Lo mbruoglio d'ammore

Lo mbruoglio d'ammore, Velletri, s.e., 1717

a cura di Stefania Napolitano

paratesto ATTO PRIMO ATTO SECONDO ATTO TERZO Apparato

ATTO II

SCENA I

LUCCIO sulo.

LUCCIO

Aimmè, che faccio? Addo’ m’abbio? che penzo?

670

O Luccio sbentorato, mo’ che faie,

C’haie lassato Cecella

Pe no sospetto fauzo; e si’ tenuto

Pe zanno ,e tradetore,

Che remmedio può dare a chist’arrore?

675

Vi’ ch’auto moscheglione

Me passa pe le chiocche?

E si accordo Cecella,

Che derraggio a Norella?

C’ammoina, che guaio; si’ troppo dura.

680

O mme vene la gotta, o lo descenzo;

Aimmè, che faccio? addo’ m’abbio? che penzo?

Che mbruoglio nc’è a sto core,

Che filo mpeccecato,

Chi mme lo vo’ sbroglià?

685

Mme vedo perzo.

Ajemmè so’ scervellato,

Cchiù scioglio,

Cchiù me mbroglio;

Tu me nce curpe Ammore,

690

Si quanto voglio fa

Manne a travierzo.

SCENA II

NORELLA mmocca a la porta, LUCCIO, e CECELLA a lo barcone.

NORELLA

Luccio mio.

LUCCIO

Che d’è Nora?

NORELLA

Na parola.

LUCCIO

*Nce vole sta refosa. Eccome ccane. (parlano zitto.)

CECELLA

*Tiemente, n’ata vota

695

Lo schefenzuso co la Segnorella;

Non se ponno spartì Marco, e Sciorella. (se ne trase a fa la spia.)

LUCCIO

Comme? Titta se nzora?

E se piglia Cecella?

NORELLA

Che d’è Luccio?

Tu cagne de colore?

LUCCIO

N’è lo vero.

NORELLA

700

E comme n’è lo vero, si mo’ muore?

Ah Luccio mo’ m’addono,

Ca tu m’haje zanniata, e me zannie;

Cecella te sta ncore,

E pe chesso te cagne de colore.

LUCCIO

705

Chist’è sospetto tuio.

NORELLA

Ma pecché sine

Te si’ fatto accossì? Ca te despiace.

LUCCIO

Pe Titta ll’haggio a gusto, ca se nzora,

Ma pe mme me sa mmale; non nce pienze

Ca si Cecella te sarrà Cainata,

710

No mme sarraie mogliere?

NORELLA

Comm’a ddire?

LUCCIO

Titta sa che nce passo co Cecella;

E pe non farce havè cchiù confedenza;

Co mmico non farrà maie parentezza.

NORELLA

Non creo, che pozz’havere sto sospetto;

715

Che stammo nfra li Turche, o simmo cane?

LUCCIO

Otra, che gioia mia,

No mme vasta lo core de vedere

Che sia parente toia, chi m’è nnemmica.

NORELLA

E chesto, che te mporta?

720

Vide, che sfrenesia?

E ss’a la casa soia, e tu a la mia.

CECELLA

*Chisto sì ch’è locigno, sciala, sguazza;

Ca mo’ mmo’ nce vedimmo.

NORELLA

Che d’è Luccio?

Tu pienze, e no rrespunne?

LUCCIO

725

*Chesta cchiù nola scompe, ed io mo’ schiatto.

Va saglietenne, ca pe darte gusto,

Chello che pozzo fare,

Lo boglio fa, si havesse da crepare.

NORELLA

Bellezza de sto core,

730

Giojello de sto pietto,

Speranza de st’affetto

Hagge piatà de me.

Tu vide lo dolore,

Che ll’arma me conzumma;

735

Lo ffuoco, che m’allumma;

E sbrigate, che d’è? (se ne trase.)

SCENA III

CECELLA a lo bbarcone co na ziarella mmano, e LUCCIO.

CECELLA

*Oh ca ll’hanno scomputa, a te Cecella.

LUCCIO

Uh nigro me che beo, si m’ha sentuto. (s’addona de Cecella.)

Parlate co Norella, io so’ speduto.

CECELLA

740

Mo’ che t’haggio trovata, (fegne parlà co la ziarella.)

Voglio sfocà co ttico

Lo sdigno, c’haggio mpietto

Contra de Luccio, che me t’hà donata.

Pe scordareme ntutto

745

De chillo scanoscente

Mo’ te ietto, e te straccio,

Lo ffaccio ad isso chello, ch’à te ffaccio. (straccia la ziarella, e la ietta.)

Accossì potesse fare

Piezze, piezze de lo core,

750

A lo cane tradetore,

Pe poterme sgolià.

Oh, che gusto, c’havarria

De sentirelo strillare,

No cchiù mmo’ Cecella mia,

755

Vi’ ca moro, oddio piatà.

LUCCIO

Veccome cca Cecella,

Si mme vuo’ muorto accideme;

Fallo, ca nn’haie ragione.

CECELLA

Hai facce de parlarme, frabuttone. (se ne trase, e le serra la fenestra nfaccia.)

LUCCIO

760

Chest’è poco, n’è niente,

Me mmereto cchiù ppeo; ma si sapisse,

Ca fuie traduto da la gelosia,

Piatate mpiett’a te nce trovarria.

O scura ziarella (auza la ziarella da terra.)

765

Che no tiempo parive

Mpiett’a Cecella mia lazzetto d’oro,

E mmo’ si’ spetacciata, hagge pacienza;

Ca si cchiù non può stare a chillo pietto

Dint’à sto core mio te do recietto. (quanno dice, cca te metta, ha da mostà lo pietto.)

770

Io te vaso, e cca te metto

Sbentorata nocchetella

Pe confuorto de sto core.

Ca si mpietto

A Cicia bella

775

Annoccata

Tu si’ stata.

Mo’ che biene a chisto luoco,

Puoje fa doce chillo fuoco,

Che mm’allumma mpietto Ammore.

SCENA IV

TONNO, e ZEZA.

TONNO

780

Comme? te pare niente no pasticcio

Dint’a la casa mia?

ZEZA

E ch’è quarche nterzetto,

Che nce ngrassa la Corte?

TONNO

È assaie cchiù peo;

785

Chi ncappa a no nterzetto?

Paga la pena, e po nce sta ncerviello;

Ma no pasticcio mmano a no guarzone

Po fa venì golio a ttene, o a figlieta,

No poco, che nne pruove,

790

Va tiene cchiù lo carro pe la scesa;

Nce tuorne n’ata vota;

Po te vene golio,

Prova le sfogliatelle, e le bbarchiglie;

E tanno, oh maromene,

795

Va pigliate la casa;

Me vennarrite nzin’a le tenelle,

P’accattà pasticcielle, e sfogliatelle.

ZEZA

Arrasso sia, tutto chesto pienze?

Penza, ca tiene ncuollo

800

Na figlia che t’arriva, e che t’accoppa;

Va trovale marito, ca si’ biecchio;

Io non pozzo sapè, che bene appriesso,

Ca stò mmalata *e tu no mmuore ciesso.

TONNO

Volea di’, ca n’ancora

805

Havive accommenzato sto taluorno.

ZEZA

Taluorno ne? taluorno? e che borrisse?

Fa li figlie, e lassarle pe la chiazza

Comm’a figlie de scrofa?

Pecché te si’ nzorato?

810

Chi nc’have da penzà?

TONNO

Lo vecenato.

Fenimmola sta baja,

Figlieta è mmaretata.

ZEZA

Mmaretata?

TONNO

Gnorsì.

ZEZA

Co chi?

TONNO

Co Titta.

ZEZA

Titta? te piglia cca; che te ne pare;

815

Figliema voglio dà a no Molenaro?

TONNO

E tu dalle no Conte, o no Marchese;

Va vide pe sti siegge, si nc’è nullo;

Che boglia apparentare co Pertuso,

E pigliarse la figlia,

820

Senza no callo, e senza na cammisa;

E bi’ si strilla? che puozz’esse accisa.

ZEZA

Si no le pozzo dà no Caaliero,

Le do no galantommo.

TONNO

Ed haje denare?

ZEZA

Tu co cche la mmarite?

TONNO

Senza niente.

ZEZA

825

E senza niente io puro

Le do no galantommo.

TONNO

Chi è chisto?

ZEZA

Lo sio Ciommo.

TONNO

Ciommo Scajenza.

ZEZA

Sì.

TONNO

Te vaa lo piello,

A no zanno schefienza, truffaiuolo

830

Vorrisse, che dia figliema, mmalora,

Che lo secunno juorno me la chianta;

O si vole magnà, matina e sera,

Ha da fa rucche rucche a la mogliere.

TONNO

Bell’accatto!

ZEZA

Brav’accunto!

TONNO

835

E ll’haje sciueto linto, e pinto.

ZEZA

Ll’haie trovato lo sedunto.

TONNO

Tutto porva, e perucchella.

ZEZA

Co la rogna, e co la zella.

TONNO

E po a tavola uh ah.

ZEZA

840

Che la faccia stommacà.

ZEZA

Va te stipa.

TONNO

Trase dinto.

ZEZA

Haje da fa co sta nennella.

TONNO

Haje da fa co sta moschella.

ZEZA

No, la vince.

TONNO

Lo bedimmo.

ZEZA

845

Leva mano.

TONNO

Leva rimmo.

TONNO

Ca te scoccio.

ZEZA

Schiatta, schia’.

SCENA V

TONNO, e CIOMMO.

TONNO

Po le mogliere strillano:

Ca li marite lloro le ncotognano;

Si lo banno cercanno co lo spruoccolo,

850

Vide, che bell’aurio... oh teccotillo attiempo: (s’addona de Ciommo.)

Jammoncenne da cca.

CIOMMO

Schiavo zi Tonno...

Ah zi Tonno, zi Tonno na parola.

TONNO

A mme decite?

CIOMMO

Sine.

TONNO

Che v’accorre?

CIOMMO

Che d’è! staje poco buono? che cos’haje?

855

Me staje de mala cera?

TONNO

Sto ammoinato.

CIOMMO

E statt’alliegro frate, ca te porto

Na nova da segnore.

TONNO

A mme na nova.

Oscia dica.

CIOMMO

Ma ride, nc’haje gusto.

TONNO

Che buo’ che rida, si n’hai ditto niente?

