La mogliere fedele

La mogliere fedele, Napoli, A Spese de li Mpressarie, 1731

a cura di Emanuela Esposito

paratesto ATTO PRIMO ATTO SECONDO ATTO TERZO Apparato

ATTO TIERZO

SCENA PRIMMA

NTREANA, e CIULLA da zincara mmocca a la Porta, e LELLA.

NTREANA

Lasseme primmo tozzolare; aspetta.

LELLA

Chi tozzola?

NTREANA

Sonch’io.

LELLA

Che nc’è Ntreana?

NTREANA

1200

Te voglio fa vedè na bella zincara,

E farte annevenare la ventura.

LELLA

Mo sì c’haggio le chiocche a sta pazzia.

NTREANA

E sientela, ched’è? ca te nce spasse;

Viene cca bella giovane.

LELLA

Chi è chesta?

1205

Me pare de conoscerla.

NTREANA

Annevina.

LELLA

Ha na nfanzia de Ciulla.

CIULLA

E chi vogl’essere?

Chesta sonco, sia Lella.

LELLA

Oh sore mia,

Sinche la bemmenuta; Oddio che gusto

C’haggio de te vedere!

CIULLA

È grazia toja.

LELLA

1210

Comme staje Core mio? uh janca tene,

Si’ fatta meza, e cchiù non pare ad essa!

CIULLA

E puro e assaje ca sonco viva, o sore,

Ca me mantenco schitto de dolore.

NTREANA

Collecienza fegliole io vavo dinto

1215

Pe no servizio, jatevenne ncoppa,

Ca mo’ mmo’ nce vedimmo.

LELLA

All’ora bona.

NTREANA

Haggio sbiata Ciulla pe no poco,

Me voglio sgoliare co Tenzella,

E farele passare la ncozzella.

SCENA II

CIULLA, e LELLA.

LELLA

1220

Tu c’haje fatto a mariteto

Che te vo’ morta, quann’isso t’amava

Cchiù assaje dell’uocchie suoje.

CIULLA

Che bolea fare?

Si non c’amarlo io puro cchiù de mene.

LELLA

E n’haje nullo sospetto?

CIULLA

Troppo ll’haggio,

1225

Isso er’amico de no Messenese,

Chiammato Tonno, e lo tenea da frate;

Cchiù de na vota chisto me tentaje,

Ma peché no mmolette

Mancà a l’annore mio, m’ammenacciaje.

LELLA

1230

Amice de sti tiempe? e fidatenne.

CIULLA

Io creo, c’havesse mmottonato Titta,

Pecché sempe me stea de mala cera.

LELLA

Non pò esse de manco.

CIULLA

Mo’ fa ll’anno

Partije pe Spagna, me portaje cod’isso

1235

Ncoppa no bastemiento; e rente Genoa

Na sera, mente io steva poco bona,

Me fece scenne nterra co no sghiffo,

Addo’ nce steva Tonno co lo frate.

LELLA

Negra te poverella ntra li lupe.

CIULLA

1240

Ah Lella jammo ncoppa,

Ca me scappa lo chianto.

LELLA

Comme vuoje.

Io sto p’ajuto a li travaglie tuoje.

CIULLA

Me conzola no penziero,

Ca nnocente è chisto core;

1245

E lo cielo pecch’è ghiusto,

Sta tempesta ha da carmà.

Si defenne, comm’è bero;

La jostizia, e l’annore,

Spero sì d’havè sso gusto

1250

De vedereme quietà.

SCENA III

MEO, e FONZO.

MEO

Jammoncenne a mmarcare,

Ch’è tardo, e già so’ lleste tutte quante.

FONZILLO

Comme vuoje, ma zi Meo famme na grazia,

Nnante che ghiammo, vorria vedè Lella

1255

Azzò coll’uocchie suoje speretuse

Me dà cchiù forza, e quanno nuje vocammo

Me faccia signo co lo moccaturo,

Che baga alliegro, e benca cchiù ssecuro.

MEO

Ma vi’, ca m’ha prommiso

1260

De dareme lo palio, si vince.

FONZILLO

No manco de parola.

MEO

Mo’ la chiammo.

SCENA IV

LELLA, li stisse, e po NTREANA, e TENZELLA.

LELLA

Bene mio, ch’è sta porta?... ah tu si’ Zio?

Che buo’?

