Lo castiello sacchejato

Lo castiello sacchejato, Napoli, a Spese de li Mpressarie, 1732

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO SECUNNO

SCENA PRIMMA

TONNO, e CUOCCIO pe strata.

TONNO

Oh ca s’è puosto fuoco a lo pagliaro,

Né se stuta pe mmone, ed io nfratanto

605

Mme scarfo a spese d’aote.

CUOCCIO

Comm’a dire!

TONNO

Comm’a di’, ca Masillo

S’è curzo co Ciccillo e no mmo fare

Chiù l’Arfiero co isso; m’ha pregato,

Ca vo’ trasì co nnuje a fà lo Turco;

610

Io mo’, che saccio quanno trona, e lampa

Le faccio fà lo Capetaneo nuosto.

CUOCCIO

Che pe chesto?

TONNO

Accossine

Fra lloro cchiù se ngrossano li sanche,

Ed io chiano chiano

615

Cchiù m’obbreco Masillo, e quann’è tiempo

Le cerco Fortunata.

CUOCCIO

Tu ll’aje bona penzata, ma lo guajo,

È ca chella vo’ chillo;

Messe’ tu si’ no sturno,

620

Chella è cardella, e bole no cardillo.

TONNO

E zitto, ca lo frate m’ha lampato

Ca cchiù priesto l’arrappa.

CUOCCIO

E ca l’arrappa,

Non fa niente; tu saje comm’è la femmena

C’ha no parmo de cuojero a lo settile.

625

E quanno dice nò, tu la puo’ accidere

Ca no stenne li piede.

TONNO

Fusse mpiso.

Sempe co sta canzona,

Decisse maje na parola bona.

CUOCCIO

E tu sempe te ncricche.

TONNO

E si si’ n’aseno.

CUOCCIO

630

Aje raggione gnorsì, stammonce zitto;

Io stonco mmalorato, c’aggio perzo

Na sportella d’ancine

Mo nce vo’ ss’aoto riesto.

TONNO

Non perdimmo cchiù tiempo

635

Pigliate lo tammurro, e ba’ sonanno,

Va chiamma li compagne, e torna priesto.

CUOCCIO

Quanto piglio no muorzo, e mo so’ lesto.

TONNO

Fruscia, curre, e stà attiento,

Ca te voglio nzorare.

CUOCCIO

640

Nzorare! no nne magno.

TONNO

E pecché?

CUOCCIO

Ca no mmoglio

Sto piso ncapo, e arreto po la coda.

TONNO

E ba’, ca si’ papurchio? nc’è a lo munno

Cosa che sia cchiù bella

645

De na mogliere quanno è giovenella.

CUOCCIO

Le femmene so’ belle,

Te fanno nnammorà;

Ma po sa comme so’?

Comm’a le ceraselle

650

Ch’hanno lo verme dinto,

E s’hanno da jettà.

So’ ghianche, e rossolelle,

Diceno piglia, e magna,

Ma dinto è la magagna,

655

Hanno lo core finto.

Perzò ll’aje da schefà.

SCENA II

TONNO, e po FORTONATA abbascio.

TONNO

Vi’ che malano d’ommo? è propio cuoccio

Sempe fà taccariello co la vocca

E no juorno lo smosso, o te lo scoccio.

660

Ma zitto; zi’, n’è chella

Fortonata che scenne? oh Tonno a ttene,

Vi’ si le può parlare mo’ che bene.

FORTUNATA

Bellonia non ce pare, ed io me magno

La rezza co lo quaglio.

TONNO

665

Schiavo tujo Sia Fortonata...

FORTUNATA

Oh che te magna lupo

Ca m’aje fatto sorrejere.

TONNO

Ch’è stato?

Tanto te paro brutto.

FORTUNATA

Mm’aggio ntiso

No sisco int’a la recchia

670

C’aggio avuto a percotere.

TONNO

Mannaggia,

Zitto, ca non è niente, si’ fegliola.

FORTUNATA

Accortammo li passe, che t’accorre?

TONNO

Nce stà Saverio ncoppa?

FORTUNATA

Mo mmo vene,

Che nn’aje da fare.

TONNO

E che cos’aje bellezza

675

Pare ca mo vuo’ gliottere, va chiano

Voleva sapè si s’ave mesorate

Li vestite, e si è lesto.

FORTUNATA

È lesto sine.