CIOMMO

860

Mo’ siente: Messè Tonno già lo ssaje

Chi sonco, e c’haggio fatto,

Si n’haggio rotte vraccia, e capo, e cuolle.

TONNO

*Havisse tanta mole. Già se sape,

La nova mia qual’è?

CIOMMO

Mo’ ven’appriesso;

865

Sonco stato nzi’ a mo’ no rompecuollo,

Ch’era fegliulo; mo’ che so’ trasuto

All’anne de lo sinno.

TONNO

*E cchiù l’haje perzo?

CIOMMO

Me voglio arrecettare.

TONNO

Oscia fa buono;

La nova mia qual’è?

CIOMMO

870

Chiano, chianillo;

Penzo de me nzorare.

TONNO

Oscia se nzora,

Ma la nova qual’è vorria sapere.

CIOMMO

E chiano ca m’affuoche.

TONNO

E si haggio pressa,

Ch’è ora de magnare.

CIOMMO

Mo’ te sbrico;

875

Sonco juto cercanno na fegliola

De bona razza, che sia bella, e bona,

Senza tenere mente a sanco, e a dota.

TONNO

L’ossoria no la scompe, ed io mo schiatto

La nova mai qual’è? co la mmalora.

CIOMMO

880

Ah zi To’, ah zi To’, vi’ co chi parle?

TONNO

Ma si tu no la scumpe; ll’haje trovata,

CIOMMO

L’haggio trovata.

TONNO

Co nzalute; nguadia;

La nova mia qual’è?

CIOMMO

Chest’è la nova,

Te voglio fa st’anore

885

De pegliareme figlieta p’ammore.

TONNO

Oh ca ll’haje vommecata;

Rengratio ll’ossoria; s’è mmaretata.

CIOMMO

Mmaretata! e co chi?

TONNO

A uscia, che mporta?

Vasta, ch’è mmaretata.

CIOMMO

890

Senza lecienza mia?

TONNO

Lecienza toja? e che nc’haie quacche braccio.

Oh chesta sì ch’è bella.

CIOMMO

Ah core mio te fete già la pella.

Mmarretata? vi’ che ddico;

895

Non sia nullo, che nce spenna

Na parola, ca Cecella

Da ch’è nata, sta pe mme.

L’ammatonto comm’a fico,

Lo spestello comm’à brenna;

900

Hà da fa co sta moschella

Luccio, Titta, e nzò chi è.

TONNO

Vuo’, che piglio na sarcena bribbante;

E te lavoro pe mez’ora st’ossa?

CIOMMO

Me spiace, ca si’ biecchio,

905

Mantece de zampogna,

Ca si no, ca si no: ma m’è breogna.

TONNO

Ah guitto aspetta, aspetta. (trase a la poteca a piglià na sarcena, e Zeza lo tene.)

SCENA VI

TITTA, ZEZA, e li stisse.

TITTA

Messere pecché strille?

ZEZA

Che d’è stato?

TONNO

Niente, niente,vattenne. (a Zeza.)

CIOMMO

O manco male.

910

Titta, ca si’ benuto

Ca mo’ accedea sto viecchio nzallanuto. (se nne va de carrera.)

SCENA VII

TONNO, TITTA, e ZEZA.

ZEZA

Se pò sapè, ch’è stato?

TONNO

Lo descenzo;

Va c’haje da fa co mmico; addo’ si’ Titta?

No nte partì da lloco, ca mo’ venco,

915

E te dico, che passo

Co chillo brecconciello;

*Vedimmo comme sta lo carosello. (trase a lo magazeno.)

SCENA VIII

ZEZA, e TITTA.

TITTA

Sia Zeza, ch’è socciesso?

ZEZA

Va lo ttrova.

TITTA

Che grazia è chessa Gnora mia?

ZEZA

Si’ pazzo?

920

Che Gnora? co chi ll’haje? da donne viene?

Addo’ ll’haggio trovato

Sto figlio, senz’haverelo figliato?

TITTA

Figlio me può chiammà, ca te so’ ghiennero,

Non t’hà ditto Messere,

925

Ca la fegliola vosta m’hà prommisso?

ZEZA

Va ca sine mpazzute, e tune, e d’isso.

TITTA

Che no me la vuo’ dare?

ZEZA

Signor none.

TITTA

E pecché?

ZEZA

No mme piace.

TITTA

A lo mmacaro.

Sapimmo lo pecché? io non so’ sturcio;

930

Non sonco malenato

Ca nce sapimmo buono a sto paese,

E la fegliola vosta nce pò stare;

E mme la piglio po senza denare.

ZEZA

Già lo sapimmo, ca si’ ricco a funno,

935

Lo Cielo te lo gguarda; te so’ schiavo,

Figliema è mmaretata.

TITTA

Uh che scheressa;

Che so’ qua peccerillo,

Quanto ca me l’agliotto: mo lo piglie;

Tocc’a lo patre mmaretà le ffiglie.

ZEZA

940

Tocc’a isso? tocc’a mmene,

Ca m’è sciuta da sti rine;

Haggio fatto tanto d’vuocchie,

Pe poterla scapolà.

Llo sacc’io, c’haggio patuto,

945

Pe la fa quanto na vacca;

Zizza, nonna, pappa, cacca,

Io non haggio maie dormuto;

Mm’haggio rotte le ddenocchie,

Semp’attuorno

950

Nott’e ghiuorno;

E tu viene,

Signor sine,

Tocc’a isso mmaretà. (se nne trase arraggiata).

SCENA IX

TITTA sulo.

TITTA

E ba ca jammo buono de ciardino;

955

Iesce zi Tonno, ca vuo’ havere gusto:

Vi’ che scajenza è chesta? e quanno scumpe

E mo’ cauda, e mo’ fredda. Uh che farria

La mannarria a descenzo, e mme starria.

SCENA X

TONNO da lo magazeno, e TITTA.

TONNO

O carosiello mio covernamette,

960

Ca mo’ torn’a l’ampressa pe basarete;

Mannaggia me rencresce de n’ascire,

Me sento proprio st’arma mia spartire.

Titta ddo’ si’.

TITTA

Sto cca.

TONNO

Su jammoncenne.

TITTA

Addo’?

TONNO

Viene co mmico,

965

Ca te dico na mbroglia.

TITTA

Ed io no ntrico.

SCENA XI

MUSSASCIUTTO da la poteca, e CECELLA da lo bbarcone.

MUSSASCIUTTO

T’haggio ntiso Maesta, mo’ mmo’ venco.

CECELLA

Mussasciu’, Mussasciu’?

MUSSASCIUTTO

Che d’è Cecella.

CECELLA

Sienteme na parola.

MUSSASCIUTTO

Scinne priesto,

Ca po Mammeta strilla.

970

No mpozzo annevenare,

Che mpeca fa sta vecchia a lo marito

Co cierte jettarielle nuove, nuove,

Che pareno zecchine.

SCENA XII

CECELLA abbascio, e MUSASCIUTTO.

CECELLA

Mussasciu’?

MUSSASCIUTTO

Ca si’ scesa.

CECELLA

Che bo’ Mamma?

975

Ddo’ te manna de pressa?

MUSSASCIUTTO

A trovà Ciommo,

Non saccio, che denare le vo’ dare.

CECELLA

Cano, che non nce isse, ca t’accio.

MUSSASCIUTTO

Chesto mo’, che bo’ dire? tu mo’ nnante

Squagliave, lo volive,

980

E mm’hai fatt’afferrare le ppetecchie.

CECELLA

Llà nc’era Luccio, ed io facea cofecchie.

MUSSASCIUTTO

Chesto pecché lo ffaje?

CECELLA

Pe darele martiello.

MUSSASCIUTTO

E no cchiù mone,

Ca tutte duje la gelosia ve ceca;

985

Ma chillo pe te more;

M’hà chiammato mo’ nnante, uh quant’hà ditto;

E mente che deceva,

Comm’a no peccerillo ne chiagneva.

CECELLA

Chiagneva ne? chiagneva? statte zitto,

990

Ca puro si’ n’auto sant’appede;

Vuommene? sia squartata chi ve crede.

MUSSASCIUTTO

Cecella no cchiù mmo’, vi’ ca te ncanne.

CECELLA

Haggio visto co st’vuocchie

Mo’ nnante ca pittava no vacile,

995

E dinto nce facea la sia Norella.

MUSSASCIUTTO

Lo ssaccio; ed iere tu, non era chella;

Sta sera mme lo dace, e bedarraje

Ca t’assemeglia assaje; e pe nzegnale

Doje lettere e nc’hà scritto a na fronnella,

1000

Una Luccio vo’ di’, ll’auta Cecella.

CECELLA

Fegliulo si’ gabbato, e tu mme gabbe.

MUSSASCIUTTO

Chesto ll’haie do vedè, cagna penziero.

CECELLA

*Lo bolesse lo Cielo, e fosse vero.

Zitto che sento scennere, vattenne.

MUSSASCIUTTO

1005

Mo’ me nzippo cca dinto,

E do ssa nova a Luccio.

*La pace è fatta già, lo cucco è pinto. (trase addo Luccio.)

SCENA XIII

ZEZA, e CECELLA.

ZEZA

Cece’?

CECELLA

Che d’è gnama’?

ZEZA

Famme la spia

Non te partì da lloco.

CECELLA

Addo’ vuo’ ire?

ZEZA

1010

Dint’a lo magazeno.

CECELLA

E che buo’ fare?

ZEZA

Vasta,

Nche bide Tonno, E tu damme na voce.

CECELLA

Va sbrigate.

ZEZA

Mo’ venco.

No nte partì da lloco.

CECELLA

Me trattenco. (Zeza trase, & esce subbeto co no carosiello mmano e ba dint’a lo magazeno.)

1015

O Luccio, si è lo vero

Chello, c’haggio sentuto, io te perdono

Li guaje, che mm’haje dato, e lo trommiento;

Che fa lo core, uh che prejezza sento.

Bello sciore addoruso, addoruso

1020

La speranza chianillo, chianillo

Mpiett’a mmene,

Nce face sguiglià.

E già sento ch’Ammore ngegnuso,

Comm’a n’apa volanno nce vene,

1025

Se nce posa, e lo mmele nce fa.

SCENA XIV

MUSSASCIUTTO, e LUCCIO dint’a la fajenzera, CECELLA addo’ steva, e NORELLA a lo bbarcone de banna.

MUSSASCIUTTO

Priesto veccola llà, su fatte sotta.

LUCCIO

Bene mio, ca me tremmano le gamme.

MUSSASCIUTTO

O cano non perdi st’accasione

De fa la pace. (lo votta fora, e isso resta dinto.)

LUCCIO

No lo fa la sciorte,

1030

Ca la nnemmica mia vo’ guerra, e morte.

CECELLA

*Vedo Luccio, foimmo.

LUCCIO

Non foire.

Fremma Cecella siente na parola.

CECELLA

*Haggio perzo le fforze maramene,

Voglio foì, né saccio chi mme tene.

LUCCIO

1035

Votame cca sta facce

Bello Sole d’Austo,

Saccio, ca vuo’, che mora,

Tienememente, e po te do sto gusto. (Cca esce Nora s’addona de chille e se ne trase a fa la spia.)

CECELLA

A chi dice?

LUCCIO

A te ddico.

CECELLA

Hai fatt’arrore,

1040

Tu parle co Norella.

LUCCIO

Hai fatt’arrore tu, parlo a Cecella.

NORELLA

*La cosa non mme spiace, appriesso, appriesso.

CECELLA

Mente, che ddice a mme, che cosa vuoie?

LUCCIO

Comme pozzo parlà si no mme vide.

CECELLA

1045

E c’haggio da vedere tradetore?

LUCCIO

No desperato, che pe te già more.

CECELLA

Votammoce, e bedimmo

Luccio (restano ncantate, e se metteno a chiagnere tutte duie.)

LUCCIO

Cecella mia.

NORELLA

*E fanno tutte duje la percopia.

CECELLA

1050

Che d’è? non mparle?

LUCCIO

E che buo’ cchiù che dica?

Te parlano chist’vuocchie co lo chianto,

Tu saje, che bonno dire.

CECELLA

No lo ntenno,

No tiempo le ntenneva,

Quann’erano li mieje, e le credeva.

LUCCIO

1055

Cece’ no ndi’ accossì, ca cchiù m’accide;

St’vocchie, sta vita, e st’arma

Semp’è stata, e sarrà sempe la toja;

E si la gelosia pe no piezzo

Nc’hà puosto nfra de nuje tanta roina;

1060

Sacce mo’ vita mia, bellezza, fata,

Ca nfra lo sdigno, t’haggio sempe ammata.

CECELLA

Pocca te faje coscienza, e chesto dice;

Io puro mo te dico,

Si’ stato sempe cca, si be’ nnemmico.

LUCCIO

1065

Core mio me perduone.

CECELLA

Te perdono.

LUCCIO

Sarraie la mia?

CECELLA

Si lo Cielo vole.

LUCCIO

Me lassarraje mai cchiù?

CECELLA

N’havè a ppaura.

NORELLA

*Ve voglio fa restà tutt’a la scura.

CECELLA

Speranza ammata,

1070

Crideme gioja,

Ca st’arma è toja;

E sta securo,

Ca toja sarrà.

LUCCIO

Bellezza, Fata

1075

Cride tu puro;

Ch’è tujo sto core;

E nzi’, che more

T’have d’ammà. (fenuto lo dovetto esce Nora, e rasca.)

*Addov’è sciuta chesta a sconcecarece?

1080

Cecella trasetenne.

Tu saje, che lengua tene,

Levammo quarche baja si mme vuo’ bene. (Cecella se ne trase, Luccio se retira, fegnenno de no mmedè Nora.)

SCENA XV

NORELLA, e LUCCIO.

NORELLA

Galant’ommo?

LUCCIO

O Norella lloco staje.

NORELLA

Cca stonco, e tu addo’ vaie guatto, guatto?

LUCCIO

1085

Comme guatto?

NORELLA

Gnorsine.

LUCCIO

E c’haggio fatto?

NORELLA

Ll’haje scomputa tradetore?

Non te serve, che mmo’ fuje,

V’haggio visto a tutte duje,

Non te puo’ cchiù commeglià.

1090

Tu si’ chillo, che mm’hai ditto,

Ca pe mme stencine, e muore?

Zanno, zanno, zitto, zitto,

Chi te cride coffià?

LUCCIO

Nore’?

NORELLA

Sfratta schefienza.

LUCCIO

1095

Sienteme na parola.

NORELLA

Va a la forca.

LUCCIO

Vi’ ca tu sgarre affé.

NORELLA

Ll’haje tu sgarrata

Si te cride pigliarme de partito.

Va c’haje da fa co mmico, io non sia Nora,

Si no mme fido fartene pentire.

LUCCIO

1100

Mo’ mme ne vao, si non mmuo’ sentire.

SCENA XVI

ZEZA ch’esce da lo magazeno co no carosiello mmano.

ZEZA

Haggio fatta la mbroglia netta, netta;

Vecco lo carosiello de Messere,

Addo’ stea chisto, nc’haggio puosto n’auto

Chino de jettarielle; mo’ vedimmo

1105

Appriesso, che nne vene;

Tonno non mpenza a mmene,

Ca maje m’hà ditto niente. Oh bello juoco;

Ll’haggio saputa fa chiano chianillo

Haggio troccato chisto, e puosto chillo.

