| | |
| | |
| | La Cilla, Venezia, per Giovanni Prodotti, s.d. [1707] |
| | a cura di Paologiovanni Maione |
| |
| |
| |
|
| |
| | ATTO TERZO |
| |
| | SCENA I |
| |
| | Notte cò luna, ch’accommenz’ad asci nche fornesce ll’atto secunno. |
| |
| | CIENZO, e CANNACCHIA, mbrejaco, vestuto femmena, da la casa de Tolla. |
| |
| | CIENZO |
| | Che marcanzegna è chesta! |
| | Lassa. |
| | CANNACCHIA |
| | Tù... mm’haje da dà... l’anore mio. |
| | CIENZO |
| | Songh’io, ò non songh’io! |
| 1455 | E puro? |
| | CANNACCHIA |
| | So’ Cienzo, ò so’ ghiacuovo! |
| | Tù si’... |
| | CIENZO |
| | Chiano. |
| | CANNACCHIA |
| | Stà, stà... Già rumpe ll’uovo. |
| | CIENZO |
| | Toll’addov’è? |
| | CANNACCHIA |
| | Na veppeta |
| | de grieco, ò de vernuoteco |
| | Me darria... Uh, che’caudo, ch’è botato. |
| 1460 | Boù. (fà no grutto.) |
| | CIENZO |
| | Che’maje pò dicere, |
| | Si chisto pe nfi all’uocchie stà mpeciato? |
| | CANNACCHIA |
| | Tu non siente tre cicere... |
| | Tienete, ca mo cade... Uh, chè mmallazzo. (cade CANNACCHIA.) |
| | CIENZO |
| 1465 | Te Cienzo: va lo trova: io già so’ pazzo! |
| | CANNACCHIA |
| | T’aggio iettato à primmo. |
| | CIENZO |
| | Vao pe piglià la sassola, |
| | E ncè trovo no maneco de rimmo! |
| | CANNACCHIA |
| | Bò, bù. (fà grutte.) |
| | CIENZO |
| | Tolla ll’haje visto. |
| | CANNACCHIA |
| 1470 | Na nà, na nà, na nà, |
| | Venga vino, cà buono me sà. |
| | CIENZO |
| | Ente varva de stoppa! |
| | Comme mmalora chisto, |
| | E bestuto accossì, dormea ccà ncoppa! |
| 1475 | E Tolla! E comme Tore... |
| | CANNACCHIA |
| | Nò mmuoje vevere? |
| | Te voglio fà no brinnese, |
| | Pruojeme stò fejasco. |
| | CIENZO |
| | Io mo faccio na botta, comm’à masco. |
| 1480 | Dimme, Cannacchia... |
| | CANNACCHIA |
| | Che? |
| | CIENZO |
| | Comme te truove ccà, cò ssà gonnella? |
| | CANNACCHIA |
| | Io... Luccio... |
| | CIENZO |
| | Luccio? |
| | CANNACCHIA |
| | À te... |
| | Auza, Compà, ncè n’autra veppetella. |
| | CIENZO |
| | Luccio! che mbroglia è chesta? Io già sbarejo! |
| 1485 | À Cienzo stò corrivo? |
| | Quanto cchiù la ntornejo |
| | Mpenzanno, che sarrà; manco nce’arrivo! |
| | È machena senz’autro, |
| | E già robba nc’è sotta. Adaso merola, |
| 1490 | Ch’è piso mio de nne caccià lò fraceto. |
| | Uh, che cuorno appontuto: |
| | So’ muorto, no tavuto aggio abbesuogno. |
| | CIENZO, che t’è socciesso? Uh, che sbreguogno. |
| |
| | Uh, chè fanno à chisto core |
| 1495 | Rraggia, Ammore, |
| | E gelosia! |
| |
| | Ò pe collera me sgorgio; |
| | Ò m’aspetta masto Giorgio, |
| | Ca so’ ghiuto già mpazzia. |
| |
| | SCENA II |
| |
| | CANNACCHIA sulo. |
| |
| | CANNACCHIA |
| 1500 | E cuotto... manco mò... |
| | Si’ bivo... Nce lò bò... Priesto fà vela... |
| | Sciaqqua, ca mo s’astuta la cannella. |
| | So’ Turche?... All’arme... abborda, |
| | Datel’a li morfiente... |
| 1505 | Cana, si tù non siente |
| | St’arma, ch’allucca, è signo, ca si’ sorda. |
| |
| | Ò che tara, taratappa |
| | Fa lo stommeco, |
| | Che stà scarreco: |
| 1510 | Nò lo siente. Bà, bò, bù. |
| |
| | Uh, chè scumma, che mme scappa: |
| | Te, mò vommeco, |
| | Ca la panza vo’ cchiù carreco: |
| | Veccotello: où, où. |
| |
| | SCENA III |
| |
| | CAPETÀ MASONE dint’a no vuzzo cò TOLLA, e Marenare. |
| |
| | CAPETÀ MASONE |
| 1515 | Sia nterra. Jo non saccio, |
| | Che smatamorfia è chesta. |
| | TOLLA |
| | Mase mio, |
| | Te preo... |
| | CAPETÀ MASONE |
| | Lassa lo vraccio, ò mo t’accio. |
| | Jatevenne, fegliu’. |
| | TOLLA |
| | Sì, caro, accideme, |
| 1520 | Fà de stà vita mia frecole, frecole, |
| | Nnanze... |
| | CAPETÀ MASONE |
| | Lo Cellevriello è ghiuto à pascere! |
| | Tù comme?... |
| | TOLLA |
| | Ntenneriscete |
| | À stò chianto, à ste lagreme. |
| | À ssi piede mme jetto... |
| | CAPETÀ MASONE |
| | Io resto ammisso! |
| 1525 | Masone, tù si’ isso, ò non si’ isso! |
| | TOLLA |
| | Agge compassejone, |
| | Pe’piatà... |
| | CAPETÀ MASONE |
| | Janarone, |
| | Chesta è fattocchiaria. |
| | TOLLA |
| | Da’refreggerio |
| | À Tolla meserabbele, |
| 1530 | Fà ssò core benigno. |
| | CAPETÀ MASONE |
| | So’ arrevato à la moneca de ligno, |
| | E già sto’pe’trasire à l’Incorabbele! |
