Lo corzaro

Lo corzaro, Napoli, Agnolo Vocola, 1726

a cura di Ferdinando De Rosa

paratesto ATTO PRIMO ATTO SECONDO ATTO TERZO Apparato

LO CORZARO

Commeddia pe mmuseca da rappresentarese a lo Teatro nuovo ncoppa Toleto st’Autunno de st’Anno 1726. Addedecata a lo Llostriss. Ed Accellentiss. Segnore, lo Segnore Conte Alberto D’Althann Nepote de Sò Amenenza, lo Segnore Cardenale Michele Federico d’Althann, Vecerré, e Capetanio Generale de sto Regno. Napole P’Agnolo Vocola, Da chi se despenzano a la Libraria soja a Fontana Medina.

Llostrissemo, ed Accellentissemo Segnore.

Sto povero Corzaro, che era schiavo de li More, vedennose scappato da le mmano lloro, se vene a ghiettà a li piede de V. Ac. pe sopprecarla de benegna protezzione a la libertà soja, a la quale è tornato dapo’ la schiavetù de muto tempo, che l’hà fatto passare chello, che maje se credeva. E sapenno quanto V. Ac. sia generosa, e pietosa nziemo co li sfortonate, nce vene allegramente, e co na certa speranza, che sarrà asauduto co farlo stare sotta l’ombra de lo nomme vuosto tanto grolejuso, e respettato, e de potere accossì addecrearese no poco, e scontarese a sso bello frisco lo tanto caudo, c’hà patuto Mmarvaria; e quanno maje non potesse recevere sta grazia, perché fuorze no la mmereta, de staresenne co la lebertà soja, ve suppreca a tenerlo a lo mmanco comme schiavo, ch’è tutto uno pe isso, pocca no strascinarà cchiù catene de fierro postele da Patrune cane, ma se vedarrà guarnuto de catene d’oro, quale sonco li gran mierete de V. Ac., che non le faranno parere d’essere schiavo,e servarrà no Patrone tanto magnanemo, e benigno, che se trovarrà contentissimo de sta sciorte soja. Segnore Ac. io ne ll’haggio assecurato de chesto, e pe signo d’azzò venco io puro ad appresentarevello co chillo respetto, e rreverenza, che devo a tale Personaggio, sopprecandove a no fareme sto scuorno de dire no, azzò le gente, e lo Corzaro stisso non me facciano le ffico all’uocchie, e me diano la quatra, si me, vedessero tornare friddo, e ghielato arrasso sia comm’a no puorro sciccato da dint’a la neve. E co chesto ve faccio no melione de ncrine, e me protesto nzi’ all’utemo selluzzo.

De V. Ac.

Nap. 2. Ottobre 1726.

Omeliss.devotiss. ed obbregatiss. Servitore. Giaseppo de Sia Mpresario.

Antecedente de la Commeddia.

Pippo, e Loisa, perzune assaje bone nate, e ricche, d’Isca, s’amavano nfra lloro comme ll’Arma, e lo cuorpo; e sapenno Pippo, che lo Patre de Loisa l’haveva prommesa a n’auto, e concrusa la parentezza, pe desperato se mette ncoppa a na varca, c’assarpava da Isca, co Ciommo fedato sujo, e se dà a correre fortuna, pe no mmedere la nnammorata soja mpotere d’auto. Quanno sonco nn’auto mare, so’ pigliate da doje Galeotte de no Renegato Algerino, che tenennose li Schiave, e la rrobba, sfonna la varca, e la lassa a mmare; e chesta canosciuta a li contrasigne fa credere, ca s’era annegata. Jutane la nova ad Isca, Loisa n’happe tanto dolore, che ne stije pe mmorire; e si be’ la scappaje, rommase no mperò tanto malaticcia, che pe no piezzo, e piezzo non se parlaje de matremmonio; e nfra chisto tiempo essennole muorto lo Patre, e po chillo; che se l’haveva da pigliare, a pregarie de la mamma, e de li pariente, dapo di anne, se cala a pigliarese pe mmarito Luccio, parente de Pippo; e se danno schitto le pparole pe nzi’ che Lloisa no rrecupera ntutto la salute.