MEO

Sienteme Lella;

Già t’haggio mmaretata co Fonzillo;

1265

Eccolo ccane, te vorria parlare.

LELLA

Comme vuo’ tu, che benca.

MEO

Si Fonzillo,

Accostate.

FONZILLO

Sia Lella, ve so’ schiavo.

LELLA

Bemmenut’Ossoria.

MEO

Mente parlate,

Pur io na parolella

1270

Voglio dire a Tenzella.

FONZILLO

Cca t’aspetta.

Sia Lella, io so’ restato assaje confuso.

LELLA

De che?

FONZILLO

De lo descurso de mo’ nnante.

NTREANA

Chi tozzola?

MEO

Sonch’io.

NTREANA

Che me commanne.

MEO

Mo’ jammo a la Recatta,

1275

Vorria pregà Tenzella, che se stia

A la fenesta quann’io passo, e beda

Lo maretiello sujo, che ba a pegliare

Lo palio pe d’essa.

NTREANA

Mo’ la chiammo.

FONZILLO

Ntanto che sto securo,

1280

Speranza bella, de l’affetto tujo?

LELLA

Si Fonzo m’havvarraje mogliere, e schiava.

TENZELLA

C’haggio da scire a fa?

NTREANA

Siente che ddice

Patro’ Meo.

MEO

Zita mia.

TENZELLA

Che zita, e bedola

Me vaje vennenno, Viecchio nzallanuto,

1285

Meglio sarria, che pienze a lo Tauto.

MEO

E be’, chesto che d’eje?

NTREANA

Hà pazziato.

MEO

Mmalora che pazzia? ca m’ha scannato.

NTREANA

Aspe’, ca mo’ l’afferro, e te la porto.

MEO

Aje Fonzo?

FONZILLO

Che nc’è zio?

MEO

1290

Leva mano,

FONZILLO

Che d’è stato?

NTREANA

Veccola ccane.

MEO

Testemmonia Vosta,

Sentite tutte quante, haggio prommisso

A Ntreana de dare Lella a Fonzo,

Co patto, ch’essa desse a me la figlia,

1295

Mo’ chesta no mme vole, è gia guastato

Tutto lo Parentato. Saglie Lella.

FONZILLO

Aje zi Meo, Vi’ che faie?

MEO

Chianto puorre.

FONZILLO

Vi’ che sconquasso mette sta fegliola.

LELLA

Ma Lella non te manca de parola.

NTREANA

1300

Ah cana tu me miette a le rrasora.

TENZELLA

O rasora, o cortielle, no lo voglio,

Chi se vo’ scotenà nfacce a sso scuoglio?

MEO

Ntrea’, covernamette.

NTREANA

Siente, siente.

MEO

No nc’è cchiù che sentire,

1305

Si non haggio Tenzella,

Io me revoco, e no ve donco Lella.

FONZILLO

Ntreana, che facimmo? aiemmè so’ perzo.

NTREANA

Va, va, ca ch’è piso mio d’aggiustà Tenza

E si no lo mazzuoccolo nce penza.

FONZILLO

1310

Che d’è chesto? che m’e dato?

Che cos’hà sta sciorte mia?

O me votta a ghì mpazzia;

O me tira a fa morì.

Mo’ me veo ncielo auzato,

1315

Mo’ me trovo sottaterra

Mo’ sto a mmare, mo’ sto nterra

Quando quanno ha da scompì.

SCENA V

TITTA spogliato da Schiavo.

TITTA

O sbenturato me, c’addo’ m’accosto,

Sento di’, ca moglierema sia viva;

1320

E cchiù d’ogn’uno m’have spaventato

La Zincara, che m’have annevenato,

Comme scioglio sto mbruoglio? addo’ me voto?

Tonno, che l’affocaje, stace a Messina,

Ca chisso me porria

1325

Levà sta fantasia. Vogl’ì a bedere,

Chi sa fosse venuto

Ca se stace aspettanno nn’ora, nn’ora?

Ma che faccio si n’è benuto ancora?

SCENA VI

TENZELLA, che fuje, NTREANA, che la secuta co na cocchiara, e TITTA.

TENZELLA

Ajutateme gente,

1330

Ca chesta me carosa.

NTREANA

Passa ccane,

Porcella, presentosa. (se secutano.)

TITTA

Tenzella che cos’è? che d’haje Ntreana?

TENZELLA

Tenitela si Titta, ca m’accide.

