Lo castiello sacchejato

Lo castiello sacchejato, Napoli, a Spese de li Mpressarie, 1732

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO PRIMMO

SCENA PRIMMA

FORTUNATA, ch’esce mmocca la porta soja, e BELLONIA.

FORTUNATA

Mo veo si mme vuo’ bene, torna priesto,

Penza ca tu mme lasse

Ntra lo ffuoco, e lo chianto.

BELLONIA

Non t’affriere tanto t’aggio ditto;

Ca po esse, che sia sospetto tujo,

Chello, che mm’aje contato.

FORTUNATA

Bellonia mia, non è sospetto none,

Si lo bedo coll’uocchie; so’ tre ghiuorne

Ch’è benuta addo’ Cianna sta fegliola,

Pe bedè saccheare lo Castiello,

E da tanno Ciccillo s’è arrassato

Da mene, e stà speruto à chillo vico,

Pe festeggià la sninfia de Chiaja.

BELLONIA

E scumpela sta baja, Fortonata;

Ca si be’ lo bedesse, no lo ccreo.

Ciccillo, che pe ttene, è ghiuto muorto;

Te vo’ cagnà pe n’aota; e po chi è chessa,

Che bo’ stare co ttico a paravone?

Te sta facce, chist’uocchie, e sti capille

Ste mmano, chesta vita.

FORTUNATA

Scumpe mo’ stì delliegge.

Si fosse bella, comme dice tune,

Lo sgrato non farria

Stuppolo, e stracce de sta vita mia.

BELLONIA

Mo nne caccio lo nietto da sto fraceto.

FORTUNATA

Sì, và Bellonia mia, và le parla,

Sacce di’, sacce fare,

Dille, che non mme faccia cchiù crepare.

BELLONIA

Chist’è pensiero mio: và sagliatenne.

FORTUNATA

Eh siente n’aota cosa,

Mmè scordava lo mmeglio, tu già saje,

Ca fratemo Masillo, nne stà ntiso

De chist’ammore nuosto, e aspetta Tata,

Che benca da Leguorno,

Pe fà sto matremmonio

BELLONIA

Mme l’aje ditto.

FORTUNATA

E sacce, ca Masillo

Isso puro pretenne sta Chiajese.

BELLONIA

Vi’ c’aoto mbruoglio è chisto.

FORTUNATA

Si sape, ca Ciccillo mme zanneja,

Nne pò venire sanco, ch’è manisco;

Nce sarrà quà rroina, maramene?

BELLONIA

Và t’arrecetta, e lassa far’à mmene.

FORTUNATA

Che boglio havè recietto,

Si mpietto

Chiano chiano

Co na vregara mmano

Mm’attenn’a spertosà

La gelosia.

Aimme? ca vedo nfonte,

Ca sta mmardetta arpia,

Quant’uocchie tene nfronte,

Tanta pertosa face a st’arma mia.

SCENA II

BELLONIA, e po CICCILLO.

BELLONIA

So’ uommene, mannaggia chi è lo meglio;

Non te ne puo’ fedà; quanno te cride,

Ca le ttiene afferrate a lo cozzetto

Te fanno vocà fora, ch’è maretto.

CICCILLO

Bellonia?

BELLONIA

Chi mme chiamma? oh teccotillo.

CICCILLO

Te vao cercanno co la lengua fora.

BELLONIA

Ed io coll’ova mpietto t’aspettava.

CICCILLO

Che buo’ niente?

BELLONIA

Di tù, ca po dich’io.

CICCILLO

Mm’aje da fà na mmasciata.

BELLONIA

Patrone: à chine?...

CICCILLO

A Graziella

BELLONIA

Quale?

CICCILLO

Sta fegliola de Chiaja, ch’è benuta

Addove Cianna la commare toja.

BELLONIA

E che buo’, che le dica?

CICCILLO

Ca mm’ha cacciato ll’arma

BELLONIA

E Fortonata?

CICCILLO

No nc’è cchiù Fortonata, aggi’aoto ncapo.

BELLONIA

Maramene, che sento? comme tune?...

CICCILLO

Non ce vo’ che sentire, no la voglio.

BELLONIA

E pecché?...

CICCILLO

Che te mporta.

BELLONIA

Tù nc’aje fatto l’ammore cchiù de n’anno,

Lo ssà lo parentato, e nn’ora nn’ora

S’aspettava sso ngaudio, e mo ch’è stato?

CICCILLO

Aggio pensato meglio, so’ sbotato.

BELLONIA

Che buo’, che te sia rutto lo caruso?

CICCILLO

Caruso? mme ne rido.

BELLONIA

Te nne ride?

Si tu avisse na sore; e te sortesse

Chesso, che buo’ fà tune, che farrisse?

CICCILLO

Si sorema facesse

Chello, ch’essa mm’hà fatto;

Le romparria la noce de lo cuollo.

BELLONIA

Mar’essa, che t’hà fatto?

CICCILLO

Niente niente?

BELLONIA

Ma puro, che t’hà fatto?

CICCILLO

Lo buo’ sentire propio: la fraschetta

Festeggiava co mmico, e me faceva

Le guattarelle co zi Tonno.

BELLONIA

Ah cano?

Vi’ ch’è chesso, che dice? ca la nfamme.

CICCILLO

N’è nfammia, fà l’ammore a buono fine.

BELLONIA

È lo vero gnorsì; mà è no sbreguogno

Dar’arecchie a di sische.

CICCILLO

Accossi è l’uso

De le femmene d’oje, ca po se sceglieno

Lo siscariello, che fà meglio suono.

BELLONIA

E che suono pò fà chella zampogna?

CICCILLO

Ha li denare, chisto suono vasta.

BELLONIA

Vi ca tù si mpazzuto.

CICCILLO

E no cchiù mone:

Vuo’ ì ddo Graziella?

BELLONIA

Nce vao, ma voglio mprimmo

Parlà co Fortunata, e po co chella.

CICCILLO

A gusto tujo: mme vasta,

100

Che sacce fà pe mme co ssa fegliola,

Po vienetenne, e sciccame na mola.

Comm’aspetta la rosata

No sciorillo addebboluto

Accossi stonc’io speruto

105

Pe la grazia de sta Fata

Che me pote addecreà.

Viene priesto acconsolarme

Co la nova preziosa

Ca pe me sarrà pietosa

110

Ch’è contenta d’azzettarme,

E ca sujo me farrà.

BELLONIA

Maro te nzallanuto.

Si non aje sta fortuna, tu si’ ghiuto. (trase addo Fortunata.)

SCENA III

TONNO, e CUOCCIO pe strata.

TONNO

Nce si’ benuto vivo? è ora chesta;

115

Mm’aje da fà ciento cose pe sta festa,

E tù mo te nne viene muorto, muorto.

CUOCCIO

Mo’ so’ date dece ora, e a ccà sta sera

Nc’è n’anno justo justo, che cos’aje?

E po che s’ha da fà, si è lesto tutto?

TONNO

120

È lesto, e non veo niente.

CUOCCIO

À ccà n’aot’ora

Veneno li vestite,

Lo trobbante, la sciabola, e la fascia.

TONNO

E lo scarparo?

CUOCCIO

Ha ditto ca mo’ vene: nc’è nient’aoto?

TONNO

125

E statt’attiento frate, ca sta vota

Mme preme cchiù dell’aote chesta festa.

CUOCCIO

E pecché?

TONNO

Già lo ssaje ca stò cuotto

Pe Fortonata: Io faccio lo Gran Turco,

Pe farem’abbedè da ssa fegliola;

130

Ca si nò, nne farria cierto de manco.

CUOCCIO

Ma chesta fa l’ammore co Ciccillo.

TONNO

Lo ssaccio, e tù non saje, che fà zi Tonno,

A Saverio, lo frate peccerillo,

Le faccio fare la Gran Torca, e a Maso,

135

Ch’è lo frate cchiù granne chiano, chiano,

Co ciento piacierelle, mme l’aggranfo;

Si chisse so’ co mmico, io so’ a cavallo.

CUOCCIO

Vi ca tù riest’a ppede

TONNO

E bà a malanno.

CUOCCIO

Buon’ora tù mm’aje ditto, ca n’ancora

140

T’ha puosto n’uocchio ncuollo,

E mo vuo’, che te piglia pe marito.

TONNO

Ma ll’auto juorno mme tenette mente,

E se mettett’a ridere.

CUOCCIO

Mo sarvate.

