Lo corzaro

Lo corzaro, Napoli, Agnolo Vocola, 1726

a cura di Ferdinando De Rosa

paratesto ATTO PRIMO ATTO SECONDO ATTO TERZO Apparato

ATTO PRIMMO

SCENA PRIMMA

Campagna, che termena a mmare, mprospettiva parte dell’Isola, e Città d’Isca nn’auto, doje Galeotte Varvaresche; de poppa dereto a no scuoglietiello da do’ sbarcano li corzare, e po SELIMMO, e CARABABÀ.

SELIMMO

Già simmo ad Isca; priesto fa trasire

Nnante, che schiara juorno

Sti Corzare llà ddinto a chella grotta;

Ma che stiano segrete.

CARABABÀ

Haver sentuto? (a li Corzare.)

Trasir llá ddinto, e llà morir de subbeto;

Non parlar, star cojeto,

Manco fomare, ca scoprire fieto. (se ne traseno li Corzare.)

SCENA II

ZORAIDA, che scenne da na Galeotta, e li stisse.

SELIMMO

Fortuna può fa cchiù?

CARABABÀ

Ched’è Si Pippo?

Vuje chiagnite, e perché?

SELIMMO

Chiagno, ca vedo

La terra, addo’ so’ nnato,

Ma nce venco da schiavo renegato.

Vedo llà chella casa, addove stace

Chi fu la causa de lo mmale mio;

Chella, che m’hà da dare ogge la morte,

Si no mm’ajuta pe pietà la sciorte.

CARABABÀ

E mo’ volite fare sto sciabbacco?

Mo’ c’ascimmo da guaje co ghire ad Isca?

SELIMMO

A fa che?

CARABABÀ

A trovà lo sanco nuosto,

A piglià gente p’acciarrà sti more.

SELIMMO

Ma chi me dà la libertà a lo core?

Ah Ciommo, s’io non haggio

Lisa mia, pe chi fui fatto schiavo,

Non escarraggio maje da le ccatene

Nzi’ che la morte a romperle no mmene.

CARABABÀ

E bolite fa schiava la Sia Lisa?

SELIMMO

Schiava no? ma la voglio mmano mia.

CARABABÀ

E mogliereta?

SELIMMO

Quale?

CARABABÀ

Comme quale;

Zorajeda. c’haje lassato Mmarvaria.

SELIMMO

Che mogliere? Si’ pazzo?

Chi l’hà manco toccato no capillo.

CARABABÀ

Ma te ll’haje nguadiata.

SELIMMO

Oh, c’haggio finto

Pe mme salvare, tu non saje la storia?

ZORAIDA

(Aimmè, che sento!)

CARABABÀ

Io pato de marmoria.

E si Lisa pe sciorte è mmaretata?

SELIMMO

Ah ccane, no mme fa sto malaurio,

Ca si è socciesso, io me jetto a mmare.

CARABABÀ

Non sia pe ditto; mo’ che s’hà da fare?

SELIMMO

Ancappammo quarcuno, pe ssapere

Do’ se trova Loisa pe pigliarla.

CARABABÀ

Comme vole Ossoria (che brutto ntrico!)

ZORAIDA

(Ah tradetore, tu haje da fa co mmico.)

SELIMMO

Sta speranza sola sola

M’ha la vita mantenuta,

Ca si no forria scomputa

Nfra li stiente da quant’hà.

P’havè mmano sta fegliola

Tanta guorfe haggio passato;

Si no ll’haggio, desperato

Cca me voglio sotterrà. (se ne trase.)

CARABABÀ

Non è tristo penziero pe no pazzo,

O maro te, ca vae a ll’Incorabole,

E nce vaje co la posta, e la trommetta;

Vi quanto fa na femmena mmardetta.

Si vuo’ mannare

N’ommo a rroina,

Fallo ncappare

Co na guaguina,

Ch’è arte soja

De l’arrotà.

Scialabalì, scialabalà

Chi no lo ccrede, lo ppozza provà.

