Patrò Calienno de la Costa

Patrò Calienno de la Costa, Venezia, per Giovanni Molino, 1709

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

Patro’ Calienno de la Costa

Commeddia pe museca de lo Dottore Agasippo Mercotellis, posta ’n musica da lo segnore Antonicco Arefece.

Addedecata al prencepe D. Lovise Pio de Savoja.

Azzellentissemo Segnore.

Comme cà V.A. pe lo munno porta na nnommenata, ch’è lo puorto, addo’ se vanno à sarvà tutte chille povere marenare, che da quarche tempesta de maro s’ashiano mieze scancarejate, n’haggio fatto malo lo pensiero, canoscenno ca non scompeva pe mmò lo male tiempo, de fà fà mazza franca à Patro’ Calienno de la Costa, co farenillo trasì dinto à ssò bello puorto, e azzò li sbottorune, che le ponno dà le mmale lengue nò le facciano sbattere nfaccia à qua scuoglio pe fenirelo de sfracassà ntutto, e pe tutto, metterelo sotta la protezzione de V.A., la quale porta pe ghiennimma l’havè piatà de tutte chiste povere sbentorate, e pecché è ommo diota, e non se rentenne de letterummeca, nò l’aggio fatto arresecare de dà le laude mmeretevole a la Grannezza Vosta, ca sarria stata na cosa fora de li fore, mà mettennole no taccariello mmocca, l’aggio fatto schiaffà sotto li piede de V.A., pregannolo, che no le faccia quà scuorno, vedendolo accossì unto, e besunto, e comme ca à gran Segnore piccolo presiento, suppreco la gran commesechiamma Vosta accettarene lo buono armo, azzo co chesso pozza havè la groleja de mme vantà sempe; mente le faccio reverenzia co tre passe arreto.

De l’Azzellenzia Vosta

Schiavottiello de li Schiave Vuoste

Francisco Ricciardo.

So le gatte, e pe la pressa, se sole dicere, ca fanno li figlie cecate, ora considera mò che bolea fà io poverommo, essennome attoccato arremmedeà na chelleta co no secutorio dereto ca n’haggio potuto fà de manco de non ntroppecà à quarch’ vuosso de pruno; e co tutto ca chi ntroppeca, e non cade, dice, ch’avanza de cammino, à me è socciesso tutto lo contrario, pocca havenno ntroppecato à chiù de no scuoglio me so’ ashiato tre punte arreto, comme havesse jocato a lo juoco dell’oca, co trovareme a no laberinto pe non sapé contà nfi a ciento, e esse pratteco de li punte, e me pare già de sentì pe ogne pentone de vico, cierte che se ne veneno caude, e fetiente pe bolé fà fruoffece, tanto che pe no le sentì me ncaforchiarria a lo culo de lo munno; ma và tiene le lengue de la gente: ca na vota pe d’uno tocca a tutte havé ssa penetenzia, pe esserese puosto à concià cierte ossa rotte, che pe forza haje da dicere Dio te la manne bona; ma io che so’ eccia cuorvo m’haggio fatta na protesta, ca s’è fatta ssa chelleta, azzò ne crepano chille che non nc’averranno sfazeone, e à chille che nc’havarranno quarche sorte de gusto lo Cielo le manne a mucchio li fellusse, che so’ chille, che fanno cantare li cecate, e te so’ baso le mmano.

Avertemiento.

Ciert’Aerette, che stanno à lo Primmo Atto co cierte poco vierze de Recetativo songo de n’azzellente Autore, e pecché piacevano grannemente se nce songo mese.

Le Perzune, che parlano.

PATRO’ CALIENNO sotta nomme de Ciommo.

RENZA mogliere de Patro’ Calienno.

SCIARRILLO Caporale, che pò se scopre pe Patre de Lella, e Fortonato.

FORTONATO guarzone de Patro’ Ciommo.

LELLA tenuta comm’à figlia da Ciommo, e Renza.

PERNA tenuta pe Schiava da Sciarrillo, che po se scopre pe Nora figlia a Patro’ Ciommo.

LUCCIO nnammorato de Lella.

MENIELLO guarzone de Sciarrillo.

La Scena se fegne a la Chiazza de la Loggia.