Le ffemmene so’ gliannole,

145

Non te fedà ca ridono,

Ca tanno te coffeano.

TONNO

Chesso se vede appriesso.

CUOCCIO

E appriesso vide;

Ora lassamenn’ire

TONNO

Addo’ vuo’ ire.

CUOCCIO

Mm’aggio arremmedeato quatt’ancine;

150

Mme le boglio sballare

Ch’aggio da fà lo Turco, e stonco aleffe.

TONNO

Torna priesto, ca sierve

Pe farme na mmasciata a Fortonata.

CUOCCIO

Messe’, vuo’ che la dica

155

Tù nce pierde la spesa, e la fatica.

TONNO

E pecché?

CUOCCIO

Si’ ammaturo,

E chest’è fegliolella; tù mo saje,

Ca le femmene sonco cannarute,

Vann’a caccia d’avè morz’appuntute.

160

So’ le femmene gentile,

Squasoselle, e dellecate,

Vonno carne, ch’è sottile,

Ca li vuoje strascenate,

No le ponno ppadeà?

165

Pesce frisco, e senza spina,

Pe la canna le strascina,

Fragagliuozze, e cecenielle

Cannolicchie pazzearielle,

Te le fanno sommozzà.

TONNO

170

E ba’ che fusse mpiso.

CUOCCIO

Mo te lo torno a di’, si nò l’aje ntiso. (da capo l’aria.)

SCENA IV

TONNO sulo.

TONNO

So’ stato mpizzo mpizzo pe le dare,

No sgrognione a lo musso,

E farele spotà diente pe n’anno,

175

Vi’ che piezzo de ciuccio, vo’ mparare.

Lo Patre a fà li figlie, aggio saputo,

Ca Ciccillo sgargea co sta chiajesa,

E Fortunata abbotta; a st’acqua trovola

Pozzo fà bona pesca,

180

E massima c’al’ammo, aggio bon’esca.

Na femmena gelosa,

È meza ntroppecata,

Regalale carcosa,

Ca chest’è na vottata

185

Pe farla mmertecà.

Sia tosta, e sia gagliarda

Ammarce co denare?

No manca, si be’ tarda,

S’ave da derropare,

190

E non se pò ajutà.

SCENA V

GRAZIELLA facenno bottune mmocca a la porta soja.

GRAZIELLA

Comma Cianna non mmene, io stonco sola,

Non ce compare nullo nnammorato,

Ed io faccio bottune:

Chiste vann’a la larga,

195

Mo’, che se fa sta festa,

Pe sfoì d’accattarme lo perduono.

Ma no mporta, ca io so’ bona pezza,

Quann’è tiempo le metto la capezza,

Oh, te ch’a chesta via

200

Veneno da llà bascio, Ciccio, e Maso,

Mme ne voglio trasì ch’a tutte duje

Io le ttengo mmalanza,

Fra tanto vedo, e sento,

Mme nformo, e po mme sceglio

205

Chi mme và chiù a lo genio, e chi è lo meglio.

Lo Passariello

Quann’ha appetito

Pe n’aceniello,

Ccà gira, e bota

210

Llà zompa, e bola

Tanto revota,

Che l’hà da trovà.

E na fegliola,

Che bo’ marito

215

Non penza, e prova;

Ma la sciaurata

Mmeste a chi trova,

Fa la frettata,

E po se spassa

220

A ghiastemmà.

SCENA VI

CICCILLO, MASILLO pe strata, e la stessa, che fa la spia.

CICCILLO

Ora non ce vo’ auto, nch’aje magnato,

Vienetenne a la casa: nce vestimmo,

E facimmo sonare lo Tammurro

Pe chiammà li compagne.

MASILLO

E accossì faccio,

225

M’addo’ vuoje fà squatrone?

CICCILLO

A lo Mantracchio.

MASILLO

Và buono, ca da llà jammo pe Puorto,

E po venimmo ccà pe fa la festa,

E pe dare l’assauto a lo Castiello

Vece buono?

CICCILLO

Eh Masi’ stà ncerviello

230

A menà la bannera, fatt’anore,

E addo’ t’aviso pigliatence gusto.

MASILLO

Oh, ch’è pensiero mio

Te voglio fà vedè bellizze a mucchio.

CICCILLO

Sì tu vuo’ quacche sarvà, avisamello.

