Lo finto laccheo

Lo finto laccheo, Napoli, A Spese de li Mpressarie, 1725

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO III

SCENA I

MICHELINO, FONZILLO, e pò LIMPIA, e PEPPITTA à lo Barcone.

MICHELINO

Fonzo mio, d’acquietareme

Io non trovo la via,

Ca ssò Laccheo me fà j mpazzia.

FONZILLO

Chesto succede, a chì se fida a femmene.

MICHELINO

1145

Nò, consultame tù ch’aggio da fare.

FONZILLO

Zitto zì, ca mme pare

Ca mò s’affaccia.

MICHELINO

E lo Laccheo cò essa!

Ò tormiento! Ò dolore!

LIMPIA

Che te nne pare de ssò tradetore?

PEPPITTA

1150

Nò nnè parlammo cchiù, ch’è ll’odio mio.

MICHELINO

(Se pò sentire cchiù?) Peppitta oddio.

Dimme chi è chisto? dimme,

Sì pe’ chisto mme lasse? E sì mme lasse

Pe no soggetto accossì bile; comme

1155

Nò nte ne piglie scuorno!

Perche mme faje ssò tratto?

PEPPITTA

Lo buo’ sapè? Ca trè non fanno quatto. (trase.)

MICHELINO

Aspetta, siente... ah morte,

Perche non me ne lieve? amico... Oddio!

1160

Io mme sento morire...

Scinne tù mò ccà abbascio, (a Limpia.)

E levame sta vita

Già che levata mm’aje tutta la pace:

Sdellanzame sto core.

LIMPIA

1165

(Io nne sento dolore

M’ancora non è tiempo

De mme scoprì.)

MICHELINO

Manco non me respunne.

LIMPIA

Senza che te confunne,

Torna, torna à la Patria, addo’ t’aspetta

1170

Chi nò juorno te deze

Quanto dà te poteva; e dapo’ viene

Ammè, ca te prommetto

De nò nte fà sentì cchiù affanne, e pene.

MICHELINO

Torna, torn’a la Patria, addo’ t’aspetta

1175

Chì nò juorno te deze

Quanto dà te poteva! Io nò lo ntenno.

FONZILLO

Nò nte j cchiù mpazzenno:

Scordatenne.

MICHELINO

Ah’ Fonzillo ch’è mpossibele

Scrastarte da lo core

1180

Na passione mmecchiata!

Ah’.

FONZILLO

Ncè sospire ancora!

MICHELINO

Porto ll’arma nchiajata

Pe chesta da duje anne,

E mò, dinto a lo giro

1185

De nò juorno la perdo,

E manco vuo’ che ghietta no sospiro?

Lo Villano

Che na chianta

Se governa chiano, chiano,

1190

Si lo viento

Nce la schianta

Che lamiento

Non farrà!

Ed ammene che mm’è stata

1195

Già levata

Peppa mia;

Tù pretienne, che mmè stia

Senza manco sosperà?

SCENA II

PEPPITTA, e FONZILLO.

PEPPITTA

Fonzo, tù fà capace Michelino,

1200

Ca essere non poce cchiù lo mio.

FONZILLO

Eh’ pe chesto non manca;

Ma non pè chesto t’avarraggio io.

PEPPITTA

Nò, spera Fonzo spera;

Ca chello che nce stato

1205

Da duj’anne sarrà fuorze stà sera.

FONZILLO

Sì stà sciorte m’attocca,

Siano ben patute li tormente

Che nfì a mò, sopportato

Aggio pe ttè, che mm’aje

1210

Cò sta bella prommessa conzolato.

Tanto sà lo cacciatore

Posteà na Merolella,

Che ncè ll’ave d’ancappà.

No sparagna lo sudore,

1215

Va da chesta parte, e chella,

Pe non farsela scappà.

SCENA III

LIMPIA PEPPITTA, e PORZIA.

PEPPITTA

Ò Limpia.

LIMPIA

(Zitto Peppa

Vecco Porzia spassammonce tantillo!)

PORZIA

(Negramene, e che bedo!

1220

Vide che confedenzia

Ch’ave Peppitta, cò sto sì laccheo.)

PEPPITTA

(Mò mormorea de nuje.)

LIMPIA

(E bizejo de le becchie

Lo mormorare sempe de nuje giovane.)

PORZIA

(Maramè, ca se toccano la mano!

1225

E pare che s’abbracciano porzine!)

À Sia Peppitta mia,

Vide, ca scannalizze le becine!

LIMPIA

Ah, ah, ah.

PORZIA

Che s’aggiano pazienzia.

PEPPITTA

Chi nò lo pò vedè che cchiuda ll’uocchie.

PORZIA

1230

Uh’ jancamè! fusse mpazzuta?

PEPPITTA

Pazza,

E chi se piglia li penziere d’autre.

PORZIA

Ma figlia mia già che non haje vregogna;

Nè rossore de fà sse cose mprubbeco;

Nò le fà co no scorza

1235

Fattell’a lo mmacaro

Co’ gente de judicio, e galantuommene.

C’a lo mmanco si pierde

Co chiste la modestia te faje utele.

PEPPITTA

Eh mò li galantuommene

1240

De sti tiempe nne sanno cchiù de nuje

Ne le fanno cchiù spezia

Quanta malizie maje pò avè na femmena!

PORZIA

Tu pigliate no viecchio denaruso.

PEPPITTA

Nò nò lo voglio giovene,

1245

E non mme mporta niente che sia povero .

PORZIA

Ma pò comme facite pe mmagnare!

PEPPITTA

À chesto, uno de nuje nc’hà da penzare.

Quanno lo pesce è bivo,

Sia sarda, ò sia retunno

1250

Sempe se fà magnà.

Ma quanno pò è stantivo,

Sia pescespata, ò Tunno

Non saje, che nn’aje da fà.

SCENA IV

PORZIA, e LIMPIA.

PORZIA

Ora vì lo diaschence!

1255

Lo Patrone è bottato,

Ed è boluto bene lo crejato!

LIMPIA

Accossì so’ le cose de sto Munno.

PORZIA

E lo Patre è contento?

LIMPIA

Contentissemo.

PORZIA

(Co la bona salute.)

1260

Ve vede accarezzare?

LIMPIA

E ch’è cecato?

PORZIA

E lo prommette?

LIMPIA

Nc’hà no gusto granne.

PORZIA

(Che le vaa na meta de malanne.)

Tù lloco magne?

LIMPIA

E dormo co Pippitta.

PORZIA

E duorme, co Peppitta!

LIMPIA

1265

Sì, ca lo lietto non è tanto stritto.

PORZIA

E lo Patre, che dice?

LIMPIA

Se stà zitto.

PORZIA

Se stà zitto?

LIMPIA

Securo.

PORZIA

Ò Patre nfrà li Patre lo cchiù nfammo!

Patre vetuperuso, Patre puorco!

1270

Comme? primmo de t’essere mogliere,

Te fà fare sse cose?

LIMPIA

Che mogliere? io non m’aggio da nzorare.

PORZIA

De cchiù?

LIMPIA

Cierto, e lo Patre

Pe chesto ssè coselle mme fà fare:

1275

Non saccio sì mme ntienne.

PORZIA

Mme vuo’ fà no piacere? Vavattenne,

Ca tu starraje mbreaco figlio mio.

LIMPIA

Ah, ah, ah, ah, ah.

PORZIA

Te nne ride porzì; lassa sta pratteca.

1280

E quanno vide femmene

Fuje comme vedisse lo dejaschence.

LIMPIA

Ma non chelle, che songo vertolose.

PORZIA

Comme mò vertolose?

LIMPIA

Che sanno cantà vuono’, e de buon gusto.

PORZIA

1285

Donca tu vaje appriesso a Cantarine?

LIMPIA

Chist’è arrore commune.

PORZIA

Figlio lassale ghì ca t’arroine.

Siente; nò nte ncrapecciare

Figlio mio co Cantarine;

1290

Ca sì a cheste t’abbecine

T’arredduceno accossì! (fà signo co le mmano.)

Lloro songo bone, e care

So’ lò schiecco de l’onore:

Ma sì tù ncè faje l’ammore

1295

Craje pezzenno te fann’ì.

SCENA V

LIMPIA, STUPPOLO, e pò RENELLA.

STUPPOLO

Aggio perzo Marchetto... O manco male

Segnora mia, che ve nne site fatta?

LIMPIA

E tù addo’ malejuorno te si’ puosto?

STUPPOLO

Jeva cercanno à buje.

LIMPIA

1300

Damme l’aniello, e chella tabbacchera.

STUPPOLO

(O maro mè!) che nne volite fare?

Scusateme Segno’, ca ll’aggio perze.

LIMPIA

Ah! frabbutto, briccone.

RENELLA

Ò vecco lo Laccheo, e lo Barone.

LIMPIA

1305

(Ò... Renella!) Llostrissemo Segnore

Io stò ccà pè servire uscia Llostrissemo.

STUPPOLO

Che nc’entra chesto mò?

LIMPIA

(Ca simmo ntise.)

STUPPOLO

Che mporta.

LIMPIA

(Lazzarone,

Miettete ssò cappiello.)

1310

Che se fà sià Renella?

STUPPOLO

Chesta tene l’aniello,

La tabbacchera, e tutto.

RENELLA

À Sì Barone mio,

Abbesogna, che ssi’ nò gran frabbutto!

STUPPOLO

1315

Marchetto, tu l’ascolti, e ti staje zitto?

LIMPIA

Chesto, nò mporta niente;

Sì ve l’hà regalato

Hà fatto buono, tutto stà ben dato.

STUPPOLO

E viva, il mio Marchetto.

LIMPIA

1320

(Io te voglio fa stà n’anno a lo lietto.)

STUPPOLO

(E ment’è chesto, mò stroppeo sta guitta.)

LIMPIA

(Fremma vascia la mano.)

RENELLA

Isso, è benuto pe la sia Peppitta,

E mò, da mè non saccio

1325

Che nne vole.

STUPPOLO

Ti bramo per mia Sposa.

RENELLA

Che nne dici Marchetto?

LIMPIA

Ca fa na bona cosa.

STUPPOLO

Il nodo è stretto.

RENELLA

Ammè, che so’ na povera fegliola.

Pare na cosa strana

1330

A sposà nò Barone!

STUPPOLO

Oh! Donna insana!

RENELLA

Mme pigliarria cchiù ’priesto lo crejato.

LIMPIA

Ma io non pozzo.

RENELLA

E che si’ ciunco? cierto,

Perche staje co’ Peppitta già ncappatto.

Ma dimme comm’aje fatto?

1335

Chesta non pò vedè lo Sì Barone,

Desprezza Michelino,

E pè chì mò? pè ttè?

STUPPOLO

Questi è il Destino.

Ch’à ste cose d’ammore,

Quann’uno crede stare cchiù securo;

1340

Pe chi manco se penza

Senza sapè perché, resta a lo scuro.

Se crede stà secura

La pecorella scura,

Quanno pascenno và

1345

Pe la Montagna.

Ma vene po lo juorno

Ch’assomma da ll’attuorno

No lupo nzanetà,

Che se la magna.

SCENA VI

RENELLA, STUPPOLO, e pò PORZIA.

STUPPOLO

1350

Or dunque, mia seccaggine,

Tù stutarraje di questo cor la sciamma?

RENELLA

(nne voglio fare na girata a Mamma.)

Siente ammè Sio Barone;

Mamma ncè stà cò buje nò pò stezzata;

1355

Mperrò pe la pracare,

Dì, ca te vuo’ pegliare

À essa; E nfrà de nuje ncè la ntennimmo.

STUPPOLO

Sì fico secca mia, cossì farrimmo.

RENELLA

E beccola ca esce!

1360

Via dateve da fare.

STUPPOLO

Dov’è Porzia mia vita?

Il Catafarco mio, dite dov’è?

PORZIA

Chisto, chì và trovanno?

RENELLA

Appunto atte,

Ca te vole sposà.

PORZIA

Leva ssa baja.

STUPPOLO

1365

Ò mio Truglio de vaja!

Appunto, io vado in traccia

Di tue carnumme.

RENELLA

(Mamma aje fatto caccia.)

PORZIA

(Caccia de che? de ss’ascio?)

STUPPOLO

Presto, ch’io già mme lascio

1370

Cader le mie membrane.

PORZIA

Chiano, chiano.

STUPPOLO

Ah! che quel muscio arrepecchiato seno

Cotanto m’innamora,

Che ti darrei di mano

(Sì n’avisse na facce de mmalora.)

PORZIA

1375

Chisto dice da vero?

RENELLA

Gnorasine.

PORZIA

E pe chesso mme hivevo trovanno

Cò tanta pressa?

STUPPOLO

Certo;

Ch’io t’amo assaje, descenzo mio scopierto.

Qual Porcello sitibonno,

1380

Che la Scrofa và cercando

Quando hà voglia di zucar;

Tal quest’alma sembra, quanno

Tè, cor mio, cercando và.

Ma se avvien, ch’io poi rimiri

1385

Quel tuo viso caro, e bello!

Mi distruggo ne’ sospiri,

Qual’amante ciucciarello,

Che al suo ben ragliando stà.

SCENA VII

GASPARRO, PORZIA, e RENELLA.

RENELLA

Bene mio, chist’è pasto de Segnore.

GASPARRO

1390

Vecco lo speretillo de sto Core,

Addio faccella d’oro.

RENELLA

Schiavo capo d’argiento.

PORZIA

(Ah, ah, ah, che bello compremiento!)

GASPARRO

Io creo, ca pe stà sera simmo leste?

PORZIA

1395

A chì mò? che so’ pazza? si tù a figlieta

Le faje fare da mò, la bona rrobba!

Consider’a mogliereta,

Ch’auto le farraje fare.

GASPARRO

Io bona rrobba a figliema?

1400

Porzia vuo’ pazzejare!

PORZIA

Che pazzeja! co st’uocchie

Ll’aggio veduto io stò vetuperio;

E tù nne si’ contento? và a la forca.

GASPARRO

Oje vecchia pazza, porca;

1405

Non parlà a lo sproposeto:

E sì stisse mbrejaca, e tù va vommeca.

PORZIA

A mmè porca mbrejaca? l’è Renella,

Ca mme ncè voglio fà na potechella.

SCENA VIII

MICHELINO, e li stisse.

MICHELINO

(Che d’è? Porzia, e Gasparro fanno lite!)

RENELLA

1410

Quietateve, ch’avite?

MICHELINO

Ch’è succiesso? ch’è stato?

PORZIA

Ll’aggio cò ssò vecchiardo sbregognato:

Sa che fà fà a la figlia?

La fà magnà, e dormì cò nò Laccheo.

1415

Se pò sentì na porcaria cchiù peo?

MICHELINO

(Ajemmè che sento! Oddio!)

GASPARRO

A nè? cò lo Laccheo era la cosa?

RENELLA

E mbè te pare poco?

GASPARRO

Nò nn’è niente.

PORZIA

E no le faje zompà tutte li diente. (à Michelino.)

MICHELINO

1420

À Si Gasparro mio;

Ch’aje perzo lo jodicio?

GASPARRO

E tù, che nne vuo’ fà de ssì penziere?

Attienet’a bedere

Li spreposete tuoje,

1425

Ca ì saccio lì guaje mieje.

PORZIA

Li guaje tuoje! sì mò ntenno; p’abbesuogno,

Addonca le faje fare stò sbreguogno?

GASPARRO

Ah, ah, ah, ah. Che bell’equivoco!

RENELLA

E se nne ride puro!

PORZIA

O viecchio pazzo!

MICHELINO

1430

Ommo senza rossore!

RENELLA

Ommo de niente!

GASPARRO

(Ah, ah, stanno ncampana.)

MICHELINO

Le spaccarria la Capo nfi a li diente.

PORZIA

O lana, lana, lana.

MICHELINO

(Io mme sento morire.)

1435

Siente, prega lo Cielo,

Ch’io non vea maje ccà miezo

Figlieta pazzeà cò stò Laccheo;

Ch’à tutte duje le scanno:

E sì tù parle te farraggio peo.

1440

Dint’a stò pietto unite

Tutte le ’Furie stanno;

E tutte s’armaranno

Ssò tuorto a bennecà.

Tanno canosciarrite

1445

Ll’ira, e lo sdigno mio:

E tanno chi songh’io

Meglio se vedarrà. (se nne và.)

GASPARRO

Ah, ah, ah, mò pe la risa schiatto.

PORZIA

Spit’abbiento vattenne, ca te vatto.

RENELLA

1450

Mamma leva ssà baja:

Peppitta ave ssò genio.

PORZIA

Bello genio!

RENELLA

Non vole Michelino, e bole chisto;

Lo patre le vo’ bene,

E le dà gusto.

PORZIA

O bravo! o marotene!

1455

E tù chesto saje dire nè moccosa?

RENELLA

Mò, ve dich’io, comme và la cosa:

È destino de le femmene,

Lò sprezzà li galantuommene;

E cò ruonte, o strafalarie

1460

Fà l’ammore, e pazzejà!

Pe nuje corre stà desditta,

D’Attaccarence a lo peo!

E pe chesto Sì Peppitta

Vole bene a no Laccheo,

1465

Non è sola mmeretà.

SCENA IX

GASPARRO, e PORZIA.

GASPARRO

Siente Sia Porzia, nò nte piglià collera;

Né te maravigliare

De chello, che de figliem’aje veduto;

Ca mò mò vederraje.

1470

Cose, che restarraje meza storduta.

PORZIA

Ma a pazzejà na femmena cò n’ommo

Non pare cosa bona.

GASPARRO

E sì chist’ommo mò, non fosse ommo?

PORZIA

E che bo’ esse femmena?

GASPARRO

1475

Chi lo ssà: mò mmò spero

De vedere sso gliuommero sbrogliato:

Ca song’ommo da bene, ommo nnorato.

PORZIA

Chest’è n’auto parlare; ma tù saje,

Ca mme vole sposà lo Sì Barone?

GASPARRO

1480

A ttene?

PORZIA

A mmè Gnorsì.

GASPARRO

(Che bello stommeco.)

PORZIA

Che dice?

GASPARRO

Ch’à buon gusto,

Tregliutella, mastina.

PORZIA

Brunotta.

GASPARRO

Garbatina.

Vistosa, speretosa.

PORZIA

Aggrazejata.

GASPARRO

1485

Via via, non parlà cchiù, ca si’ na Fata!

Ma nuje restammo, co l’appuntamiento,

De mme sposà Renella?

PORZIA

Una vota se parla.

GASPARRO

O che contiento.

Mò, che piglio stò giojello,

1490

Che prejezza che farraggio!

Nott’è ghiuorno mme starraggio

Semp’attuorno a essa, e a ttè.

Che commite, che festine

Che farraggio a li vecine,

1495

E che sfarze aje da vedè!

SCENA X

MICHELINO, che tene afferrato pe pietto STUPPOLO cò na sciammerga sdellanzata, senza perucca e cò no cappiello sbrenzolato ’ncapo, e pò PORZIA.

MICHELINO

Nò, contame frabbutto

Comme vace stò mbruoglio.

STUPPOLO

Non m’accedite, ca ve dico tutto.

PORZIA

Oh sfortunata mene Sì Barone?

STUPPOLO

1500

Auh! Sia Porzia ajutame.

PORZIA

Ch’è stato?

MICHELINO

Fatte li fatte tuoje.

STUPPOLO

Ahjere io sfortunato

Hiette a ghiocà e perdette lo vestito.

PORZIA

Ma, comm’à nò Barone, comm’a ttene,

1505

Mancavano denare?

STUPPOLO

Non vollero aspettare,

Chio venir le facesse dallo Stato.

MICHELINO

Ch’è stato, ah, ah.

STUPPOLO

(Statte zitto

Ca mò te dico tutto a sulo a sulo.)

PORZIA

1510

Addonca sì Barone senza Terre?

STUPPOLO

Eh’ nò, cara Signora:

E ca le ntrate non son giunte ancora,

Ond’io per mi levar de quarch’appretto,

Vorrei quarcosa ncunto de la dote.

PORZIA

1515

À Sì Barone mio, e che so’ pazza

À pigliareme a ttè, mò, che staje arzo.

MICHELINO

Comme a ttè se pigliava?

PORZIA

Gnorsì, ma mò nò n’aggio stì penziere.

STUPPOLO

Come? così coffeggi un Cavaliere?

MICHELINO

1520

Cavaliere? ah, ah, (mò mm’ave ditto

Ca isso era Crejato.)

Io pe chisto so’ stato

Vottato da Gasparro,

E tù lo spriezze?

PORZIA

E mò lo votto io.

STUPPOLO

1525

Quest’azzione a un par mio?

PORZIA

Eh’ figlio quann’aje vagno,

Puort’orologge, anella, tabbacchere,

Cò nò bello vestito;

Tanno sacce, ca tutte

1530

Pe cecesbeo te vonno, ò pè marito,

Ma quanno t’arreduce,

Comm’a ttè mò, che pare no pezzente,

Nò ncè na cana, che te tenga mente.

Ll’ommo, è comm’à nò presutto

1535

Mmano a chesta, e mano a chella:

Chì lò vo’ pe essa tutto;

Chì nò piezzo, e chi na fella;

Ma pò quann’arriv’all’uosso,

Nò ncè nullo che lo vo’.

1540

Quanno tene, dona, e spenne;

Chest’e chella lo pretenne:

Ma pò quanno stà a lo bascio,

Tutte quante fanno ll’ascio,

Perché spennere non pò.

SCENA ULTEMA

MICHELINO, STUPPOLO, e pò tutte.

MICHELINO

1545

Ora via,và decenno

Stò Laccheo mò chi è?

STUPPOLO

Ve stò servenno.

FONZILLO

Oh Michelino a ttiempo,

Ca t’aggio da parlà.

MICHELINO

Mò sò co ttico.

FONZILLO

Oh! Sì Baro’, ch’è stato?

MICHELINO

1550

Che Barone, ca chisto, è no Crejato,

Orsù, spapura.

STUPPOLO

Chisto n’è Laccheo.

MICHELINO

E chi è? (Gasparro da la Casa, Limpia e Peppitta.)

GASPARRO

Ah, ah, ah, ah.

MICHELINO

Zitto, zitto.

GASPARRO

Mm’aje fatto proprio ridere.

LIMPIA

Mme despejace, ca ve dongo ncommeto.

PEPPITTA

1555

Che ncommeto, io vorria

Che maje cchiù te partisse da ste braccia.

LIMPIA

Io te vorria tenè sempe cchiù stretta.

MICHELINO

Or io nne voglio fà mò la vennetta.

STUPPOLO

Chiano, chia’.

FONZILLO

Statte frate.

MICHELINO

1560

Lassateme, lassate. (Michelino caccia lo stelletto p’accidere Limpia e Stuppolo lo tene.)

GASPARRO

Chi è lloco?

PEPPITTA

È Michelino,

Che face lo nfernuso.

MICHELINO

Lassateme scannà ssò bricconciello.

PORZIA

Ch’è stato?

RENELLA

Che greciello?

LIMPIA

1565

Sì viene; viene; chesto (se fà nnanze à Michelino.)

Te resta mò de fà damme la morte.

MICHELINO

Amico lassa. (Scappa Michelino da chi lo tene, e bà de pietto à Limpia, ma scoprennose chesta le cade da mano lo stelletto.)

LIMPIA

Accide, chella Limpia,

Che dudece anne arreto abbannonaste:

Sì, passame lo core

1570

Già, che levato mm’aje sgrato, l’onore.

MICHELINO

Oddio Limpia! tù Limpia! ah! Commo è stato,

Che pe nfi à mmò non t’aggio conosciuta?

E pò, dive sapè, ca mmè fù scritto

Ca jere morta.

LIMPIA

E tù te nne dovive

1575

Nformare meglio.

MICHELINO

Nchesto aggio mancato,

Ma già che mò te trovo

Sana, e biva perdoname te prego. (s’addenocchia.)

PEPPITTA

È digno de pietate, e de perduono.

GASPARRO

Via fornimmo ssà cosa.

LIMPIA

Io te perdono.

FONZILLO

1580

E tù Peppitta?

PEPPITTA

Fonzo t’aggio ntiso.

Me te piglio sì Tata nc’acconsente.

GASPARRO

Io mme contento; e boglio

Sposareme Renella.

PORZIA

E lo Barone?

LIMPIA

Che Barone, ca chisto mm’è Crejato.

STUPPOLO

1585

Gnorsì, so’ no Barone sbaronato.

PORZIA

Via ncocchiateve tutte,

Ch’allutemo ogne cosa a fine arriva.

RENELLA

È beretate.

STUPPOLO

E biva

Il mio finto Laccheo.

TUTTE

E biva viva.

1590

Bello juorno abbenturato.

Meglio non se pò sperà.

Cchiù contento, e cchiù beato

De stò Core non se dà.

Lo Compositore, e Derettore delli Balli è lo Si Rocco Longo virtuoso Napolitano.