La festa de Bacco

La festa de Bacco, Napoli, Recciardo a Fontana Medina, 1722

a cura di Ida Paradiso

paratesto ATTO PRIMO ATTO SECONDO ATTO TERZO Apparato

ATTO I

SCENA PRIMMA

LUZEIO, e NINFA, co le giorlanne de frunne de vite co ’tre autr’uommene, e tre femmene, porzì ngiorlannate, che ’fanno na ntrezzata co le chierchia ntornejate de frunne de vite; e n’aut’ommo, e n’autra femmena, puro co le giorlanne, che ’portano ncapo no canisto d’uva pe d’uno.

Esceno LUZEIO, e NINFA co la ntrezzata appriesso, comme si venesse abballanno, e secotejarrà ad abballare; e ntra tanto cantarranno LUZEIO, e NINFA; e cantarranno porzì tutte ll’autre da dinto, comme si cantassero chille, ch’abballano.

LUZEIO - NINFA - CORO

Jammo a Bacco, cantanno, abballanno,

Ca de Bacco la razeia benegna;

La vennegna nce pò mprofecà.

Nuje farrimmo la festa cchiù bella;

Mo’, che a Bacco, de ll’uva novella,

Li presiente venimmo a ’portà. (Fornuto de cantare, e d’abballare, vanno Luzeio, e Ninfa tenenno mente attuorno.)

LUZEIO

Cca no nc’è nullo ancora!

NINFA

No nce veo manco n’arma a sto contuorno!

LUZEIO

Simmo troppo a ’bon’ora;

Jammo no poco attuorno

Pe lo Pajese: jammo, ca la festa

Non è cosa pe mmo’.

NINFA

Jammo, so’ lesta.

LUZEIO

Abbejateve vuje. (A l’abballarinole, li quale s’abbjano. e se nne traseno.)

SCENA II

RAJEMO, e CIULLA porzì co le ’giorlanne; e LUZEIO, e NINFA.

RAJEMO

Avimmo da scialare,

Sì, cara mia.

CIULLA

Sì, gioja bella. (Ntra de lloro, senza addonarese de Luzeio, e Ninfa.)

NINFA

E ’nuje.

Vedimmo de trovare

Rajemo, e Ciulla. (Ninfa parla co Luzeio, senza, che beano Rajemo, e Ciulla;e parlarranno no poco segreto ntra de lloro.)

RAJEMO

Ah! potta d’oje, che beo!

CIULLA

Che d’è?

RAJEMO

Vi’ Luzeio, e Ninfa. (Parlano Rajemo, e Ciulla, la quale farrà n’atto de despiacemiento nvedè Luzeio, e Ninfa, e ’mentre Luzeio se vo’ abbejà co Ninfa, s’addona de Rajemo, e Ciulla.)

LUZEIO

Uh, te! cca stanno. (A Ninfa.)

CIULLA

Ajemmè! (Ntra de lloro.)

RAJEMO

La vuoje cchiù peo?

LUZEIO

Ch’è chesto! (da banna.)

NINFA

O gelosia! (da banna.)

CIULLA

Uh! Che mmalanno! (A Rajemo. Mo’ parlarranno Luzeio co Ninfa; e Rajemo co Ciulla.)

LUZEIO

Ciulla co Rajemo nchietta!

RAJEMO

Mpenziero mm’hanno puosto!

NINFA

La cosa non va netta!

CIULLA

Sì, ca ponno strobbà lo fatto nuosto. (Luzeio afferra Ninfa pe lo vraccio; e banno mmiezo Rajemo, e Ciulla, e dice a Ninfa.)

LUZEIO

A ’nuje: terammo a stregnere:

No stammo addebbolute.

CIULLA

Veneno. (Ntra de lloro.)

RAJEMO

Sacce fegnere.

LUZEIO

O! Ciulla; ben trovata.

NINFA

O! ben trovato; Rajemo.

CIULLA - RAJEMO,

O! bemmenute.

LUZEIO

(Venimmo a ll’arme corte.)

Sienteme Ciulla.

NINFA

Ascota, Rajemo.

CIULLA - RAJEMO

(O sciorte!) (Se mettono a parlare Luzeio co Ciulla; e Ninfa co Rajemo, lontanielle ll’une da ll’autre.)

LUZEIO

Io creo, ca tiene a ’mente... (A Ciulla.)

NINFA

È bona st’azzejone? (A Rajemo.)

LUZEIO

La fede, che mm’haje data? (A Ciulla.)

CIULLA

Sì, mm’allecordo. (A Luzeio.)

RAJEMO

E chi t’hà fatto niente? (A Ninfa.)

NINFA

Ne? tradetore... (Se mette a parlà segreto co Rajemo.)

LUZEIO

E mmone,

Che la festa è arrevata

So’ cca pe ’fa lo nguadeio. (A Ciulla.)

CIULLA

(Oh! negra mene!)

NINFA

Già beo, ca te confunne. (A Rajemo, dapo’, c’hanno parlato segreto.)

RAJEMO

Siente (A Ninfa; e tornano a parlà segreto.)

LUZEIO

Tu no ’respunne! (A Ciulla.)

CIULLA

E chi te tene? (A Luzeio.)

LUZEIO

È fredda ssa resposta!

No, Ciulla... (Se mette a parlà segreto co Ciulla.)

NINFA

O ’buono! O ’bravo. (A Rajemo.)

