Opera Buffa Napoli 1797 - 1750
  
  
 Ll'alloggiamentare, Napoli, Mechele Loise Muzio, 1710
 a cura di Stefania Napolitano
 
 
 
paratesto ATTO PRIMO ATTO SECONDO ATTO TERZO Apparato
 
 ATTO III
 
 SCENA PRIMMA
 
 CIOMMO, e po MILLA.
 
 CIOMMO
 
    So’ resoluto già,
 De non ammare chiù,
1020Mme voglio sì scordà
 De volè bene.
    Ma comme fa lo pò
 Lo core mio che bo’
 Zeza de st’arma mia
1025Morì pe ttene!
 
 MILLA
 Ciommo, Ciommo ch’è stato!
 Songo porzì fegliola comm’a Zeza,
 E si non tanto bella, allommacaro
 Aggio tanta de gazia a chesta facce,
1030Che porria mo’ da tene
 Sperà no po’ de bene.
 CIOMMO
 Milla, chi vo’ negare
 Ca ssa faccella d’oro,
 Ca ssa vocchella a riso,
1035Nnammorare farria no core d’urzo?
 MILLA
 E tune
 CIOMMO
                Et io quanno te veo o Milla,
 N’aggio no zierto che de passeione,
 Sengo non saccio che?
 Dint’a lo core, e po
1040Dice Cupinto aibò, lassala ire,
 Amala a chella, che te fa morire.
 MILLA
 
    Prova no pocorillo
 De volè bene a mme,
 E bi’, che gusto ncè
1045D’essere ammato. (resta pensoso Ciommo.)
    Agge tu no tantillo
 D’amore, e de piatà,
 Ch’accossì può lassà,
 D’essere sgrato.
 
 CIOMMO
1050(Ora su core mio cossì buo’ fa.) (da parte.)
 Figne d’ammare Milla, azzò che Zeza
 Pe gelosia de st’autra nnammorata
 Resorvesse d’amarte,
 E te dasse accossì quarche confuorto,
1055Mprimma che t’ascia muorto.
 MILLA
 Che d’è, no mme respunne,
 Vervesie zitto, zitto,
 Et a sto core affritto
 Qua remmedio non daje
1060Tu che feruto ll’aje?
 CIOMMO
 Milla, già ch’aggio visto,
 Che veramente m’amme,
 E de ll’affetto tujo ne sto securo,
 Te voglio bene, & a sta fede io juro.
 
 SCENA II
 
 LISO da parte, e li stisse.
 
 LISO
1065Ciommo parla co Milla a sulo a sulo!
 Chi sa de che descorrono nsecreto!
 MILLA
 Si vuo’ fa sta cojeto
 Sto core mio, che spasema pe ttene,
 Già che tu mme vuo’ bene
1070Damme Ciommo la mano.
 LISO
 Comme Liso non muore!
 CIOMMO
 La mano sì (ma non te do lo core.) (a Milla, e po da parte.)
 MILLA
 Oh contiento! (se danno la mano.)
 CIOMMO
                             Oh dellietto!
 LISO
 Ch’affanno è chisto mio!
 MILLA
1075Ciommo t’aspetto!
 CIOMMO
                                     Io mo’, mo’ torno.
 A DUE
                                                                        A’ Dio! (Ciommo mentre va per partire resta sospeso mmiezzo la Scena.)
 
 SCENA III
 
 ZEZA, LISO sospiso no poco, e CIOMMO da parte sospiso.
 
 ZEZA
 
    Co mmico ll’aje
 Faccella d’oro
 Mussillo bello,
 Sì, sì dimmello,
1080Dimmello, di’.
    Nnanze che mora,
 No musso a riso,
 Co no squasillo,
 Sì, sì fammillo
1085Fammillo sì. (Liso riviene in sé.)
 
