Ll'alloggiamentare

Ll'alloggiamentare, Napoli, Mechele Loise Muzio, 1710

a cura di Stefania Napolitano

paratesto ATTO PRIMO ATTO SECONDO ATTO TERZO Apparato

ATTO I

SCENA PRIMMA

LELLA, e po QUEQUERA.

LELLA

Bene mio, bone aggente ajuto, ajuto

Sto forfante afferrate,

Ch’ha robbato sta notte a la Patrona,

Chi sa addo sarrà ghiuto;

Bene mio, bone aggente ajuto, ajuto.

QUEQUERA

Che cos’è sto fracasso.

LELLA

Sio Capetanio mio a tiempo a tiempo.

QUEQUERA

Dimme priesto ch’è stato? parla.

LELLA

No zierto sbruffa allesse,

Vestuto Cappanera co la posema,

Ch’a chisto alloggiamiento

Hà dormuto sta notte n’ha robbato

Quatto lenzola nette;

Mm’ha scassata la cascia,

S’ha pigliato li mobbele, ch’aveva,

Porzì tre cammeselle, e duje toccate,

Zitto, zitto, da po se nn’è fojuto;

Bene mio, bone aggente ajuto ajuto! (chiagne.)

Uh Lella negrecata!

Uh sbentorata te!

Scippate tutta sì!

Già songo sconquassata!

Uh jancheata me!

Mme manca de morì!

QUEQUERA

Potta d’aguanno! Zierto.

Lella sta cosa toja,

Lo core già mme face ntennerì.

Uh Lella negrecata!

Uh sbentorata te!

Scippate tutta sì.

QUEQUERA

Lassa, lassa sto trivolo, che d’aje.

Ca te scippe che faje!

Agge jodizio Lella,

Ca si’ becchia, e mo’ faje da peccerella:

Cojetate, ca voglio

Mo’ fa fa dellegenzia,

Darne parte a qua Iodece;

E si ll’ascio sto guitto, si lo trovo

Te voglio fa vedè no mumnno nuovo.

Si be’ stesse sotta terra,

Sto forfante

Si l’ancappo,

Te l’ammacco,

Te lo spacco

Co sta sferra,

Vederraje, che saccio fa;

E si l’ascio, saje che faccio?

Te l’adaccio,

E de scoppole,

E de chiechere,

E de cauce,

E de punia

Mme nne voglio sazià. (parte.)

LELLA

Viva isso, e quatt’aute!

Che bello spacca, e pesa!

Mo’ sì ch’aggio trovato

Le robbe meje! mo’ sì lo marejuolo

Già mpiso affè sarrà pe tutta craje.

SCENA II

MILLA, e LELLA.

MILLA

Lella, Lella, addo’ staje?

LELLA

Sto cca miezo che d’è?

MILLA

Dimme, va buono!

Dimme accossì se fa l’Alloggiamiento?

Se guardano accossì le robbe meje?

Haje raquoto li liette de sta notte?

LELLA

Ncoppa so’ li denare.

MILLA

E le lenzola?

LELLA

No ll’ha robbate, chillo?

MILLA

Chi ll’ha robbate chi?

LELLA

Chillo Sio posema.

MILLA

Non saccio tanta chellete,

Tu mme le paghe.

LELLA

A mme?

MILLA

A tte, che buo’ campà lo nnammorato

Ncoppa a le robbe meje.

LELLA

E mo’ chi t’ha robbato?

MILLA

Tu no lo saje?

LELLA

A mme?

MILLA

A tte, che si’ na vecchia nzallanuta,

Pe no Viecchio speruta,

Senza mette jodizio

Ca perderraje lo pilo, e po lo vizio.

Che faje cchiù mo’ cca bascio?

Scria priesto, e ba ncoppa

Va arresidia li liette, e pe tutt’oje,

Fa che mme faje tornare le Lenzola.

LELLA

Che pacienza tieme’?

MILLA

Che d’è mme vuo’ vedè?

O fuorze n’è lo vero!

O fuorze tu non saje,

La robba che mme scrie,

E quanto faje

LELLA

A mme!

MILLA

A tte, lo buo’ negare?

LELLA

E n’auta vota mo’?

MILLA

Quanta loquera?

LELLA

Ora via su fenimmola

MILLA

Ch’è stato?

LELLA

Mme nne voglio ì mo’ propio.

MILLA

Priesto, priesto mo’ scria. (la votta.)

LELLA

Vascia, vascia sse mano, agge creanza.

MILLA

Vuo’ te schiaffa no cauce a la panza?

MILLA

Nzallanuta presentosa.

LELLA

Schefenzosa mmoccosella

Crepa, crepa, schiatta cca.

MILLA

Priesto, priesto scria da cca.

Tu vuo’ propio Vecchia pazza,

Che te piglia con a mazza,

100

E te manna a quarerà.

LELLA

Vuo’, che t’auza sta gonella,

T’arrefila cca na ntosa,

E te mmezza de parlà.

SCENA III

ZEZA da lo barcone, e MILLA.

ZEZA

Milla, Milla

MILLA

Che buo’?

ZEZA

105

Ch’è stato sto contrasto?

MILLA

Ll’aggio avuto co Lella.

ZEZA

Agge pacienza è becchia.

MILLA

So’ arrobbata, e non pozzo

Dicere manco te lo fatto mio.

ZEZA

110

Dimme prita de Milla,

È asciuto Liso?

MILLA

È asciuto.

ZEZA

Da quant’ha?

MILLA

Poco nnante:

Zeza mo’ mo’ parlammo

Voglio saglì nfi’ ncoppa,

115

Chi sa che fuorze Lella

S’arresidia quarcosa, e se lo stipa.

ZEZA

Siente

MILLA

Che buo’?

ZEZA

Quanno po torna, dille

Qua’ parola pe mme.

MILLA

Tu già lo ssaje, ch’io no nce ncrino a niente;

120

Lo core mio è Ciommo,

Orzù Zeza bondì.

ZEZA

Bonnì te venga:

Puozze sbattere sempe comm’a tenga.

Tu nce curpe tradetora!

Comme vole ammare a mme,

125

Si vo’ bene sulo a tte,

Et ogn’autra vo’ che mora.

Tu nce curpe tradetora!

SCENA IV

Porta Capuana.

CIENZO, e CIOMMO.

CIENZO

Figlio l’avertemiento è sempe buono,

Che nne vuo’ da ste femmene?

CIOMMO

130

Gnopate mio a direte lo vero

Abbottare te faje comm’a pallone:

Qua’ femmena canosco?

Io l’acqua ntrovolare manco saccio,

Paro l’esca a lo fuoco, e so’ no jaccio.

CIENZO

135

Addonca mente è chesso,

Ogne juorno che faje a la Dochesca?

CIOMMO

Vavo a trovà n’ammico,

Che da fora è benuto, e se trattene

All’Alloggiamento de la sia Milla,

CIENZO

140

Ma tu co chella scusa

De parlare all’ammico,

Vide se puo’ parlà co chella gioja

De Zeza, n’è lo ve’?

CIOMMO

Non canosco sta femmena!

145

Non saccio chi decite, e addove stace.

CIENZO

No la canusce ne? cossì pozz’essere,

Ma prega lo diaschence, che t’ascia

Na vota a chella Chiazza! orsù vattenne

A sta pedata propio a la Poteca,

150

Vinne chelle recotte, e statte attiento,

Non te fare gabbà da li guarzune.

CIOMMO

E non se nne va chiune! (da parte.)

CIENZO

Decea Vergilio

A lo Paracrafo

155

Decemo quinnece.

Ca pe na femmena

N’Ommo se strangola

Se fa squartà.

Lo pozzo dicere

160

Io sbenturato,

Che so’ ncappato

Comm’a no Sorece,

A lo mastrillo

Pe no tantillo (da parte.)

165

De femmena.

SCENA V

LISO, e CIOMMO.

LISO

Cammara’ Ciommo addio.

CIOMMO

Liso a chesta pedata

Te venea a trovare

Pe sapè quarche nova

170

De chella Torca cana,

Che morire mme vede

Senza dareme ajuto.

LISO

Ciommo lo male tujo n’è speduto.

De Femmena lo core

175

No chianto, no squasillo

Vasta pe l’ammollì,

Si be’ è d’acciaro.

Lo zuccaro d’ammore

Si be’ sia no tantillo

180

Non te lo puo’ gliottì

Senza L’ammaro.

CIOMMO

Auto, che chianto io nc’aggio perzo, sempe

Tosta cchiù de na vreccia,

Fegne de non sentì quanno le parlo,

185

E Torca senza fede,

Fegne de non vedè, quanno mme vede.

LISO

Siente Ciommo, tu saje,

Che da che mme scopriste

L’ammore tujo co Zeza

190

L’aggio sempe trascurso largo, largo,

Sempre nzifra parlanno;

Et essa, che se penza,

Che le parla de me, ca mme vo’ bene,

Mille sospire jetta;

195

Ma non sa la scuressa,

Ca lo core de Liso non eje essa.

CIOMMO

Addonca ancora l’aje

Da scoprire l’ammore che le porto?

LISO

Sienteme lo pecché:

200

Voglio mprimma, che Zeza se sacreda,

Ch’io voglio bene a Milla, e p’essa schitto

Chisto spireto campa,

Se martoreja che st’arma;

Azzò, che quanno hà perza la speranza,

205

D’avereme a ncappare a la tagliola,

Voglia bene a tte sulo, e te consola.

CIOMMO

Chesta speranza schitto

Resta pe consolà

Chest’arma mia.

210

S’ammore, ch’è no guitto

Auto no mme sa fa,

Che terannia.

SCENA VI

CIULLO, e li stisse.

CIULLO

Oh, oh, ca v’aggio asciato!

CIOMMO

Ch’è socciesso!

LISO

Ch’è stato!

CIULLO

215

Lassateme asciuttà, ca sto sodato. (s’astoja.)

CIOMMO

Mme vo’ Zeza?

CIULLO

Gnornò.

LISO

Mme vole Milla?

CIULLO

Manco.

CIOMMO

Quanno parle?

LISO

Spapura.

CIULLO

Chianno, chiano; mo’, mo’.

CIOMMO

Vi’ che pacienza.

CIULLO

220

Mone.

LISO

E quanno.

CIULLO

Che v’è dato?

Lassateme asciuttà, ca sto sodato!

CIOMMO

Comme ncoccia.

LISO

Che freoma!

CIULLO

Mettitece no nchiasto si è posteoma.

CIOMMO

Dince priesto, che nc’eje?

CIULLO

Mo’ ve lo dico;

225

Non saccio pe qua ntrico;

Non saccio pe qua cosa,

Manco saccio pecchene, e manco comme,

E nzomma de le somme,

Ve dico nveretà

230

Avite da sapè, ca non se sa

CIOMMO

A guitto? (l’afferra pe battere.)

LISO

Forfantone!

CIULLO

Ca manco è chesso none. (s’addenocchia.)

Aggiate caretà

Ca songo peccerillo,

235

Ch’io puro no tantillo

Nne tengo de piatà.

Mo’ ve lo dico affè;

Mo’ ve lo conto sì;

Decite primma a mme

240

Deciteme che d’è

Chillo ch’all’Arba fa

Chichere chì?

Comme se chiamma ne?

Chella che fa ncampagna.

245

Quacquarà?

CIOMMO

L’accederria per raggia!

LISO

Lo spaccarria pe miezo

Se non fosse fegliulo.

CIULLO

Si ca so’ qua cetrulo!

250

(Mo’ nce lo dico, e bia!)

Sacciate a buje mme manna

A sta pedata propio,

E la sia Milla, e la sia Zeza vosta,

Che mo’ mo’ jate llà,

255

Ca v’anno da parlà.

CIOMMO

Liso

LISO

Ciommo

A DUE

Lo siente!

CIOMMO

Et ancora a cca staje?

LISO

E non te parte?

CIULLO

Voglio vedè bello mbroglià de carte! (da parte.)

A DUE

Corro pe ghì a bedè

La bella mia, che bo’.

260

Fuorze pentuta s’è

De cchiù mme fa penà;

Forze mme vorrà dà

Quarche contiento mo’.

SCENA VII

CIULLO, e po QUEQUERA.

CIULLO

Ecco cca lo Sio Quequera,

265

Che pare justo pecora,

E bo’ fare l’Atrante,

Mme nce voglio spassare no tantillo:

Veditevillo te, veditevillo?

Sio Quequera, Sio Quequera.

QUEQUERA

270

Ciullo, Ciullo, che d’è?

CIULLO

Nsi’ a seje perzune (s’intimorisce .)

QUEQUERA

Addo’ so’?

CIULLO

No le bide!

QUEQUERA

Miettete nnante: addove stanno, addove!

CIULLO

Llà ncoppa, si’ cecato.

QUEQUERA

Quequera annegrecato!

CIULLO

275

Bene mio, ca mo’ venono!

QUEQUERA

Da chesta via?

CIULLO

Da cca.

QUEQUERA

Ciullo mo’ torno,

Ch’aggio da ghire a fa na dellegenzia

De no zierto mmecidio socciesso. (entra nfuria.)

CIULLO

(Oh bene mio, e comme sta sorriesso?)

280

Fremma, fremma, Sio Capetanio, fremma

Ca già se nne so’ ghiute.

QUEQUERA

Pe quale via (da dinto.)

CIUMMO

Da coppa. (esce.)

QUEQUERA

Anno avuto pe zierto gran jodizio,

285

Ca si no mo’ volea farne na chianca,

Ca chesta spata allanca

D’accidere perzune nquantetate,

Senz’avè no tantillo de piatate.

SCENA VIII

LELLA co no fagotto de panne, e li stisse.

LELLA

Jostizia, jostizia (strillanno.)

290

Chi mme farrà jostizia!

QUEQUERA

Lella, chesto che d’è?

CIULLO

Che t’è socciesso?

LELLA

Chella guitta de Milla

Vide a che mm’hà arredotta;

Cacciarme da la casa

295

Jettareme le rrobbe

Pe la fenesta, e po mpubreca chiazza,

Chiammarme mariola, e becchia pazza.

CIULLO

Di chi songo ste robbe?

LELLA

So’ le meje.

QUEQUERA

Addove te nne vaje!

LELLA

300

Addo’ vorrà la sciorte!

QUEQUERA

Mme nne vene a piatà,

Ciullo saje che bo’ fa,

Pigliate chiste panne,

Portale a Zeza, e dille

305

Ca voglio, che se tenga

Lella a la casa soja, e chesso faccia,

Pe quanto pò stemà la razia mia.

LELLA

Vaso li quatto piede a Ussignoria.

CIULLO

Mo’ ve servo, da cca. (Lella le dà li panne.)

LELLA

Ma statte attiento

310

Non perdisse qua cosa pe la via.

CIULLO

No ca stongo ncerviello!

A sta pedata vao a lo rotiello.

SCENA IX

QUEQUERA, e LELLA.

QUEQUERA

Lella, saje che buo’ fare?

LELLA

Si no mme lo decite.

QUEQUERA

315

Mo’ che baje addo Zeza, statte attiento,

Che non parla nsecreto co quarc’uno;

Vide chi tene mente a chella Casa;

Ca si nn’aggio da te quarche notizia,

Co ste mmano meje propio.

320

Te voglio fa vedè bella jostizia.

Si quarc’uno se nzonasse

Dirle schitto na parola,

Sta a bedere ,che fracasse:

Te fa fa sto Quequerà.

325

Ca lo Munno che derrà,

Si non faccio lo nfernuso,

Si no spacco, e so’ piatuso

Si mme faccio pecora.

SCENA X

LELLA, e po CIENZO.

LELLA

Ora su jammoncenne chiano, chiano,

330

Non venesse quarc’uno, mara mene,

E mme desse de mano

Mmiezo a sta Chiazza

CIENZO

Lella,

Comme cca miezo staje!

LELLA

Lo credarrisse, o Cienzo!

335

Vedè mmiezo a ste chiazze sola sola

Sta povera fegliola!

CIENZO

Zierto ca resto fora de me stisso!

LELLA

Quanno maje Cienzo mio

Io sola songo asciuta na pedata

340

Da la portella mia?

CIENZO

E mo’ ch’è stato?

LELLA

Che nne vuo’ fa, po te lo dico; e be’

Cienzo mio, comme staje? pocca a la cera

Mme pare ca staje buono,

Aggraziato, e bello

345

Staje rossolillo nfacce, e chisto musso

De zuccaro mpanetta

Mm’addecreja, mme consola, e mm’addelletta.

Senco no spasemo

No parasisemo

350

Dinto a lo stommaco,

Quanno te veo,

Che già mme creo

Pe tanto caudo!

Tutta sguaglià.

355

Cienzo se tratta

Pe tte so’ fatta

Già meza stoteca,

E paraliteca,

Tanto, che teseca

360

Non pozzo sta.

CIENZO

Chesto vo’ di’ lo volè bene, o Lella!

LELLA

Pe chesta facce bella

CIENZO

Pe st’uocchio niro, niro

LELLA

Pe sta vocchella a riso

CIENZO

365

Pe sso naso appezzuto.

LELLA

Songo mpazzuta ntutto.

CIENZO

Ed io storduto.

LELLA

Bellezza!

CIENZO

Fata mia!

A DUE

Prejezza de sto core

Moro penzanno a tte.

370

Lo panteco le venga

A chi non sente Ammore;

Né sape che cos’è.

SCENA XI

Dochesca.

LISO, e CIOMMO.

LISO

Ecconce cca, su chiamma Zeza, o Ciommo.

CIOMMO

Chiamma tu Milla, o Liso.

LISO

375

Che bolesse lo Cielo, e respondesse

A lle chiammate meje sta Torca cana?

CIOMMO

Vorria perde no dito, si decesse

Sulo a mme no bondì, ssa renegata?

LISO

Che femmena ostenata!

CIOMMO

380

Che core de pepierno!

LISO

Cchiù piatà trovarria into a lo Nfierno!

Chesta Torca, senza fede,

Quanto cchiù morì mme vede,

Tanto manco n’hà piatà.

385

A lo chiagniere che faccio,

Si lo core fosse jaccio,

Se porria porzì squaglià.

SCENA XII

ZEZA da lo Barcone, e li stisse.

ZEZA

Liso

LISO

Che d’è? (sdegnato a Zeza.)

ZEZA

Che cera è chesta, che?

CIOMMO

Zeza

ZEZA

Che buo’? (sdegnata a Ciommo.)

CIOMMO

Che t’aggio fatto ne?

ZEZA

390

Liso accossì respunne?

LISO

Teng’auto ncapo.

CIOMMO

Et io,

Che te chiammo, teranna

Pecché te mustre sgrata!

ZEZA

Ca chest’arma pe tte no sta nchiajata.

395

Spaccame chisto pietto

Squartame chisto core,

E bide chi nce sta!

Vide se nce recietto!

Vi’ chi nc’ha puosto Ammore!

400

Vide se pozzo ammà!

LISO

Zeza pierde lo tiempo,

Se pienze de vedè, che Liso t’amma,

Pocca tu saje pe chi chest’arma more.

ZEZA

Pe gusto lo paté non è dolore.

CIOMMO

405

Se dice tu accossì

Puro accossì dic’io,

Teranna, sconoscente,

E senza core!

Lo chiagniere pe tte

410

Tromiento a mme non è

S’io, comm’a tte porzì

Chiagnio pe Ammore.

SCENA XIII

MILLA da lo Barcone, e li stisse.

MILLA

Bene mio, che cos’è tante bellizze!

Volea di’ ca lo Sole

415

Non vedea cammenare pe lo Cielo,

Pocca nterra, co nnuje

Mo’ nce nne stanno, e uno, e uno a duje. (Mostra Liso, e Ciommo.)

LISO

Non è chesto! ma siente,

Saje pecché mo’ no sbrenne

420

Lo Sole Ncielo, o Milla?

Comme sbrendere vole,

Si lo sbrennore sujo, sta co buje sole.

ZEZA

Milla non t’affollà,

Ca perderraje la coppola a la folla.

MILLA

425

Zeza tu parle nzifra.

ZEZA

Io parlo chiaro.

CIOMMO

Vole di’, nce vo’ zuccaro a l’ammaro. (verso Zeza.)

ZEZA

A ste rotola scarze, chi te chiamma? (a Ciomma.)

CIOMMO

La bon’arma de Mamma,

Mme deceva quann’era peccerillo,

430

Fuoco che tiene ncuorpo.

Nchiuso no lo tenè, spapura, e dillo.

LISO

Milla lo siente, o no? (a Milla.)

MILLA

Ma poco mporta,

Ca lo fuoco spapure, (a Liso.)

Quanno Liso pe tte la Sciamma è morta.

435

Quanno speranza nc’è

D’essere ammato, o no,

Negare chi lo pò,

Ch’è contentezza!

Ma chessa si pe tte

440

Ntutto perduta, è già

Cierto te può accattà

Mo’ na capezza.

ZEZA

Arrecettate Liso.

CIOMMO

Milla te puo’ quetare.

LISO

445

Chesta sì ch’è sentenza!

MILLA

Datt’armo, agge pacienza

Ciommo!

ZEZA

Liso!

LISO

Milla!

CIOMMO

Zeza!

MILLA

Pecché

Tanto crodele? (a Ciommo.)

ZEZA

E comme

Accossì sgrato? (a Liso.)

LISO

Oh Dio

450

Tanto Teranna! (a Milla.)

CIOMMO

Dimme

Cossì mme lasse. (a Zeza.)

MILLA-ZEZA

Siente

LISO-CIOMMO

Saccie

MILLA-ZEZA

Se chisto core

LISO-CIOMMO

Se st’arma mia

MILLA-ZEZA

Non sane.

LISO-CIOMMO

Non consuole.

A QUATTRO

Pozza morì, chi bene cchiù te vole.

MILLA-ZEZA

455

Pozza campà nfi’ a craje.

LISO-CIOMMO

Pozza avè bene maje.

MILLA-ZEZA

Qua femmena vorrà.

LISO-CIOMMO

Qual’ommo pensarrà.

A QUATTRO

Volerte bene.

460

Fuorz’accossi po tu,

Non pienze a nullo cchiù,

Ma sulo a mmene.

Pozza, &c.