TONNO

(Mo le jetto na botta) eh Fortonata,

Quanno lo vieste, viestelo polito,

680

Ca chillo t’assemeglia, e nche lo veo

Vestuto da fegliola

Mme pare de vedere tutt’a ttene;

Pensa tu mo che gusto n’avarraggio,

Ca già lo ssaje quanto te voglio bene.

FORTUNATA

685

E ba ca si’ no pazzo maro tene.

TONNO

Io so’ pazzo? e peché?

FORTUNATA

Ca già si’ biecchio,

E buo’ fà da fegliulo.

TONNO

A ccà cient’anne

Sarraggio viecchio

Mo so’ frisco, e berde,

690

Comm’aglio; Fortona’ tu me strapazze

Senza ragione; io non so’ Ciccillo,

Che tu saje che t’ha fatto.

FORTUNATA

Co chi ll’aje?

C’ha fatto si’ mpazzuto?

TONNO

Non te serve a negare, ca Masillo

695

M’ha ditto ca sso zanno t’ha chiantata.

FORTUNATA

Che me mporta? mo si tutta me scicco,

E me faccio venì la tarantella,

A buon cavallo no le manca sella.

TONNO

Mo dice buono, singhe benedetta.

700

Trovate n’ommo sodo comm’a mmene,

Ca sti zanne sbarvate

So’ tanta scarfaseggia, e sbalestrate.

No birbo malenato

Si be’ vace linto, e pinto

705

Si se nzora, saje che fà?

Nche lo sciore n’ha sorchiato,

Dà no caucio a lo pegnato,

A li cane te lo dà.

Le spetecchia ndì momente

710

Chella dote c’ha pigliata;

Aucelleja da ccà, e da llà,

E po chianta a li pariente

La mogliere sfortonata

Che nce ll’hanno da campà.

SCENA III

FERTONATA sola.

FORTUNATA

715

Vi’ ca dice boscia ah mara mene,

Che nce sonco mmattuta co no zanno

Che da po, che m’ha fatto nnammorare

M’ha lassata connio; ma statte zitto,

Ca lo voglio agghiustà nnanze sta sera;

720

Già songo desperata, voglio fare

Nzò che me vene ncapo, e nò me mporta,

Si resto viva, o cado nterra morta.

Mo corro la fortura

De chi se trov’a mmare;

725

Che mmeste a la ventura,

O s’have da salvare

O priesto zeffonnà.

Me stà lo cote mpietto

Sopierchio resoluto,

730

Ca vo’ da lo despietto

Cercare chill’ajuto,

C’ammore no le dà.

SCENA IV

CICCILLO, e BELLONIA pe strata.

CICCILLO

No serve, che te piglie cchiù fastidio,

C’aggio parlato già co Graziella.

BELLONIA

735

Ll’aggio a gusto, e ch’aje fatto?

CICCILLO

Chesto vasta.

BELLONIA

Sto vasta che bo’ di’? che m’aje nsospetto?

CICCILLO

Co chi ll’aje? sto ammojenato

Ch’aggio da ì trovanno

Chi mme faccia l’Arfiero.

BELLONIA

E n’aje Masillo?

CICCILLO

740

M’hà chiantato.

BELLONIA

E pecché?

CICCILLO

Va te lo trova.

BELLONIA

Chesta è na cosa nova; vi’ Ciccillo:

Che non nce veng’appriesso guajo cchiù gruosso;

Ca l’annore è no purpo moscariello,

Che si troppo lo tuocche s’affetesce.

CICCILLO

745

L’annore ccà che nc’entra?

BELLONIA

E Fortunata

No resta sbregognata?

CICCILLO

Sto sbreguogno addov’è? lo ffa l’ammore,

N’hà levato maje sciorte.

BELLONIA

Ma fà parlà lo munno, si se guasta

750

Lo matremmonejo po, ca siente dire:

Ah ah, quaccosa nc’è, la votte fete.

CICCILLO

E ponno dire puro,

Ca lo vino è guastato, che ppe chesso?

BELLONIA

Aibò, non dice buono,

755

Li pise no sso’ ghiuste: à ste facenne

Nuje poverelle femmene

Sempe jammo pe sotta.

CICCILLO

Po parlammo de chesto; vi’ ca sorema,

Vo’ che le manne Ceccia,

760

Se vo’ spassà co essa mo’ ch’è festa.

CICCILLO

Patrona, pigliatella.

BELLONIA

Mo che torno

Me la piglio.

BELLONIA

Ciccillo,

Non fà chiagnere cchiune Fortonata,

Mar’essa è meza morta.

