| | |
| | |
| | Lo mbruoglio d'ammore, Velletri, s.e., 1717 |
| | a cura di Stefania Napolitano |
| |
| |
| |
|
| |
| | ATTO III |
| |
| | SCENA I |
| |
| | CECELLA abbascio a la poteca, MUSSASCIUTTO co lo cato d’aulive. |
| |
| | MUSSASCIUTTO |
| 1365 | Cecella addo’ vuo’ ire? |
| | CECELLA |
| | Tu d’addo’ si’ sguigliato? |
| | MUSSASCIUTTO |
| | Vengo da ll’autra porta; vi’ che faje? |
| | CECELLA |
| | So’ resoluta, |
| | No mmoglio cchiù conziglie, o zitto, o ajuta. |
| | MUSSASCIUTTO |
| 1370 | Addonca si’ ncocciata |
| | De fojre sta notte |
| | E addo’ vuo’ ire? |
| | CECELLA |
| | A Ponteciello, a na Commare mia. |
| | MUSSASCIUTTO |
| | E che spiere co chesto? |
| | CECELLA |
| | De sfojre |
| 1375 | Chello, che bo’ fa Tata. |
| | MUSSASCIUTTO |
| | E che bo’ fare? |
| | CECELLA |
| | Pe forza me vo’ dare nn’agne cunto |
| | Pe mogliere a Tittillo, e Mamma a Ciommo. |
| | MUSSASCIUTTO |
| | Chesto lo ssape Luccio? |
| | CECELLA |
| | Non sa niente, |
| | E mmanco nce lo ddire. |
| | MUSSASCIUTTO |
| | Taggio ntiso; |
| 1380 | Ma io si t’accompagno sonco mpiso. |
| | CECELLA |
| | Non dobetà, ca jammo, quann’è notte, |
| | Nche dorme Tata, e Mamma; |
| | Me lasse, e te nne tuorne, e t’arreciette; |
| | Quann’è ghiuorno fai nfenta |
| 1385 | De non sapere niente. |
| | MUSSASCIUTTO |
| | Saglietenne |
| | Lassame j vennenno, ca mo’ torno |
| | E beo de nce venì. |
| | CECELLA |
| | Me daje parola? |
| | MUSSASCIUTTO |
| | Nce venco. |
| | CECELLA |
| | E si non mmiene, io vavo sola. (se ne trase.) |
| | MUSSASCIUTTO |
| | Aulive de Gaeta, o bell’aulive. (Va strellanno.) |
| |
| 1390 | Agg’aulive de lo Capetiello |
| | Lo peparuolo co lo chiappariello; |
| | Uh! quanta robba sto fegliulo tene: |
| | Nc’è la Composta pe le becchie prene, |
| | O belle femmene, veccola cca, |
| 1395 | Che bello cuoppo, che ve voglio fa. |
| | Nce lo perillo, co lo prunillo, |
| | Comm’è bella sta molegnanella, |
| | Stommacate tengo l’agresta |
| | Cetrolella pe la Majesta, |
| 1400 | Se le mmagna senza monnà, |
| | E chi le prova mme torn’a chiammà. |
| |
| | SCENA II |
| |
| | NORA sola. |
| |
| | NORELLA |
| | Luccio tradirme? Luccio coffiarme? |
| | E mme stonco? e no mpenzo |
| | De farlo stroppià mmiezo na via? |
| 1405 | Chesso sarria pazzia. |
| | Che dice, Nora ,che? tu, che buo’ fare? |
| | Tu sbarie, non t’adduone maratene, |
| | Ca mo’ cchiù assaje de primmo le vuo’ bene. |
| |
| | Che bo’ da sto core |
| 1410 | Ammore |
| | Crodele? |
| | E Luccio nfedele |
| | Che bo’ cchiù da me? |
| | Lo caccio da pietto, |
| 1415 | Pecché m’hà traduta; |
| | Nce torn’a despietto, |
| | Lo sdigno nce stuta; |
| | Sto ghire, e benire |
| | Che cosa vo’ dire? |
| 1420 | Se sape che d’è? |
| |
| | Oh! vecco Ciommo te; voglio co chisto |
| | Trovà na machenella |
| | Pe fa sta frische Luccio co Cecella. (se nne trase.) |
| |
| | SCENA III |
| |
| | CIOMMO sulo, e po NORELLA. |
| |
| | CIOMMO |
| | Non serve, che m’accia, so’ propio nato |
| 1425 | Da cuorpo a Mamma mia nigro, e scasato. |
| | Quann’aggio visto maje li Zecchine? |
| | E mmo’, che la fortura |
| | Me l’hà fatto vedè na vota schitto, |
| | So’ ghiute nfummo; avess’a lo mmacaro |
| 1430 | Tenutele no juorno |
| | Pe fare lo squarcione |
| | A qua sorbettaria, a qua pontone. (cca se fa nnante Nora.) |
| | NORELLA |
| | Si Ciommo. |
| | CIOMMO |
| | Oh sia Norella? |
| | NORELLA |
| | Na parola. |
| | CIOMMO |
| | A Ciommo sti favure? e quanno maje? |
| | NORELLA |
| 1435 | Te pare cosa nova? |
| | CECELLA |
| | Tanto bello. |
| | NORELLA |
| | Pe mme non hà mancato de parlarte |
| | *Tant’aviss’vuocchie. Ma corpa Luccio. |
| | CIOMMO |
| | E comme? va decenno potta d’oje, |
| | Ca sta cosa me coce. |
| | CECELLA |
| 1440 | Siente, fatte nniccà, vascia la voce. (se metteno a parlà secreto.) |
| |
| | SCENA IV |
| |
| | ZEZA da dinto a la poteca soja, e li stisse. |
| |
| | ZEZA |
| | *Ciommo co Nora? che mesterio è chisso? |
| | Che neozio hanno nziemo? |
| | Mannaggia sto lontana |
| | Non sento niente; ma Norella ride, |
| 1445 | Chiste fanno l’ammore, |
| | Ma Ciommo sta ntosciato. |
| | CIOMMO |
| | Ntanto, che tu pe Luccio mm’haje chiantato? (a Nora.) |
| | NORELLA |
| | Chiantato no; ma chillo |
| | Co fareme la spia, m’hà fatto stare |
| 1450 | Co lo cuojero a pesone lo mmarditto. |
| | CIOMMO |
| | Secota, va decenno |
| | ZEZA |
| | *Che buo’ jocare Zeza, |
| | Ca Ciommo t’hà troffato li Zecchine, |
| | E ciammellea co Nora! |
| 1455 | E si è chesto, isso è ghiuto a la bonora. |
| |
| | SCENA V |
| |
| | LUCCIO da mmocca a la poteca soja, CIOMMO, e NORA. |
| |
| | CIOMMO |
| | No mmuo’ auto, che chesto fatte cunto |
| | Ca Luccio è stat’acciso. |
| | LUCCIO |
| | *Machene contr’a mmene! |
| | NORELLA |
| | No mmoglio, che l’accide, |
| 1460 | Me vasta sulo, che le faje no sfriso. |
| | LUCCIO |
| | *E ba, ca vuoje sta bello. (se nne trase ammenaccianno.) |
| | CIOMMO |
| | È lesto lo servizio, saglietenne. |
| | NORELLA |
| | Te, piglia sto lazzetro, mpigna, vinne; (se lo leva da canna.) |
| | P’agghiustà co la Corte. |
| | CIOMMO |
| 1465 | Non serve. |
| | NORELLA |
| | Piglia mo’. |
| | CIOMMO |
| | *Tieme’, che sciorte. (Lo piglia, e se lo mette int’a la sacca, e resta la ziarella da fora.) |
| |
| | Pe servirte facce bella, |
| | Che d’è chesto? non è niente |
| | Mo’ te vavo a contentà. |
| 1470 | Piglio mo’ na sarcenella; |
| | Nzò ddò ll’ascio, attuffe ttuffe: |
| | Le do a primmo quatto schiaffe |
| | Di sgrognune a li morfiente |
| | Quatto buone sciaqquadiente |
| 1475 | E po ncoppa a chelle spalle |
| | Co no ligno fruscia, e dalle; |
| | Che canario voglio fa. (se nne trase Norella.) |
| |
| | SCENA VI |
| |
| | LUCCIO co la spada sottatetillico, e CIOMMO. |
| |
| | LUCCIO |
| | Patro’ mmio na parola. |
| | CIOMMO |
| | Oh schiavo Luccio |
| | Che t’aggio da servire cammarata? |
| | LUCCIO |
| 1480 | Viene co mmico fora a st’arenaccia. |
| | CIOMMO |
| | A fa che? |
| | LUCCIO |
| | No descurzo co la spata. |
| | CIOMMO |
| | Co la spata? te suonne? o si mpazzuto? |
| | A Ciommo co la spata? |
| | LUCCIO |
| | A ttene, a ttene. |
| | CIOMMO |
| | O bene mio, che risa, che mme vene; |
| 1485 | Chiss’è no spasso propio. |
| | LUCCIO |
| | Ed io te dico |
| | CIOMMO |
| | E tu vuo’, che mm’accida co n’ammico. |
| | LUCCIO |
| | Ch’ammico? tte nne miente tradetore. |
| | Che parlave d’accidere? |
| | Tu vuo’ accidere a mmene? |
| | CIOMMO |
| 1490 | Chessa lloco è ntressia. |
| | LUCCIO |
| | Io t’haggio ntiso. |
| | CIOMMO |
| | Luccio, mo’ veo, ca vuo’ esse acciso, |
| | O vaje cercanno qua remessione. |
| | LUCCIO |
| | Ah, squarcetta briccone, |
| | Mo’ proprio caccia mano: |
| 1495 | Caccia mano, te dico. |
| | CIOMMO |
| | Senza pressa: va chiano: |
| | Cca n’è luoco pe chesso: |
| | A la Renaccia vao: vieneme appriesso. (se nne va.) |
| | LUCCIO |
| |
| | Lo core |
| 1500 | Le passo, |
