| |
| |
| Patrò Calienno de la Costa, Venezia, per Giovanni Molino, 1709 |
| a cura di Paologiovanni Maione |
|
|
|
|
|
| ATTO SECUNNO |
|
| SCENA PRIMMA |
|
| LUCCIO, e FORTONATO. |
|
| LUCCIO |
| Addonca essa t’ha ditto |
| Ca ngè st’appontamiento? |
| FORTONATO |
| Essa sì. |
| LUCCIO |
| Propio Lella? |
| FORTONATO |
735 | Signorsine ngè vuo’ quarche stromiento? |
| LUCCIO |
|
| Si non faccio mò na botta, |
| E non crepo de dolore, |
| Cride ammico ca sto core, |
| Sarrà cierto de pepierno. |
|
740 | Pocca già mm’esce da sotta |
| La speranza d’havè Lella, |
| E mme pare chesta chella, |
| Justo pena de lo nfierno. |
|
| Si non faccio &c. |
|
| FORTONATO |
745 | E pure è bero mò, cà n’aje raggione, |
| De tanto desperarete. |
| LUCCIO |
| E comme a dicere? |
| FORTONATO |
| Pocca sarrà mpossibele, |
| Che Lella puozze perdere, |
| Lassa chiagniere a mmene, |
750 | Ca Perna è già bolata |
| Meglio havesse fornuto |
| Tutte li juorne mieje. |
| LUCCIO |
| Ca si’ mpazzuto! |
| Chisso mio si ch’è mbruoglio, |
| Non chisso tujo. |
| FORTONATO |
| E bà ch’è vuoglio, e vuoglio. |
755 | Dimme prita de Luccio, |
| Te vuo’ mette co mmico, |
| Che so’ n’ammaro, e povero guarzone. |
| N’aggio lietto, o saccone; |
| Ma tù che te manie |
760 | Quaccosa de lo tujo, |
| Si nge la cirche schitto |
| À Patro’ Ciommo, te la dace a sisco; |
| Comme no! che ngè dubbio? |
| LUCCIO |
| Ah ca stò frisco! |
| Lella, tù mò già saje, ca manco pinto, |
765 | Mme pò vedé; ma tù che faje de Perna |
| Chello che te dà gusto |
| Sempe ngè qua remmedio. |
| FORTONATO |
| Ma puro, va decenno. |
| LUCCIO |
| Io mo che saccio, |
| Si nò sta co Sciarrillo |
770 | Starrà co quarcun’auto, |
| E a tté chesso che mporta, |
| Stia co chisto, o co chillo, |
| Vasta ca te vo’ bene, |
| E quanno tutto manca |
775 | Mprimmo ch’essa se venne, |
| Tù nne la può foire. |
| FORTONATO |
| Eh bavattenne. |
| LUCCIO |
| Mmalora Fortonato |
| Pare ca mme coffie, |
| Co stò parlà che faje. |
| FORTONATO |
| Ah ca sbarie! |
|
780 | Pè mmè sulo è benuta sta chippeta |
| Sto zeffunno, st’ammara scajenza |
| E a mmè tocca de trevoleja. |
|
| Nò lo bide ch’apposta s’è mmoppeta |
| E pe mmene quann’essa accomenza |
785 | No la scompe si strutto non mm’ha. |
|
| Pe mmè &c. |
|
| SCENA SECONNA |
|
| LUCCIO sulo. |
|
| LUCCIO |
| Stà a bedé Luccio ch’hà da fà la sciorta |
| T’ha d’arredduce a signo, |
| Che t’agge d’annegà pe desperato, |
790 | E pò se vedarrà chi ha chiù raggione |
| Se Luccio, o Fortonato. |
|
| SCENA TERZA |
|
| LELLA da la Fenesta, e lo stisso. |
|
| LELLA |
| Aspetta Fortonato, e bi’ si vene! |
| LUCCIO |
| Chessa mme pare Lella! |
| Lella mia, core, fata! |
| LELLA |
795 | Bello giovane mio, da me che buoje? |
| LUCCIO |
| Ché d’è? ché t’aggio fatto? |
| LELLA |
| E n’auta vota mò, tù cò chi ll’aje? |
| LUCCIO |
| Lella che cera è chessa, che mme faje? |
| LELLA |
| Dimme nè, tu co mmico, |
800 | Ng’aje quarcosa da spartere, |
| Che buoje ch’io mo te faccia bona cera? |
| LUCCIO |
| E comme Lella, e comme |
| Comme tiene sso core? |
| LELLA |
| Lo core mio è de carne, e comme, e comma, |
805 | Jo aggio ntiso dicere |
| Ca stà vicino Romma. |
| LUCCIO |
| N’è lo ve’ perra cana, |
| Non aje gusto vedereme morire? |
| LELLA |
| Vi’ ch’aggio da sentire! |
810 | Chi t’ha ditto che muore, |
| Chesso a mmé che mme mporta, |
| O muore, o campe io che nne voglio fare! |
| LUCCIO |
| Mme farrisse nn’annore |
| Co chessa bella razia? |
| LELLA |
815 | Chi Razia vaje ascianno, aje fatto arrore. |
| LUCCIO |
| Oh Dio Lella, ch’è troppo terannia, |
| Scumpela mone, muovete a piatate, |
| De vedereme muorto. |
| LELLA |
| Arrasso sia; |
| Bene mio, chi te sente |
820 | Se crederrà a lo mmanco, |
| Che t’aggio fatto quarche mancamiento. |
| LUCCIO |
| E comme n’è lo ve’? |
| LELLA |
| Che stordemiento! |
|
| Si sapisse, ch’avesse chiù core, |
| Pe poté fa co tutte l’ammore, |
825 | Dice puro ca pare ca tè, |
| Ma si saje ca nne tengo uno sulo, |
| A che serve lo fa sto cuculo, |
| Io non saccio pe mme lo perché. |
|
| SCENA IV |
|
| LUCCIO sulo. |
|
| LUCCIO |
| Oh Torca renegata! |
830 | Credo che non aje core, ò sì be’ l’aje |
| Cierto sarrà nforrato |
| De pelle de diascange; |
| Va cana senza fede, |
| Che pozz’essere acciso chi te crede. |
|
835 | Luccio te può cojetà, |
| Ca Lella nn’è pe ttè, |
| Essa t’hà fatto già |
| Mo sso decreto. |
|
| Ch’aggio chiù da sperà, |
840 | So mmuorto maro me, |
| E me pozzo schiaffà |
| N’aglio dereto. |
|
| Luccio, &c. |
|
| SCENA V |
|
| CIOMMO, e FORTONATO. |
|
| CIOMMO |
| Non saccio che mme cunte! |
845 | Comme (n’è ghiuorno ancora) |
| Comme so’ biecchio io mò, vi’ che mmalora! |
| FORTONATO |
| Io manco aggio parlato, e tu te nzurfe, |
| Fuorze te voglio male! |
| Non saje sì n’ommo fatto. |
| CIOMMO |
| Oh ch’anemale! |
850 | O fatto, o sfatto mo chi t’addemmanna |
| Sse cinco rana, che me faje... |
| FORTONATO |
| Mmalora: |
| Vorria sapere... |
| CIOMMO |
| A ttè chi te nce chiamma |
| A ste rotola scarze, |
| Che mme vuo’ fa lo masto? |
| FORTONATO |
855 | Scumpela mò che serve sto contrasto. |
| CIOMMO |
| Io dico da ddo’ viene, e tu respunne |
| Ca so’ cepolle. |
