Li duje figlie a no ventre

Li duje figlie a no ventre, Napoli, Ricciardo, 1725

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO I

SCENA PRIMMA

GRANNIZEA mmocc’a la taverna, RITA, e RAPISTO, che bann’acconcianno, TELLA nnanz’a la porta soja, quatto fegliule, e doje foretanelle, e mmiezo la Scena, lo majo chino de robbe de magnare, e quatto palie de drappo.

GRANNIZEA

Bemmenute Fegliole

TELLA

Bemmenute.

RAPISTO

Pozzate mprofecare.

RITA

Allegramente.

GRANNIZEA

Comm’a sciure de Maggio

RAPISTO

O bella gente!

TELLA

Da dove song’asciute

Tanta belle magnose?

RAPISTO

Songo de l’Arenella.

TELLA

Parono cierto tanta giglie, e rose.

RITA

Abballate, abballate.

GRANNIZEA

Ca ve voglio fa fa colazeone.

TELLA

Jamm’a ciammiello, ca nce so’ li suone.

GRANNIZEA

A buje su, carrecate

Sona tu lo tammurro,

E tu lo calascione.

RITA

Eccome lesta.

GRANNIZEA

Ca volimm’anorà propio sta festa.

TELLA

Granni’, che so’ benute ad abballare,

Pe bencere li palie?

GRANNIZEA

Accossì credo.

TELLA

Negra mene, che bedo?

GRANNIZEA

E so’ benute puro pe trovare

Li nnammorate lloro

TELLA

Sì addavero?

GRANNIZEA

Pe poterese nziem’addecreare.

RAPISTO

Via mettimmonce ngusto

Lassatem’accordare A buje ch’è borpa.

E ntramente, che canto sta canzona

Abballate nconzierto.

RITA

All’ora bona.

RAPISTO

A sta Comarca vid’ogne fegliola

Che ten’attuorno ciento nnammorate,

Chi comm’a borpa, ncapp’a la tagliola

Pe quatto ciancetielle, aggrazeate

Chi pe no pizz’a riso, o na parola

Lo vide muorto cieffo nzanetate:

Aote penzanno de la trovà sola

Vanno pe l’ancappare, e so’ ancappate.

E so’ ancappate, e Nenna

Chi n’hà purchie, che se mpenna,

Hà scomput’ogne facenna

Chi vole ciammellà, che prega, e spenna.

GRANNIZEA

Comme nce cal’à chiummo sta canzona.

TELLA

Vi’ comme joca largo

Ca non se trova dinto de l’abballo.

GRANNIZEA

Accossì deve fa, chi vuo’ sta bona

E non correr’appriesso

A sti zannuotte sbrisce, allevrecate.

RAPISTO

Granni’, lo parlà chiaro

Non se pote sentì

RITA

Lo parlà sparo,

Vuo’ dicere, e tu saje

Pe na stezzella, ca n’abbiente maje.

GRANNIZEA

Non saccio, che decite

S’avissevo jodizeo

E sapissevo fa: Ssi spantecate

Che schiattano, che crepano

Che spennano, lo fecato, e na mola,

Se vonno vedè schitto na fegliola.

TELLA

Chest’è quando non siente

No rangol’a lo core,

Na carol’a lo pietto

Te può spassare a farele despietto.

RAPISTO

Addonca p’avè gusto

Abbesogna ncapparev’a lo bisco.

RITA

Ca si no può sta frisco

Morz’amar’aje d’avè pena, e desgusto.

RAPISTO

Ma negà non potite

TELLA

Di’? che cosa.

RAPISTO

Ch’a le bote mmattite, e ntroppecate

A cert’ossa de pruna

TELLA

Zitto, zitto

RAPISTO

E si te ll’aggio ditto

Ca non vonno sentì la veretate.

GRANNIZEA

Sceppate, scorcogliate

Quanto potite; e quanno le bedite

Rredutte nchiana terra

Senza manco lo sciato

Vottatel’a malanno

TELLA

Aie già parlato.

RITA

E si po t’accommenza, chiano chiano

A trasire lo chiuovo?

Aje pegliato Vajano

Si scorza, negra te, non truov’abbiento

Poc’attienn’a nteresse

Manco pienz’a trommiente

T’accedarrisse co le mmao stesse.

So’ chiacchiare nzuonno

Lo fa la smargiassa

Ca quann’a lo core

Nce sta masto Tonno

Ssa bella matassa

Va sbrogliala va.

Trasut’è l’ammore?

Non serve, che spenna,

Che saglia, che scenna,

Che benga, che trasa

La vigna, la casa

Se veng’a peglià.

SCENA II

TONNO da la casa, e li stisse.

RAPISTO

Che bella cosa è chesta? O Fedelone

Viene ca te nce voglio.

TONNO

Eccome lesto.

RAPISTO

Siente, va scaleanno

Sse mutrie, a sse quatrare,

Vi’ so’ tarde, o matine?

TONNO

Cierte de ncanto, e cierte tardacine.

GRANNIZEA

Che bo’ di’ sso parlare?

TELLA

Io no lo ntenno.

RITA

Ed io sento che diceno, e comprenno.

RAPISTO

Vatte lanterne anno

Le cerre

TONNO

So’ patute.

RAPISTO

100

Ca po mmiero la mbruna

Nce ne jammo de juoco.

TONNO

Nc’è manteca chiantata?...

RAPISTO

Qua manteca?

Jett’a joqua jersera, e fuje saputo.

GRANNIZEA

Non volite fenì sta guittaria?

TELLA

105

Tonno lassala ghì

TONNO

Siente la grimma.

RAPISTO

E bi’ la maggiorigna

Comme scartano amaro.

TONNO

E nuie sbacchetteammo a paro, a paro.

GRANNIZEA

Orzù tornamm’a nuje, ss’affettolillo

110

Ch’avit’int’a le chiocche,

La volite ncarrà? levatevillo.

TELLA

Comm’avimmo da fare?

GRANNIZEA

Fa l’ammore co ciento

Ca s’uno sgarre, l’aoto aje d’ancappare.

RITA

115

È troppo frusciamiento.

GRANNIZEA

Capo tosta

Uno chiagne pe tte, va lo conzola

N’aoto sta alliegro, falle mala cera.

Chiagne na vota, e ghiura ca tu l’amme,

A n’aoto ca nne muore.

120

Chi te regala, e porta

E tu falle carizze

Chi fa lo scrocco, serrale la porta.

RAPISTO

O bella lezzeone!...

TONNO

O che consurta!

RITA

Non saccio fa sti vierre.

GRANNIZEA

Mparatille,

125

Ca quann’era fegliola

Nn’avea cchiù de mille,

Che faceano co mme li spantecate,

E le tenea contiente, e conzolate.

Chi fa l’ammore

130

Mo’ smajatella,

Mo’ ngrognatella,

Mprimm’amorosa,

Po grannezzosa

S’hà da mostà.

135

Nesciuno ncore

Poco parole

Di’ ca no ntienne,

Ca chillo spenne;

Cala le gronne,

140

L’aoto refonne:

Pe nfi’ a le sole

L’aje da levà.

TONNO

Dimme na cosa; Siente, sse quatrare

Se jettano lo sgrano

145

Dint’a la Tasca toja.

RAPISTO

Tanto bello.

TONNO

Nnce lo volimmo anchire lo vodiello.

RAPISTO

Mettimmonce ngusto

Vedite la Tasca

Nc’è bona tiorfa

150

Nc’è meglio chiarenza

Non manca l’artone

Volimmo scialà.

Si jammo de renza

Nce anchimmo lo fusto.

155

La grimma se nzorfa,

Le vene l’abbasca,

Uh quanto cottone!

Che bol’abboscà.

SCENA III

CIULLO accappottato, che fuje da dinto a la porta de SEBEONE, che lo secuta, e cade.

SEBEONE

Ah canaglia assassine.

CIULLO

Scappa scappa.

SEBEONE

160

Afferrate sso cano

RAPISTO

Tiene, Tiene.

SEBEONE

So’ muorto; aimmè li rine

So’ tutto stroppeato.

RAPISTO

Sebeo’ si’ caduto?

SEBEONE

Ahù mmalora

Fatte ncatarattà

TONNO

N’è comm’è stato?

SEBEONE

165

Comm’è stato ste brache: songo juto

Pe secotare chillo, ch’è fojuto.

TELLA

T’aje fatto mal’assaje?

SEBEONE

So’ sdellommato.

RITA

Addo’ è stata la botta?

SEBEONE

A lo fronte, a lo scianco, a le costate.

RITA

170

Assettate a sta seggia, e piglia sciato.

SEBEONE

Sine bellezza mia.

RITA

Uh che bruognolo nfronte, negra mene!

GRANNIZEA

Lassamence ammaccare.

SEBEONE

Eh non te ne vuo’ ire

175

So’ mano chesse de mme guanciare.

RITA

Lassa fa a me, te voglio addecreare.

SEBEONE

Viene Retella

Dimme quaccosa.

Fa na fenezza,

180

Ca ssa bellezza

Mme pò sanà.

Uh che dellietto

Sente sto core,

E pe l’ammore

185

Da chisto pietto

Se vo’ scrastà.

TONNO

Vide lo viecchio pazzo ca sbarea.

RITA

Sebeo’ mme delliegge, e non va buono

Coffeà na fegliola

SEBEONE

Atta de mene!

190

Io non saccio che d’è, lo cellebriello,

Mme pare manganiello,

Lo cor’è na vetrera

Addove nott’e ghiuorno nce sta fuoco.

RITA

Chiano fremma no poco,

195

Ca mme faje mette ntuono co sso bene.

TONNO

E bi’ si n’hà bistato lo pacchiano.

RAPISTO

Tera, ca mo’ lo ncappe sso fasano.

TELLA

Ne Sebeo’, chi è stato

Chillo, ch’è sciuto da la porta toja?

SEBEONE

200

No ll’aggio conosciuto

Ca mente so’ trasuto

Da la porta dell’uorto iss’è sbignato.

GRANNIZEA

Sarrà benuto pe te cappeare

Quaccosa da la casa.

SEBEONE

Accossì creo.

TELLA

205

Non me lo pozzo propio smacenare.

GRANNIZEA

Orzù fegliole meje trasitevenne

A fa colazeone a la taverna.

SEBEONE

Io pur’aggio che fare

Non te scordà de me Retella addio.

RITA

210

Schiavo Patrone mio.

TONNO

Io te voglio sso viecchio addecreare.

TELLA

Granni’, po nce vedimmo.

GRANNIZEA

Va connio.

RAPISTO

Tonno trase tu puro

C’abbattimmo de brusca mente sgranano.

TONNO

215

Vogl’ì nzi’ a l’Arenella ca mo torno,

E songo cc aprimmo de miezo juorno.

RAPISTO

E so’ ancappate e core

Chi n’hà denare, non faccia l’ammore.

SCENA IV

LILLO creduto Lalla.

LILLO

Aggio ntiso ogne cosa, e manco male

220

Ca non se n’è addonato

Ca Ciullo m’hà portato lo vestito.

Ah Lillo sbentorato!

Co na fusta de Ciullo,

Che credennome femmena n’abbenta.

225

Co no sdigno de Tella

Che mme ved’accossine, e mme trommenta,

Mo’ mme vesto da Lillo

Co li vestite, che mm’hà dato Ciullo,

Fuorz’esco da sti guaje

230

Ca d’aoto muodo, non arrivo maje.

SCENA V

CIULLO, e lo stisso.

CIULLO

Lalla mia dove vaje?

LILLO

So meza morta

E tu nce manche de mm’ammojenare.

CIULLO

A che stato è la cosa?

LILLO

Volesselo la sciorta

235

Ch’io fosse a stato tale,

Ch’avesse muodo de te conzolare.

CIULLO

Tanto è gruosso lo mmale,

Che non se pò sanà.

LILLO

No nc’è remmedio.

CIULLO

E non vuo’ diì che d’è? che Sebeone

240

Se n’è addonato?...

LILLO

No: ca non è chesso

È n’auta spina, che mme pogna, e spercia.

CIULLO

Aimmè, Lalla, che dice

Sango mio, vita mia, comm’aje tu core,

Dareme sso dolore?

LILLO

245

Ah Ciullo non mme ntienne

Ed io non pozzo di’: Vasta, che sacce,

Ca quanto cchiù mme faje vedè sso core,

Che pe mme se ne more

Tanto cchiù ascevolire me nne sento.

250

Ca senza frutto pate sso trommiento.

CIULLO

Ah che botta aggio a lo core!

Che trommiento, che dolore!

So’ storduto

Nzallannuto;

255

E non saccio addove ghì.

Lalla cara, che mme dice?

Mme vuo’ fa propejo nfelice

Te sso pietto

Dalle mo’ co no stelletto

260

Ch’aggio a gusto de morì.

SCENA VI

TELLA, e li mmedeseme.

TELLA

Ciullo, Ciullo addo’ vaje? e tiene facce

Nfedele tradetore

De me lassare, e de cagnare ammore?

E tu sperta, e demerta

265

Che da dudece juorne si’ benuta

A levareme Ciullo; Ciullo oh Dio!

Ciullo lo core mio.

LILLO

Sciorta troppo spiatata

Pecché mme nc’aje lassata?

CIULLO

Siente Tella,

270

Se tu patisce, io pato,

E li trommiente tuoje

Songo comm’a li mieje.

TELLA

Ah sgrato, sgrato,

Comme tu campe, e comme tu resciate?

S’aje a gusto, che mora

275

P’avè cchiù largo, e stare cchiù contento

Accideme tu propio

No mme dà sso trommiento

No mme dà gelosia,

E no mme fa vedè la morte mia.

LILLO

280

No: Tella cara, cara

Campa, e statte contenta, e borria schitto

Che bedisse no poco

Comme sto cor’affritto

Ard’e abbruscia pe tte mmiezo a lo ffuoco;

285

E pe te fa vedè, quant’è l’affetto

Voglio, che guode, ed amme Ciullo tujo,

E tu Ciullo amma Tella, e no mme curo

C’ardo, moro, e mme strujo Pocca sola

La speranza tu si’, che mme conzola.

CIULLO

290

Oh Dio! che fenzeone, io già stordesco

Mme s’abbagliano l’uocchie; Ah Lalla Lalla

Non mm’affriere cchiù, ca mo’ mpazzesco.

TELLA

Ma confido a lo Cielo, che te paga

De la stessa moneta

295

Che paghe a mene, e nfin’aggia piatate

De st’amare trommiente

E che castiga a te le trademiente.

LILLO

No chiagnere cchiù no

Statte contenta sì

300

Ed a mme schitto mo’

Lassateme morì

Senz’arrecietto.

Tu secot’ad ammà,

E lassa star’a mme

305

Ca chisto core cca

Si no lo pò vedè

Lo vago mo’ a sceppà

Da chisto pietto.

SCENA VII

CIULLO, e TELLA.

CIULLO

Fremma Lalla addo’ vaje?

310

Speranza de sto core,

No mme lassà accossì, mmiezo a li guaje.

TELLA

Ah cano renegato

Aje tant’armo zoffrire

D’avereme ngannata

315

Vedereme traduta, e abbandonata.

CIULLO

Tella te compatesco, c’aie ragione

Ma che nce pozzo fa, mm’hà storzellato

Lalla, e da pietto mm’arrobaje lo core,

E levannol’a mme, l’ave levato

320

A tte, che lo tenive a tutte l’ore.

E tu, Lalla spiatata

Azzò che mora già te si’ sbotata.

Jammo donca a morire

Jammo donca a fenire

325

Sta vita sbentorata;

Ca de chessa manera

Vuje starrite contiente

E scomparrà sto core li trommiente.

Voglio Lalla, e mme descaccia,

330

Fujo Tella, e mme dà caccia,

Nfra lo stantaro, e la porta

Io mme trovo nzanetà.

Lalla accidem’e scompisce

Tella chiagnem’e fenisce

335

De mme dà sta negra sciorta

Ca non voglio cchiù campà.

SCENA VIII

TONNO, e LALLA.

TONNO

Nzomma hà cchiù de duje anne,

Che n’aje nova de frateto.

LALLA

Da che Micco accedette

340

Co na botta de maglio a la Conocchia

Lillo mio se nne jette;

Pe non essere ncappato da la Corte.

TONNO

Ch’è pena d’esse mpiso

S’è stato caso arrisso

345

Non c’è pena de morte

LALLA

Ma già ssaje

Ca si ncappava a chelle primme botte

Se le poteva dire bona notte.

TONNO

E addove se n’è ghiuto?

LALLA

Se sarrà nasconnuto

350

Pe ste campagne, o dint’a sti Paise.

TONNO

Ntramente tu ch’aje fatto, e addo’ si’ stata?

LALLA

Io negra sbentorata

Dapo, che Lillo se nne jette spierto

Mme ne venne a trovare Cannetella

355

Ch’è for’a mamma mia all’Arenella.

TONNO

Va: saglietenne ncoppa

Ca fenuta la festa

Te nne torno a portare.

LALLA

Oh! che potesse Lillo mio trovare.

SCENA IX

GRANNIZEA, che secota RAPISTO co no spito, MENELLA, che la tene pe no vraccio, RITA, e TONNO.

GRANNIZEA

360

Malantrino breccone

Te voglio caccià ll’arma.

TONNO

Che d’è stato.

RITA

Statte che nne vuo’ fa?

MENELLA

Granizia mia

Fallo pe caretà

GRANNIZEA

Sto mmeccato

Nne vole fa foì li passagiere

365

Co tanta guittarie.

RAPISTO

Non è lo vero

Nce so’ certe fegliole, che taffeano

Io te le tengo ngusto, azzò nce tornano.

MENELLA

Ah guitto tradetore.

RAPISTO

Vi’ che bole da me, ss’auta bonora.

TONNO

370

Mente è chesso va buono.

GRANNIZEA

Mo’ lo strafocarria.

RAPISTO

Non te ncollereggià Gavina mia.

GRANNIZEA

A me Gavina?

TONNO

Fremma.

RITA

Lassalo ghì a malanno.

GRANNIZEA

375

Tu non saje de che panno

Veste sta creatura.

RAPISTO

Vedo sta facce, e tremmo de paura.

MENELLA

Perdonalo sta vota

Ca no lo farrà cchiù, Granizea cara

380

E si torna a ncappare

Tu fallo nnitto nfatto carcerare.

Vi’ quant’aggio da fa

Rapisto mo’ pe tte

E tu po lasse a mme

385

Senza piatà morì.

Sto sango pagarria,

Che stace dinto cca

GRANNIZEA cara mia

No lo fa cchiù zoffrì. (se nne trase.)

GRANNIZEA

390

Vattenne mo’ da dint’a sta taverna.

RAPISTO

E che mme manca pane.

TONNO

Via n’è niente.

GRANNIZEA

Schefenzuso pezzente.

RAPISTO

Vecchia ndeavolata.

TONNO

Eh feniscela mo’: va trase dinto.

RAPISTO

395

Mme nzonno ca le faccio na sonata.

Mo’ mme ne vago

(Vecchia mmardetta)

Vi’ la cauzetta

Ca mm’è caduta:

400

(Ma mme ne pago

Mme guard’a mme.)

(Porca fetente,

Grimma mossuta)

Non dico niente,

405

Che faccio, che?

SCENA X

TONNO, RITA, e GRANNIZEA.

TONNO

E accossì Rita mia

Comme te stea decenno, tu già saje

Ca n’aggio abbiento maje

Penzanno a ssi bell’uocchie, a chessa facce

410

Damme ssa contentezza

Facimmo nfra de nuje ssa parentezza.

RITA

Non sia pe ditto, Marco te n’hà raso.

GRANNIZEA

Sciaorata mara tene

Non te la fa sferrà st’accaseone

415

Ca Tonno hà li denare, e te vo’ bene.

RITA

Non serve, che te nfade

Ca voglio Ciullo mio

E se Ciullo non aggio, io mo’ m’accio.

TONNO

Justo comm’a no massaro

420

Che lo campo ha semmenato,

Se l’annata non va mparo

Tu lo vide mpezzentì.

Accossì song’io restato

Co trommiente, e co dolure

425

Aggio perzo li sodure

E me pare de mpazzì.

GRANNIZEA

Sciaorate mare vuje, ve nnammorate

De porva, e perocchelle

O de spate, e bastune

430

Ch’anno p essi pontune ciente zelle:

Che ve ne jate a quacche bestitiello

Fatto all’utema moda?

All’utemo buon gusto?

Lo cuorno, che ve ceca

435

Affittano ogne cosa a la Iodeca.

E quacche bota, mente sta decenno

A quacche landroiella

Anema, Vita, Core

Siente no Caudarella

440

Che con a mano fredda, a lo cauzone

L’afferra, e dice, paga, o va presone.

Si quacche milordo

Te va linto, e pinto

Non credere figlia

445

Ca si s’assottiglia

Non l’esce treccalle

Lo vide de sbuordo

Che mmeste n’ammico

Ca n’hà che magnà.

450

Se parla c ottico

Lo Siente ca spacca

De ruspe, e patacche

Galesse, e Cavalle

Po penza cannela se vace a corcà.

SCENA XI

TONNO RITA, e SEBEONE.

TONNO

455

E pur’è na gran cosa

Che tanto tosta si’

SEBEONE

Bella, e cianciosa,

Retella aggrazeata

Tengo pe te, chest’arma frezzeata.

RITA

Chist’aoto nce mancava; ora ssu a nuje

460

Pigliammoncella a gusto: vi’ che bonno

Sti liune de cascia

Che l’uno è barvajanno, e l’aoto è n’ascio.

TONNO

Che dice Rita mia?

SEBEONE

Che bervesie?

RITA

Dico, ca tu si’ pazzo, e tu sbarie.

TONNO

465

Commo so’ pazzo? Quanno

Ssa grazea m’affattora

SEBEONE

Ed io sbareo, ma tanno

Quanno pe tte tu volarraje, che mora.

RITA

N’è lo vero, c’abburlo

470

Lo core mio se struje,

E se sente morì, pe tutte duje.

TONNO

Ma tocc’a me

SEBEONE

Gnornò tocc’a me schitto

Ca fuje lo primmo

TONNO

Io ca mo’ vago a mmitto.

RITA

Levammo ssi contraste

475

Chi mme fa cchiù fenezza.

Lo patrone sarrà de sta bellezza.

TONNO

Io te faccio Segnora

De quant’aggio, e possedo

Quanto mme trovo, e bedo

480

De mobele, stabele, e se movente.

SEBEONE

Sarraje da Poppa a Prora

La Patrona, e l’aggente

De la Casa, dell’uorto, e de la vigna

De me, e le cose meje

485

E presente, e feture

E dell’arede mieie, e soccessure.

RITA

Cheste so’ cose a luongo

Vorria quaccosa mo’

SEBEONE

Te mo’ te dongo

Sta rezzola nnaurata.

TONNO

Ed io st’aniello.

RITA

490

Mo’ si provita mia jamm’a ciammiello.

SEBEONE

A chi donca vuo’ bene?...

RITA

A tene

TONNO

Comme?

RITA

No: voglio bene a te.

SEBEONE

Che cosa aie ditto?

RITA

Dint’a sto core mio, nce staje tu schite.

TONNO

Nuje volimmo sapere.

SEBEONE

495

Comme vace sto ntrico.

RITA

Lo bolite sapè? mo’ ve lo dico.

Tu si’ lo fato mio,

Tu si’ la gioja bella,

No: c’aggio ditt’a posta,

500

Grattateve la zella

La Rita no ve vo’.

Io so’ mogliere a te,

Tu si’ marito a me

(De riso, oh Dio, mo’ schiatto)

505

Ssa posta v’aggio fatto

Non mme servite no.

SEBEONE

Bella truffa pe diece

TONNO

Atta d’aguanno.

SEBEONE

Tonno, dov’è l’aniello?

TONNO

Sebeo’ la rezzola?

SEBEONE

Comme nc’hà coffeato ssa fegliola.

TONNO

510

Io so’ moglier’a te.

SEBEONE

Tu si’ marito a me.

A DUE

Grattammonce la zella

Ca Rita no nce vo’.

SCENA XII

LALLA, e TELLA.

LALLA

Tella statte secura

515

Ca non ne saccio niente

Né Ciullo ll’aggio visto mmita mia.

TELLA

Ah! Lalla aggio paura

Ch’è troppo scanoscente

E non sajo che bo’ dì la gelosia.

LALLA

520

Te compatisco

TELLA

Oh Dio

Tremmo, sudo, e defreddo,

E no parpeto mpietto

Non me fa arreposà.

LALLA

N’avè sospetto

Ca te nne do parola.

TELLA

525

Chessa speranza schitto mme conzola.

No sciorillo, che ncampagna

Lo mantene la rosata;

Se lo sole, se la magna

Te lo fa priest’ammoscià.

530

A me negra sbentorata

La speranza mme mantene,

Che se manca po mme vene

Tu mme vide desperà.

SCENA XIII

LALLA, e po CIULLO.

LALLA

Io pe mme so’ mpazzuta

535

Qua’ Lella m’assomeglia? n’allegrezza

Mme sta dint’a lo core,

Lillo mio trovarraggio

E scomparraggio priesto sto dolore.

CIULLO

Lalla mia che faje lloco?

LALLA

540

Bell’ommo co chi l’aje?

CIULLO

Comme non me canusce, e no mme saje?

LALLA

Non t’aggio visto ancora.

CIULLO

Dimme, tu non si’ Lalla?

LALLA

Che pe chesso?

CIULLO

E non canusce Ciullo!...

LALLA

Io non te saccio.

CIULLO

545

Lalla tu vuoje, ch’io mora: stammatina

Non t’aggio dato li vestite mieje?

LALLA

O tu si’ pazzo, o staje chino de vino.

CIULLO

So’ Ciullo? tu si’ Lalla? ah lo penzava

Ca Lalla m’abborlava.

LALLA

550

Bello giovane mio, si quaccun’aota

Te fa star’accossì, te compatesco.

CIULLO

Addo’ vaje?...

LALLA

Tu che buoje?...

CIULLO

Io mo’ mpazzesco.

LALLA

Non so’ chella che dice

CIULLO

Ciullo, Ciullo nfelice!

555

E de chesta manera, comm’aje core

Tradì, chi pe tte more?

LALLA

Se pe mme te struje, e cuoce

Non so’ chella

Lalla bella,

560

Che recietto

Non te dà.

Va trasenno doce doce

No contiento

A chisto pietto,

565

E mme sento

Conzolà.

SCENA XIV

CIULLO, e po SEBEONE.

CIULLO

Ciullo ch’è stato chesto?

Nce vide, o no nce vide?

N’è Lalla? accossì credo: Comme cride?

SEBEONE

570

Mo’ vago a la jostizea.

E nce voglio fa mmattere na chianca.

CIULLO

Sebeo’?...

SEBEONE

Ciullo mio no cchiù: mme manca

E la vita, e lo sciato,

O sbregognato me.

CIULLO

Dimme ch’è stato?

SEBEONE

575

Lalla se nn’è fojuta,

E quaccheduno l’avarrà sbeata.

CIULLO

Io mo’ cca l’aggio vista

SEBEONE

Addove? quanno?

CIULLO

Dint’a sta casa cca se nn’è trasuta.

SCENA XV

SEBEONE, CIULLO, e LALLA a la fenesta.

SEBEONE

Lalla, Lalla

LALLA

Chi è lloco?

CIULLO

580

Che mmenzeone è chesta?

SEBEONE

Ncopp’a lloco, che faje?

LALLA

E a te che mporta?

SEBEONE

Comme che mporta? vuo’ vedè qua festa.

CIULLO

Chist’è n’aoto taluorno.

SEBEONE

Vuo’ vedè quacc’aggrisso.

LALLA

585

Tu chi si’?

SEBEONE

Non me saje?

CIULLO

Io resto ammisso.

LALLA

Chesta è la primma vota, che te vedo.

SEBEONE

Tornatenne a la casa, facce tosta.

LALLA

A qua casa?

SEBEONE

Bonora, chest’appriesso,

E bide si se sposta.

LALLA

590

Vuje state nzallanute.

CIULLO

Io moro ciesso.

SEBEONE

Vuo’, che nce saglia lloco

Sbregognata, schefienzea.

LALLA

Io so’ na locca, che ve dongo audienzea.

SEBEONE

Tozzolea mmalora

CIULLO

Oh Dio! va chiano.

SEBEONE

595

Che buo’ che scassa, lassa fare a mene.

SCENA XVI

TONNO, SEBEONE, CIULLO, e po RAPISTO.

TONNO

Oh deantane cioncale no vraccio

Da ssa porta, che buo’?

SEBEONE

La rrobba mia.

TONNO

Vattenne, o mo’ te faccio

Zompà da vocca ss’aote quatto mole.

SEBEONE

600

Vide quanta parole

Tene ss’allevrecato

TONNO

Ahù Cionchia.

CIULLO

Non aver’a paura.

TONNO

La paura

L’aggio lassata ncuorpo a Mamma mia.

SEBEONE

Cca voglio esser’acciso.

TONNO

605

Sebeo’ vavattenne, o te nce sbatto

Co la capo de pietto.

SEBEONE

Addove stammo?

CIULLO

Chiano, vi’ ch’è bregogna.

SEBEONE

O damme Lalla, o cca voglio esse mpiso.

TONNO

Chi Lalla? si’ mpazzuto?

SEBEONE

610

Si’ tu, no nzallanuto.

RAPISTO

Che d’è stato sacciammo?

SEBEONE

Sso frabbutto breccone, n’hà fojuto

Lalla mia da la casa.

RAPISTO

O che nzalata!

TONNO

Dice addavero, o abburle

615

O mme vota, lo mmale de la luna:

E cca mmiezo t’accido, e la fenesco.

CIULLO

Io cchiù sento, e mpazzesco.

RAPISTO

Ha bistato lo muorzo tenneriello.

SEBEONE

Non se l’agliottarrà comme se crede

620

Ca nce aggio da fa ammattere lo greciello.

TONNO

Vavattenne, o mo’ te smosso.

SEBEONE

E che buo’ te rompa n’uosso.

RAPISTO

Statt’abiento.

CIULLO

Jammoncenne.

TONNO - SEBEONE

Io te voglio stroppeà.

RAPISTO - CIULLO

625

Fremma mo’, non te vuo’ sta.

SEBEONE

Siente guitto nce vedimmo,

E t’agghiusto le costate.

TONNO

Vecchiacone leva rimmo

Ca nne faccio sopressate.

TONNO - SEBEONE

630

O te manno a mmedecà.

RAPISTO - CIULLO

O conchia falle dà.