1110

Ma vene Ciommo, lassame trasire,

Che no lo veda, e mme lo scippa tutto.

SCENA XVII

CIOMMO che sponta, MUSSASCIUTTO che fa la spia da dinto a la poteca de Luccio, e ZEZA.

MUSSASCIUTTO

Vedimmo si nc’è nullo; uh la Majesta. (trase la capo e appanna la poteca.)

CIOMMO

Ah sia Zeza, zi, zi.

ZEZA

Che d’è si Ciommo.

CIOMMO

Sienteme na parola.

ZEZA

Viene ccane.

CIOMMO

1115

No mme ce fa venì, si vene Tonno

Facimmo n’auta baia; viene priesto.

ZEZA

Veccome cca, che buoie? (Essa, e Ciommo se metteno de spalla a la poteca de Luccio, e Mussasciutto da dereto fa la spia.)

CIOMMO

Da mo’ sconcrudo

La parentezza nosta.

ZEZA

E pecché fine?

CIOMMO

Lo pirchio de mariteto no mmole.

ZEZA

1120

E ca isso no mmole, lo bogl’io.

CIOMMO

No, no, bellezza mia

Vogl’essere pregato a facce nterra,

Si vo’ che ll’auza n’vuocchio schitto nfaccia;

Che se crede Pertuso, potta d’oje?

1125

Quant’anore pò havere, si mme dace

La figlia pe bajassa.

ZEZA

Chiano Ciommo,

Ca chella è figlia a mmene.

CIOMMO

E pe chesto sto zitto, ca si none

ZEZA

Po parlammo cchiù a luonco,

1130

Torn’a cca n’auto ppoco ca te donco

Vintecinco zecchine.

CIOMMO

*Chesta n’abburla. Me le ddaje?

ZEZA

Gnorsine. (se ne vanno. & esce Mussasciutto.)

MUSSASCIUTTO

Bon’ora c’haggio ntiso!

Tutto chesto nc’è cca? su Mussasciutto,

1135

A tte, ngarza sta pazza, e sto frabutto

Oh vene Titt’a tiempo, e nce lo voglio.

SCENA XVIII

TONNO, e TITTA pe chiazza, ZEZA, e CECELLA a la poteca, e MUSSASCIUTTO de banna.

TITTA

Havimmo da scardà no gruosso mbruoglio.

TONNO

A chesto nce penz’io; mo’ lo bedimmo

Si ponno cchiù ste brache, o na gonnella

1140

Miettete a chisto pizzo, e sta a bedere. (Cca Mussasciutto annascuso parla a Titta, e le dice a l’arecchia.)

MUSSASCIUTTO

Quann’haie scomputo, t’haggio da parlare

Viene addo Maso. (se ne trase Mussasciutto da dinto.)

TITTA

Va ca mo’ mmo’ vengo.

TONNO

Zeza?

ZEZA

Chi è lloco? (da dinto.)

TONNO

Chiammame Cecella.

ZEZA

Mo’ te la chiammo.

TITTA

Vi’ pe quarche baja.

TONNO

1145

Che Baja, che Pezzulo?

Tu no nzaje che sa fare sto fegliulo. (Cca esceno Cecella, e Zeza.)

Viene cca figlia mia.

CECELLA

Che buo’ Gnopatre!

ZEZA

Chisto che bo’ da cca? (a Tonno parlanno de Titta.)

TONNO

A te che mporta? (a Zeza.)

Sienteme cca Cecella, tu si’ stata

1150

Sempe na bona figlia

ZEZA

Appriesso, appriesso.

TONNO

Vi’ che mmalora nera, va vattenne.

ZEZA

Tu qua mbroglia vuo’ fare.

TONNO

E manco mone?

TITTA

*Zi Tonno riest’appede chesta vota.

TONNO

Comme te stea decenno, figlia mia,

1155

Pecché si’ bona figlia,

Lo Cielo t’ha mannato bona sciorta

ZEZA

No mmolimmo cchiù sciorta

TITTA

*C’haggio ditto.

TONNO

Vi’ ca te rompo ll’ossa, statte zitto. (a Zeza.)

Io t’haggio mmaretata a sto fegliulo. (a Cecella.)

1160

Titta!

TITTA

Schiavo Patrona.

CECELLA

Bemmenuto.

TONNO

Tu lo ssaie ca sta buono, è buono figlio;

Te vo’ bene, e te vole senza dote

ZEZA

E nuie no lo volimmo.

TONNO

Saglie ncoppa. (la votta dinto.)

O te cardo sta stoppa? (a Zeza.)

1165

Che ddice? Si’ contenta? (a Cecella.)

ZEZA

Cana no dire sì, ca te mmardico. (da dinto strilla.)

CECELLA

Tata, che buò che ddico? tu lo ssaie,

Ch’a mamma, e ttene v’haggio d’abbedire;

Senza de vuie no mme pozzo movere;

1170

Agghiostateve vuje ca faccio chiovere. (se ne trase.)

TITTA

E be’ t’haggio ditto, a rrevederece. (a Tonno).

TONNO

Aspetta n’auto poco.

TITTA

Haggio da fare. (se ne va.)

TONNO

Cecella viene cca. (Cca esce Zeza, e botta Tonno, che bo’ trasire.)

