Lo finto laccheo

Lo finto laccheo, Napoli, A Spese de li Mpressarie, 1725

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO PRIMMO.

SCENA I

GASPARRO, e PEPPITTA contrastanno da la Casa.

PEPPITTA

Non serve Tata mio, ca nò lo voglio.

GASPARRO

Despriezze no Barone

Che te vole addotà!

PEPPITTA

Pò esse Prencepe.

GASPARRO

Uno ch’è ricco affunno!

PEPPITTA

Sia puro lo primm’ommo de sto Munno.

GASPARRO

Chisto mò vene apposta,

Pe te sposà.

PEPPITTA

Che se nnè torn’arreto.

GASPARRO

Or’io nc’aggio mpegnata la parola.

PEPPITTA

Tù la potive Vennere.

GASPARRO

(Chest’è sopierchio mò: resoluzione)

Io songo lo Patrone,

E tù pè forza ll’aje da fare.

PEPPITTA

Tata;

Te può quietà pe mmò;

Ca deciaraggio sempe, nò, nò, nò.

GASPARRO

Peppitta obbedisce,

Ca Tata te vatte;

E tanno fenisce

De dicere nò.

Io saccio chì vuoje

Pè chesto te sbatte:

Ma parle à li gruoje,

Ca Tata non vo’.

SCENA II

PEPPITTA, e pò MICHELINO.

PEPPITTA

Da dov’è sciuto mò sto sì Barone?

Io tradì Michelino?

Ah primma lo Destino

Me vedarrà morì.

MICHELINO

(Vecco Peppitta)

Che nc’è bellezza mia?

PEPPITTA

Na gran desditta.

MICHELINO

Ed è?

PEPPITTA

Ca chillo pazzo de Gnopatre

’Me vole mmaretate

Co nò cierto Barone...

Barone Renza, si non faccio arrore.

MICHELINO

Ah! sta nova ’me penetra lo Core.

PEPPITTA

Nò; non te desperare,

Ca no lo voglio; e quanno

Lo Sole vedarraje, tinto, e annegruto;

Tanno dì ca Peppitta t’hà traduto.

MICHELINO

Ah! bella sciamma mia, ch’aggio paura.

PEPPITTA

Non dobbetare: damme

Ssa mano. Chesta fede t’assecura.

Primma de te lassà

Mme vedarraje morì

Bell’arma mia!

E si sapesse o caro

D’averte da tradì,

À mmaro

Mò à ghiettà

Me nne jarria.

SCENA III

FONZILLO, e MICHELINO.

FONZILLO

Votta sì Michelino,

Tù curre da ccà attuorno

Commo ll’Urzo a lo mmele.

MICHELINO

Ah! Fonzo mio fedele

Aggio perza Peppitta.

FONZILLO

(Volesselo la sciorte) E commo? parla?

MICHELINO

Se la piglia no cierto

Barone Renza.

FONZILLO

Bravo.

O bello nomme, lo Barone Renza!

Ah, ah, ah, ah, ah, sarrà quarche redicolo,

Ò quarche rracchio pe sì affè.

MICHELINO

Che mporta

Diceno c’hà denare,

E lo Patre nce ngrina.

FONZILLO

Pò essere, che chesto t’arroina!

Ma Peppa, che nne dice de ssà sciorte?

MICHELINO

Ca cchiù priesto se nguadeja cò la morte.

FONZILLO

E Femmena però, se pò mutare.

MICHELINO

Se pò mutare, è beretà: ma siente;

Mente, che Michelino avarrà vita,

N’auto non l’avarrà.

FONZILLO

Non dì accossine.

MICHELINO

Nò; lo credere è bano

Che ad autre Peppa mia stenna la mano.

Chì pretenne d’avè ssà bellezza,

Vo’ à li scuoglie levà la fermezza,

E lo moto à lo Mare fermà!

Essa stace ccà dinto guardata,

E nfì à tanto che st’arma è spirata,

Sempe chiusa ccà dinto starrà.

SCENA IV

FONZILLO sulo.

FONZILLO

Si Peppa se pigliasse stò Barone

Non mme despiaciarria,

Ca non l’avarria chisto,

Già che non vo’ la sgrata essere mia,

E non me vo’ pe Michelino; Isso

’Me la scippa da mano: Però boglio

Tessere pe despietto

De chisto ch’essa vo’, quarche arravuoglio.

Già che sto bello Sole,

Essere mio non vo’;

Manco chì essa vole

Ll’aggio da fà piglià.

Canosciarrà la sgrata

Quanto lo sdigno pò:

Ca st’arma desprezzata

Se pote vennecà.

SCENA V

STUPPOLO vestuto da Barone, e LIMPIA vestuta da Laccheo finto Marchetto Crejato sujo, che sbarcano.

STUPPOLO

Sia laudato lo Cielo

Cà già simmo arrevate a sarvamiento.

LIMPIA

Siente Stuppolo penza,,,

STUPPOLO

Gnorsì, ca songo lo Barone Renza.

LIMPIA

E ca io songo Limpia

Patrona toja; E non pe auto fine

Mmè songo de stò muodo travestuta,

100

Che pè trovà lo nfammo Michelino,

Che mm’hà traduta.

STUPPOLO

Indegno marranchino!

LIMPIA

Già lo Patre de chella ch’isso vole

Nc’hà scritto, ca ccà abbeta: E hà prommisso,

De dà la figlia attene.

STUPPOLO

105

Mperrò, pur che la figlia

Non sia quarche mmalora!

LIMPIA

Nò; è bella, e chesto è chello che m’accora.

STUPPOLO

E si è bella, e s’addona

Ca chesta mia n’è mutria de Barone,

110

E mme chianta?

LIMPIA

Nò, à chesto nce penz’io:

Vasta, cò stà menzione, e li denare

Voglio ssò matremonio sconcecare.

STUPPOLO

Ora via mò, provammonce

Commo riesco a ’commannà; Marchetto?

115

Tu non respunne! Olà?

LIMPIA

Via, dì, che buoje.

STUPPOLO

Mannà li vische tuoje;

Commo accossì respunne a lo Patrone!

E te’n ridi? Forbisci ste fangose.

LIMPIA

Via, vaje buono, vaje buono.

STUPPOLO

120

Lo ssaccio ca vao buono: annetta lloco.

LIMPIA

Tè voglio dà na scoppola sollenne.

STUPPOLO

Nò lo buò fare? spogliat’e battenne.

LIMPIA

(Che birbante.)

STUPPOLO

Uscia guasta la ’menzione.

LIMPIA

Via non fa lo buffone

125

Ca lo Patrone secunno l’appuntato

Mò assommarrà da ccà. Miettete nsodo.

STUPPOLO

Nsodo gnorsì.

LIMPIA

Stà accuorto.

STUPPOLO

Accuorto sì Segnora.

LIMPIA

Ca volimmo portà sta varca npuorto.

130

Justo Cielo tù che bide

Quanto fà sto tradetore;

Tu defienneme l’onore,

Tù lo venneca pe mmè.

Ca si tù sta mpresa guide,

135

Vedarrà chell’arma sgrata,

Ca non resta mmennecata

Chì confida, e spera à Tè!

STUPPOLO

Chiano fremma, addo’ vaje tanto de pressa.

LIMPIA

Aje raggione; stò fora de mè stessa.

SCENA VI

PORZIA, e li stisse.

PORZIA

140

A visa chì sarrà stò Pappagallo! (vedendo Stuppolo)

Ma che bello Laccheo!

Commo vace polito!

Te lloco; che sarria,

E accossì avesse Porzia nò Marito?

LIMPIA

145

Bella femmena mia,

Dimme stà ccà de casa

Lo sì Casparro Ammennola?

PORZIA

Si lloco appunto. (è buono

Comm’a lo buono juorno.)

150

Bello giovane famme nò piacere,

Chisso che t’è? Patrone?

LIMPIA

Perche lo buò sapere?

PORZIA

Ca mme pare lo Sinnaco de Trocchia!

STUPPOLO

E tù ammè na ranonchia

155

De Pascarola.

LIMPIA

ah, ah, che risa.

PORZIA

Core mio te mancava

N’auto Patrone meglio:

Non vì, ca chisto pare

Justo nò guarda pinte de Cajevano!

STUPPOLO

160

E tù, na scaccia folleche d’Agnano.

LIMPIA

Via Signore quietateve,

E uscia porta respetto a li Segnure.

PORZIA

Ammè ranonchia? ammè? levate Ninno.

Lassame stroppeja ssò Strafalario.

STUPPOLO

165

Oje smamma peccerille,

Che buò che dica à chisto,

Che te vatta à deritto?

PORZIA

Ammè?

LIMPIA

(Stuppolo via)

STUPPOLO

Mà...

LIMPIA

(Statte zitto.)

Compatesca ussoria

170

Ca chisto è miezo pazzo.

PORZIA

Pè ttè lo lasso ire gioja mia,

Dimm’ammè, si nzorato?

LIMPIA

Gnornò.

PORZIA

Te vuo’ nzorare?

LIMPIA

Manco.

PORZIA

E perche? Sì nzorate.

LIMPIA

175

Nce le pierde co mmico stì consiglie.

PORZIA

E perche?

LIMPIA

Ca mme mancano li stiglie.

STUPPOLO

(O bravo.)

PORZIA

E ch’aje da fà lo masto d’ascia?

LIMPIA

(Stò Leone de cascia

Che bo’ da mè?) (a Stuppolo)

STUPPOLO

(Ciaschejala.)

PORZIA

180

Commo dice?

LIMPIA

Ca tiene

Na bella grazia.

PORZIA

À lo commanno tujo.

(eh, s’io faccio sta botta...)

LIMPIA

Io creo, ca tu sarraje...

PORZIA

Janca, e tennera cchiù de na recotta!

185

So’ stè carne na pasta reale;

Sta vocchella no mele rosato,

(Che sbarvato)

Si buono si affè.

Ncè n’Abbate, che bà cò l’acchiale,

190

Che bà sempe jettanno scarole

Perche bole

Na cosa da mè.

SCENA VII

LIMPIA, STUPPOLO, e PEPPITTA.

STUPPOLO

È curiosa.

LIMPIA

È pasto de Segnore.

STUPPOLO

Magna, magna vi è chesta la predetta.

LIMPIA

195

Cierto ca sarrà essa.

PEPPITTA

Me nne può fare cchiù sciorte ’mardetta.

LIMPIA

Signora mia scusateme l’ardire, (à Peppitta)

Lo sì Gasparro tricarrà a benire?

PEPPITTA

(Non è brutto stò Giovene!) Non troppo.

LIMPIA

200

Obblegato a Ussoria.

STUPPOLO

(N’è male lo rovagno!) (vedenno Peppitta)

PEPPITTA

(Chisto fuorze sarrà chillo Barone,)

Che bolite da Tata?

LIMPIA

Che buje le site figlia?

PEPPITTA

205

Gnorsì.

LIMPIA

Vejat’a buje!

PEPPITTA

Perche?

LIMPIA

Ca godarrite la fortuna

D’avè stò Cavaliero pe marito. (Peppitta ride.)

STUPPOLO

(Nò le sonarrà troppo lo partito.)

LIMPIA

Segnore, che v’addota

210

De tremila ducate.

PEPPITTA

(Se pò abbottà de lota.)

LIMPIA

Niente non ’me responne?

PEPPITTA

Ssò Segnore,

Pe mmè se nne pò stare a diente asciutte,

Ca nò lo voglio.

STUPPOLO

(Bonanotte a tutte:

215

Mò che mmè so’ nzorato

Mme nne pozzo tornare a lo Paese.

Non te l’aggio ditt’io

Ca chesta n’era facce de Barone.)

LIMPIA

(N’è niente) Sio Barone

220

N’è chesta chella giovane, la quale

Vuje volite addotare?

STUPPOLO

Questa gnorsì.

PEPPITTA

Bello Provinciale?

STUPPOLO

Nia Signora, e Padrona osservandissima.

Io... Io...

PEPPITTA

Vi mando col presente

225

Una soma di fistoli, e mmalanni.

STUPPOLO

A chì mò?) chesta parla a lo sproposeto. (a Limpia.)

PEPPITTA

Seguitate la lettera. (a Stuppolo.)

LIMPIA

Si tu non saje che dire. (a Stuppolo.)

PEPPITTA

(Chisto de risa ’me farrà morire.)

STUPPOLO

230

Crede Ussoria, ch’io sia quarche chiafeo?

PEPPITTA

(Quanto cchiù tengo mente a ssò Laccheo

Tanto cchiù ’me pejace.)

STUPPOLO

Voltate in quà la mutria. (a Peppitta.)

PEPPITTA

Aggiate pace. (a Stuppolo.)

STUPPOLO

E che ghiammo cercanno la lemmosena!

235

(Che buo’ nguaggià, ca chesta (a Limpia.)

Mm’ave pegliato pe peducchio nfronte?)

Ma, Signora il partito... (a Peppitta.)

LIMPIA

(Abbrevia, abbrevia) (a Stuppolo.)

PEPPITTA

(Commo và polito!) (tenenno mente a Limpia.)

STUPPOLO

Bella tu sei... tu sei...

240

(Marche’, me so’ mbrogliato.)

Tu sei un... anzi lei...

Bel chilleto d’Amor; commo si bona.

Abbia de mè pietà (Peppitta tene mente sulo a Limpia.)

Bel musso ncannellato,

245

(Nce la potimmo fà

Ca nò le sona.)

PEPPITTA

Addo’ vaje bello giovene? (a Limpia.)

Sienteme na parola.

LIMPIA

Ve stò servenno: Sì Baro’ a la Casa

250

Mme potite aspettare.

STUPPOLO

Bene, bene. (da dinto.)

SCENA VIII

PEPPITTA, e LIMPIA.

LIMPIA

Signora mia, che v’aggio da servire?

PEPPITTA

(Chisto mme fà morire.)

Non pare facce chesta

De Servetore.

LIMPIA

Accossì bo’ la sciorte.

PEPPITTA

255

Potarrisse stà ncorte

De no Prencepe; e staje, cò stò sciasciucco!

LIMPIA

Lassamm’ire sta storia,

E no me refrescate

De le ccose passate la memmoria.

260

Già che sprezzate lo Patrone, voglio

Peglià le pposte pe ncè nne tornare.

PEPPITTA

Nò, nò; fallo aspettare

N’auto paro de juorne; e tu nfratanto

Dimme chì si.

LIMPIA

Non pozzo.

PEPPITTA

265

Ma puro via.

LIMPIA

Songo nò schiavo vuosto.

PEPPITTA

E bia dillo.

LIMPIA

Segnora,

Lo ssaparrite appriesso.

PEPPITTA

Nò dillo mò.

LIMPIA

Nò, non’è tiempo ancora.

PEPPITTA

Mo lo boglio sapere,

270

Né tù m’aje da negare stò piacere.

LIMPIA

So’ na chianta senza frutte;

No ciardino senza sciure;

E so’ tutte

Le sbenture

275

Radecate mpietto ammè.

Tanto che, si tù sapisse

Co chì parle; deciarrisse,

Commo campe? nigro tè!

SCENA IX

PEPPITTA, PORZIA, RENELLA, pò torna LIMPIA, e GASPARRO.

PEPPITTA

Chì sa chì è chisto? vi che tentazione

280

Sarrà pe mmè! mm’hà genio. Ammore

Quanno manco te pienze te ncè coglie!

RENELLA

Oh Ddio! (Porzia esce appriesso, e sente.)

Sia Peppa dov’è ghiuto

Chillo bello Laccheo?

PEPPITTA

Perché? che nn’aje da fare?

RENELLA

285

Ncè voleva parlare.

PEPPITTA

Che te jeva a lo genio?

RENELLA

Ma quanto!

PORZIA

(Uh! negra mene e pozzo sentì tanto?)

Nè nè sia Perchiepetola,

Chi jate addimmannanno?

GASPARRO

290

Si non se piglia chisto io mo la scanno. (à Limpia.)

PEPPITTA

Ò vecco Tata.

GASPARRO

Commo mozzecutola.

Tù mò despriezze lo Barone Renza?

PEPPITTA

Non te voglio responnere cca fora.

Jammo ncoppa.

GASPARRO

Saglimmo.

LIMPIA

295

Ve so’ servo.

PEPPITTA

Nò saglience tù ancora. (Saglieno ncoppa Gaspero Limpia, e Peppitta.)

SCENA X

PORZIA, e RENELLA.

PORZIA

Nò, non mme serve affatto ssò partito,

Ca te scorteco viva

Si cchiù te sento nnommenà marito.

RENELLA

300

(Io crepo si non parlo!)

E tù perché quann’iere giovenella

Te lo pigliaste?

PORZIA

(Ora chest’è bella.)

Ch’accossì boze lo sì Tatà mio.

RENELLA

E mò accossì bogl’io.

PORZIA

305

Ccossì buoje tune? dive fare chello

Che bo’ mammeta.

RENELLA

Uh Mamma,

Cà n’è cchiù chillo tiempo,

Che le ffiglie obbedevano a le mamme.

PORZIA

Ih! negramene! Tù che baje cercanno

310

Che te scippa ssì zirole?

RENELLA

Voglio na cosa, che mo tutte ll’anno:

E tune si ll’avisse

Non credo mamma, ca ncè sputarrisse.

Mò ogne Zetella

315

vo’ fare l’ammore:

E schitto Renella

Non l’ave da fà?

Io puro sto mbruoglio

Lo voglio

320

Provà.

Chì dice ch’è buono,

Chì dice ch’è caro;

Si non me lo mparo

Me ponno gabbà!

325

Mperrò mamma mia

Sapè lo borria

Pe coriosetà.

SCENA XI

PORZIA sola.

Chesta da dov’è sciuta

Che sape tanto! e puro

330

Io mme ll’aggio cresciuta

Comm’a na Monacella reterata:

So’ chiacchiere; na figlia

Nche t’è asciuta da sotta, è addottorata.

Quanno tiene na figlia verruta

335

L’aje d’ascià lo marito de pressa,

Ca si nò, se la trov’essa stessa,

E nuje mamme restammo accossì.

Si pò fosse no poco arzelluta

Nott’e ghiuorno te ll’aje da guardare,

340

Ca si none... non pozzo parlare

Ma si sferro lo ddico, e bonnì.

SCENA XII

MICHELINO, FONZILLO, pò GASPARRO PEPPITTA, e LIMPIA da Casa.

FONZILLO

Ah, ah; Vì che Barone!

MICHELINO

È corejuso.

FONZILLO

E bo’ parlà Toscano.

MICHELINO

E chisto a Peppa mia vo’ dà la mano?

FONZILLO

345

Eh! chì sà...

MICHELINO

Nò Fonzì lo sì Barone

Se nne pò tornà cierto a ’lo paese.

FONZILLO

Nò, ch’ave no Laccheo trafechino.

MICHELINO

Ma Peppa non tradesce Michelino.

FONZILLO

Pare, che s’apra ccà.

MICHELINO

Sì ssì scostammonce.

GASPARRO

350

Dimme à lo sì Barone

Cà già lo matremonio, è stabelito.

Ca isso, è già Marito

De Peppa mia. N’è bero? (à Peppitta.)

PEPPITTA

Sì Segnore.

FONZILLO

(Che te pare?)

MICHELINO

(A lo Core.

355

Già mme sento trasire lo venino.)

FONZILLO

Ma Peppa non tradesce Michelino!

Ah, ah, ah, ah, ah; che dice mo?

MICHELINO

(So’ muorto.)

PEPPITTA

Siente Marchetto. Tata collecienzia.

MICHELINO

(Fonzo ch’è chesto?)

FONZILLO

Vi che confedenzia!

MICHELINO

360

Io la voglio scannà nnanze à lo Patre.

FONZILLO

Nò nò stamm’à bedere pe nfi mponta.

PEPPITTA

Fatte à bedè da ccà. (à Limpia.)

LIMPIA

Lassateve servì.

FONZILLO

Siente ssa jonta. (à Michelino.)

GASPARRO

Tù saglietenne ncoppa, ca mò torno. (se nne và.)

PEPPITTA

365

(Aggio ditto ca sine

Pe mme levare Patremo da tuorno.)

FONZILLO

Nò Michelino mio

Videtello cò essa.

MICHELINO

Addio.

FONZILLO

Addio.

SCENA XIII

MICHELINO, e PEPPITTA.

PEPPITTA

Saglimmoncenne.

MICHELINO

Ferma

370

Anema renegata

Femmena ndegna! sgrata

Nfedele ngannatrice...

PEPPITTA

Che d’è chesto che dice!

MICHELINO

Dico chello che d’è. Non t’accostare

375

Fuje da nanze ammè, ca st’uocchie mieje

Non ponno sopportà la vista ndegna,

De na fauza; Na...

PEPPITTA

Zitto

Fatte passà ssà collera.

MICHELINO

Deciteme vuje furie de l’abbisso

380

Sì nce stà lloco abbascio

N’averzerio, na pesta

Cchiù spietata de chesta?

E buje prete nzenzate

Primma d’esse tagliate

385

Da le cimme de Munte,

Deciteme, vedistevo

A la serva, a lo vosco, a la foresta,

Na Tigre cchiù nn’umana

Cchiù orribbele, e cchiù perfeda de chesta?

390

Và fauza; và ndegna;

Và furia de nfierno;

Ca maje cchiù nn’eterno;

Te voglio vedè.

Già st’arma te sdegna:

395

Stò core te lassa:

Già t’odia; e s’arrassa

Teranna da tè.

SCENA XIV

PEPPITTA sola.

PEPPITTA

Oddio, che ntrico è chisto!

Tata vo’ che mme piglia stò Barone,

400

Io nò lo voglio: E Michelino crede

Ch’io nc’acconzenta: Isso

Mme fà morire, e Ammore

vo’ proprio che mme mpizza

Pe ’forza stò Laccheo dinto à lo Core!

405

È stò core n’arvolillo

Ch’ogne biento le fa guerra!

Chì lo vo’ jettare nterra,

Chì schiantare me lo vo’.

Piglio chisto, ò lasso chillo,

410

Sempe Ammore me flagella;

E chest’arma poverella

Cchiù resistere non pò!

SCENA XV|

GASPARRO, RENELLA, e po STUPPOLO.

GASPARRO

Mo ch’aggio mmaretata sta verruta

Io la voglio fà negra

415

Sposannome Renella,

Ca voglio fare na vecchiaja allegra:

E beccola ccà tè; dammo a le strette.

RENELLA

Sì Caspà, li confiette.

GASPARRO

E perche?

RENELLA

Mo che nguadia la Sia Peppa.

420

Ma chì è stò redicolo

Che bene a chesta via?

GASPARRO

Zitto, è lo Sposo.

Oh sì Barone Renza mio Segnore

Le faccio reverenza.

STUPPOLO

Addio mio Genitore.

425

(N’è mala sta pecciotta!)

RENELLA

(Negramè, comm’è scuoncio.)

GASPARRO

E mbè comme v’aggrada la mia figlia?

STUPPOLO

Oh patesce, patesce.

GASPARRO

De che?

STUPPOLO

D’un certo male, basta, basta.

GASPARRO

430

Uscia vo’ pazzejà, damme lecienzia

Ghe t’abbraccia.

STUPPOLO

Non tanta confedenzia.

Mia cara pecciottina.

RENELLA

(Chesta sarrà na scena stammatina.)

STUPPOLO

Commo te chiamme?

RENELLA

Co la vocca.

STUPPOLO

Bene.

GASPARRO

435

(Chisto attacca, co chesta.)

Ma Figliema...

STUPPOLO

Và a cancaro attè e essa.

Sapete chì songh’io?

RENELLA

Gnorsì; site no ruonto.

GASPARRO

(Commo ’laggio sgarrata bene mio.)

STUPPOLO

440

Ammè ruonto? a un Barone?

GASPARRO

(Chisto mme fruscia troppo lo cauzone.)

À sì Barone Renza mio Segnore,

Chì s’hà da piglià figliema

N’hà da parlà cò autre.

STUPPOLO

445

Vatte arrassanno; ca te mollo un caucio.

GASPARRO

Ma chisto non è muodo patron mio!

STUPPOLO

Io mme voglio spassà co cchì vogl’io.

RENELLA

(Benemio comm’è scioscia

Stò Barone.)

STUPPOLO

Che dici

450

Mia bella fico vottatella, e moscia?

RENELLA

Niente, mio bel Cetrulo nzemmentuto

(Che te pozz’afferrà male feruto.)

GASPARRO

Ma Ussignoria...

STUPPOLO

Tacete.

Zoccoletta gentil dimmi chì sete?

GASPARRO

455

(Quanto và, ca lo sciacco.)

À sì Barone...

STUPPOLO

Un poco di creanza,

Quando parlo con Dame.

RENELLA

(Ccà nc’ave da succedere n’aggrisso.)

Parlate con cotello. (a Stuppolo.)

STUPPOLO

460

Mò te manno nò cancar’attè e isso

GASPARRO

Senta Uscia. (à Stuppolo.)

STUPPOLO

Mio diletto franfellicco... (à Renella.)

GASPARRO

Dico, mm’avete ntiso? (à Stuppolo.)

STUPPOLO

Oh mm’aje rutto seje corde fuss’acciso.

Che inzolenza! Tù zucare

465

Vuoj un’Apa, quando il mele

Dal suo fior zucanno stà?

Lè; te voglio spertuggià...

Per Tè ò bella il lascio andar.

Pupillette care care

470

Fate un vezzo a lo fedele:

(Compatisceme gnopà.

Ca mme voglio spasseggiar.)

SCENA XVI

RENELLA, e GASSPARRO.

RENELLA

Chisto è no pasto nobbele!

GASPARRO

Che mporta:

Hà ll’acquavita: e tutte

475

Chiste ch’anno contante

Soleno avè n’umore stravagante!

RENELLA

Ora parlammo a nuje: li confiette?

GASPARRO

Si te le boglio dà Renella mia

Chiù nzuccarata e doce

480

De no dattero nuovo:

Chiù saporita de le sfogliatelle!

Juorno de festa mio!

N’anno che fà le stelle

Co chiss’uocchie luciente!

485

E lo sole...

RENELLA

Via mò ssì vantamiente.

Fanne de manco.

GASPARRO

À chì! mme gosta tanto

Renella mia ssò cernoleamiento;

Che pe ttè nott’e ghiuorno

Voto, e ’revoto comm’a spito a biento.

RENELLA

490

Povero sì Gasparro!

Ma che buo’ di pe chesso?

GASPARRO

Ca mme te voglio nguadejare.

RENELLA

Ò bona.

GASPARRO

Che fuorze non te sona?

RENELLA

Che buo’ sonà? tù sì no calascione.

495

Io so’ na spinetella;

Io te sono si vuoje;

Ma tu ammè pò li taste

Non saccio buono si toccà mme puoje!

GASPARRO

Pe tastejare ntanto figlia mia

500

Te può piglià no masto de cappella,

Ca chiste se tasteano na mascella!

Io schitto da tè boglio

Sapere si m’azziette.

RENELLA

Te voglio, e non te voglio

505

Perche pare no poco anticolillo:

Vorria che mme zompasse

Sempe pè ’nante comm’a no cardillo.

GASPARRO

Sì vuo’ no cardillo

Che zompa, che canta,

510

Cca bello mussillo

Stà lesto pe ttè.

RENELLA

Sì vuo’ na cardella

Che zompa, che canta;

Ccà stace Renella,

515

Ma nò stà pe ttè.

GASPARRO

Perche non me vuoje?

RENELLA

Non sierve non puoje.

GASPARRO

Stò fort’e rebbusto.

RENELLA

Ma non pe stò fusto.

GASPARRO

520

Tè, videme tè.

RENELLA

Non sierve pè mè.