Lo poveriello,

Non troppo passa,

Che lo cerviello

Primmo nce lassa;

La rrobba appriesso;

Po more ciesso

Nfra ciento mbroglie;

Nzi’, che se scioglie,

Mmano a lo boja,

Semp’hà da sta,

Scialabalì, scialabalà,

Tann’è lo bello a bederlo sbroffà.

SCENA III

ZORAIDA sola.

ZORAIDA

O Zoraida traduta

Chesta mbroglia haje sentuta, e cca non muore

De vregogna, e ddolore?

Che ffaccio? si me scopro, me fa schiava;

Si torno a Mmarvaria, so’ zanniata

Pe bedola, pe zita, e mmaretata.

L’accido? e co Selimmo

Pozz’essere crodele?

Ah ch’è lo core mio, si be’ nfedele.

Meglio sarrà, si pozzo,

Che lo porta ad Algiere, ca po tanno

Che sta mpotere mio lo tradetore,

Farraggio quanto vo’ lo sdigno, o amore.

Si tanno lo sgrato

Canosce l’arrore.

Si chiagne, e se pente,

Pò dint’a sto core

Trovare pietà.

Ma si l’ostinato

Co mmico è ccrodele,

Nfra mille tormiente

Chell’arma nfedele

Le faccio sciccà. (saglie a la Galeotta.)

SCENA IV

Voschetto.

LOISA, e CECILIA.

LOISA

Comme pozzo st’allegra

Cecilia mia, si de notte, e ghiuorno

Me stace nnant’all’uocchie

L’ombra de Pippo mio, che me renfaccia.

100

L’ammore sujo, e sempe m’ammenaccia?

CECILIA

Ma ca vuje v’accedite

A ppenzarece sempe, che n’havite?

LOISA

Me conzolo a lo mmanco

Co la memoria soja.

CECILIA

E mo’ arrevate

105

Co sta mammoria a ppuorto;

Nce conzola lo vivo, e no lo muorto.

Signora mia penzate a lo Sio Luccio,

Che fa lo cuollo luonco, e st’aspettare;

Che ve sanate, pe ve nguadiare.

LOISA

110

Oddio Cecilia, no mme dire chesto,

Ca me daje cchiù tormiento.

CECILIA

Janca mene,

Ch’è chesto, che ddecite? e pecchè fine

L’havite prommettuto nguadiarlo?

LOISA

Pe dà gusto a chi vo’ la morte mia.

CECILIA

115

Comm’a ddi’? lo Sio Luccio non è bello?

N’è pparo vuosto?

LOISA

Sì.

CECILIA

Pe buje no squaglia?

LOISA

Troppo è lo vero; ma che buo’, che faccia?

Si quanno penzo ad isso, vene Pippo,

No mme ce fa penzare, e lo descaccia.

CECILIA

120

Addonca no mmolite nguadiarlo?

LOISA

Sì, me lo nguadio.

CECILIA

E quanno?

LOISA

Nche sto bona.

CECILIA

Ma de sto muodo maje starrite bona.

LOISA

Farraggio quanto pozzo; jammoncenne

A piglià no po’ d’aria a la marina,

125

Va chiamma sti create.

CECILIA

Mo’ ve servo;

Eh Signora, sentite, è bona ll’aria,

Ma è cchiù mmeglio lo stare allegramente.

Co lo marito rente;

No nce perdite tiempo, ch’è pazzia;

130

Si fosse ncausa mia, c’haggi’auta scola,

Sopportà no mmoria sta cannavola.

Si la Sciorte me lo manna

No marito geniale,

Nche me vole, e m’addimmanna

135

Non nce metto troppo sale,

Priesto, e tristo dico sì.

Già se sa, ca nuje volimmo

No morzillo de marito;

Chille squase, che facimmo

140

P’azzettare lo partito.

Mara me me piglio scuorno,

Leva, le’, po n’auto juorno

Io non saccio, che bo’ di’.

SCENA V

LOISA, e po LUCCIO.