| FORTONATO |
| Via, non nne sia cchiù. |
| CIOMMO |
| Non haje raggione tù; che bello nchiasto? |
| FORTONATO |
| Sia ditto dinto maro. |
| CIOMMO |
860 | Tu sempe parle sparo |
| Zumpe da palo mperteca, |
| Vide ca già se mmerteca |
| La varca, e tu la vuoje |
| Fenire d’annegà. |
| FORTONATO |
| Tu mo che dice? |
865 | Ch’annegà, co chi l’aje? |
| Saje pecché, ca non saje |
| Ca Perna meza meza s’è bennuta. |
| CIOMMO |
| E tu mo mme lo dice? |
| E comme non poteva |
870 | Accattaremell’io, |
| E a despietto de Renza |
| Schiaffaremella sotta |
| E comme no? |
| FORTONATO |
| Nnanze te scenna gotta. (da parte.) |
| CIOMMO |
| Si fosse stato fine |
875 | De nce lassà meze le robbe meje, |
| Cano mm’aje arrojonato. |
| FORTONATO |
| E mbè che d’eje? |
| Fuorze non ncè remmedio: |
| (Mo che me vene fatta, |
| Mme nne voglio servì de lo jodizio.) (da parte.) |
| CIOMMO |
880 | Tu parle sulo, e l’aje sempe pe bizio. |
| FORTONATO |
| Aggio ditto ca fuorze n’è bennuta, |
| Chi sa pe quarche mpiedeco. |
| CIOMMO |
| E po si no, va chiammace lo miedeco. |
| FORTONATO |
| Mo senterraie le botte. (da parte.) |
885 | Li denare so’ leste? |
| Ca Perna te la porto nnanze notte. |
| CIOMMO |
| Fuorze ca sarrà pizza, |
| Che bella cosa quant’arrive, e mpizza. |
| FORTONATO |
| Vasta che nne vuo’ fà, |
890 | Io nc’aggio da penzà. |
| CIOMMO |
| Mo mm’addecrie! |
| FORTONATO |
| E si da n’ora, che mme perolie! |
| CIOMMO |
| Che denare nce vonno? |
| FORTONATO |
| Ciento piezze allommanco. |
| CIOMMO |
| Ciento piezze? e chi l’ha biste ancora? |
| FORTONATO |
895 | E tu lassala ire. |
| CIOMMO |
| A la mmalora! |
| Già mme trovo a ss’abballo, |
| Se be’ n’haggie no chiallo |
| Vasta, lassa, che Renza |
| Se nn’esca da la casa |
900 | Ca nne voglio soscià na cauzettella, |
| Che tene nfunno de na casciolella. |
| FORTONATO |
| Chesto priesto ha da essere |
| Nfra nat’ora allo mmanco. |
| CIOMMO |
| Tu dice priesto, e io vommeco lo sanco. |
|
905 | Nfra n’at’ora, va pensanno, |
| Ca mme pare justo n’anno, |
| Che stò gusto aggia d’avé. |
|
| E mme sento pe allegrezza, |
| Tutto nfuso, oh che docezza |
910 | Bene mio chesto che d’è. |
|
| Nfra, &c. (senne trase.) |
|
| FORTONATO |
| Sto viecchio è pazzo, e saccio ca vo ire |
| Nseggia a lo primmo lietto, |
| E io nc’aggio n’addelietto |
915 | Ca lo voglio fenì de fa mpazzire. |
|
| SCENA VI |
|
| LUCCIO, e lo stisso. |
|
| LUCCIO |
| A cchia vela che porta? |
| Fortonà, Fortonato, oje non nce siente! |
| FORTONATO |
| Oh frate bello mio sta allegramente |
| Ch’è botata la sciorte. |
| LUCCIO |
920 | E comme? |
| FORTONATO |
| Vasta, ca lo maccarone |
| Nce l’ha fatto cadé dinto a lo caso. |
| LUCCIO |
| Ammico fedelone, |
| Lassa quanto t’azzecco mo no vaso. |
| FORTONATO |
| Ora vi’ si ncè nullo, che nce senta. |
| LUCCIO |
925 | Da ccà non ncè nesciuno. |
| FORTONATO |
| Vi’ da chell’auta vanna. |
| LUCCIO |
| Io non nce vego |
| Manco n’anema penta. |
| FORTONATO |
| Tu sta attiento da coppa, e io da sotta. |
| LUCCIO |
| Vuo’ che te dica, si’ no caca sotta. |
| FORTONATO |
930 | Siente cca, Patro’ Ciommo, |
| De Perna è nnammorato, e a chisto pizzo, |
| S’è benuto co mmico a confedare. |
| LUCCIO |
| E mbè de chesso io che nne voglio fare? |
| FORTONATO |
| E siente frate, io spero |
935 | D’avè Perna a ste mmane pe tutt’oje. |
| LUCCIO |
| Mme rallegro de tutte |
| Le contentezze toje: |
| Ma a mme che mporta chesto? |
| FORTONATO |
| Chiano no poco, e sienteme lo riesto: |
940 | Io mò, atta de ddino, |
| Saje si so’ no mmammino? |
| L’aggio data speranza |
| De nce la fa accattare, |
| E mo mo li denare |
945 | Mm’ha ditto ca mme porta. |
| LUCCIO |
| Che denà la mmalora che lo torca, |
| Ca sta peo de me. |
| FORTONATO |
| Vasta l’arrobba |
| A Renza, isso mm’ha ditto. |
| LUCCIO |
| E Lella già pe mene è ghiuto ammitto. |
| FORTONATO |
950 | Io non saccio che dice |
| Ca Lella puro è lesta; |
| Mo te dico lo nchimmo, |
| Sarrà bella la festa, |
| Ca tutte doje nne le fojarrimmo. |
| LUCCIO |
955 | Fortona’ se faje chesso, |
| Mme cacce de lo nfierno, |
| E te voglio esse schiavo nne naterno. |
| A DUE |
|
| Cierto si l’annevine, |
| Farrimmo na gran festa, |
960 | Pocc’ogne cosa è lesta, |
| E non nce po mancà. |
|
| Co Perna, e Lella nzino |
| No parmo cresciarrimmo, |
| E tutte duje volimmo |
965 | Pò nzemmora scialà. |
|
| Cierto, &c. |
|
| SCENA VII |
|
| RENZA, e po LELLA, che esceno da la casa. |
|
| RENZA |
| Lella jesce cca fora, |
| Piglia no poco d’aria, |
| Lo frisco de chest’ora, |
970 | Jova assaje, e non poco, |
| Jesce che faje chiù nchiusa dinto lloco? |
| Jesce che puozz’avè la bona sciorta! |
| Che singhe benedetta, (esce Lella.) |
| Siede cca no tantillo (s’assettano.) |
975 | Lo bi’ te siente aprì lo speretillo. |
|
| Figlia mia facce d’argiento |
| Pe pigliarence de liento |
| Vuoje sta nchiusa nn’è lo ve’? |
|
| Che bo dì chist’uocchio tinto, |
980 | Trasutiello nninto nninto? |
| Chella facce nnargentata |
| Mo addov’è? si smanciata, |
| Figlia mia quarcosa ncè. |
|
| Figlia, &c. |
|
985 | Ora tu mm’aje da dicere, |
| Che d’è tanta colereca, |
| Tu poco, e niente megnie, |
| Te veo ca sempe chiagnie. |
| LELLA |
