Lo castiello sacchejato

Lo castiello sacchejato, Napoli, a Spese de li Mpressarie, 1732

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO TERZO

SCENA PRIMMA

A suono de Tammurro, o de stromiente vene la compagnia de li Cristejane, CICCILLO da Capetaneo, GRAZIELLA d’Arfiero, CECCIA da Paggio de Ritella.

CICCILLO

Simm’arrevate già; stammonce attiente

Amice, e cammarate,

1230

Mo che se fà la festa,

Penzate ca nce vace

L’anore vuosto, e mio, anemo, e core;

Nce stann’a tene mente?

GRAZIELLA

Chist’è lo gusto nuosto, e statt’alliegro;

1235

Ca st’uommene de spireto, e balore,

Stanno pe se fà anore.

CECCIA

Ed io porzine

Co sto spito ammolato, e sta rotella

Voglio fà cose d’atterrì lo munno:

Meza Torchia voglio mannare affunno.

CICCILLO

1240

Quanno dammo l’assauto,

Aprite l’uocchie, e ghiate attiempo, attiempo,

No ve facite male,

Che no ghiesse carcuno a lo spetale.

Su bia facite largo, e tu fegliuolo (a li Sordate, che se spartono, e fanno ala.)

1245

Fatte nni ccà, si Arfiero

Accommenza la festa a la bon’ora;

Ma Graziella non ce pare ancora.

GRAZIELLA

Sio Generale anore vuosto, e grolia,

E a nomme de vettoria. (a suono de stromiente joca la bannera a lo Capetanio, e se mette de banna.)

CICCILLO

1250

E biva lo Sio Arfiero bravo, bravo.

GRAZIELLA

Compatesca ossoria

CICCILLO

Te resto schiavo.

(Ah Graziella, e che trormiento è chisto,

Và sacce addove sta, vorria spiarlo

A lo frate, ma chisto che pò dire?)

1255

Bon’ora addov’è ghiuta sta fegliola

Ccà no la vedo, llà no nc’è; mannaggia,

Che festa voglio fare co sta rraggia?

Or via sordati ritornate al campo,

E stregnite l’assedio a quel Castello;

1260

Oscia si Arfiero vaga mmasciatore

A lo gran Turco a domandar la Piazza,

A patte no mperrò de bona guerra;

Si no, c’a fierro, e ffuoco andrà la Terra.

CECCIA

E dica da mia parte al gran Visirro

1265

C’un famoso Guerriero

Lo desfida a duello

Pe l’ammaccà lo musso, e lo scartiello.

GRAZIELLA

Gnorsi mo vao Segnore, e spero quinci

Tornar lieto messaggio,

1270

Fuorze ca porterò meco le chiavi

Della difesa rocca.

Uh? che parole, m’esceno da vocca. (Tutte partono.)

SCENA II

FORTONATA, e BELLONIA.

BELLONIA

Tu m’aje fatta mpazzire pe trovarete

E addo’ t’iere nforchiata, figlia mia.

FORTUNATA

1275

So’ scesa da dereto a lo Castiello,

E mme steva mpezzata a chillo vascio

Pe no stare llà ncoppa mmiezo a tanta,

Ed esse canosciuta.

BELLONIA

Mo mme faje la saputa?

1280

Chesto ll’avive da penzare nnante,

E no mmo, che ll’aje fatta la frettata;

Io pe darete gusto,

E p’avetare puro quarche male,

Me so’ cecata a fare sta pazzia,

1285

So’ meza sdellommata,

E tu mme fuje da mano; ah figlia mia.

FORTUNATA

La cosa è fatta no nzerve a chiagnerla;

Va saglie a lo Castiello, ca mo vengo.

BELLONIA

E tu, che faje cca bascio?

FORTUNATA

No lo ssaje,

1290

Che so’ benuta a fare?

Quanno se dà l’assauto,

Voglio vedè mmescareme a la folla,

Pe dà no cuorpo a Ciccio.

BELLONIA

E ppuro tuorne?

Vi’, ca ng’abbusche tune.

FORTUNATA

Oh, no mm’accidere;

1295

Che te serve cchiù a fare la maesta;

Sì moro, moro, e sanetà, a chi resta.

BELLONIA

(Voglio fà nfenta de sagliremenne.)

Accossì buoje; accossì faccio, io saglio;

Ma penza a case tuoje,

1300

Ca si po passe guaje,

De n’avereme ntesa chiagnarraje.

Sient’a mmene capo tosta

Tu faje comm’a la castagna,

Quanno stà dint’a lo ffuoco;

1305

Che pe fa na bella botta,

Co la botta ha da schiattà.

Chi co ll’uommene se ntosta,

Cchiù nce perde, che guadagna,

Ma lo vence a ppoco a ppoco,

1310

Chi stà zitto, crepa, e abbotta,

E lo lassa sforeà.

SCENA III

FORTONATA sola.

FORTUNATA

Anore mio perduto,

Core mio strazeato, mo è lo tiempo

De fa vedere, che pò fa lo sdigno

1315

Mpiett’a na nnammorata,

Traduta, e desperata,

Mora, mora lo cane,

Ch’è causa sulo de lo mmale mio;

Mora..., ma che dich’io? e si quarcuno

1320

Pe l’ajutà me tene, io po che faccio?

Eh ca sbarejo, chi lo vo’ ajutare?

La gioja soja, che mme l’ha sbotato?

Di che benca, che benca, ca vedimmo

Chi a provare ste mano sarrà primmo?

1325

Già me pare de vedere,

Ch’esa n’ombra despettosa

Da na grotta spaventosa,

Che na spata me vo’ dà.

Tè, mme sgrida, tu che spiere?

1330

Curre a farte la vennetta...

Ma lo core dice : aspetta;

La piatate addove stà?

A sta voce ll’arma mia

Compatire lo vorria;

1335

Ma ddo’ trovo stà pietà.

SCENA IV

TONNO, e MASILLO pe strata.

MASILLO

E siente na parola, che cos’eje?

Vi’ che bregogna è chesta?

TONNO

Eh nò, Masillo fatte tu ssa festa.

Pigliate ccà sto sceltro, e chisto manto.

1340

Fa pe mme lo Gran Turco, io mo mme spoglio,

No ne voglio fa pe manco na cria.

MASILLO

E scumpe mo’ bon’ora,

Mme pare peccerillo,

Che buo’ esse accordato.

TONNO

1345

So’ no chiochio, ca sonco coffeato.

MASILLO

Ma che t’è stato fatto?

TONNO

Aje ntiso Cuoccio?

MASILLO

E a chillo tiene mente?

TONNO

Frateto se n’è sciso, e non se vede;

Chiss’aute stann’a bino,

1350

No monno respettare lo Gran Turco;

Ed io mo voglio perdere

L’anore mio co ssi mbreacune?

O ll’aggio da pegliare a secozzune?

MASILLO

Tu mo’ mme miette appretto,

1355

Che bao trovanno fratemo,

E lo scommo de sanco.

TONNO

Si’ mpazzuto?

Lassalo ì lo povero fegliulo

Se spassarrà ccà bascio.

MASILLO

Oh marisso, si ll’ascio.

TONNO

Eh nò Masillo,

1360

No mme dà sso desgusto,

Ca pare justo Fortunata mia.

MASILLO

Ma tu te staje?

TONNO

Me stonco, comme vuoje.

MASILLO

No sconcecà li fatte mieje, e tuoje.

TONNO

Dimme na cosa ddo’ stà Fortonata?

MASILLO

1365

Stà ncoppa.

TONNO

E che bo’ dire

Ca no stace affacciata?

MASILLO

Che nne saccio,

Starrà dormenno, o puro se sterlicca.

TONNO

Siscale, core mio, ca so’ speruto,

De darle no saluto.

MASILLO

Comme vuoje (sisca.)

1370

Chesta non sente.

TONNO

Siscale n’auta vota. (sisca.)

MASILLO

Manco mo’, cierto dorme.

TONNO

Agge pacienza

Torna, torna a sescà.

MASILLO

Eh ca po vene.

TONNO

Si no la vedo, io non saccio bene.

Parè si no fusillo

1375

Non hà lo vertecillo,

Tuorcelo quanto vuo’,

Non fà la rota aibò.

Sghizza da ccà, e da llà,

E non te fà felà

1380

Manco no capo.

Accossì mo songh’io,

Senza lo core mio

Storduto, nzallanuto;

Ccà boto, e llà revoto

1385

Non saccio, che me fà

N’haggio cchiù capo.

MASILLO

E zitto, ca mo vene

Lo mmasciatore, sù miettete ntuono

A buje fegliule attuorno. (escono li Turche, e torneano Tonno.)

TONNO

(Ah Fortunata

1390

Me faje perdì la spesa, e l’aparata.)

SCENA V

GRAZIELLA acompagnata da duje sordate, e li stisse.

GRAZIELLA

Salamelech, sio Gran Turco, schiavo.

TONNO

Ti, sabalkair, voste che chiere?

MASILLO

Oh cammarata, chesta è Graziella. (a Tonno.)

TONNO

(Zitto lassa fà a mme, mo non è tiempo.)

GRAZIELLA

1395

Il nostro Generale quì m’invia

Pe dire all’ossoria, ca pe piatate

De vuje, e de sta Terra,

Primmo de fà la guerra v’arrendete;

Che se voi sordi siete, ei prende l’armi

1400

E b’ammenaccia, rotte c’hà sse porte,

Ferro, fuoco, catene, stragge, e morte.

MASILLO

Bù co la palla, e chi vaglia? la corte.

TONNO

Respondir Gran Visirre a sto Ciaurro.

MASILLO

Mo’ discir Gran Seniura, o Messaggiero,

1405

Tò scaltro nzieme, e fiero

Gran cose aje ditto, e con i vostri detti

Ci minacci, e ci alletti;

Dirai à chi ti manna,

Che render non vogliamo l’alto Castello,

1410

Che lo sciocco s’inganna

Se si crede di metterci paura,

C’hà da fà co na bona creatura.

TONNO

Sciabigà zizzicul, viva Moratto.

GRAZIELLA

Donca volite guerra?

MASILLO

Bolir guerra?

GRAZIELLA

1415

Ah Maumma marditto aspetta, aspetta,

Mo te facimmo chesta varva netta.

Negrecato marattene,

Ca te voglio à pilo, à pilo

Sciccà tutto sso mostaccio.

MASILLO

1420

Ah ciaurra non far filo

Mi tagliar cucussa, e braccio.

TONNO MASILLO

Ah Ciaurra allà, allà.

GRAZIELLA

Ah Maumma baccalà.

MASILLO

Tu volir pigliar Castello?

1425

Si t’avir granfe ncuollo,

Bolir mettere a catene.

GRAZIELLA

Stà ncerviello

Ca te zollo

Te lo scippo chisto tuppo.

TONNO

1430

Mo volire aver sceruppo.

GRAZIELLA

Me ne rido ah a a. (ride chjagnenno.)

TONNO - MASILLO

Po fascire uh à à. (Tonno saglie a lo Castiello, e ll’aute partono pe doje strate.)

SCENA VI

CUOCCIO co no Schiavottiello nfasciolla, e BELLONIA pe la mano.

CUOCCIO

E biene fedelone,

Pazzeammo no poco, dammo gusto

1435

A sta gente, che bede, che cos’aje?

BELLONIA

(Mannaggia chi m’hà puosto a chiste guaje

Non pozzo pazzeà, ca no sto buono.

CUOCCIO

E pecché si’ benuto a fà la festa?

BELLONIA

Mo venuta dolura sopra testa.

CUOCCIO

1440

E bia, ca non è niente mo te passa,

Facimmo sta pazzia,

Tu star mogliere mia

Io star marita tua,

Star figlio nostro chisto pescengrilla,

1445

Presto pegliare mbraccia, e dar zezzilla.

BELLONIA

Non potir dar zezzilla.

CUOCCIO

Allattare burnussa, o mo dar schiaffo,

Non sentir pescengrilla che sciancire,

E fascire nguà nguà.

BELLONIA

Che fuss’acciso,

1450

Vascia le mmano, chesto me mancava.

CUOCCIO

Ò dar zizza a fegliulo o mo dar mazze.

BELLONIA

Te dico non potire.

CUOCCIO

Dar pochitta, pochitta.

BELLONIA

Ah maramene,

C’aggio da fà co chisto?

CUOCCIO

Bresto, bresto,

1455

Non sentir che sciancir, facir nguà, nguà.

BELLONIA

Via priesto dallo ccà, ca mo l’accordo

Te le canto la nonna, e le do zizza.

CUOCCIO

A mettimma bella bella

Dar vasillo a Tata sujo.

BELLONIA

1460

Priesto mo te vaa la zella,

O te lasso, e mme ne fujo.

CUOCCIO

No scappar vita mia, te piglia, e canta.

BELLONIA

Benir ccà figlia mia, bor chi sciancire?

CUOCCIO

Avir bua, a bellicolo.

BELLONIA

E no schiatte?

1465

Star sitto pescengrillo, scioja mia,

Non star niente dormire,

C’accossì passar bua

A DUE

Cantar nonna bor tia mamma tuja.

BELLONIA

1470

O suonno suonno viene da lo monte

Vienec’ palla d’oro, e dalle nfronte.

CUOCCIO

E dalle nfronte, e no fascire male,

Si crepa non me mporta manco sale.

BELLONIA

Vienece suonno, e biene a chi te chiamma

1475

Schiatta lo Patre, e stia bona la Mamma. (Bellonia le jetta lo peccerillo, e fuje e Cuoccio che la secuta nce l’abbia appriesso.)

CUOCCIO

Ah bornussa mmardetta

Mo’ bolir scannare, aspetta, aspetta.

SCENA VII

MASILLO, e CUOCCIO.

MASILLO

Cuoccio Cuoccio

CUOCCIO

Chi è lloco?

MASILLO

Siente siente

Nchè se dace l’assauto,

1480

Co li compagne tuoje

Dà de mano all’Arfiere,

Saglielo ncoppa, e po da chella banna

Và lo porta a la casa de zi Tonno

Nchiudelo llà, mme ntienne.

CUOCCIO

Si te ntenno.

MASILLO

1485

Non te partì nzi’ a tanno, che non mmenco.

CUOCCIO

Lassa fà a mmene, e duorme.

MASILLO

Priesto priesto,

Chiamma la gente, vecco li nnemmice.

CUOCCIO

Allà allà sciabac venir canaglia,

Ca mo dare battaglia. (Mente Masillo canta escono li Turche, e se mettono ncoppa à lo Ponte, e attuorno a lo Castiello.)

MASILLO

1490

Si mme vuo’ bene Amore

Commatte pe sto core,

E la nemmica mia

Famm’ancappare.

Se perdo sto Castiello

1495

Ma n’auto ch’è cchiù bello,

E chillo, ch’io vorria,

Famme pegliare. (se retira ncoppa à lo Ponte.)

SCENA VIII

TONNO, e FORTONATA ncoppa a lo Castiello, MASILLO, e CUOCCIO abbascio, e da no vico compare la Compagnia de li Crestiane, CECCILLO, GRAZIELLA, e CECCIA.

TONNO

Venir bella Senjura

Vedir battaglia, e non avir paura.

CICCILLO

1500

A lo schiasso de sische, e trommette

Fedelune sse spate locate,

E facite a sti brutte mamette

Li mostacce, e li tuppe sciccà.

Sù compagne, lejune valiente,

1505

Dammo dinto, le mmano frosciare,

Ca volimmo nfra quatto momiente

Sto Castiello pe tterra jettà.

Su facite squatrone.

Miettete ccà Si Arfiero,

1510

E gioca la bannera.

GRAZIELLA

Eccome lesto.

CICCILLO

Fegliù stammonce attiento.

CECCIA

Sì Segnore.

CICCILLO

A nuje dammo dinto. (Ccà se dà l’assauto, e perdono li Crestiani, Cuoccio co duje compagne afferra Graziella, le leva la bannera, e la ncatena.)

CUOCCIO

Cammenare Si Arfiero,

Ca ti star priscioniero.

GRAZIELLA

1515

Ncopp’a le spalle meje cadie la botta.

CUOCCIO

Golualich Gran Segnor menaz zechina.

Turche auta vettoria allà allà, (Tonno, e Fortonata menano denare, e se nne trasene.)

Quant’è balente nostro Mostafà.

SCENA IX

GRAZIELLA ncatenata, e CUOCCIO

CUOCCIO

Su benire a Castella. (a Graziella.)

GRAZIELLA

1520

Mence aje cunto Turco cano,

E tu Ammore tradetore,

Che m’aje posta a ste rretaglie

M’aje terato chiano, chiano

A bolerme sbregognà. (chiagne.)

CUOCCIO

1525

Ca po chiagne, priesto saglie,

E benir ngargiubola.

GRAZIELLA

Cuoccio mio caro caro

Vi’ che buoje, e lassam’ire.

CUOCCIO

Boverella non sciangire

1530

Ca mo avire libertà.

GRAZIELLA

Ah fortuna puoje cchiù fà. (sagliono a lo Castiello.)

SCENA X

BELLONIA ncoppa a lo Castiello, e CECCIA abbascio.

BELLONIA

So’ sagliuta ccà ncoppa pe bedere

Fortonata che fà, ma no la trovo,

Chest’ha l’argiento vivo a le medolla,

1535

E songo mieje li guaje;

Maje chiù co li Spagnuole? decea Tolla.

CECCIA

Lo Generale nuosto

Me manna a lo Gran Turco,

Pe trattà lo recatto de l’Arfiero;

1540

E ccà non vedo nullo

Pe mme fà la mmasciata, uh te na schiava

Addo’ si Bellonia, do’ star gran Turco?

BELLONIA

Ah mara me, che bedo! chesta è Ceccia.

Si chesta se n’addona, ca songh’io,

1545

Mme sbregogna la scigna.

CECCIA

Oje bernussa, bernussa che si’ sorda?

BELLONIA

Che bolir che bolire?

CECCIA

Ddo star gran Turco.

BELLONIA

Star ncoppa a chichierchia.

CECCIA

Io mo le schiaffarria na pretata,

1550

Che mala grazia d’ommo, fuss’acciso,

E respunne che d’aje?

BELLONIA

Voglio stà zitto,

Azzo no mme conosca a lo pparlare.

CECCIA

Aspettammo carcauto, e nfratanto

Te voglio zannejà sta coccovaja,

1555

Che d’è bella fegliola,

C’aje perduta marita? dormir sola;

E gettar panza ne? non peccejare,

Che si star fredda io voler scarfare.

BELLONIA

Uh gliannola, che sento, vi’ che dice!

1560

Le potesse sceccare chella lengua.

CECCIA

A’ a’, ca se despera; scioja mia,

Pegliar me pe marito,

No star niente si sonco pescerillo

Gatta vechia bolira sorecillo.

BELLONIA

1565

Ah schefienzia mardetta, quanno duorme

Te la voglio sonà na natecata.

CECCIA

No mme fà la sgregnosa,

Facce de pozonetto affommecato.

Votate ccà zi zi?

1570

Che mme vuo’ fa morì

Core de cana?

Comme si’ brutto sciù,

Bornussa, baccalà;

Fascir, fascir uh, uh,

1575

Tiemente comme stà.

La roffeana. (se nne và redenno.)

BELLONIA

Va ch’aje da fa co mmico

Si n’esco a sarvamiento da sto ntrico.

SCENA XI

TONNO, e CUOCCIO abbascio.

TONNO

Haje portato l’Arfiero a sarvamiento?

CUOCCIO

1580

Stare ncappato sciurolo.

TONNO

Che ddice?

CUOCCIO

Che d’è? vuo’ fa lo sasco, no mme ntienne?

TONNO

Che saccio, che buo’ dire.

CUOCCIO

Lo Si Arfiero,

E Graziella.

TONNO

Ne comme lo ssaje?

CUOCCIO

De carrera, è benuto llà Masillo,

1585

E nnanze a mamma toja, e a ciento femmene

L’ha basata, e l’ha ditto,

Tu si’ mogliere mia.

TONNO

Oh buono, oh buono,

Ed essa, che l’ha ditto, e che l’ha fatto.

CUOCCIO

Che l’ha boluto di’? s’è fatta rossa,

1590

Primmo ha sparato a chiagnere, e sciccare

E po chiano chianillo

Tanto ha ditto Masillo co le femmene,

Che già ll’hanno accordata;

Ha ditto sì, e la fede già l’ha data.

TONNO

1595

Viva Masillo, e biva Graziella;

Cuoccio mo vide n’auta cosa bella,

Pe piglià lo Castiello.

CUOCCIO

Dammoncillo.

SCENA XII

CICCILLO co la compagnia, e li stisse.

CICCILLO

Tenco no core nigro comm’a pece,

N’aggio visto tutt’oje a li barcune

1600

Ste doje fegliole, nc’è carcosa sotta;

Mme dice lo pensiero,

Ca la Gran Torca è Fortunata, e Grazia

Sarrà l’Arfiero, io no veo Masillo,

L’Arfiero stà ncappato.

1605

Che nne pò ascì da chesto?

Uh che te fa lo core, io moro ciesso.

Via fenimmo sta baja, sona ssa Tromma

Pigliate sso Castiello a la bon’ora;

Mannaggia quanno maje ne fu parola. (Se dà l’assauto li Turche fujeno, e se piglia lo Castiello.)

TONNO

1610

Già pigliata castella, sia mmardetta

Mametta, e vita suja. (Se scippa lo mostaccio, e ghietta lo scettro abbascio, e se nne fujeno.)

CUOCCIO

Star morto gran segnore.

CICCILLO

Ah compagne acciaffate lo gran Turco.

SCENA XIII

FORTONATA co sciabola, e Targa, e CICCILLO

FORTUNATA

Fremma cca tradetore.

CICCILLO

Aimmè, che beo?

1615

Gran Torca chi si’ tu? si’ Fortonata,

O si’ Saverio? fremma.

FORTUNATA

Ah renegato

Chi sonco, e che bogl’io, mo te lo ddico

Sta sciabbola, forfante, muore cano.

CICCILLO

Senza che mme lo ddice, te canosco

1620

Vattenne Fortonata,

No m’apprettà, ca songo desperato.

FORTUNATA

Ah nfame tradetore:

Tiemente a che mm’aje posta.

Voglio morire, e tu co mmico muore. (s’attaccano.)

SCENA XIV

BELLONIA, MASILLO, GRAZIELLA, TONNO ncatenato, e li stisse, che stanno commattenno.

BELLONIA

1625

Priesto Masillo ajuta, chesta è soreta.

MASILLO

Fermate Fortonata.

GRAZIELLA

Statte Ciccio,

Ca si no tu si’ acciso.

CICCILLO

Aimmè so’ muorto.

TONNO

Che remore nce lloco?

Lassateme fegliù, ca nce so’ guaje. (lo lassano.)

MASILLO

1630

Non se mova nesciuno, io sulo abbasto.

Ceccillo, siente buono;

Nuje simmo state ammice,

Pe chesto te perdono

Lo tuorto, che penzave de mme fare;

1635

Va t’arrecetta, e sacce

Ca Graziella mm’è mogliere.

CICCILLO

Ah cana,

Accossì mm’aje lassato.

GRAZIELLA

Io ll’aggio fatto pe lo buono tujo

Ca si no jere acciso da Masillo;

1640

Cojetate, ch’aie tuorto.

CICCILLO

A tte mme voto.

Pe cercarte perduono, ò Fortonata,

Accideme, si vuoie, t’aggio ngannata.

FORTUNATA

Tu no mmierete piatate.

CICCILLO

Aje raggione, gioia mia.

FORTUNATA

1645

Non si’ digno, ch’io t’accia.

CICCILLO

Chest’è troppo canetà.

FORTUNATA

Io non saccio, che te fà.

Non nce pienze tradetore

A li guaie, che mm’aie dato?

CICCILLO

1650

È lo vero, ma l’arrore,

Si se chiagne, è perdonato;

Ed ogn’uno n’ha piatà.

FORTUNATA

Non è tiempo de piatà.

CICCILLO

Aiutame Masillo, o tu mm’accide,

1655

Te piglia cca ssa spata,

O sbennegname, o damme Fortonata.

MASILLO

Te compatesco, frate,

Ma non pozzo fa niente,

Ll’aggio promessa a Tonno.

CICCILLO

1660

Ah Maro mene,

Pe mmene s’è seccato già lo mare,

E lassateme ire a dderropare.

BELLONIA

Ah povero fegliuolo.

GRAZIELLA

Tiene tiene. (lo tene Tonno.)

TONNO

Fremma ccà, ddo’ vuo’ ire?

CICCILLO

1665

Che mme serve a campà, voglio morire.

SCENA URDEMA

CECCIA, che porta ncatenato CUOCCIO, e li stisse.

CECCIA

Passa ccà Massautto, arraiso cane

Tu star schiavo?

CUOCCIO

Gnorsì.

CECCIA

Vieneme appriesso.

CUOCCIO

Aie raggione gnorsì, ma non si’ sola,

Quanta viecchie strascina na fegliola.

CECCIA

1670

Zompa... chiagne.

CUOCCIO

Uh, uh, uh.

CECCIA

Ride.

CUOCCIO

Ah, ah.

CECCIA

Vasame sto denucchio.

CUOCCIO

O chesto è troppo.

CECCIA

Vasa brutto salemmo o mo t’azzoppo.

CUOCCIO

Fruscia mo te ne attocca.

TONNO

Scompite sta pazzia, siente Ceccillo

1675

T’aggio cresciuto de che iere tanto,

Te voglio bene, e bide mo che faccio,

Pe bolerte aiutare

Pigliate Fortonata, si te vole;

Pe non te fa morire te la cedo.

CICCILLO

1680

Ah Tonno, che mme dice? io no lo ccredo.

MASILLO

Fortonata, che dice? no respunne?

GRAZIELLA

Ah caienata mia bella,

Famm’a mme sto favore.

BELLONIA

E bia spapura.

FORTUNATA

Zi Tonno, io te rengrazio, e tu fraschetto,

1685

Mpara da n’ommo fatto; io te perdono

T’azzetto pe mmarito, e tu caienata

Damme n’abbraccio.

TUTTI

E biva Fortonata.

BELLONIA

E tu n’auta, sia Ceccia,

1690

Puro mmiez’a la festa.

CECCIA

E tu ch’aie fatto?

Non serve, che mme faie sta parapiglia,

Si la Mamma è na guitta, è peo la figlia.

CICCILLO

Aie raggione pe diece.

MASILLO

Oh bravo, oh bravo.

CUOCCIO

Messe’ te curche fridde pe sta vota.

TONNO

1695

Né mporta ca Bellonia

Pe la vecchiezza mia tene sta figlia.

CECCIA

Zi Tonno, tu sternute

Senza peglià Tabbacco;

No mmoglio accattà ossa int’a no sacco.

CUOCCIO

1700

Orsù segnure mieie,

È scomputa la festa,

Lo Castiello è caduto,

Agne cosa va a siesto;

Mora lo Turco, e biva Carlo Sesto.

FORTUNATA - GRAZIELLA

1705

Che contiento, che allegrezza.

CICCILLO - MASILLO

Oh che gusto, o che preiezza.

FORTUNATA - GRAZIELLA

Gioia cara.

CICCILLO - MASILLO

Fata mia.

FORTUNATA - GRAZIELLA - CICCILLO - MASILLO

Mpietto a mme sento sguiglià.

CUOCCIO

No Castiello è già caduto,

1710

E mo stanno pe la via

N’aute duie pe scarropà.

CUOCCIO - TONNO - BELLONIA

Figlie assaie, e sanetà.

L’Autore de la Commeddia non ha potuto assistere a la Stampa, e perzò se scusa, si nce songo paricchie arrure porzì de grammateca, e d’ortografia.