| | Lo lasso |
| | Llà nterra, |
| | Da st’ogne |
| | No sferra, |
| 1505 | Scappà no mme pò. |
| | Ammore |
| | Mme pogne: |
| | Lo sdigno me votta |
| | È fatta la botta; |
| 1510 | Ca chesto nce vo’. (Le va appriesso.) |
| |
| | SCENA VII |
| |
| | ZEZA, e po CIOMMO. |
| |
| | ZEZA |
| | Se nn’è ghiuto lo nfammo; |
| | Ma ll’aggio d’avè mmano. |
| | Mme la paga lo cano. |
| | CIOMMO |
| | Zitto che se nn’è ghiuto. |
| | ZEZA |
| | O! veccotillo. |
| | CIOMMO |
| 1515 | Ente chi fa de ll’ommo! |
| | Le volea dà cchiù schiaffe |
| | ZEZA |
| | Accosta ccane. |
| | CIOMMO |
| | *Chest’autra nce mancava. |
| | Che buoje, gnorella mia? |
| | ZEZA |
| | Siente cca na parola. E mbe’ ch’è chesto? |
| | CIOMMO |
| 1520 | Non vi’, ch’è cateniglia? |
| | ZEZA |
| | Chesta chi te ll’ha data? |
| | CIOMMO |
| | È de n’ammico. |
| | E la tengo pe pigno. |
| | ZEZA |
| | Ah bosciardone! |
| | Chest’è de Nora. |
| | CIOMMO |
| | Che Nora! *Vi’ che guajo. |
| | ZEZA |
| | Li Zecchine addo’ so’? |
| | CIOMMO |
| | Sta zitto gnora; |
| 1525 | Si mme vuo’ bene, no le nnommenare, |
| | Ca me vide cca propio sconocchiare. |
| | ZEZA |
| | No mmuo’, che te le nnommene, froffante! |
| | Si ca fuorze sarranno qua tornese? |
| | Li Zecchine addo’ so’? Vommeca ccane, |
| 1530 | O te scippo chist’uocchie? |
| | CIOMMO |
| | Gnora pe chisto Cie |
| | ZEZA |
| | Che Gnora, e Gnora |
| | Li Zecchine te dico? |
| | CIOMMO |
| | Mme so’ stat’arrobbate. |
| | ZEZA |
| | Ah truffajuolo, tu te ll’haje jocate. |
| 1535 | La cateniglia restarrà pe pigno, |
| | Si mbe’ no mmasta. |
| | CIOMMO |
| | Non è robba mia; |
| | Vi’ che diavolo è chisto! |
| | ZEZA |
| | Abbia, abbia. |
| |
| | T’aggio scopierto a ramma, |
| | Trammiero, |
| 1540 | Menzogniero, |
| | No mme la ficche cchiù, |
| | Sfratta, vattenne. |
| | Tieme’, che brava lamma |
| | Che mme vo’ fa corrivo; |
| 1545 | E non te magno vivo? |
| | Porta l’aruta cca, |
| | Po va te mpienne. ( se nne trase.) |
| |
| | CIOMMO |
| | Oje piello, e quanno viene? tanta guaje |
| | Sopportà non se ponno, |
| 1550 | Le contentezze meje tutto so’ nzuonno. |
| |
| | SCENA VIII |
| |
| | TITTA, e TONNO pe strata. |
| |
| | TONNO |
| | Comme te stea decenno. |
| | Sbregato, che mme fuje da lo Pajese, |
| | Me mmarcaje co moglierema, e co figliemo, |
| | Ch’avea duje anne, ed era tanto bello, |
| 1555 | Che propio me parea no pummo d’oro. |
| | Partettemo de sera, ch’era state, |
| | A lo primmo de Luglio, e no mme scordo; |
| | A lo sbocca de Crapa, mmiero ll’arba |
| | Vecco no breantino a mano manca |
| 1560 | De Turche. |
| | TITTA |
| | O mare vuje! |
| | TONNO |
| | Penza tu mone, |
| | Che sfunnolo nce venne, e che bocare |
| | Agn’uno potte fare. |
| | TITTA |
| | Ve lo creo. |
| | TONNO |
| | Ma non servie pe niente, can ndi botte |
| | Nce fu a la coda, quase miezo miglio; |
| 1565 | Nuje tanno pe sarvarece |
| | Vocann’arritta, jettem’a mmestire |
| | Nterra Sorriento. |
| | TITTA |
| | Oh buono, manco male. |
| | TONNO |
| | Zompajemo nterra, e chi da cca, e da llane |
| | Se mesero a foire, io resto sulo, |
| 1570 | M’abbraccio lo fegliulo, e co moglierema |
| | Assarpo pe l’arena; ma, che buoje, |
| | Lo piso, e la paura m’abbelieno, |
| | E bedennome ncuollo chille Cane, |
| | Pe foire cchiù lieggio, lasso figliemo. |
| | TITTA |
| 1575 | O povero nennillo! |
| | TONNO |
| | O figlio mio! |
| | Ca nterra te lassaje, |
| | Tu fuste schiavo, o muorto, io me sarvaie. |
| | Titta accossì perdette Ciccio mio |
| | Mo’ so’ bint’anne, e sempe che nce penzo, |
| 1580 | Nce faccio no sciabacco co la Mamma. |
| | TITTA |
| | salute a buje; Messere mio che faje, |
| | Hagge pacienza, e si hai perduto figlieto; |
| | Conzolate, ca tiene a mme pe figlio. |
| | TONNO |
| | Lo Cielo me te guarda. Jammoncenne. |
| | TITTA |
| 1585 | Comme restammo de le ccose noste? |
| | TONNO |
| | Te ll’haggio ditto già, viene sta sera, |
| | Ca te nguadie Cecella, e nce nne iammo |
| | A lo molino tujo, e llà scialammo. |
| | TITTA |
| | Sì, Tata mio, ch’avimmo da scialare. |
| | TONNO |
| 1590 | Orsù lassame ì, ch’aggio da fare. (se nne trase.) |
| | TITTA |
| |
| | Si non fosse lo sospetto |
| | Ch’aggio mpietto, |
| | Agne momiento |
| | Chesta nova, e lo contiento |
| 1595 | Me farriano sconocchià. |
| | Ma lo gusto c’hà lo core |
| | È mmescato de dolore; |
| | Sempe dice lo penziero, |
| | Si è lo vero, |
| 1600 | Chi lo ssa. |
| |
| | SCENA IX |
| |
| | MUSSASCIUTTO, e po TONNO. |
| |
| | MUSSASCIUTTO |
| | Aulive de Gajeta, oi bell’aulive. |
| | No mme dice lo core (strilla da dinto.) |
| | De tornar’a la casa, |
| | Quarche malanno aspetto, e chi lo ssape |
| | TONNO |
| 1605 | Che d’è tiene le ghiorde, che no mmiene? |
| | MUSSASCIUTTO |
| | Veccome cca. |
| | TONNO |
| | Su priesto, fa li cunte, |
| | Quanta robba hai venduto? |
| | MUSSASCIUTTO |
| | Vintesette tornise, e quattecalle. |
| | TONNO |
| | No cchiù de chesto? stirate lo vraccio; |
| 1610 | Contame li denare. |
| | MUSSASCIUTTO |
| | Tiene ccane, |
| | È no carrino chisto, e chiste sonco |
| | Sette tornise, e chisto è quattecalle. |
| | TONNO |
| | Chiano: chist’è treccalle. |
| | MUSSASCIUTTO |
| | È quattecalle. |
| | TONNO |
| | Bonora! ad uocchie, ad uocchie |
| 1615 | Me vuo’ arrobbà no callo. |
| | MUSSASCIUTTO |
| | Co chi ll’haje? |
| | TONNO |
| | E si chist’è treccalle. |
| | MUSSASCIUTTO |
| | Porta ccane |
| | Vi’ se te piace chisto?... aimmè (Piglia de pressa cierte cavalle, e nce vene no Zecchino puro.) |
| | TONNO |
| | Ch’è chesso? |
| | MUSSASCIUTTO |
| | Nient’è no jettatiello. |
| | TONNO |
| | No stepare. |
| | Lassamillo vedè. |
| | MUSSASCIUTTO |
| | Che nne vuo’ fare? |
| | TONNO |
| 1620 | Io lo voglio vedè (Ll’apre la mano a forza.) (ajemmè che beo?) |
| | Chist’è Zecchino. |
| | MUSSASCIUTTO |
| | Ne? no lo canosco, |
| | Ll’aggio trovato lloco a chisto vico |
| | Masto che d’è? mo’ muore? |
| | TONNO |
| | Niente, niente, |
| | Me sbatteno le chiocche, guarda lloco; |
| 1625 | Quanto vavo a piglià no po d’acito. (Va de botta ad aprì lo magazeno.) |
| | MUSSASCIUTTO |
| | (Chisto non ha strellato, |
| | Qua llupo vo’ morì.) |
| | TONNO |
| | So’ assassenato. (trase, e se nzerra.) |
| |
| | SCENA X |
| |
| | MUSSASCIUTTO sulo. |
| |
| | MUSSASCIUTTO |
| | Addo’ malann’è sciuto sto zecchino |
| | Pe sbreognarme Uh te rott’è la sacca (Mette mano a la sacca.) |
| 1630 | Vedimmo si so’ ghiuste A ca so’ ghiuste |
| | Chiano, chi sa lo Viecchio |
| | Mo’ ch’esce mme cercasse: |
| | Lassamille annasconnere cca propeio |
| | Bene mio nche ce penzo |
| 1635 | Mme schiatto de la risa, ed è da ridere; |
| | Zeza ha rrobbato a Tonno, |
| | Ciomm’hà rrobbato a Zeza, e Mussasciutto |
| | Arrobba Ciommo, Zeza, Tonno, e tutte. |
| | Mo’ nce va la Canzona justa justa. |
| |
| 1640 | Quanno lo latro arrobba n’auto latro |
| | È cosa, che ne rideno le prete. |
| | Carcioffola, |
| | E n’ata vota: carcioffola. |
| | E po doje vote: carcioffola. |
| |
| | SCENA XI |
| |
| | TONNO co no maccaturo e no Carosiello dinto rutto, co li jettarielle, e MUSSASCIUTTO. |
| |
| | TONNO |
| 1645 | E tutto lo juorno: carcioffola |
| | Fegliuolo Viene cca; trase cca dinto, |
| | E spienne no mellone. |
| | MUSSASCIUTTO |
| | E lesto. |
| | TONNO |
| | E resta dinto mariolone. (Mussasciutto trase a lo Magazzeno, e isso lo nzerra da fora.) |
| | Bene mio ca so’ muorto! uh li zecchine! |
| 1650 | Lo Carosiello mio m’hann’arrobbato, |
| | E nc’hanno puosto dinto sta schefienza, |
| | Ah maro me so’ strutto, e conzomato! |
| | Vogl’ì a chiammà la corte. |
| | MUSSASCIUTTO |
| | Oi masto, masto (s’affaccia a la fenesta de lo Magazeno.) |
| | Vi’ ch’è chiusa la porta. |
| | TONNO |
| | Ah frabuttone! |
| 1655 | Lloco stai buono, e tanno n’escerraje, |
| | Quann’iesce pe la forca. (se nne trase Mussasciutto.) |
| |
| | SCENA XII |
| |
| | TONNO, e po ZEZA. |
| |
| | TONNO |
| | E comme voglio fare maro mene! (Chiagne, e se scippa.) |
| | O carosiello mio saporito! |
| | Gioja, speranza mia, bellezza, core, |
| 1660 | Sciato mio, Vita mia! oh negrecato, |
| | Si non te trovo, io moro desperato. |
| | ZEZA |
| | Tonno, Tonno, che d’haje? |
| | TONNO |
| | Ah Ze ah Ze ll’hai visto? |
| | ZEZA |
| | Che cosa gioja mia? |
| | TONNO |
| | Niente niente. |
| | ZEZA |
| 1665 | E pecché te lamiente? |
| | TONNO |
| | Lo caru lo caru |
| | ZEZA |
| | (Già t’aggio ntiso.) |
| | Te fa male la capo? |
| | TONNO |
| | None, none. |
| | Uh maro me! li zecch |
| | ZEZA |
| | Tu che ddice? |
| | Che Zecche? si’ mpazzuto? |
| | Sarrà quarche lordizia? |
| 1670 | Lassamette cercare. |
| | TONNO |
| | Ah none, none (strilla, e se nfada.) |
| | Ca me sento morire. |
| | ZEZA |
| | Dimme, che d’haje? |
| | TONNO |
| | No lo pozzo dire. |
| | Va chiammame la corte. |
| | ZEZA |
| | Ed a che serve? |
| | Tu vuo’ dire lo miedeco. |
| | TONNO |
| | E battenne. |
| 1675 | Non te partì da lloco, ca mo’ vengo. |
| | ZEZA |
| | Tonno mio ddo’ vuo’ ire? |
| | TONNO |
| | Uh morte cana, no lo pozzo dire. (Zeza fa nfenta de trasiresenne.) |
| |
| | Addov’è? dov’è ghiuto |
| | Chillo bello carosiello? |
| 1680 | Maro me... che maro me? |
| | Maro chillo |
| | Che lo tene; |
| | No tantillo, |
| | Che nne saccio, |
| 1685 | Co chest’ogna nce lo caccio |
| | Da le bbisole, si affé. |
| | Nce lo caccio? comme? quanno? |
| | Si è squagliato, si è sparuto? |
| | Eh ca sonco no storduto, |
| 1690 | Ca lo trovo mo’ mmo’ mmo’: |
| | E nce venga nzò cche bo’ |
| | Sango, fuoco, ed agne danno, |
| | Addo’ sta s’hà da sapè. (se nne va.) |
| |
| | ZEZA |
| | Chisto vo’ ì a la corte, ed io vogl’ire |
| 1695 | A conzurdà, ch’aggio da fare, e dire. |
| | Ah Cecella, Cece’ |
| | CECELLA |
| | Che d’è Gnamatre. (da dinto.) |
| | ZEZA |
| | Scinne abbascio a guardà, ca mo mmo’ vengo; |
| | Nche bene Mussasciutto |
| | Fa serrà la poteca. |
| 1700 | Comm’è scoperta subbeto la mpeca. |
| |
| | SCENA XIII |
| |
| | ZEZA, e MUSSASCIUTTO da la fenesta de lo magazeno. |
| |
| | MUSSASCIUTTO |
| | Oi Maesta, Maesta? |
| | ZEZA |
| | Chi me chiamma? |
| | MUSSASCIUTTO |
| | Song’io. |
| | ZEZA |
| | Tu lloco staje? |
| | MUSSASCIUTTO |
| | Sto nzerrato. |
| | Me nc’hà nchiuso lo Masto. |
| | ZEZA |
| | E che ll’haj fatto? |
| | MUSSASCIUTTO |
| | M’hà visto no zecchino. |
| | ZEZA |
| | *Uh janca mene! |
| 1705 | E a te chi te l’hà dato? |
| | MUSSASCIUTTO |
| | A lo sio Ciommo ll’aggio cappiato: |
| | Comme va sta facenna, già lo ssaje |
| | Ajutame ad ascire da sto ntrico, |
| | Ca si vao carcerato, io dico, e ddico. |
| | ZEZA |
| 1710 | Ah cano, vi’ che faje? tiene ncuorpo. |
| | Ca mo’ vengo, e arremedio. |
| | MUSSASCIUTTO |
| | E biene priesto. |
| | Oie Maje’, vi’ ca si vao surzoncorda, |
| | Io tengo lo magnà, ma no la corda. |
| |
| | SCENA XIV |
| |
| | CECELLA vestuta foretana con na mappata sotta. |
| |
| | CECELLA |
| | Cecella n’è cchiù tiempo d’aspettare, |
| 1715 | Mussasciutto no mmene, |
| | Tata, e Mamma so’ asciute, e fatto notte, |
| | Arresecammo priesto a la ventura, |
| | M’aggio puosto a la mpressa sto vestito, |
| | Che tenea Tata pigno: anemo, e core, |
| 1720 | Serrammo la poteca, e faccia ammore. |
| |
| | Me commatta la fortura |
| | Lo destino, e quanto nce |
| | No mme mporta, lassa fa. |
| | Sto secura, |
| 1725 | Ch’a lo core |
| | Sto pe te |
| | Me dice Ammore |
| | Non avere cchiù a paura |
| | Va t’abbia, non dobbetà. (s’abbia.) |
| |
| | SCENA XV |
| |
| | LUCCIO, e la stessa. LUCCIO esce ncontra a Cecella. |
| |
| | LUCCIO |
| 1730 | Ciommo me ll’hà seccata, ma no mporta |
| | Nce vedarrimmo craje. |
| | Chi è sta foretana? |
| | CECELLA |
| | Ajemmène Luccio! |
| | LUCCIO |
| | Chiano: non foire, |
| | Che d’è? votate ccane |
| | CECELLA |
| 1735 | Va pe li fatte tuoje. |
| | LUCCIO |
| | Io t’aggio da canoscere. Uh bonora! |
| | Tu si’ Cecella! t’aggio canosciuta. |
| | CECELLA |
| | E si mm’haje canosciuta, vavattenne. |
| | Luccio lasseme ire. |
| | LUCCIO |
| | Addo’, ch’è stato? |
| | CECELLA |
| 1740 | N’è tiempo de locigne: Viene craje |
| | A Ponteciello, ca po llà lo ssaje. |
| | LUCCIO |
| | A Ponteciello sola? tu si’ pazza. |
| | Jammo, ca t’accompagno. |
| | CECELLA |
| | None Luccio? |
| | Ca passe guaje pe mmene. |
| | LUCCIO |
| | E che me mporta? |
| 1745 | Quanno moro pe te, chesta m’è sciorta. |
| | CECELLA |
| | No mmoglio. |
| | LUCCIO |
| | E tu mo’ vaje. |
| | CECELLA |
| | Lassame ì, ch’haggio paura, e pressa. |
| | LUCCIO |
| | E s’hai pressa, e paura; |
| | Viene a la casa mia, ca staje secura. |
| | CECELLA |
| 1750 | Ahi Luccio, che mme dice? e pò soccedere; |
| | Che se derrà de me? dov’è l’anore |
| | LUCCIO |
| | S’è pe chesso te pigliate la chiave, |
| | Saglie, nzerrate, e statte. |
| | CECELLA |
| | E tu ddo’ vaie? |
| | LUCCIO |
| | Che manca alloggiamiento? |
| | CECELLA |
| 1755 | Si vuo’ far accossì nce vengo. |
| | LUCCIO |
| | Jammo, |
| | Ca mme cunte, ch’è stato. |
| | CECELLA |
| | No mmoglio, che nce viene. |
| | LUCCIO |
| | Comme? Cecella dubbete de mene. |
| | CECELLA |
| |
| | Sento ch’Ammore |
| 1760 | Mpietto mme dice |
| | Tu si’ felice, |
| | Va curre, va. |
| |
| | LUCCIO |
| |
| | Mente ch’Ammore |
| | Chesto de dice, |
| 1765 | Tu si’ felice, |
| | Non dubbetà. |
| |
| | CECELLA |
| |
| | Ma l’anore |
| | Da n’ata banna? |
| | Strilla, e commanna |
| 1770 | Non nc’accostà. |
| |
| | LUCCIO |
| |
| | Che bo’ st’Anore |
| | Da st’aut’ banna? |
| | Chello se fa. (traseno addo Luccio.) |
| |
| | SCENA XVI |
| |
| | TITTA, e NORA. |
| |
| | TITTA |
| | Aggio fatto mpecà quatto coselle, |
| 1775 | Siscamm’a Nora. (sisca.) |
| | NORELLA |
| | Titta. |
| | TITTA |
| | Jammoncenne. |
| | NORELLA |
| | Addo’ vogl’ire, stonco poco bona. |
| | TITTA |
| | Che d’è? fusse mpazzuta? no lo ssaje |
| | Chi nce vene a la casa? |
