Lo corzaro

Lo corzaro, Napoli, Agnolo Vocola, 1726

a cura di Ferdinando De Rosa

paratesto ATTO PRIMO ATTO SECONDO ATTO TERZO Apparato

ATTO TIERZO

SCENA PRIMMA

Voschetto.

LOISA co duje create, e DIANA.

LOISA

Viene co mmico t’haggio ditto.

DIANA

E ncoccia,

Voglio ancappare figliema, e po venco.

LOISA

1135

Ca po la truove appriesso.

DIANA

Uh negra mene,

Ca sta co Ciommo, e nce pò esse danno.

LOISA

No lo ccredo ca Ciommo è accreanzato,

Cecilia è bona figlia;

Ma si po soccedesse, se la piglia.

DIANA

1140

Io no mmoglio sta a chesto,

Ca si figliema s’hà da mmaretare

Lo sciore mmocca, e mpietto hà da portare.

LOISA

Zitto zi’, ca lo porta, che ccos’haje?

DIANA

Ah sia Loisa, tu non saje li guaje.

1145

Lo ffuoco, e la paglia

No mmuo’, che s’allumma?

Lo cane, e la quaglia

No mmuo’, che la piglia?

Ah figlia

1150

È pazzia

A crederlo mo’.

È l’ommo sfacciato,

L’amore conzumma,

La femmena cede;

1155

Chi manco se crede,

De musso ng’hà dato;

Io peggio farria

Mantiene si puo’. (se ne va correnno.)

SCENA II

LOISA, e po CARABABÀ.

LOISA

Viene cca, viene cca; vi’ comme corre!

1160

Vaga connio, si no mmo’ venire:

Jarraggio sola pe tentà la sciorte,

Che mmaje ne pò venì cchiù de la morte?

CARABABÀ

Ncaforchiate llà dinto, ca mo’ torno, (da dinto.)

Quanto scopro pajese.

LOISA

O manco male,

1165

Ciommo?

CARABABÀ

Chi è lloco? uh cca buje state! e comme

No ve mettite nzarvo?

LOISA

Vao cercanno

De liberare Pippo; jammo.

CARABABÀ

Addove?

LOISA

Addo’ Zoraida.

CARABABÀ

E che bolite fare?

LOISA

Le voglio appresentare

1170

Tutte le gioje meje pe lo rescatto.

CARABABÀ

Nce perdimmo la juta, ca la Mora

Vo’ marito, e no gioje; ne tene tanta,

Che non se crede; ed ama tanto Pippo,

Che cchiù priesto darria n’uocchio, o no vraccio,

1175

Che darne no pelillo de mostaccio.

LOISA

Ma tentammo, chi sa?

CARABABÀ

Comme volite.

SCENA III

CECILIA, e li stisse.

CECILIA

Quanno te sbrighe, quanno? uh la Signora!

E comme state cca, Signora mia:

E chillo bauglietto da do’ è asciuto? (azzenna no bauglietto, che tene no creato.)

LOISA

1180

Lo so’ ghiuto a pigliare a lo casino

Pe rescattare Pippo, vide Ciommo,

Si venessero gente.

CARABABÀ

Mo’ ve servo. (trase.)

LOISA

Tiene chisto Cecilia, quanto ll’apro; (Piglia lo bauglietto da lo creato, lo dà a Cecilia, e ll’apre.)

Vi’ che mme vene nnante!

1185

N’aniello de diamante fatt’a core,

Che pe signo d’amore

Pippo mio me donaje;

Nce volea st’allecuordo a chiste guaje. (chiagne.)

CECILIA

E bia mo’ non chiagnite, ca lo Cielo,

1190

Sperammo, che v’ajuta: e bivo Pippo,

Nce sonco cheste gioje, e sti denare,

Chiste ve ponno d’agne guajo levare.

La scajenza é la mia, ca so’ ppezzente,

E non tenco stipata,

1195

Carcosa, ca sarria mmaretata.

LOISA

Tu sempe pienze a chesto, maratene,

Ma non pienze a lo piso, a le schiattiglie

De lo marito: e po non saje chi piglie.

CECILIA

De chesto me ne rido, che l’havesse,

1200

Ca be’ nce penzarria,

De saperlo portare a boglia mia.

Na femmena bella,

Si hà muodo si hà grazia,

Te pò co no dito

1205

Sbotà lo marito:

E si have ntelletto,

Lo tene a sticchetto,

Lo sa cravaccà.

Si chillo pe sciorta

1210

Qua’ bota la strazia,

Sta zitto, sopporta.

Se fa na moscella,

Ma po nce la renne:

Chi ntenne, me ntenne

1215

No nzerve a parlà.

SCENA IV

CARABABÀ, e li stisse.

CARABABÀ

Signora, da llá bbascio a chesta via

Vedo venire gente, e si no sgarro,

So’ Mmore.

CECILIA

Ah mare nuje,

Signora, e tu te staje? fuje, fuje.

CARABABÀ

1220

Stanno lontano assaje, non c’è paura,

Jammoncenne pe cca! no ve movite?

Sia Lisa, che ffacite?

LOISA

Stea ncantata

A bedè st’arrecuordo

De chi pe ppena mia maje no me scordo.

1225

Bello core de diamante,

Tu me muste chillo core,

Tutte fede, e tutt’amore,

Ch’è costante

Cchiù de te.

1230

Io te vaso, e tutt’affetto

Mo’ te metto a chisto dito,

Pe ttenerte meglio aonito,

Te vorria mpiett’a mme. (trase.)

CECILIA

Oddio, ca me ne porta la paura.

CARABABÀ

1235

Sempe che staje co mmico, staje secura.

SCENA V

MORATTO co SELIMMO, e LUCCIO ncatenate miezo a li Corzare.

MORATTO

Cca ve manna Zoraida, che decite,

Si state p’obbedirla, o cca morite.

Conzegliateve priesto, ch’io ntratanto

Passejo no poco, jateve sbriganno

1240

(E tu mostrame, Amore, quarche ncanno.) (trase.)

LUCCIO

Pippo?

SELIMMO

Luccio?

LUCCIO

Che pienze?

SELIMMO

Che rresuolve?

LUCCIO

Da te ssulo depenne

De tutte duje la sciorte,

E la vita, e la morte.

SELIMMO

Ah nigro mene,

1245

No mmasta lo dolore

De perdere Loisa co la vita;

Haggio chest’aura pena da sentire,

Che tu pe causa mia haje da morire.

LUCCIO

Si te spiace, ch’io mora, puoje salvareme;

1250

Nguadia Zoraida, ciede a la Fortuna.

SELIMMO

Io nguadià na Mora? io na nnemmica?

LUCCIO

Ma te sarrà, cagnanno legge, amica.

SELIMMO

A Mmore cride?

LUCCIO

E si lo ffa.

SELIMMO

Lo ffaccia;

Si cagna legge, io non cagno core.

LUCCIO

1255

Donca morimmo.

A DUE

Oh sbentorato amore!

SELIMMO

Luccio, si maje potesse

Mille vote morì nzervizio tujo,

Mo’ propio lo ffarria, ma non pozzo;

Tenco na vita sola, e pe Lloisa

1260

Cca perdere la voglio; Si tu vuoje

Salvate comme puoje.

LUCCIO

Che ppotere, e bolere vaje decenno?

Troppo cirche da me; pe liberarte

Me trovo nfra li More, sto a li guaie,

1265

E buoje, ch’io mora? Vi’ che grazia nn’haje.

MORATTO

Ve site resolute?

LUCCIO

Sì, Moratto,

Famme portà a Zoraida

Ca la voglio obbedire.

MORATTO

E tu che ddice?

SELIMMO

Resto cca pe mmorire.

MORATTO

1270

Olà, portate chisto addò Zoraida. (azzenna Luccio.)

E chist’auto strozzate.

LUCCIO

Ah no Moratto,

Aspetta nzi’, ch’io torno.

MORATTO

N’haggio st’ordene.

LUCCIO

Oddio, che ffaccio? Ah Pippo, vuoje ch’io mora?

SELIMMO

No ferma, venco io puro; ah no, che dico?

1275

Va, ch’io moro, ed ascimmo da sto ntrico.

LUCCIO

Si tu cirche ostinato morire,

Io me voglio nnocente salvare,

Lamentare de me non te può.

Ah ca ll’arma me sento spartire;

1280

Mo’ me resto e ca resto, che ffaccio?

Si m’adaccio, c’ajuto le do?

SCENA VI

MORATTO, e SELIMMO.

MORATTO

(M’è benuta jocata già la palla,

Mora Selimmo nnante che Zoraida

Se penta, e lo perdona) su strozzatelo,

1285

E ghiettatelo a mmare

(Core, mo’ è tiempo de nce vennecare.)

SELIMMO

Moratto si è lo vero,

Ca me si’ stato amico,

Famme parlà a Zoraida.

MORATTO

N’è tiempo

1290

De poterle parlà, ca t’odia a mmorte.

Non te vo’ cchiù bedè, vole che mmuore.

SELIMMO

E tanta canetá mpiett’a na femmena?

MORATTO

Ll’ommo chello raccoglie, ch’isso semmena.

Penza a quanto l’haje fatto; jere tu degno

1295

D’esserle schiavo? e puro te facette

Patrone de se stessa, tradetore.

Ma si maje te volesse perdonare,

Io maje non te perdono, m’haje levata

Chi tanto tiempo havea servuta, e amata.

SELIMMO

1300

Ah rrenegato nfame, io tradetore?

Né miente; e si potesse

Vedere te farria

La nfamia toja, e la nnocenza mia.

MORATTO

Smania, strilla, jastemma, e di’ che buoje,

1305

Ma muore desperato.

SELIMMO

Sì ca moro,

Ma lo Cielo, chi sa su priesto, boja

De na furia crodele

Fa chello, ch’essa vole; e po va dille,

Ch’io prego, e spero, ch’essa maje non sia

1310

Contenta, e sazia de la morte mia.

Sbattuta dinto mare

Da ll’onna, e da li viente

Non pozza maje trovare

Nè ppuorto, nè maje carma,

1315

Nnzi’ che non cada ll’arma

Llà bascio a penià.

Lo cuorpo, che nce resta,

Se pozza po vedere

Stracciato da li diente

1320

De ciento mostre, e fere;

E pena le sia chesta

De chello, che mme fa. (Fenuta ll’aria, se sede a na preta, e li More s’accostano pe strozzarlo.)

SCENA VII

ZORAIDA, LUCCIO, e li stisse.

ZORAIDA

Olà, ch’e chesto?

MORATTO

(Oh mmaleditto punto

Che si’ benuta) io steva

1325

Pe fa aseguire li commanne tuoje.

ZORAIDA

Ma tu si’ troppo priesto esecutore,

Parlaje la lencua, non parlaje lo core.

Buono, ca m’haje trovata pe la via! (a Luccio.)

LUCCIO

È Signo, ca lo Cielo

1330

Vo’, che sinche pietosa.

MORATTO

(Io desperato.)

ZORAIDA

Pietosa co no cano, e co no sgrato?

Va Moratto a guardà le galeotte,

C’haggio visto venire certe bele;

Va mostra, c’haje valore, e si’ ffedele.

MORATTO

1335

Zoraida, me protesto

Ca nuje sarrimmo accise, o fatte schiave;

Cca perdimmo lo tiempo, jammoncenne

Co sti schiave, assarpammo,

E a chello, che buo’ fa, po nce penzammo.

ZORAIDA

1340

Va tu.

MORATTO

No; me ntrattenco.

ZORAIDA

E ba primmo te dico, ca mo’ venco.

MORATTO

Tu pazzie co la Fortuna,

Io sto mmano a lo spaviento,

Né sapimmo, che sarrà.

1345

N’aspettammo qua’ sciaura,

Vi’, ca pote no momento

Darce ajuto, o derropà.

SCENA VIII

ZORAIDA, SELIMMO, e LUCCIO.

ZORAIDA

Vide sgrato, si t’amo, a danno mio

Te scampo da la morte; e tu cchiù buoje

1350

Farme schiattà co li despriezze tuoje?

LUCCIO

Pippo n’esse crodele, ed ostinato

Co chi ng’hà tutte duje mo’ salvato.

SELIMMO

Ah Zoraida, già vedo quanto m’ame,

Vorria mpietto lo core,

1355

Pe nno mostrarme sgrato a tant’amore.

Ma si sto senza core, e senza vita,

Comme te pozzo amare?

E tu che puoje sperare

Da no cuorpo senz’arma? Oddio, Zoraida,

1360

Si tu si’ generosa quanto bella,

Hagge pietà de me, lassame stare;

Hagge pietà de te, va tornatenne,

Ca sarraje fra li tuoje meglio servuta;

E lontananza ogne gran fuoco stuta.

ZORAIDA

1365

Nfra li mieje? co st’onore, che nce porto?

SELIMMO

E tu resta co nnuje, ca si non pozzo

Amarte da marito,

Te servarraggio comme schiavo; e quanto

Possedo sarrà tujo.

ZORAIDA

E buoje, ch’io veda

1370

Selimmo mbraccia a n’auta?

SELIMMO

E tu m’accide;

O chello fa de me, che meglio cride.

ZORAIDA

Ch’io t’accida! e lo ppuo’ dire?

Ah speranza de sto core,

Si pe tte vorria morire,

1375

Comme chesto pozzo fa.

Si de te vuo’, che ne faccia

Nzò che meglio me ne pare;

Ncatenare co ste braccia

Io te voglio, e bole amore,

1380

Ma non mmuoje, pe mme schiattá.

SCENA IX

CARABABÀ, LOISA, e li stisse.

CARABABÀ

Eccola cca, venite.

LOISA

Ah, bella mia.

ZORAIDA

Auzate, che t’accorre? (e puro chesta

Me vene a tormentare?)

LOISA

Io maje me levo

1385

Da sti piede, penzì che non me faje

La grazia, che te cerco.

ZORAIDA

Io maje te sento,

Si non t’auze.

LOISA

Obbedesco.

ZORAIDA

Parla.

SELIMMO

Oddio,

Chi sa, che bene a fa?

LUCCIO

Chi sa, che ddice?

ZORAIDA

1390

(Ah, ca so’ nnata p’essere nfelice.)

LOISA

Signora, la pietà, cchiù che l’amore

Me porta a piede tuoje pe te pregare

A liberà sto tormentato schiavo; (azzenna Selimmo.)

Vasta quanto hà patuto, e si è lo vero,

1395

Ca ll’ame, e lo vuoje vivo, donamillo;

Si lo vuo’ muorto, accidelo; che serve

A farelo morire appoco appoco

De strazie, e de dolore?

SELIMMO - LUCCIO

(Chi pò tenè lo chianto?)

ZORAIDA

(Aimmè lo core.)

LOISA

1400

Sta grazia, che te cerco, non la voglio

Senza rescatto, vecco cca ste gioje; (piglia lo bauglietto da Carababà e l’appresenta.)

E si fuorze no mmastano, te prego

Dance no po’ de tiempo, io resto pigno

Nziemo co Pippo, e tanto n’havarraje

1405

Quanto cchiù ne vorraje. (Zoraida dà lo bauglietto a no Corzaro.)

CARABABÀ

(Chillo llà me farria tornare a nascere,

Lo ciuccio è scarrecato pò ì a pascere.) (se ne trase.)

ZORAIDA

(Commatto co la vita, e co la morte.

Ma chi pò contrastare co la Sciorte?)

LUCCIO

1410

O Zoraida pietosa.

LOISA

O bella Mora...

ZORAIDA

Zitto; dimme Loisa,

Si tu fusse Zoraida, ed io Loisa;

Me lo darrisse?

LOISA

Sì.

ZORAIDA

Si’ libberale,

Ca Zoraida non si’.

LOISA

Tanto farria,

1415

Pe dà la vita a chi è la vita mia.

ZORAIDA

E s’io lasso la Patria, lasso tutto,

Cca rresto, e me lo nguadio, te contiente?

LOISA

Sì, pe bederlo fora de tormiente.

ZORAIDA

Tu, che ddice Selimmo? No rrespunne?

SELIMMO

1420

È troppo terannia

Volè ch’io faccia la sentenza mia.

ZORAIDA

T’haggio ntiso. E tu Luccio, s’io lo lasso,

Le cedarraje Loisa?

LUCCIO

Allegramente,

Pe salvare n’amico, e no parente.

ZORAIDA

1425

Mpara Selimmo, comme s’ama; vide,

Ca chiste pe salvarte se contentano

Lassà l’amore lloro, e le speranze;

E tu pe non lassà lo genio tujo,

Faje morì ntra lo chianto

1430

Chi t’è mogliere, e t’è fedele tanto.

SELIMMO

Ah Zoraida.

ZORAIDA

Sta zitto, auzate, e piglia

Ste gioje, c’a tte le ddono; e acciò sacciate,

Quanto de vuje cchiù generosa io sonco,

Chisto, che m’è marito, a buje lo donco.

1435

Iate a gaudè, ch’io resto

A chiagnere a morì da desperata.

SELIMMO

O Cielo, ched’è chesto?

LUCCIO

Me sonno, o puro è bero?

LOISA

Se cagna de penziero!

A TRE

1440

E tanto pote fa na renegata?

ZORAIDA

Si chesto era pe mme, perché so’ nnata.

SELIMMO

Zoraida

ZORAIDA

Oddio, vattenne.

LUCCIO

Signora...

ZORAIDA

Aimmè, ca moro.

LOISA

Sienteme

ZORAIDA

Che pretienne?

1445

Te donco no tesoro,

Che cchiù te pote dà na sbentorata?

SELIMMO - LUCCIO - LOISA

E tanto pote fa na renegata?

SCENA X

CARABABÀ correnno, e li stisse, che stevano pe partire.

CARABABÀ

Ah Sio Pippo, sio Luccio, a chesta via

Vene na compagnia de li nuostre,

1450

Vi’, che bolite fa?

ZORAIDA

Scumpe Fortuna,

Chesto de cchiù?

SELIMMO

Non te schiantá. va Luccio,

Falle cagnare strata, e le ntrattiene

Pe nzi’ che metto nzalvo cheste femmene.

LUCCIO

Mo’ corro.

SELIMMO

Jammo.

ZORAIDA

Addove?

SELIMMO

Addo’ volite.

ZORAIDA

1455

Portame ntra li mieje.

SELIMMO

Priesto venite.

SCENA XI

CARABABÀ, e po DIANA.

CARABABÀ

Chiste vanno da cca, pe st’auta via,

Lassame j a piglià Cecilia mia.

DIANA

Me si’ ncappato mmano n’auta vota, (l’afferra.)

Mo’ sì ca no me scappe malantrino.

CARABABÀ

1460

(O mmalora sta vecchia.) Sia Diana,

Non serve, che te nfade,

Ca chello, c’haggio fatto

È stata na pazzia, perché sto alliegro,

Ca so’ asciuto da mano a chiste More.

1465

(Mo’ là torno a ngarzà.)

DIANA

Nè tradetore?

Vi’, che bella pazzia a maldrattareme

De tanta muode? ed a sbiarme figliema?

CARABABÀ

Che sbiá? co chill’haje? ll’haggio sarvata,

Azzò che no l’havisse stroppeata.

1470

Mo’ te la donco.

DIANA

Addove sta?

CARABABÀ

Cojetate,

Jura de no la vattere, e mo’ propio

Te la conzegno.

DIANA

Te ne do pparola.

Ma di’ lo vero, nc’è socciesso niente?

Nce faje l’ammore? te la vuoje pigliare?

CARABABÀ

1475

(Ah à, ch’è già ccaduta) co chi ll’haje?

Che socciesso! ch’ammore? che pigliare?

Io so’ llanza spezzata, auto non haggio

Che sto tuppo, e mo’ puro ne lo scippo

Co ste ccude de puorco, c’haggio nfaccia,

1480

Non te partì, ca mo’ te porto figlieta.

DIANA

Torna priesto; ma siente,

Trovarraje chi te vo’, si be’ pezzente.

CARABABÀ

E chi me vo’ piglià Diana mia?

DIANA

Vasta mo’, po lo ssaje.

CARABABÀ

E biento, e biento,

1485

La femmena vo’ aruta co bonora,

Povera leggiadria non innamora.

Pe fare l’ammore

Nce vonno denare;

Si no, può schiattare

1490

Lo fele, e lo core,

Ca maje non faje niente;

Chi è pirchio, o pezzente

Se pote sciccá.

La minichina co la minecá.

1495

Porzì la mogliere

Vo’ esse pagata

Si no, st’ammossata:

Te face vedere

A ttavola, a llietto

1500

No piccio, no nfietto;

Te face schiattà.

Chi tene la crapa,

Lo ssape, lo ssa.

DIANA

Chisto m’hà resbegliato lo golio

1505

De mmaretarme n’auta vota; e fuorze

Ncarto sto schiacco, ca me ll’ha prommisso

Tre anne arreto, m’have scorcogliata;

No lo voglia Cecilia, io so’ arrevata.

SCENA XII

CARABABÀ, CECILIA, e DIANA.

CARABABÀ

(Di’ comme t’haggio ditto) eccola ccane;

1510

Vasa la mano a mammata,

E cercale perduono.

CECILIA

Mamma mia,

Veccome ccane.

DIANA

Bemmenuta Oscia.

E mbe’ so’ cose cheste, che tu haje fatte,

Presentosa, fraschetta, pazza, streca?

1515

Non saccio chi me tene eh Ciommo, Ciommo,

Tu me lighe le mmano.

CECILIA

Mamma mia, (chiagne.)

Perdoname, ch’è stata la paura

Ch’havea de te.

CARABABÀ

Perdonala sta vota,

Ca no l’ha fatto apposta; tienetella,

1520

Ch’io vago a la marina a fa qua’ ppresa,

P’abboscarme la spesa.

DIANA

Va connio,

Ca mo’ mmo’ nce vedimmo Ciommo mio.

SCENA XIII

DIANA, e CECILIA.

DIANA

Siente cca, pe sta vota, te perdono,

Ma si faje cchiù tantillo, io t’adaccio,

1525

Te venno pe ttonnina.

CECILIA

Fammenne jelatina mamma mia;

Io darte cchiù desgusto? arrasso sia.

DIANA

Ora dimme na cosa, e di’ lo vero,

T’hà ditto niente Ciommo?

CECILIA

De che ccosa?

DIANA

1530

Si te vo’ pe mogliere.

CECILIA

Gnorennone.

DIANA

Comme no? si m’há ditto ca te vole.

CECILIA

A mme bole? uh lo suzzo, leva, leva,

No mme lo nnommenare, ca mo’ jetto;

Io voglio piglià isso? e ch’è fenuto

1535

Lo ppane a Puorto?

DIANA

(Pe nzi’ a mo’ va buono.)

Ma io t’haggio prommettuta.

CECILIA

Io no lo voglio

Cchiù priesto me caroso (comm’è llocca!)

DIANA

Ma perchè no lo vuoje?

CECILIA

Ca no mmoglio

Mmaretarme, gnornó, me voglio stare

1540

Sempe co ttico, mammarella mia.

DIANA

(È nzemprecella ancora la scuressa)

Comme vuoje; ma besogna,

Che ccagne vita, e stinche reterata,

Ca si no, figlia mia, si’ ghiancheata.

CECILIA

1545

Jancheata? arrasso, arrasso,

Io starraggio a la veletta

Pe non farme nnommenà.

DIANA

Benedetta benedetta,

Chi ha jodizio accossí fa.

CECILIA

1550

Ca me piglio po no spasso

D’afferrà na chiacchiarella

O co n’ommo, o na zitella.

DIANA

Na risata.

CECILIA

Na toccata.

DIANA

Pede a ppede.

CECILIA

Mano a mmano.

CECILIA

1555

Non è niente, stare osanza,

E sta moda è na creanza,

Che da nore a chi la fa;

N’è lo vero?

DIANA

Accossì ba;

Benedetta, benedetta;

1560

Co st’osanza, e sta creanza

Jamm’a Foggia a passiá.

CECILIA

Penzi a Foggia? è meglio cca.

SCENA XIV

Campagna.

MORATTO, e Corzare, c’a suono de tammurre se squatronano.

MORATTO

Amice, havite ntiso

Lo trademiento, che nce fa Selimmo,

1565

Che ng’há pportato cca pe ffarce schiave;

Stammoce a la defesa, quanno vene,

S’accida; carcerammo

Zoraida, ed a lo Patre la portammo.

Eccole tutte duje.

SCENA XV

ZORAIDA, SELIMMO, LOISA, e li stisse.

ZORAIDA

Che nc’è Moratto?

1570

Che bo’ dire sta gente?

MORATTO

Vo’ mmarcare

Pe Barvaria, e nce vo’ a tte portare.

ZORAIDA

E chi me fa sta forza?

MORATTO

Io stisso.

SELIMMO

Ah ccane

Rebello, tradetore, mo’ è lo tiempo

De vennecarme.

MORATTO

A buje.

ZORAIDA

Nullo se mova,

1575

Ca veneno a sta via li Cristiane,

Si havite muodo, jateve a salvare.

LOISA

Curre si Luccio, curre.

ZORAIDA

A mmare, a mmare.

MORATTO

Trademiento compagne, anemo, e core, (a il more.)

Mora nziemo co nnuje lo tradetore.

SCENA XVI

LUCCIO, co na compagnia de Sordate, CARABABÀ, e li stisse.

LUCCIO

1580

Posate ll’arme, o site muorte tutte.

LOISA

Zoraida mia, foimmo.

ZORAIDA

Oimmè so’ mmorta.

CARABABÀ

Venite cca, ca ve facc’io la scorta. (Zoraide e Loisa se retirano co Carababà se fa l’abbattemiento, perdono li more, e Carababà strascina lo standardo lloro.)

LUCCIO

Amice havimmo vinto.

SELIMMO

Addo’ è Moratto?

CARABABÀ

S’è dderropato a mmare miezo acciso.

SELIMMO

1585

Mora pe mmano soja.

Ca non potea trovà cchiù mmeglio boja.

LUCCIO

Le ffemmene addo’ so’.

CARABABÀ

Le bi’ llà ncoppa.

SELIMMO

Jammo a pegliarle.

LUCCIO

Jammo. (parte.)

CARABABÀ

E nuje co sta bannera nce spassammo. (pazzeja co la bannera.)

1590

Meza luna meza luna,

Muorto Alì, e Mostafá?

Tu non dare maccaruna,

Io volere strascenà.

Viva Ciommo, galantommo,

1595

No star cciù Carababà.

Meza luna, meza luna

Muort’Alì, e Mostafà.

SCENA XVII

DIANA, CECILIA, e CARABABÀ.

DIANA

Che ccos’è? si’ mpazzuto?

CECILIA

Che faje co sta bannera?

CARABABÀ

Far guascezza.

DIANA

1600

Che ccos’è sta guascezza?

CARABABÀ

Allegramente,

Sonco jute a l’acito già li More,

Chi è muorto, e chi mo’ sta co la capezza.

CECILIA

Ne? bene mio.

CARABABÀ

Mo’ strillar.

A TRE

Guascezza.

CARABABÀ

Meza luna meza luna, &c.

SCENA URTEMA

ZORAIDA appojata a LOISA, SELIMMO, LUCCIO,e li stisse.

LOISA

1605

Zoraida mia non te desperare

Ca nuje stammo pe ttene.

ZORAIDA

Aimmè, che bedo!

S’è perzo tutto, ed io so’ schiava; ahje Sciorte,

Che me serve a campà, jammo a la morte. (vo’ jettarse a mmare.)

LUCCIO

Ah Zoraida, che faje? fermate Oddio.

1610

Ca non si’ schiava no; Pippo conzolala...

Che d’è? non parle?

ZORAIDA

Ah sgrato, (a Selimmo.)

Manco meza parola me vuo’ dire

Pe conzolarme? Addio, corro a morire.

SELIMMO

Ferma Zoraida, e siente.

ZORAIDA

1615

Parla Pippo; non dico cchiù Selimmo,

Ca t’haggio perzo, e non può esse mio;

Parla, commanna, e po morì vogl’io.

SELIMMO

Chell’azzione bella, che m’haje fatta

De me salvà la vita, e liberarme

1620

Quann’era schiavo tujo, m’hà ntenneruto;

Mo’ che si’ schiava mia, te faccio libbera;

E si pienze morì, voglio, che ccampe,

Nè tu me passarraje de cortesia;

Io so’ Pippo, e tu si’ Lloisa mia. (l’abbraccia.)

ZORAIDA

1625

Oddio, ca moro...

SELIMMO

Femmene ajutatela.

DIANA

Uh, scuressa, ca more d’allegrezza.

SELIMMO

Perdoname Loisa, ca te lasso

Pe chi ng’have salvato.

LOISA

Io m’accojeto,

Ca si’ bivo, e te mustre generuso.

ZORAIDA

1630

Pippo, Pippo, addo’ si’?

SELIMMO

Veccome ccane.

ZORAIDA

Core non mme ncannà, sarraggio toja

Cagnanno legge, e nnome?

SELIMMO

Ecco la fede.

ZORAIDA

Bella mano te vaso, e po a sto pietto,

Pe pigliarte lo core, mo’ te metto.

SELIMMO

1635

Luccio, nguadia Loisa, io te la cedo.

LUCCIO

Ne si’ ccontenta?

LOISA

Attenno la prommessa.

CARABABÀ

Segnore, me n’allegro; mo’ è lo tiempo

De la prommessa mia.

SELIMMO

Eccola, piglia. (le dà Cecilia.)

DIANA

Sio Pippo, chesta è figliema, che ffaje?

SELIMMO

1640

Lo ssaccio, ma se sonco giá affidate.

CARABABÀ

E bon prode nce faccia, e sanetate.

DIANA

Ne gioja? tu si’ chella, che ddecive:

Sciù, no lo voglio; e mo’?

CECILIA

E mo’ me pare,

Ch’una cosa è lo ddi’, n’auta è lo ffare.

DIANA

1645

E senza dirme niente, chesto haje fatto?

CECILIA

Comme? non saje, e puro ll’haje carc’anno?

L’abburle non se diceno, se fanno.

SELIMMO - LUCCIO - LOISA - ZORAIDA

Da no mare tempestuso

Bella carma, che n’è sciuta!

TUTTE

1650

Vi’ lo Cielo quanto fa.

CARABABÀ

Mo’ s’asciutta chi stea nfuso.

CECILIA

Nzi’ che ll’arma n’è speduta.

TUTTE

Sempe è buono lo sperà.