Lo castiello sacchejato

Lo castiello sacchejato, Napoli, a Spese de li Mpressarie, 1732

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

LO CASTIELLO SACCHEJATO

Commeddeja Ammascherata pe Mmuseca. Da rappresentarese a lo Teatro nuovo nchisto Carnevale de st’anno 1732. Addedecata Al’Azzellentissema Segnora D. Ernestina Margarita Contessa d’Harrach, Nata Contessa de Dietrichstein, e Vecereggina de Napole.

Napole, A Spese de li Mpressarie.

Azzellentissema

Segnora.

Non è cosa nova, che li retratte, e li quatre de cose brutte, e spaventose diano gusto, e piacere a chi le bede, e canosce la forza dell’Arte, che fa la scigna a la Natura, comm’a ddicere schefosa è la ranonchia, terribbele è lo serpe, ma pittate a lo nnatorale, e co delegenza, danno maraveglia no stommacano, né mettono paura, ma danno gusto, e moveno la cureosetà a bederle; conforme sà l’Azz. V. Io non creo, c’a lo Munno se pozza dare cosa cchiù spaventosa de la Guerra; e puro non c’è cchiù bella cosa a bedere, che na battaglia pittata a no quatro da no valent’ommo, che te ncanta ll’uocchie, e lo cereviello. Ora io mo’ sapenno chesto, me piglio l’ardire, Azzellentiss. Seg., d’appresentarve umermente no quatro a penna nchisto libretiello de na guerra redicola, che fà na mazza canaglia, che fegne Turche, e Crestejane pe defennere, e peglià no Castiello de tavole, e comme isse fanno la scigna a ll’autre, accossì lo Poveta fà la scigna a loro. Soggetto veramente redicolo, e propreo de Carnevale pe spassarese la malanconia; e perzò lo metto a li piede de V. Azz., azzò degnannose de vederlo rappresentare, o lejerne quacche poco, quanno non ha che fare, se ne faccia na resata; e supprecannove con tutta la reverenzea possibile, e mmacenabbele a protejerla pe ppropea generosetà, me protesto nzì all’utemo sciato,

De V. Azz.

Ummeliss. Devotiss. e Obbrecatiss. Serv.

Filippo Ferretti, e Giacchino Greco.

A chi vo Lejere.

Si be’ chesta sia la terza vota, ch’esce nchiazza sta Commeddeja, te prego perzò, ammico Lejetore, a no la tenere pe becchia; pecché non sulo s’è cagnato cchiù de meza la museca; ma la Commeddeja stessa nquanto a le pparole è n’auta cosa. Quanno se rappresentaje ll’autre doje vote a n’auto Teatro, l’Autore sujo no nc’assestette; e chi l’avette mmano, o pe despietto, o pe ppoca pratteca, la fece justo comm’a no piezzo de permone mmano a le gatte; ascije tutta stravesata, chiena de mpropietà, le scene non avevano, che fà co la Commeddeja, né ll’arie co li recitative, e no nc’era manco grammateca, comme se pò vedere a li duje primme librette stampate, non saccio si mprosa, o mmierze. Mo ch’è benuta mmano a l’Autore sujo, chisto non sulo l’hà sanato li rascagne, e li struppie, che le fecero, ma facennole n’auto vestitiello nuovo, la fà comparere de n’auta manera, aggiustata, polita, e senza la monnezza, che ll’avevano jettata ncuollo; voglio dicere, como no nc’è na parola, che non sia de chi l’ha fatta. Spero, che si te piacette tanto quann’ascije a primmo storciata da le scortecature, t’avarrà da piacere tanto cchiù mo’, ch’esce sana, deritta, ed attellata. Potesse dicere accossì de la sore soja, chiammata: La Mpeca Scoperta, che ll’anno arreto comparse co tanto spanto, e deze tanto gusto, pecchè la mettette fora lo Patre sujo, che nn’appe lo penziero; ma mo’ che se torn’a ffare a lo stisso Teatro de primma, e la caccia uno, che pe fforza vo’ essere tenuto pe Patre potativo sujo, e non se nne vo’ cojetare ca le ccose se sanno; no pozzo mmacenarme comme resciarrà, pocca sso concia teano nc’hà puosto le mmanelle soje, che tanto sanno mpastà vierze, quanto le mmeje sanno fà doppie de quatto; lo Cielo le dia bona ventura, ca nce la desidero, pocca è figlia mia (accossì dice CICCIO VIOLA, che l’ha fatto) quanno che no, se conzola co lo penziero, ch’isso la fece bella, e bona; si po le ghianare nce la stroppejano, che nce vuo’ fà? pacienza. Tornammo mo’ a lo primmo trascurzo nuosto de sta Commeddeja, ch’è Lo Castiello Saccheato; de lo quale no serve a dirne lo soggetto, e l’antecedente, pecché già se sanno; sulo te prego a nno peglià lo sciamarro pe sfravecarlo, ca pò soccedere, che scarropanno le pprete te diano ncapo; lassalo stà, ca le soperchia chello, che ll’hanno fatto; e te so’ vaso le mmano. Le pparole Sciorte, Destino, &c. già se sà, ca no sonco sentemiente de Crestiano, ma lopine, e gliantre, co le qquale se spassano li Povete; e perzò decitele: Passa ostè, vaja col vientos, che te puorte en ora mala.

LE PERZUNE

TONNO ommo de meza ajetà, nnammorato de Fortunata.

Lo Sio Ciccio Ciampi.

FORTUNATA, zetella, sore de Masillo, e nnammorata de Ciccillo.

La Sia Teresa de Parma.

CICCILLO, giovane, nnammorato primma de Fortunata, e po de Graziella.

La Sia Antonia Colasanti.

GRAZIELLA, zetella, nnammorata de Ciccillo.

La Sia Poleta Costa.

MASILLO giovane resoluto; nnammorato de Graziella.

La Sia Fortunata Romano.

BELLONIA vecchia jodizejosa, mamma de Ceccia.

Lo Sio Carmeno d’Ambrosio.

CECCIA fegliola speretosa.

La Sia Laura Monti.

CUOCCIO, barraccone.

Lo Sio Giovanne Romaniello.

Tutte ste pperzune so’ gente marenaresche.

La Scena

È lo MUOLO picciolo co no Castiello de tavole.

La Museca

È na nzalata mmescata de paricchie Vertoluse, addo’ chi ng’ha posta n’ervesciolla addorosa, e chi no shiorillo; magnatela allegramente, ca lo Poeta ng’ha puosto lo ssale, e lo Mpressareo l’acito, e l’uoglio.