Nfra tanto Pippo, fatto schiavo; steva nn’Algiere, e non sulo lo Renegato le mese tutto lo genio sujo, ma Zoraida, che ll’era figlia, se ne nnammoraje a mmorte, e no nce lassajeno carizze pe ffarelo renegare, ma isso sempe stette costante. All’utemo la figliola, mmeziata da na vecchia mora, fegnette e se lamentaje co lo Patre, ca Pippo l’haveva vasata a fforza, e tentata de farle dessonore. Nfra li Maumettane nc’è na legge, che si no Crestiano è trovato nfallo co na femmena lloro, o hà da renegare, o morire; e pe chesto Pippo, pe scampà la pelle, fegnije de renegare; e lo Patrone co lo tiempo le deze la libertà, e la figlia pe mogliere, mettennole nome Selimmo. Ma isso havennola nn’odio pe chello, che l’havea fatto, e perché amava Loisa, no lo voze toccà maje; anze venuto lo tiempo d’ascire ncurzo, trovannose lo Renegato già biecchio, e male accietto, isso se mese a mmare co le galeotte pe n’havere attuorno la mogliere. Chesta mperò gelosa d’isso, fidatase co n’auto Renegato, chiammato Moratto, vestutase da ommo, s’annascose dinto a la Galeotta, che cchillo commannava pe ghì appriesso a Selimmo, e bedè che ffaceva. Ma chisto, quanno foje nn’auto mare, e a llibertà soja, le venne desederio de vedè lo Pajese sujo, e d’havè nova de Loisa; e perzò pigliato lo viento pe Isca, ng’arriva, e nce sbarca na matina all’Arba; e da lo sbarco sujo accommenza la Commeddia. Chello, che ne soccede, lo leggiarraje, si ng’haje pacienza; e si no, statte buono; Si nce fosse carcuno, che se maravegliasse de sentì parlà Talejano; o Torchisco Calavrese sti Corzare, po sparagnà no tornese, che nce vo’ p’ammolà la fuorfece, perché so’ Rrenegate Taliane chille, che parlano. Le pparole, Sciorte, destino &c. me protesto de dirle p’aosanza poetica; ma nquanto a lo ccredere so’ Ccrestiano Cattoleco Romano, e be vaso le mmano.

Le Pperzune de la Commeddia.

PIPPO, nnammorato de Loisa, creduto muorto, sotta nomme de Selimmo, Capo Corzaro Algerino.

La Sia Giovanna Pozzi vertovosa de l’Accelentiss. Signora Prencepessa Struoncolo Pegnatiello

LOISA, nnammorata primmo de Pippo, e po affidata co Luccio.

La Sia Angiola Cianchi, vertovosa de l’Accel. Segnore Priore Vainer.

ZORAIDA, Mora Algerina nguadiata a Selimmo.

La Sia Ceccia Grieco.

LUCCIO, Gentelommo d’Isca, affidato co Lloisa.

Lo Sio Francisco Tolve.

MORATTO, Renegato Algerino, nnammorato segreto de Zoraida.

Lo Sio Francisco Ciampi.

DIANA, Vedola, mamma de Cecilia.

Lo Sio Dommineco Francescone.

CECILIA, Creata de Loisa.

La Sia Laurella Monte.

CIOMMO, Fidato de Pippo finto Renegato, sotta nomme de Carababá.

Lo Sio Giovanne Romaniello.

COMPARZE.

CORZARE pe Selimmo, e pe Zoraida

Compagnia de Crestiane pe Luccio

Duje Create pe Lloisa

Duje Armizere pe Diana.

LA SCENA,

Na parte dell’Isola d’Isca co la Cetà da lontano.