| |
| |
| Patrò Calienno de la Costa, Venezia, per Giovanni Molino, 1709 |
| a cura di Paologiovanni Maione |
|
|
|
|
|
| ATTO PRIMMO |
|
| SCENA PRIMMA. |
|
| MENIELLO, che esce da la casa de Sciarrillo, e pò LUCCIO. |
|
| MENIELLO |
|
| È bella la scarpetta, |
| È cchiù bella la Patro’, |
| Mm’hà rrobbato lo core cò ll’arma, |
| Mò se lo tene la tradeto’. |
|
5 | È bella la cauzetta, |
| È cchiù bella la Patro’... |
|
| LUCCIO |
| Oh Meniello, Meniello! |
| Comm’accossì pe tiempo? |
| MENIELLO |
| Bello accossì tte voglio mmatenante! |
| LUCCIO |
10 | Accossì sso’ ll’amante, |
| Stanno sempe scetate, |
| Né ssanno che bo’ dì suonno, ò repuoso. |
| Meniello, saje che or è? |
| MENIELLO |
| Mò so’ sonate |
| Non saccio quanta ntinne. |
| LUCCIO |
15 | Tu da la casa scinne? |
| MENIELLO |
| Sine; lassamenn’ire. |
| LUCCIO |
| E mò addo’ vaje? |
| MENIELLO |
| Quanta coriosetate! |
| Aggio da ghì à accattare |
| Nò poco de Tabacco à lo Patrone. |
| LUCCIO |
20 | Pè llo naso. |
| MENIELLO |
| Oje ca none. |
| LUCCIO |
| Che fuorze pe la pippa? |
| MENIELLO |
| E sine sine! (Và pe partirese, e Luccio l’afferra.) |
| LUCCIO |
| Oje Menie’, siente, siente. |
| MENIELLO |
| Che d’è? mm’haje da dì niente? |
| LUCCIO |
| Vorria che me facisse no servizio. |
| MENIELLO |
25 | E verborazia mò? |
| LUCCIO |
| Tu ch’aje jodizio |
| Mè potisse portare |
| Na mmasciatella à Lella? |
| MENIELLO |
| Chello che buoje sì gioja mia bella: |
| Mà aspetta ca mò vengo, |
30 | Ca vao nfi à sto pontone. |
| LUCCIO |
| Nè, tuorne mo? |
| MENIELLO |
| Oje ca mo torno mone! |
| LUCCIO |
| E biene priesto sà. |
| MENIELLO |
| Comme si’ susta |
| Tè, mprimmo che se secca sta spotazza. (parte.) |
| LUCCIO |
| Curre, ca non me parto da sta chiazza. |
|
35 | Ammore sì tu vuoje, |
| Cierto sà havè mme puje |
| Sta contentezza; |
|
| Ca co chessa speranza; |
| Lo core già sbalanza |
40 | Pe allegrezza. |
|
| Ammore, &c. (Meniello vene co lo tabbacco mmano.) |
|
| MENIELLO |
| Luccio, veccome ccane, |
| Non so’ benuto priesto? |
| LUCCIO |
| Oh frate mio, |
| Aggio pensato meglio, |
45 | Pe non dà quà sospietto, |
| Si vide Fortunato mannamillo. |
| MENIELLO |
| Si lo veo te lo manno. |
| LUCCIO |
| Vuoje sapé addo’ l’aspetto? |
| MENIELLO |
| Si tu non me lo dice. |
| LUCCIO |
| A lo rotiello, |
50 | Compà Menie’, mme ne vuo’ dà na fronna. |
| MENIELLO |
| De che? |
| LUCCIO |
| De sto tabbacco. |
| MENIELLO |
| Ah ca staje bello! |
|
| Saje che llesena è Sciarrillo! |
| Ca le pare nzanetate, |
55 | Che le manca lo terreno. |
|
| LUCCIO |
|
| Via Menie’, si’ no chiattillo! |
|
| MENIELLO |
|
| Buono affè, si non sapisse |
| Ca nge fà mmatte l’agrisse... |
| Uh mmalora... |
|
| LUCCIO |
|
| Sto tantillo! (Luccio afferra lo tabbacco da Meniello, e se ne piglia no poco.) |
|
| MENIELLO |
|
60 | Nò chiù mò, ch’è troppo frate! |
| Manco tè si fusse prieno! |
|
| SCENA II |
|
| Patro’ CIOMMO, che esce da la casa contrastanno co RENZA, che tene afferrata la coppola de Ciommo. |
|
| CIOMMO |
| Lassa, che buoje da me? |
| RENZA |
| Dimme addo’ vaje? |
| CIOMMO |
| Vago addo’ mme dà gusto. |
| RENZA |
| Manco sta sfazione |
65 | Pote havè na mogliere, |
| De sapere addo’ vace lo marito? |
| CIOMMO |
| Vi che mmalora chessa! |
| N’aggio abbesuogno de masto de scola; |
| Jammo pe no negozio. |
| RENZA |
70 | Ogne buscia na mola: |
| Ciommo, lassa, non serve, (Renza le scippa la coppola.) |
| La coppola non l’aje |
| Se non me dice propio addove vaje. |
| CIOMMO |
| Tiente freoma nce vole! |
75 | Vago addo’ me piace, |
| O fuorze... mannaggia oje: dà ccà la coppola, |
| Scumpela Renza mone... à la mmalora; |
| Vuoje, che te agghiusta mò tutte sse raglie? |
| RENZA |
| Quà taglie vuo agghiustare? |
80 | Nò, nò, Ciommo à chest’ora, |
| E accossì pe tiempo, và decenno; |
| Dillo, sbrigate sù, vi comm’è tuosto? |
| CIOMMO |
| Jammo à ascià lloco accuosto |
| No Mercante, che bole |
85 | Na varca pe Llevuorno. |
| RENZA |
| Mò l’haje fatta à lo tuorno. |
| CIOMMO |
| Comme, ca nò è lo vero? |
| RENZA |
| E che sacc’io. |
| CIOMMO |
| Vi’ quanta sfazione! |
| RENZA |
| Io vorria che pensasse |
90 | No pocorillo à Lella, |
| St’orfana poverella |
| De figliastreta, mò, ch’è fatta grossa. |
| E l’abbesogna dare |
| Lo recapeto sujo. |
| CIOMMO |
| Già t’aggio ntiso; |
95 | L’avimmo mmaretata |
| RENZA |
| Mmaretata! e co chi? |
| CIOMMO |
| Me faje la sasca? |
| Comme Sciarrillo ccà lo Caporale, |
| Non te n’avesse ancora |
| Fatto mutto de niente! |
| RENZA |
100 | (Uh chille quatto diente!) |
| CIOMMO |
| Non te ne può fa arreto, |
| Ca Sciarrillo hà li purchie, |
| Tene la casa fatta, |
| E à ssa Loggia se sape, |
105 | Ch’abbusca à la jornata, |
| Pocca dell’arte soja |
| Non ncè che nne l’appasse. |
| RENZA |
| Ma lo meglio nce lasse. |
| CIOMMO |
| Zoè... |
| RENZA |
| C’have a la casa |
110 | Na bella schiavottella. |
| CIOMMO |
| (Chessa à la carrafella |
| Quarche spireto tene.) |
| RENZA |
| E mperzò pe mmarito |
| A Lella lo vuoie dare, |
115 | Pe poterela meglio gostiare. |
| CIOMMO |
| E bà ca tu sbarie. |
| RENZA |
| Sbarejo nè! sbarejo! |
| Mà non saje ca Sciarrillo, |
| Si vo’ Lella hà da vennere la Schiava, |
120 | Cà accossì stà appontato? |
| CIOMMO |
| Che benne hà fatto à ttene! |
| Non saccio, che bo’ venne, |
| Ca chella nnantemonia |
| Hà da stare à la casa. |
| RENZA |
125 | Lo bi’, comme te coce? |
| Non è comme dich’io, |
| Tradetore, forfante, taccagnuso? |
| CIOMMO |
| Renza sepp’oje t’ammacco lo caruso. |
| RENZA |
|
| E nn’aje raggione, |
130 | Co st’azzione |
| De me ngannare? |
| Che te ne pare |
| Core de cano? |
|
| All’ira che mme vene, |
135 | Non saccio chi me tene, |
| Che mò non te scocozzo, |
| Co st’ognie non te sbozzo |
| Brutto trafano. |
|
| E nn’aje, &c. |
|
| CIOMMO |
140 | Chi te nganna? che dice? |
| Addo’ staje co la capo? |
| RENZA |
| Janca mè! tiene mente, |
| Chi fà llo nnammorato? |
| No viecchio scioffellato, |
145 | Che n’hà a la vita soja |
| No callo de salute. |
| CIOMMO |
| Ne miente pe ssa canna, |
| Ca stò meglio de te; mò si è sopierchio, |
| E lo sopierchio rompe lo copierchio. |
| RENZA |
150 | Non bide nigro tè, ca lo catarro |
| T’è no frate carnale, |
| La tossa non t’arreje, |
| La podagra non te cionca, quanno ncigna? |
| CIOMMO |
| E tu no scumpe maje. |
| RENZA |
155 | Haje tant’ellera ncuollo, |
| Che mme pare na caccia reservata. |
| CIOMMO |
| Oh che singhe scannatta! |
| RENZA |
| Bene mio, ca sta vita |
| Vorria propio fenire, |
160 | Ca co ttico mme fete lo compare. |
| CIOMMO |
|
| E sì non se pò cchiù, |
| Ca te ne vuo’ piglià |
| Troppo co mmico. |
|
| RENZA |
|
| A chesso curpe tu, |
165 | Che te ncè vuo’ mbroglià |
| Dint’à sto ntrico. |
|
| CIOMMO |
|
| Mmalora falla scompere, |
| La voglio propio rompere. |
|
| RENZA |
|
| Nfernuso. |
|
| CIOMMO |
|
170 | Dà ccà te vaa lo cancaro. |
|
| RENZA |
|
| Te venga la pepitola, |
| Puozze morì de subbeto, |
| Tè, pigliate la coppola. (Renza le jetta la coppola, e Ciommo se la piglia, e parte.) |
| Nce puozze tornà tiseco, |
175 | L’hà avuto propio vence e venciuso. |
|
| SCENA III |
|
| SCIARRILLO miezo spogliato, che esce da la casa peppeanno. |
|
| SCIARRILLO |
|
| Justo comme s’abbruscia, e consumma |
| Lo ttabbacco à sta pippa ncasato, |
| Ncuorpo à mmene lo core mme fà. |
|
| Ca lo miccio d’Ammore l’allumma, |
180 | A li laure de Lella abbiscato |
| E già nfummo accossì senne và. |
|
| Justo, &c. |
|
| Mà pò da n’auta banna, |
| Sciarrillo che buoje cchiù, s’arde peneje, |
185 | Pe sta bella fegliola, |
| Lo core te consola, |
| Co la bella speranza, che la neve |
| De chillo bello pietto |
| Astutarrà nfra poco |
190 | Tutto quanto lo fuoco. |
| Ora parlammo à nnuje |
| Lassame dire a Perna, |
| Che se vaa allestanno |
| Pocca ll’haggio da vennere, |
195 | Saccio ca chessa nova |
| Le parerrà sceruppo, |
| Ma nce vaga lo tuppo |
| Ll’haggio mprommiso à Renza, e nnocche patto |
| Se pozza gaudè Lella; |
200 | Che nce vo’ tanta chella! |
| Addo’ si non nce sente, oje Perna, Perna, |
| Scinname la casacca, |
| La spata, e la terzetta, |
| Chella croacca netta, |
205 | Che mme portaje hiersera, |
| E lo cappiello co la pennacchiera. |
| All’utemo dell’utemo |
| Abbesogna far armo, e corazzone |
| Ca si be’ comm’à figlia |
210 | Ll’haggio sempe trattata, |
| Quanno non se ne pò fà lo contrario, |
| Non ncè festa de corte ncalannario. |
| Che d’eje, non scinne cchiune? |
| Potta d’aguanno, oje Perna! |
|
| SCENA IV |
|
| PERNA co la Casacca, lo Cappiello la Terzetta, e la Crovacca de Sciarrillo, e lo stisso. |
|
| PERNA |
215 | Vecco ccà si Patrone |
| La Spata, Lo Cappiello, e la Terzetta, |
| Mé commannate auto? |
| SCIARRILLO |
| Hagge no po’ de freoma, e ncrosione |
| Fà no core de smauto |
220 | Perna, ca t’aggio à dicere |
| Cosa, che nn’avarraie |
| Cierto no gran desgusto; |
| Mà cride à chisto fusto, |
| Ca fuorze quanto à ttene, e niente manco |
225 | Puro io lo ssentarraggio. |
| PERNA |
| Ch’è stato mmaramene! |
| Decitemello priesto, mamma mia! |
| SCIARRILLO |
| Sienteme, e saccia uscia |
| La qualemente cosa so’ forzato |
230 | Pe no cierto trattato, |
| Che pò le saparraje |
| Levarete da sta casa, e ndoje parole, |
| Besogna che te venna. |
| PERNA |
| E pecché sio Patrone? |
235 | E chè tratte so’ chisse? |
| Fuorz’asciata mm’avisse |
| À quarche mmancamiento! |
| Ò de lo servemiento |
| Che t’aggio fatto, e faccio |
240 | N’avisse sfazione! (Chiagne.) |
| SCIARRILLO |
| N’è pe st’accasione! |
| Agge pacienza Perna, |
| Non chiagnere mmalora! |
| PERNA |
| Non chiagnere mme dice! |
245 | Nfi à le sette celeste, |
| M’ ne voglio co lo chianto lamentare; |
| Dovarrisse penzare, |
| Ca si pe Schiava mbè songo stemmata, |
| Mperzò se sà, so’ nata |
250 | À Napole pe chello ch’aggio ntiso |
| Dicere da te stisso. |
| E mm’havive mprommisso! |
| Non chiagniere mme dice! |
| E mm’havive mprommisso |
255 | De mm’arremmedià na dotecella, |
| Pè po’ mme mmaretare; |
| Mò addo’ so’ ste mprommesse, |
| Dov’è ghiuto lo bene! |
| Non chiagniere mme dice? |
260 | Vecco ch’è ghiuto nfummo, e nnè botta, |
| Te nne vuoje scire pe la maglia rotta. |
| SCIARRILLO |
| Ora non tanta riepete. |
| Và manname Meniello |
| Co la sporta mò mò à la guardiola. |
|
| SCENA V |
|
| PERNA sola. |
|
| PERNA |
265 | Uh Perna poverella! |
| Chè faje? chi te consola? |
| E chè t’è ntubbenuto? |
| Si sta cosa soccede, scura mene |
| Chi sà addo’ mmattaraggio? |
270 | Chi sà se vedarraggio |
| Chiù Fortonato mio, |
| Chillo che deze Ammore |
| P’uneco sfuogo de st’affritto core. |
|
| N’aggio requia, n’aggio abbianto, |
275 | Escrastà ll’arma me sento, |
| Comme stesse |
| Pe pigliarese la via. |
|
| Uh che mmaje nce fosse nata |
| À sta vita trommentata, |
280 | Ò mm’havesse fatta morta |
| Mamma mia. |
|
| N’aggio, &c. |
|
| SCENA VI |
|
| Esce lo sole. |
| FORTONATO, e pò PERNA da lo Barcone. |
|
| FORTONATO |
|
| Già stà lo Sole |
| Ncoppa à li titte, |
285 | E ll’arme affritte |
| Và consolanno, |
| E pè mmè quanno... |
|
| PERNA |
| Oh Fortonato mio: |
| Comme volimmo fare? |
| FORTONATO |
290 | Ch’è stato? ch’è socciesso? |
| PERNA |
| Nuje simmo arrojenate! |
| FORTONATO |
| Mà pure? |
| PERNA |
| À cà mò scenno. (senne trase.) |
| FORTONATO |
| Nce so’ mosche sta vota? |
| Si scinne gioja mia cà non te ntenno. |
|
295 | E pè mmè quanno |
| Vene chell’ora, |
| Che nn’esce fora |
| Da chisto affanno... (esce Perna.) |
|
| PERNA |
| Uh mmare nuje. |
| FORTONATO |
| Nsomma |
300 | Se pò sapè chè dè, Perna ch’è stato? |
| PERNA |
| Sciarrillo mme vo’ venne. |
| FORTONATO |
| Oh Fortonato |
| E pecché? |
| PERNA |
| Che sacc’io |
| Io nò la saccio ntennere. |
| FORTONATO |
| Perna, cà non pò essere |
305 | Sciarrillo te vo’ bene. |
| PERNA |
| E che pe cchesso. |
| FORTONATO |
| Peo ntramma la sciorte |
| Pe nnuje non potea tessere? |
| Perna, cà non pò essere? |
| PERNA |
| Chesta si ch’è schiattiglia! |
| FORTONATO |
310 | Uh Perna ca lo core, |
| Sulo mpenzanno à chesso ss’assottiglia! |
| PERNA |
| E comme non pò essere? |
| Si Sciarrillo mò nnante |
| Mm’à ditto chiatto chiatto |
315 | Ca mme voleva vennere; |
| Vasta, mme perdarraje! |
| FORTONATO |
| Zitto Perna nò chiù mmannaggia craje. |
|
| Perna non chiagnere |
| Ca sto desgusto |
320 | Già mme fà fragnere |
| Non pozzo cchiù. |
|
| Cà si remmedio, |
| Fosse lo chianto |
| Pe darte gusto |
325 | Io farria peo, |
| Che non faje tù. |
|
| Perna &c. |
|
| PERNA |
| Ahimmè ca sto dolore |
| Mmè no chiuovo à lo core. |
| FORTONATO |
330 | Perna mia datte pace, |
| Cojetate bon’ora, |
| Fuorze ca nò lo saccio, |
| De nce lassà lo cuorio, |
| Crideme ca lo faccio, |
335 | Ca già sta vita mia ll’haggio nzavuorio. |
| PERNA |
|
| Chesto nce mancarria, |
| Chavesse da soccedere |
| Pe mmene quarc’aggrisso |
| Arrasso sia. |
|
340 | Oh Dio penza à ttè stisso |
| Ca spero c’haggia ammore |
| Piatà de nuje porzì |
| Fatt’a correjere |
| Né creo, ch’isso mprometta, |
345 | Che st’ammara desdetta |
| Non haggia da scompire |
| Gioja mia. |
|
| Chesso nce mancarria &c. |
|
| FORTONATO |
| Mprimmo de ssa desdetta |
350 | Saccio ca scomparrà |
| Sta vita mia. |
|
| SCENA VII |
|
| LELLA da la Fenesta, e lo Stisso. |
|
| LELLA |
| Fortona’, Fortona’, tè, manco male, |
| Aspetta ca mò scenno |
| Quanto te dico schitto doje parole. (senne trase.) |
| FORTONATO |
355 | Chesta porzì nce vole? |
| E abbesogna che fegna, |
| E faccia bona facce à sta fegliola |
| Pe fà servizio à Luccio, |
| Che mm’è no buono ammico, |
360 | Azzò che resca, e ll’uno, e ll’autro ntrico. (esce fora.) |
| LELLA |
|
| Succurreme, consola |
| St’arma che senne vola, |
| Hagge piata de mé. |
|
| Repara de sta scura |
365 | Na ponteca ventura, |
| Ch’apparecchiata ll’è. |
|
| Succurreme &c. |
|
| FORTONATO |
| (Auzate da sto nnietto? |
| Ch’autro trivolo è chisto?) |
370 | Lella affè, non te ntenno, |
| Si non parle chiù chiaro. |
| LELLA |
| Siente cchà. |
| FORTONATO |
| Va decenno. |
| LELLA |
| Fortonato mio caro, |
| Tù saje mò muto bene, |
375 | Ca da lo mprimmo juorno, |
| Che trasiste à sta casa pe guarzone, |
| Faciste no cravone |
| De st’arma poverella; |
| Ora mò saccie, Ciommo, |
380 | Chisto Patrio, che tengo, |
| Mme vo’ dare à Sciarrillo pe mmogliere, |
| E già pe parte lloro |
| Lo trattato è concruso; |
| Mperzò si non m’ajute, e mme mprommiette |
385 | De fare, cò quà muodo, |
| Che sta cosa non resca, io mò mmè scanno. |
| FORTONATO |
| Besogna ghì pensanno. |
| (Oh Luccio arrojenato! |
| Oh nigro Fortonato!) |
| LELLA |
390 | E accossì mò, comme te stea decenno, |
| Renza ll’haggio co mmico, |
| Ca stace ngelosia pe chella Schiava, |
| Ch’hà à la casa Sciarrillo. |
| FORTONATO |
| (Vide comme và à pilo! |
395 | Da cchà bene lo ttutto!) |
| LELLA |
| Chè d’è non mme respunne, e parle sulo? |
| Mbè ssaccio ca sta cosa non te mporta, |
| Ca cò mmico non faje, chello che fanno, |
| Co le belle fegliole |
400 | Li vere nnammorate |
| Mà fia comme se voglia, |
| Te prego Fortonato... |
|
| SCENA VIII |
|
| PERNA da llo Barcone, e lli stisse. |
|
| PERNA |
| Ah ca non se n’è ghiuto; uh stà co Lella! |
| LELLA |
| Te prego propio muovete à pietate |
405 | De ste llacreme meje pe caretate! |
| PERNA |
| (Che bo’ dire sta cosa?) |
| FORTONATO |
| Lella chiù che non cride, |
| Mme mporta de guastà sta parentezza; |
| Vasta, non ghì sapenno. |
| PERNA |
410 | (Che sento mara mene, io nò le ’ntenno.) |
| LELLA |
| Mme lo dice addavero, |
| Da fegliulo nnorato, |
| Te nce miette cò affetto? |
| PERNA |
| (Ora chist’è despietto?) |
| FORTONATO |
415 | Stanne secura Lella, |
| E de quanto mm’aje ditto, |
| Già vao pensanno à fa pe tutte duje |
| Quarche cosa de buono. |
| PERNA |
| (Vide, vi’, và te fida!) |
| LELLA |
420 | Fortonato mio d’oro, |
| Mò veo si mme vuo’ bene. |
| PERNA |
| (Ahimmè ca moro!) (senne trase.) |
| FORTONATO |
| De chesto stanne cierto, |
| Si sarraje de Sciarrillo, |
| Che mme puozze vedé spierto, e demierto. |
| LELLA |
|
425 | Cò stè mprommesse |
| Tù mm’addecrie, |
| Mà si sapesse, |
| Ca non coffie, |
| Veata mè. |
|
| FORTONATO |
|
430 | Non dubbetare, |
| Vattenne Lella. |
|
| LELLA |
|
| Nò mme gabbare |
| Gioja mia bella. |
|
| FORTONATO |
|
| Lassa fà à mmè. |
|
| LELLA |
|
435 | Ma si sapesse, &c. |
|
| SCENA IX |
|
| SCIARRILLO sulo da dinto. |
|
| SCIARRILLO |
| À ttè zompa stò fuosso, |
| Scappa se può, mò ch’aje ste grafe. (esce fora.) |
|
| Lo ssaccio cà quà ghiuorno |
| Nne scorno chiù de ciente, |
440 | E sotta à li morfiette |
| L’haggio da ncotognà. |
| Cà si mbè avesse à tuorno |
| Ciento li chiù baliente, |
| À chisto na chianetta, taffe |
445 | À chillo na scazzetta, tiffe |
| À st’autro no mmoccone, taffe |
| À chi no boffettone, tuffe. |
|
| Vasta vedrisse chiovere |
| Le scoppole à delluvio, |
450 | Zaffe, Ziffe, Zoffe, Zuffe. |
|
| E pò si se volessero |
| Sulo tantillo movere, |
| Affè mme vasta ll’anemo |
| Tutte de le sgorgià. |
|
455 | Lo ssaccio &c. |
|
| SCENA X |
|
| RENZA, e lo stisso. |
|
| RENZA |
| Viva sio caporale, |
| Bello accossi te voglio smargiassone. |
| SCIARRILLO |
| Oh Renza manco male, |
| Lella mia comme stace, e ncrusione |
460 | Non sarria na gran cosa, |
| Che mme facisse reverì la Sposa. |
| RENZA |
| Stace coccata ancora |
| Vasta le decerraggio, |
| Lo bello desedderio, e l’affetto. |
| SCIARRILLO |
465 | Dille cà nò arrecetto |
| Pensanno à lo momiento, |
| Quanno farrimmo cinco, e cinco à dece. |
| RENZA |
| Lo gusto mio sarria, |
| Pocca Ciommo è contiento, |
470 | De vedé sta sera annodecate, |
| Comme rimmo à lo scarmo; |
| Mà Lella mia nn’ave armo, |
| Trasì à la casa toja, comme te disse, |
| Se non esce la schiava. |
| SCIARRILLO |
475 | Chesta mò la derrupo, |
| Fà cunto ca nè sciuta. |
| RENZA |
| Fà che sia pe tutt’oje, |
| Ma sie’... co bello muodo, azzò che Ciommo |
| Non nne venga nzentore. |
| SCIARRILLO |
480 | Lassa fare à Sciarrillo, quanto sera |
| Mme deciste aggio à mente. |
| RENZA |
| Donca stà allegramente, |
| Ca priesto nn’escerraie |
| Cò gusto, e grolia toja. |
| SCIARRILLO |
485 | Non saje comme se dice gioja mia, |
| Se chesso nò sperasse io morarria: |
| Orsù governamette, Renza à Dio. (parte.) |
| RENZA |
| Sciavo sio Caporale, và connio. |
|
| E Ciommo restarrà |
490 | Conno parmo de naso |
| Cà n’è comme se penza |
| None, none. |
|
| Perna se vennarrà, |
| Ca Marco ne ll’hà raso, |
495 | E ll’hà da rescì curto |
| Lo joppone. |
|
| E Ciommo &c. |
|
| SCENA XI |
|
| FORTONATO sulo. |
|
| FORTONATO |
| Oh sciorta mmalorata! |
| Aje auto che mme fare! |
500 | Stà à bedé quanno t’aje da saziare! |
| Luccio che decerrà, mò che mme trova |
| Co chessa bella nova? |
| Che scajenza nc’è data? |
| Che bello schiuoppo è chisso, |
505 | Io so’ fora de mene, io resto ammisso! |
| Perna la perdarraggio, |
| Ca Sciarrillo già vennere la vole; |
| Luccio perdarrà Lella, |
| Ca Patro’ Ciommo la vo’ dà à Sciarrillo; |
510 | Ma Luccio poveriello, |
| Che pesce pegliarrà? |
| Mà che nne voglio fà? comme so’ ciuccio? |
| Io aggio li guaje mieie, e penso à Luccio? |
| Tè! veccotillo ccà, mò senne vene; |
515 | Che caudo; che sceruocco uh mare nuje! |
| À ca starrimmo frische tutte duje! |
|
| SCENA XII |
|
| LUCCIO, e lo stisso da parte. |
|
| LUCCIO |
|
| Vaie, e biene, tira, e mmolla, |
| E pò sempe a tuorno a Lella |
| Vrociolejo comme a palla. |
|
520 | Già pe chessa vace a rolla |
| St’arma affritta, e poverella |
| Pocca Ammore la fracella, |
| Che de scoppole ll’ammalla. |
|
| Vaie &c. |
|
525 | Ncoccia sia Lella ncoccia, mò ch’aje puosto |
| No parmo a lo sottile, e comme a seccia |
| Già mm’aje rreddutto, pocca è gusto vuosto |
| Ca si tu tiene lo core de vureccia, |
| Saccie ch’io puro me lo sento tuosto, |
530 | E nne voglio vedé nsino a la seccia. |
| FORTONATO |
| Luccio ca tù t’affrie |
| Te martorie, e te mpienne, |
| Nce lo pierde lo tiempo, che nce spienne. |
| LUCCIO |
| Oh Fortunato mio, |
535 | Ch’è chesso che mme dice, |
| Comme nò spero niente? |
| FORTONATO |
| E se tù nò mme siente; |
| Non saje lo mutto antico, |
| Chi campa de speranza, |
540 | Ca ticche, ticche lle pò fa la panza? |
| LUCCIO |
| Addonca già so’ muorto. |
| FORTONATO |
| Pè tale te può chiagniere. |
| LUCCIO |
| E pecchene? |
| Parla, non mme fa chiù stò musso stuorto, |
| E ncè peo de morire? |
| FORTONATO |
545 | Vuo’ che parla? |
| LUCCIO |
| Securo. |
| E se be’ moro pò nò mme nne curo. |
| FORTONATO |
| Nò mme pregaste Luccio, |
| Che ccà cò Patro’ Ciommo |
| Io trasesse a guarzone? azzò cò Lella |
550 | Te potesse servire? |
| LUCCIO |
| Comm’ammico, |
| Io mme fedaje co tico. |
| FORTONATO |
| E pò de chesso, |
| Nne venne che de Perna ccha becino... |
| Luccio lassame ire |
| Nò mme nce fa penzare. |
| LUCCIO |
555 | Manco la vuo’ fenire! |
| Parla mmalora! ca mme faje crepare. |
| FORTONATO |
