Lo sagliemmanco falluto

Lo sagliemmanco falluto, Napoli, s.e., 1724

a cura di Concetta Gallo

paratesto ATTO PRIMO ATTO SECONDO ATTO TERZO Apparato

ATTO TERZO

SCENA PRIMMA

DIANORA, e FRABBIZIO ncoppa a lo Teatro granne.

DIANORA

No nzerve, che me prieghe, haggio ntostato,

Voglio figliema cca.

FRABBIZIO

Ma tu vorresti

Farmi perder l’onor, che se derria?

1320

L’Anonimo hà promessa la Commeddia,

E adesso non si fa.

DIANORA

Sarrà traggenia.

No birbo havere ardire

De m’arrobbare, e dareme de mano?

Lo voglio fa scannà mmiezo a sto llargo;

1325

No nce sbregammo cchiù? dateme figliema.

FRABBIZIO

Dianora mia, se ti guardia il Cielo,

No cchiù me mpezzenti, c’haggio perduto

Li vasette, e ’l danajo a sto remmore,

Se non fo la Commedia,

1330

Perdarraggio lo creddeto, nesciuno

Accattarrà cchiù balzamo, e de botta

Me vide derropà de capo sotta.

DIANORA

Pe mmo’ vaga accossì, ca po dimano

M’hà da dà sfazione sto sio Pippo.

FRABBIZIO

1335

Farò baciarti i piedi,

Vuo’ cchiù de chesto?

DIANORA

Ne parlammo appriesso;

Voglio peglià conzurda, che nce cape

Facite la Commeddia pe sta sera,

E po nzalute mia non ce penzare

1340

A figliema, c’havesse a rrecetare.

FRABBIZIO

Comme vuoje; ma Dianora me la daje?

DIANORA

Sine, sì.

FRABBIZIO

Marcantonio?

SCENA II

PAGLIACCIO, che caccia la capo da na quinto de lo Teatriello, e li stisse.

PAGLIACCIO

Chi è lloco?

FRABBIZIO

Site leste?

PAGLIACCIO

Comm’a sbirre.

FRABBIZIO

Su cominciate.

PAGLIACCIO

E lei quanno veniate?

FRABBIZIO

1345

Adesso, adesso; jammo sia Dianora

Ca te miette a na quinta, e vedi ll’opra.

DIANORA

Non haggio sto golio.

FRABBIZIO

Viene, c’haje gusto

E bide come io fo l’innammorato.

DIANORA

Jate ca mo’ venimmo.

FRABBIZIO

Co llicenza.

DIANORA

1350

Vada ossoria; vide che pacienza!

M’haggio fatt’accordare, e si so’ n’asena;

Accossì so’ le femmene,

C’hanno lo Core muollo,

No sciato le fa rompere lo cuollo.

1355

Pe sto ddire, sempe sì,

Tutte m’hanno stroppiata,

Zetelluccia, mmaretata,

E mo’ vedola porzi.

M’hanno strutta già la sacca

1360

Mo’ li duone, mo’ li mprieste,

Fa commare, va a le ffeste;

E si n’era masvegliacca

C’auta cosa zitto zi’.

Parte di Commeddia interposta per Episodio.

Persone.

Nicoletta, ch fa Camilla, giovane risoluta

Tommasina, che fa Ginevra, giovane sostenuta

Cecella, che fa Nina, Napolitana, loro serva.

Luccio, che fa Luiggino, giovane affettato.

Pippo, che fa Fonzillo, Squarcione Napolitano

Frabbizio, che fa Quintio, vecchio Romanesco

Pagliaccio, che fa Ceremonia Napolitano creato suo.

La scena si finge in Roma.

SCENA III

Piazza.

Luiggino, e Fonzillo.

LUIGGINO

Questo dirgli volea, ch’io non son cieco,

1365

O losco, che non vegga

Anco il pelo nell’uovo.

FONZILLO

Ed io te schiudo

Quanta pile hà no pollece a le ciglia;

A lo bedè ne simmo? potta d’oje;

Oscia m’ha fatto fa tanto na meoza,

1370

E mo’ viene terato:

Signore Arfonzo io son con lei sdegnato.

