La mogliere fedele

La mogliere fedele, Napoli, A Spese de li Mpressarie, 1731

a cura di Emanuela Esposito

paratesto ATTO PRIMO ATTO SECONDO ATTO TERZO Apparato

ATTO PRIMMO

SCENA PRIMMA

TITTA, che da coppa no barcone tene mente a mmare.

TITTA

Quanto trica a spontare sta falluca,

Che porta Lella mia; ed io cca stento

Già la rraggia me zuca,

Pocca n’anno me pare ogne momiento.

Fosse chesta, che bota, e nterra sia?

Me pare, ch’essa sia

O Titta allegramente, chesta è essa,

Va scontra Lella toja, curre a la mpressa.

SCENA II

MEO, LELLA, e SCONCIGLIO, che benono co na Falluca.

MEO

Arrieje, arrieje, sepponta sso vracciullo,

Zompa nterra Nardullo,

Mantiene la falluca. Scinne Lella,

Sta attiento, zompa chiano.

SCONCIGLIO

Che non cadite, dateme la mano.

LELLA

Non c’è paura, che so’ peccerella?

SCONCIGLIO

(O bene mio, che mano tennerella.)

MEO

Fegliule jatevenne: ed allestite

Ssa falluca pe fare la recatta,

Attiente, ca, mo’ vengo;

Faciteme trovà la cosa fatta.

LELLA

Ne Zi Meo, che bo’ di’, ca no nc’è Titta?

MEO

Mo’ steva a lo barcone.

Mme credo, ca mo’ scenne. Oh teccotillo.

SCONCIGLIO

Cordola mia, mo’ vene lo cardillo.

SCENA III

TITTA, e li stisse.

TITTA

Singhe la bemmenuta

Stella Dejana mia.

LELLA

Tu ben trovato,

Schiecco de st’uocchie mieje.

TITTA

Comm’haje trecato?

LELLA

Mamma sta poco bona, e io so’ benuta.

Pe darte gusto cchiù, che pe la festa;

Ma se fa la recatta?

TITTA

E comme? è lesta.

MEO

Pe te dare sto spasso

Facimmo sta pazzia.

SCONCIGLIO

E tu sia Lella mia,

Nce volive pe fare la cchiù bella,

Perché nne si’ lo sciore, e la mortella.

LELLA

Ah a, staje bravo alliegro stammatina.

SCONCIGLIO

Saje pecché? c’aggio visto

La Fata mmeriana;

(L’addore de na femmena me sana.)

MEO

Orsù fegliola, saglietenne ncoppa,

Ca mo’ vengo; Nardullo jammoncenne

A fa le ccose noste; apparecchiammo

Quanto nce vo’ pe sta recatta.

SCONCIGLIO

Jammo eh sia Lella, sia Le’.

LELLA

Che buo’ Nardullo?

SCONCIGLIO

Vuoglieme bene a Titta; già lo ssaje

Ca me ll’ haggio cresciuto a cetrolella.

TITTA

Va pazzo, va t’agghiusta le ccervella.

Lella mia.

LELLA

Titta caro.

TITTA

Che dice mamma toja? Quanno vole

Che nguadejammo?

LELLA

Quando vo’ Zi Meo.

TITTA

Ma Zieto no la sbriga, ed Io me strujo,

E quanto cchiù l’appretto, fa cchiù ppeo.

LELLA

Ma che buo’, che nce faccia?

Parlà non me commene,

Tu, che si’ ommo, parla tu pe mmene.

TITTA

Fenuta chesta festa, io lo metto

Co le spalle a lo muro, azzò nce sbriga.

LELLA

Fa chello, che te pare.

TITTA

Saglietenne; e chi t’ama sacce amare.

LELLA

Sì ca t’amo speranza mia bella

Quanto pote sto core cchiù amà.

TITTA

Sì ca pato belleza mia cara,

Quanto pozzo patì cchiù pe te.

LELLA

Tu si’ l’arma, e la vita de Lella,

Senza l’arma pò Lella campà?

TITTA

Tu lo Sole, che st’uocchie reschiara,

Senza Sole pò Titta vedè?

SCENA IV

CIULLA, e NTREJANA mmocca la porta.

NTREANA

E ghiesce no tantillo, che cos’haje?

Piglia no poco d’aria

Ciulla mia, non t’addà tanta a li guaje.

CIULLA

Ah Ntrejana mia cara, mamma mia,

Lassame sta, pozz’esse canosciuta.

NTREANA

E chi te vo’ canoscere fegliola?

S’io che t’aggio cresciuta,

Quanno te vidde, non sapea chi jere!

E po cca nce credimmo, ca si’ morta

CIULLA

Lo bolesse la Sciorte,

Che fosse vero, ca non patarria

Chesto che pato.

NTREANA

Non te sconfedare,

Lo Cielo sempe ajuta la nnocenza,

Ma nce vonno a li guaje tiempo, e pacienza.

CIULLA

Che tiempo vuoje c’aspetta,

Si ll’acqua è ncanna; e Titta mio se nzora

Nfra poche juorne, comme tu m’haje ditto.

NTREANA

Chesto, soccedarria, s’io non sapesse,

Ca tu si’ biva, e Titta t’è marito.

CIULLA

E ca lo ssaie, che pe chesto?

NTREANA

Eh zitto;

Lassa fa a chi sa fare; aggio penzato,

Comm s’ha da guastare sto pegnato.

Nch’è benuta la Zita

Pe bedere la festa,

Io mm’appresento lesta,

Le canzonejo lo tutto,

E chiarimmo accossine sto frabutto.

CIULLA

Ntrejana non faje niente, e tu m’accide

Ca me scoprisce a Lella, che guadagne?

Farraje, che non se nguadia Titta mio;

Ma Titta si lo ssape, ca io so’ biva,

Trovarrà n’auta via pe me scannare.

NTREANA

Oh, ca mo’ staje a Napole, e no a mmare.

100

Sautammo chisto fuosso

Co ffa, che non soccea sta parentezza?

Ca po dell’auto lassa fa a la Sciorte,

Tu staje co mmico, e lloco sta la Corte.

SCENA V

TENZELLA, e le stesse.

TENZELLA

Mamma ma’

NTREANA

Tu si’ scesa, o cana perra

105

Io non t’aggio mannata,

Ch’aspettasse la Zita, e po veniste?

TENZELLA

E la Zita è benuta, ed io so’ scesa.

NTREANA

È benuta.

TENZELLA

Mo’ nnante.

NTREANA

E chi nc’è ncoppa?

TENZELLA

La Vava, e la crejata.

NTREANA

Buono, buono

110

Non perdimmo lo tiempo, trasetenne

Ciulla mia, statt’allegra.

CIULLA

E pe cche fine?

NTREANA

Ca mo’ saglio, te servo,

E t’ammaturo chisto suorvo aciervo.

So’ ppassara vecchia,

115

E faccio lo nido

Nche muodo se fa;

No cchiù sosperà

Ca be’ mme confido

De farte gaudè.

120

Me prode st’aurecchia

A a, chist’è signo,

Ca venco lo mpigno

T’agghiusto quatt’ova,

Mo’ vide che prova

125

Farraggio pe tte.

SCENA VI

CIULLA, e TENZELLA.

CIULLA

Tenza che dice? Trovarraggio maje

Remmedio a tanta guaje?

TENZELLA

Non dobetà sia Ciulla, ca nc’è mamma

Mmescata a sta facenna; ed essa sape,

130

A cuoppo cupo quanto pepe cape.

CIULLA

Aje ditto niente a Lella,

Ca so’ biva?

TENZELLA

Ah maramene, none.

CIULLA

Ne lo di’ a nullo.

TENZELLA

Guarda, che so’ pazza?

CIULLA

Di’, ca te so’ commare a chi te spia.

TENZELLA

135

Non me mparare a dire la boscia.

CIULLA

Dimme, la Zita è bella?

TENZELLA

È bella, e aggraziata,

E comme na signora sta parata.

CIULLA

Sciorta chesto de cchiù? tanta nnemico

140

Haje nzerretato contra st’arma mia

Sdigno, ammore, bellezza, e gelosia.

Povera pecorella

Sto mmiezo a tanta lupe;

Cca sciumme, e cca scarrupe;

145

Che cosa pozzo fa.

Oddio, ed a qua’ stella

Si’ nnata sbentorata

Che bide, chat’accide

Chi t’ave da sarvà. (Saglie desperata.)

SCENA VII

TENZELLA, e po SCONCIGLIO.

TENZELLA

150

Ora vide a che mbruoglio

Se trova chesta scura,

E no mmore de collera, e paura!

SCONCIGLIO

È llesto, è llesto; lassa fare a mene. (da dinto.)

Vi’, che golio le vene a Patro’ Meo (fora.)

155

De farme fare a me lo roffeano!

TENZELLA

(Uh veccote Sconciglio.)

SCONCIGLIO

E che è lo ppeo,

S’è nnammorato de Tenzella mia;

Va ca staje frisco, già la cosa è fatta.

Tu faje guardà lo pesce da la gatta. (ride.)

TENZELLA

160

Sconciglio pecché ride?

SCONCIGLIO

Oh, cca tu staje

Porpessa de sto core? non saje niente?

TENZELLA

Che cosa?

SCONCIGLIO

Cartafauza m’ave ditto,

Ca te vo’ pe mogliere,

E bo’, che parla a mammeta.

TENZELLA

165

Addavero?

SCONCIGLIO

Ncoscienzia.

TENZELLA

Cartafauza a mme bole?

Ah a, che risa.

SCONCIGLIO

Tu mo’ ride, ed io schiatto.

TENZELLA

E pecché Ninno mio?

SCONCIGLIO

Uh chi lo ssape,

Che fa pe te pigliare.

TENZELLA

170

Co ccarte fauze no mmogl’io jocare.

SCONCIGLIO

E si mammeta vole?

TENZELLA

Non mmogl’io.

SCONCIGLIO

Mo’ se vede, che faje?

TENZELLA

Statt’a bedere.

Di’; che me venc’attuorno, ca ng’hà gusto,

Ca le nchierchio le ddoghe de lo fusto.

SCONCIGLIO

175

Ed io pe l’agghiustare la cocozza,

Lo porto all’Incorabole ncarrozza.

TENZELLA

Ora dimme na cosa?

SCONCIGLIO

Va dicenno.

TENZELLA

Chi voca a la recatta?

SCONCIGLIO

So’ pparicchie.

Nc’è Titta, c’hà sparmata la falluca,

180

E Fonzillo la soja; nce so’ ciert’aute,

Cartafauza mo’ è ghiuto

Pe s’allestire, c’have na speranza

De guadagnà lo palio, e darlo a ttene.

TENZELLA

A mme lo palio a mene?

SCONCIGLIO

A ttene, a ttene.

185

Che d’è? n’è faccie chessa

D’avere ciento palie?

TENZELLA

Uh che scheressa!

SCONCIGLIO

Scheressa? manna crapa, ed oje lo bide,

Si ll’haie; e te lo dà Sconciglio tuo.

TENZELLA

Comme? Tu puro vaje a la recatta?

SCONCIGLIO

190

Tanto bello; Nuje simmo seje compagne

Ncoppa na castaudella,

Ch’ng’havimmo affettata; e tutte seje

Simmo tanta lejune, che scapammo

Co lo sciato sto mare,

195

E lo palio volimmo guadagnare.

TENZELLA

Tieme’, che bella cosa! E staje securo

Ca lo vince?

SCONCIGLIO

Pe cierto, è cuotto, è fritto

Ed a tte lo regalo, t’haggio ditto.

TENZELLA

Sinche lo bemmenuto co sta nova,

200

E cchiù meglio venuto po sarraje!

Si puorte lo presiento;

SCONCIGLIO

E cche me daje?

TENZELLA

So’ ppovera fegliola,

Non haggio, che te dare:

Tenco sto core sulo,

205

Si tu lo vuoje fegliulo,

Stienne sta mano cca;

Te pigliatillo.

SCONCIGLIO

Oh bon ora, e che chiappo, che me mette!

TENZELLA

Ma damme sta parola

210

De no lo strapazzare,

Ch’è troppo tenneriello;

St’attiento cacciottiello,

Non me fa desperà,

Covernamillo.

SCONCIGLIO

215

E ba scappa si puoje da sto mastrillo.

Seppe mo’ so’ barato;

Chesta m’hà già ncroccato

Co li squasille suoje; Mo’ m’abbesogna,

P’attennè la promesa

220

O che benca lo palio, o faccia spesa.

Le femmene so’ fatte

Comm’a lo grattacaso,

Che quanto cchiù nce gratte

La provola, lo ccaso,

225

Cchiù te lo ba strodenno;

Ad essa la mollica,

E a te la scorza.

Così fa na fegliola,

Che quanno tu nce tratte

230

O criepe, o abbutte, o schiatte,

T’ha da sciccà na mola,

Né la puo’ ì fojenno,

Ca quanto cchiù se trica,

Se fa cchiù afforza.