MASILLO

235

Nne voglio un’a sto llargo.

CICCILLO

A chi vuo’ fa st’annore.

MASILLO

A Graziella.

CICCILLO

E pecché?

MASILLO

Ca la voglio pe mogliere.

CICCILLO

Oh bon’ora, e che sento, comme? comme?

Vuo’ chessa pe Mogliere?

MASILLO

240

Chesta voglio: che d’è? Tu rieste friddo.

CICCILLO

Me faccio maraveglia; a sti quartiere

Nce so’ piezze de giuvane, e zetelle,

Che te zompano nfacce.

E buo’ ire nzì a Chiaja pe mogliere.

MASILLO

245

E tu che nce farrisse?

Chesta me tira sanco

Lo funcio nasce addove pienze manco.

CICCILLO

Tu saje chi è chessa, s’ave dote, o none?

MASILLO

Oh ca mme so’ nformato, jammo buono.

CICCILLO

250

Masi’, vi’ che no sgarre, ca mme pare

Troppo capo a la llerta...

MASILLO

E che borrisse?

Quà ppullo muorto, che te more mmano?

CICCILLO

Chesto nò, ma che sia fegliola soda.

MASILLO

Oh ca cheste maddamme muss’astritto

255

Sse grannezzose, non toccà ca sghizza.

A le bote te fanno cierte botte,

Che manco te le pienze: vasta, vasta,

Tu si’ troppo piccione:

Va parla co chi ha puosto lo scaglione.

MASILLO

260

Si tu mmatte na sgregnosa,

C’hà na mamma tatanara,

Maro tene; siente, e mpara

Chella ntoscia, e chesta tofa;

No le puoje maje contentà.

265

Te fann’ire a manganiello,

Chella tira, e chesta molla,

Un’alliscia, e ll’auta molla;

Tu nce pierde lo cerviello

E te siente desperà.

CICCILLO

270

Aje Masi’, siente sie’;

Accossì dice tu, cossì dich’io.

MASILLO

Uh parol’agge a mente, saje ca Patremo

Sta pe la via?

CICCILLO

Sia lo bemmenuto?

Ma pecché mme lo dice?

MASILLO

Non mm’aje ditto,

275

Che le parla pe tte, ca tu vuo’ sorema?

CICCILLO

Ah sì, ma no nc’è pressa (chest’è meglio.)

MASILLO

Tu nzì a mo mm’aje nfettato, e mo n’aje pressa?

CICCILLO

Voglio fare le cose chiano chiano.

MASILLO

(Chisto carcosa ha ncuorpo) comme vuoje;

280

Ma famme no piacere, nzì a tanto,

Che te resuorve, non passà da ccane.

CICCILLO

Comme vuoje, te contento,

Ma a n’aoto le darria n’aota resposta.

MASILLO

O auto, o vascio, fà comme dich’io.

CICCILLO

285

Che d’è? tu capozzie.

MASILLO

Va felecissemo

Ca po parlamm’appriesso.

CICCILLO

A gusto tujo.

Ma saje, chi sonco, e ca n’arranco, e fujo.

SCENA VII

CICCILLO, che resta penzuso, e GRAZIELLA.

GRAZIELLA

Oh? ca se so’ spartute, ed è restato

Chi mme và cchiù a lo genio: voglio ascire;.

CICCILLO

290

Oh bon’ora, a che guaje mme so’ mettuto?

Vencane nzò che bo’, so’ resoluto.

Oh vecco Graziella attiempo attiempo,

Mme voglio arresecare de parlarle,

E fa lo fatto mio primmo de Mase.

GRAZIELLA

295

Si mme parla, io le parlo, e piglio lengua.

CICCILLO

Schiavo Patrona mia...

GRAZIELLA

Bonnì ve venca.

CICCILLO

Si no ve fosse scaro, na parola.

GRAZIELLA

Patrone, che bolite?

CICCILLO

Vorria la grazia vosta...

GRAZIELLA

Comm’a dire?

CICCILLO

300

Non pozzo parlà troppo, simmo viste,

Perzò ve dico schitto. O Fata bella,

C ape ttè squaglio, e moro, e si mm’azziette

Te voglio pe mogliere...

GRAZIELLA

Uh janca mene?

Accossì prunto, prunto mme lo dice.

