Opera Buffa Napoli 1797 - 1750
  
  
 La Cianna, Venezia, Casparro Stuorto, 1711
 a cura di Stefania Napolitano
 
 
 
paratesto ATTO PRIMO ATTO SECONDO ATTO TERZO Apparato
 
 ATTO III
 
 SCENA PRIMMA
 
 SAPATIELLO da la casa de CANNETA, e fegne de parlà co essa, ment’esce.
 
 SAPATIELLO
 Jo te servo a leviello:
 Tu saje si Sapatiello, è n’ecciacuorvo.
1330Tu saje si so’ formicola de suorvo.
 Gnoressì sta secura,
 Ca nce resce la mpresa.
 Gnornò, n’havè appaura.
 Vengo dall’auta porta. Già sta ntesa.
1335Potta, e comm’è zeccosa!
 Fuorze sarrà gran cosa
 Fa mpastone Ferrante. Uh negrecato,
 Autre fuosse de chiste aggio zompato.
 
 SCENA II
 
 FERRANTE, e lo stisso.
 
 FERRANTE
 Oh fortura
 SAPATIELLO
                       (Mo vene.)
 FERRANTE
1340Pe nsi’ a quanno, sapimmo,
 Zoffrarraggio ste pene?
 Non pozzo cchiù.
 SAPATIELLO
                                  (Mo’ lo mpastocchio a primmo.)
 FERRANTE
 Semp’affanne a bezzeffia.
 SAPATIELLO
 Na patacca resostame,
1345Si Ferrante, si vuoje
 Na nova d’alleccarete le deta.
 FERRANTE
 Che nova da mme puoje?
 Va spapuranno.
 SAPATIELLO
                                Venga la moneta.
 FERRANTE
 Parla mo’.
 SAPATIELLO
                      Me la daje?
 FERRANTE
1350Te do chello, che buoje.
 SAPATIELLO
                                             Mo’ sentarraje.
 Cianna
 FERRANTE
                 La bella mia?
 SAPATIELLO
 Chessa.
 FERRANTE
                  Si va decenno.
 SAPATIELLO
 Parlare te vorria.
 FERRANTE
 E chesto che mme jova?
 SAPATIELLO
                                               Va sentenno.
1355Vole, che saglie ad auto.
 FERRANTE
 Comme, de che manera?
 SAPATIELLO
 Quann’è scurata l’aria,
 Viene co na Varrera,
 Ca chisto è lo nzegnale. Essa se trova
1360Lesta; tu saglie, e bide si te jova.
 FERRANTE
 E Marco?
 SAPATIELLO
                     All’autra cammera,
 Saje ca dorme; e già rronfola,
 Nce vede ammasonare le galline.
 FERRANTE
 Tant’è, se corca priesto,
1365Ma tu comm’intre a chesto!
 SAPATIELLO
 Saje ca simmo vecine,
 E de me s’è fedata.
 FERRANTE
 O Cianna nzuccarata.
 Va di’, ca vengo.
 SAPATIELLO
                                 E quanno,
1370Sponta lo veveraggio?
 Via jammo manejanno. (se nne trase Sapatiello.)
 CIANNA
 Pe chesto vo’ mancà. Te do quant’aggio
 A la bella vocchella de Cianna,
 De zuccaro, e manna,
1375Me voglio abbottà,
 Ma pell’ora, ch’ancora no sponta,
 Che sciamma m’è ghionta,
 Non pozzo aspettà. (se la fila.)
 
 SCENA III
 
 CANNETA da la casa.
 
 CANNETA
 Già stammo a lo telaro
1380De le mbroglie, e le machene;
 A nuje, frusciammo a tessere.
 
 SCENA IV
 
 CIANNA da la casa; e la stessa.
 
 CIANNA
 E che destino amaro
 M’attocca sempe. O Cielo! e c’hà da essere?
 CANNETA
 Cianna mia staje sbattuta?
 CIANNA
1385Io moro nghjettecuta,
 Vao strillanno comm’arza.
 Tata pe Peppo sempe mme martella:
 Tu non nce si’ comparza;
 E cchiù nne vuoje pe Cianna poverella.
 CANNETA
1390Orsù allegrezza Adesa
 Simm’a tiempo, pe fa na bella presa.
 Ferrante pe te more.
 Sconzolato, ed affritto;
 Ed è tanto l’ammore,
1395Che lo scuro mm’hà ditto
 Ca pe potè sbafare
 Dint’a la casa mia te vo’ parlare.
 CIANNA
 Comme? quanno?
 CANNETA
                                     A lo bruoco
 Passsare te nne puoje,
1400Ch’io faccio n’autro juoco,
 E sarrimmo contente tutte doje.
 CIANNA
 Che ghiuoco?
 CANNETA
                            Ajemmè, già saje
 Che fuoco, quanta chiaje
 Tengo pe Peppo. Io le farraggio ntennere,
1405Ca tu le vuoje trascorrere;
 Ed io p’avè a le granfe chella gioja,
 Passo a la casa toja.
 CIANNA
 Va buono, ma co patremo
 Comme farrimmo?
 CANNETA
                                       È piso mio.
 CIANNA
                                                              Ma dubbeto,
1410Ca non nce resce.
 CANNETA
                                   E te sconfide subbeto?
 Si vide Peppo Chireco
 Figne, ca si’ mutata.
 CIANNA
 Sì.
 CANNETA
         Che d’è staje ncanatata?
 Tu saje, ca chi n’arriseca, no roseca.
 CIANNA
1415Mm’è contra la fortura.
 CANNETA
 Ma tu saje ca se stracqua.
 CIANNA
                                                 Ll’haje sgarrata!
 Io tremmo de paura:
 Tocca te, so’ no jelo: Io stò agghielbata.
 CANNETA
 Sta zitto, ca lo cielo
1420Nce consola securo.
 CIANNA
                                      Io no lo creo.
 Orsù vedimmo
 CANNETA
                               E puro
 S’hà da nzertà.
 CIANNA
 Nce pò rescì cchiù peo
 CANNETA
 
 Statt’allegra,
1425E confedammo,
 Ca sperammo
 Tutte doje de la nzertà.
 
 CIANNA
 
 Tanto negra
 Aggio la sciorte,
1430Che la morte
 È lo cchiù, che mme pò dà.
 
 SCENA V
 
 DIANORA, e LUCACCHIO.
 
 DIANORA
 De cchiù mmo’? Malantrino.
 LUCACCHIO
 Tu te faje maraveglia?
 Che d’è? jre a na veglia, o a no festino,
1435Non pò no paro mio?
 DIANORA
                                         Contala justa:
 Che festino, che beglia?
 LUCACCHIO
                                              Ora mo’ è susta.
 DIANORA
 Qua beglia de quarch’anime
 Sarrà chessa.
 LUCACCHIO
                           Che dice?
 So’ Caaliere, e Sdamme,
1440Cammarate, ed ammice,
 Che m’hanno commetato;
 E llà resto sta notte.
 DIANORA
                                       Ah sbregognato!
 Che pallune, che bommeca,
 Vedite comme fommeca.
1445Tu Caaliere, e sdamme?
 LUCACCHIO
                                               Io, sì.
 DIANORA
                                                            Breccune
 So’ ammice tuoje, bribbante, e mascanzune.
 LUCACCHIO
 Mo’ è sopierchio.
 DIANORA
                                  Sta rasa
 Non te serve. A la casa
 Sta notte, haje da venì.
1450Ca si no vuoje senti, che brutto truono
 Ncapo t’hà da cadè.
 LUCACCHIO
 Tanta stizza che d’è? te pare buono
 Lo mancà de parola?
 DIANORA
 Non è accossì? va ch’aje da fa co Cola
1455(T’aggio da veglià ncuollo.)
 LUCACCHIO
 Tu mm’haje trovato muollo
 DIANORA
 N’è lo ve’, mala razza?
 Craje quanno viene hà da joquà la mazza.
 
    Lo strafalario;
1460Chino de trapole,
 Lo vetoperio
 De tutto Napole,
 Veccolo cca.
    Brutto fauzario
1465Nido de stroppole
 Saje che sfonnerio
 De cauc’e scoppole
 Te saccio fa.
 
 LUCACCHIO
 Bonora! nce vorria,
1470E falla restà nchiummo addo’ se trova
 Ma po che se derria?
 Vi’ ch’hà fatto Lucacchio, oh bella prova!
 Mmala sciaura annennala:
 Strilla sempe, se nfuria,
1475Sbatte, s’arraggia, smania,
 E non ncè no sbodiello,
 E no le vo’ venì no po’ de piello?
 Sta chiena de rettorie,
 Sta, che non se pò rejere
1480Secca, peruta, seseta,
 Che pare Nota’ chienca:
 E mo le vo’ afferrà na mmalatenca?
 Ora faccia, che bole,
 Ca io aggio da fa lo curzo mio.
 
 SCENA VI
 
 CANNETA, e lo stisso.
 
 CANNETA
1485Lucacchio?
 LUCACCHIO
                        O mio bel sole,
 Vita mia, cara mia, mio bene addio.
 Faremo il Marco?
 CANNETA
                                   Cierto.
 LUCACCHIO
                                                  O gioja! e quanno?
 CANNETA
 Co Cianna sto conzierto
 Mo’ sto manepolanno.
 LUCACCHIO
1490Cianna cotesta lloco?
 CANNETA
                                         Chessa è chella.
 LUCACCHIO
 E comm’entra cotella?
 Perché di qual maniera?
 CANNETA
 Pe nzertà lo designo
 Io passo cca stasera,
1495E tu va saglie ncopp’a lo soppigno;
 Ma sie’, pe non dà scannalo,
 Viene vestuto femmena,
 Ca io quanno mme pare,
 Llà te vengo a trovare, e scapparrimmo
1500E pe la porta fauza nce nn’ascimmo.
 LUCACCHIO
 Né vi sarrà pericolo.
 CANNETA
 Niente: che d’è sso scrupolo?
 LUCACCHIO
 Hò scherzato, cor mio:
 Che pericolo mai, dove son’io?
 
1505   Verrò a gaudere, o cara
 Na chioggia di dorcezza,
 Quanno ti stregnerrò.
    Ammor già mi prepara
 Quel cormo d’allegrezza,
1510Che conzolar mi pò.
 
 CANNETA
 Sine, t’aspetto gioja,
 Va viene ca sarrà la sciorte toja,
 Ammore, e quanto saje,
 Quanto saje, quanto puoje
1515Tu le mmbroglie mme daje,
 Tu le mpeche mme pruoje
 P’havè Ferrante mio; tu lo contiento
 Damme porzì, de jognere a l’attiento.
 
    Tu portamillo nzino,
1520Bello mammino mio,
 Nennillo d’oro.
    Tu ammore fa pe mme
 Azzò gaudè pozz’io
 Lo mio trasoro.
 
 SCENA VII
 
 PEPPO, e SAPATIELLO.
 
 PEPPO
1525Sta cosa no mme sona.
 Pecché addo Cannetella?
 SAPATIELLO
 Tornammo a sta canzona.
 Ca llà te vo’ parlare; oh chesta è bella!
 Chi sa pecché sarrà?
 PEPPO
1530Ma Cianna mia già sa,
 Ca Marco nce conzente.
 SAPATIELLO
                                             A te, che mporta,
 O cca, o llà de te gaudè sta sciorta.
 PEPPO
 Dice buono, jarraggio
 A recrejà sso core,
1535Ch’abbrusciato già more.
 SAPATIELLO
                                                 Buon viaggio.
 
    Quanno si’ ghiunto
 A fa l’appiello,
 De Sapatiello,
 Non te scordà.
1540   Fatte no cunto,
 Ch’a te sta panza,
 Tene speranza
 Pe s’abbottà. (se la fila.)
 
 PEPPO
 È già fatta la botta.
1545E biva Cannetella.
 
 SCENA VIII
 
 CIANNA, e lo stisso.
 
 CIANNA
 Nce resca cruda, o cotta,
 Ccossì se faccia.
 PEPPO
                                O schiavo sia Ciannella.
 CIANNA
 Addio Peppo.
 PEPPO
                            Mo’ propio
 Bella le gratie voste aggio sentuto,
1550E sarraggio sollizeto
 Semp’a li piede vuoste.
 CIANNA
                                             Bemmenuto.
 PEPPO
 Che d’è core de st’anema,
 Me pare ca staje trovola:
 Mo’ ch’è tiempo de spasso?
1555Penza ca scialarraje mmiez’a lo grasso.
 
    Musso bello, musso d’oro
 Staje colereca, e pecché?
    Di’, che d’aje, doce trasoro,
 Tu sospire, oh Dio, che d’è.
 
 CIANNA
1560Già la notte s’accosta.
 
 SCENA IX
 
 MARCONE, e la stessa.
 
 MARCONE
 (Lo sospetto cchiù cresce;
 Besogna sta de posta.)
 CIANNA
 (Chi lo ssa si nce resce.)
 MARCONE
 (Canneta n’è leggitema.)
 CIANNA
1565(Ammore tu seccurreme.)
 MARCONE
 (Orsù frusciammo ntuosto:
 N’è tiempo de fa ll’ascio.)
 Mbe’ tu, che faje cca bascio?
 CIANNA
 Mm’è parzo de sentì lo sisco vuosto,
1570E pe chesto so’ scesa.
 MARCONE
                                         Priesto a dauto:
 Serrate buono, e coccate;
 Ca io sta notte vao a na Commeddia.
 CIANNA
 (Chesta è arte de Canneta.)
 MARCONE
 E po craje allestiscete,
1575Ca già co Peppo s’ha da fa lo nguadio.
 CIANNA
 N’haje ditto si Ddi’ vo’.
 MARCONE
 Te commanna chi pò.
 CIANNA
                                          Nnanze m’accjo.
 MARCONE
 Pe forza ll’aje da fa, cossì bogl’io.
 CIANNA
 
    Facimmolo mo’ mmo’,
1580Gnorsì no nce vo’ cchiù.
 Sta lesta Cianna,
 Chesto vorrisse tu.
    Ma io dirraggio no,
 Si tenesse porzì
1585No chiappo ncanna. (se la fila.)
 
 SCENA X
 
 MARCONE sulo.
 
 MARCONE
 Va ch’aje da fa co mmico
 Maddamma trepetessa;
 Scimmo mo’ da sso ntrico,
 E bedarraje si ll’aje da fa a l’ampressa.
1590Canneta te ll’hà fatta,
 E tu Marcone schiatta,
 O vorza poverella!
 Oh che brutto corrivo, benagg’oje!
 Chiano sia Cannetella,
1595Ca lo sdigno fa fa le prove soje.
 
    Si è Lucacchio, te l’abbampo,
 Co sbruffà lo fuoco stisso,
 Che m’allumma mpietto Ammore.
    È già muorto, ca le stampo
1600Tanta chiaje mpietto ad isso,
 Quanta nn’aggio a chisto core.
 
 SCENA XI
 
 CIANNA sola da la casa.
 
 CIANNA
 Già lo tiempo nc’è adduosso.
 O sciorta ajuto pruojeme
 Pe lo zompà sto fuosso?
1605Oje Cianna, Cianna.
 
 SCENA XII
 
 CIANNA da lo Barcone, e la stessa
 
 CIANNA
                                        Veccome,
 Mo’ so cco tico.
 CANNETA
                              Sbricate.
 Nsi’ a mmo’ jamm’a capillo,
 La cosa va cauzante;
 Nce lo ncappo Ferrante a lo mastrillo:
1610Non pò mancare.
 CIANNA
                                  Canneta?
 CANNETA
 Via va saglie.
 CIANNA
                           Non saccio,
 Che cosa me ntrattene.
 CANNETA
 Ch’è chello, che te vene?
 CIANNA
 Mme sento tutta jaccio.
 CANNETA
1615Armo, che d’haje, lo cuorpo è già securo.
 CIANNA
 Sì, resorvo: Mo’ saglio.
 CANNETA
                                            E saglio io puro.
 CIANNA
 
 Che te dice sso core,
 Nce resciarrà felice?
 
 CANNETA
 
 Sì; lo core mme dice,
 
 A DUE
 
1620Ajuto Ammore.
 
 SCENA XIII
 
 LUCACCHIO vestuto femmena, e Sapatiello.
 
 LUCACCHIO
 Appoja, che fuss’acciso.
 Va deritto nzertone.
 SAPATIELLO
 Oh bene mio, che riso!
 LUCACCHIO
 Tu te lo vuoje sentì no scervecchione.
 SAPATIELLO
1625Comme t’aggio da ntennere?
 LUCACCHIO
 Muove adaso le gamme.
 SAPATIELLO
 Va buono?
 LUCACCHIO
                       Accossì ntontaro,
 Bravo, accossì se portano le Sdamme.
 E fortuna, ch’è notte,
1630Ca si fosse de juorno
 Li nnammorate a frotta
 Mme vedarrisse attuorno.
 SAPATIELLO
 Oh, che bello penziero.
 LUCACCHIO
 Fuorze n’è bero?
 SAPATIELLO
                                  Signorsì, è lo vero.
 LUCACCHIO
 
1635Questo giglio, che darde scrocca,
 Questa vocca
 Verzosa, e bella,
 Sanno l’aneme innamorar.
 Che te par,
1640Non è cossì?
 
 SAPATIELLO
 
 (Bella smorfia) Signorsì.
 
 LUCACCHIO
 
 Quest’amabbole prosetura,
 Sta fegura
 Sgezzegnosella,
1645Ogne core fanno languir:
 Puoi tu dir Forzi di no?
 
 SAPATIELLO
 
 (Oh che gusto!) ajebbò ajebbò. (Lucacchio se nne trase a la casa de Cianna.)
 
 Buon’affè, ca s’è nchiuso:
 Oh bonora nc’è mbruoglio!
1650E sarrà n’arrauoglio corejuso.
 Uh che butto farraggio.
 Dianora mm’hà mprommiso
 No gruosso veveraggio,
 Pe sapè addo’ è ghiuto: Io mo’ l’aviso. (se la coglie.)
 
 SCENA XIV
 
 FERRANTE sulo co la chitarra.
 
 FERRANTE
1655La Varrera n’è lesta; Ed io ntratanto,
 Mo’ mme metto a sto canto;
 E co sta chitarrella,
 Mme spassarraggio a di’ na canzonella.
 
    Cui si risolvi a non vuliri amari,
1660Non mi sdignari.
    Chi voli beni all’alma, ed a lu cori.
 Amami, bedda cara,
 O dimmi mori.
 
 SCENA XV
 
 CANNETA da la fenesta de Cianna, e lo stisso.
 
 CANNETA
 (Chisto pare Ferrante;
1665Ma lo signo n’è chisto.)
 FERRANTE
                                             A, ca mo’ sponta. (vede venì la Varrera)
 Bemmenuto. Cca nnante
 S’ha d’abballà.
 CANNETA
                              Già la varrera è ghionta. (se ne trase.)
 
 Se fa la varrera.
 E dapo’ fenuta.
 
 FERRANTE
1670Buono, mm’hà dato gusto.
 
 SCENA XVI
 
 PEPPO, e lo stisso.
 
 PEPPO
 Già simmo a tiempo justo.
 FERRANTE
 Po nce vedimmmo schiavo. (A chille de la Varrera.)
 PEPPO
 È apierto. (Va a toccà la porta de Canneta.)
 FERRANTE
                       Sta appannato. (Va a toccà la porta de Cianna.)
 PEPPO
                                                     O bravo! (Trase a la casa de Canneta.)
 FERRANTE
                                                                        O bravo! (Trase a la casa de Cianna.)
 
 SCENA XVII
 
 MARCONE co gent’armate, e bede ntra lumm’e lustro trasì PEPPO a la casa de Canneta.
 
 MARCONE
 Bonora! mo’ è trasuto!
1675Cierto Lucacchio è stato.
 Ah! Potta, io so’ abbeluto
 Che pozzo fa? l’ammico ha già serrato. (Va a toccà la porta de Canneta.)
 
 SCENA XVIII
 
 DIANORA, e SAPATIELLO, co la guardia appriesso, che porta la lenterna, e lo stisso.
 
 DIANORA
 Qua casa?
 SAPATIELLO
                      Chest’è essa. (Vanno a la casa de Marcone.)
 DIANORA
 Via, scassatal’ampressa. (A la guardia.)
 MARCONE
1680(Sbirre a la casa mia!)
 
 SCENA XIX
 
 FERRANTE, e CANNETA da la casa de Cianna, e li stisse.
 
 FERRANTE
 Lassa, facce de pesta. (A Canneta che lo tene.)
 
 SCENA XX
 
 CIANNA, e PEPPO da la casa de Canneta, e stisse.
 
 CIANNA
 Ammarcia scrìa. (A Peppo, che la vo’ ntrattenere.)
 DIANORA
 Veccole cca, pigliatele. (A la guardia.)
 MARCONE
 Ah canaglia, agguantatele. (A li guappe.)
 
 SCENA XXI
 
 LUCACCHIO da lo pertuso de lo soppigno, e li stisse.
 
 LUCACCHIO
1685Uh bonora! moglierema!
 E ncè porzì la guardia!
 MARCONE
 Te! tu cca co figliama!
 E tu lloco co Canneta!
 CIANNA
 Io so’ stata traduta.
 FERRANTE
                                      È stato machena.
 LUCACCHIO
1690O bene mio, che triemmolo.
 DIANORA
 Da ddo’ parla lo nfammo?
 SAPATIELLO
                                                  È ncoppa videlo.
 DIANORA
 Auza si Capora’.
 MARCONE
                                 Bravo neozio!
 E staje vestuto femmena?
 DIANORA
 Vide, che bella cosa!
1695Ah frustato bribbante.
 DIANORA
 Marcone. Mo’ haje da ghì ngalera.
 LUCACCHIO
 Oh mamma mia, ddov’è lo si Ferrante.
 DIANORA
 Saglite llà, pigliatelo.
 MARCONE
 Priesto jate attaccatelo.
 LUCACCHIO
1700O bene mio, che sfunnelo.
 MARCONE
 Bonora! Io mo’ strasecolo!
 Tu comme cca co chessa? (a Peppo.)
 DIANORA
                                                 E quanta trapole!
 PEPPO
 Che nne sacc’io, ca essa
 Mm’hà mmannato chiammanno.
 SAPATIELLO
                                                               (O bello ntrico!)
 CIANNA
1705Chisto è stato no nganno.
 MARCONE
 E chess’autra co tico.
 Comm’a la casa mia? (a Ferrante.)
 FERRANTE
 So’ stato mpapocchiato.
 MARCONE
                                              (O gelosia.)
 
 SCENA XXII
 
 LUCACCHIO co li sbirre da la casa de Marcone, e li stisse.
 
 LUCACCHIO
 Chiano si Caporale,
1710Chiano, ca mme faje male.
 DIANORA
 Vedite bella smorfia!
 MARCONE
 Priesto nnanz’a lo Jodece.
 LUCACCHIO
 Piatà, meserecordia,
 No lo boglio fa cchiù, none: lassateme.
 DIANORA
1715Ah, facce de judio.
 LUCACCHIO
 Ah, si Ferrante mio,
 Cca staje? seccurzo, ajutame.
 FERRANTE
 Io sto, che sbruffo tuosseco.
 CANNETA
 Orsù chiano, scompimmola,
1720Cheste mbroglie, ste machene,
 Tutte ll’hà fatte Canneta,
 E ll’hà fatte p’ammore. Io de Ferrante
 Sbesciolejat’Ammante;
 Pecché isso pe Cianna era speruto,
1725Da Cianna correspuosto.
 Io pe ll’aver all’ogna,
 Ste tramme aggio tessuto.
 CIANNA
                                                  Uh, che breogna!
 CANNETA
 E pecché stive tuosto
 De dare Peppo a Cianna; io de lo gliuommero
1730Da cca pigliaje lo capo. Essa credennose
 Ncopp’a la casa mia
 Trovà Ferrante, Peppo nc’hà trovato.
 CIANNA
 (Vi’ la facce d’arpia!)
 CANNETA
 E Ferrante penzannose
1735Trovà ccà Cianna, mmano a mme è ncappato.
 E Lucacchio porzine,
 Pecché sette carrine
 Se credea fa co mmico; io pe concrudere,
 A lo soppigno lo faciette nchiudere.
 DIANORA
1740Tradetore, lo siente?
 MARCONE
 Uh bonora, che caccia!
 LUCACCHIO
 Io no nne saccio niente.
 CIANNA
                                              Haje fatt’assaje.
 FERRANTE
 Va stirate sse braccia.
 CIANNA
 Veccome, sdellanzateme,
1745Io nce corpo, arrota teme;
 Ma Ferrantiello mio no mme levate.
 MARCONE
 È fatto. Avite tuorto: nguadejate.
 LUCACCHIO
 (O stelle, e che cordoglio!)
 FERRANTE
 A mme? No la canosco.
 CIANNA
                                             No lo voglio.
 MARCONE
1750Lo ghiusto lo commanna.
 DIANORA
 Lo Munno, che derria.
 MARCONE
 Via Ferrante.
 DIANORA
                            Via Cianna.
 FERRANTE-CIANNA
 Accossì bo’ lo Cielo? accossì sia.
 PEPPO
 Arma mia
 FERRANTE
                      Doce ammore.
 A DUE
1755Vecco la mano.
 CIANNA- CANNETA
                              Ed io
 Te do, giojello mio, porzì lo core.
 MARCONE
 Orassù conzolammonce.
 LUCACCHIO
 (Ll’haje fatta cana, perra.)
 TUTTI
 Pocca li matremmoneje
1760Mprimmo se fanno ncielo, e po cca nterra.
 
    Allegreza tutte quante,
 Ca mo’ è tiempo de scialà.
    E co suone, abball’e cante,
 Iammo tutte a pazzeja.
 
 
 
 
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional