Opera Buffa Napoli 1797 - 1750
  
  
 Lo finto laccheo, Napoli, A Spese de li Mpressarie, 1725
 a cura di Paologiovanni Maione
 
 
 
paratesto ATTO PRIMO ATTO SECONDO ATTO TERZO Apparato
 
 ATTO SECONDO
 
 SCENA I
 
 PEPPITTA e pò FONZILLO.
 
 PEPPITTA
 Io non aggio arrecietto!
 Già mm’odia Michelino;
 Sto laccheo mme tromenta: ah che Destino!
525Ma che laccheo? So’ pazza?
 Me ne voglio scordà! Perche vogl’essere
 E ncostante, e crodele
 Co Michelino mio, che mm’è fedele?
 FONZILLO
 Fedele sì mò che parola hà data
530De matremmonio a n’auta.
 PEPPITTA
 E comme? e dove?
 FONZILLO
                                     Và spiancello a isso.
 (Voglio vedè, che nn’esce
 Da chesta mmenzejone.)
 PEPPITTA
 (So’ restata no hielo.)
 FONZILLO
535Chesso sgrata Peppitta
 Lo permette lo Cielo.
 PEPPITTA
 Perche?
 FONZILLO
                  Pe chello, che tu faje ammene.
 Perche non mme vuo’ bene?
 Perche mme spriezze?
 PEPPITTA
                                            Ò Dio!
540Non affliggere cchiù sto core mio. (chiagne.)
 FONZILLO
 
    Bella, ssè lagreme
 Non se le mmereta
 No tradetore:
 Odialo: sprezzalo;
545Lassalo ì.
 
    Perche vuo’ chiagnere
 Pe no nfedele?
 Perche ammè fragnere
 Me faje crodele
550Sempe accossì?
 
 SCENA II
 
 LIMPIA, STUPPOLO, e PEPPITTA.
 
 STUPPOLO
 Donca lo Sì Gasparro se contenta!
 LIMPIA
 Gnorsì.
 STUPPOLO
                 (Vecco la Sposa.)
 LIMPIA
 Bravo: va te nc’accosta chiano chiano.
 STUPPOLO
 Me lo’sento a la mano,
555Ca chesta, ccà me mena no pantofano.
 
 SCENA III
 
 MICHELINO da parte, e li stisse.
 
 STUPPOLO
                                                                       Mia perzeca majateca...
 PEPPITTA
 Siente ammè brutta facce de Cevettola
 Smorfia de li Barune:
 Mò rumpete la spalla: Vavattenne
 A lo Paese tujo, ca nò nte voglio,
560E nò nce passà chiù pe chessa via.
 STUPPOLO
 Nò ncè de che: obbrecato all’Ussoria.
 MICHELINO
 (Chesto che d’è? mò nnanze, tant’amore,
 E mò tanto desprezzo? Veramente
 Me so’ ngannata; e Peppa
565De chello ch’io credea n’era nnozente.)
 PEPPITTA
 Nò nte ne vaje ancora? (a Stuppolo.)
 MICHELINO
 Non voglio sentì cchiù; chesto me vasta. (trase.)
 STUPPOLO
 Senti Donna ostinata!
 Jarrò da tè lontano,
570Ma tutto il danno è tuo
 Che non merti, a un par mio stringer la mano.
 LIMPIA
 Signora perdonateme...
 PEPPITTA
                                              Ah’ Marchetto
 Non me tè fà vedere
 Ca tù si causa de la morte mia.
 LIMPIA
575Ah’ quanto ve ngannate: ma già saccio
 Ca vuje ssò matremmonio
 Nò lo volite fà pe Michelino:
 Ma sacciate, ca chisto
 E lo maggiore nfammo,
580Che sostenga la terra:
 Nò scelerato senza legge, e fede.
 Nò briccone, che hà data già parola
 De matremmonio a n’auta...
 Vasta accossì; lo Cielo ve conzola.
 PEPPITTA
585O Dio ferma, addo’ vaje?
 Chesto comme lo’ saje?
 LIMPIA
 Nò, ca’ chiù ve contristo.
 PEPPITTA
 Aspetta ò Dio saje buono tù chì è chisto?
 LIMPIA
 
    Chist’è no perfedo,
590No ngannatore
 Che si lo cride,
 Si te nne fide
 Te ngannarà.
 
    Nò, no lo credere
595Ch’aggia lo core
 Pe ttè nchiajato,
 Ca pò lo sgrato
 Te la farrà.
 
 SCENA IV
 
 PEPPITTA sola.
 
 PEPPITTA
 Chesto che d’è? So’ morta!
600Ah Michelino sgrato,
 Comme accossi de botta
 Senza sapè perché, te si mutato?
 
    Ammore aje cchiù despiette
 Da fareme se sà?
605Gran cose mme prommiette;
 E pò mme nganne.
 
    De me, de sti trommiente
 Aggene oddio pietà
 O cagname ncontiente
610Tant’affanne.
 
 SCENA V
 
 PORZIA, RENELLA, e pò GASPARRO.
 
 PORZIA
 Passa ccà non foire.
 RENELLA
                                      E buje stepate
 La desceprina.
 PORZIA
                              Passa ccà te dico.
 RENELLA
 Vuje mme vattite.
 PORZIA
                                    A zoccola, zellosa!
 RENELLA
 Mamma stò malatella
615Pe sta vota, e no cchiù perdonamella.
 PORZIA
 Staje malatella nè?
 RENELLA
                                      Toccate ccane.
 PORZIA
 Te voglio toccà llane co sta funa,
 Verruta mara Tè...
 GASPARRO
                                     Che ncè Sia Porzia?
 PORZIA
 Ll’aggio co sto retaglio de le femmene
620Ssò mozzone de fescena,
 Ca se vo’ mmaretare.
 GASPARRO
 È figliola hà raggione.
 Che bo’ aspettà che ll’esca lo scaglione?
 PORZIA
 Che scaglione, che dente vaje vennenno
625Tu n’auto, che non aje sciato pe n’ora:
 Chì l’avimmo da dare a ssa Segnora?
 Nò spatella de chiste,
 Che teneno cchiù debbete che ghiuorne
 No corteggiano strutto,
630Che n’hà manco lo sciato?
 O quarche screvanotto nnammecato?
 GASPARRO
 
    Guarda, non sia pe ditto.
 Ca chiste vonno schitto
 Nzorarese pe fà
635Lo magna magna.
 
    Dall’uno comm’ammene
 Che saje chello che tene:
 Che pe la fà sciala
 Stenta, e guadagna.
 
 SCENA VI
 
 STUPPOLO, e li stisse.
 
 STUPPOLO
640Bravo, non nc’accorr’auto, io ccà t’aspetto (votato dint’a la Scena.)
 Pe’ tentà n’auta vota, ma è spreposeto.
 Ò vecco la Pecciotta:
 Addio sciamma viril che il cor mi scotta.
 PORZIA
 (Vì che bo’ sto levrone!)
 RENELLA
645Ò schiavo Si Barone.
 STUPPOLO
 Che faje tù ccà storzella Creature?
 Si non me lasci solo
 Con questa quà, ti menarrò li ture.
 PORZIA
 Oje facce de premmone sedeticcio,
650Musso de jelatina...
 RENELLA
                                      (Statte zitto
 Mamma, ca mme lo voglio pasteggiare.)
 Si Barone scusateme, ca chessa
 No ve canosce buono.
 STUPPOLO
 E per questo l’assolvo, e la perdono.
655Ma di, mia Caramella, pe la tossa,
 Gradisci l’amor mio?
 RENELLA
 N’è tiempo mò, lassame fà cchiù grossa.
 STUPPOLO
 Eh’ noi altri Baroni
 Mangiamo i frutti verdi,
660Ma verdi verdi, come i maccaroni.
 PORZIA
 (Bene mio, le vorria
 Stracciare proprio chella spennazzola.)
 RENELLA
 Io pe mmè so’ na povera fegliola,
 E buje site Barone;
665Pe chesto a stò partito non m’attacco.
 STUPPOLO
 Prendi, prendi tabacco.
 Nne commanne gnamà.
 PORZIA
                                              Me faje favore.
 STUPPOLO
 Comme t’aggrada, ò mia lubrica Sfera?
 RENELLA
 È bello lo tabbacco,
670Ma mme pejace cchiù la tabbacchera.
 STUPPOLO
 Con tutto che l’avea destineggiata
 Per la Sposa, la dono attè cor mio.
 RENELLA
 Oh Dio, pare na cosa mò Llostrissemo.
 PORZIA
 (Nò le dà tiempo afferra.)
 STUPPOLO
675Piglia.
 PORZIA
               Via sù obbedisce. (Forte à Rina.)
 RENELLA
                                                 Obbrecatissemo. (se piglia la tabbacchera.)
 
    Oh Dio, già so’ ncappata,
 Chisto mme fà morì.
 (Vi comm’è ruonto vì.)
 Comme sì bello.
 
680   Che facce aggrazejata!
 Già mme faje sosperà.
 (Ll’aggio da scorcoglià
 Porzì l’aniello.)
 
 SCENA VII
 
 MICHELINO, PORZIA, e STUPPOLO.
 
 STUPPOLO
 (Ll’aggio ngarrata pe lo juorno d’oje.)
 PORZIA
685Si Barone ve resto obbrecatissemo.
 STUPPOLO
 Non v’è di che.
 PORZIA
                              Ma sì lo ssà Peppitta,
 Chì sà che deciarrà?
 STUPPOLO
                                        Quest’è una guitta.
 MICHELINO
 (Oh che briccone! Chisto
 Già che non se nne vace co lo buono.
690Nne lo voglio fà ire co lo tristo.)
 PORZIA
 Uh lo si Michelino!
 STUPPOLO
 Chì è questo?
 PORZIA
                            Questo è chillo,
 Che pretenne Peppitta.
 MICHELINO
 (Me nce voglio spassare nò tantillo.)
695Schiavo Sia Porzia mia.
 PORZIA
                                              Ò lleveresco
 L’arzura vosta: e mbe quanno provammo
 Ssì confiette?
 MICHELINO
                            So’ lleste quanto primmo.
 STUPPOLO
 Uscia se piglia chesta pè mogliere?
 MICHELINO
 E uscia che nne vo’ fà de ssì penziere?
700Dimme, Sia Porzia, avisse visto ancora
 Da ccò chillo furlocco
 De lo Barone Renza?
 STUPPOLO
 (Dì ca nò lo canusce.) (à Porzia.)
 PORZIA
 Gnornò.
 MICHELINO
                   Mm’è stato ditto, ch’è no locco.
 STUPPOLO
705Chì mò?
 MICHELINO
                   Stò Sì Barone.
 STUPPOLO
                                               (Oh potta d’oje!)
 MICHELINO
 Nò ruonto, che te leva
 Le ppunia da le mmano.
 STUPPOLO
 Chì mò? (à Michelino.)
 MICHELINO
                    Stò Sì Barone. (Michelino ride da parte.)
 STUPPOLO
 (Potta d’oje n’auta vota.)
 PORZIA
710(Vide, che scena corejosa è chesta.)
 MICHELINO
 Io lo vao cercanno, e sì lo trovo,
 Lo voglio dessossare de mazzate.
 STUPPOLO
 A chì mò? (à Michelino.)
 MICHELINO
                       A lò Barone.
 Le voglio fà la capo quatto parte.
 STUPPOLO
715(Vì che pacienzia ch’aggio.) (à Porzia.)
 Uscia canosce buono lo Barone?
 MICHELINO
 Lo canosco; e le voglio
 Fà chill’aggravio ch’isso non se penza.
 PORZIA
 A lo Barone Renza!
 MICHELINO
720A lo Barone Renza.
 STUPPOLO
 (Nò, lo vatto, lo vatto.) (à Porzia.)
 (Via sù, co nò sbaratto.)
 Uscia non sà, ca chisto ccà se magna
 Li Cristiane a uso
725De Calejate Cicere? e se veve
 Caudo comm’a cafè lo sango umano,
 E ca io songo isso?
 MICHELINO
 Tù sì isso? briccone, caccia mano.
 STUPPOLO
 Briccone a mmè? (nò te partì da lloco.) (à Porzia.)
730Tù vaje cercanno propio d’esse acciso.
 MICHELINO
 Or io te voglio fà propio no sfriso. (và pe caccià mano.)
 STUPPOLO
 (O Diavolo oje!)
 PORZIA
                                 Via mò Sì Michelino...
 MICHELINO
 Da chesta strata non ncè passa cchiune;
 Ca te nne faccio ire
735Chino de Buffe, Scoppole, e Schiaffune!
 STUPPOLO
 
    A mmè co stò sbaratto?
 A mmè Schiaffune, à mmè?
 Tienelo, ca lo vatto.
 Rengrazia chesta ccà.
 
740   Tù à mmè co la bravura?
 Sì robba tù pe mmè?
 (So’ muorto de paura;
 E manco se nne và.)
 
 SCENA VIII
 
 MICHELINO, e PORZIA.
 
 MICHELINO
 Che te pare? che mobbele?
 PORZIA
745Via, ca m’hà fatto ridere
 De core.
 MICHELINO
                   E pur’è bero, ca stò smorfia
 M’hà fatto stà ncojeto, cò Peppitta.
 PORZIA
 Che dobbetate fuorze
 Che ve pozza tradì?
 MICHELINO
                                       Che buo’ tradire!
750Non dubbeto; ma è femmena.
 E le veo ì attuorno cierte abbate,
 E cierte pagliettielle.
 PORZIA
 Nò, ca Peppa hà jodicio,
 E sì non hà regale à bottafascio,
755Nfrisco te le mmantene, e pò fà ll’ascio.
 MICHELINO
 Ma sento dì, ca chiste la regalano.
 PORZIA
 E che le vonno regalà na cufece.
 
    Da n’Abbate
 Ò nò Paglietta,
760Doje coselle nzuccarate,
 O na giarra de sorbetta
 Nnè puo’ avere: Ma mperrò
 Si le ponno avè ncredenza!
 
    Ca stann’arze tutte quante;
765E chì tene li contante
 O cacciare nò le bo’,
 Ò a cacciarele ncè Penza.
 
 SCENA IX
 
 MICHELINO, PEPPITTA, e LIMPIA.
 
 MICHELINO
 Si vedesse Peppitta le vorria
 Cercà perduono de quant’aggio ditto,
770Ma eccola, ca esce.
 PEPPITTA
 Facce de tradetore
 Ed’aje armo? ed aje core
 De tenereme mente?
 MICHELINO
 Aje raggione arma;
775Ma pe la gelosia...
 PEPPITTA
                                   Che gelosia?
 Tù daje parola a n’auta,
 Chella pe ttè se struje,
 E pò a mmè...
 MICHELINO
                             Comme?
 LIMPIA
                                                (Attiempo tutte duje.)
 Mò voglio termenare stà facenna.
 MICHELINO
780Nò; parla che te ntenna:
 Che matremonio? che parola? dove?
 Quanno? che apprenzejone?
 Te nganne, Peppa mia.
 LIMPIA
                                             (Vì che briccone.)
 PEPPITTA
 Te lo faccio dì nfacce
785Da chì a mmè ll’ave ditto.
 MICHELINO
 Fammello dì: voglio scornà ssò guitto,
 Che bo’ turbà lo stato mio tranquillo:
 Io tradetore? Io?
 LIMPIA
 Sì; tù si’ chillo. (Limpia se fà nnanze.)
 MICHELINO
                               E chì lo dice?
 LIMPIA
                                                          Io.
 MICHELINO
790E chì si’ tù? a chì maje
 Aggio dat’io parola
 De matremonio?
 LIMPIA
                                  À chella, che tù saje.
 MICHELINO
 Tù si’ no malantrino,
 E cacciannote vaje ssà mmenzejone
795P’ajutà lo Patrone.
 LIMPIA
 Io sò, chì tù non pienze!
 E m’abbasta lo spireto
 Farete tenì pede,
 E confessà...
 MICHELINO
                          Che cosa?
 LIMPIA
800Ca sì no perro, senza legge, e fede!
 MICHELINO
 Tù vuo, che nnanze à chesta
 Te taccarea... (và pe dà de mano à Limpia.)
 PEPPITTA
                            Và chiano.
 LIMPIA
 Ve voglio faà toccare co le ’mano (à Peppitta.)
 Ca chisto, è nò busciardo, ommo de niente;
805No spietato; no barbaro...
 MICHELINO
                                                 Ne miente.
 LIMPIA
 Nnè mientu’ tù, sì chesto vuo’ negare.
 Cielo, e puo’ sopportare
 Ssò mostro de ncostanza!
 Ssò tradetore sgrato!
810Stò usurpatore de l’onore... Ò Dio!
 St’arma de renegato!
 Stò tiranno crudele...
 Comme nfedele dì? te si scordato
 De... (non pozzo parlà.) Comme non’aje
815Pietà de nà nfelice.
 Che...
 MICHELINO
              Chist’è no pazzo!
 PEPPITTA
                                               Quarche cosa dice.
 LIMPIA
 
 Sà che dice, la nfelice
 Da ssò sgrato abbandonata?
 
 MICHELINO
 
 Vasta mò! Nò lo sentire.
 
 PEPPITTA
 
820Zitto. Parla, che buo’ dire?
 
 LIMPIA
 
 Perche, dice m’aje ngannata,
 Perche barbaro perche?
 
 PEPPITTA
 
 Che te pare? te lo ssiente?
 
 MICHELINO
 
 Vita mia, nne so’ nnocente.
 
 PEPPITTA
 
825Nò nte pozzo cchiù bedè!
 
 MICHELINO
 
 Siente, ò Dio... (chesto che d’è?)
 
 PEPPITTA
 
 Te vorria caccià sso core.
 
 MICHELINO
 
 Non è bero.
 
 LIMPIA
 
                         Ah’ ngannatore!
 
 MICHELINO
 
 Tu da mè che nne pretienne?
 
 PEPPITTA
 
830Nò lo ntienne?
 
 LIMPIA
 
                              Chella fede,
 Che ghiuraste, mò addov’è!?
 
 PEPPITTA
 
 Non respunne? Già se vede
 Ca tu vuo’ ngannare ammè.
 
 MICHELINO
 
 (E che cchiù se pò bedè!)
 
 SCENA X
 
 PORZIA, e pò GASPARRO.
 
 PORZIA
835Gnorsì, te voglio dare lo Laccheo
 E quanto vaje trovanno. (votata dinto.)
 GASPARRO
 Che ncè Sia Porzia, sempe staje strellanno.
 PORZIA
 Ll’aggio, co ssà Segnora, che mm’è figlia,
 Che mme fà la ncappata
840Co lo Laccheo de ssò Barone cuorno;
 E io la voglio stroppejà no juorno.
 GASPARRO
 Ora via mò scompimmo ssa bajata.
 Già ca sto Si Barone è propio lotano
 E sto Laccheo mme fruscia lo cauzone:
845Mò saglio, e dico à Peppa
 Che si vo’ Michelino se lo Piglia.
 E accossì nce levammo
 Da tuorno lo Barone, e lo Creato.
 PORZIA
 Tu mò saje che te fare.
 GASPARRO
850Sì ca pò, co Renella
 Priesto, priesto’me voglio nguadejare.
 
 SCENA XI
 
 PORZIA STUPPOLO, e po RENELLA.
 
 PORZIA
 All’ora bona, chisto è ricco affunno,
 E ghiusto fà pe li besuogne mieje.
 STUPPOLO
 Sia Porzia? appunto vado asciando a lei.
 PORZIA
855Ò Patrone mio bello:
 (Nnanze, che se nne vaa
 Le voglio fà grattare chill’aniello.)
 Eh’ Renella, Renella?
 RENELLA
 Che commannate?
 PORZIA
                                     È ccà lo Sì Barone.
860T’è benuto a trovare.
 RENELLA
 (Tene l’aniello?)
 PORZIA
                                 (sine, sacce fare.)
 Sì Baro’, Jatevenne:
 Che maje v’avesse visto.
 STUPPOLO
 E perche?
 RENELLA
                      Ca mm’avite
865Arrobbato lo Core,
 E mò caro a’ bedere ve facite.
 STUPPOLO
 Non t’affliggere mio dolce susamello:
 Dammi la man.
 RENELLA
                                Questo ched’è?
 STUPPOLO
                                                              Un’Agnello
 RENELLA
 N’aniello: (mamma, comm’è aggrazejato!)
 PORZIA
870Veramente è bellissemo.
 RENELLA
 È cosa degna d’Ussoria Lustrissemo.
 STUPPOLO
 Co stì Titole chesta
 Già mme lo vo’ troccà.
 RENELLA
                                           Che bella mano. (toccanno la mano a Stuppolo.)
 STUPPOLO
 (Sì cchiù mme la guanceja
875L’aniello se ne sciulia chiano chiano.)
 PORZIA
 Nò ncommodammo cchiù lo Sì Barone.
 Saglimmoncenne.
 STUPPOLO
                                    O mio bel Sol Leone
 Statte quì a’ pasto, e se l’aniello brami,
 Pigliatillo a mmalora,
880Ma non te la filar mio bene ancora.
 RENELLA
 Nò, nò ve ncommedate
 Ca mme lo piglio io.
 STUPPOLO
                                        Sì ssì scippate
 Pigliateve ogne cosa. (Porzia, e Renella levano l’aniello.)
 RENELLA
 Ussoria m’ha confosa;
885Lassate, ca mò vengo.
 STUPPOLO
 Questo non sarrà maje.
 RENELLA
 Mamma, ca mme stroppeja.
 PORZIA
 A sì Barone mio, che malann’aje?
 Lassala ire.
 STUPPOLO
                        Vuo’, che te schiaffea?
 PORZIA
890Ammè vuo’ schiaffeà?
 STUPPOLO
                                           Non mozzecare.
 PORZIA
 Và piglia chella mazza. (a Renella.)
 STUPPOLO
 Ma questo non è modo di trattare!
 RENELLA
 Tè mamma, dalle, dalle.
 STUPPOLO
                                              Ò Diaschence oje.
 PORZIA
 Te voglio fà sentì, chesta a le spalle.
 STUPPOLO
 
895   Chiano... chiano... che si’ pazza?
 Co la mazza
 Ad’un Barone!
 Mare vuje: ch’accesione,
 Che ruina nce sarrà.
900Truffajo’... non dico attè. (à Porzia.)
 
 (Ò che caso stravagante
 De n’amante
 Coffejato!)
 Ma m’impegnarrò lo Stato
905Per potermi vennecà.
 Tie’ Renella... tiene tie’.
 
 SCENA XII
 
 MICHELINO, e PORZIA.
 
 MICHELINO
 De che ride sia Porzia?
 PORZIA
                                             Ò benemio,
 Ca poco nc’hà boluto,
 E spaccava la capo a lo Barone.
 MICHELINO
910O, che ll’avisse acciso.
 PORZIA
 Nò, statte allegramente, ca Gasparro
 Nò le vo’ dare cchiù la figlia.
 MICHELINO
                                                      Eh Porzia,
 Volesselo la sciorte!
 PORZIA
 Accossì è.
 MICHELINO
                     Ma saccio, ca Renella
915Hà fatto gran fenizze a lo Sì Renza.
 PORZIA
 Ma le costano care:
 Ca de chestamanera
 Essa ll’a scorcogliato
 Nò bell’aniello, co na tabbacchera.
 MICHELINO
920Ne? chest’era la cosa? aje fatto buono.
 PORZIA
 Securo; quanno nuje
 Facimmo contratiempo
 Nò pizz’à risa, a quarche giovenotto,
 Uh! nigr’isso, cha tanno e ghiuto, e cuotto.
 
925   Quanno vide na fegliola
 Che te face no squasillo?
 Tanno strigne lo vorzillo;
 Perch’è signo ch’allummato
 Ca ncè bagno, e te la fà.
 
930   E da pò che t’hà sporpato,
 Sa che fà la mareola?
 Te coffea; è cchiù fenizze
 Cchiù carizze
 Non te fà.
 
 SCENA XIII|
 
 MICHELINO, e GASPARRO, che esce da la porta soja, e PEPPITTA a la fenesta.
 
 MICHELINO
935Vì comme la fà tutta st’antecaglia!
 Sì Gasparro trattienete
 Quanto, te dico una, e doje parole.
 GASPARRO
 Patrone ll’ussoria.
 MICHELINO
 Tù già vuo’ mmaretare ssa fegliola?
 GASPARRO
940Securo.
 MICHELINO
                 Ora mò sacce
 Ca io ne stongo tanto nnammorato,
 Che sì amme nò la daje,
 Fatto no cunto, ca già so’ barato.
 GASPARRO
 Non serve cchiù parlare
945Ch’attè stò resoluto de la dare.
 MICHELINO
 Addonca via, nò ncè perdimmo tiempo
 Si Gasparro mio caro.
 GASPARRO
 Io mò vao à chiammare lo Notaro,
 E tù fatt’à bedere da ccà attuorno.
 MICHELINO
950Si ssì và priesto. Oh cche felice Juorno!
 Nne vorria mò a Peppitta dà l’aviso.
 
 SCENA XIV
 
 PEPPITTA MICHELINO, e LIMPIA da parte.
 
 PEPPITTA
 Michelino aggio ntiso
 Quant’aje ditto cò Patremo. Mò vedo
 Ca si’ nò galant’ommo,
955E chello ch’aggio ntiso nò lo ccredo.
 LIMPIA
 (Ajemmè! che sento! O Ddio;
 Mò vace nterra lo designo mio.)
 PEPPITTA
 Te juro eterna fede.
 MICHELINO
                                       Eterno amore
 Te promette chest’arma.
 LIMPIA
                                               (Ajemmè lo core,
960Nò, no nte resciarrà comme te cride
 Fauzo tiranno de l’onore mio.
 Ma vedo llà Gasparro
 Mme ncè voglio scoprire,
 E pò nne venga, che nne pò venire.)
 MICHELINO
 
965Tù si’ ll’arma de sto Core.
 
 PEPPITTA
 
 Tù la vita de chest’arma.
 
 A DUE
 
 No nce pò lo Ddio d’ammore
 Fà godè cchiù bella Carma.
 
 SCENA XV
 
 GASPARRO, e LIMPIA.
 
 GASPARRO
 Tù mme cunte na cosa da stordire.
 LIMPIA
970Accossì è, lloco no ncè che dire.
 GASPARRO
 Donca tù mò si femmena?
 LIMPIA
 Ma la cchiù ddesperata de stò Munno.
 GASPARRO
 E tù da Michelino
 Fuste traduta?
 LIMPIA
                              Appunto: ssò briccone,
975Co ddareme parola
 De matremonio, avette
 Chello ch’avè cchiù caro na Zitella;
 E mò se nn’è scordato.
 GASPARRO
                                            Ah! poverella.
 LIMPIA
 Si de lo stato dove me trov’io
980Tù nn’aje quarche pietate,
 Famme recuperà l’onore mio.
 GASPARRO
 Te prometto fà tutto,
 E te resto obbrecato,
 Ca si nò già dea Peppa a ssò frabbutto,
985Isso t’hà da sposare anche le pesa.
 LIMPIA
 Ma non me scoprì ancora.
 GASPARRO
                                                  Già staje ntesa.
 Ma si chesta pò fosse quarche nnorchia,
 E tù non fusse femmena?
 LIMPIA
 Eh! sì non fosse femmena
990Sarria pe mme la sciorte assai pietosa.
 GASPARRO
 Ora jammo addo’ figliema,
 Ca mme faccio capace d’ogne cosa.
 LIMPIA
 Cielo, fortuna, Ammore
 Vuje, sta mpresa, che tento
995Portate, pe piatate a sarvamiento.
 
 SCENA XVI
 
 RENELLA, e GASPARRO.
 
 RENELLA
 Ò vecco lo laccheo, la gioja mia
 Sì Gasparro addo’ vaje?
 GASPARRO
 Mò, mò vengo Renella.
 RENELLA
 Sto giovene t’è ammico?
 GASPARRO
1000Zitto, ca saparraje no bello ntrico.
 RENELLA
 Fallo aspettà tantillo.
 GASPARRO
 T’aggio ntiso; (Ma chisto n’è chiù chillo.)
 RENELLA
 Vide lo sette scorze
 Si mm’hà votato manco ll’uocchie nfacce?
1005So’ chiacchiere: abbesogna
 De non s’appassionà maje de nesciuno;
 E fà schitto la morta, e la ncappata
 Co’ ruonce, e co’ Fasane,
 Ca tutte ll’aute mò so’ tanta cane.
 
1010   Oje li giuvene
 So’ tutte arucole:
 Ma co sta merola
 Tutte se ngannano
 Ca sape leggere
1015Lo bè à ba.
 
    Chi te dà chiacchiere
 Chi conta favole:
 Ma sta pecciottola
 Te le mollifeca,
1020Ca sape dicere
 E sape fà.
 
 SCENA XVII
 
 MICHELINO, FONZILLO pò GASPARRO PEPPITTA, e LIMPIA.
 
 MICHELINO
 Fonzo, te juro, ch’aggio fatto tutto.
 FONZILLO
 Io me n’allegro assaje.
 MICHELINO
 Mò vene lo Notaro,
1025E darece la mano vedarraje.
 FONZILLO
 Io mò, si nò lo bedo, nò lo credo.
 MICHELINO
 E perche?
 FONZILLO
                      Ch’à le femmene
 Maje se deve dà creddeto.
 MICHELINO
 Ma si chesta è na cosa già concrusa.
 FONZILLO
1030Che mporta.
 MICHELINO
                          Siente amico
 Quanno tu vedarraje
 Janco lo Cuorvo, e nigro l’Armellino,
 Tanno Peppitta, lassa Michelino. (esceno da Casa Gasparro Limpia e Peppitta.)
 GASPARRO
 (Ah, ah, chi deciarria, ca chisto è femmena!)
 LIMPIA
1035Già che saje chi songh’io
 Agge pietà de mene.
 PEPPITTA
                                        Io te prometto
 De scrastà Michelino da sto pietto.
 Ed’aggio puosto attè mò tanto amore
 Che schitto tu’me staje dinto a sto core.
 MICHELINO
1040(Che d’è chesto che sento!
 Oh’ de femmena ndegna,
 Azzione la cchiù negra, e scelerata?)
 FONZILLO
 Sì nò la vuo’ sentire. (à Michelino.)
 MICHELINO
                                         Arma mperrata, (se fà nnanze.)
 Nata pe tormentà chest’arma mia,
1045Dimme... Comme?... co chisto? oh gelosia!
 Addov’è chella Fede.
 Che ’mò juraste ccà? dov’è l’ammore? (trase.)
 PEPPITTA
 Se mmereta cchiù peo nò tradetore.
 MICHELINO
 Aspetta... Oddio... che tradetore? commo?
 PEPPITTA
1050Trase tù ccà, cò mmico.
 MICHELINO
 Chesto de cchiù! a lo mmanco
 Dimma tù comm’è stato? (à Limpia.)
 LIMPIA
 Se mmereta cchiù peo nò scelerato! (trase.)
 MICHELINO
 Cchiù peo no scelerato!
1055Cielo! chesto, che d’è! ddo’ vaje Gasparro?
 Commo? a mmè daje parola,
 E mme la manche pò pe ssò soggetto?
 GASPARRO
 Và menate la mano pè lò pietto. (Gasparro le passa pe nante senza parlà.)
 MICHELINO
 La mano pe lo pietto!
1060Io jarraggio mpazzia!
 E tù Fonzo, che dice
 De stà desgrazia mia?
 FONZILLO
 Quanno tù vedarraje
 Janco lo Cuorvo, e nigro l’Armellino;
1065Tanno Peppitta lassa Michelino. (trase.)
 
 SCENA XVIII
 
 MICHELINO sulo.
 
 MICHELINO
 Ò caso lo cchiù strano, e stravagante
 Che sia maje socceduto! ò Trademiento
 Lo cchiù orribbele, e nfame,
 Che maje ntiso se sia!
1070Ò Sdigno, ò Ammore! ò Morte! ò Gelosia!
 Nà Femmena me nganna!
 Mme la fà nò Laccheo!
 No Viecchio mme reprenne!
 Se nne ride l’Amico!
1075Che laborinto è chisto! ajemmè che ntrico?
 Che fà? che fà la morte,
 Che non me leva st’odiosa vita?
 Anze, che fà sto vraccio, che non s’arma
 Pe cacciare a sta ndegna
1080Chino de ll’odio mio, lo Core, e ll’Arma.
 
    Te voglio da ssò pietto
 Ll’arma caccià spietata!
 E chino de despietto
 Lo core sdellanzà.
 
1085   A mme stò trademiento?
 A mmè st’azzione; sgrata?
 Accideme, ò tormiento,
 O famme vennecà.
 
 SCENA XIX
 
 STUPPOLO, pò RENELLA à lo Barcone, e GASPARRO.
 
 STUPPOLO
 Aggio veduta Porzia a li Mercante:
1090Mò che sso’ truffajola
 Sarrà restata sola,
 Voglio de quà manera
 Scontà, ò recuperare
 Chill’anelluccio, cò la tabbacchera.
1095Tè! la porta stà aperta!
 Saglimmo: addo’ esce esce. (trase, e chiude.)
 RENELLA
 Bene mio, ca ’me ncresce (dà lo Barcone.)
 De stare sempe nchiusa:
 No pocorillo d’aria t’addecrea.
 GASPARRO
1100Vecco, Renella mia: pare na Ddea.
 Renella staje bell’oje.
 RENELLA
                                         E Uscia bellissemo.
 STUPPOLO
 Segnora, me le ncrino devotissemo.
 RENELLA
 Uh! commo si’ sagliuto?
 STUPPOLO
                                               Con i piedi.
 GASPARRO
 (Stò Barone sarrà quarche dejaschence!)
 RENELLA
1105Che buo’ da ccà?
 STUPPOLO
                                  vo’ dirti due parole.
 RENELLA
 Vattenne, ca mò strillo, marejuole,
 Saglie ccà Sì Gasparro.
 GASPARRO
 Mò vengo.
 STUPPOLO
                      Non venirci, ca te sguarro.
 RENELLA
 Marejuolo, che buoje?
 STUPPOLO
1110Oh te vaa no piello,
 Tù mm’arruobbe n’aniello,
 Ma tabbacchera, te nne vaje, e io
 So’ mmarejuolo? voglio il sangue mio.
 
 SCENA XX
 
 PORZIA, e li stisse.
 
 PORZIA
 Pe dare gusto a figliema
1115Mm’aggio da ì schiattanno ncuorpo.
 RENELLA
 Ajuto. (strilla da dinto.)
 STUPPOLO
                Piglia la tabbacchera. (da dinto.)
 PORZIA
 Lo Barone ccà ncoppa! Uh negramene!
 E la porta stà nchiusa! (fa forza p’aprire. esce Gasparro co no Pestone mmano.)
 GASPARRO
 Io voglio fare nò baronecidio,
1120Nne lo voglio frusciare a stò Barone.
 STUPPOLO
 Chiano, vecchia mmardetta.
 PORZIA
                                                      Ah frabbuttone,
 Lassa mò, lassa lloco,
 Lassa, ca te strafoco.
 STUPPOLO
 À, à, à.
 GASPARRO
                Mò esceno, arrassateve. (esceno.)
1125Ca le voglio menà!
 STUPPOLO
                                     Chiano mmalora. (Fuje senza Cappiello, spata, e perucca.)
 Dateme ccà stà spata.
 RENELLA
 (Nigr’isso poveriello!)
 PORZIA
 Sì te la voglio dà, co na stoccata. (Porzia stà co la spata mmano.)
 GASPARRO
 
 Sfratta da ccà frabbutto.
 
 PORZIA
 
1130Vattenne lazzarone.
 
 STUPPOLO
 
 Vi comme so’ arreddutto! (chiagne.)
 
 RENELLA
 
 (Ò povero Barone!)
 
 PORZIA
 
 Te voglio spertosare.
 
 GASPARRO
 
 Le voglio menà io...
 
 STUPPOLO
 
1135Dejaschence non fare.
 
 RENELLA
 
 Che risa, bene mio.
 Vattenne nigro te!
 
 STUPPOLO
 
 Ve voglio fà a bedè. (e fuje.)
 
 GASPARRO - RENELLA - PORZIA
 
 Ah, ah, ah.
1140Nce l’hà boluto affè.
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional