Lo sagliemmanco falluto

Lo sagliemmanco falluto, Napoli, s.e., 1724

a cura di Concetta Gallo

paratesto ATTO PRIMO ATTO SECONDO ATTO TERZO Apparato

ATTO I

SCENA PRIMMA

Arba, e Cortiglio dell’Alloggiamiento.

LUCCIO vestennose, e po PAGLIACCIO co na valice ncuollo, e no mozzone allommato mmano.

LUCCIO

Te sbrighe, o non te sbrighe?

PAGLIACCIO

So’ sbrigato. (da dinto.)

LUCCIO

E quann’jesce?

PAGLIACCIO

Mo’ venco (atta che furia!

Pare, che tenca lo remmedio ncuorpo.)

Eccoce ccane.

LUCCIO

Stuta sta cannela.

PAGLIACCIO

Che buo’ stotà? na meoza; c’haje golio

De farme ntroppecare a qua’ breccella,

Che m’havesse a smaglià la catenella?

LUCCIO

Che breccia? che catena? ancora duorme?

No mmi’, ca schiara juorno? stuta, stuta.

PAGLIACCIO

Tu proprio vuo’, che piglia quatto butte?

Mo’ la stotammo bona notte a tutte.

LUCCIO

Sienteme na parola.

PAGLIACCIO

Attacca a curto,

ca sta valice pesa.

LUCCIO

Va a la varca,

Ddo’ jettemo jersera;

Conzegna chesta, e torna de carrera.

PAGLIACCIO

E chesto che bo’ dire?

LUCCIO

Ca me voglio partire pe Ssalierno.

PAGLIACCIO

Vuo’ partì pe Ssalierno! pe cche fine?

Lassame posà chesta; che d’è stato?

LUCCIO

Me voglio zeffonnare da sto Munno.

Si no mmasta da ccane.

PAGLIACCIO

E Tommasina?

LUCCIO

Non c’è cchiù Tommasina; essa m’ha ditto,

Che sfratta, e me l’hà ditto ajere appunto.

PAGLIACCIO

Contame meglio, comme va sso cunto.

SCENA II

TOMMASINA da lo barcone, e li stisse.

TOMMASINA

Che notte è chesta? aimmè, chi pò dormire?

Chi lo ssape si Luccio s’è partuto?

PAGLIACCIO

Ed essa t’have ditto, che te parte?

LUCCIO

Comme lo buo’ sentire?

PAGLIACCIO

Nce lo bole.

Quanta vote haggio ditto: iammoncenne;

Da chesta che ne spiere? e tu haje ncocciato;

Pigliate chesto, e spanne sso ffilato.

TOMMASINA

(Sento parlà cca bascio, chi saranno?)

LUCCIO

No mme nfettare cchiù; vuo’ che me scanno?

TOMMASINA

(Me pare, che sia Luccio) chi è llà bascio?

PAGLIACCIO

Uh teccotell’attiempo.

LUCCIO

E chi vo’ essere

No scuro, no scontento, no mmarditto.

TOMMASINA

Ah si Luccio, tu si’, parla cchiù zitto.

Che staje facenno lloco? co chi staje?

LUCCIO

Co Marcantonio, ed aspettava a buje

Pe ve dicere addio.

TOMMASINA

Mo’, mmo’ scenno.

LUCCIO

Vattenne, e torna priesto.

PAGLIACCIO

Che sserve, ca m’abbio, mo’ faje sta pace.

LUCCIO

Io non saccio, che pace? tocca tocca;

La sento, pe le fa na ngioriata.

PAGLIACCIO

Ma po te vive l’acqua percantata.

Vi’ ca la sgarre,

No nce parlare.

Ca na fegliola

Co na parola

Te nce sa stare.

Co no squasillo

Co no chiantillo

Hà tanta forza

De te spallà.

Vi’ ca la sgarre, no nce parlà.

LUCCIO

No mme faccio sbotà, ca so’ mparato.

PAGLIACCIO

Lo nnammorato

Lo ssaje comm’è?

Siente si Luccio;

È comm’a Ciuccio

Ch’è carrecato,

Si vo’ fermare

Sente di’ arre.

Si vo’ toccare

L’è ditto: uscè

O ntorza, o storza

A boglia d’aute semp’ha da fa.

SCENA III

TOMMASINA abbascio, e LUCCIO.

TOMMASINA

Comm’accossì de botta,

Luccio, te vuo’ partire?

LUCCIO

E che mme serve

A fa lo cuollo luonco, ed a morire

Nnanz’a te desperato?

E tanto cchiù, c’ajere m’haje cacciato.