| Niente Gnamare mia. |
| RENZA |
990 | Addonca che bo’ dì sta fantasia? |
| LELLA |
| Sto dinto à quatto mura, |
| E beo cà... (chiagne.) |
| RENZA |
| Mo che d’è? parla, spapura |
| Ca si be’ non sì sciuta da sti rine, |
| Te voglio bene sine, |
995 | Chiù che me fusse figlia, |
| E quanno faje sto chianto, |
| Tutta mme schianto, e sento na schiattiglia. |
| LELLA |
| Comme non vuoje che chiagna, |
| Sì veo ca pe mmè schitto |
1000 | La sciorta non fà niente pe deritto, |
| Saccio ca so’ traduta. |
| RENZA |
| Da chi mò? |
| LELLA |
| Vasta. |
| RENZA |
| E bà ca si’ mpazzuta. |
| LELLA |
| Comme te pare cosa, |
| Ch’io mò che so’ fegliola, |
1005 | E non so’ quà bavosa |
| M’aggia da mmaretare à gusto d’aute, |
| Pò co Sciarrillo pò. |
| RENZA |
| Nn’è chiù de chesso! |
| Io mme credea, che fosse |
| Quarcosa cchiù mportante; |
1010 | Ma Le’ non dubbetare, |
| Ch’io saccio pecché Pateto |
| Vo’ fà ssa parentezza. |
| LELLA |
| Isso troppo la tira, e pò la spezza. |
| RENZA |
| Mà Ciommo l’hà sgarrata, |
1015 | Sto juorno no lo vede, |
| Isso mo che se crede |
| Ca te vo’ da a Sciarrillo, |
| Ca ncè lo gusto sujo? |
| LELLA |
| Gniamà se chesso veo io mme ne fujo. |
| RENZA |
1020 | Lella non dubbetare, |
| Ch’à gusto tujo, tu t’aje da mmaretare. |
| LELLA |
| Nuje avimmo lo bene into a la casa, |
| E po nce lo volimmo fà scappare. |
| RENZA |
| Che dice nè, tu de quà bene parle? |
| LELLA |
1025 | Fuorze ca Fortonato |
| Non è no buono giovane, |
| Che?... |
| RENZA |
| Vasta, t’aggio ntiso. |
| LELLA |
| Gniamà, tieme’, mme faje morì de riso. |
| RENZA |
|
| Io be’ saccio ca vuoje Fortonato, |
1030 | E fà cunto ca l’aggio penzato, |
| Chisto gusto volerete dà. |
|
| LELLA |
|
| Sì gniamà ch’è no buono fegliulo, |
| Non hà bizie, è no giovane sulo, |
| E pò vasta mme fà pazzejà. |
|
| SCENA VIII |
|
| MENIELLO, e po SCIARRILLO. |
|
| MENIELLO |
|
1035 | Anga Nicola, si’ bella, e si’ bona |
| Si bella mmaretata |
| Quanta corne tiene ncapo? |
| Quatto. |
|
| E si’ cinco havisse ditto, |
1040 | A cavallo fusse scritto, |
| A cavallo de na rapa |
| Quanta corna tiene ncapo? |
| Sette... |
|
| SCIARRILLO |
| E si dece havisse ditto (lo vatte.) |
1045 | Ste mmazzate havisse scritto |
| Mulo cuornuto, figlio de pottana. |
| MENIELLO |
| E mbè? chesso che d’è? |
| SCIARRILLO |
| Nuje jammo buono affé, che fusse acciso! |
| Te dico viene priesto, |
1050 | E tu te vaje ncantanno pe la via! |
| Già è ora de magnare, |
| E avimmo d’aspettare Ussignoria; |
| Cammina nzallanuto! |
| MENIELLO |
| Io mò propio so’ ghiuto... |
| SCIARRILLO |
1055 | Comme mò? ha doje ora? |
| Ora vi’ che mmalora! |
| Io t’aggio da levà propio sso vizio; |
| Siente vi’, quanno vaje pe no servizio, |
| Se non miette l’ascelle, |
1060 | Te voglio fà sta facce felle felle. |
|
| SCENA IX |
|
| FORTONATO, e li stisse. |
|
| FORTONATO |
| Sciarrillo senza collera. |
| SCIARRILLO |
| Non bi’ ca stò schefienzia. |
| FORTONATO |
| Che nce vuo’ fa è fegliulo agge pacienzia. |
| SCIARRILLO |
| Non saccio che mme cunte, |
1065 | Và portalo a la casa sto fegliulo! |
| Ca tu non saje, quanta nne fà sso mulo! |
| E a le bote mme fa cierte azzeune, |
| Che mme fa venì propio |
| La collera da vascio a li tallune. |
| FORTONATO |
1070 | Orsù non nne sia chiù. |
| SCIARRILLO |
| Non nne sia chiune: |
| Cammara’ va decenno |
| De Lella mia che nn’eje? |
| Mme porta niente affetto, |
| Dì, mme nnommena maje? |
1075 | Ca tu mò be’ lo ssaje; |
| Che te nne pare hà gusto |
| D’avè d’apparentà co chisto fusto? |
| FORTONATO |
| (Ah ca mo te l’abbotto |
| Co quarche pataracchia.) (da parte.) |
1080 | Lella, Sciarrì, no la passà pe rracchia, |
| Ca sa lo cunto sujo, |
| Comm’ognie creatura; |
| Pare poca fortura |
| Avè à ttè pe mmarito, |
1085 | Ch’ogn’autra che sarria, |
| Mbè se contentarria perde no dito. |
| SCIARRILLO |
| Ca sarrà chessa la primma, |
| Potta d’oje! tè manco male. |
|
| Nce vorria no Razionale, |
1090 | Pe poterele contà. |
|
| Va contanno tu nfra tanto, |
| Miette Checca la Romana, |
| Che pe mme fece no chianto, |
| Che restaje co la scazzimma; |
1095 | Pò na fravola Tedesca, |
| Bella, janca, chiatta, e fresca, |
| Puccia appriesso Melanese; |
| Betta pò che co lo canto, |
| (Chesta mò è Beneziana.) |
1100 | Te facea cose de spanto; |
| Nne vuo’ chiù? de sto paese |
| Nce sarria po Fata, e Lella, |
| Lisa, Dea, e Cannetella; |
| Fortona’? no miezo munno |
1105 | Nn’averraggio affé scartato, |
| Senza l’aute che stofato, |
| L’aggio ditto tunno tunno, |
| Mme volite à lo dereto |
| Propio fà precepetà. |
|
1110 | Nce vorria no Razionale, &c. |
|
| FORTONATO |
| Io nne creo chiù de chesso, e mperzò dico |
| Ca Lella mò co ttico |
| Ng’averrà quarche sfizio. |
| SCIARRILLO |
| Fortona’ mo mme pare ch’aje jodizio! |
1115 | E tu ccà che nce faje? |
| MENIELLO |
| Niente... |
| SCIARRILLO |
| E bà ncoppa; |
| Vo sta puro ndozzana |
| Lo schefenzuso tè, |
| Ma tale sia de me, |
| Si non te cardo affé bona la lana. |
| FORTONATO |
1120 | Parlammo addove tene, |
| Saje che ncè, ca nzi ntanto, |
| Che non nne cacce Perna da la casa, |
| Non senne po fà niente. |
| SCIARRILLO |
| Uh tè! ca mme l’aje fatto venì a mmente, |
1125 | Voglio j ascianno mperzò quarche mercante, |
| Che se l’accatta, e mme dia li contante. |
| FORTONATO |
| L’autr’jere nc’era ccà no Ragoseo, |
| Che ghiea facenno accattute de schiave, |
| Chi sa, fuorze lo veo? |
| SCIARRILLO |
1130 | Vi’ Fortonato vi’ previta toja, |
| Vi’ si può fà quarcosa, |
| Che mme pare mill’anne, che mme sposa. |
| FORTONATO |
| Io mo a chesta pedata |
| Te vao servenno. (se ne trase.) |
| SCIARRILLO |
| Si, va gioja mia, |
1135 | E si lo truove torna a chessa via. |
|
| SCENA X |
|
| SCIARRILLO, e MENIELLO da lo Barcone. |
|
| SCIARRILLO |
| Oie scorzella addo’ si’ scorze’ scorzella. |
| MENIELLO |
| Veccome cchà Patrone |
| Stò ncoppa à lo barcone. |
| SCIARRILLO |
| Si ciunco, non può scennere? |
| MENIELLO |
1140 | Comme vorria sapé t’aggio da ntennere. |
| SCIARRILLO |
| Si ntennere mi bello. |
| Fà chello che dich’io, (senne trase Meniello.) |
| Voglio che saglie, e scinne à gusto mio |
| Chesta sì vi ch’è bella; |
1145 | Ah ca te voglio fà grattà la zella. |
| MENIELLO |
| Gnorsì nuje simmo cchà. |
| SCIARRILLO |
| Mò che si’ sciso a fà? |
| MENIELLO |
| Non mm’aje chiammato? |
| SCIARRILLO |
| Mò nge vorria no schiaffo, mà ben dato; |
| Perna pecché n’è scesa? |
| MENIELLO |
| Jo mme credeva, |
1150 | Che bolive à mmè schitto. |
| SCIARRILLO |
| E non saje fà na cosa senza ditto. |
| MENIELLO |
| Mò te la faccio scennere. |
| SCIARRILLO |
| Priesto a rotta de cuollo, |
| Jo t’aggio d’arreduce muollo muollo. |
|
| SCENA XI |
|
| MENIELLO, PERNA, e SCIARRILLO. |
|
| MENIELLO |
1155 | Oje Perna, curre, priesto. |
| PERNA |
| Che d’è, che d’è ch’è stato! (da dinto.) |
| MENIELLO |
| Scinne a bascio. |
| PERNA |
| Mò scenno. (da dinto.) |
| MENIELLO |
| E priesto, priesto. |
| PERNA |
| Mò scenno t’aggio ditto. (da dinto.) |
| MENIELLO |
| Nò lo siente Sciarrillo comme strilla. |
1160 | E mò mò bene mio, cà non è anguilla. (à Sciarrillo.) |
| SCIARRILLO |
| Chi t’hà data ssa pressa; |
| Che fuorze ngè quarcuno, |
| Che stesse pe mmorì? |
| MENIELLO |
| Chest’è chiù bella vi’! |
| PERNA |
| Mà tanta è stata (esce.) |
1165 | La pressa, che mm’hà data |
| Cà poco nge voleva, |
| E mme facea provà la gradiata. |
| SCIARRILLO |
| Ora vi’ la mmalora! |
| Si chessa mò cadeva, |
1170 | Che t’aveva da fare? |
| Lo riseco nge steva |
| De perde senza gusto li denare: |
| Perna mia ca n’è nniente |
| Via statte allegramente, |
1175 | Ca mò mò trovarraje n’autro Patrone; |
| Nc’avarrai sfazione, |
| Pocca me ll’hà propuosto Fortonato, |
| No mercante aggarbato. |
| PERNA |
| E n’auta vota mò chi Fortonato! |
1180 | Jo mme credea securo. |
| Che chiù non se parlasse de sta cosa, |
| Chi Fortonato mò! |
| SCIARRILLO |
| Chillo guarzone |
| De Patro’ Ciommo cchane. |
| PERNA |
| Uh mmara mene! |
| SCIARRILLO |
| E mbè che d’è sta mingria che te vene! |
| PERNA |
|
1185 | Lassateme morì |
| Già che traduta so’, |
| Da chi manco penzà |
| Mme lo potea! |
|
| Po esse ch’accossì |
1190 | Sì mme tradesce, ò nò, |
| Fenenno de campà |
| Chiù nò lo bea. |
|
| Lassateme &c. |
|
| SCIARRILLO |
| À ttè mò che t’è dato! |
| PERNA |
1195 | Tanto che Fortonato |
| Procura farme vennere? |
| SCIARRILLO |
| Sio Capitanio mio nò là vuo’ ntennere. |
| MENIELLO |
| Vi che trascurzo a luongo! |
| E io n’autro poco stongo, e mme l’ammarcio! |
| SCIARRILLO |
1200 | Sù jammongenne suso, |
| Iammo magniammo primmo, |
| Ca pò da pò magnà ne parlarrimmo. |
|
| SCENA XII |
|
| FORTONATO, e CIOMMO. |
|
| FORTONATO |
| Ca và propio a ciammiello! |
| CIOMMO |
| Prita de Fortona’ sta ncellevriello, |
1205 | Non mme facisse stà dint’à lo fuoco; |
| Chisse so’ li denare, |
| E nn’aggio fatto poco; |
| Tù schitto mò manie chisso negozio, |
| E tù schitto lo ssaje; |
1210 | Chi sà lo Farfariello |
| Lo facesse sapé che non sia maje. |
| FORTONATO |
| E chi lo bo’ sapé? |
| CIOMMO |
| Accossì pare à ttè. |
| FORTONATO |
| Chi? |
| CIOMMO |
| Chella streca. |
| FORTONATO |
| Le’! Sabbato è craje. |
| CIOMMO |
| Non mme nge fà penzà potta d’aguanno, |
1215 | Meglio mm’avesse cuoto no malanno; |
| Si schitto se lo penza |
| Mme nne pozzo foì. |
| FORTONATO |
| Chi è chessa? Renza? |
| CIOMMO |
| Massame se s’addona, |
| Ca nge manca l’argiamma, |
1220 | Comme ca sempe pare aggia l’abbramma |
| Nge farria propio mmattere l’aggrisso. |
| FORTONATO |
| Lassa fà a mmé, vuoje auto? |
| Non lo saccio sapé manco a mmé stisso; |
| Fà cunto ca mme l’aggio |
1225 | Miezo miezo scordato. |
| CIOMMO |
| Comme mò, tù che dice Fortonato? |
| Vi ca te l’aggio date li denare. |
| FORTONATO |
| Chè paura aje? chi te le bo’ negare? |
| CIOMMO |
| Nò, ch’aggio ntiso dicere |
1230 | Ca te l’avive già mieze scordato, |
| Non saje parlammo chiaro, a lo dereto... |
| FORTONATO |
| Patro’ vuo’ pazzeà |
| Jo vuoze gnefecà, |
| Ca porto sso negozio secreto. |
| CIOMMO |
1235 | À la bon’ora sia, |
| Mò vedimmo che faje, |
| Pò sacciemello a ddì, ca a la marina. |
| Senz’autro tù mme truove. |
| FORTONATO |
| Nzarvamiento. |
| CIOMMO |
| Sta vota morarraggio de contiento! |
|
| SCENA XIII |
|
| FORTONATO, e po PERNA da lo Barcone. |
|
| FORTONATO |
1240 | Ah ca vuoje restà bello |
| Contiento, e cotolato |
| Si sta cosa mme resce (da se.) |
| Comme l’aggio pensato, |
| Nge songo, si mme chiammo Fortonato. |
| PERNA |
1245 | Nn’è lo ve’ sio Mercante! |
| Vi che belle azziune, |
| Uscia mme va facenno! |
| FORTONATO |
| Oh Perna mia! |
| PERNA |
| Perna toja! co chi l’aje |
| Aie core de chiammarme co sto nomme |
1250 | Perna mia! tradetore, facce stuorto! |
| FORTONATO |
| Sienteme primmo, e po vi s’aggio tuorto. |
| PERNA |
| T’aggio sopierchio ntiso, e mme sà à mmale |
| Ch’aggio visto, e sentuto, |
| Quanto cchà zitto, zitto |
1255 | Mo nnante avite ditto |
| Co Lella tradetore. |
| FORTONATO |
| Chiss’è lo mbruoglio mo, chiss’è l’arrore; |
| Ca Lella mm’ha parlato, io no lo nego. |
| PERNA |
| E tù negalo appriesso, |
1260 | Ca l’aggio visto io propio, sà pe chesso, |
| Vi’ si mme può negà chello che beo. |
| FORTONATO |
| Ma si be’ mo canosco, |
| Ca Lella mme vo’ bene, |
| Io fegno. |
| PERNA |
| Uh mmaramene! |
1265 | Aie faccie de lo dicere? |
| Si, muovete a pietate, |
| De ste lagreme meje pe caretate! |
| FORTONATO |
| E sienteme bon’ora, |
| Sienteme, o mo mme scanno. |
| PERNA |
1270 | Miettetenge co affetto. |
| FORTONATO |
| E no vi gioja mia ca chesso è nganno. |
| PERNA |
| Ma sié, già ch’aggio visto, |
| Ca tu già non puoje esse chiù lo mio |
| Fa cunto ca so’ morta. |
| FORTONATO |
| Perna... ddio |
1275 | Addo’ sì, viene cca ca n’è lo vero |
| Quanto te pienze no; se nn’è trasuta? |
| E comme maro me sta ncancaruta! |
|
| Tanno t’addonarraje |
| Quanto te so’ fedele, |
1280 | Quanno se scoparrà |
| Tutto sso ntrico. |
|
| E a priesso a tanta gnaje |
| Sarrà Zuccaro, e mele |
| L’avere da scialà |
1285 | Nchietta co mmico. |
|
| Tanno &c. |
|
| SCENA XIV |
|
| RENZA, e LELLA. |
|
| RENZA |
| E tù mo che nne saje |
| Ca Fortonato ncrenarria co tico. |
| LELLA |
| Ca ncrenarria co mmico? |
1290 | Avea penzato già de diretello. |
| RENZA |
| Che nnaje visto qua signo? |
| LELLA |
| I tanto bello! |
| Isso propio mm’ha ditto. |
| RENZA |
| E che t’ha ditto? |
| LELLA |
| E che mm’avuto dicere? |
| Ca pe mme senne scola, |
1295 | E mm’ha dato parola |
| Gniama non saje chi è chillo |
| Ca vo ntutte li muode |
| Guastà sta parentezza co Sciarrillo. |
| RENZA |
| E tu a chesso te fide? |
| LELLA |
1300 | Gniamà che dice nè, tu che te cride? |
| Non saje comme è ammoruso, |
| Non saje quant’è cianciuso, |
| Ca n’è niente fantasteco, |
| Tanto che non sia maje, |
1305 | Se jettarria pe mme da coppa a n’asteco. |
|
| SCENA XV |
|
| SCIARRILLO, e li stisse. |
|
| SCIARRILLO |
| Lo Cielo mme ve guarde tutte nchietta |
| Belle fegliole meje. |
| LELLA |
| Uh che desdetta! |
| Chisso mo nge volea! (da parte.) |
| RENZA |
| (Via mo che d’eje?) (à Lella.) |
| Sio Caporale mio |
1310 | Singhe lo bemmenuto. |
| SCIARRILLO |
| Sciavo vuosto sia Lella, |
| À lo servizio tuio gioja mia bella; |
| V’aggio visto da suso, |
| E pe ve reverì, so’ sciso a bascio. |
| LELLA |
1315 | (Tropp’agra è la facenna.) (da parte.) |
| RENZA |
| (Feglio’, saccie fà l’ascio.) (à Lella.) |
| SCIARRILLO |
| Sia Rè, vuo’ che te dica, |
| Pare che la sia Lella l’ha co mmico; |
| Nò l’aggio fatto niente. |
| RENZA |
1320 | Ca non troppo se sente |
| Bona la figlia mia; |
| Mara me, che bo avé co Ussignoria! |
| SCIARRILLO |
| Addonca fata mia sta alleramente, |
| Ca mo mo te cojete, e piglie stato, |
1325 | E passarrà sto male che t’è dato. |
| LELLA |
| Vuje mo co chi l’avite? |
| Non saccio, che decite! |
| SCIARRILLO |
| E botate sia Lella, |
| Vota cca ssa faccella, |
1330 | No bi ca l’arma mia, si martoreggia, |
| Per te crudel! |
| LELLA |
| (Chiammatele na seggia.) (da parte.) |
| RENZA |
| (Io te dico che fignie, aggie pacienza, (a Lella.) |
| E ntienne a chello, che te dice Renza.) |
| SCIARRILLO |
| Non mme sta chiù ntosciata, |
1335 | Famme na bona cera, |
| Ca po te voglio da la bona sera. |
| LELLA |
| Sù ch’avimmo da fare? |
| SCIARRILLO |
| Ascota un quanco, |
| E mira, anzi vedrai più d’un pertuggio, |
| Or quinci, or linci al core, |
1340 | Pe donne trase, & esce sempe Ammore; |
| Anzi più dir vorrei, |
| Che tu cotella sei, |
| Per cui tanti trofei, |
| De nostri semidei, |
1345 | Siento mo sti conciette! |
| Del sangue ostil cotanto |
| Alzaro i già caduri mausolei. |
| RENZA |
| Sio Caporale mio, mo chi le ntenne |
| Tutte sse cose? |
| LELLA |
| E chello ch’è lo peo, |
1350 | Ca manco saje chi è chillo che le benne. |
| SCIARRILLO |
| Chesso è mparlà ntoscano, |
| Comme ca so’ sordato, |
| Ed aggio cammenato miezo munno. |
| RENZA |
| Pe chesso parle tosco, e spute tunno. |
| SCIARRILLO |
1355 | Nn’aggio visto Cetate! |
| Avaraggio scurzo da le Lecca, à la Mecca, |
| E pe nfi addo’ se secca |
| Lo Maro quann’è stata. |
| RENZA |
| Uh bella cosa! |
| LELLA |
| (Vide che bella smorfia coriosa.) (da parte.) |
| SCIARRILLO |
1360 | Io non te conto mo potta d’aguanno |
| Del mio valor, ca faccio male à dicere |
| Pocca tutte lo sanno; |
| Ma siente chesto schitto, |
| Uscia mo che se crede, |
1365 | So’ na cosa tremenna, |
| Che te faccio tremmà da capo à pede. |
|
| Fatte cunto, si mme spasso |
| A bolé fa lo gradasso, |
| Io te faccio no fracasso, |
1370 | Che te faccio speretà. |
|
| Quanno po so’ sciuto ncampo, |
| Truono, e lampo |
| Fatte arrasso |
| Li nnemmice te l’abbampo, |
1375 | Senza manco le toccà. |
|
| Fatte, &c. |
|
| SCENA XVI |
|
| Patro’ CIOMMO, e li stisse. |
|
| CIOMMO |
| Mal’uocchie no ve pozzano, |
| E Dio ve guarda ncocchia. |
| RENZA |
| (Uno ne cade, e n’auto ne sconocchia.) (da parte.) |
| CIOMMO |
1380 | Bello co l’ora bona! |
| SCIARRILLO |
| A tiempo, à tiempo. |
| CIOMMO |
| Non so’ mulo pe cierto. |
| RENZA |
| Ca si’ benuto justo à lo consierto. |
| CIOMMO |
| Jate secotejanno. |
| SCIARRILLO |
| Non saje, te stea spassanno sse fegliole. |
| RENZA |
1385 | La lengua vatte addo’ lo dente dole. |
| SCIARRILLO |
| Quanno volimmo fa sso gaudeammo? |
| LELLA |
| Facite vuje, ch’io fora me nne chiammo. |
| CIOMMO |
| Rè, parla è gusto tujo? |
| RENZA |
| Spialo a Lella. |
| CIOMMO |
| Io parlo a ttene, e tu te vuote à chella. |
| SCIARRILLO |
1390 | Si dice buono Renza, |
| Sia Lella simmo leste? |
| LELLA |
| (Uh che scajenza!) (da parte.) |
| CIOMMO |
| (Nce sarrà quarche mbruoglio (da parte.) |
| S’io mente parlo ccà se vota fuoglio.) |
| SCIARRILLO |
|
| Priesto jammo a fa banchette. |
|
| RENZA - LELLA |
|
1395 | Sarrà nzuonno st’allegrezza. |
|
| CIOMMO |
|
| E co gusto, |
|
| LELLA |
|
| E co prejezza |
|
| CIOMMO |
|
| De porcelle, |
|
| SCIARRILLO |
|
| E mmaccarune, |
|
| A DUE |
|
| Nce volimmo sazeà. |
|
| CIOMMO |
|
| Ca Sciarrillo va pe sette |
|
| SCIARRILLO |
|
1400 | De pollastre, |
|
| CIOMMO |
|
| E de pecciune, |
|
| SCIARRILLO |
|
| E de grieco, |
|
| CIOMMO |
|
| E marvasia. |
|
| LELLA - RENZA |
|
| Lo malan che dia ve dia. |
|
| CIOMMO - SCIARRILLO |
|
| Nc’avarrimmo d’abbottà. |
|
| Priesto, &c. |
|
| SCENA XVII |
|
| FORTONATO, e LUCCIO vestuto da Turco. |
|
| FORTONATO |
1405 | Co sta varva a posticcio, |
| Che buo’ non te conosce manco mammeta. |
| LUCCIO |
| Nò, si so’ conosciuto, io mme l’alliccio. |
| FORTONATO |
| Che paura aje? |
| LUCCIO |
| Io subbeto mme nfosco. |
| FORTONATO |
| Co tutto ch’io lo saccio, |
1410 | Poco nce vole, e manco te canosco. |
| LUCCIO |
| Ora via attaccammo |
| L’aseno addove vole lo Patrone, |
| Ma saccio Fortona’ ca la sgarrammo. |
| FORTONATO |
| Siente a mè saje parlà niente foresteco? |
| LUCCIO |
1415 | Comme mò? |
| FORTONATO |
| Verborazia a n’auta lengua, |
| Non saje parlà torchisco. |
| LUCCIO |
| E tu nne saje? |
| FORTONATO |
| Ca comme, se po dicere |
| Ca ntorchia songo nato |
| Mò da quatt’anne, che nne so’ tornato. |
| LUCCIO |
1420 | A ddavero, ò mm’abburle? |
| FORTONATO |
| Vasta che nne vuo’ fà, parlammo d’auto, |
| Vedimmo, se potimmo fa sto sauto, |
| Che d’è non nce vo niente |
| Vasta che nn’aggia na nfarenatura. |
| LUCCIO |
1425 | Tu dice buono tu, ma aggio a paura, |
| Si nietto non mme nn’auzo, |
| D’essere mpiso pe no turco fauzo. |
| FORTONATO |
| E che d’aje frate, co tutto lo sinno |
| Ch’aje da fa co quà ninno? |
| LUCCIO |
1430 | A le mmano mmardette. |
| FORTONATO |
| Sta ncoppa a l’appontato. |
| LUCCIO |
| E tanto bello, |
| Fortona’ frate mio sta ncellevriello. |
| FORTONATO |
| Vuoje auto, che sta notte |
| Tutte doje le chiavammo into a na varca, |
1435 | E nce nne retirammo a quà comarca. |
| LUCCIO |
| Ora accossì pozz’essere. |
| FORTONATO |
| Ma frate mio abbesogna |
| Mprimmo farne nzentore |
| Perna de ssò trattato. |
| LUCCIO |
1440 | E priesto mò, mò sì ca mm’aje frusciato, |
| E si priesto n’ascimmo da sto mbruoglio |
| Io te voto le spalle, e mme la coglio. |
| FORTONATO |
| Senza collera frate |
| Via mò comme vuo’ tu, |
1445 | Non te scordà lo nomme, |
| Braimmo statte attiento. |
| LUCCIO |
| Aje nfettata na nave de pezziente. |
| FORTONATO |
| Io tozzolo nfra tanto, |
| E tu no te partì da chillo canto. |
|
| SCENA XVIII |
|
| SCIARRILLO, FORTONATO, e LUCCIO. |
|
| SCIARRILLO |
1450 | Che d’è sto frusciamiento, (da coppa.) |
| N’hà manco no momiento, |
| Che me ne so’ sagliuto; |
| Chi è lloco? |
| FORTONATO |
| È Fortonato. |
| SCIARRILLO |
| Oh bemmenuto! |
| FORTONATO |
| Sciarrì, ccà sta l’amico. |
| SCIARRILLO |
1455 | Oh bravo cammara’, mò so’ co ttico. (senne trase.) |
| LUCCIO |
| Io saccio ca no resce, |
| Senza pilo sto manto. |
| FORTONATO |
| Da ccà a bello vedere nò ncè tanto. |
| LUCCIO |
| Sarria bello, e restasse |
1460 | Co sta varva de stoppa. |
| FORTONATO |
| Lo Cielo nce n’arrasse! |
| E zitto frate, ca nuje jammo mpoppa. |
| SCIARRILLO |
| Ben venga cammara’, che nc’è de nuovo? |
| FORTONATO |
| Nuje simmo leste. |
| SCIARRILLO |
1465 | E bia dammo a lo chiuovo, |
| Lo Mercante addov’è? |
| FORTONATO |
| Sta ccà Braimmo, |
| Braimmo fatte nnante, |
| Ca chisto è lo Patrone de la Schiava. |
| LUCCIO |
| Bono star, ma bolir prima bidir. |
| SCIARRILLO |
1470 | Dice buono pe cierto, |
| Ma dimme sio Braimmo, |
| Li denare so’ leste, |
| Ch’è chello che chiù mporta primmo primmo? |
| FORTONATO |
| Securo, nò le tiene? |
| LUCCIO |
1475 | Dinar, quanta bolir? |
| SCIARRILLO |
| Mò te nne viene! |
| Oh manco male, ca nne songo asciuto! |
| Chiammala Fortona’. |
| FORTONATO |
| Mò si’ servuto. |
| SCIARRILLO |
| Compa’ de ddove si? |
| LUCCIO |
| De Nabole mi star. |
| SCIARRILLO |