| | NORELLA |
| | Che mm’è mporta? |
| | N’agg’auto a che penzare, |
| 1780 | Ch’a fare compremiente a Tonno, e Zeza, |
| | E a chella segnorella; di’ ch’aspetta. |
| | TITTA |
| | Chesto d’addo’ te vene? |
| | NORELLA |
| | Vasta, sacc’io, che d’eje. |
| | TITTA |
| | Zitto, ca vene agente, trase dinto: |
| 1785 | Parlammo appriesso. (se nne trase Nora.) |
| | È Tonno co la Corte, |
| | Va sacce, che sarrà, stamm’a bedere. |
| |
| | SCENA XVII |
| |
| | TONNO, co duje Sbirre, CIOMMO, TITTA, e po MUSSASCIUTTO. |
| |
| | TONNO |
| | Mme faje piacere Ciommo, si mm’ajute. |
| | TITTA |
| | Che nc’è Messere? |
| | TONNO |
| | O Titta te nce voglio. |
| 1790 | Mo’ ve do lo latrone. (apre lo magazeno, e trase.) |
| | Iesce cca frabuttone: (a Mussasciutto.) |
| | Pigliate chisso: (li sbirre acciaffano Mussasciutto.) |
| | Caccia li zecchine, |
| | Lo carosiello mio addo’ l’hai puosto? |
| | MUSSASCIUTTO |
| 1795 | Che carosiello? Non ne saccio niente. |
| | TONNO |
| | Ah breccone cercatelo. |
| | MUSSASCIUTTO |
| | Cercateme. (Li Sbirre le cercano le sacche, nce le smerzano, e no nce niente.) |
| | CIOMMO |
| | Via priesto figlio mio, vallo decenno; |
| | Si lo ddice t’ajuto, e si tu ncuocce |
| | Mo’ te faccio lo boja, e cca te mpenno. |
| | TITTA |
| 1800 | Chisto non tene manco sale ncuollo. |
| | TONNO |
| | Cercammo senza pressa, vi’ le scarpe |
| |
| | SCENA XVIII |
| |
| | ZEZA da la casa, scippannose, e li stisse. |
| |
| | ZEZA |
| | Ah maramene, e che roina è chesta |
| | Ah figlia, e ddo’ si’ ghiuta? uh Tonno, Tonno. |
| | Cecella non nce sta se nn’è fojuta. |
| | TONNO |
| 1805 | A rotta de lo cuollo, che me mporta, |
| | Io cerco li zecchine, |
| | Ca essa, e a te darria pe di carrine. |
| | TITTA |
| | Aimmè, che schiuoppo è chisso? |
| | CIOMMO |
| | O potta d’oje! |
| | TITTA - CIOMMO |
| | Gnora, che non avisse fatto arrore? |
| | ZEZA |
| 1810 | Sti figlie addo’ so’ sciute? O figlia, figlia. |
| | TONNO |
| | Oh carosiello mio. |
| | ZEZA |
| | Gente ajutateme. |
| | A trovarme Cecella. |
| | TONNO |
| | No nce pressa |
| | Trovammo li zecchine, po ad essa. |
| |
| | SCENA XIX |
| |
| | NORA, LUCCIO, e li stisse. |
| |
| | NORELLA |
| | Che strille songo chiste? uh quanta gente! |
| | LUCCIO |
| 1815 | Mo’ vengo sore mia, (comme parlasse dinto.) O manco male! |
| | Ca songo tutte cca: Si To’, sia Zeza |
| | Non serve cchiù a strellare, ca ve porto |
| | Na nova d’allegrezza. |
| | ZEZA - TONNO |
| | Oh bene mio! |
| | TONNO |
| | Che nova, li zecchine? |
| | ZEZA |
| | Hai visto figliema? |
| | LUCCIO |
| 1820 | Oh! ch’è nova cchiù bella; |
| | S’è trovato Ciccillo co Cecella. |
| | TONNO |
| | Qua Ciccillo, che dice? |
| | LUCCIO |
| | Chillo figlio, |
| | Che tu perdiste a mmare, so’ bint’anne. |
| | ZEZA |
| | Come? Ciccillo è bivo, e s’è trovato? |
| | NORELLA |
| 1825 | Voglio sentì, che diceno. (s’accosta.) |
| | TONNO |
| | Chi ll’hà ditto? |
| | LUCCIO |
| | Cecella. |
| | ZEZA |
| | Addov’è essa? |
| | LUCCIO |
| | Dinto la casa mia. |
| | ZEZA |
| | Llà sta la nfamma? |
| | LUCCIO |
| | E mmo’ la vide ccane, |
| | E io so’ Ciccio vuosto, o Tata, o Mamma. |
| | ZEZA |
| 1830 | Comm’è chesto, che dice? |
| | TONNO |
| | Sentimmo meglio, comme va sta cosa? |
| | LUCCIO |
| | Mo’ ve chiammo Cecella, |
| | ZEZA |
| | E po essere chesto? |
| | TITTA |
| | Mo’ meglio lo sentimmo. |
| | LUCCIO |
| 1835 | Oje Cecella, Cecella, viene priesto. |
| | ZEZA |
| | Bene mio, ch’allegrezza! |
| | LUCCIO |
| | Mo’, mmo’ vene. |
| | Ed accossì, come ve stea decenno, |
| | Parlanno co Cecella mo’ a la casa |
| | Aggio saputo a sciorta, |
| 1840 | Ca perdette no frate, ed a li signe |
| | De lo tiempo, e lo luoco, che m’hà date |
| | Aggio scopierto, ca lo song’io frate. |
| | TONNO |
| | E comme te sarvaste da li Turche? |
| | LUCCIO |
| | Lo cunto è luongo, lo decimm’appriesso |
| 1845 | Vasta pe mo’, ca ve so’ figlio; e chisse |
| | Songo li panne, li coralle, e quanto |
| | Teneva ncuollo, quanno fuje pigliato, |
| | Ma pe piatà lo Cielo mm’hà sarvato. |
| | ZEZA |
| | Lassamille bedè chiste so’ isse, |
| 1850 | Te vide, Tonno, vide li coralle, |
| | E chella fecocella, che mme diste |
| | Lo juorno, che fegliaie. |
| | TONNO |
| | Tropp’è lo vero. |
| |
| | SCENA URDEMA |
| |
| | CECELLA, e li stisse. |
| |
| | CECELLA |
| | Tata mio, Mamma mia |
| | Sogno cca: perdonateme |
| 1855 | L’arrore, ch’aggio fatto. |
| | ZEZA |
| | Te perdono, |
| | Ch’è tiempo d’allegrezza. |
| | Tu non te muove Tonno? Mo’ che faje. |
| | TONNO |
| | Vorria li zecchine, |
| | Ca d’allegrezza tanno morarria. |
| | ZEZA |
| 1860 | No peccejare cchiù, ca le teng’io. |
| | MUSSASCIUTTO |
| | Vi’ si nne saccio niente? |
| | TONNO |
| | Tu le tiene? |
| | ZEZA |
| | Io le tengo. |
| | TONNO |
| | Oh bene mio! |
| | Via lassatelo a chisso, ch’è nnozente. (lassano li Sbirre a Mussasciutto.) |
| | Ciccio mo’ viene cca, figlio mio bello |
| 1865 | Quanto t’abbraccio: nce lo carosiello. |
| | ZEZA |
| | Sine, ca nc’haje nfettate. |
| | MUSSASCIUTTO |
| | Ed io sapio, ca ll’aggio ammasonate. |
| | TITTA |
| | Me nn’allegro co buje, |
| | Sia Zeza, Tonno, de lo bene vuosto. |
| | TONNO - ZEZA |
| 1870 | Salute, e bene a tutte. |
| | TITTA |
| | Che facimmo |
| | De le facenne noste? |
| | TONNO |
| | Pe mme Titta |
| | Chello ch’è ditto è ditto; |
| | Contentate la Mamma co lo Frate. |
| | ZEZA |
| | Facite vuje, ca so’ contenta. |
| | LUCCIO |
| | Ed io |
| 1875 | Non sulo te do sorema, ma voglio |
| | Pigliarme Nora toja. |
| | TITTA - NORELLA |
| | O chest’è sciorta. |
| | CIOMMO |
| | E la sciorta pe mmene è zoppa, e corta. |
| | LUCCIO |
| | Simmo contente tutte. |
| | TUTTE |
| | Gnoressine. |
| | TONNO |
| | P’allegrezza va caccia di lupine. (a Zeza.) |
| 1880 | Via dateve le mmano: allegramente: |
| | So’ tutto conzolato. |
| | ZEZA |
| | Nguadejateve priesto. |
| | LUCCIO |
| | O cara. |
| | TITTA |
| | O bella mia. |
| | NORELLA |
| | O gioja. |
| | CECELLA |
| | O fato |
| | TITTA |
| | Già tengo apparecchiato a lo Molino |
| 1885 | No buono cardolillo. |
| | TONNO |
| | Sine jammo. |
| | Jammo, e facimmo llà no gaudejammo. |
| | LUCCIO - NORELLA |
| |
| | Allegra |
| |
| | TITTA - CECELLA |
| |
| | Contento |
| |
| | LUCCIO - NORELLA |
| |
| | Chest’arma |
| |
| | TITTA - CECELLA |
| |
| | Stò core |
| |
| | A QUATTRO |
| |
| | Attenne a scialà. |
| |
| | TUTTE |
| |
| 1890 | Lo mbruoglio d’Ammore |
| | S’è asciuveto già. |
| |
| | TONNO - ZEZA |
| |
| | Non nce chiù trommiento. |
| |
| | TONNO |
| |
| | Scialanno |
| |
| | ZEZA |
| |
| | Zompanno |
| |
| | A DUE |
| |
| | Lo core che fa! |
| |
| | TUTTE |
| |
| 1895 | Lo mbruoglio d’Ammore, &c. |
| |
| | CIOMMO - MUSSASCIUTTO |
| |
| | Facimmo lo riesto. |
| | Su via, jammo priesto |
| | Corimmo a magnà. |
| |
| | TUTTE |
| |
| | Lo mbruoglio d’Ammore, &c. |
| |
| |
| |
| |
| |
| |
| |
| |
| |
| |
| |
