Lo finto laccheo

Lo finto laccheo, Napoli, A Spese de li Mpressarie, 1725

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

Lo finto laccheo

Commeddeja de lo Segnore Bernardo Saddumene.

Da rappresentarese a lo Tiatro de li Sciorentine sto Vierno de lo 1725.

Dedecata a l’Accellentissemo Segnore Lo Segnore Conte Alberto d’Althann. Degnissemo Mepote de Sò Amenenzia lo Segnore Cardenale Michele Federico d’Althann Vecerrè, e Capetanio Generale ’n chisto Regno de Napole.

A Napole MDCCXXV. A Spese de li Mpressarie.

Accellentiss. Segnore.

Spero, che gradarrite co la soleta benegnetà bosta, l’Umelissema offerta, che ve faccio de st’auta Commeddeja de LO FINTO LACCHEO, quale metto sotta la gran protezzione de V. Acc. acciò che se renna cchiù degna de l’applauso, che pare, che da se stessa se mmereta: Ve suppleco a non defraudarela ntanto de l’onore de venirel’a sentì cchiù de na vota; già che io resto pe sempe protestannome.

De V. Acc.

Umeliss. e Devotiss. Schiavo

Carlo Garzia.

A chì hà golio

de leggere.

Core mio bello; già che la Burletta, che te fece st’Autunno de la VECCHIA SORDA non te despiacette; spero che sta Commeddeja de LO FINTO LACCHEO, che te faccio sentire mò sto Vierno, t’aggia da dare cchiù gusto, perche otra lo sfizejo, che te darranno le ’parte graziose; godarraje senza dubbejo de lo ntrico, e de le passiune de le parte sode porzì. Te prego a leggerla, e sentirela co tutta l’attenzione, già che io pe ben servirete, Ll’aggio de la stessa manera considerata, e scritta: Sacce però, ca si te piaciarrà, sarrà signo ca l’Autore nò scrive male, e si nò, sarrà nzegnale ca tù non liegge buono, e te sò Cuoco.

De la Favola.

Limpia Rocchetta figlia de no Gentelommo de Salierno, mese tanto affetto à Michelino Perrella, puro giovene Salernetano, che de 12. anne l’arrevaje a fà patrone de sé stessa; ma perche Michelino fece n’ommecidejo a lo Paese, dette parola a Limpia de matremmonio; e pò se nne fojette de pressa fore Regno: Iette spierto dece anne, ncapo de li quale, essenno agghiustate le cose soje se nne voze tornare a Salierno, ma passanno pe Napole, se nnammoraje de Peppitta figlia de Gasparro Ammennola, e perche trovaje tutta la correspondenzia se trattenne a Napole duje anne: saputase da Limpia nòn sulo la vennta soja a Napole, ma porzì l’ammore co Peppitta; se ntese tanto corriva, che se resolvette de venire accompagnata co no crejato fedato de la casa soja a mpedire de quarche manera, che non se facesse lo matremmonio tra isso, e Peppitta, e fece vestire lo Crejato da Cavaliero sotta nomme de lo Barone Renza, e essa se vestette da Laccheo sotta nomme de Marchetto crejato de sto Barone, e dette a rentennere a Gasparro Ammennola, ca lo Patrone sujo s’era tanto ncrapecciato de la figlia, che si nce la deva l’avarria addotata de tremila docate, e chesto nce lo screvette primmo a lo Viecchio, c’azzattaje lo partito, ma la figlia non ne voze fà carte; e perche l’accommenzaje a piacere lo Laccheo non canosciuto nne nasce chello, che sentarraje appriesso.

La venuta de Limpia pè maro, s’è fatta pe dà gusto a chì porta li nteresse de lo Teatro, perche l’Autore de n’anta manera cchiù propia l’aveva desposta.

Perzonagge.

LIMPIA Gentildonna de Salierno nnamorata de Michelino: sotta nomme de Marchetto, e se fegne Laccheo de Stuppolo servetore sujo.

MICHELINO Gentelommo de Salierno nnamorato de Peppitta.

PEPPITTA Figlia de Gasparro Ammennola innamorata de Michelino.

La Signora Ippoleta Costa

FONZILLO nnammorato de Peppitta

La Segnora Laura Cesarini.

GASPARRO Ammennola, Viecchio Napoletano, Patre de Peppitta, e nnammorato de Renella.

PORZIA Vecchia baggiana

Lo Signore Simone de Farco.

RENELLA Figlia soja.

La Segnora Antonia Cermenati.

STUPPOLO Creato de Limpia, che se fegne lo Barone Renza patrone de la stessa.

Lo Segnore Giovanne Romaniello.

La Scena se fegne a Napole.

Museca de lo segnore Giuseppe de Majo Masto de Cappella Napoletano.