LOISA

Core mio commattuto

145

Da no vivo, e no muorto, c’haje da fare

Pe poterte quietare?

LUCCIO

Segnora, ve so’ schiavo.

LOISA

Oh cca buje site

Sio Luccio!

LUCCIO

Addove jate.

LOISA

A sta marina;

Me commannate niente?

LUCCIO

Io commannarve?

150

Ah Sia Loisa è troppo

Farme morire, e dareme la burla.

LOISA

Io dà la burla? e comme?

LUCCIO

E no ve pare,

Che sia burla lo ddi’, ch’io ve commanna,

Quanno non pozzo mmeretare ancora

155

D’esserve servetore? Oddio penzate,

Che sso’ quase di anne, che me strudo

Aspettanno chell’ora, che ng’aonisca

Co ffede de marito e de mogliere;

Ma chest’ora maje vene,

160

E stentà me facite nfra ste ppene.

LOISA

Cierto ve compatesco, perché saccio

Ca l’amore è ddolore;

Ma vuje non compatite

A mme, ca non sapite

165

Quanto cchiù granne sia

D’ogn’auta pena chesta pena mia.

LUCCIO

Comm’a dire? io non v’amo? e si decite,

C’amore sia dolore,

Io c’amo cchiù de vuje, de vuje cchiù ppato.

LOISA

170

Ma comme io so’, non site desperato.

LUCCIO

Vuie desperata? e comme?

S’io v’amo, e buje decite, ca m’amate,

Comme pò no sperare?

LOISA

Ah Luccio, no me ntienne; io t’amo, è bero,

175

Ma no mmo da sto core

Ascì lo primm’amore.

Pippo maje no mme lassa; isso contrasta

Le ccontentezze toje;

Si be’ muorto, pò cchiù che tu non puoje.

LUCCIO

180

E quanno scumpe, o sciorte?

M’hanno da tormentà porzì li muorte?

Cara bellezza mia, l’haje chianto troppo,

Mo già tiempo sarria,

Che disse luoco a la speranza mia.

LOISA

185

Sì, Luccio, lo starraggio quanno pozzo;

Nche sto mmeglio, e chest’arma s’è quietata

Vedarraje quanto t’amo, e te so’ grata.

LUCCIO

Oddio, ca sta prommessa cchiù m’accide,

Perché de lo mmorire è ppeo cchiù assaje

190

Sperare sempe, e non gaudere maje.

O non cride, ch’io t’adoro,

O no mmide sti tormiente,

Ma si po tu cride, e bide

Non haje core, e n’haje pietà.

195

Ah tiranna, io pe tte moro;

Pe tte strillo, e no mme siente,

E mme faje cchiù desperà.

SCENA VI

LOISA, e po CECILIA co dduje create.

LOISA

Addove si’ figliola?

CECILIA

Eccoce ccane.

LOISA

Jammoncenne.

CECILIA

200

So’ llesta, ne Signora

Che v’ha dditto lo zito?

LOISA

Via tu n’auta

Havisse quarche ghionta

Da metter’a lo piso

De li travaglie mieje?

CECILIA

Uh ched’havite?

205

C’havessemo da ì trevolejanno

Ciccione pe la via?...

LOISA

Oddio Cecilia,

Siente sto ventariello? saje chi è chisto?

CECILIA

Chi vo’ essere? è biento.

LOISA

None none,

No lo canusce tu, lo canosch’io.

CECILIA

210

E si n’è biento, è cucco.

LOISA

E Pippo mio.

Sì, te sento attuorno a mmene,

Ombra cara, ombra bella,

Che me viene

A conzolà.

215

Si no mmo’ nemmica stella,

Ch’io te veda faccia a ffaccia,

Mo’ te stregno nfra ste braccia,

E te voglio sempr’amà. (trase.)

CECILIA

Faje buono, strigne forte, che no scappa;

220

Ah à, che rrisa, vo’ abbraccià lo viento!

Chesta è n’auta pazzia arcepazzia

Si vuo’ abbracciare, abbraccia uh che derria.

SCENA VII

DIANA secotata da CARABABÀ, e duje Corzare.

DIANA

Ah sbentorata mene, ah gente, ah gente.

CARABABÀ

Star zitta cula nigra, no strellare,

225

Ca pe mmiezo spaccare.

DIANA

Aimmè so’ mmorta.

Papasto mio, non cacciare storta.

CARABABÀ

(Oh fortuna, e che beo chesta è Diana,

Me nce voglio piglià no po’ de gusto.)

N’haver baura, dire veretate

230

Come sciamar?

DIANA

Paolella.

CARABABÀ

Ditto boscia, tu sciamar Diana;

Bresto calar cucussa,

Ca voler dar sciablata.

DIANA

Ah negramene,

Non far bellezza mia, ca si tu dare,

235

Fascir spaccata, e cchiù no mmaretare.

CARABABÀ

Borché ditto boscia?

DIANA

Gioja mia bella,

Nani’, ditto boscia.

CARABABÀ

Eh, ch’io sapere

Comme sciamare tu, star negromante;

Berdonar chesta vota. Dove stare

240

Sesilia, figlia tuja?

Ch’io voler bor mogliere.

DIANA

(Uh che nnante te vatta mmala sera)

Non haver figlie femme, Segnore,

Ma sulo pescencrille,

245

E tutta quanta stare mascolille.

CARABABÀ

Tutta quanta star mascola?

DIANA

Gnorsine,

E havere brammolella.

CARABABÀ

E n’haver femmene?

DIANA

Gnornò.

CARABABÀ

Diabla nigra, bresto bresto

Calar cucussa, ca mo’ dar sciablata,

250

Facire ttiffe; e ttuffe capo nterra.

DIANA

(Facire ttuffe lo piello, che t’afferra.)

Segnur, sentir raggiune.

CARABABÀ

Non sentire;

Tu star bosciarda, via venir co mmico.

DIANA

Non portar gioja mia,

255

Star femmena norata, e meza vecchia,

Né haver facenna co forapellecchia.

CARABABÀ

(Vi’ chi se vole ncancarì co chesta?)

Si no benire strascenare.

DIANA

Chiano

Sentir parola; vuje comme chiammare?

CARABABÀ

260

Carababà.

DIANA

Sia co nzalute, siente

Si baccalá mio bello,

Aspettar n’auto juorno,

Quante me faccio ncuollo na colata;

Ca mo’, facce mia bella, so’ allordata.

CARABABÀ

265

(Io mo schiatto de risa) tu abborlare;

Compagne, strascenare.

DIANA

Ah negramene; (li corzare l’afferrano.)

Non terar, non terar, ca mo’ venire.

CARABABÀ

Far bresto.

DIANA

Haggio li calle, adaso adaso;

Ah sciorte cana, e chì l’havesse ditto (repeteja.)

270

D’essere schiava, e non potè vedere

Manco le gente meje, e dirle addio.

O Isca, o casarella, o figlia mia,

Mo’ vago a guardà quicquere ntorchia.

Segnor, no accadire,

275

C’haver sette figlie,

Star quant’a coniglie;

Si mamma morire,

Razzolle che far?

CARABABÀ

Magnare, e dormire,

280

Dormire, e magnar.

DIANA

Star vedola sola,

N’haver che magnare,

Star chiena de zelle,

Vennuto caudare,

285

Gratiglie, tielle,

Coperte, lenzola,

Mpegnato lettera,

E quanno star sera

A paglia corcar.

CARABABÀ

290

Dormir cchiù cenera,

Né pimmece far.

SCENA VIII

Campagna.

ZORAIDA, e MORATTO co aute corzare da la Galeotta.

MORATTO

Non t’affrijere cchiù, scumpe sso chianto,

Ca me trapasse l’arma; no mmuo’ auto,

Che bide nfra di ora

295

Selimmo acciso?

ZORAIDA

Acciso? no, lo voglio

Vivo mpotere mio, e ncatenato;

Mo’ se vede, Moratto,

Si me vuo’ bene, e pienze a lo ben fatto.

MORATTO

(Ah ca chesta m’accide co chill’uocchie.)

ZORAIDA

300

Recordate, ca Patremo

Da Schiavo te facette Capitanio

De chesta Galeotta; e penza puro

Ca pe benire appriesso a chillo sgrato,

Haggio l’onore mio a tte fidato.

MORATTO

305

No nzerve arrecordarme

L’obbreco mio; me vasta

Pe fareme morì nzervizio tujo,

Ca figliolella mbraccia a mme si’ stata,

E ca t’haggio guardata

310

Nzi’ che fuste zetella de marito;

E si maje no mmeneva

Selimmo Mmarvaria,

Chi sape c’auta cosa mo’ sarria.

ZORAIDA

Lo ffatto è fatto, accossì steva Ncielo.

315

Venimmo a lo remmedio. A chella grotta

So’ li Corzare, e da ccattuorno è isso,

Tu va llà ddinto, e machena co chille,

Ca nfra tanto co chiste io vao cercanno,

E chi primmo lo trova, che l’ancappa;

320

A buordo lo portammo,

Facimmo vela, e Mmarvaria tornammo.

MORATTO

Mo’ volo pe servirte.

ZORAIDA

Eh sie’... Moratto,

Si tu lo truove, no lo straziare,

Vasta, che me lo puorte, e penza tanno

325

Ca Selimmo sonch’io,

Ch’isso è lo core mio.

MORATTO

Sì, Signora.

No le tocco no pilo; e si pe sciorta

Se mettesse ndefesa?

ZORAIDA

Non sia maje.

MORATTO

Ma si lo ffa, che ffaccio?

ZORAIDA

Aimmè che ddico? (penza.)

330

Trattalo da nnemico No Moratto

Lassalo j.

MORATTO

Ma chillo se ne fuje,

E restammo corrive tutte duje.

ZORAIDA

Che penzo? che ddico?

Che ffaccio? che boglio?

Salvà no nemmico

335

Lo sdigno no mmo’;

Stracciarme lo core

Amore non pò;

O sciorte, a che mbruoglio

Me trovo pe tte.

340

Non saccio che fare;

Che serve a ppenzare?

Si campa, si more,

Pe mme cchiù no nc’e;

Va curre, va vide,

345

Fa chello, che ppuoje;

Si vuoje tu l’accide,

Ma scanna po a mme.

SCENA IX

MORATTO co no Corzaro che rresta.

MORATTO

Va, va, ch’è piso mio

Levarte da sso ntrico. Oh che ffortuna

350

Me chiove nzino, ch’io no la penzava.

Selimmo co benire Mmarvaria

Zoraida me levaje; io cca l’accido

Co scusa d’ancapparlo;

Me piglio la mogliere, e faccia Amore,

355

Sciorte non pò mancare a chi have core.

No nzerve a ghì a la grotta, haggio Sceriffo, (azzenna lo Corzaro,)

Trovammo ad isso nnanze che lo trova

Zoraida, e mo’ facimmo chesta prova.

Desperata gelosia

Che stracciato m’hai lo core,

360

Damme tuosseco, e forore

Pe poterme vennecà

E tu scusa o bella mia

Si te ncanno, e so’ crodele;

Perché t’amo so’ nfedele;

365

E chi ama tutto fa.

SCENA X

SELIMMO, e DIANA.

SELIMMO

Sciorte mia, ca tu primmo

Me si’ benuta mmano p’ajutarme;

Comme te stea decenno, nchè ssentije,

Ca Loisa se steva mmaretanno,

370

Pe ddesperato me mettette a mmare;

Fuje fatto schiavo.

DIANA

E nuje nce credettemo.

Ch’jere muorto annegato, arrassosia;

Ma perché no screviste a lo paese,

P’essere rescattato?

SELIMMO

375

M’haveva nn’odio, ed era desperato.

DIANA

Sta pazzia, che faciste figlio mio,

Poco nce voze, c’accedea Loisa,

Da tanno sempe ha chianto, e sta malata.

SELIMMO

S’è mmaretata?

DIANA

No, ma st’affedata

380

Co no parente tujo.

SELIMMO

Co chi?

DIANA

Co Luccio

SELIMMO

Oh Diana, n’é chella, che cca bene

Da coppa a chella scesa?

DIANA

Chell’è essa,

E Luccio l’accompagna.

SELIMMO

O Cielo, o sciorte

Io te rengrazio; addove si’ tu n’auto.

SCENA XI

CARABABÀ, e li stisse.

SELIMMO

385

Carababà?

CARABABÀ

Segno’.

SELIMMO

Priesto, fa mettere

Li corzare agguattate a chesta sepa.

DIANA

Pippo mio, vi’ che faje co ssi maumme,

Ca nc’è figliema puro, ch’è Zetella.

CARABABÀ

N’haver baura, ca portar ntorchia,

390

Donare a gran Segnor, fascir Soldana,

E tu stare a serraglio pe bammana. (trase.)

DIANA

E tu puozze figlià pe lo vellicolo,

Ca te venco a llevare de pericolo.

Pippo, tu no rrespunne?

SELIMMO

Sto penzanno,

395

Che faccio co Lloisa, ch’è affidata,

E co Lluccio porzì, che m’è parente.

DIANA

Cchiù becine haje li diente, nche ll’haje mmano,

Nguadiatella de botta, pe no mettere

La sanetate toja ncostejune;

400

Amore no mmo’ legge, e nno raggiune.

Siente cca: lo nnammorato

Quann’è troppo respettuso,

Maje ng’arriva a lo designo:

Ma si è llesto, e presentuso,

405

Esce priesto da lo mpigno,

E se pote contentà.

Co l’ammore n’abbesogna

D’esse friddo, e spepetato,

Ma nce vo’ destrezza, e pietto;

410

Ca non sape ch’è breogna,

Non se ntenne de respetto,

E creanza poco nn’hà.

SELIMMO

Già so’ becine, curre, cca parlammo;

E chello, ch’è lo mmeglio conzertammo.

SCENA XII

LUCCIO, che dà lo vraccio a LOISA, CECILIA, e duje create.

LUCCIO

415

Sedimmoce a no scuoglio, e ddescorrimmo.

LOISA

Uh Si Luccio, che bedo?

Doje galeotte nterra.

LUCCIO

Non è niente.

LOISA

Chi sa, si so’ ccorzare? jammoncenne.

LUCCIO

Vedimmo meglio.

LOISA

No.

CECILIA

Ched’haje Segnora?

420

Non se magnano femmene ntorchia.

Ma sento ca nce fanno mercanzia.

LUCCIO

Jammo, Signora, pe sta via cchiù corta.

SCENA XIII

CARABABÀ, po SELIMMO co li Corzare, e li stisse.

CARABABÀ

Ciaurra no mover.

LOISA

Oddio, so’ mmorta. (s’addebbolesce mbraccia a Luccio.)

CECILIA

Ah mamma mia, ch’è chesto?

CARABABÀ

425

Compagne attuorno.

SELIMMO

No mmover Cristiane,

Ca star schiave.

LUCCIO

Signore pe pietate

Ajutammo sta giovane, ca more.

SELIMMO

N’haver baura, c’ajutar, Figliola

Pigliar patrona mbraccia.

CECILIA

Mo’ Signore.

430

Si Luccio dalla cca, Signore Turco,

Haver pietà de nuje, non ammazzare,

Si voler per mogliere, tu pigliare.

CARABABÀ

(Chesta si l’annevina,

Nzomma vo’ fare ll’uovo agne gallina.)

LUCCIO

435

(O Cielo, chest’appriesso ad esse schiavo?)

Cecilia mia allascale lo busto.

CECILIA

Zitto ca mo’ revene.

LOISA

O sciorte sgrata,

Io schiava? ah negrame, che nce so’ nnata.

SELIMMO

(Chi pò tenè lo chianto a ttale vista?

440

E m’è forza de fegnere.)

LOISA

Ne Luccio,

Cheste so’ le ccatene,

Co cche nce stregne Amore?

Tu senza libertà, io senza onore.

SELIMMO

No baura d’onore, stare allegra. (a Loisa.)

LUCCIO

445

Signore, pe pietà, si la desgrazia

Nc’ha fatto schiave, no nce strapazzare,

Pe rescattarece havimmo oro, e ddenare.

SELIMMO

Io donar libertà senza rescatto; (azzenna Loisa.)

Andar tutte, e restar chesta co mmico.

LUCCIO

450

Chesta! e perché.

SELIMMO

Perché piacer, volere.

LUCCIO

Signore, m’è mogliere; e si tu maje

Sentiste amore, e mpietto ng’haje pietate,

No nce spartì, ca tutte duje ng’accide.

SELIMMO

Borché sentire Amore, e haver pietate,

455

Dar core ad essa, e a tte dar libertate,

Andare, andar Cristiano.

LUCCIO

Oddio.

LOISA

Signore

CARABABÀ

Star zitto co mmalora,

Ca si chisto nfomare,

Mo’ tutte duje mpalare.

LOISA

Ahi Cielo.

LUCCIO

Ahi sciorte.

LOISA

460

Te prego pe pietà.

LUCCIO - LOISA

Damme la morte.

SELIMMO

Non sentir cciù pparola; andar Cristiano (a Luccio che le vo’ parlare.)

Si no, mannare a buordo, e ncatenare;

Bella venir co mme.

LOISA

Signore

SELIMMO

Alzare.

LOISA

No mme parto da sti piede, (s’addenocchiano.)

LUCCIO

465

O ng’accide tutte duje

LOISA - LUCCIO

O nce daje la libertà.

SELIMMO

(Vi’ c’amore, vi’ che fede!) (le fa sosire.)

Tu partite. (a Luccio.) Tu venire. (a Loise.)

LOISA - LUCCIO

E de nuje non haje pietà?

SELIMMO

470

(Ah ca moro de pietà.)

LUCCIO

Lisa?

LOISA

Luccio.

LOISA - LUCCIO

Che farrimmo?

LOISA

Campa tu, vav’io a morire.

LUCCIO

Rent’a tte vogli’io morire.

SELIMMO

(Core mio no nce scoprimmo.)

LUCCIO

475

Ah tiranno. (Luccio vo’ caccià la spata, e Loisa lo tene.)

LOISA

Ferma Oddio,

Ca si’ acciso.

SELIMMO

Andar connio

Ca star pazzo, e non sapire.

Bor te, bella Siniurella

Donar vita, e libertà.

LUCCIO

480

Lisa.

LOISA

Luccio?

LOISA - LUCCIO

Addio, chi sa. (Selimmo se porta Loisa a la geleotta, e Luccio se parte desperato.)

SCENA XIV

CARABABÀ che ferma CECILIA.

CARABABÀ

Fermar, fermar Seniura, dov’andare?

CECILIA

Addo’ me piace, che boler Maumma?

CARABABÀ

Ddo’ piascer? tu star schiava.

CECILIA

Patrone tujo dato libertate.

CARABABÀ

485

Ma non dat’io, tu stare schiava mia.

CECILIA

Ah Si Luccio, si Luccio?

CARABABÀ

No strellare,

Pescencrella mia bella,

Ch’io voler bene, e non passar sta sera

Che pigliar bor mogliera.

CECILIA

A me mogliere?

490

Non magniar mosciomao, Papasso mio;

Nzorar paese tujo.

CARABABÀ

Sentir Seniura,

Benire a galeotta, ca mostrare

Sgioje, perne, e coralle, e tutta tutta

A tte voler donare.

CECILIA

495

Rengrazio Uscia; non gabbar compare.

CARABABÀ

Gabbare? e chi potere gabbar femmena?

Tu canoscire a me.

CECILIA

Starraje mpazzuto,

Addove, e quanno maje t’haggio veduto?

CARABABÀ

Vedere nfacce, e veder buono a occe.

CECILIA

500

(Me pare c’há na nfanzia de Ciommo;

Ma chillo è muorto a mmare; oh fosse vivo.)

CARABABÀ

Manco mo’ canoscir, Sesilia mia.

CECILIA

(Mara me, chisto sa lo nomme mio;

Sarrà qua’ ffattocchiaro) co chi ll’haje,

505

No mme chiammo Cecilia, vavattenne.

CARABABÀ

Aha, mi canoscer, tu star Sesilia,

Visto libro magia, e llà trovato

C’haver Bossinioria fatto amore

Co baisaniello tuo sciamato Ciommo.

CECILIA

510

(Janca me quanto sape) haje fatto arrore

Ciommo non saccio, e maje facette amore.

CARABABÀ

Tu star bosciarda, io sapere tutto.

CECILIA

E sto Ciommo chi è?

CARABABÀ

Star sgioveniello

Che tu credire muorto, ma star schiavo;

515

E si a chillo volire,

Fascir fattura, e bresto cca venire.

CECILIA

Lo bolesse lo Cielo e fosse vero.

CARABABÀ

Star vero, sgioja mia, mo’ mmo’ vedere.

CECILIA

Tu me gabbe.

CARABABÀ

Guallà, mi no gabbare.

CECILIA

520

Sincheme galant’ommo.

CARABABÀ

Fata, bellezza mia, io sonco Ciommo.

CECILIA

Tu si’ Ciommo?

CARABABÀ

Io so’ Ciommo.

CECILIA

O core mio.

SCENA ULTEMA.

DIANA, e li stisse.

DIANA

Uh negra me, che bedo! ah ccana perra.

Co li schiave porzì ncommerzione?

525

Mo’ te voglio scannare.

CECILIA

Ajuta Ciommo.

CARABABÀ

(Lassa fa a mmene, de’ ca non t’è mamma.)

Che diabla voler veccia mmalura? (a Diana.)

DIANA

Comme che boglio? arrajeso mmarditto.

Chesta m’è figlia.

CARABABÀ

Star mogliere mia.

DIANA

530

Che mmogliere, e smogliere? fuss’acciso.

Passa cca renegata.

CECILIA

Tu chi sine?

DIANA

Comme chi sonco? a mammeta chi sine?

CECILIA

Bella femmena mia non te canosco?

DIANA

No mme canusce? ah ppresentosa aspetta,

535

Te voglio stravesare co chest’ogna. (Va pe l’afferrare, e Carababà caccia la sciabola, e Diana fuje.)

CARABABÀ

Non toccar mammalà ca grattar rogna.

Venir mogliere mia a galeotta.

DIANA

Ah ccana addove vaje? no nce ire,

Ca si no te mmardico a zizze storte.

CECILIA

540

Schiavo sia mamma.

CARABABÀ

Far quarera a Corte. (Carababà se piglia pe la mano Cecilia, e co la sciabola ammenaccia Diana, che nce la vo’ levare.)

DIANA

Va figlia mmardetta,

Te gliotta sto mare.

CECILIA

No cchiù, no strellare

Cajazza, cevetta.

DIANA

545

Te veda sbattuta

De facce a no scuoglio.

CARABABÀ

Star uoglio, star uoglio.

CECILIA

Va duorme storduta.

DIANA

Ah razza de cana.

CARABABÀ

550

Sonare campana

E fascire ntintò.

A DUE

Ntintò.

DIANA

A mme lo ntintò?

Vogli esse adacciata

Cca propio mmalora.

CECILIA

555

Tu si’ speretata,

Vattenne a bonora.

CARABABÀ

Andar co Diabla,

Si sciabla jocare,

Tagliare scartello. (la votta, e cade.)

DIANA

560

Aimmè so’ ccaduta.

CECILIA

Mo’ sì ll’haje scomputa.

CARABABÀ

Soser bello bello,

E bedimmoce po.

DIANA

So’ mmorta.

CARABABÀ - CECILIA

Nce vo’.