1480 | Si de Napole Uscia? |
| LUCCIO |
| Star de Nabole si’ de Romania. |
| SCIARRILLO |
| Si si’ mmiero Levante, |
| E che arte è la toja? |
| LUCCIO |
| Mi star Mercante. |
|
| SCENA XIX |
|
| FORTONATO, PERNA, e li stisse. |
|
| FORTONATO |
| Fa comme te dich’io, che paura aje? |
| PERNA |
1485 | Che sso’ sse marcangiegne che mme faje |
| Tradetore aje raggione! |
| FORTONATO |
| Oh Dio Perna ca chessa è nfenzione. |
| SCIARRILLO |
| Fortonato mme disse, |
| Ca jere Ragoseo. |
| LUCCIO |
1490 | Mi non sabir, chi stara Raguseo. |
| PERNA |
| Ah ca tu non mme gabbe, |
| No mme la faje ssa tramma, |
| Non saje ca già t’aggio scopierto à ramma? |
| SCIARRILLO |
| Uscia quanno se parte? |
| LUCCIO |
1495 | Mi bartir brist, briste. |
| FORTONATO |
| Tu mme vuo’ pe mmarito, |
| E saccie fegne, e accetta lo partito. |
| SCIARRILLO |
| Mò che d’è sso contrasto? |
| FORTONATO |
| Non bo’ che se le tocca chisso tasto. |
| SCIARRILLO |
1500 | Ah ca vuo’ pazzeà fegliola mia, |
| Se pò cojetare quanno vole uscia. |
| PERNA |
| Ma sta pressa che d’eje? |
| SCIARRILLO |
| Ca mm’aggio d’aggiustà li fatte mieje. |
| LUCCIO |
| Dicir bonu Batrun. |
| SCIARRILLO |
| Mà prita toja? |
| PERNA |
1505 | No ncè tiempo nfi’ à craje? |
| SCIARRILLO |
| Non saccio co chi l’aje! |
| Tu mò te nn’aje da ire da sta casa. |
| Vuo’ che stia co lo culo into à la vrasa? |
| LUCCIO |
| E burchì non bulir? |
| FORTONATO |
| Fatte capace, |
1510 | Ntienne, ntienne à sso fusto. |
| PERNA |
| Mprimmo me scanno, che te dà sso gusto. |
| SCIARRILLO |
| E fuorze chi ssa zita, che mme piglio, |
| Non bo’ a la casa manco no coniglio. |
| PERNA |
|
| Io maje so’ sazia, (s’addenocchia nnanze à Sciarrillo.) |
1515 | Né mm’accojeto, |
| Nfi che sta razia |
| Non mm’aje da fà. |
|
| Che d’è nfi a craje? |
| Già ch’è la reto |
1520 | Tu non porraje |
| Me la negà. |
|
| Io maje, &c. |
|
| SCIARRILLO |
| Ora via, comme vuoje, |
| Te sia fatta la razia. |
| FORTONATO |
| Uh mannagg’oje! (da sé.) |
| PERNA |
1525 | Tu cride, ca non saccio, |
| Quanto vuo’ fà? |
| FORTONATO |
| Và stirate sso vraccio. |
| Dille ca mò ha da essere. |
| LUCCIO |
| Nò Badrun, nò Bordio, |
| Mò bolir scava. |
| SCIARRILLO |
| Eh frate, và connio! |
| LUCCIO |
1530 | Barchetta star biliata. |
| SCIARRILLO |
| E che d’è mò ssa pressa, che v’è data? |
| FORTONATO |
| Saccio che tenne piente. (à Perna.) |
| SCIARRILLO |
| Aspettammo nfi a craje ca non è niente. |
| FORTONATO |
| E craje venire vole! |
| SCIARRILLO |
1535 | Non saje, fuorze chi sà, |
| Se vo’ lecenzià co sse fegliole, |
| Ca so’ bone perzune. |
| PERNA |
| Sciorte famme morì, non pozzo chiune. (senne trase.) |
| SCIARRILLO |
| Via ca pò nce vedimmo jammoncenne. (se ne traseno.) |
| LUCCIO |
1540 | Chisso n’hà ntentione de la venne. |
|
| SCENA XX |
|
| FORTONATO, e LUCCIO |
|
| FORTONATO |
| Mmalora tu nce curpe, |
| Co ssa pressa ch’aje avuto, |
| Ca mm’aje propio storduto, |
| Io la volea avisare. |
| LUCCIO |
| E che pe chesso. |
| FORTONATO |
1545 | Ca mme l’aje fatta fare la frittata. |
| LUCCIO |
| Tu l’avisse avisata, e stravesata, |
| Da me che buje, |
| Te voglio dà lo riesto. |
| FORTONATO |
| Che fegliola ostenata! |
| LUCCIO |
1550 | Tosta de chierecuoccolo! |
| FORTONATO |
| Me farria spertosà mò co no spruoccolo. |
| LUCCIO |
| Meglio te vaje a mpennere, |
| Ca nò ne pierde sango. |
| FORTONATO |
| A non bolerme ntennere, |
1555 | A non credere manco |
| A tante juramiente ch’aggio fatto, |
| Cierto ca so’ restato stoppafatto. |
| LUCCIO |
| Mò a che pienze, datt’armo, |
| Oh bene mio che fossero |
1560 | Accossì li guaje mieje, |
| Li mieje si so’ mmalanne |
| Ca Lella manco l’aggio pe cient’anne. |
|
| Si be’ trica, saje ca vene, |
| Pe te ss’ora addesiata, |
1565 | E sarrà chiù nzuccarata, |
| De lo gusto ch’aje d’avè. |
|
| Ma pe mme no nce sso bene, |
| No nce muodo, né nce taglio, |
| Mo m’accido, e mme sfeccaglio, |
1570 | Ca sarrà meglio pe mmé. |
|
| Si be’ trica, &c. |
|
| FORTONATO |
| N’è malo lo pensiero! |
| E non nce può far’auto. |
| LUCCIO |
| Si addavero! |
| FORTONATO |
| No vuzzo hai d’abboscare |
1575 | E mmiero a le doje ora |
| Trovate a la marina. |
| LUCCIO |
| E che buo’ fare? |
| FORTONATO |
| Tu te può fegurà, ca Lella è lesta, |
| Li guaje sarrà co chesta. |
| LUCCIO |
| De farele passà sta fantasia? |
| FORTONATO |
1580 | E de la fà votare à boglia mia. |
| LUCCIO |
| Jammoncenne da ccà, ca simmo ntise. |
| FORTONATO |
| Be’ s’anno d’aggiustà ssi contrapise. |
|
| SCENA XXI |
|
| PERNA, e MENIELLO. |
|
| PERNA |
| E che d’è, ca me faje mò sto piacere? |
| MENIELLO |
| Ora sù và decenno, stà a bedere. |
| PERNA |
1585 | Và trova Patro’ Ciommo. |
| MENIELLO |
| Non te l’aggio ditt’io. |
| PERNA |
| Vi’ primmo si ncè Renza. |
| MENIELLO |
| E bà connio! |
| Tu co tutto lo sinno |
| Me vorrisse passà pe Roffeano? |
| PERNA |
1590 | Zitto vascia la voce, parla chiano! |
| Io non saccio che dice, siente à mmene, |
| Non è cosa de male. |
| MENIELLO |
| Nò, è de bene! |
| PERNA |
| Voglio ch’isso m’accatta da Sciarrillo, |
| Pe no mme vedé mmano à quà berrillo. |
| MENIELLO |
1595 | Ah, ah, mò t’aggio ntiso. |
| PERNA |
| E mò nce vaje? |
| MENIELLO |
| E battenne non saccio co chi ll’aje, |
| Mme vuo’ fa esse acciso? |
| Lo Patrone m’adaccia! |
| PERNA |
| No ne! non mancarrà chi me lo faccia |
1600 | E si be’ mo sapesse, arrasso sia, |
| Puro de ghi a trovà chillo che scria. (se ne trase.) |
| MENIELLO |
| Viene ccha, mo te servo, |
| Comme stace nzorfata! |
| Te te, vi che carrera, ch’ha pigliata! |
|
1605 | Tiene, tiene, e pò all’utemo scappo, |
| Ca st’affizio de porta pollaste |
| Senza vagno no nge chi lo fa. |
|
| Ma che nn’aggio a lorreto, no tappo |
| Leva, le’, non parlà de ssi taste, |
1610 | Perna mia, ca tu vuoje pazzeà. |
|
| Tiene &c. |
|
| Ma io mo che nge perdo! |
| Già me trovo a ssa via, |
| Pare na scortesia, |
1615 | Meglio è che me la levo mo datuorno |
| E si ngè chella vecchia io me nge scorno. |
|
| SCENA XXII |
|
| RENZA, e lo stisso. |
|
| RENZA |
| Chi è lloco? |
| MENIELLO |
| Uh ne, tù si’? chi vaje ascianno? |
| RENZA |
| Oh bravo affé chiss’è n’auto malanno, |
| Tù n’aje toppetiato! |
| MENIELLO |
| Io no lo neo, |
1620 | Ma no vao ascianno a ttè. |
| RENZA |
| Già te lo creo; |
| Sta vota non si’ ghiuto pe deritto, |
| Nn’è lo ve’ faccie stuorto? |
| MENIELLO |
| Ll’erva che non vogl’io me nasce all’uorto! |
| RENZA |
| Ma puro, và decenno. |
| MENIELLO |
1625 | Che cosa? |
| RENZA |
| Uh comme ncoccia! |
| MENIELLO |
| Renza non saccio che me vaje vennenno. |
| RENZA |
| Comme tiene à la corda, |
| Nn’è lo ve’? |
| MENIELLO |
| Ma si’ frate, |
| Non te lo pozzo dicere? |
| RENZA |
1630 | E pecché? |
| MENIELLO |
| Vuoje sapé |
| Lo pecché, lo peccomme, e lo pe quanto? |
| Bello mo te la canto; |
| Perna non mm’hà ditt’auto, |
| Che non te lo decesse. |
| RENZA |
1635 | E si trovave Ciommo, |
| Tù mo che le decive? |
| MENIELLO |
| Ah ca no mme nge cuoglie, |
| Ch’aje da fà co l’argive; |
| Tù vorrisse sapé |
1640 | Chello che Perna vo’ da Patro’ Ciommo? |
| RENZA |
| E pecche no; io mo te lo sdellommo, |
| Si me scappa la freoma sto fraschetto, |
| Parla, o mo te strafoco. |
| MENIELLO |
| Renza vi ca te perdo lo respetto. |
| RENZA |
1645 | E tu vallo decenno. |
| MENIELLO |
| Renza comme malanno |
| Tù vuo’ che te lo dica, |
| Si no lo può sapere, |
| Ca lo manna preganno |
1650 | Che la voglia accattare da Sciarrillo, |
| Non te lo pozzo dì, vi ca mo strillo. |
| RENZA |
| Zitto mo no lo dicere, |
| No lo boglio sapere; uh facce mia! |
| E troppo via via, |
1655 | Ma chesso mo chi se lo credarria! |
|
| SCENA UTEMA |
|
| CIOMMO, e li stisse. |
|
| CIOMMO |
| Tutte le cose meje vanno à la smerza |
| Io aggio ditto à chillo, (da se.) |
| Che ghiesse co lo vuzzo nfi à la Preta, |
| E non s’è bisto chiune, |
1660 | Pe mme fa mozzecà sempe le deta. |
| RENZA |
| Via sù ca mo te passa sta cecoria. |
| CIOMMO |
| Sta a bedé nge sarrà quarc’auta storia! |
| MENIELLO |
| Lloco siente le botte, |
| Bello auzà de cappotte, |
1665 | Che boglio fà. |
| RENZA |
| Ch’è mo, ca non è niente, |
| Tù mo t’accatte Perna, |
| E staje chiù alleramente. |
| CIOMMO |
| Che Perna, ch’accattà, tù co chi ll’aje |
| Llo mmanco che mme passa pe la mente, |
1670 | Io che nn’aggio da fa de chisse guaje? |
| MENIELLO |
| E no nge auto panno! |
| RENZA |
| Ora vi’ sso fegliulo nn’è nnozente, |
| E chella scrofa lo va mmezeanno. |
| CIOMMO |
| Chi è chessa? |
| RENZA |
| La sia Perna, |
1675 | Che d’è, nò la canusce? |
| MENIELLO |
| Chisso manco la sape, e tu lo frusce. |
| RENZA |
| Nn’è lo ve’, che te pare? |
| CIOMMO |
| Ah c’aggio rutto |
| Chillo che ba seje rana! |
| RENZA |
| Uh che frabbutto! |
| Nnammecato schefienza! |
1680 | Te, foss’ommo ammacaro! |
| CIOMMO |
| Uh che pacienza! |
| Tu mo che mmalor’aje? |
| MENIELLO |
| Te pozza torcere. |
| RENZA |
| Te venga nfacce, oh Viecchio gualleruso! |
| Vuo’ che te mmezza a parlà co creanza? |
| CIOMMO |
| Tu non te nne vuoi j a cancaro, |
1685 | Ò te chiavo no cauce a la panza? |
| RENZA |
| À mme? che fusse acciso! |
| MENIELLO |
| Uh bene mio, mo schiatto de lo riso. |
| RENZA |
| Non saccio chi me tene, |
| Che non te ne dia tanta à bottafascio, |
1690 | Nfi che t’esce lo spireto pe bascio. |
| MENIELLO |
| Si cà ll’aje asciato sulo. |
| CIOMMO |
| Sempe me chiavarraje ssa facce... |
| MENIELLO |
| Zitto |
| Nò lo dì ch’è breognia. |
| CIOMMO |
| Non te nne vuo’ fà mmalora fonnachera. |
| RENZA |
1695 | Damme la dote mia. |
| CIOMMO |
| Và pigliatella, |
| Ca non nge manca niente, cà nient’era. |
| MENIELLO |
| Uh bene mio, me so’ pisciato sotta! |
| RENZA |
| Già me nge songo rotta, |
| Non mme commene chiù de stà cò tico. |
| CIOMMO |
1700 | E priesto abbia mo propio da sto vico. |
| RENZA |
|
| Facce de cuorno, |
| Senza vregogna! |
|
| MENIELLO |
|
| Che brutto scuorno, (à Ciommo.) |
| Non te lo tenere! |
|
| RENZA |
|
1705 | Mo, che li liennene |
| T’aggio levato, |
| Mo me faje chesso |
| No ve’, no ve’? |
|
| CIOMMO |
|
| Uh malejuorno! |
1710 | Che fusse accisa, |
| Tù non avive |
| Manco cammisa. |
|
| MENIELLO |
|
| Strilla mmalora, (à Ciommo.) |
| Via fatte ntennere! |
|
| RENZA |
|
1715 | T’aggio sanato |
| Pe nfi à la rogna. |
|
| CIOMMO |
|
| Quanno ssa lengua |
| Se ne vo’ scennere, |
| Quanno mmalora |
1720 | Se po sapé. |
|
|
|
|