TOMMASINA

Io non t’haggio cacciato; t’haggio ditto

Ca si patisce tanto,

Ed aspettà non puoje, che fa la sciorte,

Tu lassame connio;

Voglio lo bene tujo cchiù de lo mio.

LUCCIO

Che buo’ c’aspetta cchiù, si la speranza

M’have ghiuse le pporte; e tu pescraje

Te mmarite co Pippo?

TOMMASINA

E chi l’ha ditto?

Quant’acqua hà da passà.

LUCCIO

Non sia pescraje,

Sia nfra quinnece juorne, nfra no mese,

Sia nfra n’Anno, vuo’ cchiù? semp’è lo stisso,

Tu depienne da patreto,

Chist’è ncocciato, a Pippo te vo’ dare;

Addonca, che mme serve st’aspettare?

TOMMASINA

Ma chi sa, che pò essere nfra tanto?

Io non lasso de fa chello, che pozzo

P’accattivarme patremo; e già spero

LUCCIO

Che buo’ sperà, bon’ora? So’ sei mise,

Che stonco a sto martirio, e non faje niente,

Addio figliola, statte allegramente.

TOMMASINA

Luccio, ed haje core

Lassarme nnitto nfatto?

LUCCIO

E tu haje core vederme fa lo tratto?

Lo mmorire appoco appoco

Cchiù stentata fa la morte;

E chi mpietto ha n’arma forte

Tutto nziemo vo’ morì.

100

S’auza priesto da lo juoco

Chi jocanno ng’hà perduto,

Ca lo stare llà speruto

Cchiù li flate fa venì.

SCENA IV

TOMMASINA, e DIANORA, ch’esce da la Casa.

TOMMASINA

Già se n’è ghiuto; oddio, comme no mmoro

105

A sta partenza amara? o Luccio, Luccio,

Accossì tu me lasse? ah Turco, ah Moro?

DIANORA

Bonnì sia Tommasina,

Accossì priesto ne?... che d’è, tu chiagne?

E pecché gioja mia?

TOMMASINA

Perché so’ nnata

110

Pe campare, e morire desperate.

DIANORA

Comm’a dire? che passe?

TOMMASINA

Ah mamma mia,

Ca da mamma te stimo, haggio perduto

Lo core mio; Luccio s’è partuto.

DIANORA

S’è partuto?

TOMMASINA

Gnorsì.

DIANORA

Pe ddo’.

TOMMASINA

Che saccio.

DIANORA

115

E perché?

TOMMASINA

M’have ditto

Ca vedè no mme pote mmano a Pippo.

DIANORA

Ma, figlia mia, si’ stata capotosta,

Non t’haggio ditto sempre nguadiatillo

Annascuso de patreto?

TOMMASINA

Non pozzo.

DIANORA

120

Perché non puoje? sta scusa, è troppo fredda.

TOMMASINA

Non pozzo dire tutto.

DIANORA

Dinne chello, che puoje.

TOMMASINA

Sacce ca Luccio

È nato galantommo, hà patre ricco,

E s’è finto pe mmene Sagliemmanco.

DIANORA

125

Uh che me dice, te! Secota appriesso.

TOMMASINA

S’io me lo piglio senza, che bo’ patremo,

Me cacciarria de Casa, e senza niente,

Lo patre sujo ll’odiarria a mmorte,

E tanno, che facimmo?

130

De meseria, e de famme morarrimmo.

DIANORA

Dice buono; ma zitto,

Lassa fa a mme co patreto.

TOMMASINA

Che serve,

Si Luccio se n’è ghiuto?

DIANORA

Eh no, ca vene,

N’hà piede pe ffoì, chi vole bene,

135

Va saglietenne va, ch’è piso mio

D’acconcià ssa valanza.

TOMMASINA

Ma pise no nce mette la speranza.

Si no sciore, o na chianta è seccata,

Miettec’acqua, fa chello che buoje,

140

No la puoje

Maje cchiù sorzetà.

Già la sciorte m’hà ll’arma levata,

Ca m’ajute, che pozzo sperare,

Si a campare

145

Non pozzo tornà?

SCENA V

DIANORA, e FRABBIZIO da la Casa.

DIANORA

Ssa figliola m’hà proprio affattorata:

Ed io me sento spegnere le ccarne

Quanno la vedo affritta; Luccio puro

Me va a lo genio, e tanto voglio fare,

150

Che s’hanno tutte duje da nguadiare

Uh te lo sso Frabbizio attiempo attiempo.

Si Frabbizio bonnì.

FRABBIZIO

Bacio la mano

Mia Signora.

DIANORA

Che d’è? troppo pe ttiempo

Ascite stammatina.

FRABBIZIO

Un gran negozio

155

No mm’hà fatto dormir cotesta notte.