| | Ma io vorria sapè... |
| | TOLLA |
| | Oh Dio respunn’a’mme: Soccurso ajutame, |
| 1535 | Ò tù m’accide; ò tanto fuoco astutame. |
| | CAPETÀ MASONE |
| | Orsù, sdigno resuorvete. |
| | À te, perchia schefienzia, |
| | Te donammo la vita; ma dell’autre, |
| | Ch’a’chisto mbruoglio corpa no, |
| 1540 | Nne sarraggio na negra lommenaria, |
| | À sango, a fuoco hanno da ghì pe ll’aria. |
| | TOLLA |
| | Donca cchiù staje, cchiù ntuoste? |
| | CAPETÀ MASONE |
| | N’è carne chesta pe li diente nuoste. |
| | TOLLA |
| | Perro, no nc’è piatà? |
| | CAPETÀ MASONE |
| | Strille’a li gruoje, |
| 1545 | E nce’puoje mette sale quanno vuoje. |
| | TOLLA |
| | Ah, bribante, assassino, |
| | Frustato, malantrino: |
| | Era Tolla bellissema |
| | Quanno m’haje mpapocchiato, |
| 1550 | Quanno tutta larrobba m’haje truffato? |
| | CAPETÀ MASONE |
| | Ente quanta nne vommeca |
| | Stò spetale ncompennio, |
| | Dico: no la vuoje scompere, |
| | Ò mò?... |
| | TOLLA |
| | Vì, che puoje fà, fatt’a’tenere. |
| | CAPETÀ MASONE |
| 1555 | Brutta scirpia, sberressa: |
| | Nzomma, che vò vedere |
| | La mmalora de chiaja, tù si ’essa. |
| | TOLLA |
| | Vuje lo zoffrite, ò Ciele? |
| | Siente, nfammo, crodele: |
| 1560 | Mennett’hà da cercà nnanz’ad Ammore |
| | Stò chianto mio, ch’è sango de stò Core. |
| | CAPETÀ MASONE |
| |
| | Cilla hà da esse mia; |
| | E pe’te, |
| | Vuoje sapè, |
| 1565 | Che nce’vò? |
| | No bello chiappo. |
| |
| | Levate ssà pazzia: |
| | De sciure: |
| | Nò nne addure. |
| 1570 | De rance: |
| | Nò nne mance. |
| | Agghiustate da mò |
| | No’buono tappo. |
| |
| | SCENA IV |
| |
| | TOLLA sola. |
| |
| | TOLLA |
| | Si Ammore, Cielo, Stelle, |
| 1575 | D’ammoruse fracielle, |
| | Facite vuje no nchiasto, |
| | P’arremollà no Core d’uosso masto. |
| | Vuje facite, che’senta |
| | Quacche pietà de me; vuje consolateme, |
| 1580 | Faciteme contenta; ò furmenateme. |
| |
| | Si non campo conzolata, |
| | Nò mme mporta |
| | De lassà stà vita scura. |
| |
| | Ma, crodele, porzì morta |
| 1585 | (Ombr’affritta, e desperata,) |
| | Secutanno te jarraggio; |
| | E a lo’manco te farraggio |
| | Cacà sotta de paura. |
| |
| | SCENA V |
| |
| | TORE co na sciabbola sotta, e LUCCIO co lo vestito de femmena sotta tetilleco. |
| |
| | TORE |
| | Io stà notte me mpenno: |
| 1590 | Chisto è caso de chiappo. |
| | LUCCIO |
| | Io no la ntenno. |
| | E comme, che diaschence |
| | Stive ncatarattato! |
| | TORE |
| | Vuoie, che nne votta quanno nce’so’ nato? |
| | LUCCIO |
| | Io già so’ fato mummia! |
| 1595 | À piedegrotta propio? |
| | TORE |
| | À piedegrotta. |
| | Veo de gente na frotta: |
| | Faccio annasconne Cilla; E chiano, chiano |
| | Vao pe’bedè chi erano; |
| | E becco retomano |
| 1600 | N’autra scoglietta, e beo, ch’era la guardia: |
| | Torno, p’auzà le ghieffole |
| | Pe la via de Posileco; |
| | E non trovo cchiù Cilla (oh Dio ca moro,) |
| | Cilla, la vita mia, lo mio trasoro. |
| | LUCCIO |
| 1605 | Creo, ca se dett’a’correre |
| | Mmedè li pagliarule. |
| | TORE |
| | Accossì creo; |
| | Ma io penzo cchiù peo... |
| | LUCCIO |
| | Zoè? |
| | TORE |
| | Chi sà? Masone, ò quacc’un’autro, |
| | Sì nne ll’hanno zampata. |
| | LUCCIO |
| 1610 | Tù mo farraje vedè lo nfierno apierto. |
| | TORE |
| | E si è cossì, pe’cierto |
| | Ll’averranno schiaffata |
| | Addo’, povero Tore, |
| | Maje cchiù la trovarrà: |
| 1615 | Vì chi pò sopportà tanto dolore. |
| | LUCCIO |
| | Chiss’è schirchio; Cojetate. |
| | Masone stà co’Tolla; e tù gia’saje, |
| | Ca Cilla è de jodizio. |
| | TORE |
| | Ajemmè... |
| | LUCCIO |
| | N’è tiempo de contà cchiù guaje. |
| 1620 | Tù torn’à ghì cercanno; |
| | Ca io vogl’ì spianno, ch’è socciesso. |
| | TORE |
| | Siente: si no la trovo, io moro ciesso. |
| |
| | Si trovo Cilla, aspettame; |
| | Si no, nce’vedarrimmo |
| 1625 | All’autro munno. |
| |
| | Ammore, |
| | Sì, carfettame; |
| | Tù saje, ca poco stimmo |
| | De me taglià stò core |
| 1630 | À tunno, à tunno. |
| |
| | SCENA VI |
| |
| | LUCCIO sulo. |
| |
| | LUCCIO |
| | Si è pe’ stà vota, Luccio, |
| | Rieste comm’a’no ciuccio. |
| | Tu ’n’haje penzato nnanze |
| | Chello, ch’appriesso po’ potea soccedere; |
| 1635 | Vide mo, che nn’avanze; |
| | Sempe le mbroglie hanno da ghir’all’orza, |
| | E chi le’fà, nce resta pe lè torza. |
| |
| | Uh, che guerra de vespune |
| | À st’aurecchie vao sentenno! |
| 1640 | Mbe’ la ntenno: |
| | Brutto signo, già se sà. |
| |
| | De pensiere na vattaglia |
| | Mme fà ncapo: taglia, taglia; |
| | E lo core, e li premmune, |
| 1645 | Uh, che’fanno, nzanetà! |
| |
| | Luccio, te pierde d’anemo |
| | Pe’tanto poco pisemo? Anemale! |
| | Na stezzella de male |
| | T’hà fatto già venì lo parafisemo! |
| 1650 | Che d’è? Fuorze te mancano |
| | Autre’zeppe, autre’noscole, |
| | Pe’mbroglià lo’felato? |
| |
| | SCENA VII |
| |
| | CIENZO co na mazza mmano, da la Casa; e lo stisso. |
| |
| | CIENZO |
| | Ò Cienzo sbregognato! |
| | Va trova che l’hà bisto? |
| | LUCCIO |
| 1655 | Cienzo! Datt’armo. Annasconimmo chisto. (zoè lo vestito de femmena) |
| | CIENZO |
| | Mmalora! Have’da perdere |
| | Na moglier, e na figlia, e ghire mmatola |
| | Votanno, e revotanno! |
| | Vi si lo vuoje cchiù gruosso lo malanno. |
| | LUCCIO |
| 1660 | Che buo’ trovà? Na cufece! |
| | Ma, che? Sì ll’aggio mmano... |
| | CIENZO |
| | Luccio... |
| | LUCCIO |
| | Messere... |
| | CIENZO |
| | Ah, tradetore... (l’afferra ncanna.) |
| | LUCCIO |
| | Chiano... |
| | CIENZO |
| | Caccia mo Tolla, e figliema; |
| | Si no te straveseio. |
| | LUCCIO |
| 1665 | Adaso. Io pe’trovarele, |
| | Hà poco manco n’ora, che ntornejo. |
| | CIENZO |
| | Comme? |
| | LUCCIO |
| | Non saje chi è stato? |
| | CIENZO |
| | Chi? |
| | LUCCIO |
| | Masone. |
| | CIENZO |
| | Masone? Benaggioje! |
| | LUCCIO |
| | Chisto nn’ha’cottejato tutte doje; |
| 1670 | E mmiero Mergoglino... |
| |
| | SCENA VIII |
| |
| | TORE, CILLA, MASONE e li stisse. |
| |
| | TORE |
| | Lassala; ò mo te spacco. |
| | CILLA |
| | Lassa. |
| | CAPETÀ MASONE |
| | Ah, cano. |
| | LUCCIO |
| | Vide lo fatto tujo. |
| | CIENZO |
| | Ah, malantrino. |
| | TORE |
| | Te voglio chianchejà. |
| | CAPETÀ MASONE |
| | Vascia sse mmano. |
| | CILLA |
| | Ajuto, Tata mio. |
| | CIENZO |
| 1675 | Lassamelle chiavà stà mazza ncapo. |
| | TORE |
| | À stà, ca l’accid’io. |
| | LUCCIO |
| | Dammole à stò bribbante. |
| | CAPETÀ MASONE |
| | Orsù, già mm’è sagliuto lo senapo: |
| | Chi mprimmo vo’ morì, se faccia nnante. |
| | TORE |
| 1680 | E, che buo’, che te scorteco? |
| | CILLA |
| | Tore mio, statte ccà. |
| | CAPETÀ MASONE |
| | Saje quanta schiaveche, |
| | E mmano a’cimme d’uommene, |
| | Aggio fatto tremmà? |
| | CIENZO - TORE - LUCCIO |
| | Urre catammaro; |
| 1685 | Ò mò... |
| | CIENZO |
| | Chiano li cuorpe. E Tolla mia? |
| | LUCCIO |
| | Isso nn’hà da dà cunto. |
| | CIENZO |
| | Mo la vommeca. |
| | CAPETÀ MASONE |
| | Ll’aggio lassata mmiezo à chella via. |
| | CIENZO |
| | Non serve... |
| | CAPETÀ MASONE |
| | Orsù, vuje propio |
| | Volite passà à rolla. |
| | CIENZO - TORE - LUCCIO |
| 1690 | À chi? |
| | CILLA |
| | Scompite mò. |
| | CAPETÀ MASONE |
| | Non tanta folla. |
| | Statev’allegramente: |
| | Mò m’è benuto à mente, |
| | Ca sì de tutte vuje faccio no scupolo, |
| | È breogna, è peccato, e nce’aggio scrupolo. (se nne fuje.) |
| | TORE - CIENZO |
| 1695 | Ah, sbafante, potrone, |
| | Mò te la vuoie sentì. (le vann’appriesso.) |
| |
| | SCENA IX |
| |
| | CILLA, LUCCIO. |
| |
| | CILLA |
| | Oh Dio, nò lè fà ghì. |
| | LUCCIO |
| | Che paur’haje si chillo è no squarcione? |
| | Siente: à Cienzo haje da dicere. |
| 1700 | Ch’à te, ed’a Tolla nzemmera |
| | Nne fujeva Masone. |
| | CILLA |
| | Ed’à chè fine? |
| | LUCCIO |
| | Pò senterraje lo riesto: dì accossine. |
| | CILLA |
| | Ah, Luccio, che te pare? |
| | Tutte nce vanno contra li malanne! |
| | LUCCIO |
| 1705 | Non serve à sconfedare, |
| | Ca vene cchiù nn’un’ora, che n’cient’anne. |
| | CILLA |
| | Sciorte, Ammore, na vota scompitela, |
| | Ca stò core cchiù forza non’hà: |
| | Ò stà vita pe sempe acceditela; |
| 1710 | Ò cagnate lo sdigno mpiatà. |
| |
| | SCENA X |
| |
| | CIENZO, TORE, e li stisse. |
| |
| | CIENZO |
| | Lo cano s’è annascuso. |
| | TORE |
| | De st’ommo valeruso, |
| | Truove la valentizia |
| | A la vocca, a le gamme, e a la malizia. |
| | CIENZO |
| 1715 | Tore, m’haje puosto ncuollo |
| | M’obbreco, no presutto. |
| | LUCCIO |
| | Ch’è stato? |
| | TORE |
| | À rumpe cuollo |
| | Ncè squagliato da nanze, lo frabbutto. |
| | LUCCIO |
| | Via saglite; ca nuje |
| 1720 | Iammo Toll’à trovà. |
| | CIENZO |
| | Fremma: pur io |
| | Voglio venì cò buje. |
| | CILLA |
| | No, tata mio, |
| | Restate, ca me sento ascì lo sciato. |
| | CIENZO |
| | Sì... Nò... vengo... mme resto... Io so’ mbrogliato. |
| | TORE |
| | Nuje te la portarrimmo, |
| 1725 | Saglitevenne mò. |
| | CILLA |
| | Tata, saglimmo. |
| | CIENZO |
| |
| | Portatemella, |
| | La popatella |
| | De chisto core. |
| |
| | CILLA |
| |
| | * Ciele, sfrattate, |
| 1730 | * Pe caretate, |
| | * Tanto dolore. |
| |
| | SCENA XI |
| |
| | LUCCIO, e TORE. |
| |
| | LUCCIO |
| | Già nne la carriava? |
| | TORE |
| | Si à tiempo n’arrevava, |
| | Era fatta la festa, |
| 1735 | E me potea spassà co na rapesta. |
| | Ma che? |
| | LUCCIO |
| | Che d’haje? Tù chiagne! |
| | TORE |
| | Aggio paura, |
| | Chè levata non sia l’accoppatura. |
| | LUCCIO |
| | Via, ca chisto è spreposeto. |
| | TORE |
| | Che fuorze non pò essere? |
| | LUCCIO |
| 1740 | E bia, ca tu sbarje; |
| | E non saccio pecché chiagn’e t’affrje! |
| | Dammo à chello, che mporta. |
| | TORE |
| | Che buo’ da’cchiù, stè brache? |
| | Ogne speranza è morta. |
| | LUCCIO |
| 1745 | Bello sciaddeo! Tù subeto te cache. |
| | TORE |
| | Ma, che buo’ fà? |
| | LUCCIO |
| | Vedimmo. |
| | Sempe, chè tiempo avimmo, |
| | Se pò mbroglià n’aserzeto. |
| | TORE |
| | Pe mmè, porzì lò mele è fatt’averzeto. |
| | LUCCIO |
| 1750 | Stà zitto, cacarone. |
| | Chi sà Toll’addo’ stà? |
| | TORE |
| | A la casa starrà sciabbacchejanno, |
| | Ca ll’è benuto curto lo jeppone |
| | LUCCIO |
| | À nnuje. |
| | TORE |
| | Benaggiaguanno! |
| | LUCCIO |
| 1755 | Chè cos’haje? |
| | TORE |
| | Aggio fatto l’appiello. |
| | LUCCIO |
| | Che d’è? |
| | TORE |
| | Chillo giojello, |
| | Chè Cilla me donaje, |
| | Quanno à primmo Masone aggio afferrato, |
| | O m’è caduto; ò isso ll’hà scippato. |
| | LUCCIO |
| 1760 | Da pietto? |
| | TORE |
| | Nzomma, Tore, |
| | Tù no lo siente Ammore, si’ storduto? |
| | Te vo’ muorto; e tù muore, ed haje fornuto. |
| | LUCCIO |
| | Tù subbeto te spuoste, |
| | E nn’haje niente raggione. |
| 1765 | Te pare poco, che le mbroglie noste |
| | Siano iute à colà ncuollo a Masone? |
| | Chist’è no chiaro nnizio |
| | De vencere lo palio; |
| | E pò pe lo giojello faje st’aggrisso! |
| 1770 | Vaa tutto lò male appriesso ad’isso. |
| | TORE |
| | Oh Dio... |
| | LUCCIO |
| | Parlammo a Tolla. |
| | TORE |
| | Tozzoleja. |
| | Tù conzuolo mme daje; |
| | E st’arma cchiù se strobba, e cchiù pena. |
| | LUCCIO |
| | Puoje tozzola’nfi a’craje! |
| 1775 | Chesta no ncè sarrà. |
| | TORE |
| | Nò lò creo. |
| |
| | SCENA XII |
| |
| | TOLLA da la fenesta, e li stisse. |
| |
| | TOLLA |
| | Chi è? |
| | LUCCIO |
| | È Luccio, e Tore. |
| | TOLLA |
| | Ognuno |
| | Se nne vaa da ccà: |
| | Che bolite da me? |
| | Non cannosco nesciuno. Aggio nzavuorio |
| 1780 | Pecché boglio morì, porzì lo cuorio. |
| |
| | Stà vita poco tene, |
| | E corre, à pede fitto, |
| | La morte ad’affrontà. |
| |
| | Si mme volite bene, |
| 1785 | Quanno so’ ghiut’à mitto, |
| | Facitem’atterrà. |
| |
| | SCENA XIII |
| |
| | LUCCIO, e TORE. |
| |
| | LUCCIO |
| | Chesta n’abburla. |
| | TORE |
| | Scinnenne |
| | Stò pò de spina ponteca. |
| | LUCCIO |
| | Priesto, iammo à saglire da lo muro, |
| 1790 | Ca cierto more. |
| | TORE |
| | E’morarraggio io puro. |
| | A DUE |
| |
| | Mo è sopierchio, scajenza mmardetta |
| | Mo si’ troppo, Destino quernuto. |
| |
| | TORE |
| |
| | Che nne dice? Na fossa mm’aspetta: |
| |
| | LUCCIO |
| |
| | Piglia sciato, va chiano, ed aspetta: |
| |
| | TORE |
| |
| 1795 | Vot’e gira, lo tiempo è perduto. |
| |
| | LUCCIO |
| |
| | Vì, ch’ancora n’avimmo perduto. |
| |
| | SCENA XIV |
| |
| | CANNACCHIA sulo. |
| |
| | CANNACCHIA |
| | O Cannacchia scasato, |
| | Va vedenno, addo’ miette li guaje tuoje? |
| | Mmalora! cchiù nne vuoie? |
| 1800 | Lo patrone nzorfato fà roina; |
| | E la trippa vacante t’assassina. |
| | Và fuje, e cò quà gamme, |
| | Sì paro iusto, iusto Notà Chienca? |
| | Ed è tale là famme, |
| 1805 | Che mmè fà ncuorpo peo de mmalatenca. |
| | Tocca, vì, che spettacolo: |
| | Cierto, ca stò a l’allerta pe meracolo. |
| |
| | Mme sento muscio, muscio |
| | Stò ventre poveriello, |
| 1810 | Ch’è propio na piatà. |
| |
| | Cardanno sì non fruscio, |
| | Che mmenchia lo vodiello, |
| | Maje non se pò abbortà. |
| |
| | SCENA XV |
| |
| | CAPETÀ MASONE, e lo stisso. |
| |
| | CAPETÀ MASONE |
| | Le’cose de stà notte |
| 1815 | Vastarriano à schierchià n’ommo d’aurunzo! |
| | Ccà staje? stè belle botte |
| | Se fanno, n’è lo vè, facce de strunzo? |
| | CANNACCHIA |
| | Vasta. Lò ditt’è ditto, |
| | Ed’è fatto lo fatto. Lo Demmonio... |
| | CAPETÀ MASONE |
| 1820 | N’è cossì? Statte zitto: |
| | Viene co mmico a fà stò testemmonio: |
| | Aggia la veretà lo luoco sujo; |
| | Pò scigliete la morte à gusto tujo. |
| | CANNACCHIA |
| | Ma io... |
| | CAPETÀ MASONE |
| | Valla scompenno. |
| 1825 | Io pe mmè, no la ntenno! |
| | CANNACCHIA |
| | * Pegliammo stò pontone. |
| | CAPETÀ MASONE |
| | Mpietto a Tore trovà lo smeraglione, |
| | Che tenea ncuollo figliema! |
| | Povera chierecoccola, |
| 1830 | Vì, si la vuoje cchiù brutta la conessa: |
| | Sarva lè chiancarelle pe na pressa! |
| | Non siente? |
| | CANNACCHIA |
| | Addo’? ch’è stato? |
| | CAPETÀ MASONE |
| | Che puozz’esse squartato; |
| | À l’allerta se dorme? |
| | CANNACCHIA |
| 1835 | À me? chi è lloco? |
| | Io... |
| | CAPETÀ MASONE |
| | No la vuoje sentire? |
| | CANNACCHIA |
| | Gnorsì... so’ ccà... lo suonno fà dormire. |
| | CAPETÀ MASONE |
| | À c’acc’à n’autro poco |
| | Te voglio fà dormir’, accossì buono, |
| 1840 | Che non ce scetarrà manco no truono. |
| | CANNACCHIA |
| | Ma... |
| | CAPETÀ MASONE |
| | Non ghi pepetanno. |
| | CANNACCHIA |
| | Uscia... |
| | CAPETÀ MASONE |
| | No la vuoje scompe; ò mo te scanno? |
| | CANNACCHIA |
| | Appilo. |
| | CAPETÀ MASONE |
| | Haje visto Tore? |
| | CANNACCHIA |
| | Chè saccio: non segnore. |
| | CAPETÀ MASONE |
| 1845 | E Cienzo addo’ sarrà? |
| | CANNACCHIA |
| | Và l’annevina. |
| |
| | SCENA XVI |
| |
| | CIENZO da dinto, e li stisse. |
| |
| | CIENZO |
| | Mo vengo, quant’arrivo à la marina |
| | CANNACCHIA |
| | À tiempo. |
| | CAPETÀ MASONE |
| | Tore? (se spaventa Masone) |
| | CANNACCHIA |
| | Ajebbò. |
| | CAPETÀ MASONE |
| | N’è isso? |
| | CANNACCHIA |
| | Signornò. |
| | Cienzo m’è parz’à mmè. |
| | CAPETÀ MASONE |
| | Fortura soja, |
| 1850 | Ca mo lo facea piezze |
| | CANNACCHIA |
| | * Va te stoja. |
| | CAPETÀ MASONE |
| | Addov’haje ntiso Cienzo? |
| | CANNACCHIA |
| | Ccà dereto. |
| | CAPETÀ MASONE |
| | Iammo à sbroglià stò gliuommaro |
| | Nnanze, che lo neozio veng’à fieto. |
| |
| | Sì non aggio int’a le granfe |
| 1855 | De stò core lo giojello, |
| | Chè maciello; |
| | Che sarrà. |
| |
| | CANNACCHIA |
| |
| | * Co ssò naso de vattaglio, |
| | * N’appelaglio |
| 1860 | * A lè caranse, |
| | * È lo cchiù, che le puoje fà. |
| |
| | SCENA XVII |
| |
| | CILLA da la fenesta. |
| |
| | CILLA |
| |
| | Stò voccone, cchiù se mazzeca, |
| | Cchiù a lò gliottere me ntorza: |
| | E la pena, che mme scazzeca, |
| 1865 | Me fà chiagnere pe forza. |
| |
| | SCENA XVIII |
| |
| | TORE, LUCCIO, e TOLLA da la casa soja; e la stessa. |
| |
| | TORE |
| | Va saglietenne suso. |
| | LUCCIO |
| | Tolla, non te ncoccià. |
| | TOLLA |
| | Cossì’è concruso. |
| | LUCCIO |
| | Stà lo carro a la scesa; |
| | E tù ll’ugne le’rote? |
| | TOLLA |
| 1870 | Ll’aggio d’accide propio; |
| | E pò voglio esse mpesa ciento vote. |
| | CILLA |
| | Chest’è Tolla. |
| | TORE |
| | Cojetate. |
| | CILLA |
| | E’stà cò Luccio, e Tore. |
| | LUCCIO |
| | Nc’è speranza, |
| | Si faje comme dich’io. |
| | TOLLA |
| 1875 | Schitto affanno nce’avanza. |
| | CILLA |
| | Chè sarrà maje! |
| | TOLLA |
| | Cossì hà da esse... oh Dio, |
| | Tanta forz’addov’è? |
| | Viata ll’arma de chi accid’amme. |
| | TORE |
| | È Cilla chella? |
| | LUCCIO |
| | È essa. |
| | CILLA |
| 1880 | Tore mio... |
| | TORE |
| | Cilla. |
| | TOLLA |
| | All’utemo |
| | Saccio buono, che fà, mm’accido io stessa. |
| | CILLA |
| | Ch’è stato? |
| | LUCCIO |
| | E, che bo’ essere: |
| | Chiù nc’ajutammo à tessere, |
| | Cchiù la tela se guasta. |
| | CILLA - TORE |
| 1885 | Tore |
| | Non pozzo cchiù: ll’arma se scrasta. |
| | Cilla |
| | TOLLA |
| 1885 | È Cilla? Ah, fore, ogne confuorto è grimmo: |
| | Accedimmonce ntierzo, e la fornimmo. |
| | TORE |
| | Che d’è stò mal’agurio? |
| | TOLLA |
| | E, ca spiere, che faje? |
| | È lesto: nce puoje dà cò no sciamarro. |
| | TORE |
| 1890 | Bella, tù comme staje? |
| | CILLA |
| | Tiranno, comm’à buje, stò nigro carro. |
| | LUCCIO |
| | Cienzo, che fà? |
| | CILLA |
| | Mo è sciso pe mannare |
| | Le Tartane a’pescare. |
| | TORE |
| | Mò sarria tiempo. |
| | CILLA |
| | Aspetta, ca mo scenno, |
| 1895 | E fuimmo correnno. |
| | LUCCIO |
| | Via sù nò ntrattenite. |
| | E Tolla? |
| | CILLA |
| | Tolla s’averrà pacienzia. |
| | TOLLA |
| | Facite, che bolite, |
| | Ca pe mme già stà fatta la settenzia. (se nne và.) |
| | (Mentre se dice st’aria, CILLA se và allestenno pe fuì; e LUCCIO porzì trase pe sollecetare.) |
| | TORE |
| |
| 1900 | No lo guastà stò nzierto, |
| | Adaqquancillo tù, |
| | Piatuso Ammore. |
| |
| | Ò sciorte, a’Ciel’apierto, |
| | Non fa chiovere cchiù |
| 1905 | Tanta mmalore. |
| |
| | SCENA XIX |
| |
| | CAPETÀ MASONE, CIENZO, e CANNACCHIA da dinto; E pò fora; TORE, CILLA, che tanno vo’ ascire; e LUCCIO. |
| |
| | CAPETÀ MASONE |
| | Haje besuogno cchiù prova? |
| | CIENZO |
| | Già so’ fatto capace. |
| | LUCCIO |
| | Siente stà bella nova. |
| | TORE |
| | Te, mietteme à lo naso la vammace. |
| | CILLA |
| 1910 | Che d’è? (CILLA se ne torna suso, e se mett’à la fenesta.) |
| | LUCCIO |
| | Cienzo, e Masone; annasconnimmonce, |
| | Simmo scopiert’à ramma. |
| | TORE |
| | Hà ditto buono mamma, |
| | Scompimmola na vota, ed’accedimmonce. (Mo escono.) |
| | CIENZO |
| | Non serve autra descorpa. |
| 1915 | Lo sio’ Luccio ste mbroglie? |
| | CAPETÀ MASONE - CANNACCHIA |
| | Isso nce corpa. |
| | CIENZO |
| | E porzì Tolla, e Tore? |
| | CAPETÀ MASONE |
| | Tutte tre ll’hanno fatta. |
| | CANNACCHIA |
| | Si segnore. |
| | CIENZO |
| | Già figliema è la toja; |
| | E a’chiss’autre mbrogliune |
| 1920 | Lè boglio fà frustà. |
| | CANNACCHIA |
| | Facc’io lò boja. |
| | CAPETÀ MASONE |
| | Che buo’? chisse l’accido à scoppolune. |
| | CILLA - TORE - LUCCIO |
| | Meglio la vuoje sentire? |
| | Nò ncè speranza cchiù. |
| | LUCCIO |
| | Iamm’a fuire. |
| | CILLA - TORE |
| | Iamm’à morire. |
| |
| | SCENA XX |
| |
| | CIENZO, CAPETÀ MASONE, e CANNACCHIA. |
| |
| | CIENZO |
| 1925 | Volimmo fà lo nguadejo, |
| | Ch’è lesta la fegliola? |
| | CAPETÀ MASONE |
| | Pò lò farrimmo craje; |
| | Ca mo nc’è no vervece a la cognola... |
| | Vasta. |
| | CIENZO |
| | Ed io nn’aggio n’autro. |
| | CAPETÀ MASONE |
| 1930 | Ma puro? |
| | CIENZO |
| | E tù, che d’haje? |
| | CAPETÀ MASONE |
| | Chesta smeraglia, |
| | Che tenea mpietto Tore, |
| | Hà muoppeto à stà capo na vattaglia. |
| | CIENZO |
| | Vi, che non facce’arrore: |
| | Chest’è de Cilla. |
| | CAPETÀ MASONE |
| | E comme (oh Dio) spalefeca. |
| 1935 | Essa addo’ ll’hav’avuta? |
| | CIENZO |
| | * Che sarrà! |
| | CANNACCHIA |
| | * Che scajenza ll’è benuta! |
| | CIENZO |
| | Chesta è propio la toja? |
| | CAPETÀ MASONE |
| | Gnorsì. Pe premmio |
| | Me la dette n’Corcovia |
| 1940 | Carlo cinco, bon anema. |
| | Tienemente sta zifera: |
| | Chesta dice: Masone scannapapara; |
| | E n’cuollo stea attaccata |
| | A na fegliola mia. |
| 1945 | Che ghiusto a la Marina de Foria |
| | Da li Turche nne fuje zeppolejata, |
| | Nziemme co la notriccia. |
| | CIENZO |
| | Ò provedenzia |
| | De lo Cielo benigno! |
| | CANNACCHIA |
| | * Che bo’ essere! |
| | CAPETÀ MASONE |
| | Spapura, che buoje dicere? |
| | CIENZO |
| 1950 | Cierto, ca Cilla è figlieta. |
| | CAPETÀ MASONE |
| | Bene mio! |
| | CIENZO |
| | Da quant’hà, che la perdiste? |
| | CAPETÀ MASONE |
| | Già songo sidec’anne. |
| | CIENZO |
| | È essa propio. |
| | CAPETÀ MASONE |
| | Ma tu comme ll’aviste? và contanno. |
| | CIENZO |
| | Mentre steva pescanno |
| 1955 | A la chiaja Rommana; na matina, |
| | Veo mmiero la marina |
| | Na cosa, che mme parze no catavero: |
| | Vao, co quatto palate, |
| | E trovo (nzanetate) |
| 1960 | Na negra giovenella, |
| | Tutta chiena de sango, chè moreva; |
| | E azzicco ad essa veo na pecceorella, |
| | Coll’uocchie russe, rasse, che chiagneva. |
| | Autro dire non potte... |
| | CAPETÀ MASONE |
| 1965 | Secoteja. |
| | CIENZO |
| | Ca la notte, |
| | Quanno lo breantino, |
| | Che nne la carrejava, |
| | Dette nterra a far acqua lla’becino; |
| | Essa, pecché penzava |
| 1970 | De se sarvà, da proda se jettaje, |
| | À no scuoglio mmestette; |
| | E ncuorpo, pe lo butto, se crepaje, |
| | E co lo sango nfine, |
| | Che da vocca l’ascette, |
| 1975 | Fece ll’arma porzì sette carrine. |
| | Morta, che fuje, la scura, |
| | Da lo sango affocata, |
| | Le diette sebetura; E pò pigliaje |
| | La nenna, che stea tutt’ammatontata, |
| 1980 | E sta chelleta ncuollo le trovaje. |
| | Da tanno, comm’a figlia, |
| | Pe sempe la scresciette. |
| | CAPETÀ MASONE |
| | Mmiezo à tanta delliette |
| | Già chest’arma squaquiglia. |
| | CANNACCHIA |
| | Io mo strasecolo! |
| | CAPETÀ MASONE |
| 1985 | Dimme, avesse sta giovana, |
| | Vicino a lo vellicolo, |
| | Nò njeo, quanto no cecere? |
| | CIENZO |
| | Lo tene. |
| | CAPETÀ MASONE |
| | Ò figlia grazejosa, |
| | Non senza chè te volea tanto bene. |
| | CANNACCHIA |
| 1990 | Va penza cchiù à magna. Vide, che vene. |
| | CAPETÀ MASONE |
| |
| | Ò, ch’allegrezza, |
| | Che contentezza, |
| | Nzicco nzacco lo Cielo mme dà! |
| |
| | Iammo priesto, saglimmo, |
| 1995 | Corrimmo, |
| | Ca sto core cchiù abbiento non hà. |
| |
| | SCENA XXI |
| |
| | LUCCIO, e li stisse. |
| |
| | LUCCIO |
| | Ajuto, gente, ajuto, |
| | Ca Cilla dinto maro s’è ghiettata. |
| | CAPETÀ MASONE |
| | Ch’e stato? Ajemmè so’ ghiuto. |
| 2000 | Mo la trovo, e la perdo: oh’sciorte sgrata. |
| | CIENZO |
| | Curre, ajutala tù, |
| | Ca veo Tolla venì. |
| | CANNACCHIA |
| | Nce nne so’ cchiù? |
| |
| | SCENA XXII |
| |
| | TOLLA, e CIENZO. |
| |
| | TOLLA |
| | Cienzo, che terannia! |
| | Manco pe gli a’morì trovo la via. |
| | CIENZO |
| 2005 | Tolla. |
| | TOLLA |
| | Che d’è? |
| | CIENZO |
| | Parlammo nconfedenzia, |
| | E cride, ca t’è utele. |
| | TOLLA |
| | Di ll’autro. |
| | CIENZO |
| | Tù deciste, |
| | Ca Tore non t’è figlio: addo’ ll’aviste? |
| | TOLLA |
| | E tù, che nne vuoje fà? |
| | CIENZO |
| | Priesto, forniscela, |
| 2010 | Ch’aggio no cierto nnizio, |
| | Ca Tore è figlio mio. |
| | Dimme la veretà. |
| | TOLLA |
| | Mo te dich’io. |
| | À Gajeta na femmena, |
| | Ch’avea nomme Grannizia, |
| 2015 | Co lo marito Pruocolo, |
| | Vint’ann’arreto, avevano |
| | No peccerillo, ch’era già smammato... |
| | CIENZO |
| | Grannizia! Ah potta d’oje, t’aggio pescato. |
| | TOLLA |
| | Chist’à mme lo lassajeno |
| 2020 | Pe ghir’a Romma; e dinto Sciummecino, |
| | Pecché pò s’annegajeno, |
| | Perzò mme rommanette lo mammino. |
| | CIENZO |
| | Justo, e bero iodizio |
| | Fò de lo Cielo, pocca da la connola |
| 2025 | Na sera l’arrobbajeno, |
| | E maje cchiù nn’appe nova. |
| | TOLLA |
| | Si mbe st’arma se trova, |
| | De guaje, d’affanne chiena, |
| | Porzì gusto nne sente. |
| | CIENZO |
| 2030 | Va responnenno; E statt’allegramente. |
| | Tenea chesta catena |
| | Ncuollo lo peccerillo? |
| | TOLLA |
| | Chesta propio. |
| | CIENZO |
| | Ò figlio de stè bisciole, |
| | Gioja mia, sango mio. Ed’a lo vugueto |
| 2035 | De lo vraccio deritto |
| | Stà no golio de cotena? |
| | TOLLA |
| | Ll’have. |
| | CIENZO |
| | Ò, che gusto! ò figlio beneditto. |
| | TOLLA |
| | Chessa chi te l’hà data? |
| | CIENZO |
| | Tore à Cilla la dette; |
| 2040 | E Cilla s’è trovata, |
| | Ch’è figlia de Masone. |
| | TOLLA |
| | Affè! me mmaceno, |
| | Che sia chella fegliola, che perdette. |
| | CIENZO |
| | Ed è curzo de furia |
| | Pe l’ajutà, ca s’è gliettat’à maro. |
| | TOLLA |
| 2045 | Scur’essa! sarrà morta. |
| | CIENZO |
| | Non saccio. Ò figlio caro... |
| | Dimm’à mme; stamm’à chello, che cchiù mporta. |
| |
| | Addov’è lo figlio bello |
| | Lo giojello |
| 2050 | De lo Tata? |
| |
| | Chiammamillo, |
| | Portamillo, |
| | Pe le fare n’abbracciata. |
| |
| | SCENA XXIII |
| |
| | CANNACCHIA, e li stisse. |
| |
| | CANNACCHIA |
| | Che chioppeta de sfunnole, |
| 2055 | È chesta de stà notte! À tiempo curre, |
| | Curre priesto, e seccurre, |
| | Ca figlieto mo more. |
| | CIENZO - TOLLA |
| | Comm’è stato? |
| | CANNACCHIA |
| | Na botta de cortiello s’hà chiavato. |
| | CIENZO |
| | Addo? |
| | CANNACCHIA |
| | Ccà nnanze. |
| | CIENZO |
| | Ò figlio, e che desgrazia... |
| 2060 | Ò figlio... |
| | TOLLA |
| | Ò Tore. |
| | A DUE |
| | E ch’allegrezza nzuonno. |
| | CANNACCHIA |
| | Cienzo, che ncentra! All’utemo |
| | Morerraggio io porzì de famm’, e suonno. |
| |
| | SCENA XXIV |
| |
| | LUCCIO, e MASONE, che porta CILLA addebboluta mbraccia. |
| |
| | LUCCIO |
| | È chiusa ll’autra porta. |
| | Iammo à saglì da ccà. |
| | CAPETÀ MASONE |
| | Ò figlia, ò cara. |
| 2065 | Figlia, si tù si morta, |
| | Iarrimmo tutte duje ncopp’à na vara. |
| | CILLA |
| | Ah. |
| | LUCCIO |
| | Zitto, allegramente. |
| | CAPETÀ MASONE |
| | Figlia. |
| | LUCCIO |
| | Già se resente a la bon’ora. |
| | CAPETÀ MASONE |
| | Vide lo Tata tujo. |
| | LUCCIO |
| | Vi Luccio. |
| | CILLA |
| | Ò Dio. |
| 2070 | Addov’è Tore mio? so’ biv’ancora! |
| | Comme! chi è chisto? lassame, |
| | Lassame. seccorriteme. |
| | CAPETÀ MASONE |
| | Statte, tù me si’ figlia. |
| | LUCCIO |
| | Chist’è pateto. |
| | CILLA |
| | Non te canosco, abbjate. |
| | LUCCIO |
| | Accossì è? |
| | CILLA |
| 2075 | Gnornò, ch’è trademiento. |
| | CAPETÀ MASONE |
| | Sì, figlia, ch’è lo vero. Oh, che contiento. |
| | LUCCIO |
| | Mo tutt’haje da sentire... |
| |
| | SCENA UTEMA |
| |
| | CIENZO, che porta TORE abbracciato, TOLLA, CANNACCHIA, e li stisse. |
| |
| | CIENZO |
| | Figlio mio. |
| | TORE |
| | Tata. |
| | CAPETÀ MASONE |
| | È Cienzo. |
| | LUCCIO |
| | E porzì Tore. |
| | TORE |
| | Si Cilla è morta, lassame morire. |
| | CILLA |
| 2080 | Tore mio addo sta? |
| | CIENZO |
| | Vecco Cilla, sta’ccà. |
| | CILLA |
| | Tata... |
| | CIENZO |
| | Nò, Core, |
| | Masone è tata tujo. |
| | CILLA |
| | Comme pò essere! |
| | CAPETÀ MASONE |
| | Ll’haje ntiso mò? |
| | CIENZO |
| | Tant’è. |
| | CAPETÀ MASONE |
| | Figlia docissema.. |
| | CILLA |
| 2085 | Tata core de st’anema. |
| | CIENZO |
| | E Tor’è figlio mio. |
| | LUCCIO - CARNACCHIA |
| | Chist’è ncantisemo! |
| | TOLLA |
| | Vì, che smorfia de stelle! |
| | CAPETÀ MASONE |
| | Cierto, ca nn’aggio sfizio; E la feruta? |
| | CIENZO |
| | N’è niente, pocc’è ghiuta pelle, pelle. |
| | CILLA |
| 2090 | Che feruta? mo moro. |
| | Chi è stato? Vita mia, doce trasoro. |
| | TORE |
| | N’è niente vita mia, doce trasoro. |
| | CIENZO |
| | E a te chi t’hà sarvato? |
| | CILLA |
| | Che’saccio. |
| | CAPETÀ MASONE |
| | Luccio è stato. |
| | CIENZO |
| | Manco male, |
| 2095 | Ca si’ franco de terze, e capetale. |
| | Pecche te si’ ghiettata? |
| | CILLA |
| | N’ammante desperata, |
| | Cchiù campà non poteva. |
| | TORE |
| | Ed io porzì pe’chesto m’accedeva. |
| | CIENZO |
| 2100 | Orsù, nuje, ca facimmo? |
| | Non vì, ca chist’abbrusciano? |
| | CAPETÀ MASONE |
| | L’allegrezza compimmo, |
| | E stampammolo mò lo matremmonio. |
| | CAPETÀ MASONE - CIENZO |
| | Via sù le mmano. A la bon’ora sia. |
| | CILLA - TOLLA |
| 2105 | Confuorto de sto Core, anema mia. |
| | LUCCIO - CANNACCHIA |
| | Che guste a la ntrasatta! |
| | TOLLA |
| | E Tolla è catenaccio, e crepa, e <...>irtta. |
| | CAPETÀ MASONE |
| | Chi è? |
| | CIENZO |
| | Povera Tolla. Io la renunzio, |
| | Ca l’ammore de figliemo, |
| 2110 | Hà bint’ogn’autro ammore. |
| | CAPETÀ MASONE |
| | Tolla accostate. |
| | Confesso, ca t’aggiobbreco: |
| | Ca’cca: Me si’ mogliere: allegra, sciala. |
| | TOLLA |
| | Fatone mio dellietto, |
| | Tu mme daje li contiente co’la pala. |
| | LUCCIO |
| 2115 | Chi maje lo credarria! |
| | CANNACCHIA |
| | Sguazzarraje panza mia, co lo banchetto. |
| | TUTTE |
| | Ò docizze, ò contiente, |
| | Pene viate, e fortunate stiente. |
| |
| | Chillo mmale, ch’a ll’ommo da trivole, |
| 2120 | Cierte bote no’mmene pe’nocere, |
| | Ca lò rreto contiento se fà. |
| |
| | Si li nfrusce non songo cocivole, |
| | Co la freoma lassatele cocere, |
| | Ca po’ cuotte so’ duc’à magnà. |
| |
| | SCOMPETURA. |
| |
| |
| |
| |
| |
| |
| |
| |
| |
| |
| |
| |
| |
| |
| |
| |
| |
