Lo mbruoglio d'ammore

Lo mbruoglio d'ammore, Velletri, s.e., 1717

a cura di Stefania Napolitano

paratesto ATTO PRIMO ATTO SECONDO ATTO TERZO Apparato

ATTO I

SCENA PRIMMA

TONNO, e MUSSASCIUTTO co na cannela appennetora, ch’esceno da la poteca, e banno a lo magazeno.

TONNO

Damme cca sta cannela, e bavattenne,

Va rape la poteca; non nce siente?

Che d’è? si’ stat’acciso?

Tu duorm’ancora? scetate mantrone.

No lo bbide, ch’è ghiuorno?

MUSSASCIUTTO

*Fusse mpiso;

È ghiuorno?

TONNO

È ghiuorno sì.

MUSSASCIUTTO

È ghiuorno?

TONNO

E n’ata vota.

MUSSASCIUTTO

Bon’ora comm’è ghiuorno

Si mo nnante è sonata meza notte.

TONNO

O cano renegato,

Tu propio vuo’ scasà la casa mia

Co fareme perdì tutte l’accunte.

MUSSASCIUTTO

Ch’accunte? si mo’ è ora

De fa lo primmo suonno.

TONNO

Si qua parrella vene

Pe treccalle d’aulive, o peparuole?

Quanno trova serrato;

Non passa nnante, e perdo sta facenna?

Tu propio vuo’, che schiatta, o che me mpenna.

MUSSASCIUTTO

E che maje può abboscà co ste facenne?

Treccalle, o no tornese, e pe treccalle

Perdimmo sei docate

De suonno e de salute.

TONNO

Tre calle non è niente,

Sguadagnato, mbreaco, porcaglione.

MUSSASCIUTTO

*Siente ca ncigna mo’ lo tordeglione.

Chest’auto me manca

D’avè da sentire,

Treccalle n’è niente,

N’è niente, è lo ve’?

Te venca l’allanca,

L’hai ntiso mai dire,

Ch’a chisto paese

Treccalle fa razza?

Te fa no tornese,

Tornese fa grano,

Lo grano carrino,

Carrino docato;

E tu guadagnato

Co chesta facciazza

De puorco fetente,

Me dice, ch’è niente;

Trecalle che d’è?

MUSSASCIUTTO

E che malann’è stato? c’haggio ditto;

Che baje tanto a la voce?

Treccalle t’è na zecca, e no trasoro;

È lo vero,haje ragione;

*Che sia sguarrato chi vo’ sta a guarzone. (Tonno trase a lo magazeno, e Mussasciutto apre la poteca.)

SCENA II

MUSSASCIUTTO sulo.

MUSSASCIUTTO

Te si nzerrato? e ba ca vuo’ sta frisco:

No mme lieve lo suonno? io mo’ te sfratto

Lo meglio, che nce stace a sta poteca;

Sa ch’abbramma, che tenco stammatina,

Né nce serve acquavita, e non cafeo,

Si dormo è lopa, e si non dormo è peo.

Uh che nera feleppina:

Che fracasso fa la panza!

Fann’a punia le stentina,

No mme sanno arequià:

Chisto sì ch’è besentierio,

Hanno perzo la creanza;

Pe fenì sto vetoperio

È besuogno de magnà. (piglia na preta, e rompe nuce.)

SCENA III

ZEZA, e MUSSASCIUTTO.

ZEZA

Fegliulo addov’è Tonno?

MUSSASCIUTTO

Dint’a lo magazeno.

ZEZA

Che nce face?

MUSSASCIUTTO

Che saccio, agne matina, ed agne sera

Se mpertosa llà dinto, e se sepponta;

O le pesa carcosa, e se l’acconcia;

O puro qua nterzetto mette nconcia.

ZEZA

Sa che buo’ fa, va vide

Pe lo pertuso de la mascatura.

MUSSASCIUTTO

Jatece vuje, ch’è meglio,

Ca si chillo s’addona, ca sonc’io,

Nce mmatte lo greciello,

Me schiatta qua barrata a lo scartiello. (Zeza se mette a fa la spia, e Mussasciutto se nne trase.)

ZEZA

Dice buono mo vao

Oh bene mio

Che beo! da sotta terra

Caccia no carosiello, e comm’è gruosso

Mo nce devaca dinto

Na carta de denare, e sonco d’oro

Va sacce quanta sonco

Zitto ca parla sulo o bravo, o bravo

Ha ditto ca nzi’ a mo’ nce so’ llà dinto

Quatto ciento zecchine; e che buo’ cchiune?

Zeza si ricc’a funno,

Mo’ sì, ca può scialare,

E chella scura figlia mmaretare.

Fegliuolo addove si’?

MUSSASCIUTTO

Che buo’ Maesta? (cca esce.)