NTREANA

Non me tenè, si Titta, ca me scanno.

1335

Te voglio magn’a muorze malenata;

Trase dint’a la casa.

TENZELLA

Vavattenne,

Vi’ ca me jetto a mmare.

TITTA

Che t’ha fatto?

NTREANA

Niente niente.

TITTA

Ma puro?

NTREANA

Passa dinto

Eh lasseme si Titta.

TITTA

Scumpe mone.

1340

La vuo’ fa desperà la poverella,

Che se derrup’a mmare? che t’hà fatto?

TENZELLA

Me vole mmaretare a Cartafauza.

NTREANA

Ah lencuta, lencuta, zitto, zitto.

TITTA

Comme comme? vuo’ dà sta palommella

1345

A chill’ascio pecuso? che si’ pazza?

TENZELLA

Vuje lo bedite mo’, che cosa è chesta?

Chi nce l’ha puosto sto demmonio adduosso;

N’onza de carne a no cantaro d’uosso.

TITTA

Haje raggione, haje raggione, saglietenne

1350

Ncoppa a la casa mia statte co sorema;

Ca po venco, ed agghiusto ste zampogne.

NTREANA

Viene cca, viene cca.

TITTA

Lassala ire,

Ca si’ troppo ncocciosa.

NTREANA

Vavattenne

Ca nce vedimmo appriesso; maratene,

1355

Si non te piglie Patro’ Meo, t’arrappo.

TENZELLA

Comme la vuo’ sentire? no lo voglio.

NTREANA

Ah berruta, verruta, te nce coglio.

TENZELLA

A me biecchie? vuo’ sta bella,

No m’ancappe a sta tagliola;

1360

So’ ffegliola peccioncella,

E becino a no sciamarro

Io me voglio nghiettechì?

Di’ che benca, gnorezzì.

NTREANA

Vi’, si la vo’ scompire.

TITTA

1365

Chesta me fa morì, lassela dire.

TENZELLA

Ntra la tossa, e lo catarro,

Li dolure, e la cionchia

Starria fresca comm’a rrosa;

E de cchiù la gelosia,

1370

Co li strille pe rrefosa,

Me farria priesto morì.

SCENA VII

Se sente apprimmo sparà na botta, po comparesceno 4. falluche, che vocano addoje addoje; una nc’è FONZO, a n’autra Patro’ MMEO, ed a n’autra SCONCIGLIO, la quarta, che ba nnanze a tutte, e la falluca de Titta, che sta nterra co NTREANA.

NTREANA

Che botta è chesta?

TITTA

Ah a, ca mo’ se partono

Pe la recatta le fallucche, jammo

A bedè chi va nnante.

NTREANA

Eccole ccane,

1375

Ca veneno.

TITTA

E la mia va nnante a tutte.

NTREANA

Addo’ vanno?

TITTA

A passare lo cavallo,

A botà lo fortino, e po so’ ccane.

Oje Ciommo Ciommo, appuggia a la lenterna

St’attiento cane, magnete sto mare.

FONZILLO

1380

Date lejune mieje, mmestimmo a chesta,

Che nce va nnante? ah cano, tira fora

Appuggia a lo fortino, via frusciate.

MEO

Belle giuvene mieje date stregnite,

Vencimmolo sto palio, ca tenco

1385

Stipato tutto chello, che bolite.

SCONCIGLIO

Ah canaglia, canaglia date suoccie.

Mmalora, che facite.

TITTA

Ah ah, che risa,

Lo viecchio vace ad orza.

NTREANA

Vide chisto,

Ca vota lo centimmolo cca nnante.

MEO

1390

Oie Sconciglio, Sconciglio, viene arreto.

SCONCIGLIO

Sorca guallecchia, ca venimmo affieto

O manna craje, ah figlie de na scrofa.

TITTA

L’ha pigliato lo purpo; Addio Ntreana.

NTREANA

Si Titta, addo’ t’abbie?

TITTA

Mo’, mmo’ torno.

NTREANA

1395

Si accorre niente, vi’ ca sto cca ttuorno.

SCENA VIII

SCONCIGLIO ch’esce da mare, e Ntreana.

SCONCIGLIO

Che ve venca lo cancaro birbante

Lazzaro mbreacune,

Jate a mmalora a carrejà craune.

NTREANA

Hagge pacienza; è Stata, e baje cchiù frisco.

SCONCIGLIO

1400

E battenne tu nnante,

No me zocà lo verme.

NTREANA

Che cos’haje?

Ca t’arrappe, e t’accide, che nce faje?

SCONCIGLIO

O descenzo mmarditto, che le scanna,

Vonn’ire a la recatta, e se mbreacano;

1405

Si n’havessero visto maje vocare,

Sbotà la varca, e farme ire a mmare?

NTREANA

Tu mo’ che nce farrisse, so’ desgrazie.

SCONCIGLIO

Tiemente, che caozone arrojenato!

E m’è stato mprestato; mo’ mmo’ siente

1410

Ca lo patrone lo vo’ nuovo; ed io

Lo guadagno nce scotolo,

C’haggio fatto a crastà sei onze a rruotolo.

NTREANA

Haggie salute, a n’auta occasione,

Che bince n’auto palio, te renfarche;

1415

Voca ngalera, e no a falluche, o varche.

SCONCIGLIO

Ntrea’ tu mme repasse, ma non saje

Ca sogra me farraje nfra quatto juorne.

NTREANA

Addavero?

SCONCIGLIO

Ncoscienza.

NTREANA

Ah, a, che spasso.

E si’ ommo pe figliema, nzertone?

SCONCIGLIO

1420

Ched’è, non fosse buono

A tenerla contenta notte, e juorno?

NTREANA

È lo vero, ma ll’aggio mmaretata.

SCONCIGLIO

Saccio, ca ll’haje prommessa a Cartafauza,

Ma no nne prova affè da chesta fauza,

1425

Lasseme ì a mmotà, ca po parlammo.

Ma pe mo’ te la dico.

No viecchio, e na fegliola è brutto ntrico.

Tu sgarre a li mise;

Marito, e mogliere

1430

Vonn’essere pare;

Chi vo’ mmaretare

C’agghiusta li pise,

Si no vo’ vedere

Lo cane, e la gatta

1435

Pe ncoppa, e pe sotta

Stracciarse, e strillà.

Lo viecchio è geluso,

La giovane è pazza,

Vo’ chillo mpertuso

1440

La scura nzerrare;

Vo’ chesta scialare

Pe ccasa, e pe chiazza

E sa, che recatta

Nce nasce de botta;

1445

Fa chillo bò bò, e chesta mià mià.

SCENA IX

NTREANA sola.

NTREANA

Chisto dice quarcosa, ma che serve

Lo nteresse a nuje femmene nce scanna

Ca simmo cannarute, e li denare

Sa quanto assaje cchiù ppeo nce fanno fare.

1450

Si la femmena jesse spogliata

Non farria pe denare l’ammore;

Se farria da lo genio terà.

Ma perchene ha da ire aparata,

Si be’ crepa, e ne schiatta lo core,

1455

Co chi ha zuco se ll’have da fa.

SCENA X

LELLA, e CIULLA.

LELLA

Sia Ciulla mia, vattenne allegramente,

Ca quanta te sapimmo,

Te farrimmo nfaore, e po lo Cielo

Non t’hà d’abbannonà, ca si’ nnozente,

1460

E pate pe l’anore attortamente.

CIULLA

Accossì spero, ed isso, che me sape,

Ha da scoprire la nnocenza mia;

Chesto sulo vorria, che metta ncore

A Titta, ca so’ femmena d’anore.

LELLA

1465

Non dobbetare no, ca già ne veo

Lo capo de se sciogliere sto mbruoglio;

Chi te sarvaje da mano a l’assassine,

Farrà vedere a Titta tujo crodele,

Ca mogliere le si’ tanto fedele.

CIULLA

1470

Vocca de sciure mia te rengrazio

De lo confuorto, che me daje, e cride

Ca me ne traso tutta conzolata

Che te veda contenta, e mmaretata.

LELLA

Che pietà, che ne sento, poverella,

1475

Comme n’avette core chillo cano

De darla a l’assassine,

C’a mmare l’affocassero? e si chille

No n’haveano pietate, no mmoreva

Comme n’ajeniello, senza fare niente?

1480

Nzomma non s’ama maje senza trommiente,

Traso puro a li guaje

Ca sto no, e sto nzi, che bo’ fa Ziemo

Co Fonzo; ma la sgarra; aggio prommiso

Ad isso de pegliare!

1485

Accossine hà da essere

E Ziemo me pò purzì adacciare.

È no scuoglio chisto core

Che resiste ad ogne guerra

La paura, e lo dolore

1490

No lo ponno fa sbotà.

Pò lo Munno nnabessare

E cadè lo Cielo nterra,

Quanto voglio aggio da fare

E chi maje mme pò spostà?

SCENA XI

SCONCIGLIO, e MEO.

SCONCIGLIO

1495

Mo’ vene a chesta via Cartafauza,

Ed è tornat’arreto la falluca,

Chi sa ch’è stato? Voglio cca sentire.

MEO

Po dice ca si’ acciso

Pe fa lo guappo; guitte, caparrune,

1500

Si stissevo cca nterra

Adaccià ve vorria co na sferra.

SCONCIGLIO

Va sacce, co chi ll’hà?

MEO

Vi’, che breogna;

S’hà da dire pe Nnapole sta storia,

Che quatto mbreacune

1505

M’hanno mmestuto a mmare,

Rutto li rimme, e fattome tornare?

SCONCIGLIO

(Ah a, ca non so’ sulo, mo’ le donco

No morzillo de quatra) oh Patro’ Meo

Che d’è? tu si’ benuto,

1510

Havisse tu lo palio venciuto?

MEO

Haggio vinto la peste, che ve roseca

A ttene, e a chille birbe malenate,

Che ghievano cottico.

SCONCIGLIO

C’hanno fatto?

MEO

M’hanno mmestute nfacce a lo cavallo,

1515

Nce simmo sfracassate rimme, e barche;

E so’ tornat’arreto.

SCONCIGLIO

E si lo ddico,

Ca stanno a feccia nzino a li capille,

M’hanno fatto a me puro semmozzare,

A piglià cannolicchie;

1520

Tu c’haje pigliato? ancine?

MEO

E ba a malanno

O vuoje, che me scapriccio mo’ cottico?

SCONCIGLIO

E pecché? tu lo ssaie, ca te so’ ammico.

MEO

E manco te ne vaje?

SCONCIGLIO

Dimm’a lo mmanco

Chi va primmo de tutte?

MEO

La falluca de Titta,

1525

Ma Fonzo le sta appriesso proda, e poppa;

Vuo’ sapere nient’auto, si’ squagliato?

SCONCIGLIO

Mo’ mme ne vao?

MEO

Aimmè so’ sbreognato,

Si Fonzo non guadagna, me despero,

Pecché me vene sfallo lo penziero.

SCONCIGLIO

1530

Io lo voglio fa dare a la fortuna.

Ne patro’ Mmeo comme faje co Tenza?

L’haje prommiso lo palio, nce lo daje?

MEO

E battenne a mmalora, fuss’acciso,

Da me che buoje.

SCONCIGLIO

Si’ ghiuto già a l’allecchia,

1535

E fora guallecchia, e fora guallecchia.

MEO

Chisto vo’ che l’accia, ma non guastammo

Li fatte nuoste, c’agne tiempo vene,

Nzomma so’ sfortonato ad ogne cosa,

Né serve, ca me strudo, e me spellecchio;

1540

Chesto soccede all’ommo, quann’è biecchio.

Ammore me votta,

Fortuna me caccia,

Speranza m’abbotta,

Lo sdigno me straccia;

1545

So’ tutto crepato

Né saccio che fa.

La mamma promette,

La figlia no mmole;

Porzì li fraschette,

1550

Pecché so’ mmecchiato,

Co fatte, e parole

Me vonno abborlà.

SCENA XII

TITTA co na lettera mmano, e po NTREANA.

TITTA

O munno nfamo, amice tradeture,

O nigro chi se fida e chi ve crede;

1555

Ahi lettera scontente, e quanta guaje,

Patire me farraje. (Tozzola a Ntreiana.)

NTREANA

Chi è lloco?

TITTA

Ajuto,

Ntreana mia, ca so’ desperato;

Haje veduto la Zincara?

NTREANA

Gnornone,

Pecché? che t’è socciesso.

TITTA

Ah maromene

1560

Ca so’ ghiuto a lo Muolo pe bedere

S’era venuto Patro’ Tonno.

NTREANA

Quale?

TITTA

Lo Messenese chill’amico mio;

No lo saje?

NTREANA

Sì lo saccio, e be’, ch’è stato?

TITTA

M’ha mannata sta lettera lo cane.

1565

O sciorte, e fosse cca, pe lo scannare.