SCENA VIII

NTREANA, e LELLA mmocca la porta soja.

NTREANA

235

Tu mo’ m’haje ntiso chello, c’haje da fare?

LELLA

T’aggio ntiso, no cchiù; ma resto pazza.

Titta hà mogliere, e me vo’ zannejare.

NTREANA

Se crede, che sia morta.

LELLA

Tu comme saje, ch’è biva?

NTREANA

Che te mporta?

240

Vasta, che lo sacc’io.

LELLA

Aimmè che sento?

Quanno me credo d’esse mmaretata

Me vedo coffejata.

E chi vo’ comparire pe lo munno?

NTREANA

C’haje fatto qua sbreguogno? O si tu sola,

245

Che faje l’ammore, e po la parentezza

Quanno se stregne, sciosciala ca vola?

LELLA

Ma comm’haggio da fa, ca mpiett’a mmene

Titta se nc’è nchiovato?

NTREANA

Te manca nnammorato?

250

No chiuovo caccia ll’auto; nc’è Fonzillo,

Che mpazzesce pe ttene.

LELLA

E sempre chisto

Me vruociole pe nnante, t’haggio ntesa:

Pe l’ajutà, sta bella rezza haje stesa.

NTREANA

Che rezza? co chi ll’haje? Tu parle sparo

255

Ciulla tu la canusce?

LELLA

La canosco.

NTREANA

Ed io nnante sta sera,

Te nce faccio parlare, e tanto vide,

Si è biva, o morta, pocca no mme cride

Ah zitto ca mo’ vene, st’a sentire

260

Comm’haje da dire, e chello, ch’haje da fare.

LELLA

Ntreana jammo dinto si te pare.

SCENA IX

TITTA, che scenne da la falluca, e le stesse, ch’esceno fenuta la mez’aria de Titta.

TITTA

Bella sciamma de sto core.

Esco mo’ da dinto mare.

P’abbrusciare nnante a te. (esce Lella co Ntreana.)

265

Oh vecco Lella mia.

Schiavo bellezza co la compagnia.

NTREANA

Sio Titta mio benvenuto.

LELLA

Addio. (de mala grazia.)

TITTA

Addio! che bo’ di’ chesto? m’haje trovato

Che stea scocchiarejanno lo pegnato? (Lella fegne iresenne, e Ntreana la tene.)

NTREANA

270

Chesto non sia pe ditto

Vi’ ch’è mala creanza figlia mia.

LELLA

E lassame Ntreana, hagg’auto ncapo.

TITTA

Gioja mia, che d’è chesto? ch’aggio fatto,

C’accossì me recive?

NTREANA

Non è niente.

275

È na chiomera, che s’ha posta ncapo.

TITTA

E che d’è sta chiomera, va decenno. (a Ntreana.)

NTREANA

Dincello tu sia Lella!

LELLA

Aimmè lo core;

E lassamenne ì, lassa.

TITTA

Sia Lella,

Non so’ ommo, che mmereto sti ncuntre;

280

Se pò sapè che d’è, che staje schiattosa?

Priesto mo’, comm’è tosta! Vi’ che cosa!

LELLA

Vi’ che ccosa? ne forfante,

Co ssa faccie fresca fresca

Tu mme viene pe da nante

285

Pe tornarme a coffià?

Co che bella mmesca pesca

Si’ benuto tradetore?

Arma, vita, gioja, core

No ng’abballo cchiù a ssa danza,

290

Va te mpara de creanza,

E po vieneme a parlà.

SCENA X

NTREANA, e TITTA.

TITTA

Ntreana mia, che è chesto?

Sonch’io, o non sonch’io? e chesta è ella?

NTREANA

È ella, chi vo’ essere?

TITTA

E che have.

NTREANA

295

Non saccio chi l’ha ditto

Ca mogliereta è biva

TITTA

Oh chest’è bella:

Chella è già fatta terra, ha chiù de n’anno;

No m’hà visto portà porzì lo lutto?

NTREANA

Nce ll’haggio ditto, ed essa m’ha respuosto,

300

Ch’è biva, e tu te cride, che sia morta.

TITTA

Comm’è biva? si quanno jette a Spagna,

Me la portaje co mmico, e morze a Genoa.

NTREANA

E la vediste morta?

TITTA

Io l’atterraje.

NTREANA

(Ah mbroglione bosciardo) e Lella dice,

305

Ca nc’è chi l’ha veduta, e ng’hà parlato.

TITTA

Chisso starrà mpazzuto; o chesta è scusa.

NTREANA

È scusa, è scusa, me ne so’ addonata.

Ma chesto poco mporta, io tenco mmano

N’auta quaglia pe tte.

TITTA

Po se ne parla:

310

Voglio vedè ch’è chesto; e si quarcuno

L’ha ditto pe mme fare n’ancarella,

O marisso, ch’è nato,

E peo la mamma soja, che l’ha fegliato.

NTREANA

Figlio mio vi’ che faje.

TITTA

Che m’è socciesso!

315

Va Ntreana.

NTREANA

Haggio posta già na zeppa,

E mo’ vago a mpecà n’aute rechieppa.

TITTA

Che faccio, addo’ me voto, e qua è lo capo

Pe sbrogliare sto gliuommaro guastato?

Quanto cchiù penzo, cchiù me veo mbrogliato.

320

Quanta furie scatenate

Stanno attuorno a st’arma mia

Sdigno, Ammore, e gelosia,

Che mme stracciono sto core

E non saccio che mme fà.

325

Pe me bedo revotate

De lo mare tutte l’onne,

E sto pietto, se confonne

Pe sto guorfo a navecà.

SCENA XI

FONSILLO, e NTREANA, e duje Marenare appriesso.

FONZILLO

E lassateme ì, ca mo’ mmo’ torno (da dinto.)

330

Addove si’ Ceccone:

Mietteme lo tennale a la falluca

Co la bannera a poppa: E tu va piglia

Li rimme nuove, e miettece li struppole

Gagliarde, e nuove fatte; sta ncerviello,

335

Si non mmuo’, che t’ammacco sso scartiello

Ntreana stamm’a nuje, scumpe sso riesto.

NTREANA

Fortuna toja, che t’haggio mo’ trovato;

Non perdere cchiù tiempo, parla a Lella,

Dille, ca Ciulla è biva; e accossì Titta

340

Se pò annettà li diente.

FONZILLO

Io le vao a parlà, ma no mme sente.

NTREANA

Oh ca la truove mo’ d’autra manera;

Veccola llà, va curre, (compare Lella a la porta.)

Sacce di’, sacce fare

345

Po vieneme a trovare. (Fegne ì a la casa soja.)

SCENA XII

LELLA, e li stisse.

LELLA

Ah Ntreana, Ntreana?

NTREANA

Che nc’è Lella?

LELLA

Sienteme na parola.

NTREANA

Mo’ mmo’ venco,

Ca vao de pressa, vi’ che bo’ Fonzillo. (trase.)

FONZILLO

Sia Lella, ve so’ schiavo.

LELLA

Benvenuto,

350

Che v’haggio da servire?

FONZILLO

A me servire?

M’avite da fa grazia.

LELLA

Che bolite?

FONZILLO

Ah, ca troppo vorria,

Ma sonco sfortonato, e tremmo tutto,

Che no mme dice no.

LELLA

Si se pò fare,

355

Ve servo, pecché no; jate decenno.

FONZILLO

Sia Lella è quase n’anno

Che me strudo pe tte, comme se squaglia

La catramma a lo ffuoco, e sale all’acqua,

Te so’ benuto appriesso,

360

Comme no cacciottiello a la patrona,

E tu sempe stizzata

M’haje coll’uocchie chest’arma ntossecata.

LELLA

Me potive scosare,

Pecché sto core ll’haggio dato a Titta.

FONZILLO

365

Ma si Titta è nzorato,

No nce pierde sso core?

Lella mo’ che lo ssaje, cagna ss’amore.

LELLA

Comme nzorato? Non se sa ch’è bidolo.

FONZILLO

Accossì nce credeamo,

370

Ma la mogliere è biva

LELLA

E chi l’hà ditto

FONZILLO

Chi lo sape l’ha bista, e nc’ha parlato.

LELLA

E si chesso è boscia.

FONZILLO

Quanno passo da cca dimme, che buoje,

Famme scannare nnante a sso poncone;

375

Te perdono da mo’, ca n’haje raggione.

LELLA

Lassamenne nformare, e si è lo vero,

Prometto d’esse toja; si no, cojetate,

Ca nce pierde lo tiempo, e le pparole;

Io voglio Titta, ed isso Lella vole.

FONZILLO

380

Me contento, e lo ssaje?

LELLA

Te lo pprometto

Da fegliola norata,

E si te manco mora sbregognata.

FONZILLO

Fra li sciure de chesta speranza

Io m’addormo ciardino d’amore,

385

E lo core, che suonno se fa.

Nch’è lo tiempo, e stascione s’avanza,

Da li sciure a li frutte venimmo;

E starrimmo contiente a scialà. (se ne va.)

LELLA

Tu terzie na primera.

390

O chiagne a Bierno, o ride a Primmavera.

SCENA XIII

MEO, e TITTA pe strata.

MEO

Aspettame cca mmocca, ca mo’ saglio,

E bedo ch’è sto mbruoglio.

TITTA

Scinne priesto,

E sacce di’ a Nepoteta.

MEO

Mo’ venco,

Ma statte allegramente, ca n’è niente;

395

Sarrà qua scherebizzo de figliola,

Ca le vene, e le passa nduje momente

Ma tu che cosa haje fatto?

TITTA

Niente, niente.

MEO

Havisse sgargeato da cca ttuorno

Qua ffegliola de chesse?

TITTA

400

Chi nnà biste?

MEO

E ba, ca sta fraschetta

Te vo’ dà qua mmartiello pe pazzia.

TITTA

Ma chisto non è muodo d’abburlare,

Chesta è la via de mme fa crepare.

MEO

Tu si’ fegliulo ancora, Titta mio

405

E non saje ca le zzite so’ schiattose;

Co la fremma s’agghiustano ste cose.

Na jommenta polletrella

Sempe sta co l’arbascia;

N’abbesogna, che te stizze,

410

Si te fa qua’ mpertenenza;

Ca lo tiempo, e la pacienza,

Le ffrunnelle, e li carizze

Te la fanno po addomà

Accossì fa na zetella,

415

Ch’hà la zzirria, e la pazzia;

Ncronna, ncoccia; fa despiette,

Te fa sta dint’a lo ffuoco;

Tu va chiano, a ppoco, a ppoco,

Nche a la sella po t’assiette,

420

Tanno fruscia a speronà.

SCENA XIV

TITTA, e TENZELLA co CIULLA a lo barcone.

TITTA

Vi’ che scajenza è chesta? da do’ è sciuto,

Ca moglierema è biva?

E no l’accidarria tremilia vote?

A me, che non aveva

425

Aut’uocchie, che li suoje, sto mancamiento?

TENZELLA

No fa cchiù sto spremiento,

Fa comme dice mamma, jesce fora.

CIULLA

Facimmo comme vole;

Tieme’ che baja è chesta,

430

Adacquammo ssa testa.

SCENA XV

NTREANA abbascio, e li stisse.

NTREANA

Già stanno a la loggietta,

Voglio vedè de fa na machenella.

TITTA

Quanto trica zi Meo!... Uh te, chi è chella?

NTREANA

(Già l’hà vista) si Titta

435

Che nova nc’è?

TITTA

Me sonno,

O sto scetato? chella pare Ciulla

O Ntreana, chi è chella?

CIULLA

(Ah Titta mio.)

NTREANA

È na commare mia.

TITTA

Pare Moglierema.

NTREANA

Tu n’haje ditto, ch’è morta?

TITTA

Si non fosse

440

Che è macelente, ed hà le trezze negre,

Mo’ deciarria, ch’è essa.

NTREANA

Lo bolesse lo Cielo.

TITTA

(Non sia maje.)

CIULLA

(Si mme vuo’ morta, tu m’accidarraje.)

NTREANA

Chesta è chella fegliola, c’haggio ditto,

445

Che pe tte sarria bona,

Tanto cchiù, ch’assemmeglia a Ciulla toja.

TITTA

E pecché l’assemeglia, no mme piace.

NTREANA

Comm’a di’? n’era bella Ciulla toja?

TITTA

Lassammo sta li muorte; mettarria

450

Nova refosa a la schiattiglia mia.

SCENA XVI

MEO, e li stisse.

MEO

Ntreana viene cca.

NTREANA

Che nc’è zi Meo

MEO

Viene co mmico, t’haggio da parlare,

TITTA

E la resposta mia?

MEO

Tu già la saje.

Quanta mogliere vuoje trenta, o quaranta.

455

Me mmaraveglio assaje de fatte tuoje,

Ca si’ nzorato, e faje le guattarelle,

Pe ghire zannejanno le zitelle.

TITTA

Viene cca, viene cca

MEO

Vatte connio,

Ca si niente me vota lo senapo,

460

Piglio no rimmo, e te lo rompo ncapo.

Jammoncenne Ntreana.

NTREANA

Collecienza

TITTA

Va fa chello che buoje.

NTREANA

Haggie pacienza.

TITTA

E una, e una doje, scumpe Fortuna,

E che sonco de lota, che me piglie

465

A zeffonnà co tanta crepantiglie?

SCENA XVII

TENZELLA, e CIULLA da la porta.

TENZELLA

Se ne so’ ghiute tutte, jesce, jesce.

CIULLA

C’haggio da scire a fa? fuorze ca trovo

Maritemo accojetato; o nc’è quarcuno,

Che me derrupa a mare,

470

Pe fareme accojetare?

TENZELLA

E che cos’haje co desperarte tanto?

Ssi guaje, e sse scajenze

No durarranno no, comme te pienze.

CIULLA

Comme vonno scompì, Tenzella mia,

475

Si stanno a frisco a frisco pe sguigliare?

Haje ntiso Meo, ch’hà ditto a Titta mio?

TENZELLA

Chesto è buono pe tte, ca de sto muodo

Se scompono ste baje,

E co Tittillo tujo scialarraje.

CIULLA

480

Se scompono ste baje? Ah sore mia,

Titta è ncocciuso, ne vorrà bedere

La fine; e senza sanco non fenesce

Sta cosa, cride a mmene;

Ed io sempe starraggio into a ppene.

485

So’ n’affritto rescegnuolo

Da la vipera nciarmato,

Che restato senza vuolo,

Se lamenta,

Zompa, e stenta

490

Pe sarvarse; ma non pò.

Accossì è chest’arma mia,

Da la Sciorte percantata,

Vo’ foì la negrecata,

Ma non pote; o ddo’ s’abbia,

495

Trova chello, che no mmo’.

SCENA XVIII

TENZELLA, e SCONCIGLIO da viecchio co no capo purpo, na cannuccia, e stromiente da pescare.

TENZELLA

Maressa che piatate, che ne sento;

Sempe a fa no lamiento?

Ma chi è chisto che bene arravogliato?

Havarrà la terzana lo sguajato.

SCONCIGLIO

500

Pe fa meglio la spia a Cartafauza

Che benarrà pe festeggià Tenzella,

So’ benuto accossì; Mo’ cca me chianto,

E me metto a pescare. Uh cca sta essa

No me voglio scoprì, ca co sta spoglia

505

Pozzo vedere, si me fa qua mbroglia.

TENZELLA

Cca se mette a pescare sto sciaddeo!

Ddo’ sempe nc’è l’allanca;

Qua pperchia, o qua bavosa no le manca.

SCENA XIX

MEO, e li stisse.

MEO

Ora già l’haggio fatta, o bona, o trista

510

Lo ffuoco se l’ha bista,

Ntreana m’ha promisso

De dareme Tenzella;

Ed io pe d’essa donco a Fonzo Lella,

Ah a, cca sta la gioja, mo’ nc’è la festa.

515

Schiavo tujo ceceniello de sto core.

TENZELLA

Sinche lo bemmenuto affoca gatte.

MEO

Comme? accossì me chiamme cacciottella.

TENZELLA

Io non te faccio tuorto,

Pecché si’ tutto spine, e sicco, e stuorto.

SCONCIGLIO

520

(Chisto è lo primmo ntinno dell’alluorgio

Trotta canzirro, ca mo’ vene ll’uorgio.)

MEO

Tenzella, sempe t’ascio de sto muodo,

Co ss’uocchie carestuse? e cche cos’haje?

Votate ccane tremmolella mia,

525

Seccetella addorosa.

TENZELLA

Tu si’ na raja petrosa,

Né faje pe mmene, ammarcia pe sso tuosto.

MEO

Quanto cchiù me descaccie, io cchiù m’accosto.

TENZELLA

Ah bene mio, che frusciamento è chisto

530

Se pò sapè che buoje?

SCONCIGLIO

(Bravo Tenzella,

Te strodarria de vase ssa manella.)

MEO

E che boglio volè? ssa bella grazia,

Tregliozza cannaruta.

TENZELLA

Che grazia vaje cercanno?

535

C’haje da essere mpiso

Cestunia mia de mare?

MEO

E no cchiù m’affocare co sse nciurie

Core de pesce cane; tu non saje

Ca me sarraje mogliere, quanto primma.

TENZELLA

540

Addavero?

MEO

Addavero.

TENZELLA

E chi l’ha ditto?

MEO

La mammarella toja.

TENZELLA

L’aggio a gusto.

MEO

Eh, siente n’auta cosa; la recatta

La faccio fa pe ttene; ca lo palio

Ha da esse lo tujo, pecché tu puorte

545

Lo palio de le belle,

E farrimmo schiattà sse moccoselle.

TENZELLA

Bene mio quanta cose! ed io sciaurata,

Non ne sapeva niente; e giacch’è chesso,

Mejuccio mio, statte allegramente,

550

Ca volimmo fa ridere la gente.

MEO

Uh preziosa mia, musso affatato,

E me vuo’ bene?

TENZELLA

Sine.

MEO

E pecché mo’ m’haje ditto

Tanta brutte parole?

TENZELLA

Me credeva,

555

Ca m’abborlasse.

MEO

Arrasso sia, che dice,

Io pe tte dint’all’acqua piglio fuoco.

SCONCIGLIO

(Vi’ comme lo carrea a ppoco, a ppoco).

TENZELLA

Orsù vattenne mo’, c’haggio da fare.

MEO

Ma nnante, che te parte

560

Dimme quatto parole nzoccarate.

TENZELLA

Quanta ne vuoje.

SCONCIGLIO

(Che llocco nzanetate.)

TENZELLA

Cianciuso bello bello

Nennillo aggraziatiello,

565

Si’ pproprio accuonciolillo

Pe stroppejare Ammore

Ah mamma mia lo core,

Co ss’uocchie me frezzije,

No cchiù, votate llà.

MEO

570

Bene mio comm’è doce! torn’a dire.

SCONCIGLIO

(Tutta la storia proprio vo’ sentire.)

TENZELLA

O scuoglio de lo ssale,

E comme non haje scuorno,

De farme sto taluorno?

575

Va miettete l’acchiale,

Va mmirate a lo spiecchio,

No mi’ ca tu sbarije?

Vi’ che se vo’ nzorà.

SCONCIGLIO

Cu, cu, curubbà,

580

E lo viecchio, che face l’ammore

Quanta buffe, che bol’abbuscà.

MEO

Co cchi parle tun’auto?

SCONCIGLIO

Parlo sulo.

MEO

Vavattenne da lloco

SCONCIGLIO

Cca sto buono.

MEO

Vuo’ che nce venco lloco.

SCONCIGLIO

Cca sto buono.

MEO

585

Va pesca a n’auta banna.

SCONCIGLIO

Cca sto buono.

MEO

Ah lazzaro briccone, aspetta, aspetta.

SCONCIGLIO

Va viene ca t’aspetto, e cca sto buono.

MEO

E manco te nne vaje, o t’ammasono. (Cca Meo afferra Sconciglio, e chillo se lo strascina a mmaro, ddove se secutano ngioriannose, e Tenzella ch’esce decenno.)

TENZELLA

Oh bene mio che botte! Ah, a, che riso.

MEO

590

Si non te scanno, che pozz’esse acciso.

SCONCIGLIO

Oh, oh, Cartafauza fa l’ammore.

MEO

Eh sì ca non t’arrivo caparrone,

E te ne faccio sauza.

SCONCIGLIO

Curre cca, curre cca, oje Cartafauza.

TENZELLA

595

Chesta sì, ch’è commedia,

E se pote pagare no docato;

O Cartafauza mio nce si’ ncappato.

MEO

Lazzarone.

SCONCIGLIO

Patro’ mio.

MEO

Va connio.

SCONCIGLIO

Mo’ mme ne vavo.

MEO

600

Haje raggione.

SCONCIGLIO

Schiavo, schiavo.

MEO

Ma si saccio tu chi si’.

SCONCIGLIO

Io sto cca pe te servì.

MEO

Nce vedimmo appriesso po.

SCONCIGLIO

E mme chiammo schiatta mo’.

TENZELLA

605

Che breogna, che schefienza,

Va t’asciutta, hagge pacienza. (a Meo.)

(Oh che gusto, nce lo bo’.)

MEO

Si’ ng’attuppe frabuttone.

SCONCIGLIO

Cartafauza va te scauza

610

Ca te vene l’antecore

E l’ammore fa non puo’.

MEO

Male juorne io te do.

TENZELLA

N’auta vota, ssò, ssò, ssò.