Opera Buffa Napoli 1797 - 1750
  
  
 La Cilla, Venezia, per Giovanni Prodotti, s.d. [1707]
 a cura di Paologiovanni Maione
 
 
 
paratesto ATTO PRIMO ATTO SECONDO ATTO TERZO Apparato
 
 ATTO SECONDO
 
 SCENA I
 
 TOLLA, TORE, e LUCCIO.
 
 TOLLA
620Ca perzò stammatina
 So’ scesa da la banna de lo muro
 Pe ghi à parlar’à Cienzo à la marina.
 TORE
 Lò saccio; ma è securo,
 Ch’avimmo fatto peo.
 TOLLA
                                          Zoè?
 LUCCIO
                                                      Messere
625Corre pe becenzone,
 Pe fà la vessa mmuolo cò Masone.
 TORE
 Creo, ca potte vedere,
 Ca tù si’ de Masone nnammorata;
 E pecché isso vo’ toppà cò tico,
630Perzò, à boc’arrancata,
 Se vo’ levà da tuorno lo nnemmico.
 LUCCIO
 Penzamm’a lo remmedio:
 Vi, ca chesta è na carola,
 Che roseca lo core à te, ed’a figlieto.
 TOLLA
 
635Penzammo... Ah crodele,
 N’ammante fedele
 Tradisce accossì?
 Pe mme vuje penzate,
 Trovate
640Chiajuta,
 Ch’io già so’ storduta,
 Non saccio, che dì.
 
 LUCCIO
 Tù staje storduta, e chisto
 È ghiuto peo de te.
645Ora sentit’a mme...
 TORE
 Lo connutto maisto
 De tutte li fracielle,
 Pe’nnuje s’è già spilato!
 LUCCIO
 E zitto. Aggio penzato
650De... Vuje facite ll’uocchie pesciarielle?
 TOLLA - TORE
 Ma si l’affanno è tanto,
 Ch’à chiagnere me sforza.
 LUCCIO
 E bà, ca mo arrivammo cò ssò chianto.
 Nuje jammo scorza, scorza,
655E ccà besogna fà no trucco à riesto,
 E ghì à toccà lo bivo priesto priesto
 Tù Cienzo haje da trovare,
 Nnanze, che scenn’a stregne li capitole,
 E ll’haje da mpapocchiare,
660Decenno, ca pe d’isso abbramm’, e spirete;
 Nzomma ll’haje da fa gliottere,
 C’abbruscie, muore, e zetera
 Pe le toccà la mano: co no patto.
 Ch’a l’ammico Masone dia lo sfratto.
 TORE
665O bona mmenzione!
 TOLLA
 Fatecarrimmo nvano.
 LUCCIO
 E comme? Aggelo mmano,
 Cala botta no sferra.
 Sacc’io, ch’a lo patrone
670(E lò saccio pe cierto,)
 Mpenzann’a te, l’afferra
 Lo descenzo scopierto.
 TOLLA
 E chesto, che pò fa?
 LUCCIO
                                       Tirammo nnante.
 Quanno tiempo avarrimmo,
675Tanta nne mmentarrimmo,
 Pe’nsi, che mmiezo a tante,
 Una nne venga, che farra pe nnuje,
 Pe fà stare contiente a tutte duje.
 TOLLA - TORE
 Ah.
 LUCCIO
          Tozzola, e fa chesto,
680Ca pò penzammo p’agghiustà lo riesto.
 Ll’haje da mette no nchiasto all’uocchie.
 
 De papocchie,
 Ll’haje d’abbottà.
 Haje da fegnere,
685Ca vuoje stregnere,
 Si la botta la vuoje nzertà.
 
 SCENA Ii
 
 TORE, e TOLLA.
 
 TORE
 Che d’è? tù staje ncantata!
 TOLLA
 O Tolla sbentorata!
 TORE
 Mmiezo a chiant’, e sospire,
690Mamma, no figlio tujo non fa morire.
 TOLLA
 Tù me parle de morte?
 Siente, si da la sciorte
 Piatà non pozz’avere,
 Mprimmo mammeta morta haje da vedere.
695À nnuje facimmo core,
 Armammonce de nganno, e de malizia:
 Faciteme jostizia
 Despietto, Gelosia, Sdigno, ed’Ammore.
 TORE
 Sì, mamma, dalle dinto;
700E sperammo a Copinto
 D’havè nfavore nuosto lo decreto.
 Va saglie, ch’io t’aspetto ccà dereto.
 
    Mamma, la vita toja,
 Mamma, la vita mia
705T’arrecommanno.
 
    Penza, ca peo de boja,
 Pe te, pe mè sarria
 L’aciervo affanno.
 
 SCENA Iii
 
 TOLLA sola.
 
 TOLLA
 Si le mbroglie non ghiovano,
710Cò bocca mmenenata,
 Quanta furie se trovano
 Chiammarraggio... Che dico? Io so’ barata.
 
    Se sà, chi è peo de furia
 Quann’è traduto Ammore.
 
715   Vedimmo.
 Che facimmo;
 Si nò, de chesta ngiuria,
 Aspetta
 La mennetta,
720Marvaso, tradetore.
 
 SCENA IV
 
 CILLA da la Fenesta, e la stessa.
 
 CILLA
 Chi è? chi tozzola?
 TOLLA
                                     Cilla.
 CILLA
                                                 Tolla.
 TOLLA
 Tù chiagne?
 CILLA
                          Penza, ch’aggio na vozzola
 De gliannole, che strujeno
 Stà vita da la capo a li carcagne.
 TOLLA
725Già lo’saccio.
 CILLA
                           E nce nn’è
 Pe figlieto, e pe’ tè.
 TOLLA
                                      Perzò so’ ccà.
 Fuorze...
 CILLA
                   Che fuorze (oh Dio)
 TOLLA
 Cienzo, che fà?
 CILLA
                               Dall’autra banna è sciuto...
 TOLLA
 Ajemmè...
 CILLA
                       No nnanze, pe’ fornì lo scritto.
 TOLLA
730O destino quernuto!
 A DUE
 O Tolla
                 negrecata, ò core affritto!
730O Cilla
 CILLA
 Haje visto Luccio?
 TOLLA
 Sì. Mo è tiempo, scetate
 Sù sdigno, e mpietto sbruffamo
 Arraggia, fuoco, e tuosseco.
735Mo stà: cossì hà da esse: è già penzata
 Viva contenta, ò morta desperata.
 