NTREANA

Che t’hà fatto? pecché? che nc’è a sta lettera.

TITTA

Ah Ciulla mia traduta, o amico fauzo,

O Titta sbentorato, o Cielo, ahi sciorte;

Dateme Ciulla, o dateme la morte.

NTREANA

1570

Tu che dice? sbarije, che fusse pazzo?

TITTA

Si non moro mpazzesco siente, siente.

(LETTERA)

Titta mio già che sto nfunno de lietto,

Io te cerco perduono de n’arrore,

C’haggio fatto p’amore.

1575

Sacce ca n’è lo vero,

Ca Ciulla toja te faceva tuorto;

Comm’io te disse; fu despietto mio.

Quanno po me la diste p’annegarla,

Pe pietà la sarvaje; si tu la truove

1580

Abbracciatella, tienetella cara,

Ch’è Mogliere Fedele, ed è norata.

De chisto trademiento n’hà dolore

Tonno spenna, che scrive, se tu more.

NTREANA

Ah jance me, che sento! comme Ciulla

1585

No morette de freve, comm’haje ditto?

TITTA

None, Ntreana, none; io Turco cano

Senza nformarme buono, ll’haggio accisa,

Si è morta; ed aggio perzo pe n’arrore

Lo schiecco d’onestate, e de l’amore.

1590

Me resta na speranza, ca la zincara,

M’have ditto, ch’è biva; oddio trovammola,

E sentimmo, che dice.

NTREANA

Va la cerca,

Ca starrà da cc’attuorno, e io cca l’aspettto.

TITTA

Mo’ vago, ah sciorte mia damme recietto?

1595

Ciulla cara, Ciulla bella,

Poverella, mara te;

Chi lo ssape addove staje,

Si si’ biva, sì o no?

Fata mia, stannardo d’oro,

1600

Si non moro gran cos’è

Si non t’ascio p’oje, o craje,

Io m’annego, e nce lo bo’.

SCENA XIII

NTREANA, CIULLA da zincara, e po LELLA; e Patro’ MMEO.

NTREANA

Bene mio, c’haggio ntiso Ciulla, Ciulla

Mo’ si’ asciuta de guaje, allegramente.

CIULLA

1605

Ntreana mia che buoje?

NTREANA

Lo veveraggio

Allegrezza, allegrezza.

CIULLA

De che cosa?

MEO

No nne voglio fa niente.

LELLA

Ma è breogna.

MEO

Si è breogna, è la mia; Tu cca che nc’intre?

LELLA

Ma tu non haje promisso darme a Fonzo?

MEO

1610

E si Fonzo moresse non c’è auto?

NTREANA

Uh Lella, è patro’ Mmeo; attiempo, attiempo.

LELLA

Che nc’è Ntreana?

NTREANA

Mo’ è lo punto justo,

D’ajutà sta nnozente.

MEO

Che l’accorre?

Sta zincara chi è?

LELLA

Zi Meo è Ciulla,

1615

La mogliere de Titta.

MEO

Tu si’ Ciulla?

CIULLA

Pe te servire.

MEO

O quanto ll’haggio a gusto,

De vederete viva.

NTREANA

Ciulla mia,

Non perdimmo lo tiempo a zeremonia

Jate dinto, e le conta

1620

Chello, che t’aggio ditto de mariteto:

Conzurdate le ccose, e quanno tosso,

Jesce pe sta portella da dereto

Uh cca mo’ torna, priesto jatevenne,

E meglio la descorra chi cchiù ntenne.

1625

O Cielo mprosecallo sto designo,

Ca de l’ajuto tujo me pare digno.

SCENA XIV

TITTA, NTREANA, e po CIULLA.

TITTA

Ntreana mia, non trovo cchiù la zincara

Ll’haje vista tu?

NTREANA

No ll’haggio vista, none;

Uh che d’have sta pica, che me schiatta?

TITTA

1630

E che facimmo?

NTREANA

Aspettala commico.

Ca vene pe ssecuro addo’ vuo’ ire

Trovanno ova de Lupo.

TITTA

Aimmè ca stonco.

Comme stesse a la corda, e a la stanchetta.

CIULLA

Aje chi vo’ la Paletta.

NTREANA

1635

Zi’ ca sento strellà, vide si è essa.

TITTA

O sciorte! è chella stessa chiamma, chiamma.

NTREANA

Aje zincarella viene cca.

CIULLA

Che buoje.

NTREANA

Dimme na cosa tu canusce chisto?

CIULLA

No lo saccio; chi si’?

TITTA

So’ chillo schiavo

1640

A chi haje ditto, ch’è biva la mogliere.

CIULLA

A sì, mo’ m’allecordo, tu si’ chillo,

E mbe’ che buoje?

TITTA

Dimme lo vero è biva Ciulla mia.

CIULLA

È biva, ma fa cunto, che sia morta.

TITTA

1645

Comme morta? perché?

CIULLA

Perché ha saputo,

Ca te vuoje nzorare.

E pe farete nzorà se vo’ annegare.

TITTA

A Cielo non sia maje, zincara mia.

CIULLA

Suse, suse, che faje? vi’ ch’è breogna.

TITTA

1650

No mme soso da cca, si no mme dice,

Adov’è Ciulla mia.

CIULLA

Che la vuo’ accidere.

TITTA

Me la voglio mpizzà dint’a lo core.

CIULLA

E chella non è porca, e non è guitta?

TITTA

Non è lo vero no, ca fuje traduto.

CIULLA

1655

Tu comme ll’haje saputo?

TITTA

N’amico fauzo che me l’accosaje

M’ha scritto ch’è nnozente.

CIULLA

E a n’ommo fauzo

Cride chesto?

TITTA

Lo credo perché Ciulla

Morea pe mmene.

CIULLA

Chesto tu sapive,

1660

E po crediste ca t’havea gabbato?

TITTA

Aimmè la gelosia m’havea cecato.

NTREANA

(Cielo vatte sto fierro mo’, ch’è caudo.)

CIULLA

(Mo’ si non pozzo cchiù) Titta se vede

Ca si’ cecato si pocca m’haje nnante

1665

E non mmide, e non saje

Ca sonco Ciulla, che cercanno vaje.

TITTA

Ciulla mia, tu si’ essa?

CIULLA

Io sonch’essa, Titta mio

Si tu accidere mme vuoje

1670

Mmano a tte mme trovo già.

TITTA

Ciulla cara scumpe oddio

De fa chiagne st’uocchie tuoje,

Si mme vuoje vedè campà.

SCENA URDEMA

SCONCIGLIO zompanno, TENZELLA, la falluca de TITTA, FONZO, e tutte lo riesto.

SCONCIGLIO

Vettorea, vettorea.

LELLA

Che nc’è Nardo?

SCONCIGLIO

1675

Mo’ vene la recatta.

MEO

Chi va nnante?

SCONCIGLIO

La falluca de Titta, e Fonzo appriesso.

TENZELLA

Stamm’a bedè chi vence.

MEO

E io resto ciesso.

SCONCIGLIO

Vecco cca la falluca, Titta aje vinto.

CIULLA

Che d’è chesto che sento!

TITTA

Core mio

1680

Strillano c’aggio vinto io lo palio.

FONZILLO

Jatevenne a malanno

Ca già l’avimmo fatta la frettata.

TENZELLA

Zi Meo damme lo palio, ch’aje vinto.

MEO

Nce vo’ st’auta refosa.

NTREANA

1685

E non te vuo’ sta zitto presentosa.

SCONCIGLIO

Titta ha vinto, nc’havite che nce dire?

FONZILLO

Hà vinto lo concedo.

SCONCIGLIO

Le pozzo dà llo palio?

MEO

Sì dancillo.

SCONCIGLIO

Titta lo Veveraggio; pigliatillo.

TITTA

1690

Dallo cca Ciulla cara a tte lo donco

Perché vince de fede, e de costanza

Ogne mogliere.

CIULLA

Ed io lo donco a Lella

Perché de le ffegliole, è la cchiù bella.

FONZILLO

Che sento chesta è Ciulla?

NTREANA

Chest’è e d’essa.

FONZILLO

1695

O che prejezza c’haggio, e comm’è biva?

NTREANA

Mo’ jammo ncoppa, llà decimmo tutto,

Chist’aute matremonie nc’agghiustammo

E mo’ co Ciulla nosta ng’allegrammo.

TUTTE

Già la sciorte ha votate le bele.

TITTA - CIULLA

1700

Ciulla/Titta mia/mio mo’ jammo a gaudè

Tu si’ stata mogliere Fedele

E lo Cielo haje havuto pe tte.