LUIGI

(Mo’ lasso la Commedia

E la ffaccio addavero) adagio, adagio,

E senza gridi; io vorrei sapere

1375

Per qual fine mi manca la parola?

FONZILLO

De che ccosa?

LUIGGINO

Non fummo noi d’accordo

Ch’io servissi Camilla, e lei Ginevra?

FONZILLO

E no poco de cchiù.

LUIGGINO

Dunque a che fine

Lei corteggia Camilla?

FONZILLO

Ah si Luise,

1380

Si no mme fusse amico, te darria

Na mentuta, e po appriesso na stoccata

LUIGGINO

Piano con le mentute, e le stoccate,

Che non parli con morti.

FONZILLO

E si me tiente,

Me faje lo spantecato co Ginevra;

1385

E ddice a mme, ca milordejo Cammilla.

LUIGGINO

Jo Genevra?

FONZILLO

Jo Cammilla?

LUIGGINO

E tuo sospetto.

FONZILLO

E toja ssa gelosia.

LUIGINO

Non niego che Ginevra, e m’ama, e prega;

Ma che posso far io più che sprezzarla?

FONZILLO

1390

E ca chella me fruscia li cauzune,

C’haggio da fa? pigliarla a boffettune?

SCENA IV

Nina,e li stisse.

NINA

(E le ttrovo accocchiate tutte duje.)

Si Loise, sio Fonzo, a uno, a uno

Na parola a l’arecchia.

FONZILLO

Dilla forte.

1395

Già sapimmo che d’è.

NINA

Ma le ssegnore

M’hanno ditto a spartato, ed annascuso

Ogn’una la mmasciata; e no mmorria

Pe buje sentì li strille,

Ed havè na terata de Capille.

LUIGGINO

1400

Di’ pur, che no ’l sapranno.

NINA

E io mo’ lo ddico.

A buje ve vo’ la sia Gianevra (a Luiggi.) , e a buje

La sia Gammilla. (a Fonso.)

LUIGGINO

Udisti?

FONZILLO

Oscia lo ssenta?

LUIGGINO

Ma certo non v’andrò

FONZILLO

Manch’io nce vao.

LUIGGINO

O pur se vo, vo per Camilla.

FONZILLO

E io

1405

Vao per Gianevra, ch’è l’affetto mio.

NINA

C’haggio da di’? Sbregateve, ch’è tardo.

FONZILLO

Di’, ca venimmo.

NINA

Eh, no mmenite nziemo,

Perché me sbreognate.

(E che pparo de brave nnammorate.)

LUIGGINO

1410

Chi va prima di noi?

TOMMASINA

Nce vaga oscia,

Ca chiano, chiano me ne venco arreto,

Ma stamm’attiento, non facimmo fieto.

LUIGGINO

Quelle care pupillette,

Che languir fanno il mio core,

1415

Benché armate di rigore,

Lieto corro a vagheggiar.

Tra le fosche nuvolette

Dello sdegno, son due stelle

Minacciose, ma pur belle,

1420

Che mi fanno sospirar.

SCENA V

Camilla, Ginevra.

camera.

GINEVRA

Vorrei, che m’intendessi.

CAMILLA

Ed io vorrei

Che tu m’havessi intesa.

GINEVRA

È tua vergogna,

Ch’io sorella minore t’abbia a dire,

Che vivi troppo libera, e sfacciata!

CAMILLA

1425

Tu meriti in risposta una guanciata.

Non te la dò per non turbar la casa,

E nostra madre inferma.

GINEVRA

Ed io, Camilla,

Hò pur le mani, ma lasciam le risse.

Dimmi un po’; sta ben fatto a noi zitelle

1430

E senz’uomini in casa ad introdurre

Giovani a conversarvi.

CAMILLA

O Monna onesta,

E che ruina è questa?

L’usanza del Paese ce ’l permette,

Ogn’un sa chi siam noi, non ci conviene

1435

A chi ci favorisce usar mal viso;

E poi si sa da tutti, che zitella

Mai non trova marito, s’ella pria

Con qualche amore non si fa la via.

GINEVRA

Va bene, ma s’intende

1440

Pioggia, non già diluvio.

SCENA VI

Nina, e detti.

NINA

Eccove cca le spincole, signora.

CAMILLA

Ove sono? (hai veduto Alfonso mio?)

NINA

(Gnorsì mo vene)

GINEVRA

M’hai recato gli aghi?

NINA

Eccole ccane.

GINEVRA

(Hai visto Luiggino?)

NINA

1445

(Ll’haggio visto, e mo’ vene.)

CAMILLA

Eh Nina, Nina

Queste spille son picciole di capo,

Va le cambia (trattienti su la strada,

E fammi cenno all’or che viene Alfonso.)

GINEVRA

Nina?

NINA

Signora?

GINEVRA

Vedi tu quest’aghi

1450

Sono spuntiti, cambiali (se incontri

Il mio Luiggi, digli che non venga.)

Nina

(Mo vao) Segnore meje

Chisto è no mpazzemiento

Co st’aco, e co ste spincole mmardette,

1455

Mo’ ca la capo è grossa, mo’ ch’è piccola,

Mo’ ch’è troppo appontuta, e mo’ è spontuta;

No ve cojetate maje; e cheste ccose

Chi le bo’; se le sceglia, p’have gusto,

Ca si no lo servizio maje va justo.

1460

Devrissero penzare,

Ca sonco grannecella;

Lo ffarme j a comprare

Cchiù de na scarolella

Spisso me fa sentire,

1465

Ed io non pozzo cchiù.

Sto prattecà Romano

N’è buono a chi va sola;

Ca stenneno le mmano,

Ed hanno na parola,

1470

Che no la pozzo dire.

Uh comm’è brutta, sciù.

GINEVRA

Camilla, io te ne priego per tuo bene,

E per mia pace ancor statti su ’l sodo,

Lascia andar quest’Alfonso.

CAMILLA

Ed io ti priego

1475

Per tuo vantaggio, e per quiete mia,

Non far la bacchettona; lascia andare

Cotesto Damerino, e ti contento.

GINEVRA

(Ah Luccio mio) noi parliamo al vento.

CAMILLA

Chi tenta impedirmi,

1480

Ch’io siegua il mio bene,

Il vento in catene

Si crede arrestar.

Non voglio pentirmi

D’amar quello ingrato,

1485

Non sempre ostinato

M’havrà da sprezar.

SCENA VII

Ginevra sola.

GINEVRA

Noi che faremo, o core? io già non posso

Disamar quell’ingrato,

Né più tener celato il mio bel foco;

1490

Ah che non v’è più foco

A silenzio, a difesa,

Mi scopre il volto, ed è quest’alma accesa.

Dal suo fonte chiaro, e bello

Sorge l’acqua appoco appoco,

1495

E formato un fiumicello

Mormorando corre al mar.

Così cresce in me l’affetto

Che ristretto in breve loco

Dispettoso il cor mi sforza,

1500

E lo forza a sospirar.

SCENA VIII

Quinzio vestito scioccamente alla Romana, e Cerimonia.

QUINZIO

Non me sta roppe il capo, signor coso,

Son tante quelle: sai li sganassoni?

CERIMONIA

Non m’hà ditto ossoria, ca vo’ lo Donne?

E pe chesso ve chiammo si Don Quinzio.

QUINZIO

1505

E adesso più no ’l voglio, oh questa è bella!

Son tanti Donni, e Donne, che mo’ vanno

Sette a quattrino come caldearroste.

CERIMONIA

E comm’haggio da di’?

QUINZIO

Va via, Pistone

Se tu havessi giudizio, lo diresti

1510

Senza fammelo di’.

CERIMONIA

Che sonco astrolaco?

QUINZIO

E tu va in ghetto, e fattici, Barone.

CERIMONIA

(O bene mio, e comm’è preziuso!)

QUINZIO

Ti chiami Cerimonia, e poi non tieni

Un tantin di creanza.

CERIMONIA

1515

Comm’a dicere?

QUINZIO

Io prendo moglie.

QUINZIO

E voglio l’Illustrissimo.

CERIMONIA

Sta lesto,

(Chisto cca va na doppia la fella.)

QUINZIO

Embe’, m’hai nteso?

CERIMONIA

Signorsì llostrissemo

E giacch’oscia llostrissemo s’accasa

QUINZIO

1520

Prendo moglie, e non casa, moglie, moglie.

CERIMONIA

(Maglio, maglio,) chi ve pegliate?

QUINZIO

Io n’hò tre per le mani.

CERIMONIA

(Rrobba a grassa.)

QUINZIO

Hò Camilla, Ginevra, ed hò Ninuccia,

1525

Che per me fan le smorfie.

CERIMONIA

(O viecchio pazzo.)

CERIMONIA

E si è chesto llostrissemo, pe mmene

Facite sta Nenuccia; è creatella,

Ne mme pò di’ fatte nnillà tiella.

QUINZIO

Voglio farti il servizio; andiamo intanto

1530

A visitar le spose.

CERIMONIA

Sì llostrissemo.

QUINZIO

E tu portati ben.

CERIMONIA

Gnorsì llostrissemo.

QUINZIO

Dimmi le cerimonie.

CERIMONIA

Sì llostrissemo.

QUINZIO

Che poi

CERIMONIA

Gnorsì llostrissemo.

QUINZIO

(In malora)

Che tanta illustreria?

CERIMONIA

1535

Lo ffaccio, pe servì llossegnoria.

QUINZIO

Ma tu m’hai rotto il capo; a loco, e tempo;

Poter del Cielo.

CERIMONIA

Uscia non ve nfadate,

Quanno nce vole, e buje me l’azzennate.

QUINZIO

Così farò; tu viemmi dietro.

CERIMONIA

Venco.

QUINZIO

1540

Eh dimmi? Sono io bello sto appuntino?

CERIMONIA

Uscia pare no zito a no carrino.

QUINZIO

Oh che nuova bella bella! (salta d’allegrezza.)

Io son bello, non è vero?

Se tu fossi una zitella,

1545

mi vorresti sì o, no? (cenna sì, e no col capo.)

CERIMONIA

(O cionchia, e scumpe mo’.)

QUINZIO

Fammi un po’ la Signorina,

Ch’io vo’ fare il Cavaliero;

Dammi qua la tua manina. (le prende per mano ballano.)

1550

Balla meco, bella, balla.

O che gusto! Oh o hò.

CERIMONIA

(O che lloco! Sciò, sciò, sciò.)

SCENA IX

Camera.

Luiggino, e Camilla, e poi Ginevra e Fonzillo.

LUIGGINO

Ma pur dovresti renderti una volta

Rocca, scoglio di gelo a miei sospiri.

CAMILLA

1555

Altro sole mi scalda, habbiti pace.

LUIGGINO

O fera, o mostro, o furia, o sasso.

CAMILLA

E quando

Finisci d’annojarmi, affettatuzzo?

Da me che speri? non mi dar più pene;

Ama Ginevra tua, ecco che viene.

GINEVRA

1560

Signor Luiggi serva vostra.

LUIGGINO

(O sorte,

Fugge la vita mia, viene la morte.)

CAMILLA

Ginevra, sta sul sodo, ecco il tuo amante.

GINEVRA

Camilla tu sei troppo ingiuriosa;

Io non amo, e se amo, amo chi è degno.

CAMILLA

1565

E chi è degno ancor io d’amar m’impegno.

GINEVRA

Accoglilo che viene.

FONZILLO

Schiavo vuosto, Segnore meje.

CAMILLA

Ben venca,

Signor Alfonzo,

GINEVRA

Serva sua.

FONZILLO

(Che grazia

De miedeco sarvateco!) Segnora

1570

Che ng’havite commico?

GINEVRA

Ecco Camilla

Parlate a lei.

FONZILLO

Io parlo all’ossoria,

Oh chesta sì, ch’è bella.

GINEVRA

Sig. Luiggi

LUIGGINO

Oddio, Ginevra lasciami.

Un tempo mi sprezzasti, or che pretendi?

1575

Camilla mia

CAMILLA

O caro Alfonzo.

FONZILLO

E bia

Si’ zetella, e n’haje scuorno? Sia Genevra

GINEVRA

Mi sai del Galantuomo, e sei villano.

FONZILLO

O bon’ora tu mm’jesce da le mmano!

Che simmo quarche birbo? o so’ scompute

1580

Le ffemmene a lo munno? nn’haggio tanta

Sott’a sti piede, e oscia me fa la guappa?

GINEVRA

Eh vattenne in mal punto.

FONZILLO

(Tommasina)

Vi’ ca parlo ncommeddia (e giacché ch’è chesto,

Segna sta caccia, e ghioca pe lo riesto.

1585

Co sso sfarzo sgraziato

M’haje pigliato mo’ de filo;

Ma non saje, ca no pilo

Non te stimmo, manco a tte (a Camilla.)

(Vi’ che bo’ chesta da me?) (a Ginevra.)

1590

Haje da chiagnere, e sperire

Pe mme dire na parola

No mme faje cchiù cannavola,

Te castico pe ssi affè:

(Manco tu la scumpe ne?)

LUIGGINO

1595

(Che arrogante incivile!)

CAMILLA

Che creanza

A far partir così quel galant’uomo?

GINEVRA

Meglio sarebbe, e non tornasse mai.

CAMILLA

Ma questo non vedrai.

SCENA X

Nina, poi Quintio, Cerimonia, e detti.

NINA

Segnore lo Si Quintio sta cca fora

CAMILLA

1600

Ch’entri.

GINEVRA

(Quest’altra noja.)

LUIGGINO

Oh ch’altro intoppo!

GINEVRA

Odi Luigi

LUIGGINO

M’importuni troppo.

QUINTIO

Signore spose

(Dico ben Cerimonia?)

CERIMONIA

Signorsine.

CAMILLA

Ben venca signor Quintio.

QUINTIO

Adesso, adesso

1605

Che imparo di creanza il servitore.

(L’illustrissimo bestia?)

CERIMONIA

Zennate

C’accossì sta lo patto.

QUINTIO

Embe’ Signore,

State bene?

GINEVRA - CAMILLA

A servirla.

QUINTIO

Cerimonia?

CERIMONIA

Llostrissemo.

QUINTIO

To prendi. (si leva il ferrajolo, e ’l cappello e gli dà a Cerimonia.)

CERIMONIA

Che facite?

1610

Chessa è mala creanza.

QUINTIO

Se non taci,

Io t’increanzo bene. Oh Sior Luiggi,

Voi qui siete! buongiorno.

LUIGGINO

Servitore.

GINEVRA

Che sciocco!

CAMILLA

Che ridicolo?

LUIGGINO

Che scemo.

QUINTIO

E così, mio Signore Cerimonia?

CERIMONIA

1615

Che bolite

QUINTIO

Il malanno, (l’Illustrissimo.)

CERIMONIA

L’ossoria n’ha zennato.

QUINTIO

E ch’hò da fare

L’occhietto con te bestia?

CERIMONIA

E uscia se stia.

QUINTIO

Io m’hò fatta la barba sta matina

E voi vi siete concie non è vero?

CERIMONIA

1620

Llostrissemo gnorsì.

QUINTIO

Chi t’ha chiamato?

CERIMONIA

Havarraggio sgarrato (mo t’agghiusto.)

QUINTIO

Signor Luiggi, e voi?

CERIMONIA

Gnorno Llostrissemo.

QUINTIO

Tu starai ubbriaco.

CERIMONIA

Manco mone?

È suonno, è suonno.

CAMILLA

Questa è una Commedia.

QUINTIO

1625

Mia Signora Ginevra inginevrata.

Voi state troppo bella eh Cerimonia.

Cerimo’... Cerimonia, Diavolo.

CERIMONIA

Llostrissemo Llostrissemo, dormeva.

QUINTIO

Ah sgazzerato, vo’ ammazzarti.

CERIMONIA

Scappa.

QUINTIO

1630

Ah mariolo tornami la Cappa.

CAMILLA

Ah a che baja!

LUIGGINO

Ve ch’uom.

GINEVRA

Che matto!

LUIGGINO

Signore io parto.

CAMILLA

Vada pur

GINEVRA

Crudele.

Così tratti chi t’ama, & è fedele?

GINEVRA

Caro tiranno mio. (a Luigi, e questo dice a Camilla.)

LUIGGINO

1635

Bella nemica mia.

CAMILLA

Non più che sei nojoso.

GINEVRA - LUIGGINO

Volgiti almeno oddio.

CAMILLA

Eh lasciami in riposo.

LUIGGINO

(Squaglia da nante a mme.)

CAMILLA - GINEVRA

1640

(Non v’è pietà per me.)

GINEVRA - LUIGGINO

Dimmi se vuoi, ch’io mora.

CAMILLA

Vivi ma non per me.

GINEVRA

(Ah Luccio.)

LUIGGINO

(Sfratta, abbia.)

GINEVRA

Così con chi t’adora?

CAMILLA

1645

(Comme lo schiude te.)

LUIGGINO

(Non sono cchiù pe tte.)

GINEVRA

(Ed io moro pe tte.)

SCENA XI

Cerimonia col ferrajolo di Quintio ridendo, e Nina, e poi Quintio.

NINA

Chesto che d’è? tu ride! si mpazzuto?

CERIMONIA

Bene mio so’ scosuto, lo sio Quintio

1650

Per bolè secotareme, hà vrociolato

Tutte le grada, ed io sonco sfelato.

NINA

E ba’ l’ajuta.

CERIMONIA

Non è muorto ciesso?

Haggio sta sciorte mo’ de sta co ttico,

Quanno la trovo cchiù? giojello mio,

1655

Dellietto de sto core,

Schiecco, perna d’Ammore, e quanno quanno

Me faje gaudere?

NINA

Zitto varvajanno

Ca tu me faje morire;

Da che te saccio auto non saje dire.

1660

Giojello, delietto,

Perna d’ammore,

Schiecco sbrannore

Famme godere, e cucurucù.

CERIMONIA

Comme? non dico buono? io parlo a rrima,

1665

E me ll’haggio mparato a lo Cortese,

Ch’è lo meglio Poeta a lo paese.

NINA

E chisto è muorto, o vivo?

CERIMONIA

È muorto.

NINA

O smocco,

De sta manera parla co li muorte;

Quanno parle a li vive

1670

Chiacchiarea, comme parlano li vive.

CERIMONIA

Ma tu non haje lejuto...

NINA

Che llejuto, e chitarra vaje cercanno?

Si pproprio lazzarone,

Mparate a ddi’ carcata cosa, anchione.

CERIMONIA

1675

C’haggio da j a la scola? n’e cchiù tiempo.

NINA

E si non saje parlare, va te stipa

Calascione scassato, vozzacchione.

CERIMONIA

Nina ch’è chesso? no mme vuo’ cchiù bene?

CERIMONIA

Te voglio bene sì, ma parla all’uso,

1680

Ca venire me faje proprio lo vuommeco.

CERIMONIA

Me nce voglio nzajà, vi dico buono,

E si ncarro, t’accatto lo perduono.

Porchiacchella tennerella

Vide cca sto cetrolillo,

1685

Sa che bella nzalatella

Tutte duje volimmo fa?

Si lo guattaro d’Ammore

Nce mett’uoglio, e l’acetillo,

Uh che gusto, uh che sapore

1690

Nce vo’ esse a lo mmagnà.

QUINTIO

Ferma qui mariolo,

Dammi, dammi barone il ferrajolo.

Qui finisce la Commedia interposta.

SCENA XII

DIANORA da dentro, e poi fuora, e li stisse.

DIANORA

Ajuto, ajuto, oh povera fegliola.

FRABBIZIO

Ch’è socciesso?

PAGLIACCIO

Che ssaccio?

CECELLA

Che d’è mamma?

DIANORA

1695

Bene mio, ca mo’ more, addove site?

Luccio, Pippo, Frabbizio, priesto priesto.

SCENA XIII

LUCCIO, PIPPO, e li stisse.

LUCCIO

Che d’è Dianora?

PIPPO

Perché strille?

DIANORA

Ajuto

Mo’ more Tommasina

PIPPO

Ah sciorte cana.

DIANORA

Addo’ vaje tu n’auto, viene ccane

1700

Ca n’è cosa pe ttene, trase Nina,

Ajuta Nicoletta, che la sponta,

Ca mo’ venco.

CECELLA

Mo’ corro, uh poverella.

DIANORA

Zompa Pippo, va piglia

Ll’acqua della Regina,

1705

Per ll’ontà nfronte, e metterla a lo naso.

PIPPO

Maro me, ca sconocchio, o Cielo, o Ammore,

No mme date sto guajo, e sto dolore.

PAGLIACCIO

Pigliate il nostro Balsamo panzatico,

DIANORA

E ba a la forca, mo’ si’ proprio nzateco.

LUCCIO

1710

Ch’è stato?

FRABBIZIO

Che cos’have?

DIANORA

La scuressa

Mo’ c’hà fatto la scena ed è trasuta,

S’è post’a chiagne comm’a desperata,

(Pe chello che l’haje ditto.) (a la reccchia de Luccio.)

Po s’è ghiettata ncoppa de na seggia,

1715

Meza morta, stonata, addebboruta,

E na simpeca vace, e n’auta vene,

Chi sa si more (e morarrà pe ttene.) (A Luccio.)

LUCCIO

(Cielo che sento!)

FRABBIZIO

Oh figlia mia, va trase

E bide comme sta.

DIANORA

Viene si Luccio,

1720

Vide si tene freve, ca nne saje.

LUCCIO

Va si Frabbizio.

DIANORA

Viene tu mannaggia.

FRABBIZIO

Va Luccio.

LUCCIO

Vada Oscia.

PAGLIACCIO

E mbe’ ch’è chesto?

A zeremonia stammo?

Va la tasta.

1725

Ca si no la tasto io.

LUCCIO

Aimmè Luccio, che bide

Tu Vaje a mmedecare chi t’accide.

SCENA XIV

PAGLIACCIO, e FRABBIZIO.

PAGLIACCIO

Nzomma chesta Commeddia è sfortunata,

È morta cessa primmo d’esse nata.

FRABBIZIO

1730

Signori compatite la disgrazia,

Io v’aspetto domani, che vedrete

Non solo la Commeddia, ma più balli

Pagliaccio su la corda; chi lo ccrede?

PAGLIACCIO

E l’Anonemo mpiso pe lo pede.

SCENA XV

DIANORA, e detti.

DIANORA

1735

Marcanto’ collecienza, si Frabizio

Na parola.

FRABBIZIO

Che nc’è?

DIANORA

Dimme lo vero.

Tommasina t’è figlia?

FRABBIZIO

No mm’è figlia.

DIANORA

E tu comme la tiene?

FRABBIZIO

La trovaje

Tantillo, ch’era sperza, e ghiea chiagnenno.

DIANORA

1740

Addo’?

FRABBIZIO

Dint’a la folla del mercato

La sera de li fuoche... che cos’haje?

Tu te faje rossa?

DIANORA

Niente; da quant’have?

FRABBIZIO

So’ tridec’Anne.

DIANORA

E comme jea vestuta?

FRABBIZIO

1745

Co no rocchetto bianco, e no corpetto

D’armesino ncarnato, e haveva ncanna

St’ogna de la gran bestia ncrastata.

DIANORA

Ah Cielo te rengrazio,

C’haggio trovata figliema perduta.

FRABBIZIO

1750

Figlieta!, e comme?

DIANORA

Si, è Tenzella mia,

Che tanno la perdette.

PAGLIACCIO

(Chesta è pazza,

Quanta geste che fa.)

DIANORA

E mo’ spontannola

Ll’haggio vista da sotta a chella zizza

No golio de ceraso, che teneva;

1755

O figlia bella mia preziosa.

Si no mmoro de gusto, e na gran cosa.

SCENA XVI

FRABBIZIO, PAGLIACCIO, e PIPPO co na Carrafella.

PAGLIACCIO

Chesta che d’hà, che ddice, è speretata?

FRABBIZIO

O Marcantonio mio, so’ arrojenato.

PIPPO

Vecco cca ll’acqua vita comme stace?

FRABBIZIO

1760

Io credo, ca non serve, è revenuta,

ma nce so’ guaje a tommola pe nnuje.

PIPPO

Nce so’ guaje, e perché?

FRABBIZIO

Damme sta mano

Ajutam’a calà.

PIPPO

Scinne.

PAGLIACCIO

Va chiano.

PIPPO

Ch’è stato?

FRABBIZIO

O Pippo mio, Tommasina

1765

Mo’ s’è scoperta figlia de Dianora.

PIPPO

Comme? Non t’era figlia?

FRABBIZIO

None, none.

PIPPO

Che sento!

PAGLIACCIO

E ment’è chesto,

Può Zocà quanno vuoje franfellicche,

Ca mo’ Dianora la mmarita a Luccio.

PAGLIACCIO

1770

Aimmè che sento! o ammore, o negra sciorte

Accossì mme serrate vuje le pporte.

Da qua’ cimma de Montagna

Scenne st’ombra nera nera

A scurare la Campagna!

1775

Ddo’ nce pascola na fera,

Che mm’accide, e me devora,

E sta sempe mpietto a me?

Sto sceruppo che mm’haie dato (a Frabbizio.)

Lo cerviello mm’ha levato.

1780

No nce vedo, no nce sento

Addo’ stonco? Lo trommiento

Mme spaventa, m’addolora

E non moro. Oddio pecché?

FRABBIZIO

Chesto n’è tanto guajo, te dò nepotema;

1785

Io me gratto la Zella,

Ca mo’ Dianora no mme da Cecella.

PAGLIACCIO

E miettece la ionta, pierde cheste,

A mme fa cunto già ca m’haje perduto,

O si Anonemo mio già si’ falluto.

SCENA Urdema

TOMMASINA appojata e LUCCIO, DIANORA, NICOLETTA, CECELLA che da dereto a lo Teatro picciolo esceno a li granne, e li stisse.

DIANORA

1790

Iammoncenne a la Casa figlia bella,

E statte allegramente.

TOMMASINA

Ah mamma mia,

Sta nova, che me daje, ca te so’ figlia,

Ca non sonca cchiù straccio de la sciorte,

Levà me pò da mano de la morte.

DIANORA

1795

E mo’ te voglio dare n’auta nova;

E sentiteme tutte; io te mmarito

Co Luccio tujo, che m’è pronepote.

FRABBIZIO

Chest’auto puro!

PIPPO

(Seppe mo’ so’ ghiuto.)

PAGLIACCIO

Comme t’è pronepote? Si è de Trane.

DIANORA

1800

So’ de Trane, e a la Casa po contammo

Comme vanno ste ccose; Iammoncenne.

FRABBIZIO

Dianora me n’allegro.

NICOLETTA

Ah sciorte sgrata.

FRABBIZIO

Non sospirà, ca t’haggio mmaretata.

Dianora, tu mo’ vide, ca Frabbizio

1805

T’ha cresciuta na figlia vertovosa.

DIANORA

Te ne rengrazio, e appriesso

Vedarraje che facc’io.

FRABBIZIO

Damme Cecella.

CECELLA

Vide che golio!

Zi Frabi’ si’ mpazzuto? Co chi ll’haje?

PAGLIACCIO

1810

Comme accossì te staje?

Va vide a la rezzetta, si lo bauzomo

Te potesse levare cinquant’anne,

Ca faje sso matremmonio.

FRABBIZIO

E ba a malanne.

DIANORA

Jammoncenne ch’è notte.

LUCCIO

Jammo core.

TOMMASINA

1815

Venco speranza mia.

FRABBIZIO

Pippo tu piglia

Nicoletta pe mmano ch’è la toja.

PAGLIACCIO

Tu damme ssa manella.

Ca faccio lo vracciero.

CECELLA

Teccotella:

Ma vi’, non telleccare

1820

Ca te dò na mmoccata.

PAGLIACCIO

Chesto saje? e tu si’ ammatrecolata.

LUCCIO - TOMMASINA

Da po tanta travaglie, e tormiente,

Si’ la mia bellezza de st’arma.

NICOLETTA - PIPPO

E la sciorte ng’accocchia a nuje puro.

A QUATTRO

1825

Chi sta ncielo lo ssa, che se fa?

FRABBIZIO

Vuie scialate, ed io resto a l’ascuro.

DIANORA

Si Frabizio, che d’haje? non è niente.

PAGLIACCIO

La mogliere tu saje, ch’è na Sarma.

DIANORA - PAGLIACCIO - CECELLA

Né lo viecchio la pote portà.