CICCILLO

305

Scosateme bellezza, ca si aveva

Cchiù tiempo, e luoco, meglio lo deceva.

GRAZIELLA

Già ch’è chesto, vedimmo,

Ca si pozz’esse toja, lo boglio fare,

Lassamence penzare.

CICCILLO

310

Penzace bella sì,

Ma no mme dire no,

Ca me farraje morì

Da desperato.

O penta palommella

315

Pensa a lo nomme ch’aje

Te chiamme Graziella,

E grazia me farraje

Musso affatato. (A la rebbreca de la primma parte ven’ascenne, Masillo, che s’agguata, e sente.)

SCENA VIII

MASILLO, FORTUNATA a lo barcone, e GRAZIELLA.

MASILLO

Vi’ s’è comme dich’io, ca lo frabbutto

320

Ha la magagna ncuorpo, aspetta, aspetta

Ca mo te voglio fa ssa varva netta

Aje Fortonata, Fortonata?

FORTUNATA

Gnore.

MASILLO

Scinn’abbascio, e fa scennere Bellonia.

FORTUNATA

Mo scennimmo.

GRAZIELLA

Vorria parlà co chisto,

325

Ma mo scenne la sore, jammoncenne,

Non manca tiempo, e chi mme vole bene

Lo ssà comm’ha da fare, appriesso vene.

La campana quanno sona,

Non se parte da no luoco,

330

E la gente appoco, appoco

Fà venì co lo ssonà.

Accossì fà na zetella

Quann’è bona, quann’è bella,

Nche se mett’a la fenesta

335

Chesto vasta a fa la festa;

Vi’ le mmosche attornià.

SCENA IX

MASILLO, FORTUNATA, e BELLONIA abbascio.

MASILLO

E ba’ ca t’aggio ntesa, mo t’arrivo.

FORTUNATA

Che buo’ Masillo mio?

MASILLO

Curre Bellonia

Và parla a Graziella, ca la truove

340

De bona tempra. Mo se nn’è trasuta.

BELLONIA

E mo’ bellezza mia sarraje servuta.

MASILLO

E tu fegliola siente,

Mo che scennea da coppa

Aggio visto Ciccillo, che faceva

345

La percopia attuorn’a Graziella;

Non senza che lo guitto,

Me facea lo schefuso; eh Fortonata

Te torn’a di’, no le tenè cchiù mente

Ca te spacco ssa capo nfi a li diente.

BELLONIA

350

Masillo mio non correre,

Po essere che sia l’apprenzeone:

Nformate meglio, e po...

MASILLO

Che apprenzeone

Ll’aggio visto co st’uocchie. Tu m’aje ntiso

Stà ncerviello, vi’ comme te l’aviso.

355

Mo fa cunto ca so’ fatto

Comm’a bufaro stezzato,

Corro, e mesto nzò chi è.

Schefenzuso a mme sso tratto,

Maro te che nce si’ nato

360

Te nne voglio fà mappina

Vuo’ provà la tremmentina,

Come sape, crid’a me.

SCENA X

FORTUNATA, e BELLONIA.

FORTUNATA

Che te pare Bellonia, è comm’io dico,

O comme dice tu?

BELLONIA

Figlia mia cara

365

So’ restata na mummia, ma tu puro

Potive fa de manco

De ridere co Tonno...

FORTUNATA

T’aggio ditto,

Ca mm’è scappato a ridere,

Mmedere chillo viecchio brutto fatto,

370

Ch’attuorno mme facea le guattarelle.

BELLONIA

Tu haje fatto pe abborlarlo,

E Ciccillo se crede, ch’è lo vero.

FORTUNATA

Si tu le parle, cagnarrà penziero.

BELLONIA

Nche lo trovo le parlo...

FORTUNATA

Vance mone.

BELLONIA

375

Aggio da ì ddo’ chesta, aje ntiso frateto.

FORTUNATA

Po ncè vaie quanno tuorne.

BELLONIA

Eh zitto ciota,

Lo male tiempo, è ccà; si chest’attacca

Lo passeo co Masillo,

Tu guadagne lo chiaieto, e tuio Ciccillo.

FORTUNATA

380

Ma chi sa, che pò essere nfratanto.

BELLONIA

Oh ca mo’ mm’aie frusciata: statte zitto,

E lassa far’a mmene t’aggio ditto.

Vuie facite la zannata

Fraschettelle

385

Pazzarelle;

E po curre mamma, e zia

La stoppata

Vien’a fà.

T’aggio ditto figlia mia,

390

Ca coll’uommene geluse

N’abbesogna pazzeà.

Ca po pigliano le scuse

Pe mannarve a scortecà.

SCENA XI

FORTUNATA sola.

FORTUNATA

Maramè comme faccio, si Bellonia,

395

Non fa niente co chesta: addo’ è benuta

Sta bonora de Chiaja

Pe farme sconcecà lo fatto mio.

Mannaggia lo Castiello, e quanno maie

Nne fu parola: aimme perdo Ciccillo;

400

Lo sgrato mme la face; a lo mmacaro

Lo potesse scriare da sto pietto:

Ma non pozzo, e perdo isso, e lo recietto.

Mo so’ comme a no Vasciello,

Che no piezzo ha veleiato,

405

Ma po mmeste, e se sfracassa

Nche lo puorto vo’ piglià.

Quanto tiempo sto cerviello

P’avè Ciccio ha navecato,

Ma la sciorte me n’arrassa

410

Mo, che stea pe ng’arrivà.

SCENA XII

BELLONIA da la casa soja, e po CECCIA facenno cauzette.

BELLONIA

Voglio co chesta scusa

Parlare a Graziella; Ceccia, Ceccia?

CECCIA

Che buo’ Mamma?

BELLONIA

A che staje co ssa cauzetta?

La scumpe pe sta sera?

CECCIA

Che so’ pazza,

415

Che boglio fatecare ogge, ch’è festa?

Mo arrivo a sti scagniente, e l’ammasono,

Po nce vedimmo craje.

BELLONIA

Buono, buono.

È bello sso designo, si te resce;

Che ffesta, e che ffestino vaje cercanno;

420

Ncresciosa, presentosa? haje da crepare

Nzi a meza notte ncoppa a sta cauzetta,

Ssa festa toja no stace ncalannario,

Che buo’ fare tut’oje lo cavallo.

CECCIA

N’è ncalannario? e stà a lo Chiaravallo

425

Lo bi’, ca tutte quante so’ aparate

Zetelle, mmaretate; e stann’a spasso

Chi nfenesta, chi a l’astreco, chi nchiazza,

Ca se fà lo Castiello? e buoje ch’io sola

Haggio da fà la gatta cennerentola,

430

Acceputa a no pizzo a ffatecare?

BELLONIA

Poche parole; mosta ssa cauzetta.

CECCIA

Che me ll’haje d’apprezzare?

BELLONIA

E ppuro parle?

Uh te, che sfuorgio tè. Vi’ bella rezza

Pe piglià cecenielle.

CECCIA

E tu pecchene

435

No m’accatte li fierre cchiù sottile?

BELLONIA

E chiste che cos’hanno!

Facimmole bedere a Comma’ Cianna.

CECCIA

Ah ah, chest’è cchiù meglio; si te pare;

Jammoc’a fà na causa a la Vagliva;

440

Nsomma d’ogne manera co la gente

T’aje puosto ncapo de me sbregognare?

Ca sonco capo abbiento, presentosa,

Lencuta, cannaruta, trevellessa,

Scanza fatica, e cuorpo de buon tiempo,

445

Mo chest’auto nce manca, a fà vedere,

Ca non saccio canoscere no fierro

Si fà pertuso gruosso, o peccerillo,

E non pienze ca sonco de marito;

Tu propio me farraje perde la sciorte;

450

E quanno, quanno me ne lieve o morte. (chiagne.)

BELLONIA

Tu chiagne, e buo’ marito? vuo’ stà fresca,

Sia Donna Petronilla, affe te juro

De mmaretarete co lo pesaturo. (tozzola a la casa de Graziella.)

CECCIA

E già che simmo a chesto,

455

Te la cauzetta, e scumpete le riesto. (jetta nterra la cauzetta, e s’arrassa da la mamma.)

BELLONIA

Aspetta bricconcella, aspetta, aspetta.

SCENA XIII

GRAZIELLA da la fenesta, e le stesse.

GRAZIELLA

Chi tozzola?

BELLONIA

Songh’io, Sia Graziella.

GRAZIELLA

Oh Sia Bellonia mia, che baje facenno?

BELLONIA

Nc’è Comma’ Cianna?

GRAZIELLA

Nò; volive niente?

BELLONIA

460

Le voleva fà vedere sta cauzetta;

E tu mo co chi staje?

GRAZIELLA

Stonco sola.

BELLONIA

Si n’aje che fare, siente na parola.

GRAZIELLA

Aspetta, ca mo scenno.

BELLONIA

Sia Maddamma (a Ceccia.)

Trase dinto, ed allummame lo ffuoco.

CECCIA

465

Chest’auto nce mancava de mpazzire

A ghiettà lo focile.

BELLONIA

A maratene

Tu propio non ce viene comm’a mmene.

CECCIA

Ah mamma, me faje ridere,

Si’ ccoreosa affè

470

E buo’ sapè perché?

Ca faje comm’a le becchie

Che giovane so’ pazze;

Po quanno so’ mmecchiate,

So’ tutte addottorate, e so’ sapute.

475

Tanno le siente dicere:

Quann’era peccerella

Non ghieva pe le chiazze,

Felava, arrepezzava,

Faceva le colate;

480

Parea na vesparella

E diceno vessecchie

Pampanute.

SCENA XIV

BELLONIA, e GRAZIELLA abbascio.

BELLONIA

Ah sprovera, sprovera...

GRAZIELLA

Eccome ccane,

Che m’haje da dire?...

BELLONIA

Tenco na mmasciata.

GRAZIELLA

485

De chi?

BELLONIA

De Furtunata co lo frate.

GRAZIELLA

Che bonno?...

BELLONIA

Mettimmonce llà dinto

Ca parlammo cchiù meglio.

GRAZIELLA

Comme vuoje; è cosa bona.

BELLONIA

Si...

GRAZIELLA

Su ncigna a dire.

BELLONIA

490

Uh che pressa che tiene; stà a sentire.

Eh Graziella ntienne a mme sta attiento

Lassalo ghì Ciccillo

Attacca co Masillo, ca si none

Nce faje venire sanco, e po è peccato

495

All’aote levà lo nnammorato.

GRAZIELLA

Bellonia mia: Fortonata è pazza.

Che Ciccillo, e Ciccione và contanno,

Io non canosco nullo; e si le spiace,

Che chillo la zanneja, che lo lassa,

500

Ca la rraggia accossì fuorze le passa.

SCENA XV

CUOCCIO, che bà vennenno ancine, e le stesse, che parlano zitto.

CUOCCIO

Oje castagnole, e ancine,

Cannolicchie saporitielle

Addoruse, freccecarielle,

Femmene belle

505

Veccole ccà

O goliuse chi vo’ scialà.

Aje chi vo’ peglià appetito

Nc’è n’ancino saporito,

Na carnumma, na patella;

510

Co na spera, n’ostechella,

Vi’ che spuonolo calluto,

Vi’ che muorzo cannaruto

Pepe, e vuoglio, e lassa fà.

BELLONIA

Cuoccio aspetta no poco...

CUOCCIO

Oh bravo accunto?

515

Vatte sbrecanno...

GRAZIELLA

Aspetta.

BELLONIA

Mo’ mo’ venco.

CUOCCIO

Priesto, ch’aggio da fare...

GRAZIELLA

E che cos’aje?

CUOCCIO

Sta Chiajese, è cagliente atta de craje.

Aje castagnole, e ancine

Cannolicchie saporitielle?

BELLONIA

520

E zitto, no strellà, ca mm’aje storduta?

CUOCCIO

È longa sta matassa? ll’aje scomputa?

Aje cannolicchie, e ancine.

SCENA XVI

TONNO, e li stisse, e po CECCIA.

TONNO

Oh Cuoccio lloco staje? siente, siente.

CUOCCIO

Mo venco, quanto faccio na facenna

525

Co zia Bellonia.

TONNO

Lloco stà Bellonia?

BELLONIA

Veccome ccane.

TONNO

Oh manco male attiempo.

BELLONIA

Che buo’ niente zi Tonno?

TONNO

Na parola. (parlano zitto.)

CECCIA

Fegliulo viene ccà.

CUOCCIO

Che nc’è bellezza?

CECCIA

Voglio vedè, che ttiene.

CUOCCIO

Tutto bene;

530

Spere, ancine, patelle, cannolicchie.

CECCIA

Chiste so’ muorte.

CUOCCIO

Che buo’ pazzejare?

Tocca si cannolicchie, e bi’ si sghizzano.

CECCIA

Che buo’ sghizzà, ca pareno li mpise

Co la lengua da fora, e non se moveno.

CUOCCIO

535

Chesto già lo ssapea, ca vuje zetelle

Volite cose assaje freccecarelle.

Non guanceare cchiù, ca se smauceano,

E no le benno po.

CECCIA

Che haje, che strille?

Quanto li binne a grano?

CUOCCIO

540

Treje a grano.

CECCIA

Seje no le ddaje?

CUOCCIO

E si ca sonco vuruoccole;

Aspetta ca mo magne cannolicchie.

CECCIA

N’aggio no gran golio veramente.

CUOCCIO

E trasetenne, no nfettà la gente.

CECCIA

545

Cinco le ddaje?

CUOCCIO

Si le commanne nduono

Si la patrona, ca ffa bella grazia

Comm’a no lattovario me sazia.

CECCIA

A me duono? và connio;

Ca na femmena, che piglia

550

Se fà mettere la vriglia,

E pe forza, o pe ragione

Stace a rriseco de dà.

Be’ sacc’io lo fatto mio,

Non so’ tanto nzemprecella;

555

Si n’aje auta locernella,

a la scura paparone,

Quanno vuoje, te puo’ corcà. (se ne trase.)

CUOCCIO

Scazza, chest’è begliacca.

TONNO

E che d’è chesto? (a Bellonia.)

Ca dice a Fortonata sta parola,

560

Zi Tonno te vo’ bene.

BELLONIA

Né nce lo pozzo di’; scusame a chesto.

TONNO

Si mo no lo sapesse

Ca tu puorte mmasciate a chisto, e a chillo

Deciarrisse ca tè...

BELLONIA

Tu staje mpazzuto

565

Quanno maje aggio fatto ssi servizie.

TONNO

Vi’ che gliannola negra.

E bà a malanno.

CUOCCIO

Oje vecchia roffeana, si te piglio.

BELLONIA

E che buo’ che te sgargio scurmo fraceto.

CUOCCIO

570

Uh te te, ca li cippe fanno fuoco, (ccà posa la sportella pe ghire a spartere, e Ceccia se la piglia e se mette a lo barcone.)

TONNO

A perchia brutta fatta.

BELLONIA

Sconciglio scortecato.

CUOCCIO

E mbe’ chesto che d’è? vi’ li nennille.

Ca fann’accostiune; site pazze?

TONNO

575

Cuoccio no mme tenè.

CUOCCIO

Vascia le mmano.

BELLONIA

Viene, viene guallecchia

Ca te voglio stracciare ssa pellecchia.

CUOCCIO

E zitto zia Bellonia.

Porta respetto a ll’uommene.

BELLONIA

580

Isso ch’aggia creanza co le femmene.

TONNO

E tu no mmuo’ stà zitto jolla jolla.

BELLONIA

Appila tu schefienzia; sorchia, sorchia.

TONNO

Uh te te la norata.

BELLONIA

Vi’ che stampa de fà lo nnammorato.

CUOCCIO

585

Uh mmalora la sporta addov’è ghiuta

La sporta bene mio chi l’ha pigliata?

GRAZIELLA

Curre, curre da ccà vi’ chi la tene.

Oh bene mio che risa.

BELLONIA

Che singhe strascenato.

TONNO

Fusse accisa.

590

Calascione brutta fatta.

BELLONIA

O Teorba a ttaccone.

TONNO

Crepa.

BELLONIA

Schiatta.

TONNO

A lo ponte jolla jo’.

GRAZIELLA

A la forca sciò, sciò.

CECCIA

595

Chest’è bella ah ah.

CUOCCIO

La sportella è già squagliata,

E tu vecchia mmalorata,

Lo dammaggio aje da pagà.

BELLONIA

Lassa.

TONNO

Tira.

BELLONIA

Mpiso mpiso.

CUOCCIO

600

Non mme scappe ah ah.

CECCIA

Oh che botta ah ah.

BELLONIA

Fuss’acciso ah ah.