Lo Masillo

Lo Masillo, Napoli, Camillo Cavallo, 1712

a cura di Stefania Napolitano

paratesto ATTO PRIMO ATTO SECONDO ATTO TERZO Apparato

ATTO III

SCENA I

RIENZO, e LILLO.

RIENZO

Lo spestello,

Scocommello.

No mme fa Lillo jurà.

LILLO

Gnorenno, ntienneme a mme:

1375

È mal’erva, assalo ghì.

RIENZO

Si lo patre co lo scritto

Te l’avesse data a tte:

Che derrisse tu mo’ di’?

LILLO

Ma s’è tristo t’aggio ditto;

1380

Tu lo ttujo le puo’ dà,

Pe la scomper’accossì.

RIENZO

Lillo, tu che si’ n’ommo de iodicio:

Dimm’a mme si va buono,

Fuirene na giovane norata,

1385

Che ll’ha lo patre a n’auto mmaretata?

No lo ddico ad Ambruoso,

Pe non ce fare nascere n’aggrisso.

Ma vedè mme lo boglio io co isso.

LILLO

Zitto: ca sento gente.

1390

Jammoncenne, ch’è notte;

E lassa far’a mmene.

RIENZO

Io vao a fa na viseta de pressa:

Te so a trovà a la casa.

Nce vedarrimmo da cca n’ato poco.

1395

Vide de mette, Lillo, acqua a sto fuoco.

SCENA II

LUCCIO vestuto de sciammerga co lo farraiuolo.

LUCCIO

È Notte, è notte assai, e mi dispiace,

Che la Luna splendeggia

Comme se fosse propio mezzo giorno.

Nfaccia mi metterò questo cappotto

1400

Che conosciuto non sarò di botto.

Mi conforta una doce speranza

E mme dice,

Che felice

Mme vo’ fare il Dio d’amor.

1405

Si Norella m’asserva costanza;

Sarrà bero

Nzò che spero;

Ne cchiù teme questo cor.

Io le voglio fiscare.

1410

Chi sa; se fa nfenestra:

Le dico ca so’ cca

Pronto p’appalorcià. Zi, zi.

SCENA III

LIONORA vestita da huomo, ch’esce di casa nello stesso tempo che fischia Luccio.

LIONORA

Zi, zi.

LUCCIO

Zi zi Norella.

LIONORA

Luccio mio.

LUCCIO

Io di pregezza moro.

LIONORA

Io di timore.

LUCCIO

1415

E di che temi cara, anima bella.

Com’all’istesso punto,

Ch’io qui vengo a sapere,

Che volevate fare;

Ti trovo lesta pe ce nn’affuffare?

LIONORA

1420

Per fuggir da mio padre,

Ch’al Medico volea darmi domani;

Mercè de le tue chiavi io son’uscita:

E a te me ne veniva.

LUCCIO

O car mio cor, viva per sempe, viva.

1425

Se vi paresse giammone per quinci.

LIONORA

Io son pronta a seguirti.

SCENA IV

LILLO, co spata, rotella, e lanterna, vestuto de sciammerga, vene da la stessa strata pe do’ chille se nne vanno.

LUCCIO

Chi vaglià? Chi vaglià?

LIONORA

È uno che cammina, e se nne va. (e se nne vanno Luccio e Lionora.)

LILLO

Mme siscano l’arecchie,

1430

Ca chesta ncignatura,

È rechiammo de mala scompetura.

Io tremmo de paura:

Mme sta friddo lo core;

Non saccio che sarrà.

Tu Rita m’assecura:

Ma vence lo tremmore,

Che mammeta mme dà.

SCENA V

RITA affacciata, e LILLO.

RITA

Chi sa si vene Lillo:

E mamma vo’ che nguadeja Masillo

1435

Ncell’aggio ditto da chell’ata banna,

Mm’ha ditto ch’a doi’ora,

Cca se trovava pe nce nne fuire;

Mo’ non vede venire.

LILLO

Ma n’è lo schiecco mio che sta affacciato?

RITA

1440

Foss’isso chillo, che sta llà fermato?

LILLO

Rita?

RITA

Lillo?

LILLO

Che faje?

RITA

Mo’ mme ne scenno.

LILLO

Curre, ca cca t’aspetto

Gioiello de sto pietto.

Mo’ sì ca veramente mme vuoie bene

1445

O Rita de chest’arma,

Arma de chisto core,

Core de chesta vita,

Rita mia bella, Rita.

Io la voglio aspettare a sto pontone.

SCENA VI

RITA da la casa, e appriesso PORDENZIA meza spogliata, che la secuta.

RITA

1450

Lillo mio addo’ sine? (e Pordenzia l’afferra.)

PORDENZIA

Ah guittarella, porca, malenata,

Addov’jere abbejata?

LILLO

(Pordenzia! Aimmè che faccio.)

PORDENZIA

No respunne?

RITA

Che cosa?

PORDENZIA

1455

Ah baiassa, zellosa. (e le dà.)

LILLO

(Buon’è che mme n’abbia.)

PORDENZIA

Ma chi è chillo che fuie?

Guardia, gente, tenitelo;

Squartatelo, accedi telo.

1460

Dimme chi è chillo, Rita o mo’ te scanno.

RITA

Io no nne saccio niente.

PORDENZIA

Non saje niente, e fuive?

Che cosa? E te nne ghive?

Saglimmoncenne suso,

1465

Ca te voglio acconciare sso caruso.

RITA

Mamma mia, che t’aggio fatto.

Maramene annerecata.

PORDENZIA

Mme volive fa sso tratto?

Ah scrofella sbreognata. (e se nne traseno.)

SCENA VII

AMBROGIO prima da dentro, e poi in istrada con una veste di camera.

AMBROGIO

1470

Norina, oimè, Norina, (da dentro.)

Norina dove sei?

O Dio ella è fuggita: (poi fuori.)

Quest’uscio senza stanga me l’addita.

O vergogna, o rossore, o vitupero.

1475

Sepellisciti vivo

Ambrogio sventurato,

Per sempre vergognato.

Infelice, che farai

Senza figlia, e senza onor.

1480

Sorda morte, a che non dai

Presto fine al mio dolor.

Misero, che rìsolvo.

Dove corro a quest’ora;

Se ’l colpo m’ha così rotto, e snervato,

1485

Che già mi manca il fiato. (Si siede in un poggiuolo ch’è in un canto mezzo svenuto.)

SCENA VIII

RIENZO da Vantaggiato de Galera tutt’armato.

RIENZO

Ora vide st’ammore de Norella,

Mm’ave arreddutto a fa l’accedetaro.

Ma me pò di’ caccuno;

Ch’accedetaro e Miedeco è tutt’uno.

1490

Pensammo a case nuoste.

Rienzo: te vasta ll’armo,

D’accide Nota’ Luccio?

Mme vasta ll’armo dice?

Venga lo Si Notare;

1495

Venga, ca mme ne vole nnommenare.

Saie che cunto faccio d’isso?

Quanto va, vi’ sta spotazza.

Di’ ch’è ghiuto lo scurisso,

Si lo piglio co sta mazza.

1500

Ma chi è chillo accovato a lo pontone?

Vedimmo de non fare qua sgarrone.

AMBROGIO

Ah Norina, Norina.

RIENZO

Chisto chiamma Norella,

E mme parla toscano?

1505

È lo Notare, e ghiocome sta mano.

Mo’ te le chiavo ncuorpo na stoccata

No. Le vasta na bona mazzeiata.

Ah guitto caperrone,

Notare frabottone. (e batte Ambrogio.)

AMBROGIO

1510

Oimè, oimè son morto.

RIENZO

Uh mmalora: è lo Gnore.

Ora vide ch’arrore.

AMBROGIO

In che t’offesi io mai, che m’assassini?

RIENZO

Gnore: t’aggio dat’io, ma non volenno.

1515

Mme credeva de dare,

A Luccio lo Notare;

Per far io chello ch’attoccava a buie.

AMBROGIO

E che m’ha fatto mai questo Notaio

Ch’a me tocca ammazzarlo?

RIENZO

1520

Chisso, co chiave fauze

Nne vo’ Nora fuire.

AMBROGIO

Ah; ch’è tardo l’avviso, e il tuo venire.

RIENZO

Donca nne l’ha foiuta?

AMBROGIO

Messer sì, Messer no. (Non so che dire.)

RIENZO

1525

Gnore, parlame chiaro.

Dimme mo’ si nc’è Nora,

Ca la levo da mano a la mmalora. (subito)

Si Norella mia non c’è,

Luccio ll’ha da tenè,

1530

Mo’ te la porto.

AMBROGIO

Ah, ch’è comun l’affronto.

Lorenzo, figlio caro.

Norina non è in casa;

Né so dir dove sia.

RIENZO

1535

Ncasa de lo Notare, addo’ vo’ essere.

(Ah cacciottella.) Vo’ venire Uscia?

AMBROGIO

Vo’ venir certamente.

Ma lasciate ch’io fermi questa porta.

RIENZO

Priesto ca chesso poco, e niente mporta. (se nne vanno.)

SCENA IX

MASILLO sulo.

MASILLO

1540

Bene mio, pe la preiezza

No nce capo int’a li panne.

Gaudarraggio ssa bellezza,

Che m’ha date tant’affanne.

Chesta mme pare ll’ora,

1545

Che mm’ha ditto Pordenzia,

De saglire a la zita;

De dà l’aniello a Rita.

Mme voglio chiano, chiano abbecenare

E chianillo chianillo tozzolare.

SCENA X

LILLO de la stessa manera, e MASILLO.

LILLO

1550

Si Pordenzia mm’ha ’llommato,

Può di’ Lillo, buonanotte,

Rita mo’ n’è chiù pe tte.

Vide che nce sarrà stato,

Poverella, quanta zotte

1555

Abboscate n’ha pe mme.

SCENA XI

RITA, e po PORDENZIA nfenesta, e li stisse.

RITA

Chi è? chi è? chi è lloco?

MASILLO

(È Rita, e sta arraggiata!)

LILLO

(Rita stace affacciata,

E uno toppeteja? Ausolejamnmo.)

PORDENZIA

1560

Chi tozzola? Chi eje?

MASILLO

È Masillo.

RITA

Masillo?

Mamma mme jetto mo’ da sto barcone.

PORDENZIA

Zitto, Scigna, lenguta.

RITA

No nce vo’ zitto Mamma.

1565

Pigliate tu Masillo,

Ca io mme piglio Lillo.

PORDENZIA

Trase dinto sfacciata, ca t’agghiusto. (E se ne trase, tirandose Rita.)

MASILLO

Piglia Masillo chesto;

E torna pe lo riesto.

LILLO

1570

O Rita bella, musso nzoccarato.

Quanto te so’ obbrecato.

Masillo mme la vo’ fare pe mmano:

E Rita tene ntuosto. Ma lo cano

Non se parte da cca. Stamm’a bedere.

MASILLO

1575

Non saccio che mme fare:

Si mme ne vao, o torno a tozzolà.

SCENA XII

PORDENZIA da la casa, MASILLO, e LILLO.

PORDENZIA

Masi’?

MASILLO

Porde’? Pordenzia

Io so’ benuto;

Ma troppo aggio sentuto.

LILLO

1580

(Vedimmo de guastare qua matassa.)

Pordenzia, buonanotte. Addio Masillo.

PORDENZIA

Bona notte Sio Lillo.

MASILLO

Schiavo tujo.

PORDENZIA

Torn’a cca n’ato poco. (a Masillo.)

MASILLO

T’aggio ntiso. (a Pordenzia.)

Ve so base le mmano.

PORDENZIA

Schiavo.

LUCCIO

Schiavo.

PORDENZIA

1585

Lillo: troppo averria da dire, e fare:

Ma torna a cca n’at’ora;

Ca vedarraggio de te conzolare.

LILLO

Lo Cielo te lo renda. A revederce. (E se nne trase.)

PORDENZIA

Va ca t’aspetto. O comme vace bona.

1590

Rita sta meza meza mmertecata:

Nche Masillo la mano ll’ha toccata,

Vecco ca Lillo vene,

E toccarralla a mmene. (e se nne trase.)

SCENA XIII

LIONORA sola, pure con abito d’huomo.

LIONORA

Uccidetemi fieri martiri:

1595

Date posa a la pena del cor.

A una infelice,

Sperar non lice,

Ne’ suoi sospiri,

Altro ristor.

1600

Non sì tosto mi libero dal padre,

Che di giustizia fieri empi ministri.

M’arrestan coll’amante:

E appunto in quell’istante,

Che sciorta son da loro

1605

Colla forza de l’oro,

Sopraggiunge mio padre, e l’altro amante,

E fugitiva qui porto le piante.

Oimè, che l’uscio è chiuso.

Lassa me che farò misera, e sola?

1610

Stelle è troppo rigor.

Uccidetemi fieri martiri:

Date posa a la pena del core.

SCENA XIV

MASILLO, e detta.

MASILLO

Si Pordenzia vo’ Lillo?

Farrà lo sfuorzo sujo pe mme dà Rita;

1615

Ma si Rita è ncocciata;

Io no la veo cierto ssa jornata.

LIONORA

(Questi è Masillo, se non prendo abbaglio.)

MASILLO

(Ma chi è chist’auto, che mme tene mente?)

LIONORA

(Questi nel mio periglio

1620

Aita mi può dar, guida, e consiglio.)

MASILLO

(Che bo’ chisto da mene.)

LIONORA

Masillo mio, s’in te pietade alberga,

Soccorri una Donzella sventurata,

Che farà senz’ajuto, assassinata.

MASILLO

1625

E addov’è ssa fegliola?

LIONORA

La Donzella son’io,

Nora figlia d’Ambrogio.

MASILLO

Ve canosco gnorsì.

Comme jate accossi?

LIONORA

1630

M’ha trovato mio Padre,

Che con Luccio il Notar me ne fuggiva.

Gli esco di mano, e qui tornando trovo

Che chiuso è l’uscio mio.

Sarò, lassa, ammazzata;

1635

O al Medico, per forza maritata.

MASILLO

Aggio ntiso; e canosco Nota’ Luccio.

Uscia venga co mmico cca becino

A na Commare mia. Lassa fa a mmene.

LIONORA

Andiamo. Il Ciel ti dia sempre del bene. (ed entrano.)

SCENA XV

LUCCIO sulo.

LUCCIO

1640

Astri fieri ncocciati co mme:

Deh fermate:

Deh cessate

Site meco vuie troppo crudel,

Pecché date, e levate, pecché

1645

Il diletto,

L’arricetto

A n’amante costante, e fedel?

Oimè non so chi viene.

SCENA XVI

MASILLO, e detto.

MASILLO

Mo’ si cca lo Notare

1650

Ha da fa che lo Jodece a contratto,

Mme lasse Rita mia.

LUCCIO

Questo mi par Masillo? Ello è per certo.

Bona notte Masillo. Avessi visto

Un giovane da qqua?

MASILLO

1655

Na giovane vuo’ dicere,

Che no sbarvato pare.

Saccio quanto vuo’ dicere Notare.

LUCCIO

Io non intendo certo il parlà vuosto.

MASILLO

Uscia no ntenne a mmene:

1660

O io no ntenno a buje?

Ora s’aje tu golio d’avere Nora:

Aje da fare che Lillo

Lasse Rita a Masillo.

LUCCIO

Pur che Nora sia Mia,

1665

Farò quanto vuoi tu.

MASILLO

Chi so’ chiste, che beneno da cca.

LUCCIO

Ritiriamci, chi sa. (E se mettono da parte.)

SCENA XVII

RIENZO, AMBROGIO, e detti.

RIENZO

Sto penzuso: ma penzanno.

Io non saccio che mme di’,

1670

Io non saccio che mme fa.

Penso mo’ ca sta scialanno

Lo Notaro, saie co chi?

Vide comme io pozzo sta.

AMBROGIO

O Dio: perché son vivo?

1675

Per sentirmi ad ogni ora

Rimproverare, oimè, le mie vergogne.

MASILLO

Mo’ è tiempo d’accordare sse Zampogne.

Statte tu lloco. (a Luccio.) Schiavo, (Agli altri.)

Addio Si Ambruoso.

AMBROGIO

Cos’è Masillo mio?

MASILLO

1680

Uscia stia allegramente;

Non parlà de vregogna.

Ched’è: lo si Notare

N’è ommo de co ttico apparentare?

AMBROGIO

Già pubblico è per tutto il vitupero.

1685

Cca no ncè betoperio che tenga.

Datencella Si Ambruoso.

Ca lo Si Rienzo po se pò pegliare

Ciulla la Sore de lo Si Notare.

AMBROGIO

Rispondetegli voi Signor Lorenzo.

RIENZO

1690

Che bolite vuie mo’ che dich’io:

Tutto lo gusto vuosto è gusto mio.

LUCCIO

Ecco a baciar le scarpe i piedi vostri,

Luccio che v’ave affeso.

Ma del mio gruosso errore

1695

Non è stato colpa Ammore.

MASILLO

Lossoria non dà Ciulla a lo Si Rienzo?

LUCCIO

Quanno esso l’azzetta io so’ contento.

AMBROGIO

Nora mia dove sta?

MASILLO

Mo’ ve la porto cca. (ed entra.)

AMBROGIO

1700

Alzati Signor Luccio, e già, che ’l Cielo

Ha voluto così, così vogl’io.

LUCCIO

O Gnore, o Signor mio.

E voi Signor Laurenzo,

Mm’accettarrie per vostro cainato?

RIENZO

1705

Mme ne stimmo norato.

LUCCIO

No mm’odiarrite più.

RIENZO

De lo passato no nne parlo cchiù.

SCENA XVIII

MASILLO, LEONORA da huomo, AMBROGIO, LUCCIO, e RIENZO.

MASILLO

Cammina. Di’ ca no l’haje fatt’a posta.

Si Ambruoso, eccove cca Norella vosta.

LIONORA

1710

Ecco Nora a tuoi piedi,

Che ti chiede pietà del suo fallire. (inginocchiata.)

MASILLO

Via ca t’ha perdonata, (facendo alzar Lionora.)

E t’ave a Luccio tuio mmaretata.

N’è lo vero Si Ambruoso?

AMBROGIO

1715

Sì che Luccio è ’l suo Sposo.

LIONORA

O caro padre. (e va per inginocchiarsi di nuovo, e Masillo l’impedisce, e non la fa né men parlare.)

MASILLO

O mamma.

Via no nne sia cchiune.

È benuto lo tiempo, Si Notare,

Che Rita mm’aje da dare.

LUCCIO

1720

Pur ch’ella nci consenta,

Farò, che Lillo no nce penzi affatto.

MASILLO

Vecco ca se nne vene guatto, guatto.

LUCCIO

Chi, Lillo?

MASILLO

Gnoressine.

LUCCIO

Lillo, sappi che data aggio parola,

1725

Di dar Rita a Masillo.

SCENA XIX

LILLO vestito come prima, e detti.

LILLO

Ma n’avite aggiustato Rita, e Lillo.

SCENA XX

PORDENZIA da la fenesta, e li stisse.

PORDENZIA

Masillo non compare. Uh quanta gente!

Jamm’a bedè ched’eje. (e se nne trase.)

LUCCIO

Hai da far ciò ch’io dico.

LILLO

1730

Nnanze m’accido co le mmano meje.

RIENZO

Te commanna lo masto,

No rebbrecare cchiù, ca non commene.

MASILLO

E po la mamma la vo’ dare a mmene.

LILLO

Si non sentite Rita

1735

Vuje parlate a lo viento:

Chiammammola, e bedite, che nne dice.

Eccola ccane. None, ch’è la mamma.

SCENA XXI

PORDENZIA da casa, e detti.

MASILLO

Pordenzia?

PORDENZIA

Masillo?

LUCCIO

Vuoi che Masillo sposi Rita.

PORDENZIA

Voglio

RIENZO

1740

Ll’aje sentuto?

LILLO

Gnorsì.

Ma Rita diciarrà,

Ca no lo bole fa.

MASILLO

Mamma va saglie, e portale st’aniello.

PORDENZIA

Mo’ saglio. (e se nne trase.)

AMBROGIO

La va mal per te fratello.

LILLO

1745

Mo’ vedimmo si Rita non è contenta.

RIENZO

Farrà chello che dice mamma soja.

LILLO

S’è chesso m’arrecetto.

AMBROGIO

In donna non fu mai stabile affetto.

SCENA ULTIMA

RITA strascenata da PORDENZIA, e tutte.

RITA

Ca mme faje comm’a tonnina,

1750

Lillo sulo aggi’a peglià.

Si Masillo m’addotasse,

Mm’arrecchesse,

Mme facesse na Regina,

Voglio Lillo, e puo’ cantà.

PORDENZIA

1755

Ora mo’ lo bedimmo.

Ma nnanze de toccarele la mano,

Dimm’a mmene Masillo:

Addo’ aviste st’aniello?

MASILLO

Che nne vu’ fa Pordenzia.

1760

Vuo’ nnommenare mo’ li muorte a tavola.

PORDENZIA

Ma puro? Vi’ ca mporta.

MASILLO

Jeze mmano de Turche peccerillo:

Sarranno vintun’anno?

PORDENZIA

Vintun’anno?

MASILLO

E pe ssa preta, creo, contradescenzo,

1765

Avea ss’aniello a sto vraccio ligato.

Po mme so’ arrecattato,

E la Patrona che mme volea bene,

Ss’aniello me tornaje,

Decennome; co chisso trovarraje

1770

Fuorze lo patre co la mamma toja.

PORDENZIA

Avisse fuorze sotta de sto vraccio

De fraola no golio?

MASILLO

Eccolo ccane.

PORDENZIA

O Ciullo, o figlio mio.

Figlio bello, lo sango, l’ammore

1775

Mme terava a tte sempe vedè.

MASILLO

Mamma cara, ca sempe lo core

Mme senteva toccare pe tte.

RIENZO

Addonca s’a Masillo

E sore Rita, sia mogliere a Lillo.

PORDENZIA

1780

Chello, che fa lo Frate sia ben fatto.

MASILLO

E Ghiodece a contratto, ommo de penna,

È gioven’aggarbato;

L’azzetto pe cainato.

AMBROGIO

Dunque in tanta allegrezza,

1785

Io, Prudenza, e Masillo

Resteremo scontenti?

Ho per Masillo una mia nipotina,

Comodetta; e bellina.

Terrasselo in sua casa mia Sorella,

1790

De la giovane madre;

Ed acciocché Prudenza

Sola in casa non stia,

Verrà in mia casa, e sarà moglie mia.

MASILLO

E biva lo Si Ambruoso. Io so’ contente.

1795

Fallo mamma ca faie lo buono juorno,

Senza ghì cchiù bennenno semp’attuorno.

PORDENZIA

Faccio chello che buoie sie beneditto.

RIENZO

E biva: ca gnorsine a primmo aie ditto.

LILLO

Ora jamm’a dormì, ch’è meza notte.

MASILLO

1800

Che dormire si’ pazzo.

Magnammo tutte nziemo, ca scialammo

E po nci’arrecettammo.

AMBROGIO

Io vi convito tutti a casa mia.

Ma mi dispiace ch’improvvisamente,

1805

Non ho che darvi niente.

RIENZO

Sient’a mmene; Uniantur pignatella;

Ca ognuno de nuie ha caccosella.

MASILLO

Signorsì buono decite

Jammo mo’ tutt’a scialà.

PORDENZIA

1810

Io ve porto na frettata.

LUCCIO

Io na grossa sopreggiata.

RIENZO

Io no paro de pecciune.

LILLO

Tengo io li maccarune.

AMBROGIO

Ho una bella gelatina.

LIONORA

1815

V’è formaggio, v’è farina.

RIENZO

Aggio io vine squesite.

MASILLO

Io saucicce quantetà.

Signorsì, &c.

MASILLO

Via Si Lillo.

LILLO

Si Masillo.

PORDENZIA

1820

Sia Norella.

RIENZO

Sia Retella.

AMBROGIO - LIONORA

Su venite.

RITA - LUCCIO

Eccoce cca. / Eccoci qqua.

Signorsì, &c.