ZEZA

Va trov’a sta pedata lo sio Ciommo

Dille che benca cca.

MUSSASCIUTTO

Che nc’è de nuovo?

ZEZA

Vasta mo’, curre priesto,

Po te dico che nc’è.

MUSSASCIUTTO

Vecco so’ lesto.

SCENA IV

ZEZA, e CECELLA a lo barcone.

ZEZA

Cece’?

CECELLA

Che buo’ Gnama’?

ZEZA

Te si’ bestuta?

CECELLA

Gnorsì.

ZEZA

Scinne cc’abbascio.

CECELLA

Mo’ mmo’ scenno.

ZEZA

Si no ngarzo sto viecchio, io già me mpenno.

Quanta vote le dico,

Tonno che faje? ch’aspiette?

Vi’ ca figlieta è granne, e d’è de carne,

E la carne tu saje,

100

Quanto chiù triche a cocerla, chiù fete,

Lo Turco me responne: Oh bene, o bene,

Miettece sale assaje, ca se mantene.

Va c’hà da fa co mmico,

Haggio visto addo’ sta lo carosiello:

105

Chello che non sa isso, lo sacci’io:

Deceva Tata mio,

Ca la femmena è casa,

Che bo’ lo pesonante;

Né pò sta bona maje quann’è bacante.

110

Chist’uommene schiattuse

No la vonno sentì,

La casa, che non s’abbeta

Chiano, chianillo capeta,

Fa porva, e scarrafune,

115

E fa perimma.

Sentitela ncocciuse

Sonc’accossì

Le zite,

Si tu non le mmarite,

120

Cercano accasiune

De ì ngattimma.

SCENA V

TONNO sulo, ch’esce da lo magazeno.

TONNO

Bene mio piglio sciato,

Ca non ce manca niente,

Lo carosiello è sano,

125

Mo’ vavo allegramente a trovà Titta,

Voglio vedè, si pozzo darle figliema

Senza manco no callo;

Pò esse, che me resce lo designo,

Ca nce stace speruto;

130

E l’ommo quann’è cuotto tann’è ghiuto.

SCENA VI

TONNO, e ZEZA.

TONNO

Fegliulo addove si’?

ZEZA

Tonno che buoje?

TONNO

Mussasciutto addov’è?

ZEZA

Ll’haggio mannato

A piglià la menesta.

TONNO

Uh che sproposeto;

Potive sparagnare sto tornese;

135

Lloco nc’è pane, aulive, e peparuole.

ZEZA

Sonc’otto juorne, che n’allummo fuoco.

TONNO

E no mmi’ ca sparagne li cranne.

ZEZA

Zitto, non te nfadà, ca non cocino,

Mo’ la donco a li pulle.

TONNO

E chesto è peo,

140

Stipala pe pescraie, o tornancella.

ZEZA

Accossì faccio *puozz’havè la zella.

TONNO

Eh Zeza, mo’ ch’è sciuto

Ll’haje cercato le sacche?

ZEZA

Ll’haggio fatto.

TONNO

Che sinche benedetta, mo’ fai buono;

145

Damme lo farrajuolo, e lo cappiello

Ca voglio ascire... oh maro me, che beo!

Curre, curre a malanno.

ZEZA

Che d’è stato.

TONNO

No palummo è bolato

A lo sacco dell’uorgio.

A DUE

150

Sciò, sciò che fuss’acciso.

TONNO

Bene mio sta ncerviello, e addove staje.

ZEZA

Zitto ca non è niente.

TONNO

Chist’è lo muodo de morì pezzente,

No scotolare cchiù sto farrajuolo,

155

Ne faje zompà lo pilo.

ZEZA

E bi’ che porva?

TONNO

Che tanta polezia?

Havarraggio da fa lo galameo?

ZEZA

Ma po se carolea.

TONNO

Tu faje cchiù peo.

Damme cca, damme cca; vi’ ca mo’ torno,

160

Si vinne, sta ncerviello,

Scarzea la mesura,

Tu mo’ me n’ienn’a sisco.

ZEZA

A chesto nce penz’io *va ca staje frisco.

TONNO

Zeza mia si tu lo ppruove,

165

Comm’è doce, comm’è bello,

Quanno faje appoco, appoco

Truove po lo montonciello,

Tanno mm’haje da nnommenà.

Siente, e fa chello, che dico,

170

Mo’ di passe, mo’ na fico,

Mo’ di nuce, di castagne,

Mo’ n’auliva, duje lopine,

Busche tanto quanto magne,

Te può fare di carrine,

175

E me puoje addecreà. (se nne va.)

ZEZA

Che te venca l’allanca,

Pare, che lo tterreno mo’ le manca.

SCENA VII

ZEZA, e CECELLA abbascio a la poteca.

CECELLA

Che buo’ Gnamatre?

ZEZA

Figlia mia, ch’è chesto?

Vi’ che capo sciegliuta, e mpeccecata,

180

Perchè non te l’haie fatta?

CECELLA

Haggi’auto ncapo.

ZEZA

Mara te, ca si’ pazza;

Co sto pensiero, che t’hai puosto nchiocca,

Tu vuo’ morire jetteca, o crepata.

CECELLA

Quanto cchiù priesto schiatto,

185

Cchiù priesto m’arrecetto.

ZEZA

E ba connio

Ca Luccio t’hà chiantata, che pe chesso?

Sarrà muorto lo munno?

Nce ne sonco cient’aute, che te vonno,

E so’ cchiù meglio d’isso.

CECELLA

190

Ma no nce sonco io,

Pocca lo tradetore

M’ha lassato senz’arma, e senza core.

ZEZA

Figlia mia benedetta,

No mm’affriere cchiù co ste pparole;

195

Datt’armo, statt’allegra,

Ca Mamma toja vo’ fa na bella cosa;

Non passa sta semmana, e te mmarrito

Co cinco ciente piezze.

CECELLA

Mamma mia

Parlammo d’auto, ca mpenzanno sulo,

200

D’have co tanto stiento ammat’a Luccio,

Ch’isso m’ammava, e po che m’hà chiantata

Senza dirme pecché, senza raggione:

Me vene tale chianto, e tanta rraggia,

Che nsentì nnommenà uommene schitto,

205

Me piglia la fortuna, e lo mmarditto.

ZEZA

Tu mo’ dice accossì, ca staje schiattosa;

Ma quanno po te dico,

Ca te do pe marito lo sio Ciommo...

CECELLA

Qua Ciommo?

ZEZA

Chillo guappo,

210

Che fa tremmà lo Burgo, e miezo Napolo.

CECELLA

Ciommo Scajenza

ZEZA

Chisso.

CECELLA

Leva, leva,

Chest’auto me mancava

D’annegrecarme co no porcaglione;

Co no sacco de mazze, no spetale,

215

Ch’auto non tene, che na perocchella;

Na sciammerga stracciata, e na spatella.

ZEZA

Chiano, chiano che d’haje, tu saie chi è Ciommo?

CECELLA

E no mmuo’ che lo saccia?

Pe nzi’ a li peccerille

220

Lo pigliano a bernacchie, e a secozzune.

ZEZA

Via ca tu parle sparo.

CECELLA

E bia no cchiune.

ZEZA

Cecella a che ghiocammo? quanno parlo

Uppeca, zitto, ammuccia, e st’a sentire.

CECELLA

Non serve, be’ sacc’io quanto vuo’ dire.

225

No la facimmo lonca, Mamma mia,

Te lo ddico da mo’ pe nzi’, che campo;

No mmoglio cchiù marito.

O sia buono, o sia tristo:

Me vasta pe nzi’ a mo’ quant’aggio visto.

230

Si Luccio m’hà traduta,

Che boglio cchiù sperà;

Fede cchiù non ce sta,

Non c’è cchiù ammore.

Me sonco già chiaruta,

235

Sciorta non c’è pe me,

Me sento di’ accossì:

Cecella muore.

ZEZA

Addo’ vaje? siente cca, non fa schiattiglie;

Che sia brosciata, chi accarezza figlie.

SCENA VIII

CIOMMO SCAJENZA, e TITTA pe chiazza.

CIOMMO

240

Chesto chi te l’hà ditto?

TITTA

Chi l’hà bisto.

CIOMMO

Hà visto lo mmalanne, che lo vatta;

A te mo’, che te pare,

Che Ciommo pozza fare

L’ammore co Cecella?

TITTA

245

Pecché no? che n’è bella.

CIOMMO

Ma non nce sta no callo, e ca nce fosse

Na cuffia de zecchine,

Co sei rotola d’oro, che pe chesto:

Vvo’ c’apparenta co li potecare,

250

E sbreogna la Casa? che te pare?

TITTA

Ma veo, ca sempe passe pe sta chiazza;

CIOMMO

Nce passo pe spassareme lo tiempo,

Pe coffiare tanta moccoselle

Che squagliano pe mme; zanneo la sera,

255

A chi donco na chiacchiara,

A chi faccio no zinno, o no sospiro,

A n’auta n’occhiatella,

Na rasca a chesta, e no resillo a chella.

TITTA

Comme mo’ tu non amme

260

Cecella? e no la vuoje.

CIOMMO

Ch’ammare? che bolere? ca te suonne;

Titta, n’è nata ancora chella fata,

C’hà d’havere sta sciorta.

Tu lo sai, che nce vole

265

Pe fareme nzorà? Na segnorella

C’haggia tre quarte, si non è de sieggio;

Bella quant’a lo Sole, e meglio dote,

Che sona, canta, e abballa a la franzese,

Ch’accossì nc’è l’osanza a sto Pajese.

TITTA

270

Si Ciommo tu m’abburle.

CIOMMO

E sient’appriesso

Da n’ata banna po tenco sto core,

Ch’è fatto pe la guerra, e no p’ammore.

TITTA

*Comme l’ha ditta tonna. E pe che fine.

Sempe staje co la Mamma a musso a musso?

CIOMMO

275

E ca chella è mpazzuta, che nce faie?

Sempe se mpettoleia co chella figlia

Ch’abbistato lo Cucco.

TITTA

E tu non l’amme?

CIOMMO

E n’ata vota mo’, da Gentelommo:

Che d’è nc’hai passione? va decenno;

280

Io stonco cca pe ttene

Mo’ veo si scauzo adisso, o isso a mmene.

TITTA

Pocca mme dice, ca no ll’amme: siente... (parlano zitto.)

SCENA IX

LUCCIO da la poteca soia, e li stisse de banno.

LUCCIO

Mo’ ch’è sciuto lo Sole,

Cacciate ste rovagne a soliarle;

285

Dateme li colure, e li pennielle,

Lassateme pittà di piattielle.

*Ma sto zanno sta cca nziemme co Titta?

Va sacce, che nce fanno; uh che locigno (cca esce no fegliulo co na boffettella, e isso le fa signo che ne la trasa).

C’hann’afferrato! chi lo ssa, che diceno,

290

Oh potesse sentì qua’ parolella.

CIOMMO

Fa cunto ca si’ lesto, è toia Cecella.

LUCCIO

*È toia Cecella isso dice a Titta!

E donn’è sciuto st’auto nnammorato?

O Ciommo gabba Titta, o i’ so’ gabbato,

TITTA

295

Vi’ che faje co la Mamma;

Co lo patre non serve, che nce parle;

Ca nce stonco ntrattato.

CIOMMO

E si’ a cavallo.

TITTA

Ma la coda è cchiù forte a scortecare.

CIOMMO

Comm’a dire, pecché?

TITTA

Pecché Cecella,

300

E Luccio no gran piezzo

Hanno fatto l’ammore; e si be’ stanno

Accostejune a morte, haggio paura,

Che non fanno sta pace; tu lo ssaie,

Ca primm’ammore non se scorda maie.

CIOMMO

305

(Oh vecco Luccio a tiempo, st’a sentire? (la parentese sotta voce, e ll’auto lo dice forte.)

Sta sbrasata che faccio) ed io te dico

Ca Cecella è la toja,

Mo’ che metto le mmano a sto neozio,

E conca nce pretenne

310

Starrà tre passe arreto,

Pe non darme desgusto;

E si no, vi’ che dico,

È scurzo, è muorto.

LUCCIO

*E tu hai da fa co mmico.

CIOMMO

315

Si a lo naso me saglie la mosca,

E me scappa no miezo stornuto,

Sto moscillo fa cunto ch’è ghiuto,

Vivo, vivo se pote atterrà.

Quanno Ciommo se nfosca,

320

Se nzagna,

Co li diente la terra se magna;

Nche se move, nce mmatte l’aggrisso

O marisso.

Chi nc’have che fa. (Fenuta ll’aria, Luccio fa na passiata pe nnanze a Ciommo, e po dice dint’a la poteca soia.)

LUCCIO

325

Nardo damme na mazza, e ghiesce ccane.

CIOMMO

Cca nce sta trademiento, schiavo schiavo (a Titta.)

LUCCIO

Bene mio, che carrera, c’ha pegliata;

O povero squarcetta

Tu si’ tutto sodato, va t’annetta. (se ne trase a la poteca.)

SCENA X

TITTA, e NORELLA da lo barcone.

TITTA

330

Ente lamma de spata, potta d’oie,

E ba fidat’a chisto, ancora corre.

NORELLA

Voglio vedè si è sciuto Luccio mio;

Tiemente, che desgrazia, cca nc’è fratemo

Titta bonnì.

TITTA

Bonnì te venca Nora,

335

Tu quanno te nne viene a lo molino!

NORELLA

Hà ditto Zia, sta sera, o craie matino.

TITTA

Sbrigate, ca sti juorne nc’è, che fare.

NORELLA

Che? apposta si’ benuto?

TITTA

A posta, sine.

NORELLA

E comme, accossì lasse

340

Mpotere a lo guarzone

La casa, lo molino, e quanto nc’eie?

No lo ssaie, ca chillo è Malantrino.

TITTA

Vattenne, e biene priesto a lo molino. (Norella se ne trase, ed esce fenuta ll’aria.)

So’ no molino abbiento.

345

Sta capo è fatta rota,

Ch’attuorno attuorno vota

Sera, e matina.

Lo molenaro è Ammore,

Ch’a botta de trommiento

350

Macena chisto core,

E lo sfarina.

SCENA XI

NORELLA sola a lo bbarcone.

NORELLA

O ca gia se n’è ghiuto,

E ancora Luccio mio no nce comparse

Aimmè ca sto a la corda; e quanno vene?

355

Luccio, Luccio, che faie?

Tu duorm’ancora, e i’ n’arreposo maie.

Lo sole de Nora

Ancora non esce;

O quanto me ncresce,

360

Ca tric’a benire;

Va iate sospire

Sto Sole a scetà.

Decite accossì:

Tu saie chi t’aspetta;

365

Pe tte n’arrecetta;

Non farla sperì,

Va trovala va.

SCENA XII

LUCCIO co no fegliulo, che porta na tavolella co li colure.

LUCCIO

Già se n’è ghiuto Titta, io resto ammisso

De chello, c’haggio ntiso;

370

Ciommo hà fatto nzi’ a mo’ lo spantecato

Co chella tradetora de Cecella;

Mo’ le dà la carrella,

E bo’ fa spalla a Titta!

E chesto che bo’ dire?

375

Io me sento mpazzire.

Sedimmonce cca fora, ca non manca

De vedè Mussasciutto, e nce nformammo,

Comme vanno sti fatte

Su dammoce da fa: Fegliu’ piatte. (lo fegliulo caccia no vacile e piatte de faienza crude.)

SCENA XIII

CECELLA, e NORA da li bbarcune llore, e LUCCIO; che pitta.

CECELLA

380

*Vecco lo tradetore, e mmo’ s’affaccia

Norella a lo bbarcone;

Voglio fare la spia,

E co st’uocchie vede la morte mia.

NORELLA

Oh te, ch’è sciuto già, bonnì si Luccio.

LUCCIO

385

Schiavo Patrona mia.

NORELLA

Cossì te voglio

Co la capo a fa bene.

LUCCIO

E si no stonco

Co la capo a fa bene, e tu nce torna.

NORELLA

Che d’è? Cecella toia

Te mantene ncoieto?

LUCCIO

390

Eh ca mo’ non è cchiù lo tiemp’arreto.

CECELLA

*Cecella, che nne dice?

NORELLA

Che bella cosa pigne a sto vacile?

LUCCIO

Na giorlanna de sciure,

E po mmiezo nce vene na fegliola,

395

Che si be’ non pozz’io

Pittarla comm’è bella,

Vasta, se po canoscere chi è chella.

NORELLA

E potimmo sapè, chi è sta Segnora.

LUCCIO

*Chest’è Cecella mia. Si tu sia Nera

400

Pegno chella, che dint’a sto core.

Lo fato d’ammore

Co lo sanco nce voze pittà.

Essa dorme a no lietto de sciure,

Io pe d’essa tra spine, e dolure

405

Me voto e me giro,

Me pogno,e sospiro,

Cerc’ajuto, e non trovo piatà.

CECELLA

*Chesto sento, e non moro? e puro l’ammo?

NORELLA

Luccio, Luccio che dice?

410

Tu staje mmiezo a le spine, io ntra li sciure?

C’aspiette core mio,

Che non parle co fratemo, e mme piglie?

Tu mme vide sperì? né te ne cure,

E po dice ca sto mmiez’a li sciure?

LUCCIO

415

Chello, che tenco ncuorpo,

N’è tiemp’ancora de cacciarlo fora;

Ammore m’è contrario, e gelosia,

Ma puro chella ch’ammo sarrà mia.

NORELLA

Che gelosia, che dice?

420

Ch’hai visto marame?

LUCCIO

No mmedo mente;

Ma chi amma addavero

Sta spina l’ha d’havè dint’a lo core,

Ca senza gelosia no stace Ammore.

NORELLA

Che gelosia

425

Nennillo bello?

Speranza mia

È tuio sto core

Non dobbetà.

Si mme vuo’ bene

430

No mme dà pene,

Co sto martiello;

Si Nenna more,

Chi t’hà d’ammà?

LUCCIO

O ca se nn’è trasuta!

435

Essa tutta se nfetta,

E non sa, ca Cecella mme carfetta.

SCENA XIV

MUSSASCIUTTO, e LUCCIO.

MUSSASCIUTTO

Che se rompa lo cuollo

E Ciommo, e chi lo vole; so’ schiattato;

E non pozzo trovà ddo’ s’è ntanato.

LUCCIO

440

*Oh vecco Mussasciutto. Na parola.

MUSSASCIUTTO

Dice a mme?

LUCCIO

Gnoressine.

MUSSASCIUTTO

Haggio da fare.

LUCCIO

Tu puro mme vaie contra? e c’haggio fatto?

MUSSASCIUTTO

Niente; te pare poco

Lo brutto chiantarulo,

445

C’hai fatto a chella scura de Cecella?

A lassarla pe Nora bello cagno!

LUCCIO

Va, ch’essa ha fatto meglio lo guadagno.

MUSSASCIUTTO

Che guadagno, te suonne?

LUCCIO

E lo sio Ciommo?

MUSSASCIUTTO

Che Ciommo? si’ mpazzuto?

LUCCIO

450

Non serve a commoglià, ca be’ sto ntiso

MUSSASCIUTTO

Si nc’è maie tale cosa, ch’io sia mpiso.

LUCCIO

Addonca n’è lo vero?

MUSSASCIUTTO

E n’ata vota?

LUCCIO

E la mamma?

MUSSASCIUTTO

È lo vero ch’è na pazza.

Troppo se nfrettolea co chillo Zanno;

455

Ma Cecella hà jorato,

Da che tu ll’haie chiantata

No mmedè, non sentì nesciun’at’ommo,

E tu nnuommene Ciommo?

LUCCIO

*Aimmè Cecella mia, e c’haggio fatto.

SCENA XV

CECELLA a lo barcone, e li stisse.

CECELLA

460

Fegliulo addove si’?

MUSSASCIUTTO

Veccome ccane.

CECELLA

Va trova lo Sio Ciommo a sta pedata,

Dille da parte mia, che benca mone,

Ca ll’haggio da parlare.

MUSSASCIUTTO

Qua’ si Ciommo?

CECELLA

Ciommo Scajenza, quale?

465

Tu faie lo musso stuorto?

MUSSASCIUTTO

E quanno maie?

CECELLA

E mo’ nn’haggio sta voglia.

LUCCIO

*Ajemmè so ghiuto.

CECELLA

Che d’è? tu non te muove?

MUSSASCIUTTO

*Io so’ storduto.

Dice addavvero o burle?

CECELLA

Oh chesta sì, ch’è bella,

470

Nce vuo’ na tarantella?

Voglio chillo, che dint’a sto Core

Lo fato d’Ammore

Pe trommiento nce voze stampà.

Isso dorme a no lietto de sciure,

475

Io pe d’isso tra spin’e dolure

Me voto, me giro,

Me pogno, e sospiro,

Ne speresco, e non saccio addo’ sta.

LUCCIO

*Ah fortuna, e che sento. (se dà no schiaffo.)

CECELLA

*Ora mo’ schiatta,

480

Chello, che mm’haje vennuto, e tu t’accatta.

SCENA XVI

MUSSASCIUTTO, e LUCCIO.

LUCCIO

Ajmmè, ca nce corp’io a sta facenna,

M’haggio fatto lo chiappo, che me mpenna

Bene mio Mussasciutto ajuto, ajuto.

MUSSASCIUTTO

E che buo’, che te faccia?

LUCCIO

485

Non nce ire.

MUSSASCIUTTO

E po?

LUCCIO

Vedimm’appriesso d’accordarla,

O le parlo, o le parle.

MUSSASCIUTTO

Quant’arrive.

LUCCIO

Vedimmo co la Mamma.

MUSSASCIUTTO

A, a, cchiù meglio.

LUCCIO

Faccio parlà lo patre.

MUSSASCIUTTO

Non saie niente.

LUCCIO

490

Dimme, c’haggio da fare?

MUSSASCIUTTO

Crepa, e schiatta

Mparate a no mostà caso a la gatta. (se nne trase a la poteca.)

LUCCIO

Pe zeffonnà sto core

Nce vo’ sta gelosia;

Povera vita mia

495

Mo’ si’ speduta.

Non te vastav’Ammore

Lo ffuoco, che mm’ardeva,

Sto jelo nce voleva;

Ncopp’a lo cuotto ajemmè acqua volluta.

SCENA XVII

ZEZA, e MUSSASCIUTTO.

ZEZA

500

Ca t’hai rutto lo cuollo a chesta via;

Nce si benuto ciesso? addov’è Ciommo.

MUSSASCIUTTO

Vuo’ che nne votta craie? no ll’haggio visto.

ZEZA

Volea di’, si facive no servitio.

MUSSASCIUTTO

E che buo’, che nce faccia,

505

Si non se trova; ed haggio revotato

Lo Ponte, co lo Burgo, e lo Mercato.

ZEZA

Va vide n’ata vota; e quanno tuorne

Portame no pasticcio,

Piglia cca sto carrino co sto panno.

MUSSASCIUTTO

510

No pasticcio? e pe cchine?

ZEZA

Pe Cecella,

Non saccio comme sta la poverella.

MUSSASCIUTTO

E lo Masto?

ZEZA

N’è muorto?

Sì ca ll’hà da vedè; curre, fa priesto.

MUSSASCIUTTO

Pasticcio bene mio, zù zù so’ lesto.

SCENA XVIII

ZEZA e CIOMMO.

ZEZA

515

Oh, vene lo Sio Ciommo,

Voglio stregnere mo’ sto matremmonio,

Ca Cecella ha da fare a gusto mio;

Bonnì, bonnì si Ciommo

CIOMMO

O Zeza addio.

ZEZA

Na parola,

CIOMMO

Patrona, ma fa priesto

520

C’haggio da ire po a lo Tarcenale.

ZEZA

A fa che?

CIOMMO

No lo ssaie?

ZEZA

Non saccio niente.

CIOMMO

Vogl’ì a fa fa sarzizio a li Sordate,

Che stonco levantanno.

ZEZA

Comme, comme.

CIOMMO

Sto levantanno mo’ na Compagnia.

ZEZA

525

Pe chi?

CIOMMO

Pe mmene.

ZEZA

Che buo’ ì a la guerra?

CIOMMO

*Vi’ che partito è chisto. Tanto bello.

ZEZA

E Cecella?

CIOMMO

E Cecella bona notte;

Tu non te sbriche cchiù, essa n’hà dote.

Io luonco, luonco non ce pozzo stare;

530

A la guerra vogl’ì pe mme spassare.

A sta guerra, a sta guerra se vede

Colli More, e li Turche arraggiate

Chesta spata, e sto fusto che fa.

Nzanetate

535

Che fanno li piede!

Cannune, e moschette;

Sto fora li panne,

Me pare mill’anne

De pigliare no scuto, na lanza,

540

A chi scresto, a chi percio la panza,

Co na botta... (cca so’ jettate quatto frunne da na fenestra, e Ciommo fuie pe la paura.)

Guarda sotta

Ch’è stato? chi è llà.

ZEZA

Tienemente, comme fuie pe la paura, (ridenno.)

545

E bo’ ire a la guerra? viene ccane

CIOMMO

Ch nc’è lloco?

ZEZA

So’ frunne, non è niente.

CIOMMO

Agn’Ommo pò morì de trademiente. (torna a dicere ll’aria.)

A sta guerra &c.

ZEZA

Sti partite non serveno si Ciommo;

550

Quanno volimmo stregnere, so’ lesta;

La dota sta a no pizzo, e so’ Zecchine.

CIOMMO

*Zecchine. E quanta sonco?

ZEZA

So’ dociento,

Li panne, ll’oro...

CIOMMO

E non te piglie scuorno

Che sonco Casadduoglio, o Trippaiuolo?

ZEZA

555

Sient’appriesso.

CIOMMO

Sentimmo,

Ma sacce ca lo tiempo nce perdimmo.

ZEZA

Vi’ ca sarranno ntutte

Setteciento docate.

CIOMMO

È che me mancano

Quattro milia docate, quanno voglio.

ZEZA

560

Ciommo mio, no nce cchiune, O attacca, o scioglio.

CIOMMO

Lo boglio fare pe s’ammore tujo;

Mo’ vavo a renonzare la bacchetta,

Ma voglio pe dimane

Vintecinco zecchine.

ZEZA

Sonco leste.

565

Tu va parla co Tonno,

E di’, ca vuo’ Cecella senza dota,

Va curre, sbrica priesto.

CIOMMO

*Nce l’aggio coveta già. Mo’ vao so’ lesto.

Gnorella cara, cara.

ZEZA

570

Fegliulo bello, bello.

CIOMMO

Damme ssa man’a mme.

ZEZA

Che nne vuo’ fare, che?

CIOMMO

Te la voglio vasà.

ZEZA

A, a.

CIOMMO

Sì, sì.

ZEZA

No, no.

CIOMMO

575

Saputa mia massara.

ZEZA

Giojello, smargiassiello.

CIOMMO

Damme sto gusto, da’.

ZEZA

No mmoglio, no lo ffa.

CIOMMO

No mme fa scuorno mo’.

ZEZA

580

Vi’, ca me struoppie mo’.

SCENA XIX

TITTA, e po NORA.

TITTA

Ch’aggio vinto sto pallio, e ll’aggio fatta

A tanta fruscia urache

Bene mio, che prejezza!

Non capo int’a la pella

585

Mo’ pozzo dire, ch’è la mia Cecella.

Voglio chiammare Nora;

Pe le dà chesta nova. Oje Nora, oje Nora.

NORELLA

Titta! Tu si’, che buoje.

Che si’ tornato a fare.

TITTA

590

Viene, scinne cca bascio.

NORELLA

Staje chino d’allegrezza!

TITTA

Scinne, ca te lo ddico.

NORELLA

Mo’ scenno, eccome cca, mo’ so’ co tico. (se nne trase.)

TITTA

Tieme’, che zumpe fa

595

Lo core mpietto

Recietto

Cchiù non hà

Tant’è la gioia.

Pare, che boglia di’

600

Co lo zompare

Mo’ può scialare. Sì,

Cecella è toja.

NORELLA

Veccome cca, che buoje?

TITTA

Ora vatte allestenno,

605

Ch’abbesogna, che biene a lo molino.

NORELLA

Ch’è stato? ch’è socciesso?

TITTA

Cose bone. Mo’ nnante agg’appontato

La parentezza mia.

NORELLA

Co chi?

TITTA

Co Tonno,

Che me dace la figlia.

NORELLA

Ll’agg’a gusto.

610

(Ca me levo sto spruoccolo da ll’uocchie.)

TITTA

Sta lesta, ca mo’ vengo, e te ne porto.

NORELLA

E sta pressa pecché?

TITTA

Pe fare na marenna, ca sta sera

Vene Tonno, la figlia, e la mogliera.

SCENA XX

TONNO, sulo.

TONNO

615

Oh, ca mo’ sto cchiù lieggio,

C’haggio appontata già la parentezza

De figlieme co Titta, e senza dote;

Ma chello, ch’è lo mmeglio,

Ch’a lo molino suio, sempe, che boglio

620

Pozz’ire a sgoliarme

De zeppole, de pizze, e maccarune,

Mo sì, ca me fa prode lo magnare

Pecché non penzo de caccià denare.

Ma che bedo, n’è chillo Mussasciutto

625

Iss’è, che porta mmano; O Tonno a ll’erta;

Cca nc’è frabottaria;

Mettimmoce a sto pizzo a fa la spia.

SCENA XXI

MUSSASCIUTTO co no pasticcio dinto a lo panno, e TONNO.

MUSSASCIUTTO

Passe, che siate accise; e quanta cane,

Che correno a l’addore;

630

Me sanno no cortiggio da dereto

Comm’à cana, che leva;

Chist’auto frusciamiento nce voleva.

Frate n’hanno raggione,

Ca l’addore, che ghietta, è scannaluso;

635

Si fosse prieno, mo’ me dolarria;

Me scapparria no figlio

Co lo pasticcio mmocca;

Stonco pe mme lassa tocca, e non tocca.

TONNO

Fremma cca mariuolo. (Tonno vene da dereto, ed afferra lo panno.)

MUSSASCIUTTO

Aimmè.

TONNO

Frabutto.

640

Lassa, ch’è chisto, addo’ me ll’haie robbato!

MUSSASCIUTTO

Chiano ca so’ sciagliuozze, e so’ li mieie.

TONNO

Scagliuozze?

MUSSASCIUTTO

Gnoressì.

TONNO

Guitto, Forfante;

All’adore lo sento, ch’è pasticcio.

MUSSASCIUTTO

E sia pasticcio; be’ che cosa vuoie?

TONNO

645

Voglio sapere di chi è.

MUSSASCIUTTO

Lo mio.

TONNO

Tieme’, che bocca de magnà pasticce.

MUSSASCIUTTO

Co li denare mieie so’ lo patrone

De magnà nzò che boglio.

TONNO

Denare tuoie? O cano renegato

650

Allegeruto mm’haie lo vernecato;

Lassa

MUSSASCIUTTO

Che buo’ lassare? è sanco mio.

TONNO

Vi’, ca chiammo la guardia?

MUSSASCIUTTO

E che me mporta?

Non nce chiamme lo boja?

TONNO

Zeza Zeza.

SCENA URDEMA

ZEZA da lo barcone, CIOMMO, e li stisse.

ZEZA

Che d’è?

TONNO

Scinne cc’abbascio.

CIOMMO

655

Che rommore nc’è lloco? che d’è stato?

MUSSASCIUTTO

Niente, niente, è pasticcio scafacciato.

TONNO

Lassa cano, ca t’affoco.

MUSSASCIUTTO

No la vince pe no poco.

ZEZA

Tonno Tonno ch’è breogna.

CIOMMO

660

Via dancillo.

MUSSASCIUTTO

Na zompogna.

A 4

No la scumpe? e manco mo’?

TONNO

Si non lasse, mo’ te scanno.

ZEZA

Via scompitel’a malanno.

CIOMMO

Si cchiù ncuocce, mo’ t’adaccio.

MUSSASCIUTTO

665

E cchiù priesto lo scafaccio. (Tonno, e Ciommo tiranno tutte duie, Mussasciutto lassa lo panno, e chille cadeno.)

TONNO - CIOMMO

Tira Ciommo/Tonno.

ZEZA - MUSSASCIUTTO

Nce lo bo’!

TONNO - CIOMMO

Ajmmè ajmmè che botta.

MUSSASCIUTTO

Si vuo’ pasticcio, mo’ lo tiene sotta. (se piglia lo pasticcio, e fuje.)