CICCILLO

765

E ca chiagne, che d’eje? o che mme mporta.

BELLONIA

Che te mporta? e tu lo ssaje

Che bo’ dire fà sperire

Na fegliola nnammorata?

Che de botta l’aje lassata,

770

E non sape a di’ pecché;

Che te mporta, bravo affè?

Ll’aje patute maje sti guaje,

Ire appriesso a na schiattosa;

Che tu chiagne, e essa gosta;

775

Tu la prieghe, ed essa ntosta?

Prova primmo, ch’è sta cosa,

E po viene, e di’ che d’è?

SCENA V

GRAZIELLA, e CICCILLO, che resta penzuso.

GRAZIELLA

Tiemente co che rrafa era venuta

Chella Maddamma pe mme scanagliare,

780

E pigliarme de filo? quant’arriva

Ca mo mm’accappa; voglio festeggiare

Chi mme pare, e mme piace... Uh te Ciccillo.

CICCILLO

Vorria parlà co Titta,

Che mme faccia l’Arfiero... uh Graziella;

785

Schiavo Patrona mia.

GRAZIELLA

Addio Si Ciccio,

Che d’è? staje penzeruso?

CICCILLO

No tantillo.

GRAZIELLA

Si è lizeto, pecché?

CICCILLO

Ca vao trovanno

Chi mme faccia l’Arfiero.

GRAZIELLA

E ppe nzi’ a mmone

Tu si’ stato a trovarlo?

CICCILLO

790

Uh, ca l’avea trovato,

E pe ll’ammore tujo mm’hà chiantato.

GRAZIELLA

Pe mmene? io che nce corpo? e chi era chisto?

CICCILLO

Masillo, sto squarcione, c’hà saputo

Ca no voglio la sore; s’è sbotato.

GRAZIELLA

795

E pecché no la vuoje?

CICCILLO

Ah core mio,

Che boglio volè cchiù? da che te vidde

Dinto a sso bello mare

De grazea, de bellezza, e de sbrennore

Mme nce ngorfaje, e nce perdie lo core.

GRAZIELLA

800

E si è chesto puoje fare tu l’Arfiero,

Chi meglio cchiù de te vota bannera?

CICCILLO

Sia Grazie’ no mm’accusar’attuorto,

Ca si voto bannera, essa nce corpa;

C’ammava a mmene, e festeggiava n’auto.

GRAZIELLA

805

Si è lo vero, aje ragione: e tu pe mmene

Mo passe chisto guajo.

CICCILLO

Che guajo è chisto?

Si avesse da morire

Pe ttè, bellezza mia, moro contento,

E d’averete amata no mme pento.

GRAZIELLA

810

(Tiemente, che mme vace pe la capo)

Ossù, pocca pe mme passe sta chella,

Manname li vestite, e la bannera,

Ca mo, che bene fratemo, da isso

Te faccio fà l’Arfiero,

815

E no staje cchiù mpenziero.

CICCILLO

Uh gioja mia, che bella grazea è chesta?

Che sia lo bemmenuto, mo te porto

Lo vestito mio propeo, e ogne cosa.

Mo sì faccio na festa cchiù gostosa.

GRAZIELLA

820

Chesto nò, chesto nò, no tte guastare

Lo fatto tujo.

CICCILLO

E tù vuoje pazzeare.

Si potesse, tte darria

Chisto core nnamorato,

Ca starria cchiù conzolato

825

Mman’a tte, che mpiett’a mme.

Co sta doce compagnia

Camparria de contentezza,

Contempranno ssa bellezza,

E dormenno rente a te.

SCENA VI

MASILLO, ch’è sciuto primmo, e GRAZIELLA.

MASILLO

830

(Chisto bravo spasseja da ccà tuorno,

Ma mo mmo’ lo scompimmo sto taluorno.)

GRAZIELLA

Ciccio già mm’hà ncappata, e mm’abbesogna

De farele vedere quanto l’ammo.

MASILLO

(Uh bonora, che sento?)

GRAZIELLA

835

Ccà nullo mme canosce,

E Tata mio, bon’arma,

Mme mparaje peccerella

A jocà la bannera? mo’ mme serve:

Mme voglio vestì ommo,

840

Senza ch’isso lo ssaccia,

Pe farele sta finezza.

MASILLO

(E chest’appriesso?)

Mo vuoje sentì lo mbruoglio;

Tu simmene pe cchillo, e io raccoglio.

SCENA VII

MASILLO, e FORTUNATA a lo barcone.

MASILLO

Tutto chest’ nc’è sotto? e lo Sio Ciccio

845

Mme vo’ fà doje focetele a na botta?

Vo’ zannejare sorema,

E mme vole ncantare Graziella,

E io le voglio mmedecà la zella. (sisca.)

FORTUNATA

Masi’, che buoje?

MASILLO

Nc’è Saverio ncoppa?

FORTUNATA

850

No nn’è benuto ancora.

MASILLO

Quanno vene,

Magnate, e po lo vieste,

Ca passammo da ccane, e lo pegliammo.

FORTUNATA

E tù no vviene?

MASILLO

Nò vengo sta sera,

Stà ncerviello fegliola.

FORTUNATA

Và connio;

855

(Chesto è cchiù buono a lo designo mio.)

MASILLO

Voglio parlà co Tonno

Pe ffà na contramena a Graziella:

Sio Ciccio, mo vedimmo

Chi se sose cchiù primmo.

860

Te faccio fà lo ragno

Che tesse, e fà la tela!

Isso và sotta, e ncoppa;

Ma quanno l’hà scomputa,

La scopa lo saluta,

865

E nne lo fà sfrattà.

Tu naveche compagno,

Aje puosto rimme, e bela,

Fruscia, c’aje viento mpoppa;

Ma la tempesta è lesta

870

Pe farete zeffonnà.

SCENA VIII

CECCIA sola mmocca la porta.

CECCIA

Lassam’ascì ccà mmocca a resciatà no poco

Mo che ll’orza de mamma no nce stace;

Ah bene mio, ca feto già de liento

Comme votta peruta a na cantina;

875

E bi’ si stammatina

Ll’avea buono afferrato lo catone,

Volea che fatecasse ogge, ch’è festa;

Io bella lesta, lesta

Co la scusa, c’avea fatto n’arrore,

880

Pe stizza aggio sfelata la cauzetta,

E sto guadagno hà fatto la Cevetta.

Manco male ca Nora,

La sore de Ciccillo,

Mme vo’ tenè co essa pe tutt’oje,

885

Llà voglio fare lo cavallo armato,

E mme voglio abbuscà no nnammorato.

Nche bene Primmavera,

Ogn’arvolo scioresce,

Cossì fà na zetella,

890

Nch’è fatta strappatella,

Da ll’arba nzi’ a la sera

Se fricceca, speresce,

Ca se vo’ mmaretà.

Accossì facc’io puro,

895

Ca tengo ccà na cosa,

Che dd’è, non saccio a dire,

Va sia, mme fa patire,

E massem’a lo scuro;

Che sola, e paorosa

900

Io no nce pozzo stà.

SCENA IX

FORTUNATA, e BELLONIA abbascio.

FORTUNATA

Nce pierde le parole, statte zitto,

Aje da fà comm’io voglio.

BELLONIA

Uh figlia mia,

No lo bi’, ch’è bregogna.

FORTUNATA

Mme voglio vennecare?

BELLONIA

Non te manca

905

Meglio muodo de chisto?

FORTUNATA

Mo è lo tiempo,

Ca mmiezo a la barruffa

Lo pozzo stravesare, zanno, nfammo.

BELLONIA

Vi’, ca simmo scoperte?

FORTUNATA

Co chi ll’aje?

Tu te tigne la facce co le mmano,

910

Io mm’assemeglio a fratemo;

Chi vo’ penzare maje ca simmo nuje?

BELLONIA

E Saverio dov’è?

FORTUNATA

Ll’aggio sbeato.

BELLONIA

E mmano a no fegliulo

Miette l’annore tujo?

FORTUNATA

Uh, ch’hà jodizeo,

915

Quanto nn’ave no viecchio... zitto zitto,

Fatte nneccà, vide chi vene?

BELLONIA

E ppuro?

No nce penzare cchiù che nne vuoje fare?

FORTUNATA

Voglio vedè che fà, mme faje schiattare. (s’annasconnano.)

SCENA X

CICCILLO co no fegliulo appriesso, che porta no fangotto, e na bannera, GRAZIELLA abbascio, e le stesse, che fanno la spia.

CICCILLO

Tozzola a chella porta.

FORTUNATA

Che te dico?

GRAZIELLA

920

Chi tozzola?

CICCILLO

Sonch’io sia Graziella:

Chiste so’ li vestite.

GRAZIELLA

Bemmenuto.

CICCILLO

Frateto ll’haje veduto?

GRAZIELLA

Stace lesto.

CICCILLO

Fallo vestì, ca passo, e mme lo piglio;

Eh siente, lloco dinto

925

Nce stà na ziarella, e lo perduono,

Co confedenza sà.

GRAZIELLA

Uh che spreposeto?

Potive fà de manco de sta cosa;

M’aje fatto fà tanto na facce rossa.

CICCILLO

Veramente è na cosa troppo grossa.

GRAZIELLA

930

Aspe’ non te partire.

Ca la voglio vedere.

CICCILLO

No mme parto.

FORTUNATA

Ah Bellonia mo schiatto.

BELLONIA

E si tù si’ ncocciosa, saglietenne.

FORTUNATA

Voglio vedè lo riesto.

GRAZIELLA

Uh comm’è bella!

935

E c’hà da fà pe tte mo Graziella?

CICCILLO

Vita de st’arma mia.

GRAZIELLA

Arma de chisto pietto.

CICCILLO

Pe contentà stò core,

Fede da te vorria.

GRAZIELLA

940

Ed io gran fede, e ammore

Te juro, e te prometto.

CICCILLO

Cara non me mancà.

GRAZIELLA

Core non dobbetà.

CICCILLO

Pe tte de notte, e giorno

945

Sospiro, e me lamento.

GRAZIELLA

Ed io te stonco a ttuorno

Penzann’ogne momento.

CICCILLO

Gioja, si me mancasse.

GRAZIELLA

Fato, si me gabbasse.

CICCILLO

950

Sarria no trademiento.

GRAZIELLA

Sarria na canetà.

SCENA XI

FORTUNATA BELLONIA, e CICCILLO.

BELLONIA

Haje cchiù mo’ che bedere, e che sentire?

FORTUNATA

Che te pare? e tu haje mo cchiù che me dire?

CICCILLO

Oie Bellonia, Bellonia. (chiamma a la casa de Bellonia.)

BELLONIA

Zitto, zitto. (a Fortonata.)

955

Lassam’ascire.

FORTUNATA

Torna priesto.

BELLONIA

Sine.

SCENA XII

CICCILLO, BELLONIA, e CECCIA a la fenesta, e po abbascio.

BELLONIA

Chi chiamma?

CICCILLO

Oh lloco staje?

Sù damme la fegliola.

BELLONIA

Mo la chiammo,

Ceccia Ceccia?

CECCIA

Chi è lloco?

BELLONIA

Scinne, scinne.

CECCIA

Vorria, che tu saglisse,

960

Ch’è miezo juorno; tu quann’iesce, maje

Nò nne truove la via de tornare,

Ed io ccà m’aggio auto a storzellare.

BELLONIA

Maratene, e ch’è stato?

CECCIA

Che bo’ essere stato? cca le zoccole

965

Jocano a mpizzo mpazzo, io steva seduta,

E mme sagliuto pe le gamme ad auto

Tanto no sorecillo, uh mamma mia,

Che ppaura m’ha pposta

N’auto ppoco che steva,

970

Me mozzecava.

BELLONIA

Addove?

CECCIA

Addo’ poteva.

CICCILLO

È proprio saporita sta fegliola.

BELLONIA

Arrassosia, che guajo; scinne, scinne,

Ca po faie la cajazza n’auto juorno.

CECCIA

Tu vuo’ che scenna, ed io te dico saglie,

975

Voglio magnare, ca so’ ascevoluta.

BELLONIA

Non te sbriche verruta?

CECCIA

Aggio da scenne à fare, (voglio fegnere.)

CICCILLO

Viene à magnà co Nora, ca te vole.

CECCIA

Nce voleva sto mazzo de scarole.

CICCILLO

980

Comme scarole?

CECCIA

Me coffie, ca mamma

Me fa stà comm’a moneca de casa,

E nò mmò ch’esca, e trasa.

BELLONIA

Uh, male ncanna,

E non te sbriche chiu, c’aggio da fare.

CECCIA

Comme? addavero me nce vuo’ mannare?

BELLONIA

985

Gnorsì, ve nce mannammo.

CECCIA

Uh te che sento!

E ba fà testamiento

Agghiustate l’assequia, ca mo muore,

A mme sta grazia? a mme tanto favore?

BELLONIA

Puozze morì, puozze crepà tu sola,

990

E nò mmuo’ scenne cchiù, o non te manno?

CECCIA

None no, ca mo scenno.

CICCILLO

E quanno quanno.

BELLONIA

Ed accossì, Ciccillo, c’aje portato

A sta bella Chiajese?

CICCILLO

Che m’haie visto?

BELLONIA

E che sonco cecata?

CICCILLO

995

È stato lo vestito

Pe chi hà da fà l’Arfiero.

BELLONIA

E chi lo face?

CICCILLO

Lo frate d’essa.

BELLONIA

Lloco si’ arrevato?

Ciccillo vi’ che faje,

Ca no scompe sta festa senza guaje?

CECCIA

1000

Eccome ccà so’ scesa.

CICCILLO

Jammoncenne.

BELLONIA

Viene addo’ Fortunata, quanno tuorne,

Ca llà stongo.

CECCIA

Gnorsì.

BELLONIA

Stammo ncerviello;

Non fà lo cavallone

Ca te peso lo musso craje matino.

CECCIA

1005

Gnornò ca mme ncaforchio a la cantina.

Mamma mia, so’ ffegliolella

Sonco allegra, e speretosa,

So’ de genio pazziarella,

Che ccos’aje? non è gran cosa

1010

Si stonco a pazzià, mo che me tocca.

Quanno po so’ nnammorata

Io me metto a sosperare,

Tanno dico: aimmè lo core:

Cchiù nnillà, che so’ mmecchiata,

1015

Che so’ fatta calascione,

Io me jetto a no pontone

Me la spasso a pecciare,

A strellare: uh che dolore;

Ma peccià da mo sarria na locca.

SCENA XIII

BELLONIA sola.

BELLONIA

1020

Uh? che puozze schiattà nnanze sta sera,

Da chi malanne ha ntese ste parole?

So’ chiacchiare, nuje femmenne nascimmo

Co la malizia ncuorpo;

Da che zocammo zizza

1025

Si dicimmo ma... mma... (e n’è boscia.)

Volimmo di’ ma... ri... to mamma mia.

Pozza dicere na mamma:

Figlia mia che nne vuo’ fare?

Cride stà mpappalardiello,

1030

E te miette a lo maciello,

Ca la chiamma,

Mmediosa,

E sgregnosa sempe stà.

Si le dice:... può ncappare

1035

No marito presentuso,

Sbalestrato, malenato,

Che t’ammacca lo caruso;

Co li figlie, e co li guaje;

Maratene, che farraje?

1040

Le responne attuosto, attuosto:

Comm’haie fatto, voglio fà.

SCENA XIV

TONNO, e MASILLO pe strata.

TONNO

No cchiù ca t’aggio ntiso, no mmuo’ aoto,

Che dint’a la barruffa de la festa

Nne faccia cappeare Graziella?

1045

Duorme cojeto, ca la cosa è lesta.

MASILLO

Ed io nche bene Tata,

Faccio pe ttene, e parlo a Fortonata;

Accossì po lo zanno de Ceccillo

Farrà comm’a lo cane de Jasuopo,

1050

Che perdette la carne

Pe secotare ll’ombra.

TONNO

E nce lo bole,

Ca chisse sbarvatune Galimeje

Se credono peglià Napole a ffamma,

Quanta femmene vedono coll’uocchie,

1055

Se credono afferrare co le mmano:

E po vanno a sciacquare a lo pantano.

MASILLO

Orsù jamm’a bbestirece, ch’è tardo.

TONNO

Aspetto Cuoccio, e ancora no nce pare;

Non pò mancare, stace a qua’ ttaverna

1060

A gioquare a la mmorra.

MASILLO

Fosse chisso, che sona lo Tammurro.

TONNO

Chiss’è isso.

SCENA XV

CUOCCIO da schiavo janco, che sona lo Tammurro, e li stisse.

CUOCCIO

A la guerra spellecchione,

Ca te cauze, e ca te vieste,

1065

Si nce campe, e no nce rieste,

Co di zumpe si Barone;

A la guerra spellecchione.

TONNO

Che te rumpe lo cuollo, e quanno viene?

Quanto cchiù porto pressa, e tu cchiù duorme.

CUOCCIO

1070

Se pò sapè, che d’aje co la bon’ora?

O jetto sto tammurro, e mme ne vao?

Io so’ schiattato ncuorpo,

A battere la cascia

Pe tutte sti quartiere; e tu mo strille?

TONNO

1075

Li compagne addo’ so’?

CUOCCIO

So’ tutte leste;

T’aspettano a la casa.

TONNO

Jammoncenne.

CUOCCIO

Ma tu non saje na cosa.

TONNO

Ch’è sta cosa?

CUOCCIO

Aggio visto mo nnante a no cafeo,

Cola, Ntreone, Tecchia, Tecchia, Trippa,

1080

E compagne a la trencia fà consiglio;

Ca vonno saccheare lo Castiello

Co l’allucche, e l’arraglie, comme fanno

Dint’a lo lavenaro.

TONNO

Bravo, bravo

Lassa fà nzi’ che schiattano, ch’aguanno

1085

No le soccede comm’a mo fa ll’anno.

MASILLO

Oh ch’avessero paglia!

Sta marmaglia te pote saccheare

Na taverna aparata

Ca nquanto a sto castiello l’ha sgarrata.

CUOCCIO

1090

Si è chesto dammo dinto allegramente;

Mo te faccio abbedè, che sà fa Cuoccio;

Io quanno passo guaje, tanno cchiù ncoccio.

Poveriello

Sbentorato

1095

Chi s’accosta a sto Castiello,

Ca de chiechiere, e scozzette

De sgrognune, e parapiette

Te lo voglio addecreà.

MASILLO - TONNO

Lassa ì, che nne vuo’ fà?

CUOCCIO

1100

Che scioccare de mmascune,

Quanta scoppole a no sciato,

Tutte nziemo zuffe, zzaffe

Nnicchie, punia, cauce, e schiaffe,

Che mmestute, che cadute?

1105

Oh, che bello vrociolà.

MASILLO - TONNO

Tiene, tiene, ttrù ttrù, stà.

SCENA XVI

FORTONATA vestita da Gran Torca, e BELLONIA da schiava negra.

BELLONIA

T’avimmo dato gusto; so’ bestuta,

Tiemente, che zannata,

Si se sà, maramè, so’ sbreognata.

FORTUNATA

1110

Bellonia agge pacienza; tu già saje,

Ammore, sdigno, e gelosia, che ponno;

Saccio, ca faccio arrore;

Ma pe fà manco male

Io te porto co mmico, ch’aje jodizio;

1115

Si po so’ sbreognata,

Che s’ha da fa? mme vedo desperata.

BELLONIA

Zitto, chi è chillo, ch’esce da dò Cianna?

SCENA XVII

GRAZIELLA da ommo co la bannera arravogliata, e li stisse.

GRAZIELLA

Tanto aggio fatto, e ditto a la Commare,

Che m’ha fatto vestire; e comm’è tosta?

1120

Na femmena, che mmecchia,

Non te sa compatire na fegliola,

Pecché non vale cchiù, vo’ mette scola.

BELLONIA

Nce venga la fortuna p Graziella;

Essa è pe cierto; uh maramè, che beo?

FORTUNATA

1125

Vecco ca, non so’ sola a fa pazzie.

BELLONIA

Vedo venì cchiù gente.

GRAZIELLA

Ecco Ciccillo.

SCENA XVIII

CICCILLO da Capetanio, e li stisse.

CICCILLO

Si Arfiero, simmo lesto?

GRAZIELLA

Sì segnore.

CICCILLO

Che beo! mme pare chisto

Graziella a la cera: Patro’ mmio,

1130

Voscia comme se chiamma?

GRAZIELLA

Menechiello.

CICCILLO

E site frate?

GRAZIELLA

A Grazia.

CICCILLO

Atta d’aguanno

Comme v’assomegliate!

GRAZIELLA

È ca tutt’a no ventre simmo nate.

BELLONIA

(Ah fauza, menzognera.)

GRAZIELLA

E chi so’ chelle?

CICCILLO

1135

Oh, no mme nn’era accuorto; chelle sonco

Le Ttorche de la festa; si Saverio,

Già si’ bestuto? tu ce pare bello,...

Che d’è me staje ngrannezza? no respunne?

BELLONIA

Non rispondire a ttia Ciaurra brutta.

CICCILLO

1140

Chisto starrà ngrognato pe la sore. (A Graziella.)

GRAZIELLA

Ed io le voglio fare

No juoco de bannera.

FORTUNATA

Si Arfiero, passa nnanze

Joca a carcaota fera,

1145

No mm’ha piaciuto lo botà bannera.

GRAZIELLA

Sta troppo morfosella sta gran Torca.

CICCILLO

Oh ch’è benuta a mmene sta canzona;

Jammo ca non è digno.

GRAZIELLA

O bona o bona.

SCENA XIX

BELLONIA, e FORTONATA.

FORTUNATA

Che ne dice Bellonia de sta cosa?

BELLONIA

1150

Agge pacienzia figlia, ca lo tiempo

Ammatura le ssorva; vide, e tace

Ch’è piso mio de fa fà sta pace.

FORTUNATA

Che pace si’ mpazzuta,

Io pace o tregua co chi m’hà traduta?

1155

So’ n’arma desperata,

Stizzata da le ngiurie,

Venite sierpe, e furie

Chest’arma a vennecà.

Jate a lo tradetore,

1160

Lo core straziatele,

Lo sanco ntossecatele,

Facitelo schiattà.

BELLONIA

Fremma, ca vene mo’ la compagnia,

Sta fegliola mpazzesce arrasso sia.

SCENA XX

A suono de stromiente vene la compagnia de li Turche. MASILLO fà lo Capetaneo, TONNO lo Gran Turco, e CUOCCIO da Schiavo, e fa lo Sargente.

CUOCCIO

1165

Fa scir ala canaglia a mana ritta.

Salemmo passar ccà, venir maumma

Ametta non partir, state ncerviello.

Siepp’oje v’ammatonto lo scartiello.

TONNO

Su sciamar gran Sordana. (a Masillo.)

MASILLO

1170

Mo venir sì Seniure,

O Saverio, Saverio; oh te ca scenne

Priesto fà reverenzia a lo Gran Turco.

SCENA XXI

FORTONATA, BELLONIA, e li stisse.

CUOCCIO

Vasciar uocchie canaglia (a li sordati.)

Ca passar gran Sordana.

TONNO

1175

(Bon ora comm’è bello sto fegliulo,

Pare justo la sore.)

Ti star bella Seniura,

Ma non barlar; perché?

FORTUNATA

C’avir paura.

TONNO

Seniura bella

1180

N’avir baura

Mi star bor tia,

Bor vita mia

Tutta ciaurra bolir mastar.

Ti star sicura,

1185

Bidir castella

Come star forte

Defender porte

Tanta soldata; no sospirar.

CUOCCIO

Sfodarate sse sciabbole canaglia,

1190

E strellate allà allà,

Viva la gran Sordana, e mostafà.

MASILLO

Salite a lo Castiello,

Nuje restammo cca bascio a fà la guardia.

TONNO

Sì benir Seniurella.

CUOCCIO

Allà, allà, allà, allà.

1195

Accompagnar Grantorca, e Mostafà.

TONNO

(Accommenza da mo’, te vaa lo piello.)

CUOCCIO

Accossì bà la festa,

Se pò sapè che d’aje?

O mo sferro; tieme’, che gioja è chesta?

TONNO

1200

Vuo’ che nce scenno lloco,

E te schiaffo sto sceltro int’a la faccia?

CUOCCIO

Sempe mme schiaffarraje na nasata.

MASILLO

E mbe’ chesto che d’è? che si’ mpazzuto?

Vuo’ sconcecà la festa?

CUOCCIO

1205

E si chisto vo’ fà sempe lo masto;

Mo mme vota lo mmale de la luna.

MASILLO

Zitto mo’ ca n’è niente.

CUOCCIO

A la mmalora

Aggio spiso lo tuppo,

Ccà ncè lo sanco mio,

1210

M’aggio porzì mpegnate le llenzola,

E mo che d’è? che d’è?

No mme pozzo peglià no po’ de gusto?

MASILLO

Statte cojeto, e fà chello che buoje.

TONNO

Eh mmalosca, mmalosca, tu aje ragione.

CUOCCIO

1215

Venir ccà sia maddamma

Ballare nziemo.

BELLONIA

Non sapir ballare.

CUOCCIO

Tun’auto puro? e mo arrivammo a giuorno.

BELLONIA

Oh che taluorno. (abballano a la moresca, e cantano.)

CUOCCIO

Fascir festa Maimamà,

1220

E ballar facir llì llì.

BELLONIA

Po scialare a taffejà.

So’ stracquata non se pò.

CUOCCIO

N’aoto poco fà accossì

Vota vota.

BELLONIA

No cchiù mo’.

CUOCCIO

1225

Fruscia.

BELLONIA

Lassa fuss’acciso.

CUOCCIO

(Oh che riso allà, allà.)

TUTTE

(O che gusto ah, ah, ah.)