SCENA XIX

ZEZA, e TONNO.

ZEZA

Tu puo’ schiattare.

Chesta si no la vince;

1175

La voglio mmaretare a gusto mio.

TONNO

*Co chesta, si nce strillo, faccio peo.

O Zeza mia che faie, vi’ ca si’ pazza

ZEZA

Si’ pazzo tu guattascio; che te pare?

M’haggio cresciuta chella puca d’oro.

1180

Pe fa fa la vajasse a no schefienza?

Pe scopà lo Molino?

Pe covernà li Ciucce, e li Cavalle?

N’è stat’acciso? affé no la perlicca,

Tu puo’ schiattare, ed isso che se mpicca. (se ne trase arraggiata.)

TONNO

1185

Che puozz’esser’accisa

Ma Titta addov’è ghiuto

Tiemente, ca chist’anto s’è pentuto.

SCENA XX

TITTA, e MUSSASCIUTTO.

MUSSASCIUTTO

Mettimmonce de posta

Ca nuje nne le zampammo li Zecchine.

TITTA

1190

Vide, ca no nce resce.

MUSSASCIUTTO

Dalle chiacchiare tune,

E bedarraje, che butto

Te fa fa Mussasciutto.

TITTA

Vi’, che becchia mmardetta! A Ciommo?

MUSSASCIUTTO

A Ciommo.

TITTA

1195

Vintecinco Zecchine?

MUSSASCIUTTO

E n’auta vota!

TITTA

E ncunto de la dota?

MUSSASCIUTTO

Nce vuoje na sonatella?

Ma chillo nce le truffa

E nche ll’ave a le granfe, se l’affuffa.

TITTA

1200

Chest’è securo.

MUSSASCIUTTO

Zitto, ca mo’ vene:

Arrepammonce cca, ca no nce scappa

La facimmo la zappa.

SCENA XXI

CIOMMO, e ZEZA.

CIOMMO

Io creo ca simm’a tiempo, ecco llà Zeza;

Che me fa signo, a te curre si Ciommo,

1205

Ch’è lesto lo neozio; che nc’è Gnora?

ZEZA

Te piglia cca, so’ bintecinco chisse,

Torna cchiù a notte ca te do lo riesto,

Parlammo, e la scompimmo sta facenna,

Nguadie Cecella ;e Tonno che se mpenna.

1210

Che strilla e sbatta,

Che crepa, e schiatta,

Mo’ tocc’a mmene.

A DUE

E si nce vo’.

ZEZA

Iss’hà ncocciato,

1215

Zez’hà ntostato;

Vi’ che nne vene?

Che sciala mo’.

A DUE

E si nce vo’. (Zeza se ne va.)

CIOMMO

Oh bene mio, che bedo; e sonco ruspe. (apre la pezzolla.)

1220

Vintecinco Zecchine a Ciommo? a Ciommo

E chi me vo’ parlare? Mo’ mme faccio

A la varva de Zeza

No vestito de trinca de Scarlato

Bene mio, che sarrà mmiezo a sto Burgo,

1225

Jarranno sotta, e ncoppa,

E massema le Femmene

Pe bedere sto fusto; e bi’ ca voglio

Levà cappiello a nullo,

Nnammoratelle mo’ ve do no vullo.

SCENA XXII

TITTA, e MUSSASCIUTTO da banna, e CIOMMO.

TITTA

1230

Haje visto addo’ l’hà mmiso. (zoè li Zecchine.)

MUSSASCIUTTO

Tanto bello!

CIOMMO

(Mme senco ricco affunno;

E songo lo primm’ommo de lo Munno.)

MUSSASCIUTTO

(E ba, ca vuoje sta pace.) Fatte nnante. (a Titta.)

TITTA

Sio Ciommo, schiavo tujo.

CIOMMO

1235

O! Titta bemmenuto.

TITTA

E mbe’? te pare buono?

È bona st’azzejone?

CIOMMO

Va parlanno: Che d’eje?

TITTA

E comme! no lo saje?

MUSSASCIUTTO

Chisto hà raggione.

CIOMMO

1240

E de che? gioia mia!

MUSSASCIUTTO

(Cca sta lo mbruoglio.) (Mosta la fauda de la Sciammerga, addo’ Ciommo ha puosto li Zecchine.)

TITTA

Mme prommettiste de mme dare ajuto,

Pe mme peglià Cecella,

E po mm’è stato ditto;

Ca te l’acchiappe tune.

MUSSASCIUTTO

È buono chesto?

CIOMMO

1245

Chiano: mo’ te dich’io

MUSSASCIUTTO

(La faccio cierto: lo neozeio è lesto.) (parla de li Zecchine.)

CIOMMO

E che nce pozzo fare

S’aggio lo sanco doce?

Che buo’, si quanta femmene mme vedono;

1250

Tutte se nne nnammorano;

Chi la vide, che spasema:

Chi se scippa, e se vatte, e chi pecceia:

Chi vide morì jetteca:

Chi vide restà teseca;

1255

Chi chiagne, chi sospira, e chi peneja!

TITTA

Chesto lloco lo saccio.

MUSSASCIUTTO

È cosa vecchia.

CIOMMO

E mbe’, si lo sapite,

Conzederate a povera Cecella;

Ed aggio fatto chesso,

1260

Pe no la fa morì la poverella.

MUSSASCIUTTO

(A ca mo’ nce vedimmo.) (fa la mmira a li Zecchine.)

TITTA

Siente, Ciommo, agg’a gusto

Ca Cecella è la toja,

Ca saccio, chi si’ tune; e azzò, che bide,

1265

Ca contiento nfi’ mponta

Io ne songo rommaso,

Te voglio da n’abbraccio, co no vaso.

CIOMMO

O Titta de sto core

Mo’ te voglio cchiù bene,

1270

Mo’, che canusce ll’Uommene. (Mussasciutto mo’ le va levanno li Zecchine.)

TITTA

Lassamette vasare n’auta vota.

MUSSASCIUTTO

(Voglio, che mme nne nnuommene.)

Ed io porzì t’abbraccio, ca lo mmierete:

Viva Ciommo mill’anne. (mo’ nce ll’hà levate.)

CIOMMO

1275

Ammecone norato;

Vide da me, che buoje.

MUSSASCIUTTO

(Nce ll’aggio fatta pe lo juorno d’oje.)

(È fatta la botta

Chianillo, chianillo.)

1280

La sciorte te votta,

Ca chillo morzillo (a Ciommo.)

È propeio pe te.

(E chesta è pe mme.) (la Vorza.)

Tu si’ no fatone:

1285

Si’ bello, sfarzuso:

Smargiasso, guappone:

Polito, cianciuso,

Lo paro non c’è.

(E chesta è pe mme.) (la Vorza.)

CIOMMO

1290

E biva Mussasciutto. Veramente

Si’ fegliulo saputo,

Ca lo mmiereto nuosto haje canosciuto.

MUSSASCIUTTO

E chi no nte canosce?

TITTA

E chi non sa quanto fammosa sia

1295

De Compa’ Ciommo mio la guapparia?

CIOMMO

E che sapite vuje?

S’io ve contasse le prodizze meje,

Ve farria fa no pizzeco;

E azzò non se nne perda la Mammoreja,

1300

Se nne stampa la storeia.

MUSSASCIUTTO

E co raggione;

E mme creo, ca sarrà no storejone!

TITTA

E addove

Maje lo truove

Chi saccia fa sti schiasse?

1305

Non serve a dire cchiù,

Ca tu

Se sa, chi si’.

(Ma te ll’haje fatta fa!)

Si, mmiezo a le prodizze,

1310

Lo Rre de li Smargiasse,

E faje co sse bellizze

Le femmene sperì.

(Ma si’ cappotto già.)

CECELLA

Vuje mo’, che ve credite,

1315

Ca nce schitto valore,

Ca nce sulo grannezza,

Gravetà, vezzarria, spanfio, e bellezza?

Nce l’argiamma porzine.

Tiemente; ed ammarciammo co Zecchine.

1320

Uh! bonora! la Vorza?

Addov’è! ch’è squagliata, bennagg’oje!

Via: jatela caccianno.

TITTA

Io te ll’aggio da dà?

MUSSASCIUTTO

Da me la vuoje?

CECELLA

Da vuje; ca mo’ stea ccane.

TITTA

1325

A Cio’, vi’ comme parle!

MUSSASCIUTTO

A me chesto? si’ pazzo!

CIOMMO

Comme potta de craje

TITTA

E che? fuorze mme saje pe marejuolo?

MUSSASCIUTTO

Si’ tu no truffajuolo.

CIOMMO

1330

Ma la Vorza no nce, da vuje la voglio.

TITTA

E che buo’? chessa spata

Ncanna te l’arravoglio! frabuttone!

MUSSASCIUTTO

Chi parla de Zecchine!

Che Zecchine vo’ avè lo pezzentone!

CIOMMO

1335

O chesta sì, ch’è bella!

Li Zecchine; o ve sgorggio.

TITTA

No nte movere,

Ca te torcio sso cuollo, potronaccio.

MUSSASCIUTTO

Tiene le mmano a ttene

Si non vuoje, che te spenna sso mostaccio.

CIOMMO

1340

Ah! potta!

TITTA

Va a la forca

Pedocchiuso, fetente.

MUSSASCIUTTO

Sfratta da cca, birbante,

O te faccio Zompà tutte ssi diente.

TITTA

Marejuolo,

1345

Lazzarone

MUSSASCIUTTO

Truffajuolo,

Mascauzone

CIOMMO

Li Zecchine addo’ so’ ghiute?

TITTA - MUSSASCIUTTO

Che Zecchine? tu si’ pazzo.

CIOMMO

1350

Non ve resce sso designo.

TITTA - MUSSASCIUTTO

No nte serve sso scamazzo.

CIOMMO

Mo ve fello, ve sbodello,

Li zecchine voglio cca.

TITTA - MUSSASCIUTTO

Si n’astute

1355

Sso locigno

Ste manzolle vuoje provà.

CIOMMO

Li Zecchine, potta d’oje!

TITTA

Tu che buoje?

Sfratta da lloco.

MUSSASCIUTTO

1360

No la scumpe, o mo’ t’affoco.

CIOMMO

A mme chesto?

Mo’ ve scresto.

TITTA - MUSSASCIUTTO

Te volimmo sbodellà.

CIOMMO

Mme ll’avite da pagà.