RAJEMO

Ma tu si’ troppo tosta! (A Ninfa.)

NINFA

Pe benire a Soccavo,

Che nce volea qua ’ghiuorno?

Di’, ca già mm’haje traduta,

dapo’, che mm’haje mprommiso. (A Rajemo: e tornano a parlà segreto.)

RAJEMO

(Uh! Che taluorno!)

LUZEIO

Tu mme staje nzallanuta! (A Ciulla.)

CIULLA

Chisto è lo gusto mio. (A Luzeio.)

LUZEIO

Mo’ lo ’bedimmo! (A Ciulla; e tornano a parlà segreto.)

RAJEMO

E puro!

Tant’è, comme dich’ io. (A Ninfa.)

NINFA

E nne sto certa? (A Rajemo.)

RAJEMO

Auh! Te nn’assecuro. (A Ninfa.) (Lo dovetto, che ’bene, lo diceno Ciulla, e Rajemo; parlanno Ciulla a Luzeio; e Rajemo a Ninfa.)

CIULLA

Chiena d’ammore...

RAJEMO

Chino d’affetto...

A DUE

Te stea aspettanno,

Pozzo di’ cchiù?

(Nc’è peo despietto.)

CIULLA

Cielo pe mmè!

RAJEMO

Sciorte pe mmè!

CIULLA

Chillo ch’affritto.

RAJEMO

Chella ch’affritto.

A DUE

Tene sto core,

Schitto si’ tu.

CIULLA

Sacc’jo, che ’pena...

RAJEMO

Sacc’jo, ch’affanno...

CIULLA

Zoffro pe te.

RAJEMO

Scardo pe te. (Se nne vanno Rajemo, e Ciulla da doje banne.)

SCENA III

LUZEIO, e NINFA.

LUZEIO

O lo ’bello arravuoglio!

A ’te mmo’, che te dice lo penziero?

NINFA

Frate mio; cca nc’è mbruoglio!

LUZEIO

È cchiù, che bero.

Chella mme mazzecava!

NINFA

Chill’autro ntrattagliava!

LUZEIO

Gra ’robba nc’è cca sotta.

NINFA

N’è netta sta colata.

LUZEIO

Nc’hanno fatta la ’botta:

Ciulla sarrà de Rajemo nnammorata.

NINFA

E Rajemo d’essa, sine:

È secura la tramma.

LUZEIO

Mm’avea ditto porzine,

Ca lo patre voleva...

NINFA

E ’chillo, ca la Mamma

Tanto gusto nn’aveva...

A DUE

E mmone; mare nuje!

Nc’hanno fatto mpastone a ’tutte duje. (Restano tutte duje penzuse, parlanno po nsegreto co ammoina secunno lo fatto.)

SCENA IV

PERNA, e MAFRONE, porzì co le ’giorlanne; e li stisse.

PERNA - MAFRONE

Mo’, ch’è tiempo d’allegrezza,

Non se penza a ’fatecà.

Viva Bacco, che nce dace

Chesta bella contentezza,

Che nce face Grellejà. (Senza lebbreca.)

LUZEIO

Uh! che ’brutto vervece!

NINFA

Uh! che ’bespone! (Parlano nfra de lloro senza esserese addonate de Mafrone, e Perna; e ntra tanto chiste jarranno tenenno mente attuorno, senza vedè Luzeio, e Ninfa; E Perna starrà co desgusto, pecché non hà trovata la ntrezzata de Soccavo.)

PERNA

Ih! Addov’è la ntrezzata,

Venuta da Soccavo!

MAFRONE

E che sacc’jo;

LUZEIO

Vecco Perna, e Mafrone:

Spejammo.

NINFA

Sì. (Luzeio, e Ninfa parlanno ntra de lloro, e ’se vanno accostanno a Perna, e Mafrone.)

MAFRONE

Che d’è? te si’ strobbata? (a Perna.)

PERNA

Che destino è lo mio!

Aggio la sciorte negra!

LUZEIO

Mo sapimmo quaccosa. (ntra de lloro.)

NINFA

Buono.

MAFRONE

E stammo a l’allegra:

Perzò staje regnolosa? (a Perna.)

Che scajenza t’afferra?

Uh! Luzeio e ’Ninfa!

PERNA

O! bemmenute.

MAFRONE

Schiavo.

PERNA

100

E ll’autre de Soccavo?

LUZEIO

So’ ghiute pe la Terra.

MAFRONE

Te lo ’siente? (A Perna.)

LUZEIO

Mafro’; dimme no poco:

Vuje state allegramente...

SCENA V

POMPONEIO, porzì co la giorlanna, e li stisse.

POMPONEIO

Embe’? che se fa lloco?... (Mentre parla a Mafrone, e a Perna, s’addona de Luzeio, e Ninfa.)

105

Gioje; mo’ so’ co ’buje. (a Luzeio e Ninfa.) Non e accossine? (secoteja a parlare co Perna e Mafrone.)

Cca s’hà da fa la festa,

E li nguadeie porzine;

E ’buje mme state cca?

LUZEIO

Sientete chesta. (A Ninfa.)

PERNA

Simmo venute schitto

110

Pe bedè la ntrezzata. (’Ntratanto, che ’chiste parlano; Luzeio, e Ninfa parlarranno segreto ntuorno a le parole, c’hanno ntese da Pomponeio.)

POMPONEIO

A ’nuje, sfelammo.

MAFRONE

Ch’è stato?

POMPONEIO

Ammarcia, e zitto:

Priesto, ca s’hà da fa.

PERNA - MAFRONE

Mo’ nce nne jammo.

Mo’, ch’è tiempo d’allegrezza

Non se penza a ’fatecà.

SCENA VI

LUZEIO, NINFA, e POMPONEIO.

LUZEIO

115

Mo’ sbroglio sto ’felato.

NINFA

Spiale.

LUZEIO

È piso mio. (Mentre Luzeio, e Ninfa derranno ste ’parolelle; Pomponeio tenerrà mente a Perna, e Mafrone, che cantano, sollecetannole co atte mute.)

POMPONEIO

E accossì fate mieje:

Matino, pe lo ’frisco.

LUZEIO

O! Ben trovato,

Pomponeio caro.

NINFA

Addio.

POMPONEIO

Cca nce parite belle.

NINFA

120

È grazeja toja.

POMPONEIO

Che d’eje?

Vuje state strobbatielle!

LUZEIO

Ajebbò.

NINFA

N’è bero.

POMPONEIO

(Auh! benaggia aguanno!) (Tenenno mente a Ninfa co d’uocchie ammoruse.)

E accossì, state buone?

LUZEIO

Pe ’servirete sempe.

NINFA

A lo commanno.

POMPONEIO

125

(Uh! che tentazejone!) (Porzì tenenno mente a Ninfa.)

LUZEIO

Ch’è stata sta sbentura!

Da quanno da Soccavo te partiste,

Pe te fa Saciardote de Chianura,

Maje cchiù no nce veniste!

NINFA

130

Mo’ s’è puosto ngrannezza.

POMPONEIO

(O vocca bella!)

LUZEIO

Saccio,

Ca state ncontentezza

Co tanta belle nguadeie: e ’nuje da fora.

POMPONEIO

Chesto cca non fa mpaccio,

135

Ca non so’ fatte ancora; e ’be commito

Pe sta sera, da mo’.

NINFA

Vengo.

LUZEIO

So’ ’lesto.

E li Zite chi so’?

POMPONEIO

Figliama pe ’ marito

Se piglia Rajemo; ed io Zenobbeia...

NINFA

140

Ajemmene! (Le vene comme n’addebbolemiento, e s’assetta a na preta.)

LUZEIO

E pò essere chesto? (Arraggiato.)

Che ’dice? addove? quanno... uh! comm’è stato!

POMPONEIO

Ch’è chello, che ve vene!

LUZEIO

O ’raggia!...

NINFA

O sciorta!

LUZEIO

O Luzeio desperato:

Aggio lo nfierno ncuorpo,

NINFA

O Dio! So’ morta. (s’addebbolesce.)

POMPONEIO

145

Chiano: ch’è chesto? Fremmate... (A Luzeio. Nchesta scena ha da fa Luzeio comm’a na fureia; e Pomponeio restarrà sorriesseto, non sapenno, che d’eje; E pecché sta attuorno a Luzeio pe l’appracare, non s’addona de Ninfa addebboluta.)

LUZEIO

So’ tutto fuoco: lassame.

(Ciulla co Rajemo.)

POMPONEIO

Siente.....

LUZEIO

So’ na fureia nfernale.

POMPONEIO

Ch’è stato?...

LUZEIO

Addonca figliata.

150

No nt’hà ditto maje niente?

POMPONEIO

Manco sale.

LUZEIO

Io traduto! lo sdigno ch’assomma.

Cchiù peo de na bomma,

Rojna, fracasso,

Sconquasso

155

Hà da fa.

Io gabbato! la botta no sferra.

Cana, perra

me ll’haje da paà.

SCENA VII

POMPONEIO, e NINFA addebboluta.

POMPONEIO

Che smorfeia corejosa!

160

Chisto è ghiuto mpazzia!....

Uh! chest’autra, che fa! che d’è sta cosa!

Ah! potta! Ninfa mia...

Chesta è morta, bonora!

NINFA

Ah! (se resente, e sospira.)

POMPONEIO

Che d’è? che d’è stato?

165

Oje Ninfa?...

NINFA

E campo ancora!

POMPONEIO

Datt’armo.

NINFA

Ajemmene! e Luzejo? (Va tenenno mente, e non vede lo frate.)

POMPONEIO

Che ’sacc’jo!

È ghiuto, che ’parea no speretato.

NINFA

Povero frate mio! (Mo’ se sose.)

Nn’have muta raggione.

POMPONEIO

E ’pe qua fine?

NINFA

170

Sì, ch’è stato traduto.

POMPONEIO

E da chi? va decenno.

NINFA

Da figliata, da chine?

Essa ll’hà ncancaruto.

POMPONEIO

Io no nte ntenno

Va meglio spaporanno.

NINFA

175

Mo’ te dich’io: da quanno,

Co ’tico, da Soccavo se partette,

co ’cinco, e cinco a dece,

Essa le mprommettette

De se pegliare ad isso;

180

E po ll’hà fatta negra comm’a ’pece.

POMPONEIO

(Che ’buono ncuntro è chisso!)

Sta cosa mo’ la sento!|

NINFA

Maje te ll’hà ditto?

POMPONEIO

Maje.

NINFA

Che trademiento!

POMPONEIO

O! è digno de piatate:

185

O! hà raggione; e ’pe ’chesto

Tanto t’affrje?

NINFA

Mm’è frate;

E ’po nc’è n’autro riesto,

Ca io.....

POMPONEIO

Vasta. Tu saje,

Ca mme t’aggio cresciuta peccerella;

190

E ’creo, ca saparraje,

Ca sempe fuste chella...

Chella....

NINFA

Chene?

POMPONEIO

(Uh! che mbruoglio!)

Chella... che de sto core...

Uh!...

NINFA

(Bravo! nce lo boglio.)

POMPONEIO

195

N’hà fatto no zoffritto (ajuto, o Ammore.)

NINFA

(Mo’ te mbroglio li pise)

POMPONEIO

E mmo’ nne faje porpette.

NINFA

Uh! janca mene!

Tu viene co ss’assise;

E a ’Senobbeia vuoje bene!

POMPONEIO

Che ’Senobbeia!

200

Vide tu si mme vuoje, ca io te mpatto,

Ch’a frateto do figliama,

E accossì scialarrimmo tutte quatto.

Che ’pienze, fata mia?

Sto contiento lo spero?

NINFA

205

Pò spontare sta via:

Cchiù a lo ’sì, ch’a lo ’no, sta lo penziero.

Voglio vedere mprimmo,

Si tu vuoje bene a mme;

E ’po,

210

Ntra sì, e ’no,

Puoje credere a lo ’sì,

Ca digno nne si’ tu.

Haje ntiso, che ’bolimmo?

T’abbasta chesto cca?

215

E mbe’

Speranno va,

Ne ghì

Trovanno cchiù. (Quanno Ninfa lebbrecarrà ll’areia, hà da scì Senobbeia a ’sentire, la quale, mentre chella canta, hà da fare atte mute de maraveglia, de ’raggia, e ’de desperazejone.)

SCENA VIII

POMPONEIO sulo.

POMPONEIO

Bene mio! bella botta!

220

Ed è botta de Masto! O gioja, o fata:

O facce de recotta:

Vocchella sceroppata...

SCENA IX

SENOBBEIA, porzì co la giorlanna, la quale è asciuta a la lebbreca de ll’areia de Ninfa; e lo stisso.

SENOBBEIA

Schiavo, si bella botta...

POMPONEIO

(O male juorno!)

SENOBBEIA

Schiavo...

POMPONEIO

(Mo’ nce so’ guaje!)

SENOBBEIA

225

Botta propeio de Masto.

POMPONEIO

(Uh! che ’taluorno!)

SENOBBEIA

Mme faje ll’ascio porzine! (Cca l’afferra pe lo vraccio, e lo fa votare ad essa.)

POMPONEIO

O! Senobbeia! cca staje?

Mo’ stea penzanno a ’tene.

SENOBBEIA

Ne? a mme propeio?

POMPONEIO

Sine;

230

Palomma, bella fatta.

SENOBBEIA

Ne, tradetore, a mmene?

Penzave a la scajenza, che te vatta. (Arraggiata.)

POMPONEIO

Che d’è ssa cera storta?

Chi t’hà menato a ’prete?

SENOBBEIA

Ah! sbreognato!

235

Mme faje la gatta morta?

Faje lo gniognio porzì? sbetoperato! (Cca cchiù s’arraggia.)

POMPONEIO

Seno’; tu staje nn’arrore...

SENOBBEIA

De cchiù? t’aggio vist’io,

Co la Sia Ninfa, fa lo strugge ammore. (Cca arraggiata; e smorfejosa.)

POMPONEIO

240

Tu che ’dice? co ’chella...

SENOBBEIA

A lo gaglione mio

Che fenizze facea la Segnorella! (Cca puro accossì.)

POMPONEIO

(Sta susta nce voleva!

Ora mo’ mme la joco.)

SENOBBEIA

245

E bì lo bello mio si se spremmeva!

Bene mio! bella botta... (Cca Senobbeia porzì smorfejosamente, hà da contrafare a ’Pomponeio; e isso hà d’abbottare, e sbruffare.)

POMPONEIO

(Bonora! mo’ l’affoco!)

SENOBBEIA

Botta propeio de Masto! o gioja, o fata...

POMPONEIO

No scompe sta canzone?

SENOBBEIA

250

O facce de recotta.

Vocchella sceroppata.

POMPONEIO

Haje ditto mone?

Sientete la resposta.

SENOBBEIA

Frabutto, che ’puoje dicere?

Che puoje di’, facce tosta? (Cca arraggiata, e ’chiagnenno.)

POMPONEIO

255

Ca tu non vaje tre cicere:

Ca no nce sierve manco pe na tacca:

Nce piace la cchiù tennera:

Volimmo la vetella, e ’no la vacca.

SENOBBEIA

Uh! lo ’brutto vecchiumma!

260

Guallaruso, scianchella! (Cca arraggiatissema, e ’porzì chiagnenno.)

POMPONEIO

Ora mo’ fa la scumma.

SENOBBEIA

Vi’ che lega pò fare

Co no voje scortecone na vetella!

POMPONEIO

Ora mo’ puoje crepare.

SENOBBEIA

265

Cano, perro, vegliacco!

Te pare cosa bona?

Pò fa chesto no viecchio

Saciardote de Bacco? (Cca puro, nfi’ a ll’uteme, stezzata, e chiagnenno.)

POMPONEIO

Ora mo’ sona.

Pe ’gaudè mm’apparecchio.

SENOBBEIA

270

Core de cano muorto:

Arma de Pesce cano fauzo, guitto,

A Senobbeia sto tuorto!

POMPONEIO

Sientete meglio chello, ch’aggio ditto.

Tu non sierve pe na tacca:

275

Non volimmo cchiù la vacca:

La vetella

Tennerella

Nce pejace de magnà.

Crepa, e zitto. Vi’ tu mone;

280

Si na bella

Popatella,

Pe no ’brutto mascarone,

È raggione de lassà! (Mentre se canta st’areja, Senobbeia hà da fa li cchiù atte desperate, e arraggiate de lo Munno sempe chiagnenno.)

SCENA X

SENOBBEIA sola.

SENOBBEIA

Uh! maramene, e ’comme mm’hà scartata

285

Lo senza fede, facce de jodio!

Uh! povera Senobbeia sbentorata! (Chiste hà da essere no riepeto; E se pò assettare a na preta; E ll’autro che ’bene appriesso ll’hà da dicere chiagnenno a ’selluzzo, e smanejanno.)

Bacco, tu non si’ Dio,

Tu no mmierete cchiune

De stare nfra li Dieje,

290

Si non faje tune le ’mennette meje.

SCENA XI

RAJEMO, e la stessa.

RAJEMO

Quanto cchiù bao penzanno

A Luzeio, e ’Ninfa, io cchiù mme veo perduto.

SENOBBEIA

(Mo’ mme crepa l’affanno;

Ajemmè, ajemmè lo core!)

RAJEMO

(Io so’ storduto!)

SENOBBEIA

295

(Bene mio! mo’ se fragne:

Mo’ lo jetto pe ’bocca, negra mene!)

RAJEMO

Mamma; che d’è? tu chiagne!

SENOBBEIA

Ah! figlio mio, chiagno pe mme, e ’pe tene. (Nzi’ cca Senobbeia hà sempe da sciabbacchejare; ed appriesso hà da parlà sempe comme chiagnenno.)

RAJEMO

Sì, ca lo ’saccio io puro;

300

E nché le ’bidde ccane,

Mme se fece lo core scuro scuro.

SENOBBEIA

De che parle? (Chesta parola Rajemo no ll’hà da sentire, essennose nzallanuto, e nfurejato pe ’chello, che ll’hà ditto la Mamma.)

RAJEMO

Li cane,

Pe ’fa sto bello ’butto

Vennero, Mamma mia.

SENOBBEIA

305

Chi dice?

RAJEMO

Luzeio, e ’Ninfa.

SENOBBEIA

Auh! che ’rutto

S’avessero lo cuollo pe la via. (ca parla nfurejata, e ’chiagnenno; e sempe accossì secoteja a parlà appriesso.)

RAJEMO

Donca è fatta la botta?

Perdo Ciulla pe ’chesto?

SENOBBEIA

Autra ’robba nc’è sotta:

310

Uh! che ’brutto sconquasso!

RAJEMO

E di’ lo riesto.

SENOBBEIA

Chillo brutto vecchione,

Chillo facce de mpiso...

RAJEMO

Pomponeio?

SENOBBEIA

Sso breccone

Se piglia Ninfa!

RAJEMO

E comme?

SENOBBEIA

Lo conzierto

315

St’aurecchie ll’hanno ntiso.

RAJEMO

Ah! potta d’oje!

Chesta e machena cierto!

SENOBBEIA

Cchiù chiantuta la vuoje?

Nce ll’hanno fatta fine.

RAJEMO

Uh! bonora!

SENOBBEIA

E accossine

320

Sarrimmo coffejate tutte duje:

Li nguadeie, che sta sera

So’ appontate pe ’nuje,

Mo’ cagnano bannera;

E mmo’...

RAJEMO

Ntenno l’appiello:

325

Luzeio sarrà de Ciulla?

SENOBBEIA

A, tanto bello.

RAJEMO

Comm’è stato: io mpazzesco!

Io sto tuorto zoffrì!... (Cca Rajemo se nne vo’ ghì nfureiato.)

SENOBBEIA

Fremma: addo’ vaje? (Senobbeia lo tene.)

RAJEMO

Sacc’jo, che ’fa: mo’ nn’esco.

Luzeio de Ciulla mia!... (Porzì Rajemo vo’ fojre.)

SENOBBEIA

Figlio, che ’faje? (Pure lo tene.)

RAJEMO

330

Chesto non sia pe ditto... (Chillo vo’ scappare.)

SENOBBEIA

Ntienne, sie’ beneditto. (Senobbeia l’afferra, e ll’hà da dicere tutto chesto co affetto.)

La mammarella toja; ntienneme a mmene:

A ’Ninfa ll’haje mprommiso:

Tu ll’haje voluto bene:

335

E la raggione vo’...

RAJEMO

Sì: t’aggio ntiso. (Chesto lo ’dice Rajemo, danno a ’canoscere d’avè ntiso, ca la Mamma parla pe lo fine sujo.)

SENOBBEIA

Accossì nc’accojetammo:

Se levano le ’baje...

RAJEMO

Sine: è lo vero.

SENOBBEIA

Che te pare? (Cca Senobbeia s’hà d’accommenzare a ’mettere ngusto.)

RAJEMO

(Abbonammo.)

SENOBBEIA

Te piace lo penziero?

340

RAJEMO

Sine Mamma mia:

Lassa fa a mme.

SENOBBEIA

(Non capo int’a la pelle.) (Cca mmo’ tutt’allegra.)

Beneditto te sia

Quanto latte haje zucato a ste zezzelle.

Sine: figlio; pegliatella,

345

Ca tu saje, ca Ninfa t’amma;

Ed a ’Mamma

Poverella

Faje la vera caretà.

Songo ancora,

350

A la bonora,

Tonnolella,

Frescolella,

Senza piecco; vide cca.

SCENA XII

RAJEMO sulo

RAJEMO

Ciulla de Luzeio mprimmo

355

Lo Cielo, a ’rompecuollo, hà da cadere:

Mo’ mmo’ lo ’bedarrimmo:

Aggio da fa vedere no scamazzo;

Ca si Mamma è mpazztuta, io non so’ pazzo.

Ma, che ’faccio? che spero?

360

Confonneno sto core.

Mbrogliano lo penziero

La Raggione, ed Ammore; e ’chisto, e ’chella

Trommentano chest’arma poverella.

La Raggione mme sforza

365

A ’mantenè la fede a Ninfa; e ’provo,

Ch’Ammore, co cchiù forza,

Ncasa, pe ’Ciulla mia: mpietto lo chiuovo.

Ah! ca mme veo perduto

Mo’, che ’Ninfa sta ccane!

370

Ajemmè! ca so’ storduto!

Mme songo tanta cane a ’chisto core,

E ’Ninfa, e ’Ciulla, e la Raggione, e Ammore. (S’assetta nzallanuto ncopp’a na preta.)

O sciorte! Ah!

SCENA XIII

CIULLA, e lo stisso.

CIULLA

Rajemo mio,

Che d’haje? che t’è socciesso?

RAJEMO

375

Ah! cchiù tujo non songh’io:

Te perdo, Ciulla mia.

CIULLA

Comme? di’ appriesso.

RAJEMO

Sì, ca te perdo...

CIULLA

Ajemmene!

Parla che d’è? ch’è stato?

RAJEMO

E ’pierde tune

380

N’ammante sbesciolato,

Che spasema pe ’tene.

CIULLA

O Dio! no cchiune:

Ch’è stato?

RAJEMO

Mo’ da Mamma (cca se sose.)

Aggio ntiso....

CIULLA

Che cosa?

RAJEMO

Ca nc’è na bella tramma:

385

Ca pateto se piglia

CIULLA

Chi?

RAJEMO

Ninfa.

CIULLA

Ninfa! ajemmene! io so’ confosa!

RAJEMO

E ’tu, che le si’ figlia,

Sarraje de Luzeio.

CIULLA

E ’chesto è bero?

RAJEMO

È cierto,

Ca Mamma nn’hà sentuto lo conzierto.

CIULLA

390

Machena è stata chesta.

RAJEMO

Sì, Ciulla mia.

CIULLA

Va trova cchiù confuorto:

Negra me, ca mo’ moro.

RAJEMO

Ed io so’ mmuorto.

RAJEMO

Siente, ammato giojello.

La sciorte de nuje duje

395

Stace ncopp’a no taglio de cortiello.

Tu saje buono, ca nuje

Nce trovammo mprommise,

Tu a Luzeio, ed io a ’Ninfa; e ’comme maje

Agghiustammo sti pise?

400

Sempe lo tuorto è nuosto.

CIULLA

Ajemmè! che ’guaje!

RAJEMO

Saje, ca pateto è tuosto;

E ’si mbe’ veo, ca chesta è mmenzejone.

De Ninfa, e ’Luzeio; puro

Avimmo sempe contra la Raggione.

CIULLA

405

O Cielo!

RAJEMO

Ed è securo,

Ca Pateto t’appretta; e pecché Ammore,

Che nc’attaccaje li core,

Non vo, che la nzertammo,

Na cosa se pò fa.

CIULLA

Qual’è?

RAJEMO

Fojmmo.

CIULLA

410

Fojre! e addove jammo?

Ca nce ncappano a ’bista, ed è cchiù peo.

RAJEMO

È lo vero: lo ’creo.

Si no facimmo chesta,

Ch’accossì scomparrà sta crepantiglia,

415

E scanzammo sto truono.

CIULLA

Che ’pienze fare?

RAJEMO

Attocca a ’te la festa

Fa la gatta cecata; e ’tu saje buono,

Ca ll’hà da fa la figlia,

O de lo Saciardote, quanno ll’ave,

420

O d’autro, lo cchiù digno.

CIULLA

Saccio.

RAJEMO

E becco la chiave,

P’aprì na bella porta a lo designo.

CIULLA

E ’comme, caro mio?

RAJEMO

Veccote lloco:

Quanno site a lo juoco,

425

Mme nne vengo da femmena vestuto;

E mmiezo a ’tutte quante,

T’abbraccio, e ’baso: e ’becco, ch’è fornuto.

CIULLA

Chiano: non passà nnante:

E l’anore lo bo’?

RAJEMO

De sta manera

430

Lo patre tujo mme t’hà da dà pe ’forza;

E ’potimmo scialà nnanze sta sera.

CIULLA

Sto voccone mme ntorza:

Sarria buono: ma... o Dio!

La vreogna, lo scuorno... uh! maramene!

RAJEMO

435

None, shiatillo mio:

Si propeio mme vuoje bene;

Armuzza de sto core,

Chesto cca s’hà da fare.

CIULLA

O anore! o Ammore!

RAJEMO

P’avè la contentezza,

440

Bbesogna fa sta caccia.

CIULLA

O Ammore, e quanto puoje! via su, se faccia.

RAJEMO

Sine; Popata bella;

Carella

De sto core;

445

Bbesogna arresecà,

Ch’Ammore

Accossì bo’;

E isso nce farrà

Rescì la botta.

450

Nò; Musso nzuccarato;

Non dobbetare, no:

Co n’ommo arresecato

La sciorte no nce pò,

Ca le sta sotta.

SCENA XIV

CIULLA sola.

CIULLA

455

Mara me! ch’aggio fatto!

Da cca dice l’anore:

Ca na: è buono sto tratto?

Da cca sogghiogne Ammore, ca p’ammore

È ezeta ogne ’cosa.

460

Ah! ca ntra anore, e ammore io so’ confosa!

Non saccio, che mme fare!

Mme sento int’a lo ’fuoco!

SCENA XV

MAFRONE, PERNA; e la stessa.

MAFRONE

Mo’ non pò cchiù strellare

Zi viecchio nuosto. E mbe’ che se fa lloco?

PERNA

465

Ah, ah.

CIULLA

Quanta rojne!

MAFRONE

Cca s’ha da fa la festa,

E li nguadeie porzine,

E ’buje mme state cca? (Nsi’ cca Mafrone hà da contrafare a lo viecchio; e Perna hà da ghì sempe redenno.)

CIULLA

(Nc’è peo desditta!)

PERNA

Mo’, ch’ogne ncosa è lesta

470

Nce volimmo spassare.

CIULLA

(O Ciulla affritta!)

MAFRONE

E ’che ghioquà de vozza

Volimmo fare....

PERNA

O! Ciulla!

MAFRONE

Cca si’ tu?

Via, sonammo tu, tù. (Mafrone, e Perna suonano la trommetta co la vocca, e diceno tutto chello, che ’bene appriesso a lo tuono de chille, che ’banno danno lo Santo Martino; E ntra tanto Ciulla hà da sta sempe sbaceluta, e ntutta la scena maje le darrà audienzeia.)

O fata mia, mal uocchie non te pozza,

475

Mo’ che lo maretiello pegliarraje.

PERNA

Che ’puozze sta contenta, e ’senza guaje;

E a ’cocchia, a ’cocchia fa li mascolune.

MAFRONE

Vejata te, ca sempe a ’buonnecchiune,

Allegra sguazzarraje mmiezzo a lo bene.

PERNA - MAFRONE

480

Haje sempe da gaudè, vejata tene.

Tu, tù, tu, tù: nc’avimmo guadagnato

Lo veveraggio nuosto, e ’sta nchiommato.

MAFRONE

Che d’è? tu staje marfosa!

CIULLA

Quanta guaje, negra me! (Ntra sé stessa.)

PERNA

Mo’ so’ scompute.

MAFRONE

485

Che ’guaje! che d’è sta cosa?

CIULLA

(O sciorta mia!)

PERNA

Si zita, co ’salute;

E staje tutta venino!

MAFRONE

Mme pare, ca te ruseche la rezza!

Mo’, che te chiove nzino

490

No trasoro de gusto, e d’allegrezza!

Non dice na parola! (A Perna.)

CIULLA

(O Luzeio, o Ninfa, e quale

Destino scajenzato...)

PERNA

Ih! parla sola! (A Mafrone.)

CIULLA

(Ccane v’hà carrejato....)

MAFRONE

495

Non sento manco sale! (A Perna.)

CIULLA

(Azzò che ’sia

Strazejata pe ’buje chest’arma mia?)

PERNA

Chest’è pazza! (A Mafrone.)

CIULLA

(Ca vuje

Mm’avite ntrovolate li contiente.)

MAFRONE

Che? l’avesse co ’nuje! (A Perna.)

PERNA

500

Che ’buoje, che ’faccia? (A Mafrone.)

CIULLA

(Sine.

Sine (ajemmè) ca pe lloro li trommiente

Mpietto mme so’ nasciute.)

MAFRONE

E ’se nfureia perzine! (A Perna.)

CIULLA

(Mannaggia quanno maje nce so’ benute.)

PERNA

505

Accostammonce. Oje Ciulla, che te vene?

MAFRONE

Che scajenza t’è data?

CIULLA

Che ’bolite da mene?

Jatevenne da cca. So’ desperata.

Peo de fureie scatenate

510

Fanno mpietto Anore, e Ammore,

Che spetacciano sto core,

E mme vottano a ’morì.

Ntra l’affanno,

Che mme danno,

515

Tutte duje, senza piatate,

Mme fracellano accossì.

SCENA XVII

MAFRONE, e PERNA.

MAFRONE

Chesto che d’è! che ll’è benuto a ’chessa?

PERNA

Che d’è sta mmenzejone?

MAFRONE

Ntiennela pe na pressa!

PERNA

520

Ha parlato cervone! Eh, saccio buono,

Che d’è.

MAFRONE

Che? so’ squasille?

PERNA

Ajebbò.

MAFRONE

S’è posta ntuono?

PERNA

Manco.

MAFRONE

So’ broccolille?

PERNA

La sgarre. Lo ’sacc’jo.

525

Chello, che d’eje.

MAFRONE

E ’dillo, core mio.

PERNA

Sì mbe’

So’ nzemprecella.

Sacc’jo, ch’ogne Zetella

Speresce pe d’avè

530

No muorzo de marito,

E sosperanno va:

Ah, datemillo, ah;

E nche se trova po,

Schefose,

535

Contegnose,

Nce sputano, puh, puh.

La segneno

E se strudeno,

E ncuorpo lo prodito

540

Lo stregneno,

Lo nchiudono,

E tutte accossì so’.

A? che nne dice tù?

MAFRONE

Mm’haje dato propeio gusto;

545

Te vorria dà n’abbraccio: veccotillo,

Ca nc’haje cuoveto justo!

PERNA

Crejanza no tantillo,

Fegliu’! n’abbraccio a mme? chesta è trestizeia.

MAFRONE

Chiano: che d’haje?

PERNA

Che d’aggio?

MAFRONE

550

Che d’è? senza melizeia,

Io te lo volea dà pe ’beveraggio.

PERNA

Vattenne, presentuso...

MAFRONE

Via mone...

PERNA

Facce tuosto...

MAFRONE

Ch’è stato?

PERNA

Schefenzuso.

MAFRONE

555

No cchiù; stammo a lo ’nuosto:

Aggio abburlato: ascota...

PERNA

Lo ’buoje dicere cchiune?

MAFRONE

Arrasso sia.

PERNA

Orsù, te la perdono pe sta vota.

MAFRONE

E accossì: Perna mia;

560

Haje ditto da Majesta,

Da saccente nfi’ mponta!

PERNA

Chesta è la cosa, chesta.

MAFRONE

È chesta, sì; ma siente st’autra jonta.

Vuoje sentì, sì, o none?

PERNA

565

Via su.

MAFRONE

Siente, ch’è bella.

PERNA

Va decenno, spapura.

MAFRONE

Non vide Ciulla mone

Tanto contegnosella?

Chesto, saje quanto dura? nfi’ a sta sera,

570

Ca craje ll’haje da vedè d’autra manera.

Lo peccerillo,

Mprimmo hà paura

De lo gattillo;

Po s’assecura.

575

E nce pazzeja,

Se piglia gusto,

Se lo guanceja;

E ’fa la Zita,

Che se ’marita,

580

Justo

Accossì.

Si sta la sera

Tutta sgregnosa,

De mala cera;

585

Lo juorno appriesso

È n’autra cosa,

Non è cchiù chella,

E allegra, e ’bella

La vide ghì.

590

Tu mone a ’chesso

Haje, che nce di’?

PERNA

Mafro’: mme si’ resciuto!

MAFRONE

Che mme saje pe ’campierchio?

PERNA

Io t’avea pe ’cetrulo nzemmentuto;

595

Mo’ veo, ca saje sopierchio!

MAFRONE

Non ciaschje? a, ca tune

Non si’ de le strafine!

PERNA

Io, mone?

MAFRONE

E ’tu porzine;

Co no poco de cchiune;

600

Haje da fa comm’a ll’autre zetolelle:

Quanno po te mmarite.

PERNA

Co chi ll’haje?

Non sarraggio de chelle:

Ih! sarria na vreogna! (uh! fosse craje.)

MAFRONE

Ll’avimmo da vedere.

PERNA

605

Addonca mo’ pe ’chesto

Tu no mme pigliarrisse pe ’mogliere?

MAFRONE

Sì: Fata mia: so’ ’lesto:

Comme vuoje tune. A Pe’, tu mme coffje.

PERNA

Spassammonce ah n’è bero:

610

Ah! tu ll’arma mm’affrje:

Ajemmè! ca lo penziero

Sta sempe appriesso a ’tene.

MAFRONE

O nennella mia d’oro!

Addonca mme vuoje bene?

PERNA

615

Ah! ca n’aggio cchiù abbiento:

Mara me! ca pe ’te mme strujo, e ’moro

Pe ’te sto core allumma,

E no doce trommiento lo conzumma,

Vuoje cchiù? Tu no ’respunne?

MAFRONE

620

Sta cosa addo’ è sguigliata!

Tu troppo mme confunne!

PERNA

Ah! poverella me! mme nc’haje ncappata!

MAFRONE

A Pe’; mme lo ’faje credere:

Va chiano: mazza franca.

PERNA

625

Fuorze non pò soccedere?

A ’tene, che te manca?

Tu si’ schiecco d’ammore:

Ss’uocchie so’ doje sajette,

Che sperciano sto core

630

Pe te...

MAFRONE

No cchiù, ca già so’ cuotto, o bella,

A le mmano mmardette:

Sgargejà nce volimmo na mascella.

PERNA

Tu si’ giovene, e ’si’ bello

Ne la femmena vo’ cchiù,

635

Quanno s’hà da mmaretà.

MAFRONE

O giojello!

Vi’, ca tu

Mme faje mettere ngrannezza,

N’autro ’tanto mme faje fa.

PERNA

640

Tu si’ schiecco de ’bellezza,

E sto core

Tutto ammore

Già pe ’te squaglianno va.

MAFRONE

Sine, bella, sine, gioja,

645

Ca da mo’ chest’arma è toja,

Mpietto a ’tè se vene a sta.