DIANORA

Comm’a ddi’?

FRABBIZIO

Pe ppenzare a un matrimonio.

DIANORA

Si è lezeto, di chi? de Tommasina?

FRABBIZIO

Costei l’hò mmaritata: è un altro affare.

DIANORA

L’havite mmaretata? co nzalute,

160

Mo’ scialammo a confiette; chi le date?

FRABBIZIO

Pippo, che m’hò cresciuto come un figlio.

SCENA VI

NICOLETTA a lo barcone, e li stisse.

NICOLETTA

(Zijemo co Dianora fa conziglio!)

DIANORA

E perché no le date lo sio Luccio?

Ch’è cchiù bello, cchiù addotto, e aggraziato?

FRABBIZIO

165

Primma, che Luccio ncasa mia venesse,

A Pippo io ci mpegnò molte promesse,

E po tenco m’penziero de Sposare

Luccio con mia nipote Nicoletta.

NICOLETTA

(Oh che te sia ssa lengua benedetta.)

DIANORA

170

Me faccio maraviglia,

Stime cchiù na nepota, che na figlia.

FRABBIZIO

Che buo’, che benca meno de parola?

Sarrebbe un grand’errore,

Che l’Anonimo fosse mancatore.

DIANORA

175

Vi’ che ffaje, ca me pare

Che figlieta speresca appriesso a Luccio;

Chi lo ssa che pò fare,

Che non te metta ncapo no Cappuccio?

FRABBIZIO

A mme Cappuccio, a me? poter di Bacco,

180

L’ammazzarebbe; o puro

La sfrattarria di Casa nuda, e cruda,

Che manco le darrei

Pe dote soja li secreti miei.

DIANORA

Ma sarria chesto troppo canetate.

NICOLETTA

185

(Chi nce la mette a chesta

A bolè sconcecà la sciorte mia?

Che se rompa lo cuollo, vi’ c’arpia!)

FRABBIZIO

No cchiù, parliamo d’altro; che facimmo

De lo trattato nuostro?

DIANORA

Qua’ trattato?

FRABBIZIO

190

De le nnozze future.

DIANORA

Che nozzole ammature vaje cercanno?

Mmarita primmo figlieta, e nepoteta;

Quanno te si’ sbregato,

Negoziammo nziemo.

FRABBIZIO

E perché adesso

195

No lo ffacimmo mo’?

DIANORA

Voglio vedere

Chi mmarite co figlieta.

FRABBIZIO

Non t’haggio ditto, ca le donco Pippo?

DIANORA

Ed io non t’aggio ditto, dalle Luccio?

FRABBIZIO

Ma lei farrà trattareme da Ciuccio.

DIANORA

200

O ciuccio, o cavallo

Volimmo sso gusto,

Si no, ca sto fusto

Frabbizio ha da fa.

FRABBIZIO

Voi siete un mitallo

205

Qual’ora incocciate;

Non tanto, fermate

Dianora, chi sa.

FRABBIZIO

Ci voglio penzare.

DIANORA

Che tanto penzare?

210

Resuorvem’a pprimmo.

FRABBIZIO

Vedimmo, farrimmo.

DIANORA

Si no lo buo’ fare,

Non serve a mpecà.

FRABBIZIO

Vedremo di fare;

215

Quarcosa sarrà.

SCENA VII

NICOLETTA, e FRABBIZIO.

NICOLETTA

Gnorezì, gnorezì?

FRABBIZIO

Che ci è figliola?

NICOLETTA

Sentite na parola.

FRABBIZIO

Eccoci quivi.

NICOLETTA

Che v’ha ditto Dianora?

FRABBIZIO

Nulla, niente.

NICOLETTA

No ve serve a nnasconnere,

220

C’haggio sentuto tutto:

Decite a ssa maddamma,

C’attenna a li guaje suoje, e che no mmaa

Froscianno le cecale.

FRABBIZIO

Tu che d’haje?

NICOLETTA

Che boglio havere cchiù? che nc’entra chessa

225

A levarme de mente

Che non me date Luccio?

FRABBIZIO

E chi la sente?

NICOLETTA

Chesto vorria vedè, ca no mme scaso

Co Tommasina, e ad essa la stravise?

FRABBIZIO

Che d’è? fusse mpazzuta

230

Fatte li fatte tuoje, ca nce penz’io.

Figne, ca fegno io puro,

C’haggio li fine mieje; colei sta ricca,

S’hà scresciuto Cecella, io vao penzanno

De fare co no tratto schiacco, e Donna;

235

Di sposar la figliola, e di schiaffarme

Dint’a la Casa, e fareme patrone;

E perciò la ncenzeo.

NICOLETTA

Chesto sarrà cchiù ppeo,

Ca vuje pe chisso fine, che tenite,

240

Sotta ve mettarrite.

FRABBIZIO

No, no, ca non son tanto sempliciotto

Va saglietenne, agghiusta li vasette

Del balzamo simpatico;

Mmparateve le pparte, ca sta sera

245

S’hà da fa la Commeddia, e si mme resce,

Figliole scialarrite a carne, e pesce.

NICOLETTA

Haggio rotta co ziiemo sta lanza;

E pocca è a boglia mia, a Tommasina

Voglio scarfà l’arecchie, e sta vecchiazza,

250

Si ng’hà fortuna provarrà la mazza.

Ah Luccio, Luccio mio, gioja speranza,

Pe tte sera, e matina

Io sto dint’a lo fuoco; ed a sto core

Tutto lo nfierno sujo ng’ha puosto Amore.

255

Non è tanto na mamma gelosa

De lo figlio, che tene a lo pietto,

Quanto sonco gelosa de te.

St’arma mia pe tte n’arreposa,

Nzi’ a lo viento me dace sospetto

260

Ma chi sape si pienze tu a mme.

SCENA VIII

PIPPO da la cammera soja.

PIPPO

Sta zannaria de Luccio, e Tommasina

Va piglianno de vizio,

Io non porto cchiù ncuollo,

E stonco pe le fa na menechina.

265

Voglio parlà a Frabbizio,

Che la scompa sta baja, che ne l’abbia,

Si no mmo’, che lo zollo:

O puro che mme dia

Pe tutta craje la figlia.

270

E fenimmo sta vernia, e sta schiattiglia.

Ma scenne Tommasina co Cecella:

Chi sa che bene a fare;

Qua mmasciatella non porrà mancare.

SCENA IX

TOMMASINA, CECELLA, e PIPPO.

TOMMASINA

Scinne priesto.

CECELLA

E che buoje?

TOMMASINA

Va jesce a chiazza.

275

Assettate lo vascio de Teresa,

Vide si passa Luccio,

Fallo venì, ca ll’haggio da parlare.

PIPPO

(Vi’ s’è comme dich’io, ca non pò stare?)

CECELLA

E nc’è pressa de chesto?

TOMMASINA

Sì.

CECELLA

Mannaggia

280

Io m’haggio da mparare

La parte pe sta sera, e tu me scuonceche.

TOMMASINA

Na mez’ora che d’è? va ca mo’ tuorne.

Io te tenco la parte, e priesto priesto

Te mpare ss’autro riesto.

CECELLA

285

Gnorsì, tu dice buono, ca la saje;

Io m’haggio da mparare doje facciate,

E si non dico buono, me sbreogno;

Né Patreto me dace lo ventaglio,

Che m’hà prommiso.

TOMMASINA

Te lo donco io,

290

Va vance core mio.

CECELLA

Mo’ nce vao,

Ma tieneme sta parte,

Vide si dico buono st’arietta.

TOMMASINA

Addove stace?

CECELLA

Proprio a sta chiavetta.

TOMMASINA

Di’ priesto, e po vattenne.

PIPPO

295

(Vi’ che furia, che tene, già se mpenne.)

CECELLA

Na figliola tennerella,

Nzemprecella comm’a mme,

Si accommenza a fa l’ammore,

Sente già dint’a lo core

300

Freccecà na cosa nova,

Che la prova,

E no la sa e la sente sospirà.

TOMMASINA

Te pigliate la parte ca vaje bona.

CECELLA

Se lammenta nott’e ghiurno,

305

Ma non sape a ddi’ perché?

Vo’ spià, ma n’have scuorno;

Se conzumma lo cerviello,

E borria no gioveniello

Pe poterselo mparà

310

Ma no nc’è chi ce lo dà.

PIPPO

Ferma, addo’ vaje?

TOMMASINA

Aimmè fortuna,

Vi’ chisto che farrà, si m’hà sentuta.

PIPPO

Tieme’: comm’è sparuta!

E be’ sia Tommasina, che te pare.

315

Va bona sta facenna?

TOMMASINA

Qua’ facenna?

PIPPO

Che nn’haje da fa de Luccio?

TOMMASINA

M’have da conzertare.

PIPPO

Ed io so’ muorto?

TOMMASINA

Lo ssaccio, ca si’ bivo; ma tu saje,

C’a conzertare poca grazia ng’haje.

PIPPO

320

Poca grazia! è lo vero; eh, ca sacc’io,

Perché te spiace lo conzierto mio.

TOMMASINA

Che buo’ sapè? te suonne? a chillo tocca,

C’hà stiso lo soggetto; accossì bole

Lo ghiusto, e la creanza.

PIPPO

Cierto, cierto,

325

Ma sto pe sconzertarve sso conzierto.

SCENA X

NICOLETTA de banna, e li stisse.

NICOLETTA

(Chiste c’hanno cca bascio?)

TOMMASINA

Che conzierto, e sconzierto vaje vennenno?

Se pò sapè che buoje!

PIPPO

Tu no la scumpe,

La zannaria co Luccio, e io ng’arremmedio.

TOMMASINA

330

Che buo’ arremmedià, si Prota miedeco?

Si n’haje meglio creanza a lo pparlare,

Te ne faccio mparare.

PIPPO

Chest’appriesso?

NICOLETTA

Che ccos’haje Tommasina?

TOMMASINA

Niente, niente.

PIPPO

Staje troppo resoluta.

TOMMASINA

335

E tu troppo m’appriette.

NICOLETTA

Che d’è stato.

TOMMASINA

Che bo’ essere stato? sto sio Prolaco

Me vo’ mettere legge

O ca parlo, o ca pratteco co Luccio,

Nè me la dace Patremo.

NICOLETTA

Tu haje tuorto,

340

T’hà da esse marito...

TOMMASINA

Che mmarito!

No lo voglio pe prossemo.

PIPPO

Mo’ parlo

Co patreto, me scuso, e po dò dinto,

E te faccio vedè, si sta commeddia

La fenisco ntraggeddia.

TOMMASINA

345

Uh te lo pullo muorto ca sbraveia!

NICOLETTA

E no cchiù Tommasina; va va Pippo,

Statte cojeto, e lassa fare a mmene.

TOMMASINA

Che buo’ fare tu n’autra? attiene a ttene.

PIPPO

Lencuta, sfacciata.

350

Mo’ mmo’ vederraje

Sto pullo che fa;

A chesta pedata

Dò caccia a sto zanno,

Lo scresto lo scanno,

355

No scappa si affè.

TOMMASINA

È muorto è muorto, uh poveriello! te.

PIPPO

Mo’ siente l’aggrisso;

Tu puro co isso

Me ll’haje da pagà;

360

Nnché Patreto arriva

Cchiù morta, che biva

Te faccio lassà;

E tanno dirraje

Sto pullo chi è.

SCENA XI

NICOLETTA, e TOMMASINA.

NICOLETTA

365

Ma tu no la vuo’ ntennere,

Chillo hà troppo raggione:

Dimme te pare cosa

De figliola norata

Sperì pe n’auto, ed essere affidata?

TOMMASINA

370

Tu puro te ne viene co sso ruseco;

C’affidare? c’anore? io no lo voglio;

E pe l’anore, n’haggio tanto, e tanto,

Che si n’havesse manco,

Già sarria mmaretata a boglia mia.

NICOLETTA

375

E a Luccio perché faje la percopia?

TOMMASINA

Che percopia? nce parlo, ca sta ncasa.

NICOLETTA

Pippo puro sta ncasa.

TOMMASINA

Ma è nsestuso,

E pe despietto sujo parlo co Luccio.

NICOLETTA

Vi’ che bello cappuccio c’haje cosuto!

380

Orsù scumpela mone,

Ca nce patesco io puro, e co raggione.

TOMMASINA

E perché?

NICOLETTA

Ca lo voglio pe mmarito,

E zio me l’ha prommiso.

TOMMASINA

Si te vole,

Pigliatillo connio; ma nzin’a tanto,

385

Che buje no v’affedate,

Crepa chi vole, ng’haggio da parlare.

NICOLETTA

Lo ffaccio, pe poterme sconcecare.

Ma t’accorto li passe; tu te cride,

Ca me si’ sore, e ca si’ figlia a zijemo;

390

Ma staje nn’arrore, si’ figliola sperza;

Saccelo, e si mo’ puoje, tu m’attraverza.

Si n’auciello forastiero,

Chisto nido n’è lo tujo,

Vascia l’ale, e no strellà.

395

Ca, si vene lo sprovriero,

Te spetaccia a gusto sujo,

Ddo’ no mmuoje te portarrà.

SCENA XII

TOMMASINA, e DIANORA da la casa.

TOMMASINA

Aimmè, c’haggio sentuto?

Io non tenco cchiù patre;

400

Chi me credeva sore, m’è revale;

E ddo’ mme era stipato tanto male?

DIANORA

Allegramente Tommasina mia,

C’haggio parlato a patreto de muodo,

Che se sonco mbrogliate già le ccarte.

TOMMASINA

405

Ah mamma, ca lo core cchiù me sparte.

Che cchiù Luccio? che Patre? m’have ditto

Nicoletta ca so’ figliola sperza,

No mm’è Patre lo zio,

E pretenne essa puro Luccio mio.

DIANORA

410

E lo guajo, che la ntrocchia,

Frabbizio pe tte squaglia; no la credere;

Ca te l’ha ditto pe te sconfedare,

Ma è piso mio de la fa schiattare.

SCENA XIII

CECELLA, e le stesse.

CECELLA

Iesce sia Tommasina,

415

Si vuo’ parlare a Luccio ch’è benuto.

DIANORA

Addo’ sta?

CECELLA

Sta parlanno co Teresa.

TOMMASINA

L’haje ditto ca lo voglio?

CECELLA

No mmò venire, dice c’ha da fare.

TOMMASINA

Siente Dianora mia; pozzo sperare?

DIANORA

420

Zitto, lassa fa a mme; curre Cecella,

Ntrattienelo no poco, ca mo’ venco.

CECELLA

Viene priesto, chi sa, che non se parta,

Pocca stace ngrannezza;

Che ll’haggio da tenè co na capezza? (se ne va.)

DIANORA

425

Va saglietenne, e fa tanto de core

Ca si non s’è partuto,

Non se parte cchiù mo’; nce stonco io,

Ne le faccio passare lo golio.

TOMMASINA

Chi lo ssa si è accosì?

DIANORA

Zitto gnorante.

430

Auciello, che ntornea do’ sta la rezza,

Ng’ha da ncappà pe forza, e se scapezza.

TOMMASINA

Credere te vorria,

Bella speranza mia,

Chest’arma t’assecura

435

Ma vene la paura,

E l’ammenaccia.

Sto core oddio, me pare,

C’ha ll’onne de lo mare,

Che ntra li scuoglie, e arene

440

Mentre che ll’una vene

Ll’auta la caccia. (se ne saglie.)

SCENA XIV

LUCCIO, e DIANORA.

LUCCIO

No, lassame Dianora,

Voglio proprio squaglià da sto paese,

Ddo’ haggio perzo lo core,

445

La quiete, e l’onore.

DIANORA

Qual’onore haje perduto? tu che ddice?

LUCCIO

Comme? te pare niente,

Ll’essere galantomo,

L’havere stodiato mmedecina

450

A Salierno, ddo’ stea p’addottorarme;

Vedere, e nnamorarme de ssa sgrata,

E benire ped’essa

A fa lo sagliemmanco, e sta a Patrone?

N’è niente? n’è breogogna?

DIANORA

Haje già rraggione

455

Haje fatt’assaje, ma che breogna t’eje?

Pocca a li tiempe d’oje

Li Sagliemmanco so’ comm’a li miedece,

Che co quattro parole arrepezzate

Pretenneno sanare li malate.

460

E Tommasina po te vole bene

LUCCIO

E c’ha fatto pe mmene?

DIANORA

Chello, ch’essa ha potuto.

LUCCIO

Ah, ca m’ha ncannaruto

Co chiacchiere, e promesse,

465

Ma vo’ Pippo la sgrata.

DIANORA

No no la sfortonata,

Ca si lo sente nnommenà, se torce.

LUCCIO

E perché n’ha voluto

Nguadeiarme nzegreto?

DIANORA

Saglie ncoppa

470

Ca te dico lo tutto.

LUCCIO

No Dianora,

Me ne voglio ire.

DIANORA

E scumpela bon’ora.

Né turco, né cano,

Ed haje tanto core

Lassà chella Fata?

475

Lo bo’ la raggione

De farla morire

D’arraggia, e dolore?

Addo’ na zetella

Cchiù bella, e nnorata

480

Trovare la puo’?

Che d’è? t’haje scordato

Le ttrezze, le mmano

Chill’uocchie a resillo,

Lo bello mossillo,

485

Cianciuso, addoruso,

Lo pietto quagliato?

Non pozzo cchiù ddire;

Chi sa che Marrone,

Scappare me pò.

LUCCIO

490

Ajemmè che bole chesta? vavattenne

Già lo ssaccio, ch’è bella, ch’è norata,

Ca fuorze mme vo’ bene,

Ma no stace pe mmene.

DIANORA

Chi te l’ha ditto? a chesto t’ajut’io;

495

Frabbizio mme sta sotta,

Io nce nn’haggio parlato, n’hà mez’ora;

E nc’è bona speranza.

LUCCIO

Uh, ca lo viecchio

Ha cchiù scarfuoglie assaie, che na cepolla;

Vasta, ch’è sagliemmanco.

DIANORA

500

Ed io n’haggio cchiù d’isso,

Ca so’ Pogliese, e tenco alloggiamiente.

LUCCIO

Chillo tira co Pippo, e non saje niente.

DIANORA

E si non saccio niente,

Nc’è remmedio de li nnammorate,

505

Quanno so’ ddesperate.

LUCCIO

E sarria?

DIANORA

No mme ntienne? nc’è lo mutto:

Si vuo’ carcuna, e non può havè ssa sciorte

Schiaffate dinto, e chiajeta co la Corte.

LUCCIO

Oh, ca maje n’ha voluto.

DIANORA

E saglie ncoppa,

510

No cchiù mme tormentare

Ca mo’ te dico chello c’haje da fare.

LUCCIO

Voglio fa, comme vuoje.

DIANORA

E cca songh’io pe li designe tuoje.

LUCCIO

Già so’ fatto na bannera

515

Che se vota ad ogne biento,

E si be’ non have abbiento,

A no luoco sempe sta.

Da ch’è ll’arba nzi’ a la sera

La speranza cca me vota,

520

Lo dolore llà me sbota,

Né mme parto maje da cca.

DIANORA

Tommasi’, c’haggio ditto? ch’era vrenna:

Già Sciurolo è ncappato, spenna, spenna.

SCENA XV

FRABBIZIO, e PIPPO pe strata.

FRABBIZIO

Ma lei mi par che sia troppo incoccioso;

525

Tommasina è la toja, te l’hò promessa.

PIPPO

Ma, Si Frabbizio mio, no mmo’ cchiù essa,

Ca già s’è fatt’acito.

FRABBIZIO

Eh, che tu sei stordito;

Havrà detto pe scherzo.

PIPPO

Ll’have ditto

530

Co lo fele a li diente.

FRABBIZIO

Eh bia, ca non è niente;

Sempre mai fu ritrosa

Donna, che si fa sposa.

PIPPO

E puro sette?

FRABBIZIO

E otto, e nove, e ddiece; m’haje frusciato,

535

E scumpelo sso nfietto,

Ti basta, che l’Anonimo l’ha detto.

PIPPO

Ma l’ossoria me faccia no favore,

Giacché mm’have cresciuto;

Mannatene sto Luccio; a che ve serve?

FRABBIZIO

540

A che mi serve? Oh caspita, figliolo;

La gelosia te sfibbia tutto il cerbero;

Tu non saje, ca mme serve a barda, e a sella;

Recita bene in palco,

Mi conserta le donne, fa commeddie,

545

Ha studiato bene medicina,

E sa tanta segrete,

Che dire si potria,

Ca tene ncuollo na speziaria.

PIPPO

Ma l’ossoria comporta

550

Farse sbià na figlia?

FRABBIZIO

Che sbiare?

Ella è donna da star dentro un esercito.

Andiamo, andiamo sopra

P’acconcià li vasette,

Te piglia ccane, saglie ste ricette.

PIPPO

555

Che rrecette bon’ora? io sto che schiatto.

De gelosia.

FRABBIZIO

Chi è geloso è matto.

Sei male innamorato,

Tu non l’intendi niente,

Cupido va bendato,

560

E si vuo’ fa l’ammore

Tu puro haje da cecà.

O schiatta, o va mpazzia

Chi troppo vede, e sente,

Questa è la miglior via

565

Per non sentir dolore,

Scialare, e fa scialà.

PIPPO

(Che puozze scialà tu de sta manera,

E te commoglia po la mmala sera.)

SCENA XVI

CECELLA, e PAGLIACCIO mbreaco co la valice ncuollo.

CECELLA

Ne Paglia’... da do’ viene?

PAGLIACCIO

Haje visto Luccio?

CECELLA

570

Io creo, che chiacchiareja co mamma mia.

Ma tu da dove viene?

PAGLIACCIO

No mme chiammà Pagliaccio, ca me corro,

Marcantonio me chiammo.

CECELLA

Da do’ viene?

Che d’è? tu si’ nzorduto, o staje mbreaco?

575

(Mannaggia, e comme fete!)

PAGLIACCIO

So’ ghiuto a la marina

A mmarcà sta valice, ch’è de Luccio. (posa la balice.)

CECELLA

E perché ll’haje tornata?

PAGLIACCIO

Ca la varca è mmarcata, se n’è ghiuta;

580

Ed io facce de perna,

So’ sciuliato dinto a na taverna. (fa no grutto.)

CECELLA

Che te rumpe lo cuollo, ppù che fieto.

PAGLIACCIO

N’è niente, è feccia, è feccia,

Tre carrafe de lagrema, e na feccia.

CECELLA

585

Arrassate da cca, ca tu mme mpieste;

Haje bravo chino a funno.

PAGLIACCIO

Accossì va lo munno, gioja mia. (le dà na botta.)

CECELLA

Malan che ddi te dia, non te staje?

PAGLIACCIO

Magna quanto tu nn’haje, si haje seta, vive,

590

E bide addov’arrive ne Cecella,

Tiene na ziarella?

CECELLA

È voglio, è voglio.

PAGLIACCIO

Perzò lo Casadduoglio m’have ditto,

Ch’è meglio lo zoffritto, che la trippa,

E chi ha sciacquato, vo’ Tabacco mpippa.

CECELLA

595

Ah, a; che rrisa, e comme parla sparo!

Va duorme, ca te passa, mbreacone.

PAGLIACCIO

Signorsì c’haje raggione; io so’ de Trano.

So’ paiesano de Luccio, e tutte duje

Simmo state a Salierno a stodiare;

600

Isso facea lo miedeco, e toccava;

Lo puzo a le ffegliole;

Ed io cacciava mole,

Ca facea lo varviero.

O nzeppava sepposte, o lo crestiero.

CECELLA

605

Chisto proprio è na scena; e mo’ che faje?

PAGLIACCIO

Faccio lo Sagliemmanco, e pe sta sera

Facimmo na Commeddia; a nuje a nuje:

Facimmo chella parte tutte duje.

CECELLA

(Voglio sentì che dice) quale parte?

PAGLIACCIO

610

Tu la vajassa, ed io lo ppane apparte.

CECELLA

Accommenza, st’attiento.

PAGLIACCIO

So’ abbiato,

Tu faje la Sfinfia, ed io lo nnammorato.

CECELLA

Cuccopinto,

PAGLIACCIO

Mu... musso mio d’oro.

CECELLA

Già ntartaglia.

PAGLIACCIO

Na meza, ca moro.

CECELLA

615

Va cedenno.

PAGLIACCIO

Squa... squaglio pe tte.

CECELLA

Oh che ggusto, veditelo te.

PAGLIACCIO

Miette grieco puozz’essere acciso.

CECELLA

Bene mio che spasso, che rriso!

PAGLIACCIO

Uh che caudo è lo mese d’Austo.

CECELLA

620

Mo’ t’agghiusto, t’adacquo si affè.

CECELLA

Chisto già s’è ghiettato, e mo’ dà funno.

Sarvammo sta valice,

Che non fosse arrobbata. (se trase la valice, ed esce co na fonecella, e na mazza.)

Mo’ nce vedimmo.

PAGLIACCIO

Venca la frettata (nsuonno.)

625

Chiano, chiano, che pressa!...

Tu pappate st’allessa... venca vino...

Sto capezzale vale no carrino.

CECELLA

E comme s’è acconciato a gusto mio.

PAGLIACCIO

Uh che sciummo, vi’ che monte,

630

Vi’ Caronte co la scafa;

Na carrafa, na carrafa.

Vive Tonno, e bive tu,

Ca io sparo bù, bù, bù.

CECELLA

Ed io sono tuppe ttu. (lo vatte co na mazza e fuje.)

PAGLIACCIO

635

Ah mamma mia, chi è lloco? chiano chiano;

Addove so’ le mmano? ajuto, ajuto,

Ca m’hanno assassenato, e so’ fferuto. (s’auza pe foire, e trovannose attaccato zompa.)

SCENA URDEMA

FRABBIZIO a lo bbarcone, DIANORA a la fenestra, PIPPO, e CECELLA abbascio.

FRABBIZIO

Chi strilla?

DIANORA

Che remmore?

PIPPO

Che nc’è llocco?

CECELLA

Pagliaccio è mbreacato.

640

Ed io ll’haggio attaccato.

DIANORA

Ah pazza, pazza.

FRABBIZIO

Sciuoglielo Pippo, e saglielo cca ncoppa.

PAGLIACCIO

Cecella, tu che file lino, o stoppa?

PIPPO

Cammina mbreacone.

PAGLIACCIO

E io no mmoglio.

PIPPO

Cammina fuss’acciso.

TUTTI

E voglio, e voglio.

PAGLIACCIO

645

Pe la scesa de Capo de monte

Vidde Zeza, che gliev’abballanno.

CECELLA

Quanno, quanno?

PAGLIACCIO

Jeva abballanno,

E portava li zuoccole a pponte.

PIPPO

Zeza, Zeza?

PAGLIACCIO

A capo de monte;

650

Quatto, sette, tutte, otto,

Miette na meza,

Piglia no gotto.

CECELLA

Oh che spasso!

PAGLIACCIO

Sciacqua Zeza.

CECELLA

Sciacqua tu, ca no nne voglio.

PIPPO

655

Arre ciuccio.

TUTTI

E voglio, e voglio.