 ZEZA
 Parla, spapura su,
 Non fa chiù lo squasuso!
 LISO
 Ammore mm’aje confuso! (da parte.)
 CIOMMO
 (Zeza co Liso!) (Ciommo s’addona de Zeza, e Liso)
 ZEZA
                               Dimme (Liso mentre Zeza le vo’ parlare, isso le vota le spalle.)
 LISO
                                                Accossì faccio
1090Fegnere vogl’io mo’ d’ammare a Zeza
 Pe bedè si de Milla
 La fede data a Ciommo, è fauza, o vera.
 ZEZA
 Famme na bona cera.
 LISO
 Zeza sta allegramente,
1095Liso è lo core tujo.
 CIOMMO
 (Ciommo lo siente?) (da parte.)
 LISO
                                          Che bolesse lo Cielo,
 E dapo’ tanta lacreme che ghietto,
 Fosse ammollato mo’ sto core mpietto!
 LISO
 
    Chesta mano signo sia (Liso dà la mano a Zeza.)
1100De l’affetto
 Che mprommetto,
 De la fede, che te do.
    (Vi’ ca fegno, Milla mia! (da parte.)
 Ca sto core
1105Nsi’ che more
 Chiù lassare non te pò.)
 
 ZEZA
 Ora su Liso mio
 Recordate de me?
 LISO
                                    Non dubbetare.
 ZEZA
 Porzì Ammore mme voze consolare.
 
 SCENA IV
 
 LISO, e CIOMMO sospise tutte duje da parte.
 
 LISO
1110E lo potite fare!
 CIOMMO
 E nn’aje avuto core!
 LISO
 Dare la mano a Zeza!
 CIOMMO
 Dare la fede a Milla!
 LISO
 Gabbare a chi vuo’ bene!
 CIOMMO
1115Tradì lo core tujo!
 LISO
 Donca no ncè speranza?
 CIOMMO
 Donca no ncè remmedio?
 LISO
 Chi Milla mme darrà?
 CIOMMO
                                            Chi mme la porta?
 LISO-CIOMMO
 Milla/Zeza no ll’aggio chiù, si Milla/Zeza è morta.
 LISO
1120È morta nenna mia!
 CIOMMO
 È morta chella gioja!
 LISO
 Chi mme consola mo’?
 CIOMMO
                                            Chi mme conforta?
 LISO-CIOMMO
 Milla/Zeza no ll’aggio chiù, Milla/Zeza è morta.
 LISO
 
 Facce bella nnargentata.
 
 CIOMMO
 
1125Palommella, puca d’oro!
 
 LISO
 Ma te, te Milla mia.
 CIOMMO
 Ma te te Zeza bella!
 LISO
 Tutta janca vestuta
 CIOMMO
 Tutta sciure coperta!
 LISO
1130A mme ghiarrà trovanno.
 CIOMMO
                                                 Essa a mme cerca.
 LISO
 Ecco cca Liso o Milla!
 CIOMMO
 Ecco cca Ciommo o Zeza!
 LISO
 Fremma non te partì.
 CIOMMO
 Lo viento se la porta.
 A DUE
1135Ma qua Milla/Zeza dic’io, si Milla/Zeza è morta.
 LISO
 
    Facce bella nnargentata,
 Antretella nzuccarata
 Dimme Nenna addove si’?
 
 CIOMMO
 
    Palommella, puca d’oro,
1140Si non viene, vi’ ca moro
 Non mme fare chiù sperì.
 
 SCENA V
 
 QUEQUERA, e li stisse sospise.
 
 QUEQUERA
 È isso, o non è isso!
 Cola e pe zierto: oh frate bello mio (Quequera resta sospiso in vedere Liso.)
 E comme t’aggio asciato?
1145Lassa quanto (mente Quequera vo’ abbracciare a Liso chisto va mpazzia.)
 LISO
 
 Quanta site, (correnno.)
 Che bolite?
 Chi ve manna Zeza, o Milla?
 
 QUEQUERA
 
 Frate mio cca non se strilla. (secotanno Quequera.)
 
 CIOMMO
 
1150Iatevenne
 A st’autre tenne
 Accattateve na meza;
 Chi ve manna Milla,o Zeza?
 
 QUEQUERA
 Chist’è n’autro malanno!
1155Chi Milla, e quale Zeza jate ascianno?
 LISO
 Chi Milla m’hà levato?
 CIOMMO
 Chi mm’ave acciso Zeza?
 LISO
 
 Tu la tiene forfantone!
 
 CIOMMO
 
 Ll’aje accisa caperrone! (afferranno a Quequera.)
 
 LISO
 
1160Priesto dillo.
 
 CIOMMO
 
                          Mo’ confessa.
 
 QUEQUERA
 
 Non aggiate tanta pressa;
 Deh moveteve a piatate.
 
 Paro lo mpiso mmiezo a si confrate!
 LISO
 Mme t’addenocchio nnanze!
 CIOMMO
1165Mme te jetto a li piede. (s’addenocchiano nnanze a Quequera.)
 QUEQUERA
 Uh quanta compremiente! (Quequera s’addenocchia mmiezo a Liso e Ciommo.)
 Mm’addenocchio pur’io,
 Ca mme parite proprio Commertiente. (Quequera dice l’aria addenocchiato.)
 QUEQUERA
 
 Milla cerne, e Zeza mpasta,
1170E buje state già a la groria,
 Chesto mmale è de na razza
 Ch’a sanarlo no nce vasta
 Lo sceruppo de cecoria,
 Ma nce vo’ na bona mazza (se sosono tutte.)
 
 LISO
 
1175A mme mazze, a mme forfante?
 
 CIOMMO
 
 Addenocchiate cca nnante. (Quequera s’addenocchia.)
 
 LISO
 
 Mo’ t’accio.
 
 CIOMMO
 
                        Mo’ t’adaccio.
 
 QUEQUERA
 
 Signorsì ca mo’ llo faccio.
 Ca Mamma vo’ accossì,
 
 LISO
 
1180L’anno dato?
 
 CIOMMO
 
                           Si’ feruto?
 
 LISO
 
 Vi’ lo sango, comme scorre?
 
 CIOMMO
 
 Comm’è bella chella Torre!
 
 LISO
 
 Quanta spate! quanta sciabbole!
 
 QUEQUERA
 
 Incorabbole, incorabbole!
1185Masto Giorgio addove si’?
 
 LISO-CIOMMO
 
 Zitto zi’, ca Milla/Zeza chiamma
 Mo’ le donco no bonnì.
 
 QUEQUERA
 
 Masto Giorgio addove si’!
 
 SCENA VI
 
 Porta Capuana.
 
 CIULLO, e LELLA.
 
 CIULLO
 Ora mo’ ncoccia!
 LELLA
                                  E comme si accossì.
 CIULLO
1190Non nce lo pozzo di’.
 LELLA
 Fuorze ca Cienzo è sgrato,
 Non te dà qua’ recotta quarche bota?
 CIULLO
 Io te vaso lle mmano,
 Non pozz’esse chiammato roffeano.
 LELLA
1195Non saccio co chi ll’aje;
 Che d’è ca dice, Cienzo chesta sera
 Lella t’aspetta, e quanno vaje ha ditto
 Che le puorte na nocca pe la capo.
 CIULLO
 Mo’ sì ca mm’aje frusciato!
1200Chi se vo’ arrecordà tutte sse cose!
 Tu mo’ che nc’aje parlato,
 Pecché no nce ll’aje ditto?
 LELLA
 La prejezza, lo gusto ch’aggio avuto
 D’avè fatta la pace
1205Co Cienzo saporito, e tenneriello,
 Mme ll’hà fatto scordà de direncello.
 CIULLO
 
 E tu mo’ tornance,
 Che buo’ da me!
 Non pozzo dicere,
1210Chest’e chell’auto;
 Io co no sauto
 Mo’ so’ a la casa,
 E a la Patrona
 Le conto tutto
1215Pilo pe pi’
 
 LELLA
 
 Che le vuo’ di’?
 
 CIULLO
 
 Ca tu co Cienzo,
 Mmiezo a la strata
 Te si’ basata
1220Non è lo ve’?
 
 ZEZA
 
 Uh scura me!
 
 CIULLO
 
 Ca ll’aje refuso
 Cierte torone
 Negà lo puo’?
 
 LELLA
 
1225E tu che buo’?
 
 CIULLO
 
 Ca chino chino,
 No moccaturo
 De panne lurde,
 De caso, e lardo
1230Ll’aje refossato,
 Negà lo puo’?
 
 LELLA
 
 E tu che buo’?
 
 CIULLO
 
 Ca nsi’ a tre rotola
 De stoppa, e cannavo,
1235Pe nsi’ a no trepete,
 No scumma vuruuoccole,
 Tu ll’aje portato,
 Negà lo puo’?
 
 LELLA
 
 E tu che buo’?
 
 CIULLO
 
1240No voglio niente!
 Zompa sto fuosso,
 Lo frutto è gruosso,
 Sarraje frostata
 Pe mariola;
1245Si non si’ mpesa!
 
 LELLA
 
 Che dice, che?
 
 CIULLO
 
 Stall’a bedè.
 
 SCENA VII
 
 LELLA, e po CIENZO.
 
 LELLA
 Ora vi’ lo tentillo quanto face?
 Chi mme ll’hà fatto asciare pe la via
1250Chisto fraschetta! a tiempo a tiempo Cienzo,
 Uh negrecate nuje!
 Ca mo’ sarrimmo mpise tute duie.
 CIENZO
 
    Che d’è te veo colereca!
 Nennella saporita
1255Votame ssa faccella,
 Lassame rallegrà.
    No bi’ chest’arma spasema;
 Mme manca già sta vita,
 E schitto tu si’ chella,
1260Ch’ajuto mme puo’ dà.
 
 LELLA
 Cienzo mio a lo remmedio.
 CIOMMO
                                                    Ch’è stato?
 LELLA
 Chello che t’aggio dato
 Tutt’è robba de Zeza, e chillo guitto
 De Ciullo che ll’hà bisto, a la ncorzera
1265Mo’ nce ll’è ghiuto a di’; nuje che facimmo?
 O simmo mpise nzemmera, o foimmo.
 
    Ma siente cca, (chiagnenno.)
 Si tu si’ mpiso
 Saje che buo’ fa.
1270   Votate a mme
 Dimme bonnì
 Non te scordà.
 
 CIENZO
 Ente che bell’augurio che mme faje!
 LELLA
 N’è buono che lo ssaje
1275N’è buono che lo dica, azzò che pone,
 Non te mecca paura lo pennone?
 CIENZO
 Che pennone, che mpiso, co chi ll’aje!
 Lassammo j sti guaje.
 LELLA
                                           E de ste rrobbe,
 Si mme spia la Patrona, che le dico?
 CIENZO
1280Nnaze ch’arrive, io già te sonco ncuollo,
 E te le porto io, o te le mmano mone,
 De la Poteca mia pe qua’ guarzone.
 LELLA
 Ora mo’ m’acquieto.
 CIENZO
                                        Ora mo’ dimme,
 Mme gabbarraje tu cchiune, com’aje fatto
1285Co Quequera mo’ nnante?
 LELLA
 Mprimma mme piglia pesole,
 De lo nfierno mmarditto farfariello,
 Ch’io mo’ gabbarte chiù Cienzo mio bello.
 CIENZO
 Penza da quanto tiempo
1290Dura st’ammore nuosto,
 Penza ca sempe tuosto
 Pe ammarte songo stato;
 Penza ca maje stofato
 Mm’hà ssa bellezza lloco;
1295Pensa ca si no poco
 Non t’aggio visto, o Lella,
 Mm’afferrato tu saje la tarantella.
 LELLA
 Tu saie, ch’io sempe mo’
 Pe lo passato, e chiù
1300T’aggio ammato, zoè
 Tu faje, comm’io, gnorsì,
 Si a sta bellezza cca,
 Le voglio bene, o no;
 Tu saje, e lo saje tu
1305Quanta ammasciate a mme
 So’ benute; e porzì
 Lo saje tu chesto già,
 Quanta vote pe Cienzo
 Mm’è benuta la freve, e lo descenzo.
 CIENZO
 
1310Lella mia mme gabbe chiù?
 
 LELLA
 
 Cienzo mio gabbarte! aibò.
 
 CIENZO
 
 Mente è chesto tennerella
 Sì fammillo
 No squasillo.
 
 LELLA
 
1315Tu porzine facce bella.
 Menamillo
 No Vasillo!
 
 CIENZO
 
 Mariola.
 
 LELLA
 
                   Smargiassone!
 
 CIENZO
 
 Chiù mme gabbe?
 
 LELLA
 
                                     None, none.
 
 LELLA
 
1320Mme vuo’ bene?
 
 LELLA
 
                                  Sine sine.
 
 CIENZO
 
 Tanto bene chi te vo’.
 
 LELLA
 
 Cienzo bello sulo tu.
 
 SCENA VIII
 
 CIOMMO sulo.
 
 CIOMMO
 Core mio che pienze chiù,
 Pocc’Ammore mm’hà traduto.
 
1325   Né chiù chella
 Facce bella
 Puo’ sperare de gaudè.
    Dillo sine, dillo tu
 Tu terranna! comm’ajuto
1330No mme daje,
 Che mme faje
 Sempe chiagnere pe tte.
 
 SCENA IX
 
 MILLA, e lo stisso
 
 MILLA
 Tu colereco, Ciommo, tu colereco!
 Contiento de sto core,
1335Che te siente? ch’è stato sto dolore?
 CIOMMO
 (Abbesuogno che fegna) ah Milla, Milla (da parte.)
 Comme vuo’ che colerico no stia,
 Si tu la pena mia
 Ll’aje accresciuta a na manera già,
1340Che st’arma mia no ha n’ora d’abbiento.
 MILLA
 Lo dolore lo caccia lo contiento.
 CIOMMO
 E qua contiento, dimme
 Ave sto core mio, si lo scurisso,
 Da che toccaje ssa mano jancolella
1345Non arrecetta chiune;
 (Pocca si chella ch’ammo non si’ tune.) (da parte.)
 MILLA
 Io non sapeva ch’era st’ammoina,
 Mme pensava de cierto, avisse perzo,
 O le pecore mpuglia, o mmiezo mare
1350Na frotta de Vascielle,
 Ma mente aggio scopierto
 Lo male tujo, datt’anemo, ch’è stato!
 Ciommo tu si’ sanato! (Milla afferra Ciommo che va a la casa soja.)
 
    Viene co mmico,
1355Ca te lo dico
 Quale remmedio
 Te pò sanà.
    Si no lo cride,
 Provalo, e bide
1360Si lo tromiento
 Te fa passà
 Si chiù contiento
 Se pole dà.
 
 SCENA X
 
 LISO da parte, e li stisse.
 
 LISO
 E sempe a canto a Milla
1365Ciommo non è lo ve’, Liso che dice!
 CIOMMO
 (E che resorverraje core nfelice!) (Ciommo e Milla parlano nsecreto.)
 LISO
 
    Chi le frezze d’ammore non prova,
 Gelosia non sape che d’è.
    Chi all’affanno recietto non trova
1370Maje chiù spera no gusto d’avè.
 
 CIOMMO
 (Orsù accossì se faccia (da parte.)
 Chiù trommiento se dia a sta teranna.)
 MILLA
 Lo male che t’affanna,
 La pena che mo’ siente,
1375Si faje chello che dico non è niente.
 CIOMMO
 Milla lo core mio spaccalo, e pesa,
 Veccolo cchane.
 LISO
                               E comme
 Nnuommene tu de Milla mia lo nomme,
 Nnemmico tradetore,
1380E non t’accide Ammore?
 MILLA
 Jammo suso a la casa,
 Ca stammo a lo copierto
 Pocca già la serena va cadenno. (entra.)
 CIOMMO
 Comme vuoje tune (Mente Ciommo vo’ entrà a la casa de Milla Liso se fa nnanze.)
 LISO
                                       Ciommo
1385De fa chesto a nn’ammico n’aje raggione!
 CIOMMO
 Non dubbetà ca tutto è nfenzione.
 
 SCENA XI
 
 LISO sospiso a la porta de MILLA, e po ZEZA da lo Barcone.
 
 LISO
 Che s’accida, che s’accida, (nfuriato verso la porta de Milla.)
 Che s’adaccia, che s’adaccia
 ZEZA
 Liso buon pro te faccia!
1390Trase, trase addo Milla,
 Ca nesciuno te vede;
 Curre va, ca t’aspetta,
 Saglie ca non si’ bisto,
 Vi’ ch’è scurato juuorno,
1395Non te pigliare scuorno!
 LISO
 Zeza la fede data, e a tte mprommessa,
 Io te mantengo.
 ZEZA
                                E Milla,
 No mme di’ la boscia,
 Porzì te dà no po’ de gelosia.
 LISO
1400Siente Zeza abbesuogno che lo dica,
 La Chiaja è fresca, e la feruta è antica.
 LELLA
 Fa chello che tu vuoje,
 Ch’io non te lasso maje,
 Orsù Liso governate
 LISO
                                        Addo’ vaje? (Zeza resta sospesa, e po chiagne.)
 ZEZA
 
1405   Addove vao mme dice?
 Vao a chiagnere a solluzzo,
 Vao ad enchiere no puzzo,
 De ste lacreme pe tte.
    Si a l’affanno de sto core
1410Si de st’arma a lo dolore
 Chiù remmedio non ncè.
 
 SCENA XII
 
 LISO sulo.
 
 LISO
 Fremma sienteme Zeza! addove vaje?
 Corro a darele ajuto fremma! e Milla?
 Milla non’è de Ciommo ncaprecciata?
1415Addonca che chiù bo’?
 Chiù de no core avere essa non può. (Entra alla casa de Zeza.)
 
 SCENA XIII
 
 Notte.
 
 QUEQUARA sulo stravestuto co na velata co lo Calascione sotta.
 
 QUEQUERA
 Co sto Tabbano ncuollo, & a lo bruoco
 Non pozz’essere proprio canosciuto;
 Lo Barcone de Zeza pare chillo,
1420Mettimmonce cca sotta.
 E co sto calascione
 Le voglio dà na canzonella; orsù
 Lassamillo accordare: mo’ sto buono
 Cantammo a chisto suono. (canta.)
 
1425Quanno t’affacce ne, ch’io sto cca bascio,
 Zeza de st’arma mia fatta co ll’ascio
 
 Mm ch’aggio ditto!
 Zierto si mm’hà sentuto,
 Mo’ mme la tirarrà ncapo na testa.
1430Orsù cantammo chesta. (canta)
 
    Scetate core mio faccella d’oro,
 Jesce da chisto nido o palombella.
    Videme ca pe tte squaquiglio, e moro,
 Sienteme sulo sì na parolella.
1435   No lo siente sto trivolo a martoro,
 Che non t’affacce cchiù faccia mia bella
 No cchiù dormire no doce trasoro
 Aprela priesto mo’ sta fenestrella.
 
 Senco venire aggente
1440Voglio sentì chi songo!
 
 SCENA XIV
 
 CIENZO vestuto a la Calavrese, co na cocozza sotta, e lo stisso da parte.
 
 CIENZO
 Pe bedè si de Lella
 L’affetto che mme porta è fauzo, o vero,
 Stravestuto mme so’ da Calavrese,
 Voglio fegne lenguaggio, e co la scusa
1445De cercà alloggiamiento,
 Voglio dire ca ll’ammo, e scanagliare
 Si mme vole gabbare.
 QUEQUERA
 Sengo gente scostammonce da cchane.
 CIENZO
 Ora via su chiammammola:
1450Ohi di la casa!
 QUEQUERA
                             È Calavrese chisso!
 No mme voglio scoprì,
 E boglio sta a sentì; chi va cercanno.
 CIENZO
 Ohi dill’Alluggiamientu!
 
 SCENA XV
 
 LELLA, e li stisse.
 
 LELLA
 Chi è lloco, chi è lloco! (da dinto.)
 CIENZO
                                            Sung’eu, sung’eu.
 LELLA
1455Non nce sta sto si Meo. (da dinto.)
 QUEQUERA
 Chisto vole restà all’Alloggiamiento,
 E Lella no lo ntenne.
 CIOMMO
 Oh, ohi di lu Pricoju!
 LELLA
                                         Jatevenne;
 Non ncè nesciuno. (da dinto.)
 CIOMMO
1460Ohi di l’Alluggiamientu!
 LELLA
 Chi è lloco mara mè! (Lella esce co na cannela appennetora mmano.)
 N’Urzo nnanze a la porta.
 CIOMMO
 Nun ti spagnà, ca sungu
 Da Calavria sbarcatu pocu nnanti.
 QUEQUERA
1465Vi’ che bella fegura! (da parte.)
 LELLA
 Embe’ chi vaje ascianno?
 CIENZO
 Vurria nu pocorillu d’arricettu.
 LELLA
 Bell’Ommo, va vattenne,
 Ca non nce songo liette. (Lella va pe se nne trasire, e Cienzo l’afferra.)
 CIENZO
1470Cuori meu
 LELLA
                       N’auta vota!
 CIENZO
 Ogni pizzu mmi vasta pi riposu.
 LELLA
 Comm’è proffidiuso! (da sé)
 Lo buo’ sentì cantanno,
 Non nce songo chiù liette, bona notte.
 CIENZO
1475Sientimi a lu mmacaru na parola! (Lella va pe partire, e Cienzo la torna ad afferrare.)
 LELLA
 Dica Uscia, dica Uscia.
 CIENZO
 Vidi tu gioja mia,
 Si da cca simmu ntisi.
 QUEQUERA
 Cierto chisto sarrà qua contrabanno; (da parte.)
1480Voglio sentì che diceno.
 LELLA
 Puo’ parlà a gusto tujo
 Ca non te sente n’anema.
 CIENZO
 Ora sacci ch’iu sungu
 Di Calavria Mercanti lo chiù riccu,
1485Tiengu Piecuri,Vacchi, e niguziu
 Tutti sciorti di robbi:
 E picchini di tia su nnammuratu,
 Sa binuto a chist’ura a diritillu,
 A cuntarti lu focu, e li trumienti
1490Chi pi tia provu, e patu,
 Pi nun farmi a cunusciri di jornu.
 LELLA
 So’ grazie, so’ favure,
 Ch’Uscia mme fa.
 QUEQUERA
 Nnammorato è de Lella lo scurisso! (da parte.)
1495Bella razza farria.
 Co chist’Urzo all’allerta, chell’arpia.
 CIENZO
 
    Cuori miu bieddu
 St’arma pinari,
 Trivuliari
1500Nun fari chiù.
    Si nu mmi cridi
 Venilu vidi
 L’ardenti focu,
 Ch’a pocu a pocu
1505Mm’accisi ammuri,
 E tantu arduri
 Mmi causi tu.
 
 LELLA
 Non pare tristo giovane! (da parte.)
 Mm’ave no po’ de grazia! io che nce perdo;
1510Lassamillo trasì dinto la casa,
 Ca po le faccio fa ngaudià ch’aje tuorto.
 (Uscia trasa.) si la sciorte mm’ajuta (Cienzo e po da parte.)
 Nfra poco mme vedraggio annobbeluta.
 QUEQUERA
 Già se nne trase, e io mone, (da parte.)
1515Le voglio fa guastà lla mmenzione.
 Lella, Lella
 LELLA
                       Chi è lloco?
 QUEQUERA
 Dimme Zeza che fa.
 LELLA
                                       Stace mpeduta.
 CIENZO
 Trasimmuncinni. (Quequera afferra Lella.)
 QUEQUERA
                                    Aspetta;
 Chiammamella cca bascio.
 LELLA
1520No la pozzo chiammare, e n’autra vota!
 Trasite.
 CIENZO
                  Sungu lestu.
 QUEQUERA
 Lassame entrà. (Quequera va pe trasire a la casa de Zeza, e Lella lo caccia.)
 LELLA
                               Bell’Ommo
 Tu te nsuonne quarcosa chesta notte.
 QUEQUERA
 Aje provato d’avè chest’ossa rotte?
 CIENZO
1525Chianu, chianu ssu guappu
 Non ti ncrifari tantu,
 Ch’io di tia nu mmi spantu. (Lella appenne la cannela a la porta, e se mette mmiezo.)
 QUEQUERA
 
 Jesce fora.
 
 CIENZO
 
                       Sungu lestu.
 
 LELLA
 
 Vuje ch’avite
1530Non se sa.
 
 QUEQUERA-CIENZO
 
 Mo’ l’accido/u de/i punia!
 
 QUEQUERA
 
 Caccia mano.
 
 LELLA
 
                            Chiano, chiano.
 
 CIENZO
 
 Fatti arretu.
 
 QUEQUERA-CIENZO
 
                          Fatte/i llà
 
 SCENA UTEMA
 
 ZEZA, LISO e CIULLO, e po MILLA, CIOMMO, e li stisse.
 
 ZEZA
 Che cos’è
 LISO
                     Che contrasto
 CIULLO
                                                Che rommore
 MILLA
1535Che fracasso.
 CIENZO
                           Ch’è stato!
 LELLA
 Vonno trasì pe forza,
 Alle case dell’aute.
 CIENZO
 Figliemo sta co Milla. (da sé verso Ciommo.)
 QUEQUERA
 Fratemo sta co Zeza! (da sé verso Liso.)
 CIOMMO
1540Che creanza!
 LISO
                           Che termene!
 CIULLO
 Vi’ che descrettione!
 CIENZO
 Ciommo
 QUEQUERA
                    Cola mio bello! (Quequera abbraccia Cola.)
 CIOMMO
 Pare Tata a la voce!
 LELLA
 Chi Cola chisto nnommena!
 LISO
1545Chist’è fratemo cierto!
 CIENZO
 Te paro Tata, e Tata songo, videme. (Cienzo se scopre.)
 LELLA
 Scura me chist’è Cienzo!
 LISO
 Quequera frate mio! (s’addenocchia.)
 CIOMMO
                                          Gnopate bello! (s’addenocchia.)
 LISO
 Eccome cca.
 CIOMMO
                         Perdoname.
 MILLA-ZEZA
                                                  Che bedo!
 QUEQUERA
1550Comme te trovo cca?
 CIENZO
                                         Comme cca staje?
 LISO
 De Milla nnammorato
 CIOMMO
                                           Et io de Zeza. (se sosano.)
 CIENZO
 Lassa parlare a Cola.
 LISO
 Pe pavura de vuje mme nne fojette,
 Comme già lo sapite da la casa,
1555Mm’accattaje sso vestito, e pe potere
 De Milla mia lo core
 Tirarelo ad amarme,
 Liso mme mise nomme, e mme fegnette
 Ch’era n’Ommo de fora;
1560Et all’Alloggiamiento sujo stisso
 Ll’arrecietto cercaje, e llà so’ stato
 De Milla amante sì, ma sbentorato.
 LELLA
 Ora vi’ quanta cose!
 CIULLO
                                       Vi’ che mbruoglio!
 QUEQUERA
 Ora mente ch’è chesto io te perdono,
1565E già che tu de Milla
 Nnammorato te si’, te sia concessa.
 LISO
 Contentezza non voglio chiù de chessa. (mente Cola va verso Milla pe le fa nnanze Zeza.)
 ZEZA
 Chiano
 MILLA
                 Fremma
 ZEZA
                                    Ch’è stato!
 ZEZA
 Mme t’addenocchio nnante
 QUEQUERA
1570Uh quanta compremiente! uscia se sosa;
 Che ncè quaccauta cosa?
 ZEZA
 L’annore mio, la repotatione.
 Voglio che mme mantenga.
 QUEQUERA
 Bon prode, e sanetate!
1575Tu nne tiene quaranta accaparrate.
 ZEZA
 A mme la fede, e la parola ha dato
 De matremmonio Cola,
 Lo può negà? (verso Cola.)
 LISO
                             Gnornone;
 Ma è stato nfenzione.
 QUEQUERA
1580Frate, non aie raggione.
 E tu Milla che dice?
 MILLA
 Lo core mio è Ciommo.
 CIOMMO
                                             È banetate!
 MILLA
 Comme, sgrato, mme nieghe
 De la fede jorata la mprommessa?
 QUEQUERA
1585Vi c’autra nova è chessa!
 Ora su non chiù chiacchiare, ch’è tardo;
 Cienzo arremmedia tune chiste guaje.
 CIENZO
 Zeza, pocca de Cola
 Nn’ave avuto la fede, e porzì Milla
1590Ll’ave avuto da figliemo; è concruso
 Lo Matremmonio già,
 Da tu la mano a chella, e tu a chell’autra. (Cola dà la mano a Zeza, Ciommo, Milla.)
 Azzò che n’autra vota ve mparate.
 QUEQUERA
 So’ spartute le grazie.
 LISO-CIENZO
1595Già che la sciorte vo’ chest’è la mano.
 ZEZA
 Porzì te godo!
 MILLA
                            Et io porzì t’abbraccio.
 LELLA
 Tutto va buono, e nuje
 Calavrese a posticcio, che facimmo?
 CIENZO
 Chest’è la mano mia.
 LELLA
                                         E chesta ccane
1600Te la stregne pe signo.
 LELLA
                                           E pe contiento
 A sta luce de luna
 Co sti strumiente, Quequera,
 Cantammo na canzona.
 QUEQUERA
                                             Io songo lesto.
 CIENZO
 E po se penza a tutto l’auto riesto.
 QUEQUERA
1605Sonate lo Ceccone.
 QUEQUERA-CIENZO
 
 Quant’è bella la femmena Zita
 Quant’è doce la femmenà.
 
 TUTTI
 
 Core mio tu nzecchete cca.
 
 QUEQUERA-CIENZO
 
 Comm’all’urmo s’azzecca la vita,
1610Cossì ll’ommo a la femmenà.
 
 TUTTI
 
 Core mio tu nzecchete cca.
 
 
 
 
 
 
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional