La Cianna

La Cianna, Venezia, Casparro Stuorto, 1711

a cura di Stefania Napolitano

paratesto ATTO PRIMO ATTO SECONDO ATTO TERZO Apparato

LA CIANNA

Commeddeia pe museca de Col’Antuono Feralintisco pe lo Triato de li Shiorentine nchist’anno 1711. Addedecata a l’Autezza Serenissema de la Segnora Maria Matalena Prencepessa de Croy, Duchessa d’Aurè, e Prencepessa de S. Empiro, &c.

Nvenezia 1711. Pe l’Arede de Casparro Stuorto. Co Lecienzia de li Superiure. Se vennono a la poteca de Ciccio Ricciardo a la Fontana de Medina.

Serenissema Segnora

Pe fa lo nummero preffetto, appresento a li piede de Vost’Autezza Serenissema chesta terza Commeddeja, ed aggio pe cierto, ca porzì buje la saaparrite, recevere, e protejere, comm’hanno fatto de ll’autre doje la Serenissema Sore vosta, e lo Serenissimo Cajenato vuosto. Corre, Gnora mia bella, no brutto tiempo pe la povera Vertute. E da quant’hà, che ll’avarriano sdellanzata, tarrasenata, e cacciata da sso Munno, si no nce fossero li Personagge de ciappa, che la defenneno. Che nce vuoje fa? Nce so’ cierte spil’acito, nsertune, papurchie, caccial’appascere, che ncoscienzeja, non sanno manco si è male tiempo quanno chiove, e le bide, nzanetà, che se fanno tutte chianchiere, e co cierte cortellacciune, ammolate a rasulo, se sbracciano nsi’ a le tetelleca, e se metteno a doje mano a tagliare a tunno, e cottepejusso, ca tagliano a ghjetto, a la babbala, addo’ esc’esce, a la spaccastrommola, è pecché non sanno canoscere lo feletto, l’appiccatora, la pezz’a canniello, ed autre morzille cannarute, passano li chiafeje, ogne ncosa pe locena, pe gammonciello, e pe noce de cuollo. E saje quanta nce nne so’ de chisse? No ncè pontone addo’ no nne truove na scoglietta, è negrecato chi nce ntorza, pocca hanno cierte ligge, che se le fanno a gusto lloro, che so’ contrarie a la raggione, pecché nfrucecate da la cetrolaria: so’ nnemmiche de la Jostizia, pecché nasceno da no cierto cherebizzo d’essere tenute pe sacciente, e co che mmo’? co fa li contrapunte a lo spreposeto, a qua’ coselluccia vertolosa, che le ncappa mmano. Ma che? crideme, Serenissema mia, ca chisse non serveno manco pe ardere, e lo cuorio lloro non va se’ chialle, pocca quanno vedeno chi le mosta li diente, e le fa na cera storta, addeventano na mummia, se fanno no pizzeco, e le bide ammarcià stencenate co le que pro ette, che pareno tant’arrobba galline. Ora chi meglio de Vost’Autezza Serenissema le pò fa trovà co la saraca int’a la sacca? Vasta, che facite ntennere, ca sta chelleta è proteggiuta da vuje, che site chella Sdamma de tanta grannezza, de tanto miereto, de tant’autoretate, e tanto saputa, e bi’, che nn’esce. Non compararriano pe la porvere, e le bedarrisse co la coda mmiez’a le gamme ammorrarese tutte nzemmera, e ghì trovanno qua’ mantrullo addo’ s’annasconnere. Chesto lo tengo pe securo da la majateca gentelezza vosta; E che porzì aggiate la benegnetate de contentareve, che io mme vaa sprubbecanno pe sempe.

De V. A. S.

Ummelis. Devotis. e Sbesciolatis. Serv.

Antonio Branno.

Amico Lejetore.

Brevisse arazejo. Mprimmo, e nnantemoneja t’avertesco, ca l’arrure de la Stampa so’ comm’a le posteome fredde, che nche nne sana una, vide lesta, ca sguiglia ll’autra. Lo jodizio de chi leje (si n’è qua’ pappashiushio) pò sopprire a sto defietto, che sta cosuto a filo duppio co li Truocchie.

Se sa, ca la Pouesia è comm’a lo sango de puorco, che si no l’apparicchie co aruta, passe, pegnuole, garuofane, cannella, e pepe, te faje n’abbottata de suvaro. Mo’ me nne vengo a lo quateno. Le parole de Sciorte, Fortura, Destino, Ammore, Stelle, ed autro, aggele pe cose necessarie a ste sciorte de composezejune, e non pe sentemiento de l’Autore, lo quale è Crestejano nsi’ ncopp’a ll’asteco, sta sempe co lo cuollo sott’a li commannamiente de la fede nosta.

Sta Commeddeja s’è motata poco manco de tutta p’agghiustarese a lo prubbeco, ed è stat’abbesuogno, che l’Autore se fosse servuto de mut’areje, che stanno a n’autra Commeddeja, porzì fatta da isso, non sulo pe dà sfazejone a chi ll’ha commannato, ma pecché lo tiempo curto, hà boluto accossì. O bona; o trista, la remette a lo jodizio commune. Da ll’uommene buone spera no cortese campatemiento; E de chi vo’ froffechejare, nne fa tanto cunto, quanto de le primme scarpe soje, pocca se sa bonissemo, ch’autre perzonagge d’isso so’ passate, e passano pe sta trafila; Mantienete co salute, si te vuoje piglià gusto sto Carnevale.

Perzune, che chiacchiarejano.

MARCONE SQUACQUARA Artesciano patre de Cianna, e nnammorato de Canneta.

Lo Segnore Giaseppo de Lillis.

CIANNA figlia soja, nnammorata de Ferrante.

La Segnora Matalena Conti.

CANNETA RECHIEPPA Vedola: nnammorata de Ferrante.

La Segnora Teresa Sellitto.

DIANORA PERVOZZO Vecchia: mogliere de Capeta’ Lucacchio.

Lo Segnore Tommase Scarlato.

LUCACCHIO SFERRONE Capetanejo: marito sujo, e nnammorato de Canneta.

Lo Segnore Giacchimmo Corrado.

FERRANTE STAMPACCHIA Spataccino nnammorato de Cianna.

Lo Segnore Giovanne Grieco.

PEPPO CHIRECO Tavernaro:nnammorato de Cianna.

Lo Segnore Gajetano Bottoniello.

SAPATIELLO SCARFECCHIA Creato de Capeta’ Lucacchio.

Lo Segnore Carmeno d’Ambrosio.

La Scena se fegne lo Quartiero de la Taverna Penta.

La Museca è de chillo stisso, c’hà fatta la primma.

L’Abballe se so’ despuoste da lo Segnore Antonio Costantino fammuso abballarinolo.