Li duje figlie a no ventre

Li duje figlie a no ventre, Napoli, Ricciardo, 1725

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO TIERZO

SCENA I

LALLA, e TELLA da la Casa.

LALLA

So’ asciuta da li panne

1155

Pe chello, che mm’aje ditto,

E sto penzanno schitto

Ca chiss’è Lillo mio, che m’assemeglia.

TELLA

Tutt’a te speccecato,

E sacce c ape mme sta spantecato.

LALLA

1160

Chiss’è lo gusto mio

C’accossì fenarranno sti malanne.

TELLA

Comme dice?...

LALLA

Te prego

Vuogliele bene

TELLA

E Ciullo?

LALLA

Ciull’è no tradetore

1165

T’hà cagnato pe Lalla,

Tu cagnalo pe Lillo.

TELLA

Uh che mme dice!

LALLA

Cossì sarraje contenta, ed io felice.

TELLA

Accossì boglio fa, ca già l’ammore

De Lillo, caccia Ciullo da lo core.

SCENA II

RITA, e li mmedeseme.

RITA

1170

Chisto mme pare Lillo,

E che bo’ di’ ca sta vestuto femmena.

LALLA

E accossì Tella mia

Non ce perdere tiempo.

TELLA

Tutto mme lo fa fa la gelosia.

RITA

1175

Lillo che faje?...

LALLA

Tu da do’ si’ asciuta.

TELLA

Chi Lillo? chest’è Lalla

RITA

N’è lo vero.

TELLA

Gnorsì

LALLA

Tu si’ mpazzuta.

RITA

Ora sienteme Tella

Chesta che bide cca co ssa gonnella,

1180

È Lillo, e cca mo’ nnante ll’aggio visto

Ca moreva pe tene.

LALLA

Tu pe cierte sbarie

RITA

Chisto, chisto

Nziemo co Ciullo no lo ssaje c’hà ditto.

TELLA

Io so’ fora de sinno: uh ch’arravuoglio!

LALLA

1185

Tu nce vuo’ nzallanì

TELLA

Vide che mbruoglio!

RITA

Mo’ s’è bestuta femmena

Pe non dare sospetto,

E poterte gabbà

LALLA

Si’ pazza cierto.

RITA

E levarete Ciullo da lo pietto.

TELLA

1190

Che sento?...

RITA

È no frabutto

LALLA

Addove? quanno?

RITA

Comme fa lo gnorante.

TELLA

Io non saccio che di’!...

RITA

Vi’ che forfante.

TELLA

Donca sto trademiento

Contra mme vaje tessenno:

1195

Sbignamette da nante

LALLA

Oh che trommiento!

RITA

Vi’ ca non sa che di’

TELLA

Cierto stordesco.

RITA

Tradetore

LALLA

Te nganne.

TELLA

Io mo’ mpazzesco.

RITA

T’aggio ditto, che nc’è: tu sacce fare

Si no mme n’avarraje da nnommenare.

TELLA

1200

Si’ tradetore?

LALLA

Non è lo vero.

TELLA

E ccoss’ammore

Mme vuo’ ngannà?

LALLA

E lo penziero

1205

Te fa sbaglià.

TELLA

So’ tutta sdigno

So’ tutta fuoco

Sfratta da cca.

LALLA

Cielo benigno

1210

Fremma no poco

Sienteme cca.

TELLA

Lillo te fujo

Ca mm’aje traduta:

Ciullo mme pento

1215

Non mme lassà.

LALLA

Oh che trommiento

Ciullo lo sgrato

Semp’hà penzato

De te lassà.

SCENA III

GRANNIZEA coll’aote fegliole da la Taverna MENELLA, e RAPISTO vestuto femmena.

GRANNIZEA

1220

Che te pare staje buono

Puo’ ghì cierto a la Zita

MENELLA

E pare mmeretate

La cchiù bella fegliola

Ch’aggi’Antegnano

RAPISTO

Affé ca vao de truono,

1225

E te fa pazzeà propio sta vita.

Sta manella gentile

Sto naso prefelato,

E sto pedillo accuoncio

Te lo fa sommozzà qua nnammorato.

MENELLA

1230

Rapi’, si te vedesse

Porzì no stommacato

Addeventarria subbeto ncappato.

GRANNIZEA

Conca te vedarrà pe ssa bellezza

Jarrà morenno

RAPISTO

1235

E le pò ascì lo spireto

Ca si non ved’argiamma nquantetate

Mme metto ngravetate,

E no le dongo audienzea.

MENELLA

Faje cierto de mescescia

1240

Ca si’ mprommiso a mme giojello caro.

GRANNIZEA

E senza li denare

Non te se pò parlare?...

RAPISTO

Non Segnore.

GRANNIZEA

E pecché?

RAPISTO

Ca chist’è l’uso

Non c’è landra chiarchiolla, o perchiepetola

1245

Che no la siente dire

Un taglio di velluto,

Un abito vorrei di broccato

Due pendenti, un diamante, od un rubino,

Po s’arremmedea co no lioncino.

GRANNIZEA

1250

E tu pur’accossì pretienne fare.

RAPISTO

Pe sso tuosto si no tu può ammarciare.

Sì co le femmene

Tu faje squasille

So’ cose morte

1255

Va frietille;

Ca non te vonno

Manco sentì.

Denare a tommola

Schitto nce ponno:

1260

Votra fellusse

O janche, o russe:

Ca tu le puote

Pe nzi’ a morì.

GRANNIZEA

Sa che schiattiglia, c’aggio

1265

Ca chella figlia mia no lo bo’ ntennere.

RAPISTO

Damme lo veveraggio

Ca te la faccio tennera,

Comm’a fico pallana.

MENELLA

Chessa n’è cosa bona,

1270

Ammà co lo nteresso

Lo face schitto quacche basciajola,

O chi va pe le chiazze sola, sola.

GRANNIZEA

Cca che facimmo co le mmano mmano.

RAPISTO

Facimmo na ballata

1275

E abballanno aballanno jammoncenne

Pe tutto sto paese

GRANNIZEA

Ll’aie pensata

Ca no nce manca d’abboscà quaccosa.

RAPISTO

Jammo addo Ciullo nuosto,

Jamm’addo Cicc’Antuono,

1280

Ca non ce manca cierto lo perduono.

GRANNIZEA

Qual’abballo facimmo?

RAPISTO

Ncignammo la spallata

E po lo mattacino, o la ntreozata. (cca s’abballa, e se canta.)

GRANNIZEA - MENELLA - RAPISTO

E facimmo la sfacciata.

MENELLA

1285

Presentuso che buoje da me.

RAPISTO

Presentosa nzeccat’a me.

Io vorria chiss’uocchie da fora.

GRANNIZEA

Che te torca la mmalora.

MENELLA

Quant’è brutto videlo te.

RAPISTO

1290

Ment’è chesso governate. (Se nne traseno abballanno, sonanno, e cantanno.)

SCENA IV

SEBEONE, e TONNO.

SEBEONE

Io non saccio che dice;

Lalla da dece juorne

Stace a la casa mia

TONNO

E pur’è bero

Ca non è stata maje a sti contuorne

1295

Se non che stammatina

Ll’aggio jut’a pegliar’a la Renella.

SEBEONE

Oh chesta, sì ch’è bella:

Mme vuo’ fa revotare le stentine.

Da ch’è mancata da la casa mia

1300

S’è bista lloco ncoppa

Addonca chessa è essa

TONNO

E statte zitto

Sarrà quacched’un aota

SEBEONE

E chesso schitto

E ll’aoto vestut’ommo

Manco sarrà la stessa?...

TONNO

Io so’ confuso.

SEBEONE

1305

E a mm emme va prodendo lo caruso.

Na sberressa de chesse marvasa

Negra casa

Addo’ mette lo pede:

O te zuca quant’aje, quanto tiene,

1310

O sbreguogno a la fine te dà.

Sbalestrata! Maje sazia se vede

Nnammorata! mantiene, mantiene,

A la scesa no carro, che bola,

Na fegliola, che bo’ sgargeà.

SCENA V

TONNO, e po RITA.

TONNO

1315

So’ fatto miezo stuoteco

So’ storduto, non saccio, che mme dire,

E la cana de Rita

Pe cchiù trommiente, o Dio, mme fa morire.

RITA

Tonno, no ca non muore

1320

E non te serve a fa lo spantecato,

Ca so’ parole perze.

TONNO

E pecché?...

RITA

Ca non credo a nnammorate.

TONNO

Che non dico lo vero?

RITA

O lo vero, o boscia

1325

Accossì mm’hà mparata mamma mia.

TONNO

Ma io so’ d’aota pasta.

RITA

Tutte quante te diceno accossine

Quanno simm’a lo stregne de li sacche

Le trove ciento miglie fore crapa.

TONNO

1330

Ah Rita tu non vide

Quanto mm’arde, martielle, e mme consume.

RITA

E battenne, ca pare

Ssi’ cacapozonette, o ssi’ milorde

Co le folleche sfatte

1335

E co li cauzoncielle a tre bottune

Vonno fa co le femmene sbaratte.

TONNO

Co mmico non c’è chesso

Bellezza cara mia, doce trasoro

Se pe tte mme ne squaglio, abbruscio e moro.

1340

Sto core se struje

Tu cana, mme fuje,

E de sti trommiente

Non siente

Piatà.

1345

L’affanno m’accide

Non dormo, mme fragno

Tu vide,

Ca chiagno,

E staje a borlà.

SCENA VI

RITA, e po GRANNIZEA.

RITA

1350

Chisto cca mme trommenta

E non sa ca sto core

Pe Lillo arde ed abbruscia, e maje n’abbenta.

GRANNIZEA

Che d’è maddamma mia?

Che sit’asciuta a fare lloco fore:

1355

Pate schianto de core

O quanta cosa tiene nfantasia.

RITA

Mamma lassame stare.

GRANNIZEA

Meglio pensasse a chello, ch’aie da fare.

RITA

Tu dalle ca te frusce, e de sta cosa

1360

Nne saccia cchiù de te

GRANNIZEA

Vi’ la moccosa

Vo’ mparare a la mamma de fa figlie.

RITA

Sì ma chisse consiglie

Erano buone, quanno

Parlavano li vuoje.

1365

Mo’, che lo munno cagna trattamiento

Abbesogna cagnare sentemiento.

GRANNIZEA

Uh figlia benedetta!

Crisce, fa annore a mammarella toja.

RITA

È ccossì, comme dico

1370

Non mme ghì nzallanenno

Se qua bota no ntenno.

Ca mo’ non simmo cchiù a lo tiempo antico.

GRANNIZEA

Beneditto lo latte, ch’aie zucato

Saputa figlia mia.

RITA

Lo Maretiello

1375

Vo’ esse giovaniello

Ca fa chello, che buoje

E niente se nne cura

S’addaventa crastato, o purp Voje.

Io non voglio

1380

Fegliolillo

Pe poterelo pe naso

Comm’a bufera portà.

Ca si ncaso

Po qua ghiuorno

1385

Soccedesse quacche mbruoglio

Lo stordesco co no strillo

E lo faccio accojetà.

GRANNIZEA

Bene mio, quanto sape sta fegliola:

Figlia propio a la mamma,

1390

Chesto vo’ di’ quann’ha na bona scola.

Quale mamma, tale figlia

Fa l’ammore, e chella piglia,

Si la vede, che s’alliscia

Essa subeto se striscia

1395

E te copea nzò che fa.

E no schiecco addo’ se mmira

Vace a spasso, e se la tira

Si se mette a la fenesta

Essa corre lesta lesta

1400

E na casa se nce fa.

SCENA VII

CIULLO Sulo.

CIULLO

Se pe mme so’ storduto

Pe tanta cose fore de li fore,

Che nfra cinco, o seie ore

Mme songo soccedute.

1405

Vorria parlà co Lalla.

Fremma addo’ vaje?... a chesta casa?... e dove?

Non saie ca non ce sta si sta addo Tella

Tozzoleammo chiano ca si chesta

Dice ca non mme sape O puro chella

1410

Mme sconceca lo juoco uh che tempesta!

Ma veccol’affacciata

Da dereto a lo vico, Ah Lalla mia,

Speranza de sto core

Agge de me piatà

SCENA VIII

LILLO, e lo mmedesemo.

LILLO

Lo Tradetore

1415

Sta parlanno co Tella, ah sgrato, sgrato.

CIULLO

Sì, vita de chest’arma

Sarraggio sempre tujo ment’aggio sciato.

LILLO

Ciullo la bella carma

Mm’aie ntrovolato mpietto.

CIULLO

1420

Non avere sospetto

Ch’io t’aggia da lassà

LILLO

Sciala crodele.

CIULLO

Comm’aie ditto?

LILLO

E resciate arma nfedele.

CIULLO

Ah sì: ma tu bellezza

Pensa a non mme tradire.

LILLO

1425

Io mme sento morire

E mme magno lo grasso co la rezza.

CIULLO

Non parlà de sto muodo

LILLO

Io cchiù non pozzo.

CIULLO

Ca sempe t’aggio ammato

E si fra cheste braccia

1430

Non t’aggia da tenè

LILLO

Muore spiatato.

CIULLO

Oh Dio che beseone!...

LILLO

Ah Sore mia.

CIULLO

Da vero so’ mpazzuto

Che d’è chesto che beo?...

LILLO

Sì so’ benuto.

CIULLO

Quanta Lalle nce so’? che mmenzeone.

LILLO

1435

Tu si’ restato ammisso?

Non mme respunne?...

CIULLO

Oh Dio! che ncanto è chisso!

Io non saccio addo’ stongo?

Io non saccio che bedo?

Cca nce stanno doie Lalle, e no lo credo.

SCENA IX

TELLA, e li stisse.

TELLA

1440

Ciullo, che t’è socciesso?

CIULLO

Songo fore de sinno

TELLA

E siente appriesso.

LILLO

Non te fa maraveglia

Ca vide, ca sta facce s’assemeglia

A chella ch’aje veduto a la fenestra;

1445

Ca simmo sore, e frate

Tutt’a no ventre nate.

CIULLO

Cchiù parle, cchiù confunne

Lo penziero, e la mente.

TELLA

Ma se tu nce refliette non è niente.

LILLO

1450

Io so’ Lillo, e song’ommo,

E pe no guajeciello

Che nn’aggio avuto mo’ lo sarvaguardea,

Pe stare cchiù securo

Mme vestiette da femmena

1455

Co lo nomme de Lalla sore mia.

Venn’addo Sebeone, che mm’è Zio.

Tu te nne nnammoraste:

Io ch’era giovaniello

Mme nnammoraje de Tella,

1460

Tutt’oje t’aggio ngannato,

Mo’ che benuta Lalla,

S’è scopierto lo ntrico,

E mme sarraje parente, e buon’ammico.

CIULLO

Addonca mme daie Lalla?...

LILLO

Sia la toja,

1465

E tu Tella mme ciede?...

CIULLO

Nce vo’ ditto.

LILLO

Chessa parola, mm’addecrea schitto.

Donca comme te siente?

CIULLO

So’ fenute pe mme tutte li stiente.

Mente steva desperato

1470

Tra li guaje, e tra l’affanne

Lillo mio, mm’aje consolato

E mme puorte mo’ a gaudè.

So’ scompute li malanne:

So’ sparute li trommiente:

1475

Stongo mmiezo a li contiente,

Che mme veneno da Te.

SCENA X

LILLO, e TELLA.

LILLO

Donca Tella mia cara

M’acciette tu pe schiavottiello tujo.

TELLA

Lillo da che te vidde

1480

Trasiste chiano chiano int’a sto pietto

E co doce dellietto

A lo fuoco d’ammore, ardo, e mme strujo

Veccome cca so’ so’ toja

Fanne chello, che buoje

LILLO

Oh gioja, oh gioja

1485

N’aggio cchiù, che sperare

Ogne guajo è squagliato,

Mo’ che Tella è la mia songo veato.

TELLA

Ed io tanto contenta

Che p’allegrezza st’arma mia n’abbenta.

1490

Canta la Tortorella

Si trova lo compagno:

Io pena cchiù non sento

Ch’aggio trovato già

Sta bella sciorte.

1495

Co chesta speranzella

No strillo cchiù, non chiagno

Mo’ veng’ogne trommiento.

C’affanno non mme dà

Manco la morte.

SCENA XI

SEBEONE, CIULLO, TONNO, e lo stisso.

SEBEONE

1500

Ora vide le cose comme vanno

Nuj’eramo mpazzute

CIULLO

Ecco cca Lillo.

LILLO

Zio caro mio perdoname,

Pe n’esse ranosciuto

TELLA

Già lo ssanno.

LILLO

E tu Tonno mio bello

1505

L’arror’è stato de no giovaniello.

TONNO

Io te resto obbrecato

E quanto gusto pozz’avè, che Tella

Te sia mogliera

CIULLO

E Lalla

Co mmico hà fatto già la parentezza,

1510

S’aspetta sulo lo consenzo vuosto.

LILLO

Io pe mme ll’aggio dato

SEBEONE

Ed io porzine.

CIULLO

Io moro d’allegrezza.

LILLO

Ed io songo contento senza fine.

SCENA XII

GRANNIZEA, RITA e li stisse, e po TELLA.

GRANNIZEA

Uh Tonno, Sebeone, Lillo, e Ciullo

1515

Quacche cosa farranno.

SEBEONE

Viene Rita, e Grannizea

E siate a parte a li contiente nuoste.

RITA

Che ve siete nzorate.

SEBEONE

Lillo hà pegliato Tella, e Ciullo Lalla.

GRANNIZEA

1520

E comme Lill’e Lalla

TONNO

Erano frate.

RITA

So’ pegliate li puoste.

LILLO

Ecco cca Tella.

CIULLO

Damme na voce a Lalla

TELLA

Sta corcata

Ncopp’a lo lietto pe la contentezza

D’avè visto lo frate, e non pò scennere.

SEBEONE

1525

Saglimmo ca le dammo st’allegrezza.

GRANNIZEA

Dice buono, ma primmo

Giacch’è ghiornata chesta de contiente

Tonno che nguadea Rita.

TONNO

E Sebeone

Che se piglia Grannizia.

GRANNIZEA

1530

Sia beneditto ca mme daje la vita.

RITA

E mente Lillo, e Ciullo so’ nzorate

Damme la mano, e sia o sanetate.

SCENA XIII

RAPISTO sonanno MENELLAco tutte le foretanelle, e li fegliule.

SEBEONE

Uh vecco a tiempo, a tiempo

Rapisto niemo co li ballarine.

TONNO

1535

Fenimmola sta festa.

CIULLO

Facimmo fa n’abballo.

LILLO

E saglieno lo majo

RAPISTO

Che cosa è chesta.

SEBEONE

Falle mett’a registro

Che ncignano l’abballo, e tu nfratanto

1540

Fa saglì li guagnune a saccheare.

RAPISTO

Eccoce leste: Dateve da fare. (Cca s’abballa, e se sacchea.)

TUTTE

E biva tutte, e biva.

MENELLA

Grannizea, Sebeo’, da quanto tiempo

Speresco pe Rapisto

1545

Lo vorria pe marito.

SEBEONE

Pigliatella

Ch’è figliola comprita.

RAPISTO

Sto pinolo d’aloja mme dà la vita.

SEBEONE

No cchiù saglimmo ncoppa.

GRANNIZEA

Dice buono.

TONNO

Jamm’a dà st’allegrezza a la sia Lalla.

RITA

1550

Ca tornammo da capo a pazzeare.

RAPISTO

E non se parla maje de taffeare.

TUTTE

Oh che gusto, o che contiento

Nce sentimmo addecreà

E scomputo ogne trommiento

1555

Jammo tutt’a grelleà