Lo sagliemmanco falluto

Lo sagliemmanco falluto, Napoli, s.e., 1724

a cura di Concetta Gallo

paratesto ATTO PRIMO ATTO SECONDO ATTO TERZO Apparato

ATTO II

SCENA PRIMMA

LUCCIO, e DIANORA da la Casa soja.

DIANORA

Giacché nuje non penzanno,

Mo’ nce simmo scopierte pe pariente

Può stare allegramente,

Ca sso negozio tujo sta mmano a mmene

660

De farte nguardiare Tommasina;

Tu tratteme nfratanto comm’a primmo,

Manco dicere ad essa chi nuje simmo.

LUCCIO

E perché?

DIANORA

Chi lo ssape,

Che no ll’esca da vocca, e Nicoletta

665

Co Pippo non facesse quarche mbroglia,

Che nce venesse curto lo jeppone.

LUCCIO

Non dice male, cierto c’haje raggione.

DIANORA

Anze fa n’auta cosa,

Figne co Nicoletta fa l’ammore,

670

Dalle sto pappasale p’addormirla,

Ma non nghì troppo nninto; ca nfratanto

Io tratto co Frabbizio a lo ssegreto;

Faccio no trucco, e mmucco, e t’acquieto.

LUCCIO

Comme te piace.

DIANORA

Aspetta, ca mo’ torno

675

Vogl’ì a piglià la tela

Pe fa quatto lenzola,

Ca ssi settepanelle, e Bettorine

Co ll’ogna de li piede

M’hanno strutto lo cuojero de le spalle.

LUCCIO

680

Va, ca t’aspetto ncoppa.

DIANORA

Eh, siente Luccio

Damme n’uocchio a Cecella,

Ca chessa verrutella

Accommenza a sputà ncopp’a l’ardiche:

E Frabbizio nce nn’hà na bona parte.

LUCCIO

685

Ma tu l’haje post’a fare na brutt’arte

Co farla recetare.

DIANORA

Non di’ niente,

Ca me trovo gabbata, e pe sta vota

Vaga accossì; ma ne la levo priesto

Nnanze che s’abbottasse la Zampogna.

LUCCIO

690

Oh ca lo rrecetare è na gran rogna.

E massem’a la femmena,

Che bo’ esse veduta, e regalata;

Non se ne spesa cchiù, nche nc’è ancappata.

DIANORA

Nnanze la schiatta freve; a sse ppastocchie

695

Cchiù non ce corro, c’haggio apierto ll’uocchie.

Lo munno è troppo tristo;

Mo’ na figliola nasce

Co la semmenta ncuorpo;

E nzino da le ffasce

700

Commenza a fa l’ammore,

Se mpara a guittià.

Sa quanta n’haggio visto

Moccose, e bavoselle

Fare le nzemprecelle;

705

E po tutt’a no cuorpo

havè lo vantecore,

Treppute cammenà.

SCENA II

LUCCIO, NICOLETTA, e TOMMASINA a lo barcone.

LUCCIO

Quanno me lo ccredeva

De trovà na parente tanto stretta?

710

E mpegnarse pe mme?... uh Nicoletta.

Fegnimmo.

NICOLETTA

Addio si Luccio: che bo’ dire?

Non t’haje fatto vedè da stammatina.

LUCCIO

Haggi’avuto, che ffare a la marina.

TOMMASINA

(Nicoletta co Luccio! quanno maje?)

NICOLETTA

715

(Me scopro, o no me scopro?)

LUCCIO

M’havite addimmannato?

Che m’havite da dà quarche commando?

NICOLETTA

A mme commanne? a me? oddio si Luccio,

Sto delleggio de cchiù?

LUCCIO

Io delleggiarve?

NICOLETTA

720

Ma sti commanne mo’ da do’ so’ asciute?

Nce sta chi ve commanna.

LUCCIO

E qual’è chessa?

NICOLETTA

È Tommasina vostra.

LUCCIO

Eh, ca sbagliate,

Chella mo’ se mmarita, e piglia Pippo.

NICOLETTA

Chesto n’è cosa nova; e puro vuje

725

Da tanto tiempo, che le jate appriesso.

LUCCIO

No lo pozzo negà, ca ll’haggio amata,

Ma ll’onna de lo mare haggio zappata.

TOMMASINA

(Ah sgrato, chesto dice?)

NICOLETTA

Uh che boscia!

Chella te vene appriesso,

730

Comme na cacciottella a lo patrone.

LUCCIO

Comme lupo vuoje dire a n’ajeniello.

Orsù parlamme d’auto.

NICOLETTA

Che d’è chesto?

E tu mo’ Tommasina t’haje scordata?

LUCCIO

Scordata no, ma penzo, ch’è na sgrata:

735

E pe scordarme d’essa, nfra di juorne

Io me voglio partire,

Pe no mmederla cchiù, né la sentire.

NICOLETTA

E pe l’ammore sujo tu vuo’ fa chesto?

Io me starria senza farne cunto;

740

E pe farla schiattare,

N’auta, ch’è meglio d’essa, vorria amare.