 SCENA V
 
 CILLA sola.
 
 CILLA
 Ed io, che stò ccà nchiusa
 Dimme, ch’aggio da fà, povero core?
 Nò: tù respunne, Ammore,
740Tù dimme, co’ qua’ scusa
 Puoje commoglià lo’tuorto, che refunno
 À na fedele toja? Parla, respunne.
 Tù saje, ca pe’pensiero
 La bella legge toja non aggio affiso;
745Saje... Che dice? E lo vero.
 Aggio mala fortuna: t’aggio ntiso.
 
    Cierto, non haje da ridere
 De mme fà cchiù crepà,
 Sciorte arraggiata.
 
750   Haggio armo pe’mm’accidere
 E appriesso me puoje fà
 Na secutata.
 
 SCENA VI
 
 TORE, e CILLA.
 
 TORE
 Mbe, che d’è? puro strille!
 Mamma n’hà fatto niente?
 CILLA
755Negra me, so’ arrivate li trommiente
 Le cimme à rosecà de li capille.
 TORE
 Comme?
 CILLA
                    Era sciuto tata;
 E mammet’arraggiata,
 Creo, ca l’è ghiut’appriesso,
760Fuorze...
 TORE
                   Vogl’ì à bedè quant’è socciesso,
 CILLA
 Statte, si mme vuoje bene,
 Non te ghisse mettenno à quacche mpigno.
 TORE
 Saccio quanto commene,
 P’arrevà cò lò buono a lo designo.
 CILLA
765Sì è chesto, và correnno. Ajuta gioja,
 A mmammeta, à te stisso, cà Cilla toja.
 TORE
 
    Cilla mia, tù cirche ajuto
 À chi ajute và cercanno,
 E non sà, si lo pò havè.
 
770   Tutte trè stammo speranno:
 O nce resce; ò no tavuto
 No nce’manca à tutte trè.
 
 CILLA
 Siente, Tore, vorria...
 
 SCENA VII
 
 CIENZO, LUCCIO, e li stisse.
 
 CIENZO
 A’ la Casa?
 LUCCIO
                       A’ la Casa.
 CIENZO
                                            O Tolla mia.
 TORE
775Che dice?
 CILLA
 Vene Tata.
 CIENZO
                       Io mo squaquiglio...
 Mbè stà cosa che d’è?
 LUCCIO
                                          Chist’è lo figlio.
 TORE
 E mme credea, che mamma fosse ccà.
 CIENZO
 Comme! Nò nc’è?
 CILLA
                                    Nc’è stata,
780E da llà s’è abbiata
 Pe te venì à trovà.
 LUCCIO
 Vide, ch’ammore.
 CIENZO
                                    O perna de stò core.
 Jate priesto trovatela,
 E nzino à me portatela.
785O Tolla saporita.
 Via, trasetenne tù.
 Contentizze, nò cchiù, ca mò sta vita,
 Fà no punto fenale.
 CILLA - TORE
 * È fatto. (Addemmannanno co signe, si è fatto lo scritto)
 LUCCIO
                     * Non è fatto.
 CILLA - TORE
                                                * Manco male.
 CIENZO
790O bene mio, ch’allanca!
 LUCCIO
 E chella stà speruta.
 CILLA - TORE
 * Fortuna, mazzafranca,
 * Ammore, ajuta.
 
 SCENA VIII
 
 CIENZO, e LUCCIO.
 
 CIENZO
 Movete, assarpa, curre,
795Trovala, e portamella.
 LUCCIO
                                          Eccome lesto.
 CIENZO
 Viene, fata, e seccurre
 Cienzo... Ancora staje cca? Curre, và priesto
 Curre, ca già so’ ghiuto.
 Và priesto, ca mo moro ascevoluto.
 LUCCIO
 
800   Mo vao cercanno:
 Ntrà no momiento
 Sarraje contiento;
 Non pecceja.
 
    Vatt’alliscianno,
805Miettete ntuono,
 Nntosciate buono,
 Ca mò so’ ccà.
 
 SCENA IX
 
 CIENZO sulo.
 
 CIENZO
 Uh, che frizze, uh, che fuoco
 Aggio a stò pietto! O, musso, e quanno viene?
810Gia non trovo cchiù luoco,
 Gia... Cienzo haje tanto caudo, e te ntrattiene?
 Va tu puro, sciaddeo.
 Mm’attocca, no lo ’neo:
 Cò ciento mano haje d’afferrà sto duono:
815Curr’è pigliala mbraccia. Dice buono;
 
    È tanta l’allegrezza,
 Che si non corro subbeto,
 Dubbeto
 De morì.
 
820   Sento, ca la prejezza
 Fa ncuorpo no fracasso,
 E tanto è lo sconquasso,
 Che non se pò zoffrì.
 
 SCENA X
 
 CAPETÀ MASONE, e CANNACCHIA.
 
 CAPETÀ MASONE
 Io non saccio, che stroppole
825Me vaje danno a’rentennere.
 CANNACCHIA
 Io me la sento scennere,
 Ch’all’utemo uscia
 Sarraje zito de chiacchiare.
 CAPETÀ MASONE
 Sarraggio lo mmalan’, che die’te dia.
 CANNACCHIA
830* Tira, ca vince.
 CAPETÀ MASONE
                                Nzomma
 Ssà vocca schitto sbromma
 Sempe de mbriachizie na vorrasca!
 CANNACCHIA
 A’, a’.
 CAPETÀ MASONE
              Non vuoje stà muto,
 O’ te fraveco n’uocchie co na rasca.
 CANNACCHIA
835Vì lo viecchio è benuto
 Comme l’appontamiento?
 CAPETÀ MASONE
 Averrà avuto quacche mpedemiento?
 CANNACCHIA
 Sì, sì.
 CAPETÀ MASONE
              Donca te pare,
 Mmamalone, sciasciucco,
840Che Cienzo pozza fare
 À n’Ommo comm’a mme no trucco mmucco?
 
    Comme si non sapisse
 À Napole chi so’,
 Che saccio à guappejà!
 
845   Comme si non vedisse
 Stò vraccio quanto pò,
 Masone, che’sa’fà!
 
 CANNACCHIA
 Che’ saccio.
 CAPETÀ MASONE
                         E bì chi autro,
 Sì mbè fosse lo zifaro,
850Vo’ tenemente sulo
 La nnammorata mia. Bello cetrulo!
 Tù mo, che’saje stì tiermene?
 Nchiocc’à tè no ncè traseno,
 Ca viso, urebbo, ed opera si’ n’aseno.
 CANNACCHIA
855* Ò io, ò tù.
 CAPETÀ MASONE
                        Che nfruceche?
 CANNACCHIA
 Ca perzona de creddeto
 Me lo steva contanno
 Mo, ch’uscia mm’haje chiammato.
 
    Si lo’buoje sentì cantanno,
860Piglio mò na chitarrella
 
    Crid’a mme, ca te la fanno,
 E’te’puoje raspà la zella.
 
 CAPETÀ MASONE
 Che Cienzo sia de Tolla nnammorato,
 Nò mme mporta; ma quanno
865Ncè sia ntrà Cilla, e Tore
 Quacche cosa d’ammore,
 Veccote già mpastato lo destino:
 Abbuscate da mo no mantesino.
 CANNACCHIA
 * Chesto sulo nce manca.
 CAPETÀ MASONE
870E batt’apparecchianno a fà na chianca.
 CANNACCHIA
 Le farria de pecciune,
 De vetelle, pollanche, e de capune.
 CAPETÀ MASONE
 No cchiù parole. Tozzola.
 CANNACCHIA
 Mo te servo.
 CAPETÀ MASONE
                          E pò essere
875* Chesto!
 
 SCENA XI
 
 CILLA da la fenesta, e li stisse.
 
 CILLA
 Chi è?
 CAPETÀ MASONE
 
 Bellissema
 Carissema,
 Mariteto stà ccà:
880Tata Cienzo, che fà?
 Tù comme staje?
 
 CILLA
 
 * Uh, che cosa
 * Sustosa!
 Tata, Cienzo non ncè,
885Ed io stongo pe te
 Chiena de guaje.
 
 CAPETÀ MASONE
 Siente lloco, campierchio.
 CANNACCHIA
 Tù tienemente sulo à lo copierchio.
 CAPETÀ MASONE
 Sapiss’addov’è ghiuto?
 CILLA
890Hà no piezzo, ch’è sciuto,
 E cchiù no ll’aggio visto.
 * Io voglio bene à chisto,
 * E non saccio pecché.
 CAPETÀ MASONE
 Che dice, bella?
 CILLA
                                Niente.
 CAPETÀ MASONE
895Sù, statt’allegramente.
 CANNACCHIA
 * Co le llagrem’all’uocchie.
 CAPETÀ MASONE
 Siente...
 CANNACCHIA
                   * Tutte pastocchie.
 CAPETÀ MASONE
 E crid’à mme...
 CANNACCHIA
                               * Scur’essa.
 CAPETÀ MASONE
 La meglio Prencepessa
900(Vide, che te dich’io)
 T’have da mmedejà.
 CILLA
 Io spero de scialà. * Cò Tore mio.
 
 Stà scardanno n’affanno zocuso,
 Pe te schitto, st’affritto mio core,
905Pe te sento no stiento penuso,
 Pe te’noce lò doce d’ammore.
 
 SCENA XII
 
 CAPETÀ MASONE, e CANNACCHIA.
 
 CAPETÀ MASONE
 Acqu’, acqua, ca mo allummo,
 Mò me ne vao nfummo.
 Che dice varvajanne,
910Chesta more pe mme?
 CANNACCHIA
 Da cc’à cient’anne.
 CAPETÀ MASONE
 Jammo a trovà lo pate,
 Sù tirammo à fornì. Siente Catammaro:
 Spartimmonce à doje strate.
915Io mm’abbio da chesta, e tu da chella,
 E s’ascie Cienzo, portalo
 Cò tico a lo Palazzo de Schetella,
 Ca llà so’ io.
 CANNACCHIA
                         Mo corro; ma mperrò...
 CAPETÀ MASONE
 Và parlanno, che d’è?
 CANNACCHIA
920Tù non saje, che ncè vo’?
 CAPETÀ MASONE
 Che cosa?
 CANNACCHIA
                      Sient’a mmè...
 CAPETÀ MASONE
                                                   Valla scompenno.
 CANNACCHIA
 Ncè vorria... Nò mmè pische?
 CAPETÀ MASONE
                                                        Io non te ntenno.
 CANNACCHIA
 
    Non siente, ca st’afa,
 Che nfoca, e dessecca,
925Zoffrì non se pò?
 
    Na bona carrafa,
 Mo propio nce’azzecca
 Mo sì, ca nce vo’.
 
 SCENA XIII
 
 CAPETÀ MASONE sulo.
 
 CAPETÀ MASONE
 Ah’mbriaco... E tù sapejo,
930Ca si’ fojuto subbeto,
 Ca si’ nò co no cauce
 Te facea fà no vuolo
 Nfi mponta à la lanterna de lo muolo.
 À nnuje: Jammo sollizeto
935Addo’ Ammore me votta. O core, ò Fata,
 Dea verria pentata,
 Mammuzza bella de lò Dio mammino,
 À no Marte, che t’amma haje da stà’nzino.
 
 Cchiù contiento de Masone.
940Vid’, e trovalo si puoje.
 Smargiassone,
 Ommo de spanto:
 E de masse aver’accanto
 Na moglier’accossì’bella,
945Vroccolosa,
 Cianciosella,
 Grazejosa:
 Che mmalora! cchiù nne vuoje?
 
 SCENA XIV
 
 CIENZO, e TOLLA.
 
 CIENZO
 No cchiù; no cchiù Tollecchia
950(Ò, che gusto) no cchiù ca tù mm’accide.
 TOLLA
 N’è lo vè? Te nne ride?
 Cano, tù qua’fattecchia
 Mm’haje fatto fà.
 CIENZO
                                   Comme? Pecché?
 TOLLA
                                                                     Da quanno
 Cò tico aggio parlato,
955No strummolo nfocato
 Dint’a lo pietto mio và rociolanno.
 CIENZO
 * Mo me nne vao nnestrece
 Sù, venimmo a lo quateno.
 Nc’è la pezzolla?
 TOLLA
                                 Vasta.
960Nne trovarraje cchiù d’una.
 CIENZO
 * Aruta, e bona pasta:
 * Chest’è doppia fortuna.
 TOLLA
 Che d’è?
 CIENZO
                    Besogna correre
 Priesto, priesto à concrudere.
 TOLLA
965Ma mprimmo haje da resorvere
 De dà figlieta à figliemo.
 CIENZO
 Io t’aggio ditto à primmo,
 Cà me farria de muta sfazejone,
 Pecché Tore lò stimmo
970Cchiù de no figlio; ma chi è Masone,
 Tù lò saje, io lò saccio.
 TOLLA
 Che dice! Chist’è n’arcepotronaccio;
 E pò de cchiù non hà
 Pe s’accattà no mesoriello de scorcuoglio.
 CIENZO
975La parola...
 TOLLA
                        Che mporta.
 Haje armo de vedere
 Na scura figlia co la mala sciorta?
 CIENZO
 Tù già mme si’ mogliere...
 TOLLA
 * Staje frisco.
 CIENZO
                            E perzò pozzo allegramente
980Fedà cò tico li segrete mieje.
 TOLLA
 Và decenno, che d’eje, spapura.
 CIENZO
                                                            Siente:
 Cilla n’è figlia mia, ma la cresciette
 Da quanno no fegliulo,
 La popella de st’uocchie (ajmmè) perdiette.
 TOLLA
985À chesto non si’ sulo, pocca Tore
 Manco m’è figlio.
 CIENZO
                                   Cierto?
 TOLLA
                                                   È azzò, chè sacce,
 Cilla squaglia ped’isso, ed isso more;
 E pò (cò quatto stracce,
 Che pe dote le daje) piglià no giovene,
990Bello fatto, e majateco,
 Valente co lo rimmo, e co la pesca,
 E Cilla camparrà contenta, e fresca.
 CIENZO
 Ora tè! Che mme dice?
 TOLLA
 E nuje, da n’autra banna,
995Camparrimmo felice.
 CIENZO
 Fà quanto vuoje: ssà grazia, me commanna.
 Ora ssù, nnanze notte
 Nuje lo potimmo fà st’accordamiento
 Ca mò, cò quatto botte,
1000Caccio Masone da l’appontamiento.
 TOLLA
 Già stammo ntise;
 A DUE
                                     Addio.
 CIENZO
 Confalone d’Ammore
 A DUE
 Stà cò tanto no
                              Core,
 Vatt’allegrann’, ò
 A DUE
 Ca mbraccia m’avarraje, Mussone
                                                                mio.
 Ca mbraccia spero havè, Masone
 TOLLA
 
    Da chella
 Zezzenella,
1005Che sosperà
 Mme fà,
 Lo civo, à buonne cchiù,
 Spera stò core.
 
 Contiento
1010A lo trommiento
 Io spero havè
 Pe te,
 Pocca scetaste tù
 Tanto dolore.
 
 SCENA XV
 
 CIENZO sulo.
 
 CIENZO
1015O vocchella de zuccaro;
 Belle lavra de buccaro,
 E, che parole chiene de docezza
 So’ chesse? ò bella cosa!
 Ogne’parola è frezza,
1020Che st’arma me spertosa;
 Ma scenno da na vocca sceroppata.
 Doc’è la frezza, e doc’è la frezzata.
 
    Uh, che furia de tricche tracche
 Mpietto Ammore sparanno me và!
 
1025   Nò cchiù trivole, fora sciabbacche,
 Zompa Core, ed’attienn’à scialà.
 
 SCENA XVI
 
 CAPETÀ MASONE, e lo stisso.
 
 CAPETÀ MASONE
 Oje Cienzo, e mbè, ch’è stato?
 dapo’, ch’aggio aspettato,
 Hà cchiù de n’ora, che te vao cercanno.
 CIENZO
1030Mo te dich’io... No ntrico...
 Mm’ha fatto...
 CAPETÀ MASONE
                             Tu respunne mazzecanno!
 CIENZO
 Vasta...
 CAPETÀ MASONE
                 Parla cò mmico:
 Che d’è?
 CIENZO
                    No mbruoglio de no cierto vuzzo...
 CAPETÀ MASONE
 E s’io lò dico, ca tù parle muzzo.
1035Via, jammoncenno mò.
 Abbiammonce.
 CIENZO
                               Addo’?
 CAPETÀ MASONE
 Comme! Non saje?
 CIENZO
                                      Che saccio.
 CAPETÀ MASONE
 E che buo’, che te spenna stò mostaccio?
 CIENZO
 À mme? Quaglia, gallina...
 CAPETÀ MASONE
1040Vuoje vedè na roina?
 Fà no cunto, ch’è fatta.
 CIENZO
 Farraja la mmala pasca, che te vatta.
 CAPETÀ MASONE
 Che buo’, che’netta, netta
 Te la faccia zompà ssa chierecoccola?
 CIENZO
1045Trova che t’arrecetta,
 Si non te vuoje nzorà co na saglioccola.
 CAPETÀ MASONE
 À Masone?
 CIENZO
                        Và chiano.
 CAPETÀ MASONE
 E tù proprio nne vuoje...
 CIENZO
                                               Vascia sse’mmano:
 Vi ca te sgorgio.
 CAPETÀ MASONE
                                À mme?
 
 SCENA XVII
 
 TORE, li stisse.
 
 TORE
1050Fremma, si’ guappo. So’ ccà io pe’tè.
 CAPETÀ MASONE
 Che buo’ fà, mmerdusiello?
 CIENZO
 Tù figliema no ll’haje.
 TORE
 * Ò buono.
 CAPETÀ MASONE
                       Ssò scartiello
 Te lo voglio ammallà.
 TORE
                                         Le chiavarraje
1055Doje detella de naso.
 CAPETÀ MASONE
                                         Ah potta d’oje!
 (Cca’nce perdo). Te voglio...
 CIENZO
                                                     E puro vuoje?
 CAPETÀ MASONE
 Orsù...
 TORE
                A stà la spata,
 O la vuoje portà ncanna arravogliata.
 CAPETÀ MASONE
 Mo ve smenozzo...
 CIENZO
                                    Torna.
1060No la vuoje scompe ancora?
 TORE
 Te nne vuoje ghì a’mmalora,
 Ò t’assesto no jace int’a le corna?
 CIENZO
 
 Va te stipa,
 Pezzentone.
 
 TORE
 
1065Va t’arripa,
 Mascauzone.
 
 CAPETÀ MASONE
 
 À mme chesto?
 Chest’a’mme?
 
 CIENZO - TORE
 
 À te’chesto
1070Chest’a’tè.
 
 CAPETÀ MASONE
 
 Chest’à mme? Cuorpo de Bacco
 Mo ve’scresto,
 Mo ve’nfilo.
 
 CIENZO - TORE
 
 Si te muove, te refilo
1075Buono, buono lo’tabacco.
 
 CAPETÀ MASONE
 
 Co no sciuscio
 Ve nne fruscio,
 Co na’botta
 Ve sbodello.
 
 CIENZO - TORE
 
1080Ò lo bello
 Cacasotta.
 
 CAPETÀ MASONE
 
 Io, e buje sarrimmo trè.
 
 CIENZO - TORE
 
 Va toccanno, e bì, che nc’è.
 
 SCENA XVIII
 
 CIENZO, e TORE.
 
 CIENZO
 Bello ioqua’de scarpa!
1085Tiemente comm’assarpa.
 TORE
                                                 À chi lo mmizze?
 CIENZO
 Alliegre nuje, ch’è tiempo d’allegrizze.
 TORE
 Zoè?
 CIENZO
             Parla co’mammeta; ed’ammolate,
 Pe’gaudè pe’scialà. Siente, e conzolate.
 TORE
 Sempe comm’a no tata
1090T’aggio portato ammore;
 Ma mo sarrà na cosa spotestata.
 CIENZO
 Ed’io porzì de core
 T’aggio voluto bene; e mo nfi mponta
 Me sarraje caro, mo, che ncè la jonta.
1095Uh, che festa farrimmo!
 TORE
                                               * Dio lò sà.
 * Fegnimmo.
 A DUE
                            Nce sarrà
 De suonne no conzierto.
 E robba da cardare, à Ciel’apierto.
 
 Haje da sentì
 
 CIENZO
 
1100De calasciune
 Lo ntrunche ntranche.
 
 TORE
 
 De rebbecchine
 Lo zi, zi, zi.
 
 A DUE
 
 De vottafuoche
1105Lo zù, zù, zù.
 Uh, che sarrà!
 
 TORE
 
 Li maccarune,
 À mucchio, à branche.
 
 CIENZO
 
 E de galline
1110S’ha sguazzà.
 
 A DUE
 
 Farrimmo juoche
 Cchiù de lo cchiù.
 
 SCENA XIX
 
 LUCCIO, e TORE.
 
 LUCCIO
 Tore, staje grellejanno!
 Ncè bona nova?
 TORE
                                Ncè.
1115Ma puro ncè stà mmiezo lo malanno.
 LUCCIO
 Và decenno, che d’è?
 TORE
 Fatt’avimmo cò Cienzo,
 Nfi à mò, no para piglia d’allegrezza;
 Mà, che pe chesto?
 LUCCIO
                                     Io penzo,
1120Ca Tolla già l’hà puosto la capezza.
 TORE
 Già de chesto parlava.
 LUCCIO
 E si n’era pe mme, già se sgarrava.
 TORE
 È bero; ma tu saje, che nce’stà sotta.
 LUCCIO
 Mo s’hà da fà la botta.
1125Saje, ca Cilla sta lesta,
 Sbignatevella; e chi nce’resta, resta.
 TORE
 O quanto...
 LUCCIO
                        À te, retirate,
 Ca de portante veneno
 Masone, co’Cannacchia.
 TORE
1130Io saglio ad auto
 À parlare co mamma.
 LUCCIO
                                          Ed io mm’agguatto
 Pe sentì guatto, guatto lo trascurzo.
 TORE
 Cielo, si no’mm’ajute, io già so’ scurzo.
 
 SCENA XX
 
 CAPETÀ MASONE, CANNACCHIA, e LUCCIO annascuso.
 
 CAPETÀ MASONE
 Da parte mia, gnorsì a lo Castellano.
 CANNACCHIA
1135De ll’vuovo?
 CAPETÀ MASONE
                          E puro tridece!
 Che faccia da de mano
 Ad appuzare tutte li cannune
 Mmierzo stà casa, e chella,
 Pe’nne fà de savorre dueje montune.
 CANNACCHIA
1140Cierto?
 LUCCIO
                 * Bù, bù.
 CAPETÀ MASONE
                                    Agnolella.
 Quanno?
 CANNACCHIA
                    *  Tiente pazzia.
 Quanto meglio sarria,
 E ghiessemo ad anchire lo vodiello
 A la Taverna dint’a lo Castiello.
 LUCCIO
1145* Ah, ah.
 CAPETÀ MASONE
                    Breccone...
 CANNACCHIA
                                          Adaso...
 CAPETÀ MASONE
 E, che buo’, che t’affoco?
 Io stò, che pe lo naso
 Ietto scarde de fuoco:
 E tù semp’haje la capo à no sarzizio?
 CANNACCHIA
1150Ma, che nce pozzo fà, si chist’è bizio?
 
    Maje l’allanca
 Nò mme manca,
 Tengo ncuorpo no molino.
 
    N’aggio abbiento
1155No momiento,
 Vorria sempe pan’, e bino.
 
 CAPETÀ MASONE
 Manco la vuoje fornì?
 Vi che freoma ncè vo’.
 CANNACCHIA
                                           Ma si è cossì.
 CAPETÀ MASONE
 No: non corrimm’a folla.
 CANNACCHIA
1160Vi mo chi hà fatt’arrore?
 CAPETÀ MASONE
 E porzì lo sio Tore! Tutt’è machena
 De stà scrofa de Tolla;
 Ed io all’uno, e all’autra
 Ll’aggio da fà cacà la penetenzia.
 LUCCIO
1165* Crepa pe mò.
 CANNACCHIA
                               * Screvite stà settenzia.
 CAPETÀ MASONE
 Cilla, non pozzo credere,
 Che nce’aggia corpa. À chillo viecchio propio
 Le voglio chella varva
 Spennar’à pilo, à pilo.
 LUCCIO - CARNACCHIA
                                           * Sarva, sarva.
 CAPETÀ MASONE
1170Ah cane, trademiento.
 Fà pietto tù...
 LUCCIO
                            * Che gusto.
 CAPETÀ MASONE
                                                     À tè...
 CANNACCHIA
                                                                  Ch’è stato?
 Che d’è tanto spaviento?
 CAPETÀ MASONE
 Non è nesciuno? E bà, ca mo si’ nato.
 Mò m’asceva na botta,
1175E sgrazejatamente
 Tù nce ghive pe sotta.
 LUCCIO - CANNACCHIA
                                          * Ò che balente.
 CAPETÀ MASONE
 
    Cò lo Rre de li smargiasse
 Te la spasse
 Sio Copinto,
1180N’è cossì? Tienete mmalora!
 
    Quanno penzo,
 Trasì dinto
 Pe scialare;
 Che te pare?
1185Accommenzo
 À ghì da fora!
 
 Siente ccà stò penziero:
 Cilla nne fujarrimmo
 Da po’, ch’è fatto scuro;
1190E ognuno ha da restà comm’à sommiero.
 CANNACCHIA
 * Scazza!
 LUCCIO
                    * E lesto.
 CAPETÀ MASONE
                                       E tù mprimmo
 Haje da portà la voca.
 CANNACCHIA
                                          À mme?
 CAPETÀ MASONE
                                                            Securo.
 CANNACCHIA
 Uscia vo’ pazzejà?
 CAPETÀ MASONE
                                    Và cammenanno:
 Jammo à manepolà.
 CANNACCHIA
                                        * Chist’è malanno!
 LUCCIO
1195Va, c’haje da fà co Cola: va joquanno.
 CAPETÀ MASONE
 
 Aggio d’havè pe forza
 Mbraccia la bella mia,
 E ognuno hà da schiattà.
 
 CANNACCHIA
 
 Vide, che non te ntorza.
 
 CAPETÀ MASONE
 
1200Malan, che die te dia.
 
 LUCCIO
 
 * Cierto te ntorzarrà.
 
 SCENA XXI
 
 LUCCIO sulo.
 
 LUCCIO
 Ò chisto è n’autro chiajeto!
 Mo besogna joquà de cellevriello.
 S’è scopierto l’agguajeto?
1205Vedimmo chi farrà meglio l’appiello.
 
    Arte co d’arte,
 Che bell’allotta,
 C’hanno da fà.
 
    Ma tu da sotta,
1210Pe d’ogne parte,
 Nce’haje da restà.
 
 SCENA XXII
 
 TOLLA, e TORE.
 
 TOLLA
 Veccote a ch’è servuta
 La bella mmenzeone;
 P’agghiognere a lò cuotto acqua volluta.
 TORE
1215Sarria sopierchio bella,
 Quanno tù...
 TOLLA
                          Si.
 TORE
                                  Mutasse ntenzejone.
 TOLLA
 Nnanze mm’esca la zella:
 Chesto non sia pe’ditto.
 TORE
 E ba, ca tutte duje jarrimm’a mmitto.
 TOLLA
1220Va la sciorte a travierzo.
 Se mora.
 TORE
                    * E Cilla mia farra lo tierzo.
 TOLLA
 Vì si Luccio ha qua’nnova;
 Sì no, nnanze, che scura,
 Haje da vedè na mmalora a prova.
 TORE
1225E quanno stracquarraje, quanno, ò sbentura?
 
 SCENA XXIII
 
 CILLA da la fenestra, e li stisse.
 
 CILLA
 Chist’è Tore. Non siente?
 TORE
 Cilla.
 CILLA
             Che’nov’avimmo?
 TORE
 Sempe chiant’, e lamiente.
 TOLLA
 E boca Rajemo, e puro muorte simmo.
 CILLA
 
1230   Ò stelle mmalorate,
 Si morta mme volite,
 Datemillo a la mpressa
 Sto contiento.
 
    Ma vuje nò mm’accedite,
1235Sta grazia mme negate,
 Pe’mme fà morì cessa
 Ogne momiento.
 
 TORE
 Oh, Dio...
 
 SCENA XXIV
 
 CIENZO da dint’a la casa, e li stisse.
 
 CIENZO
                     Chi è lloco fora?
 CILLA
                                                    È Tolla.
 CIENZO
 Tolla mia? O de stò pietto, (s’affaccia)
1240Ammoruso dellietto...
 E nc’è Tore porzì. Vicina è ll’ora,
 Che bello, nnitto nfatto,
 Volimmo fà no sciala core à quatto.
 TOLLA
 Stò gusto vao pezzenno...
 CILLA - TORE
1245Ed io porzì.
 CIENZO
                         Mbe, jammonce allestenno,
 Ca mò mo’ncè levarrimmo sto golio
 Io sto, che n’aggio recoja.
 TOLLA - TORE - CILLA
 Sì n’è comme dich’io...
 CIENZO
 Mo tutt’agghiusto.
 TOLLA - TORE - CILLA
                                    Haje d’agghiustà l’assecoja.
 CIENZO
 
1250Io co’ Tolla, e tù co’ Tore.
 
 TORE
 
 Io cò Cilla.
 
 CILLA
 
                       Ed io co’ Tore.
 
 TOLLA
 
 Io cò tico. (Tradetore).
 
 CIENZO - TORE e CILLA - TOLLA
 
 À bezzeffia
                        scialarrimmo
 Chi lo’sà sì
 
 A QUATTRO
 
 Uh, che bampa m’è cresciuta?
 
 CIENZO - TOLLA e TORE - CILLA
 
 Ma si avimmo
                              chi l’astuta,
 * Ma si manca
 
 CIENZO - TOLLA e TORE - CILLA
 
 Bella mmesca
                             che farrimmo.
 * Brutta botta
 
 SCENA XXV
 
 LUCCIO, e CANNACCHIA.
 
 LUCCIO
 Tù mo già l’haje sentuta.
1255Ch’è na cosa de vrenna.
 CANNACCHIA
 Lloco te voglio, Curcio, à ssà sagliuta.
 LUCCIO
 E bà ca la marenna
 Haje gusto de la perdere.
 CANNACCHIA
                                                 Uh, che tasto.
 Tiene si puoje: scomputo è lo contrasto.
 
1260Nc’è da vevere?
 Nc’è pappa?
 
 LUCCIO
 
 De sciarappa
 Nc’è no Tevere.
 
 CANNACCHIA
 
 E lo cardo?
 
 LUCCIO
 
1265Quanto puoje.
 
 CANNACCHIA
 
 Vi, che buoje,
 Ccà so’ pe tè.
 
 LUCCIO
 
 No pegnato
 Mmaretato...
 
 CANNACCHIA
 
1270Chisto propio mme commanna.
 
 LUCCIO
 
 Maccarune,
 À  buonne cchiune...
 
 CANNACCHIA
 
 Benemio, vengano ncanna.
 
 LUCCIO
 
 E’pò dalle à no tremmone.
 
 CANNACCHIA
 
1275Chest’è bera sfazejone.
 
 LUCCIO
 
 Si’ contiento?
 
 CANNACCHIA
 
 Buon’affè.
 
 LUCCIO
 Piglia stà penna ncunto,
 Va sciaqqua.
 CANNACCHIA
                           Pruoje ccà. * Buono è l’accunto.
 LUCCIO
1280Mo accommenz’a fà vruoco:
 Tù nchè biene vestuto co l’ammico,
 Chiantate a chisto luoco,
 Ca io starraggio mmocc’à chillo vico.
 CANNACCHIA
 È ntesa la mportanza.
1285Iammo: ntra tanto, à defrescà stà panza.
 
 SCENA XXVI
 
 LUCCIO sulo.
 
 LUCCIO
 Cienzo ccà... Tolla llà...
 Chillo à Cannacchia; e chesta a Masone;
 Tore cò Cilla...
 
 SCENA XXVII
 
 TORE, e lo stisso.
 
 TORE
                             Oje Luccio, che se fà?
 LUCCIO
 * Meglio non pò cauzà la mmenzione.
 TORE
1290Che d’è? staje nzallanuto?
 LUCCIO
 * Tutto stà, che se nzerta. Ò bemmenuto.
 Tolla, addovè?
 TORE
                             Stà suso.
 LUCCIO
 Iammo, ca nc’è no mbruoglio corejuso.
 TORE
 Fosse buono pe nuje?
 LUCCIO
1295Mo ll’haje da ntennere.
 Nò; meglio falla scennere,
 Ca non pozzo partì.
 TORE
                                      Mo, co no sauto,
 Sarrimmo ccà. (se nne và.)
 LUCCIO
                               S’hà da nzertà senz’auto.
 Maje lo gliuommaro non se pò sciogliere,
1300Sì lo capo n’arrive à trovà;
 Ne à lo schiacco là botta pò cogliere
 Chi deritto cecare non sà.
 Lo capo già l’avimmo.
 La mmira stà pegliata; e bedarrimmo...
 
 SCENA XXVIII
 
 TOLLA, TORE, e lo stisso.
 
 TOLLA
1305Vecconce ccà.
 LUCCIO
                            Venit’à sto pontone:
 Poco parole, e bone.
 TORE
 Parla.
 LUCCIO
              Lo Capetanio
 S’hà puosto nchierecoccola
 De nne scopare Cilla, cò duje autre,
1310E cò Cannacchia...
 TOLLA - TORE
                                    Sì?
 LUCCIO
                                             Vestuto femmena
 Le vo fà lo servizio.
 TOLLA - TORE
 Ajemmè, che precepizio!
 LUCCIO
 Stat’à senti nfi all’utemo:
 Già stà fatto lo trafeco,
1315Cannacchia già pe canna stà pegliato.
 Lo cuorpo mo hà da essere,
 Masone, mpapocchiato,
 Nn’hà da fuire à tè. Cilla, cò Tore
 Se ll’hanno da sbignare...
 TOLLA
1320E Cienzo?
 LUCCIO
                      Ha da trovare
 Cannacchio, ncagno tujo.
 TOLLA
                                                Sent’a l’addore,
 Ch’è cosa de freddura.
 LUCCIO
 Comme!
 TORE
                    Lassalo dì.
 LUCCIO
                                          Chesta è secura.
 Quanno simmo a lo quateno,
1325Tù à Cienzo haje da fà ntennere,
 Ca t’è ghionta na simpeca:
 Ntesa sta paparacchia,
 Isso ha da venì subbeto
 Pe te trovvare; e trovarrà Cannacchia;
1330Pocca, ntrà chisto termene,
 Tù a la casa de Cienzo haje da saglire:
 Io, Cannacchia fegnennome,
 Porzì bestuto femmena, à Masone,
 Pe Cilla te darraggio:
1335Tù, da n’autro pontone,
 Cò Cilla puoje fojre;
 Lassanno à mme no gruosso veveraggio.
 TORE
 Ò buono.
 TOLLA
                    À mme non pare...
 Oh Dio...
 LUCCIO
                    Siente: pe mmare
1340Masone hà da fuì. Quanno si’ ghionta
 A la varca co d’isso; tù già saje
 Qual’è la via, che sponta.
 Muode saccio, ca nn’haje:
 Pe manejà la pasta,
1345Non te manca iodizio: e tanto vasta.
 TORE
 Non pò ghì meglio.
 TOLLA
                                      À nuje.
 Fà tù, facite vuje. Mmano a la sciorte
 Schiaffo stà negra vita: ò gusto, ò morte.
 LUCCIO
 Orsù, va saglietenne,
1350E fatte trovà nnordene.
 Nuje porzì ghiammoncenne
 Ad agghiustà lo riesto.
 TOLLA
 Viata Tolla si nce resce à siesto.
 TORE
 Viato Tore, si nce resce à siesto.
 LUCCIO
1355* M’enchio la vorza si nce resce à siesto.
 
 SCENA XXIX
 
 TOLLA sola.
 
 TOLLA
 
 Ammore, tù carrejamo
 Nzino a lo fato mio,
 Saccio, ca lò puoje fà,
 Lo spireto addecrejame,
1360Levame stò golio,
 Famme stà caretà.
 
 SCENA XXX
 
 CIENZO sulo da la casa.
 
 CIENZO
 Si, ca sarraggio Prencepe,
 Mmetammo miezo Napole,
 Ca li denare scioccano!
1365Pe sta notte soperchiano
 Cicia, Pordenzia, e Meneca
 (Che so’ pariente) a fà no scialatorio;
 E appriesso pò farrimmo banchettorio.
 
    Cchiù doce banchetto
1370De Toll’a lo lietto,
 Pe mme no ncè vo’.
 
    Ma, che? Nuje già simmo
 Vicin’à scialare,
 Chè bello frusciare
1375Farrimmo
 Mò mò.
 
 SCENA XXXI
 
 CAPETÀ MASONE stravestuto, CANNACCHIA vestuto femmena, e doje perzune armate.
 
 CAPETÀ MASONE
 Cammina, nzallanuto.
 CANNACCHIA
 Chiano, ca mò me sbraco.
 CAPETÀ MASONE
 Tù, nzomma, haje fatto vuto
1380De stà sempe mbrejaco!
 CANNACCHIA
 Ma si...
 CAPETÀ MASONE
                 Vascia ssà voce.
 CANNACCHIA
                                                La gonnella
 Se nn’era scesa...
 CAPETÀ MASONE
                                  Zitto,
 Che te pozza venì la cacarella.
 CANNACCHIA
 Orsù, non sia pe ditto.
 CAPETÀ MASONE
1385Tù haje ntiso, è haje da fà?
 CANNACCHIA
                                                    No ncè vo’ autro.
 CAPETÀ MASONE
 La porta già st’aperta.
 Cò Salemm’e Beserta (so li nomme de le doje perzune.)
 Io vao dall’autra banna. Tù nchè siente
 Zì, zì, ficcate ad auto,
1390P’ammarrà st’aleviente,
 C’hanno da fà lo trucco.
 CANNACCHIA
                                             T’aggio ntiso.
 CAPETÀ MASONE
 Penza, ca si la sgarre, tù si’ acciso.
 À nuje, sfilammo. Hà da gaudè sto Core,
 Pe’despietto de Tolla, e Cienzo, e Tore.
 
 SCENA XXXII
 
 LUCCIO vestuto femmena, TORE, e CANNACCHIA.
 
 LUCCIO
1395Tù, nch’è fatta la botta,
 Ammarcia pe la via de fore grotta.
 TORE
 Non manca addove ghì.
 CANNACCHIA
                                              * Sento trascorrere.
 LUCCIO
 Resca ò no’resc’a’mammeta,
 Tu nzerta; e de lo riesto lassa correre.
 CANNACCHIA
1400* Me pare Luccio.
 LUCCIO
                                   Cilla già stà ntesa;
 Donca pe’te’non pò sferrà la mpresa.
 CANNACCHIA
 * Iss’è.
 TORE
                Che ombr’è chella?
 LUCCIO
 Sarrà Cannacchia. Zì.
 CANNACCHIA
                                          So’ ccà. Che d’è?
 Tù porzì te si’ fatto femmenella!
 LUCCIO
1405Vasta. Respunn’à mè,
 È benuto l’ammico?
 CANNACCHIA
                                        S’è annascuso
 Dall’autra porta; e mm’hà lassato ll’ordene,
 Che, nzentenno zì, zì che saglia suso.
 LUCCIO
 Priesto, fà scenne mammeta,
1410Nnanze che torna Cienzo.
 TORE
                                                 Mo mm’abbio.
 
 SCENA XXXIII
 
 CANNACCHIA, e LUCCIO
 
 CANNACCHIA
 Oje Luccio, frate mio,
 Vì, che no mme mettisse à quacch’apprietto.
 LUCCIO
 Che buo’? lla’nc’è da vevere, e ngorfire;
 E nc’è porzì lo lietto,
1415Ma no lietto d’azzò, si vuoje dormire.
 CANNACCHIA
 Ò bravo...
 LUCCIO
                     Ll’haje sentuto?
 CANNACCHIA
 Pocca de sete, e famme,
 Ma de suonno, ch’è peo, già so’ speruto.
 
 SCENA XXXIV
 
 TOLLA stravestuta, TORE, e li stisse.
 
 TOLLA
 Luccio. Tolla. Via su’muove sse’gamme. (A Cannacchia.)
1420Priesto, va saglie e’corcate;
 Lass’apierto, non chiudere.
 CANNACCHIA
 Mo me nne vao à fà no buono scampolo. (trase à la casa de Tolla.)
 
 SCENA XXXV
 
 LUCCIO, TOLLA, e TORE.
 
 LUCCIO
 Saglie tu puro, sbricate.
 TOLLA
 Adaso. E Carmosina?
 LUCCIO
1425Chell’apparecchia dint’a la cocina.
 TORE
 Quanno?
 TOLLA
                    Stelle, ajutateme,
 Vuje mbraccia à lo mio bene accompagnateme. (trase à la casa de Cienzo.)
 LUCCIO
 Siente... Vecco lo signo.
 
 SCENA XXXVI
 
 Cienzo da dinto pe’bia, li stisse.
 
 CIENZO
 Bonasera.
 LUCCIO
                      E Cienzo, a’tiempo. Allestate
1430E falla natorale, e de manera,
 Che nce la facce gliottere;
 E pò subeto viene. (saglie a la casa de Cienzo.)
 TORE
                                      È piso mio.
 
 SCENA XXXVII
 
 CIENZO, ch’esce fora, e TORE.
 
 CIENZO
 Notte pe mme felice.
 TORE
                                         Ò mamma, ò Dio.
 CIENZO
 Chi chiagne!
 TORE
                           Addo’ iarraggio?
 CIENZO
1435È Tore!
 TORE
                 Chè farraggio?
 CIENZO
 Tore.
 TORE
             Cienzo.
 CIENZO
                             Che d’è.
 TORE
                                               Curr’, ed ajuta,
 Ca mamma, bene mio, s’è addebboluta.
 CIENZO
 E comme? addove? quanno?
 Ajemmè, veccote Cienzo nzecoloro.
 TORE
1440E disse, mentre ll’uocchie stea smerzanno,
 Chiammate Cienzo mio, nnanze, chè moro.
 CIENZO
 Ò gioja... Aù, che mpiedeco:
 Tiene, si puoje lo chianto.
 TORE
 Va saglie, che io, ntratanto,
1445Corro à chiammà lo miedeco.
 CIENZO
 
 Vengo à morì cò tico,
 Quanno campà non pozzo (Trase Cienzo à la casa de Tolla.)
 Contiento nzino à te.
 
 TORE
 
 È cierto, ca mme sbozzo, (trase Tore a la casa de Cienzo.)
1450Cielo, si chisto ntrico
 Va fuceto pe mè.
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional