La mogliere fedele

La mogliere fedele, Napoli, A Spese de li Mpressarie, 1731

a cura di Emanuela Esposito

paratesto ATTO PRIMO ATTO SECONDO ATTO TERZO Apparato

ATTO II

SCENA PRIMMA

TITTA, e NTREANA pe strada.

TITTA

A tte che te ne pare

615

De chello, che m’hà ditto Cartafauza?

NTREANA

Robba sarria de ne fa na sauza;

Ma tu che nne vuo’ fare?

Lo ppeo sarrà lo ssujo; de pare tuoje

Nce ne so’ poco a Napole?

TITTA

620

Ed io mo’ co sse trapole

M’haggio da fa borlare? E no mme scanno.

NTREANA

Tu non faje niente, ed haje quarche malanno.

TITTA

A sto malanno nce starrà cchiù d’uno.

E nfra ll’aute Fonzillo,

625

Che me fa de l’amico.

NTREANA

E che t’ha fatto?

TITTA

Isso havarrà cacciata sta boscia,

Ca moglierema è biva

Pe ncantareme Lella, e si è stato isso,

Che me pozz’affocà mmiez’a sto mare

630

Si llà proprio no ll’haggio da scannare.

NTREANA

Chist’è ghiodizio tujo tremmolario,

Ca chillo n’è nnozente, ed io lo ssaccio.

TITTA

C’haje stodiato quarche calannario?

NTREANA

Vi’ ca tu pe sospetto faje qua danno;

635

O muore, o vaje presone, e perderraje

Lella, e l’amico; fa comme dich’io,

Si tu te vuo’ nzorare,

Te donco la Commare.

TITTA

E pure lloco

Ntrea’ no cchiù de chesto,

640

Aiutamm’addo’ voglio.

NTREANA

E che buò fare?

TITTA

Me voglio vestì schiavo pe saglire,

Co la scusa de vennere, addo Lella.

NTREANA

E pecché?

TITTA

Pe basarla; e nch’è basata

Hà da essere mia.

NTREANA

Bona pensata.

645

Non ce perdere tiempo (vuo’ sta frisco.)

TITTA

Saglietenne addo Lella; nche me siente,

Famme saglire ncoppa, o falla scennere.

NTREANA

No mmuo’ auto, che chesto,

La cosa è fatta, statte allegramente.

TITTA

650

C’alliegro voglio sta nfra sti tormiente.

È n’ancunia sto core,

Dove amore, e Gelosia

Fanno comme a dduje ferrare,

A chi dare cchiù nce pò.

655

Mente chillo dà na botta,

Asseconna chest’Arpia,

E lo scuro, che sta sotta,

Pe la stizza fuoco sghizza,

E se torce addo’ no mmo’.

SCENA II

NTREANA, e CIULLA.

NTREANA

660

M’è benuta jocata già la palla.

Aje commare, comma’.

CIULLA

Che nc’è Ntreana?

NTREANA

Spaparanza sto core; sient’apprimmo

La nova, che te porto.

CIULLA

È nova bona?

NTREANA

Haggio tanto mpecato,

665

Che già lo matrimonio s’è guastato.

CIULLA

Lo Cielo ce lo rrenna; comm’haje fatto?

NTREANA

Vasta po te ddico; pe mo’ sacce,

Ca Patro’ Mmeo mmarita Lella a Fonzo,

Nche sa ca tu si’ biva.

CIULLA

670

Oh ca lo chianto mio llà ncoppa arriva.

NTREANA

Nc’è n’auta cosa mo’, che nce pò dare

N’auto ajuto cchiù gruosso.

CIULLA

Ed è?

NTREANA

Mariteto se vo’ fegnere Schiavo

Pe ghì a basare Lella.

CIULLA

Ah negramene

675

E chisso chiamm’ajuto? Si lo fface,

Se l’hà da nguadiare, o pure è acciso;

E io pe lo sarvare,

Abbesogna, che mora.

NTREANA

Che si’ pazza?

Jettate ncuoll’a mmene,

680

Ca te faccio vedè le ccontramene.

CIULLA

Eccome ccane, vi’ che buo’, che faccia.

NTREANA

Va miettete a la mpressa lo vestito,

C’ajere t’abboscaje.

CIULLA

Pe cche fine?

NTREANA

Mo’ torno, e te lo ddico; mo’ che trase

685

Manname cca Tenzella.

CIULLA

Ma, che serve

Sto bestirme de Zingara?

NTREANA

Vattenne,

No me fa perde tiempo, po parlammo.

CIULLA

Vi’ ca nuje la sgarrammo.

NTREANA

Oh mo’ si’ troppo.

Va te vieste, te dico.

CIULLA

690

Oddio, ca tu me miette a quarche ntrico.

NTREANA

Vi’ comm’è pettemosa?

CIULLA

Jammoncenne;

Già sonco desperata,

L’arresecarse sia la meglio strata.

Chi cade dint’all’acqua

695

S’ajuta comme pò,

E nzi’ che non se stracqua,

Non se sconfida no

Poterene scampà.

Cchiù bote s’è beduto

700

No povero malato,

Che mente è desperato

Lo sana, e le dà ajuto

N’arrore, ch’isso fa.

SCENA III

NTREANA, e po TENZELLA.

NTREANA

La paura, che tenco,

705

Che non se scopra lo designo mio,

No me l’hà fatto di’ nnanze lo tiempo,

Azzò, che non perdesse la fatica;

Ma chesta quanto trica?

TENZELLA

Mamma, che buoje.

NTREANA

Siente cca Tenzella;

710

No mmoglio, ch’jesce a chiazza.

TENZELLA

Pe che fine?

NTREANA

Ca già si’ fatta grossa.

TENZELLA

Uh che freddura?

Ajere nce so’ sciuta, e mo’ non pozzo?

Che so’ fuorze cresciuta quarche Canna?

No, no, quarcosa nc’è, vallo decenno.

NTREANA

715

Non haggio, che te di’, no mmoglio, ch’jesce.

TENZELLA

Ma sta cosa pecché cossì de botta?

NTREANA

Schiavo sapere, che portare sotta.

TENZELLA

E comm’haggio da dire a chi me spia,

Pecché stonco nzerrata?

NTREANA

720

Dille ca staje malata.

TENZELLA

Arrasso sia,

Pozza schiattà lo miedeco; che ddice?

Vide, che pezza fraceta!

NTREANA

E tu sona.

TENZELLA

Comme lo pozzo dire si sto bona?

NTREANA

Tu propio la vuo’ vencere; decimmolo:

725

V’havimmo mmaretata.

TENZELLA

Mmaretata, e co chi?

NTREANA

Co Patro’ Mmeo.

TENZELLA

Aquavita, e cafeo.

NTREANA

E che bo’ di’ chesto?

TENZELLA

Da quant’ha t’è benuto sto penziero?

NTREANA

M’è benuto mo’ nnante.

TENZELLA

E mo’ te passa;

730

Chi t’hà data sta scola?

No sacco d’ossa rotte a na fegliola?

NTREANA

Che sacco d’ossa rotte, staje mpazzuta?

N’ommo fatto, n’ommo de jodizio.

TENZELLA

Se faccia mastro giorgio, si ha jodizio.

NTREANA

735

Sta buono de salute, e stace commeto.

TENZELLA

Gnorsì, gnorsì; ma io me nce trovo scommeta.

NTREANA

Che buo’ lo sbarvatiello? che ndì iorne

Se joca quanto tene pe sse chiazze,

E pe pane te sazia de mazze?

740

Chisto t’haje da pegliare.

TENZELLA

Io no lo voglio.

NTREANA

Te lo ffaccio volere, anca te pesa.

TENZELLA

Di’ che se corca, ca la manta è stesa.

Si’ becchia, e non saje chesto,

Ca lo marito a forza

745

E na cauzetta stretta,

Che non se pò cauzà;

E si la vuo’ tirà,

Tanno se straccia.

Mparate st’auto riesto,

750

Lo core non se sforza,

Lo genio non s’appretta

E chi lo vo’ apprettà

Scagno de farse amà,

Cchiù se descaccia.

SCENA IV

NTREANA sola.

NTREANA

755

Veramente ha raggione la scuressa,

Ch’è troppo figliolella, e Patrommeo

È no poco stantivo: che buo’ fare,

Havere non se pò grieco, e cappucce,

Chillo sta ricco assaje,

760

Nc’è da magnà? so’ niente ll’aute guaje

Le sarrà forte apprimmo,

Ma po nce face ll’uso

La conocchia s’acconcia ad ogne fuso.

Lo vetiello tenneriello

765

Schifa assaje lo jugo tuosto,

Ma nche sotta nce l’haje puosto

Se l’accolla chiano, chiano

E s’ausa a lo terà.

Accussì fa na zetella

770

Quanno s’hà da mmaretare,

Nullo viecchio vo’ pegliare

Ma nc’ha stesa la manella,

Lo marito, è saporito,

E lo sape accarezzà.

SCENA V

MEO, e FONZO pe strada.

MEO

775

La facenna è concrusa; nche Ntreana

Me fa vedere Ciulla, te do Lella.

FONZILLO

Zi Meo si me vuo’ vivo,

Non te cagnare de penziero.

MEO

Bravo?

E che so’ peccerillo, o Sagliemmanco

780

Lo vide sto mostaccio?

Chisto te dà parola,

Si no l’ha Titta, è toja la fegliola.

FONZILLO

Titta no la pò havè; ma chi lo ssape,

Che mbroglia maje pò fare,

785

Pe non farmela dare?

MEO

E che Patrone de llo sanco mio?

Si non s’attenne a fa li fatte suoje,

Nc’è la jostizia, e tenco bone mane.

FONZILLO

Lo ssaccio, e manco io so’ quarche pacchiano.

MEO

790

Ora parlammo d’auto; tu staje lesto,

Pe la recatta?

FONZILLO

E comme aggio sparmata

Na felluca sottile co seje uommene?

Che sonco seje gigante.

MEO

Fonzo siente,

Io spero a la fortuna, e cchiù ad Amore,

795

Ca io venco sso Palio; ma si ncaso

Lo vince tune, m’haje da fa na grazia.

FONZILLO

Patrone de la vita, che borrisse?

MEO

Vorria, che me lo disse,

Ca lo vorria donare a Tenza mia.

FONZILLO

800

Comme vole ossoria; si be’ voleva

Appresentarlo a Lella,

Ma le do n’auta cosa, che’è cchiù bella.

MEO

Sì, famme sto piacere,

Vorria fa na fenezza a stà fegliola,

805

Ca me la nguadio; e boglio,

Che faccia a certe sninfie cannavola.

FONZILLO

Tu staje bravo afficcato a ssa quagliozza.

MEO

Sine, si Fonzo mio, ch’è troppo bella,

E me face piglià la tarantella.

810

Si stonco scetato,

Tenzella me frusta,

Si stonco corcato,

Tenzella me susta,

Si dormo, me sceta

815

Ca nzuonno me vene,

M’afferra, me tene,

E comm’a copeta

Me face squaglià.

Si vevo, si magno,

820

Me sento nnozare

Si pesco, me fragno,

Ca dinto a sto mare

Non c’è sta serena

E quanno sto sulo,

825

Me piglia la pena,

O comme a figliulo

Me metto a zumpà.

SCENA VI

FONZO, e LELLA dallo barcone.

FONZILLO

E ba ca l’ha pigliato lo Calappio

Sto viecchio, e se n’abbia, co chisse butte;

830

Amore nzomma fa scherchiare a tutte.

Ma vedo Lella, oddio, che luna è chesta.

LELLA

Ora vi’ che maretto,

Me fanno ncapo sti penziere? Ah Titta

Non t’havisse maje visto, e conosciuto,

835

Ca lo repuoso n’haverria perduto.

FONZILLO

Sia Lella, ve so’ schiavo.

LELLA

Addio si Fonzo.

FONZILLO

Ve veo malanconeca, c’havite?

LELLA

Non sempe se pò sta de na manera;

Me sento poco bona co la capo.

FONZILLO

840

E cchiù priesto lo core, che ve dole.

LELLA

Lo core? E pecché fine.

FONZILLO

Di’ se sole,

Ca pe sciccà no chiovo rebattuto,

Nce vo’ fatica assaje, ca nc’è arrozzuto.

LELLA

Vuje parlate pe Titta, ma sgarrate,

845

Da quant’ha, ch’è zompato da sto pietto,

Sa che bravo martiello è lo despietto.

FONZILLO

Si è lo vero, sarrimmo tutte e duje

Felice, e consolate.

LELLA

A chesto che nc’entrate.

FONZILLO

850

C’entro assaie, zi Meo me v’hà promessa,

E mo’ simmo accossì na cosa stessa.

LELLA

Me v’hà promessa già.

FONZILLO

Che ve dispiace?

LELLA

Chi chiamma? mo’ mmo’ venco.

Si Fonzo collecienzia, so’ chiammata.

FONZILLO

855

Attennite. Che d’è st’auta nzalata!

LELLA

Non te storbare,

Ca non è ninte;

Fonzillo siente

Mo’ sto nformata

860

Torna a passare

Fuorze chi sa.

Si no, tu aspetta

Ca vago, e bengo,

Si mme ntrattengo

865

Nche so’ sbrecata

Sto a la veletta

Pe t’aspettà.

SCENA VII

FONZILLO

Fortuna, e puro chesto

Mente stongo a lo meglio de parlare

870

Me viene a sconcecare

Ma chi lo ssa: si non l’ha fatto apposta

Pe spezzà lo descurzo, ch’è mpontata

Sentenno, ca lo zio me l’hà promessa.

Fosse sbotata? c’auta storia è chessa?

875

Si mbe’ scompe la tempesta,

Puro mormora lo mare,

Accossì me pare chessa,

Che co mmico voglia fa.

Pe nzi’ a mo’ m’ha tormentato

880

Co lo sdigno, e lo dispietto,

E mo vo’ co lo sospetto

Travagliato

Farme stà.

SCENA VIII

SCONCIGLIO sonanno lo tammuro nconsierto de sonature, li ballarine vestute turche, che portano lo palio mmiezo, e po MEO, e LELLA, che s’affacciano da lo barcone lloro, e TENZA, e NTREANA a la loggetta soja.

SCONCIGLIO

Todos todos a chi mi compagneros,

885

A chi se fa la fiestas;

Mo’ che sto palio s’have de chiantare,

Strodimmoce na mola a pazziare,

Addove si’ merluzzo? cca te chianta. (A chi porta lo palio.)

Perché vostè è l’Arfieros de la festa,

890

Sbrigateve mmaloras, cuerno cuerno.

MEO

È benuto lo palio, Lella, Lella,

Viene t’affaccia.

TENZELLA

Mamma curre curre,

Uh quanta gente viene vide, viene.

LELLA

Che nc’è zi Meo.

MEO

Se mette mo’ lo palio.

NTREANA

895

Ch’havimmo da vedè? si’ corza priesto,

A metterte nfenesta? trase dinto.

TENZELLA

Che d’haje arrasso sia

Manco pozzo vedere na pazzia.

NTREANA

Trase dinto te dico.

MEO

Ah Gnora, Gnora

900

Lassala sta a bedè la poverella.

No me la fa sperì; (che facce bella.)

SCONCIGLIO

Accossì state buono?

NTREANA

Mo’ mmo’ vene

Ch’hà da fa no servizio.

SCONCIGLIO

Uh Tenza nosta?

LELLA

Ntrea’ falle levare sto golio.

NTREANA

905

Comme vo’ la sia Lella; eh stamm’attiento

Pe quarche zannaria, vasciate ll’uocchie.

TENZELLA

Gnorsì mo’ le chiudimmo,

E co ll’ossa pezzella po vedimmo.

SCONCIGLIO

Eh mi segnor D. Meos, onde chiere,

910

Che mettimmo los palios?

MEO

Mo’ mmo’ scenno,

Chisto scargea Tenzella, ed io me mpenno. (Sconciglio piglia lo palio, e l’arvolea passeanno.)

A lo palio d’Amore

Nnammorate sbardellate

Su corrite, che facite?

915

Chi lo vole, eccolo cca.

(Ah nennella pazziarella

Io te voglio guadagnà). (azzenna Tenzella.)

LELLA

Viva Nardullo viva, bravo, bravo.

SCONCIGLIO

Vaso la mano a ostè, sia Lella schiavo.

920

Mo’ se vede chi hà chiù core,

Chi la vence sta recatta,

E chi perde se lo gratta

Co di’ mano cca, e llà

(Voca, sia, che sarria

925

A sto scuoglio ntroppecà.)

NTREANA

Sia Le’ t’haggio da dire na parola.

LELLA

Mo’ scenno abbascio, viene.

NTREANA

Eh figlio’ vi’ che faje, attienne a ttene.

SCENA IX

SCONCIGLIO, MEO abbascio, e TENZA a la fenesta.

TENZELLA

Ch’è squagliata a bon’ora, vi’ che susta

930

Perché no mmoglio Meo, non sa che fare

Pe fareme schiattare?

MEO

Addove si’ Nardullo?

SCONCIGLIO

Eccome ccane.

MEO

Damme sso palio, e tozzola ssa porta.

SCONCIGLIO

E ch’havimmo da fa.

MEO

Voglio saglire

935

A mettere lo palio a sso barcone.

SCONCIGLIO

Y perché non lo miettes

A lo barcones tuios?

MEO

Ca no me piace,

Che d’è si’ fatto moccia, che buo’ mettere

L’assisa a le pennate?

SCONCIGLIO

Tu che d’aje?

940

Chi te scicca, che strille? mo’ lo metto

Porzì ncoppa na votta.

MEO

Dallo ccane.

SCONCIGLIO

Che boglio dà? na meoza, è affizio mio.

Mo’ saglio addo Ntreana, e nce lo chianto.

MEO

Tu vuo’ saglire?

SCONCIGLIO

Yo, che fosse ciunco?

MEO

945

Uh te te ca Sconciglio m’è resciuto.

SCONCIGLIO

Lo Sonciglio si’ ttune; oje Cartafauza,

No mme ì guancianno, ca te perdo

Lo respetto; me siente?

TENZELLA

Ah maramene,

Ca chiste mo’ faranno accostiune.

MEO

950

E che buo’ che te rompa

La noce de lo cuollo, lazzarone?

SCONCIGLIO

E bù senza la palla;

Vi’ chi fa leva te? na mmummia secca,

Che si faccio na lloffa te l’affoco.

MEO

955

A me na lloffa? oh potta d’oje? birbante,

Damme sto palio cca.

SCONCIGLIO

Non t’accostare

Ca te faccio no stuppolo.

SCENA X

NTREANA, e LELLA abbascio, e li stisse.

NTREANA

Ch’è chesto?

LELLA

Ah janca me, ca chisse mo’ s’accidono

Ajutate spartite

960

Curre Ntreana, e buje che nce facite? (Cca Ntreana, e Lella teneno Meo, e duje aute Sconciglio.)

NTREANA

Patro’ Mmeo ch’è breogna; vi’ che faje?

MEO

Lassame ì Ntreana.

LELLA

Statte zitto.

SCONCIGLIO

Fatte a tenè guallecchia,

Ca si viene te stiro ssa pellecchia.

MEO

965

Oh mmalora lassateme.

LELLA

Sconciglio,

Vavattenne da lloco.

NTREANA

Scumpe mone.

MEO

Posa sto palio.

SCONCIGLIO

Schiatta,

Tanto ng’haje tu, quant’io a sta recatta.

SCENA XI

FONZO, e li stisse.

FONZILLO

Che remmore nc’è lloco?

NTREANA

Uh Fonzo Fonzo

970

Acconcia st’arravoglio.

FONZILLO

Che d’è stato?

SCONCIGLIO

Vo’ mettere lo palio addo Ntreana.

FONZILLO

E tu va mettencillo dalle gusto.

SCONCIGLIO

Nce lo vo’ mettere isso co malanno;

E chisto è affizio mio.

FONZILLO

Va nce lo saglie,

975

E fenite sta baja.

MEO

No nce saglire;

Ca te caccio lo fecato cca mmiezo.

FONZILLO

Ah zi Meo, haje jodizio; e mo’ te pierde?

MEO

Ed isso mo’ vo’ vencere lo punto;

E nnanze non ce lasso sto mostaccio.

NTREANA

980

Venca da tene la prodenza, scumpe.

FONZILLO

Non guastammo la festa, e tu Nardullo,

Damme sto palio, ca lo metto io.

MEO

Me scusa ostè, nce va l’anore mio.

NTREANA

Ncoppa la casa mia no nce lo voglio.

SCONCIGLIO

985

E io mo’ te lo nzippo a chisto scuoglio.

FONZILLO

Jammoncenne zi Meo, leva ssa baja.

No mi’ ca pierde de connizione

A bolè contrastà co sto scauzone?

Chi cammina pe li spine,

990

S’hà da pognere, e stracciare,

Chesta è cosa che se sa.

MEO

È lo vero accossì ba.

SCONCIGLIO

Dise bien, mosca saglià.

FONZILLO

Co schefienzie, e malantrine

995

No besogna havè, che fare.

FONZILLO - MEO

Pecché t’hanno d’allordà.

SCONCIGLIO

Vi’ che mmierdas vonno aulà?

SCENA XII

SCONCIGLIO, NTREANA, e LELLA.

SCONCIGLIO

Oh ca ll’haggio venciuta

LELLA

Haje fatta prova,

Va stirate lo vraccio.

SCONCIGLIO

Ma sia Lella,

1000

Isso vo’ fa lo potta a ncioreareme,

Ed io non passo pe sto chirchio rutto.

NTREANA

Lassalo ì sia Lella, sient’a mmene.

LELLA

Jammo dinto, e parlammo chiù apposate.

SCONCIGLIO

Lo palio è puosto già, via su abballate. (Cca se fa l’abballo a la torchesca, Sconciglio se torna a peglià lo tammurro, e sona fenuto l’abballo dice:)

1005

Fegliule jatevenne a la falluca,

Ca mo’ venco, e le ccose nc’agghiustammo,

E po co ste milorde nc’arrappammo.

SCENA XIII

LELLA, e NTREANA.

LELLA

Sta mbroglia vole fare lo si Titta,

Stravestirse da schiavo pe basarme?

1010

E di’ che benca, di’, ca no le scippo

Ll’uocchie co st’ogna?

NTREANA

Non farraje a chesto,

C’haggio provisto a tutto; saglietenne.

Serrate da dereto, e s’io venesse

A tozzolare, non aprì.

LELLA

Non t’apro.

NTREANA

1015

Mo’ voglio mette Ciulla stravestuta

A la portella mia reto la casa,

Azzò vennenno Titta, da llà esca,

E vedimmo chi fa meglio sta pesca.

LELLA

Guidela tu comme te pare meglio,

1020

Ajuta chella scura negrecata.

NTREANA

È piso mio.

LELLA

Vide a che stella è nata.

Orsù non è cchiù tiempo sta mmalanza;

Ciulla è biva, e sta cca; Titta ha mogliere,

Lella ca tu nce pienze, che ne spiere?

1025

Non serve cchiù a penzare

Povero core mio,

Lassalo sosperare

Resuorve ch’aje da fa.

Si vide ca non puoje

1030

Avè chillo che buoje

Lassa sso tradetore,

Amma chi puoje peglià.

SCENA XIV

TITTA da schiavo vennenno cauzette.

TITTA

O creo ca simm’a ttiempo, e che Ntreana

Sta ddo Lella, ca nghiusa have la porta,

1035

Mettimmoce a strellare

Pe farel’affacciare.

Chi volir comprar calzetta,

E russetta a piattina,

Tutta quanta rrobba fina

1040

A bon prezzo mi donar

Su baisano via comprar.

Non nce compare nullo, a che ghiocammo?

Mettimmoce a sto pizzo, ed aspettammo.

SCENA XV

CIULLA da zingara, e lo stisso.

CIULLA

Ahie chi vo’ la palettella,

1045

Nc’è lo spito, ed è polito,

Tenco cca la scummarella,

Cortesia ve voglio fa;

Chi se nzora, e bo’ accattà.

CIULLA - TITTA

Chi volir &c. - Ahie chi vo’ &c.

CIULLA

1050

Ecco llà Titta, ah negrame lo core

Che sbattere me fa; Cielo soccurzo.

Compar bongiorno.

TITTA

Chesta nce mancava, che bolir?

CIULLA

Che d’avir co chesta cera?

1055

Annevenar ventura.

TITTA

Andare, andare,

Ca ti star mariola.

CIULLA

N’è lo vero;

Io non so’ llatra, e manco tu si’ schiavo.

TITTA

(Oh bon’ora, e che sento?) Ti star pazza?

CIULLA

Non cagnare lenguaggio, ca te saccio.

TITTA

1060

Che sapir? ti star fauza.

CIULLA

Tu si’ fauzo

Ca staje cca pe fa mbroglia,

O maro te, si chesta se scommoglia.

TITTA

(Tiemente c’hà li spirete sta zingara,

Me potesse ajutà?) Su va decenno

1065

Nnevineme la sciorta.

CIULLA

Me daje la cortesia.

TITTA

Te la dongo.

CIULLA

Damme sta mano, ed auza cca sta faccia.

TITTA

Veccola.

CIULLA

(Tradetore) siente ccane,

Te vedo all’uocchie ca si’ nnamorato;

1070

Fust’amato no tiempo.

TITTA

E mo’?

CIULLA

Si’ odiato.

TITTA

Perché?

CIULLA

C’haje la mogliere.

TITTA

Lloco sgarre.

CIULLA

No sgarro; siente appriesso.

TITTA

Sto a sentire.

CIULLA

Te si’ bestuto Schiavo pe basare

La fegliola, che amme, n’è lo vero?

TITTA

1075

(Io rest’ammisso) comme tu lo ssaje?

CIULLA

Lo folletto, che tenco a chist’aniello

Me lo ddice a l’arecchia.

TITTA

E mente è chesto

Comme, haje ditto ca io sonco nzorato,

Si moglierema è morta?

CIULLA

Ed io te dico

1080

Ca mogliereta è biva.

TITTA

È biva! comme?

CIULLA

Che d’è; te si’ cagnato de colore?

Che te spiace, ch’è biva.

TITTA

Ah porca, nfame?

CIULLA

Perché le dice chesto.

TITTA

Vasta, vasta.

Ed è biva pe cierto?

CIULLA

È biva.

TITTA

A sciorte.

1085

Accossì m’haje traduto? E già ch’è biva,

Pigliate chiste, e dimme addove stace.

CIULLA

Che ne vuo’ fa.

TITTA

Le voglio caccià ll’Arma.

CIULLA

Addonga la vuo’ morta.

TITTA

E zeffonnata.

CIULLA

Stipate li denare, ca la scura

1090

Pe contentarte venarrà no juorno,

Co tutto ca le si’ tanto nnemmico,

E te dirrà chello, che mo’ te dico.

Non si’ stracquo turco cano

De volerme fa patire?

1095

Vuo’ che mora, pe morire

So’ benuta eccome cca.

TITTA

(Oddio me pare de sentire Ciulla.)

CIULLA

Su che faje, stienne ssa mmano

Te lo pietto scippa straccia

1100

De sto core fa venaccia

Nzi’ che t’haje da sazià.

Aimmè lo core, ajuto.

TITTA

Uh poverella

O Ntreana, Ntreana?

SCENA XVI

NTREANA, e li stisse.

NTREANA

Che nc’è Titta.

TITTA

Ajuta chesta Zingara.

NTREANA

Maressa

1105

Ch’è stato.

TITTA

È addebboluta;

Te dalle sto carrino, e di’ che torna,

Ca ll’haggio da parlare.

NTREANA

Tu mo’ ddo’ vaje.

TITTA

Me voglio ì a spogliare.

NTREANA

E Lella.

TITTA

Haggio cagnata penione.

1110

Po te dico pecché, lasseme ire.

CIULLA

E quanto sto a morire?

NTREANA

Figlia mia, che cos’è? che t’è socciesso?

CIULLA

Ah ca non pozzo, te llo ddico appriesso.

Maritemo addo’ stace.

NTREANA

1115

Se n’è ghiuto a spoglià!

CIULLA

T’ha ditto niente.

NTREANA

Vo’, che tuorne ca t’have da parlare,

E t’hà lasciato no carrino, sciala.

CIULLA

Sì ca scialo, ddov’è? dammillo priesto.

Saje perché l’ha lassato.

NTREANA

1120

Perche?

CIULLA

Che me n’accatta solemato.

NTREANA

Non ce perdere tiempo, fa sta spesa,

E bi’ comme te truove? Ah maratene

Vi’ ca tu vaje mpazzia, si non ntienne,

Susete, e ghiammoncenne.

CIULLA

1125

Hoje morte, addove si’, che non mme siente,

Ca pe farme stentare, e cchiù patire,

Si’ fatta sorda, e no mme faje morire.

SCENA XVII

SCONCIGLIO, e TENZELLA.

SCONCIGLIO

Haggio ntiso, ca Titta sta mmojenato,

No mmene a la recatta,

1130

Si be’ nce manna la falluca soja;

Chesto me va cchiù mparo,

Pe guadagnà lo palio, ca sto cano

È no turco de Mare; e co raggione

Me deva apprenzione.

TENZELLA

Mo’ che Mamma

1135

St’attuorno a Ciulla pe la conzolare

Lassame ascì no poco a resciatare.

SCONCIGLIO

Tenzella.

TENZELLA

O si smargiasso tu cca staje?

SCONCIGLIO

A lo commanno tujo bannera mia.

TENZELLA

Haje fenuto fa buglia, presentuso?

SCONCIGLIO

1140

Ma si chella ranonchia scortecata

De Cartafauza me vo’ ì fruscianno,

Ng’hà mancato tantillo, e le ncasava

Quatto gliommare ncapo, la schefice

Isso voleva saglì a la Casa toja.

1145

Pe mettere lo Palio.

TENZELLA

Che d’era?

M’arrobbava coll’uocchie, o me magnava.

SCONCIGLIO

E si chillo annascuso

Te lo mollava quarche pezzechillo,

O jocava de ciampa a sto pedillo?

TENZELLA

1150

E sì ca io so’ morta? no le deva

No muzzeco a lo naso.

SCONCIGLIO

Ca lloco sta lo ccaso,

Potea sgarrà la botta,

E scagno dello naso, dive sotta.

TENZELLA

1155

Va Zanno marotene,

Sempe co la pazzia; ma tu non saje,

Ca sto dint’a li guaje.

SCONCIGLIO

Perché bellezza?

TENZELLA

Ca mamma me vo’ dare a Cartafauza.

SCONCIGLIO

Pecchesso lo Carnumma era ncocciato

1160

De saglì ncoppa; Ed io bravo saputo,

Ca tell’haggio chiaruto. Eh statt’attiento;

Non te fa trasportà da mamma toja,

Ca ste becchie mmardette hanno pe uso.

D’annegrecà le ffiglie; co pretesto

1165

Ca le vonno dà pane pe campare,

Le danno n’uosso viecchio a spollecare.

TENZELLA

È lo vero, ma tu me faje paura,

Ca si’ troppo manisco, e furiuso,

Vorria, che fusse doce cchiù de pasta,

1170

Che no vvedisse troppo, e non trasisse

A li guaje de le femmene; m’haje ntiso,

Fegliulo finché manzo, ca si’ acciso.

SCONCIGLIO

Tenze’ no nnommenà troppo sto manzo,

Ca la Carne de piecoro hà no fieto;

1175

Vasta, si non so’ manzo, so’ cojeto.

TENZELLA

Quanno faje accossì starrimmo buono,

E te vorraggio bene

De chillo muodo, che tu vuoje a mmene.

SCONCIGLIO

Pe l’Affecchienzia ntanto duorme, duorme.

1180

Ma tu st’attiento pe lo viecchio.

TENZELLA

Guarda non è focile pe tenè sta scarda.

Speretillo de sto core

Pe tte sulo tenc’affetto.

SCONCIGLIO

Fecatiello de sto pietto

1185

Lo centimmolo d’amore

Schitto tu me faje votà.

TENZELLA

Fruscia via, non te stracquà.

SCONCIGLIO

Tu figliola si’ la mola,

Che me fragne nott’è ghiuorno.

TENZELLA

1190

Tu figliulo si’ lo mulo

Che sta mola vuote attuorno.

SCONCIGLIO

Fragne bona sta farina.

TENZELLA

Arre trotta, su cammina.

SCONCIGLIO

Nché lo grano è mmacenato

1195

Bella pizza voglio fa.

TENZELLA

Quanno po te si’ stracquato,

Quant’alizze vuo’ jettà.