| E pò de Perna io me ne ncrapecciaje. |
| LUCCIO |
| Se pò sapé chè d’aje? |
| Tù faje li trase, e iesce? |
560 | Chè d’è? che te rencresce, |
| Vuo’ proprio, che m’accia? |
| FORTONATO |
| Jammo, ca pe la via |
| Sentarraje lo socciesso. |
| LUCCIO |
| Va cammenanno, ca te vengo appriesso. |
|
| SCENA XIII |
|
| MENIELLO sulo mmarennanno. |
|
| MENIELLO |
|
565 | Pe bedé si le stentina |
| Songo sane, ognie mmatina |
| Quanno mm’auzo, |
| Comme se dormesse scauzo, |
| Voglio sempe marennà! |
|
570 | E nce vo’ sta marennella, |
| Ca mme vace dinto all’ossa; |
| Oje Meniello là vuoje arza! |
| Ca st’alice è bella grossa, |
| E chest’autra manco è scarza, |
575 | Comm’è fresca sta panella! |
| Io mme sento arrecreà. |
|
| Pe bedé, &c. |
|
| Co la mmarenna, che mme dà sta schiava, |
| Starria comm’à li sciure, |
580 | Manco mme fosse Vava; |
| Sì nce la cerco schitto, |
| So’ ghiuto à mmitto, e mme mena li ture; |
| Nò, nò, quà ghiuorno io te la scaccarejo, |
| Otra ca la coffejo, |
585 | Pocca le zeppolejo |
| Da vota à bota quarche tornesiello, |
| Vasta mme procaccejo, |
| Ca non so’ quà sciaddeo, |
| Ma ha da fà co Meniello. |
|
| SCENA XIV |
|
| CIOMMO, e lo stisso. |
|
| CIOMMO |
590 | Da doje ora che stongo |
| Mpalato into à sto vico, |
| E non nce è stato taglio |
| De vedé Perna; ò vecco ccà Meniello. |
| MENIELLO |
| Patro’ Ciommo bonnì. |
| CIOMMO |
| Dove t’abbie? |
| MENIELLO |
595 | Vao à la Guardejola, |
| Ca mm’aspetta Sciarrillo. |
| CIOMMO |
| Fremmate no tantillo, |
| Dimme Perna che fà? |
| MENIELLO |
| Stà ncancaruta, |
| Che non te dico niente. |
| CIOMMO |
600 | E pecché, nò lo saje? |
| MENIELLO |
| Pe non saccio che cosa, |
| L’hà ditto lo Patrone; |
| Anze ca poco nnanze ll’aggio asciata |
| Meza morta vecino à la fenesta, |
605 | Ch’à botta d’acqua nfaccia è sorzetata. |
| CIOMMO |
| Mo comme ll’aie lassata? |
| MENIELLO |
| Accossì; mà pecché mme ll’addemmanne? |
| CIOMMO |
| Sienteme ccà Meniello, |
| Si mme tiene secreto, |
610 | Chiù de no tornosiello |
| Io te voglio refonnere! |
| MENIELLO |
| Voscia mme vo confonnere! |
| Che t’aggio da servire? |
| Commanneme à bacchetta, |
615 | E fà comme parlasse mmiezo maro. |
| CIOMMO |
| Saglie ncoppa addo’ Perna, |
| E bide se la può fare affacciare |
| Da cchà dinto à lo vico, |
| Ca mme faje no piacere sengolare. |
| MENIELLO |
620 | Frate, vuo’ che te dico, |
| Co sto parlà piatuso |
| Mme farrisse penza... |
| CIOMMO |
| Maliziuso! |
|
| SCENA XV |
|
| RENZA da la fenesta, e lli stisse. |
|
| RENZA |
| De Perna se trascorre. (da se.) |
| CIOMMO |
| Tè accattate ll’allesse. |
| MENIELLO |
| A cchà à cient’anne. |
| CIOMMO |
625 | Saccio ca mm’aje pescato. |
| MENIELLO |
| Zierto tu si’ de Perna nnammorato. |
| RENZA |
| Vi’ ch’aggio da sentire |
| Da chisse duje frabutte! |
| Terra pecché non t’apre, e tte ll’agliutte! (senne trase.) |
| CIOMMO |
|
630 | Meniello crideme, |
| E nò ncè dubbio, |
| Ch’Ammore è cancaro, |
| E pe mmè propio |
| Cecato fauzo |
635 | Quann’hà la zirria |
| Se fa na gliannola, |
| E già lo spireto, |
| Pe tanta strazie |
| Mo senne sciulia, |
640 | Tieme’, tieme’. |
|
| Tiemente, videme |
| So no streverio, |
| Lo core è fraceto, |
| Lo cuorpo è siseto |
645 | Mpietto aggio l’asema |
| Meniello ajutame, |
| Mo cado tè! (Renza à tiempo ascenne.) |
|
| RENZA |
|
| Meniello ajutalo |
| Mo cade tè! |
|
650 | E non te piglie scuorno |
| Faccia de cuorno, nfammo, tradetore, |
| De fà lo nnammorato? |
| CIOMMO |
| (Ah ca nce so’ ncappato!) (da parte.) |
| MENIELLO |
| (Mme nce voglio spassà co ssì verlascie.) (da parte.) |
| RENZA |
655 | Che d’è non mme respunne? |
| T’è scesa lengua ncanna? |
| CIOMMO |
| (Meglio da chessa vanna |
| Sarrà che me la sfila, |
| Primma che ssa mmalora mm’arrefila.) (parte.) |
| MENIELLO |
660 | Che bello auzà de fierre! |
| RENZA |
| Non fuje? si t’aggio mmano! |
| Te voglio fa passà tutte ssi vierre. (afferra Meniello.) |
| E tu chiappo de mpiso |
| Passa cchà ca co tico |
665 | Mme la voglio scontare. |
| MENIELLO |
| A chisso ntrico |
| Io mo che ncentro? |
| RENZA |
| E cchà che stie decenno? |
| MENIELLO |
| Patro’ Ciommo ha parlato. |
| RENZA |
| E tu ll’haje ntiso: |
| Pò che bolive fa? |
| MENIELLO |
| Niente ncoscienzia. |
| RENZA |
| E mme lo nieghe appriesso? |
| MENIELLO |
670 | Io che nce ncentro a chesso? |
| Che nn’aggio da cacà la penetenzia. |
| RENZA |
| Nce ncintre sorchiamucco! |
| Comme lo rucco rucco |
| Tu mo no stie facenno? |
| MENIELLO |
675 | Isso me stea decenno... |
| RENZA |
| Ah ca te voglio arrefelà lo riesto. (lo vatte.) |
| MENIELLO |
| Corrite bona gente, (gredanno.) |
| Ca chessa mo mm’accide, priesto, priesto. |
|
| SCENA UTEMA |
|
| PERNA da lo barcone, e lli stisse. |
|
| PERNA |
| Renza chiano li cuorpe, |
680 | Sì; non te miette affé co no fegliulo |
| Dimme nè che t’affatto? |
| MENIELLO |
| Niente, sarrà mbreaca. |
| RENZA |
| Zitto pideto mbraca: |
| Che mm’ha fatto? a tte puro, (lassa Meniello.) |
685 | Vorria dinto a chest’ogna. |
| PERNA |
| Co mmico porzì ll’haje? |
| RENZA |
| Co tico, e co sto fauzo. |
| MENIELLO |
| Ajutame tallone ca te cauzo. (fuje.) |
| PERNA |
| E pecché? |
| RENZA |
| Tu lo ssaje. |
| PERNA |
| Va, ca abbesogna, |
690 | Che stinghe nzallanuta. |
| RENZA |
| No è Maumma! haje faccio de responnere? |
| Tu che nne vuo’ da Ciommo? |
| PERNA |
| Chi lo canosce st’ommo! |
| Ora va, poverella, |
695 | Vommeca ca te sane. |
| RENZA |
| Vi’ comme nega la scrofa? |
| Se vo mette co ll’uommene nzorate? |
| PERNA |
| Mara me! n’auta vota? |
| Chessa da me che bole? |
700 | Et io aggio auto caudo che de Sole. |
| RENZA |
| Non serve, che la piglie pe sto vierzo, |
| Ca sto bona nformata |
| Mperzò lassalo ire, |
| Ca se no te nne piente. |
| PERNA |
705 | Attaccame li puorce a la cetrola. |
| RENZA |
| Sfacciata! staje ngajola, |
| Che buo’ fa? perzo parle. |
| PERNA |
| Io te dico accossì, ca tu te nsuonne, |
| Ca si be’ so’ na schiava, |
710 | Aggio tanto a ste pettole d’annore, |
| Che pe tutta sta Loggia va l’addore. |
| RENZA |
| Megl’era se decive a la Chiazzetta. |
| PERNA |
| Ente vechia mmardetta! |
|
| Sì nce scenno lloco abbascio, |
|
| RENZA |
|
715 | Sì nce saglio lloco ncoppa, |
|
| PERNA |
|
| Guallarosa, |
|
| RENZA |
|
| Lennenosa |
|
| PERNA |
|
| Te ll’agghiusto sto scartiello, |
|
| RENZA |
|
| T’arrefilo lo cottone, |
| Zitto feccia de vordiello. |
|
| PERNA |
|
720 | Ora chesso è troppo mone |
| Piglia, brutta fattocchiara (le tira prete.) |
|
| RENZA |
|
| Perchiepetola, janara, |
|
| PERNA |
|
| Va a la forca, pù, pù, pù. |
|
| RENZA |
|
| Guitta, porca, pù, pù, pù. |
|
| PERNA |
|
725 | Streca, vommeca vracciolle, |
|
| RENZA |
|
| Perchia, femmena pezzolle, |
|
| PERNA |
|
| Saglie, saglie, |
|
| RENZA |
|
| Scinne, scinne, |
|
| PERNA |
|
| Carpecata, |
|
| RENZA |
|
| Scrofolosa, |
|
| PERNA |
|
| Viene saglie |
|
| RENZA |
|
| Scinne tù. |
730 | Si nce scenno, &c. |
| Si nce saglio, &c. |
|
|
|
|