TOMMASINA

(Fortuna, e c’haggio fatto a chesta cana.)

LUCCIO

Ma ddove trovo ssa figliola lesta,

Pe farme vennetta?

NICOLETTA

745

Non te serve a cercarla; haje Nicoletta.

LUCCIO

Troppo grazia sarria, ma non so’ digno

D’esserve Servetore.

NICOLETTA

Ah Luccio mio,

Non di’ accossì; ca degna non sonch’io.

LUCCIO

Già che buje m’onorate, io mo’ me resto

750

Pe ve servire.

NICOLETTA

O Amore,

E bero chesto?

TOMMASINA

(Ah fauzo tradetore!)

LUCCIO

Comme na palommella

C’attuorno a la cannela

Botanno fa l’ammore,

755

Cossì sto core, o bella,

Attuorno a tte farrà.

E comme na varchetta,

Che corre a rimmo, e a bela

Addo’ lo puorto aspetta,

760

Accossì fa vogl’io

(Ma qua è lo puorto mio,

Amore già lo ssa.)

SCENA III

NICOLETTA, e TOMMASINA, e PIPPO da la casa de Frabbizio.

NICOLETTA

Io sto scetata, o dormo? e sarrà bero

Chesto c’haggio sentuto?

765

Che Luccio s’è pentuto

D’havere amato Tommasina, e bole

Amare a mmene! aibò; sonco parole.

Ma vedo Pippo, e Tommasina nziemo

Va sacce, che sarrà, voglio sentire.

PIPPO

770

Ma Dio te lo pperdona, avisamello,

Ca tu volive coffiare Luccio,

Sentuto non havria tanto martiello.

TOMMASINA

Si non jere nsestuso, lo ddeceva,

Ma perché m’haje nfettato,

775

Co chesta gelosia t’haggio schiattato.

NICOLETTA

(Che sento!)

PIPPO

Manco male.

Ch’è fenuta sta baja; nc’è nient’auto?

Pozzo di’, ca si’ mia?

TOMMASINA

Saraggio toja.

PIPPO

E Luccio?

TOMMASINA

N’auta vota

780

Me nnuommene sto zanno? parla a patremo

Di’; che se sbriga priesto, accossì tune

Scumpe ssa gelosia, io sta schiattiglia

(Aimmè, tu criepe o core,

Ma tanto devo a Luccio tradetore.)

NICOLETTA

785

(Chesta dice addavero,

E Luccio n’hà burlato )

PIPPO

O vita de sto core,

Pocca mme daje nfavore lo decreto,

Te nne vaso sse mmano accossì belle;

790

Mo torno, e parlo a patreto; nfratanto

Penza c’haggio da tene chesta sciorte

D’essere tujo.

TOMMASINA

(E io sonco de la morte.)

PIPPO

Sta speranza, che m’haje data,

Vocca bella, me conzola;

795

Tanto puoje co na parole,

Che mme faje resorzetà.

Era st’arma desperata

Ntra l’ammore, e gelosia:

Mo’, che tu si’ fatta mia,

800

Mbraccia a tte reposarrà.

SCENA IV

TOMMASINA, e NICOLETTA.

TOMMASINA

Luccio tradirme? amare na nnemmica

Pe darme gelosia?

E perché? c’haggio fatto a chillo sgrato?

Ah ca chella trammera l’hà sbotato.

805

Ma videla ddo’ sta pe fa la spia?

Haj’auto cchiù che fare, e che bedere,

Fele de schiavo, lengua de serpente,

Mo’ che le boglie toje già so’ contente?

NICOLETTA

Co chi parle?

TOMMASINA

Co ttico.

NICOLETTA

E comm’haje ditto?

TOMMASINA

810

Ca non te serve a fa cchiù marcancegne;

Mo’ che Luccio, è lo tujo; ma è piso mio

De ntossecarte lo voccone ncanna.

NICOLETTA

Che n’haje mmidia? e tu abbotta.

TOMMASINA

Io mmedia? e de cche ccosa pe no nzanno?

815

Voglio sentire mmidia?

NICOLETTA

È agresta, è agresta.

Decea la vorpa; va ca t’haggio ntesa:

Hagge pacienza, si n’haje fatta presa.

Si’ degna de pietà,

C’haje perzo li designe,

820

Lo suonno, e le ffatiche;

Ma non te desperà.

Ca t’è breogna,

Sta sciorte n’è pe tte;

S’haje sinno, gliutte, e figne,

825

Non ghì cercanno ntriche;

Spassate, ntienn’a mme,

Co na zampogna.

SCENA V

TOMMASINA, e po LUCCIO da la casa de Dianora.

TOMMASINA

Chesto de cchiù, so’ zanniata appriesso;

Fortuna haje cchiù, che ffare

830

Pe farme desperare?

LUCCIO

Tommasina?...

TOMMASINA

Ah fforfante

Ed haje cchiù core de venirme nnante?

LUCCIO

E perché no? che t’haggio fatto?

TOMMASINA

Ah nfame,

Che mm’haje fatto? ed haje facce de lo ddire;

835

E biene pe tornareme a tradire?

Squaglia da nante a mme

Bosciardo ncannatore,

Va fauzo, tradetore

No mme te fa vedè,

840

Ca me spaviente.

LUCCIO

Tu che ddice, che d’haje?

TOMMASINA

Che si’ benuto a fa?

Da me che ccosa vuoje,

Saccio li ncanne tuoje,

845

E tu, m’haje da scontà

Li tradimiente.

SCENA VI

LUCCIO, e po CECELLA a lo barcone.

LUCCIO

Fermate, siente se n’è ghiuta! ah sciorte,

A li dolure mieje st’auta refosa,

Ah sgrata menzognera de sto muodo

850

Tratte chi t’ama, e te donaje lo core?

Io so’ fauzo? io bosciardo? io tradetore?

E azzò non te renfaccia

La leggerezza toja, la nciuria mia,

Vuoje che squaglia da ccane; accossì sia.

855

Ah Cecella, Cece’

CECELLA

Che buo’ si Luccio.

LUCCIO

Nche scenne Marcantonio da Frabbizio,

Fallo trasire lloco; e a mamma toja

Dille, che non se parta quanno vene,

Ca mo’ mmo’ torno.

CECELLA

Sine, nce lo ddico.

LUCCIO

860

Ma statt’attiento a Marcantonio.

CECELLA

Sine,

Mo’ me metto a sedè mmocca la porta,

E bedo quanno scenne,

Ma torna priesto.

LUCCIO

Mo’ mmo’ venco.

CECELLA

Attienne. (se nne trase.)

LUCCIO

E io m’haggio da partire

865

Senza de vennecarme de ssa sgrata?

E senza scannà Pippo? non sia maje;

No starraggio sul’io dint’a i guaje.

Tutto fuoco, venino, e despietto

Sento mpietto

870

Tornarme lo core,

Che bennetta cercanno me sta.

Già la fede, e l’ammore sprezzato

M’have armato

De sdigno, e forore,

875

E me spoglia d’affetto, e piatà.

SCENA VII

FRABBIZIO, e PAGLIACCIO da la casa, e CECELLA abbascio a la porta.

FRABBIZIO

Te si’ scetato, o no?

PAGLIACCO

Me so’ scetato.

FRABBIZIO

Haje digerito bene?

PAGLIACCIO

Porzì ll’ossa,

E starria pe magnà sett’aute vote.

CECELLA

880

(Uh Pagliaccio, e Frabbizio,

Voglio sentì che ddiceno)

FRABBIZIO

Stupisco,

Che un uomo comm’a tte, già miezo medico

Si lasci ubbriacar; non sai che ’l vino

Alla virtù è nemmico: ecco il Petrarco:

885

La cola, il sogno, e l’oziose piumme

Hanno dal mondo ogne bertù sbannita.

No miedeco mbreaco! oh che vergogna!

PAGLIACCIO

(Siente ca mo’ accommenza sta zampogna

Comme mo’ io so’ mmiedeco?

FRABBIZIO

E ne dubbiti?

890

Quid esto medicina?

PAGLIACCIO

È chella che te spila,

Trase da nante, ed esce da dereto,

E move a furia acqua, truone, e fieto.

CECELLA

(Sciù comm’è puorco.)

FRABBIZIO

Io non dico questo.

PAGLIACCIO

Ma che ddice?

FRABBIZIO

Saje tu, ch’è medicare?

PAGLIACCIO

895

Che nne saccio. Po appriesso me lo mpare

Ora vide che buoje.

FRABBIZIO

Vattenne al palco,

Apparecchia la scena, ca mo’ venco

Pe despenzare il balzamo simpatico.

PAGLIACCIO

È priest’ancora.

FRABBIZIO

Oh caspita, non saje

900

Ca s’ha da fare la commeddia doppo?

PAGLIACCIO

Non te nfadà, ca mo’ m’abbio, e galoppo.

CECELLA

Eh Pagliaccio, Pagliaccio?

PAGLIACCIO

Chi me chiamma?

Oh Cecella, che buo’.

CECELLA

M’ha ditto Luccio,

Che non te parte, ch’isso mo’ mmo’ vene.

FRABBIZIO

905

(Oh bene mio Cecella) attienne a ttene. (a Pagliaccio.)

PAGLIACCIO

Saje che bo’?

CECELLA

No lo saccio.

PAGLIACCIO

Mo’ mmo’ torno.

CECELLA

Non te partì, m’hà ditto.

PAGLIACCIO

No mme parto.

FRABBIZIO

E va col tuo malanno.

PAGLIACCIO

E che cos’aje

Co sti malanne nfacce? Mo’ mmo’ vao,

910

Già saccio, che buo’ fa, ma saje si’ Anonamo:

che nc’è a lo Pastor fido?

Non v’è pena maggiore

Ch’in vecchie membra il pizzicor d’ammore.

Dice Ppocrate, e Galeno.

915

Ch’è lo viecchio nnammorato

N’arcabuscio sfoconato,

C’a sparà te vene meno,

Fa na vampa a lo focone,

E po botta maje non fa.

FRABBIZIO

920

Oh che te venga il cancaro, vattenne.

CECELLA

(Che gusto bene mio, comme se mpenne.)

PAGLIACCIO

E lo viecchio na verlica,

Che de viento sta abbottata;

Si no poco s’affatica.

925

Se ne sciulia già lo sciato,

Se scapezza a no pontone,

Tutto nfieto se nne va.

SCENA VIII

FRABBIZIO, e CECELLA.

FRABBIZIO

Ca s’ha rutto lo cuollo, Sia Cecella,

Che fa Dianora?

CECELLA

È sciuta.

FRABBIZIO

(Buono, buono)

930

E Lei che fa?

CECELLA

Me receto la parte.

FRABBIZIO

Bravo, che bella figlia! (vo’ accarezzarla, ed essa s’arrassa.)

CECELLA

Stateve co le mmano, si Frabbizio,

No mmolite lassà proprio sso vizio.

FRABBIZIO

Qua’ vizio? vizio chiami

935

Careggiar le fanciulle?

CECELLA

E ba carreja

O figlieta, o nepoteta; che llotano!

FRABBIZIO

Animuccia mia cara sciroppata

Non te pigliare abbasca, ch’io no ’l faccio

Con pensiero cattivo.

CECELLA

O buono, o tristo,

940

No mmoglio, che mme tuocche

FRABBIZIO

Eh ferma ferma;

Un pulcino a la gola.

CECELLA

Non è niente.

FRABBIZIO

E vuoi farti succhiare quel bel sangue?

CECELLA

Né l’havimmo cacciato.

FRABBIZIO

E in questa parte,

Lascia ch’io te l’acchiappi.

CECELLA

E n’auta vota?

945

Mo’ vedimmo a chest’auta; si’ contento? (co la mano se scerega all’una, e all’auta banna de lo cuollo.)

FRABBIZIO

(La mia minzogna s’è dispersa al vento)

Cicella mia sei troppo carestosa.

E pur sai quanto t’amo, e che ti voglio

Per mia sposa, e signora.

CECELLA

E io t’aggio ditto;

950

Ca no mmoglio marite, e ca non saccio,

Che bo’ dire st’ammore.

FRABBIZIO

O sei marmo, o sei fera, o non hai core.

Ma poscia che no ’l sai, mo’ te lo mparo;

Ascolta il tuo maestro.

CECELLA

Te rengrazio,

955

Non si’ buono a st’afficio, ca si’ biecchio.

FRABBIZIO

Io non so’ vecchio ancora, e se ci fosse,

Sarebbe meggio; e sperienza, ed anni

Sanno insegnar, ed aprono le scole.

CECELLA

Ma dice la commedia,

960

C’Ammore vole fatte, e non parole.

No masto, ch’è mmecchiato,

Non zerve, ch’è ssorduto;

E pende no paputo,

Te fa tremmare sotta,

965

Scagno de te mparà.

Ma quanno è gioveniello,

È bello a lo scolaro,

E cchiù pigliato

A ccaro,

970

E si le dà na botta,

Lo sape po accordà. (se ne fuie a la casa soia.)

SCENA IX

FRABBIZIO, e po DIANORA, e LUCCIO.

FRABBIZIO

Non si’ fojuta? no mme scappe appriesso. (resta penzuso.)

DIANORA

Non t’accidere cchiune, ca mo’ parlo

Co Tommasina, e bedo ch’è sta baja.

LUCCIO

975

Non zerve.

DIANORA

Eh statte zitto uh te lo viecchio,

Annascunnete priesto.

Mo’ parlo a chisto, e scompo po lo riesto. (Luccio se retira.)

FRABBIZIO

È besuogno, che scopra no segreto

Pe quietare la vecchia.

DIANORA

Si Frabbizio?

FRABBIZIO

980

O amabile Dianora a tempo giungi.

DIANORA

Che t’haggio da servì?

FRABBIZIO

Portami in casa

Cicella, c’ora venco all’uscio picciolo,

E la piglio co figliema, e nepotema

Pe fare la Commeddia.

DIANORA

Mo’ la porto.

FRABBIZIO

985

C’hai risolvuto dell’affare nostro!

DIANORA

C’hai resoluto tu de Luccio, e figlieta?

FRABBIZIO

Orvia per terminar codesta briga,

Bisogna, che ti scopra un mio secreto,

Che mai no’l palesò, ne lo direbbe

990

Per quant’oro hà lo munno.

DIANORA

E ba decenno.

FRABBIZIO

Luccio è un uomo di garbo; ed io che ammo

Cchiù de Pippo, hò penzato mmaritarlo

Con mia nipote per unir con esso

Il mio sangue, e ’l casato.

DIANORA

995

E Tommasina non t’è figlia

FRABBIZIO

Un quanco;

Per figlia l’hò allevata.

LUCCIO

(Chest’auto puro?)

DIANORA

A mme co sta zannata

Si Frabi’, si Frabbi’, vi’ ca so’ becchia,

E canosco li pulle a le cauzette;

1000

Tu mo’ dice ssa nnorchia

Pe mme levà de piede.

FRABBIZIO

Si è boscia,

Pozza morì senza Cecella mia.

DIANORA

E a chi è figlia?

FRABBIZIO

Il dirò con miglior aggio.

Chesto te l’haggio ditto,

1005

Pe no ngannare a ttene, e manco a Luccio.

Dincello, e si la vole, nce la donco:

Ma che sappia però che a Nicoletta,

Tutta la robba mia pe ghiusso aspetta.

DIANORA

(C’auta desgrazia è chesta! oh Tommasina

1010

La sciorte te vo’ fa proprio mappina.)

Già che dice accossì, voglio parlare

A Luccio, e po te torno la resposta.

FRABBIZIO

A gusto tuio; ma Luccio no lo veo

Da stammatina? e s’hà da recetare;

1015

Sapisse addove stace?

DIANORA

Mo’ mmo’ vene.

FRABBIZIO

Di’, che benca a trovarme suso il palco

P’allestì la Commeddia.

DIANORA

Te lo manno.

FRABBIZIO

Ma ti sovvenga del mio grave affanno.

Giuro Amore e la mia fede,

1020

Ch’io non so comme so’ bivo;

Il mio petto è fatto un crivo,

E la bella mia Cecella

Con quei rai lo spertuggiò.

DIANORA

Che disgrazia mi contò.

FRABBIZIO

1025

Tante botte ella mi diede;

Che lo sanco n’è sporchiato;

Se lo spirto s’è fermato,

È che Amore dentro il core

Col suo crin ve l’attaccò. (se ne va pe strata.)

DIANORA

1030

E da ciuccio lo trattò.

SCENA X

DIANORA, LUCCIO, e CECELLA abbascio.

DIANORA

Luccio?

LUCCIO

Dianora.

DIANORA

Haje ntiso?

LUCCIO

Che facimmo?

DIANORA

Aspe’, ca mo’ parlammo. (tozzola la porta soja.)

CECELLA

Chi tozzola?

DIANORA

Sonch’io; damme la chiave.

E ba fatte vestì ddo Nicoletta,

1035

Ca s’hà da recetare.

CECELLA

E quanno quanno?

Ca già me pare n’anno,

Che mme faccio vedè ncopp’a le scene.

DIANORA

Va va sciaurata tene.

CECELLA

Né Ma’, me faccio mettere

1040

Duje sciure n’capo, e mpietto?

DIANORA

Comme vuoje.

CECELLA

E no poco de cuoncio?

DIANORA

Ah schefenzosa,

Ancora non si’ nata,

E buo’ j co la vocca nfracetata.

CECELLA

E tu perché lo puorte? e già si becchia.

DIANORA

1045

Ah bipera mmardetta

Passa cca, passa cca.

CECELLA

Aspetta, aspetta. (fuje.)

DIANORA

Luccio, la cosa cchiù nce cresce mmano:

Tommasina n’è cchiù figlia a Frabbizio,

Né sapimmo chi è.

LUCCIO

Sia chi se voglia,

1050

No nne parlammo cchiù, ca no mme serve:

Fraschetta, tradetora.

DIANORA

Adaso, adaso,

Sa che buo’ fa? vattenne a recetare.

Ca mo’ me sto co essa

Pe scoprire paese; e po sta sera

1055

Parlammo cchiù posato.

LUCCIO

Fa che buoje.

Ma no la voglio cchiù, tu già m’haje ntiso.

(E mo’ vogl’j a frosciarne chillo mpiso.) (Dianora va a la casa de Frabbizio.)

SCENA XI

PIPPO, e po PAGLIACCIO da la strata.

PIPPO

E Dianora me jeva attraverzanno

Lo matremmonio mio co Tomasina?

1060

E ba, ca vo’ sta bella; haggio mmentato

Na cosa, co Pagliaccio, che si resce,

St’arpìa vo’ havere gusto.

PAGLIACCIO

O Pippo, cca te trovo justo justo.

PIPPO

Che nnova?

PAGLIACCIO

È lesto tutto.

PIPPO

1065

Aspe’, quanto me piglio la sarrecchia. (trase a la cammera soja, ed esce co la spata.)

PAGLIACCIO

Che mmalora de vecchia,

A fareme attaccà, mente dormeva?

Pe farme sbreognare.

E ba, ca te la voglio conzolare.

PIPPO

1070

Addove si’? lo famolo sta lesto?

PAGLIACCIO

Nce st’aspettanno.

PIPPO

E ghiammo a fa lo riesto.

PAGLIACCIO

Eh siente, lo ssaje buono.

Ca vo’ venì la vecchia stravestuta

A bedè la Commeddia?

PIPPO

Sine, sine

1075

L’ha ditto Nicoletta.

PAGLIACCIO

Su jammoncenne, ca lo viecchio aspetta.

SCENA XII

TOMMASINA, e DIANORA e po CECELLA da lo barcone.

TOMMASINA

Ed io che ne sapeva,

Ca Luccio pasteggiava Nicoletta?

Ll’haggio visto co chella fa l’ammore,

1080

E Me ll’haggio creduto.

DIANORA

Pigliate chesto mo’, che n’è benuto.

Si’ corza a furia contra no nnozente,

Chillo cchiù non te vole, e si tu saje

Arremmedia sti guaje.

TOMMASINA

1085

Ma quanno sentarrà comm’è passato

Lo fatto, cagnarrà de fantasia.

DIANORA

Tu co chello te nn’iesce; e nce sta sotta

No lotano cchiù gruosso; haggio apprettato

Zi Frabbizio mo’ nnante, che te desse

1090

A Luccio pe mogliere.

TOMMASINA

E c’have ditto?

DIANORA

Ca sì, ma vo’ che faccia,

Ca tu no le si’ figlia; e quanto tene

Attocca a Nicoletta.

TOMMASINA

Ah maramene?

Luccio lo ssa? che dice?

DIANORA

Non te vole.

TOMMASINA

1095

Pacienza; non so’ nnata co ssa stella (chiagne.)

Oddio lo core, aimmè...

DIANORA

Uh poverella,

Figlia mia che te siente.

TOMMASINA

Ah ca mo’ moro

DIANORA

Datt’armo, che cos’haje? sto cca pe tene.

TOMMASINA

Ss’ajute tuoie non sonco cchiù pe mmene,

1100

Io me ne more, mamma, nfra di juorne.

E senza vedè Luccio.

DIANORA

Arrasso sia.

TOMMASINA

Dille da parte mia, ca lo rengrazio,

E le cerco perduono de l’arrore,

C’haggio fatto pe amore.

CECELLA

Ah Tommasina

1105

So’ benute le sseggie pe pigliarce,

Sbrigate, saglie, saglie.

DIANORA

Mo’ venimmo

Su jammo, gioja mia.

TOMMASINA

Si mme vuo’ bene

Dille, ca ll’haggio amato, e pure ll’amo,

Si be’ m’accide; e s’isso m’ha lassata,

1110

Sempe soja sarrà sta sbentorata.

Si be’ morta voglio amarlo,

E chest’arma Luccio mio

Co no bello venticiello

Pe trovarlo

1115

Venarrà.

SCENA XIII

Comparza de lo llargo de lo Castiello, co no Teatro mmiezo de Sagliemmanco, no boffettino, e no bauglietto; Sonature che fanno na zenfonia all’uso, a lo suono de la quale s’arrauna lo Puopolo, e po esce Pagliaccio vestuto redicolo, e po Frabbizio.

PAGLIACCIO

Ammore m’ha schiaffata na stoccata,

M’ha fatto no pertuso futo futo

E mamma mia s’è tutta desperata,

Ca lo giojello suio ha già perduto;

1120

E l’hà perduto, e bà,

Che raccia na quarera a Cecca ntroccola.

FRABBIZIO

Bene, bene mi piace; bilordaccio

A questo modo ne?

PAGLIACCIO

Che v’haggio fatto?

FRABBIZIO

In cambio di servir, tu vai cantanno?

PAGLIACCIO

1125

Chest’è ll’utema moda

De li settepanelle,

C’agn’uno vo’ cantà doj’ariettelle.

FRABBIZIO

Sciocco, birbo, poltron, milenzo, infame!

PAGLIACCIO

Ch’è stato si patrone? sto fracasso

1130

Ca canto? e si chiagnesse

Io vorrebbe saper ei che facesse?

FRABBIZIO

Ed osi di parlar? Tu non sapevi,

Ch’oggi deggio servir questi Signori?

PAGLIACCIO

E l’ossoria le sserva, chi ve tene?

FRABBIZIO

1135

Ma tu dovevi prevenirmi in palco,

Per dir, ch’io già mi parto, e vo’ lasciare

A beneficio loro

Il mio ricco tesoro.

PAGLIACCIO

Quà tesoro?

FRABBIZIO

Del balzamo simpatico.

PAGLIACCIO

1140

E mo’ ll’hanno sentuto da uscìa;

Se serva chi nne vo’; chi no se stia.

FRABBIZIO

Incivile, villano a questo modo

Si parla a questa gente nobilissima?

PAGLIACCIO

E comm’haggio da di’?

FRABBIZIO

Taci. Signori

1145

Io non voglio stincar le vostre orecchie.

PAGLIACCIO

Io non voglio stracciar le ppezze vecchie.

FRABBIZIO

Già sapete per prova quante sono

Le virtù del mio balsamo simpatico.

PAGLIACCIO

Le virtù del mio balzamo panzatico.

FRABBIZIO

1150

Quant’infermi hà sanati.

PAGLIACCIO

E quanta n’have accise, e stroppeate.

FRABBIZIO

Si chiama egli simpatico,

Che non solo è antipatico de’ mali,

Ma è tutto simpatia con la salute.

PAGLIACCIO

1155

È tutto ntrepatia co la nfrascata.

FRABBIZIO

Sicché sana l’infermo.

PAGLIACCIO

E ’l sano ammazza,

(Che te venca lo piello.)

FRABBIZIO

E ’l san migliora.

PAGLIACCIO

Te lo manna a mmalora (fuss’acciso.)

FRABBIZIO

Si chiama ancor Simpatico,

1160

Perché nelle sue lettere

Sue virtù si comprendono.

PAGLIACCIO

Se mpenneno.

FRABBIZIO

Scioglie i nervi attratti,

Impingua l’umor secco,

Matura i tumori,

1165

Purga il sangue infetto,

Ajuta a digerire,

Toglie ogni dolore,

Ingagliardisce i sensi,

Cura ogni gran male,

1170

Opra in un istante, e a tutto vale.

PAGLIACCIO

Purifeca, mollifeca,

Annetta, e caccia fora,

E schiatta lo malato nfra mez’ora.

Segnure nobelisseme

1175

Chist’è lo vero bauzamo,

Che n’è fatto de chiacchiere,

C’haggia no bello nomme, e brutte fatte,

Comm’a ciert’aute Sagliemmanche sfatte,

Che te fanno na zorbia, e po la chiammano

1180

Il balsamo del Sole,

L’unguento de li morti, e che sacc’io,

Che non zervono ad auto, ch’a sfrattare

Lo vorzillo, ed a farve vommecare.

FRABBIZIO

Non dir così, Pagliaccio, tutti sono

1185

Corona del mio capo.

PAGLIACCIO

Ne Si Anonemo

Quanto lo binne?

FRABBIZIO

Io non vendo, dono

Per cortesia a ricchi,

Per caritate a poveri.

PAGLIACCIO

Sentite

Si dona il nostro balzamo panzatico

1190

Per cortesia a giuvane,

Pe caretate a becchie.

FRABBIZIO

E acciocché veggiano

La cortesia del servitore Anonimo;

Tieni Pagliaccio.

PAGLIACCIO

Tenco. Fa a la mpressa.

FRABBIZIO

Questo vaso un teston l’hò dato in Roma,

1195

A voi per due carlini; ora che parto,

Per amor, ch’io vi porto.

PAGLIACCIO

A lo vorzillo.

FRABBIZIO

Vi domando un carlino; e sto aspettando

Tre padroni, che facciano favore.

PAGLIACCIO

(A buo’ mmercato penzace) Segnure,

1200

Favorite l’Anonemo, pigliatelo,

Ca da povero giovane ve juro,

Ca ogn’uno, che lo ttene,

Non pò havè maje cchiù bene.

Si Patro’, male signo, chisto bauzamo

1205

No nzerve.

FRABBIZIO

E la ragione?

PAGLIACCIO

Uscia mo’ hà ditto.

Ca scioglie i nervi attratti,

E chisto fa venì lo ranco a tutte.

FRABBIZIO

Eh taci sciocco, chiama Cardellina,

E spassate codesti miei Signori.

PAGLIACCIO

1210

Oh chesta sì è la via,

Che potimm’ajutà la mercanzia?

Cardellina?

SCENA XIV

Cardellina, ch’è CICELLA, e li stisse.

CARDELLINA

Chi chiama?

PAGLIACCIO

Uscite fora.

CARDELLINA

Che vuoi Pagliaccio?

PAGLIACCIO

Hà ditto lo patrone,

Che spasse sti Segnure.

CARDELLINA

E tu?

PAGLIACCIO

Non zervo.

1215

N’hanno sanco co mmico, tu l’haje genio.

CARDELLINA

Ed io non so che far, sono ragazza.

PAGLIACCIO

Sei bona in caggia, e sarrai bona in piazza.

FRABBIZIO

Cardellina?

CARDELLINA

Padrone

FRABBIZIO

Un’arietta

A codesti Signori.

CARDELLINA

Ecco son pronta.

PAGLIACCIO

1220

Su canta, ca te porto la vattuta.

SCENA XV

DIANORA attappata, PIPPO, che le vene a la pedata, e LUCCIO, che bene appriesso a Pippo.

DIANORA

Attiempo attiempo è sciuta;

Voglio sentì che dice sta fraschetta.

PIPPO

(Già la vecchia è arrevata )

LUCCIO

(Vecco Pippo )

PIPPO

(Ah ca ll’haggio annevenata.)

CARDELLINA

1225

Sento dir, che Amor sia bello,

E provarlo anch’io lo vo’;

Già comincia a lusingarmi,

Titillando il cor mi sta.

DIANORA

Ng’ha grazia la moccosa.

CARDELLINA

1230

Mi presenta questo, e quello,

Ed io sciegliere non so;

Ma per dirla, il meglio parmi,

Chi è più ricco, e chi più dà.

PAGLIACCIO

E viva Cardellina.

CARDELLINA

1235

Vivan questi Signori,

Che son tanti cortesi a favorirmi.

DIANORA

(Uh che puozze schiattà, vi comm’è pronta.)

FRABBIZIO

Cardellina?

CARDELLINA

Padron.

FRABBIZIO

Giacché tu sappi,

Che son questi Signor così benigni,

1240

Pregali a favorir anche l’Anonimo.

CARDELLINA

Scusatemi padron, questa giornata

È per me destinata.

PAGLIACCIO

Faccia lei,

Che a smautì vase molt’acconcia sei.

CARDELLINA

Signori nobilissimi

1245

La vostra Cardellina st’attendendo

Il primo, che le mandi il fazzoletto.

PAGLIACCIO

Per haver un simpatico vasetto.

CARDELLINA

Ecco il primo; obligata.

PAGLIACCIO

(Ed è Milordo.)

CARDELLINA

Presto, presto Padron, datemi un vaso.

FRABBIZIO

1250

(Uh decisse addavero ) eccone uno,

E la ricetta ancora; ove si legge

A quanti mali giova, e come s’usa.

CARDELLINA

Prenda Signore.

PAGLIACCIO

Eccone un’altro.

CARDELLINA

1255

Lascia Pagliaccio, che a me viene.

PAGLIACCIO

L’hà menato no viecchio.

CARDELLINA

Io vo’ tutti servir.

PAGLIACCIO

Che bravo stommaco!

O bon’ora, e che chioppeta?

CARDELLINA

Sta fermo.

PAGLIACCIO

Eh ca tu non può tanto, cerc’ajuto;

1260

Io Piglio li denare, lo Si Anonemo

Dace li vase a mmene.

Io po le ddonco a ttene,

Tu po le ghiette a lloro,

E nce mmescammo tutte a sto lavoro.

FRABBIZIO

1265

Cardellina?

CARDELLINA

Padron?

FRABBIZIO

Poc’altri vasi

Vi restano da dar, quanto più presto

Tu sarai favorita.

CARDELLINA

Già v’intendo

Più presto noi faremo la Commedia?

FRABBIZIO

Certo, e sarà?

CARDELLINA

L’AMORE NON GRADITO

PAGLIACCIO

1270

Segnure, ch’aspettate a provedere,

Ca pescraje nce ne jammo, e buje restate,

Arrasso sia, senza sanetate.

DIANORA

Ne voglio accattà uno

Uh guardia, guardia

1275

Piglia sto mariuolo

Lo moccaturo mio, co tre patacche,

E no carrino dinto?

PIPPO

Staje mbreaca?

DIANORA

Tu si’ stato forfante, guardia guardia.

PAGLIACCIO

Che malanne hà ssa vecchia co ssi strille.

PIPPO

1280

Che faccio, c’ha perduto,

E lo bole da me.

PAGLIACCIO

Dalle se’ schiaffe,

E bottannella a cancaro.

PAGLIACCIO

Vattenne,

O te nforro de punia?

DIANORA

Piscia ccane.

Lo sanco mio.

PIPPO

E no mmuo’ j a lo ponte,

1285

O mo’ te donco nfronte? (la votta forte.)

DIANORA

Iostizia, jostizia, ca sto mpiso

M’h’arrobbato, e me perde lo respetto.

LUCCIO

(Mannaggia chesta è zia) non haje creanza (a Pippo.)

A mmaltrattà na femmena schefienze

1290

Tu saje, chi è chessa!

PIPPO

Sia conca se voglia.

Che pretienne si’ guappo?

LUCCIO

Ah birbantiello

Miette mano assa spata (lo puopolo fuje, e Frabbizio, e Pagliaccio zompano nterra a spartì.)

Aiuto, aiuto,

Ca chisse se sbennegnano.

PAGLIACCIO

Si Luccio,

1295

Si Pippo, che ffacite? turzo mmiezo.

LUCCIO

Arrassate da lloco.

PAGLIACCIO

Afferra Pippo.

CARDELLINA

Bene mio, ca mo’ moro.

DIANORA

Aggente aggente.

PAGLIACCIO

No strellà, foss’accisa; ca n’è niente.

SCENA URDEMA

TOMMASINA, e NICOLETTA, ch’esceno da dereto a lo Teatro, e li stisse.

NICOLETTA

Ah Luccio mio che ffaje?

TOMMASINA

Fermate Pippo.

LUCCIO

1300

No mme tenè.

PIPPO

Lassame j bon’ora.

FRABBIZIO

Tienelo Nicoletta.

PAGLIACCIO

No passa Tommasina.

PIPPO - LUCCIO

Te voglio fa provà la trementina. (esce ncoppa a lo Teatro, e dice a Pippo.)

DIANORA

Screstamillo sso forfante.

PAGLIACCIO

1305

Statte zitto fusse mpesa.

DIANORA

Fusse mpiso tu, ed isso.

FRABBIZIO

E scumpitelo st’aggrisso.

NICOLETTA - TOMMASINA

Luccio/Pippo mio sarvate cca.

PIPPO - LUCCIO

E lassateme sfocà.

PIPPO

1310

Va smargiasso.

LUCCIO

Va birbante.

A DUE

La fenimmo chesta mpresa

Quanno tiempo nce sarrà.

DIANORA

Mariuolo, truffajuolo

Io te voglio f’arrotà.

PAGLIACCIO - FRABBIZIO

1315

Lo sempateco panateco

Chesta vota è ghiuto già.