDENZIA
 Lillo mio è scomputo.
 Ora vattenne, e torna
1285Priesto da cca: me ntienne?
 MASILLO
 Mo’ mme ne vao ma siente:
 Di’ a Rita, che mme stia allegramente.
 Valle decenno, si mme vuoje bene.
 
 Ca priesto priesto ha da scialà.
1290E già lo sango dint’a le bene
 Pe l’allegrezza zompanno va. (e se nne trase.)
 
 LILLO
 Pordenzia: mme puo’ di’ pecché Masillo
 Tant’allegrezza ha ncuorpo?
 PORDENZIA
 Pecché arrevato è a fa no bello cuorpo.
 LILLO
1295Ed è?
 PORDENZIA
              Se piglia Rita pe mogliere.
 LILLO
 Masillo piglia Rita!
 PORDENZIA
                                      Gnoressine.
 E tu puro starraje allegramente:
 Pocca si Rita nguadeja Masillo:
 Pordenzia piglia Lillo.
 LILLO
1300Nnanze me scenna gotta arrasso sia,
 Ch’io faccia sto sgarrone. (O brutt’arpia.) (e se nne va.)
 PORDENZIA
 Ched’è Lillo? ched’aje?
 Fremma, aspetta; addo’ vaje. (e secotanno se nne trase.)
 
 SCENA XVII
 
 RIENZO da Chiavettiero.
 
 RIENZO
 Chiave, chi vole chiave.
1305Povera Medecina a che si’ data.
 Ora sì, ch’è lo vero,
 Ch’ogne Miedeco nuosto è chiavettiero.
 
    Chi vo’ chiave mascoline,
 Femmenine,
1310Chiave grosse, mezzanelle,
 Pe portune, pe portelle,
 D’ogne sciorte ll’aggio cca.
    Si volite mascature,
 Le fatture,
1315Metteture,
 Io ve voglio regalà.
 
 SCENA XVIII
 
 RITA, e poi LEONORA dalle finestre, e RIENZO.
 
 RITA
 O Chillo? No nce siente.
 RIENZO
                                              A mme bolite?
 RITA
 Pigliate quatto rana,
 E crastame sta cana.
 RIENZO
1320Non te posso servire,
 Pocca n’aggio li fierre, che nce vonno.
 LIONORA
 (Mi parve di sentire
 Per la strada un chiavaro,
 Il manderà il Notare.
1325Eccolo in verità.)
 RIENZO
                                  Vuoje cchiù denare?
 RIENZO
 Craje torno a passà.
 LIONORA
 Buon huomo.
 RIENZO
                            Che bolite?
 LIONORA
 Avessi per ventura
 Una chiave mezzana mascolina.
 RIENZO
1330Gnorsì, creo ca nc’è. Veccola cca.
 LIONORA
 Ponetela qui dentro, (cala lo panaro.)
 Acciocché se va bene
 Possa adesso vedere, ed osservare.
 RIENZO
 Chess’io ll’aggio da fare.
 RITA
1335Non siente. (Ente creanza.
 Sta parlanno co mmico,
 E chella Segnorella
 Me lo leva da nante, e lo vo’ essa.)
 Non siente; a chi dich’io?
 RIENZO
1340Fegliola mia, che pressa puorte, aspetta,
 Aspetta nzi’ a dimane,
 Ca po torno da ccane, e si’ servuta.
 LIONORA
 Sollecita.
 RIENZO
                    Sta lesta.
 RITA
 (Quanta ne fa sta scigna a la fenesta.) (E mentre va da sotto la casa di Rita alla casa di Leonora, sopraggiunge Luccio.)
 
 SCENA XIX
 
 LUCCIO, e li stisse.
 
 LUCCIO
1345Nora è cca pronto tutto. (e mette tutto nel panaro, e Leonora il tira.)
 RIENZO
 Mmalora chi è benuto
 E sconcecà lo juoco.
 LIONORA
 Venisti a tempo, o caro.
 RIENZO
 Si tu sapisse pecché nn’aggio pressa,
1350Mo’ lo piacere tu mme faciarrisse.
 RIENZO
 T’aggio ditto ca no, che buoje da mene.
 LUCCIO
 Questo il Medico pare.
 RIENZO
 Vi’ che malanno è chisto.
 LUCCIO
 Al sicuro ch’è isso:
1355Che mmenzione è chesta.
 Mme vaje facenno maschere, n’è vero?
 RIENZO
 Te suonne, Signor mio, so’ chiavettiero.
 LUCCIO
 E questa, che tu porti, ribaldone
 Non è barba a posticcio. (gli strappa la barba.)
1360Ah brutto bosciardone
 Falzario chiavettiero,
 Medico sbregognato.
 Mo’ ti farò veder che saccio fa. (se ne va.)
 RITA
 Ah, ah, ah.
 LIONORA
                       Ah, ah, ah, ah.
 RITA
1365O chesta è bella.
 RITA - LIONORA
                                 Ah, ah. (e se n’entrano.)
 RIENZO
 
    Che breogna: isciù che ghioja:
 Cchiù non pozzo comparé.
    Già na chiaveca m’aspetta.
 Priesto curre, va te jetta.
1370Non te fare chiù a bedè.
 
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional