Lisa pontegliosa

Lisa pontegliosa, Napoli, Francisco Ricciardo, 1719

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO PRIMMO

SCENA I

LISA, e TONNILLO.

LISA

A’ a’, mo si mme piglie

Co sta chiacchiara sfatta, vavatenne,

Non te voglio sentire, và te mpienne.

TONNILLO

Ah Lisa; e c’haggio fatto?

LISA

M’haje mognuto lo piecoro; sù squaglia,

Và trova Rita toja,

Ca chella te sà fare

Gnuoccole, verrizzielle, e bille valle;

Io so’ fredda, so’ nzateca, e sciaurata,

Da me che ccosa vuoje?

Và pe li fatte tuoje.

TONNILLO

Che gnuoccole, che rrise? Tu che dice?

Chi t’hà dato a rrentennere ste nnorchie?

Rita, chi la canosce?

LISA

Nò la canusce ne? zanno, bosciardo;

Nò stive ll’auto juorno

Nziemo cod’essa sotta a chella teglia

A sonare, a cantare a musso a musso?

TONNILLO

E be’ chesto che d’è? ca nce spassavamo;

Ment’essa, ed io pascevamo le ppecore,

È cosa nova chesta?

LISA

E che decistevo,

Quando de me parlastevo?

TONNILLO

Chi parlava de te? che te l’hà ditto?

LISA

Chi me l’hà ditto? ll’haggio ntiso io

Dereto a chella fratta

Addo’ steva agguattata;

E tu tanto cecato

No mme vediste quanno venne; abbia.

TONNILLO

Ah Llisa bella mia, tropp’è lo vero.

Ca Rita me frusciava con a tatana,

Azzò l’ammasse, co lassare attene;

Ma io nò responneva, e steva saudo.

LISA

Nò rresponnive? Ah fauzo, e non deciste:

Retella, gioja mia, lassa f’a mmene,

Ca si trovo na scusa te la chianto?

TONNILLO

Vi’ ca n’haje ntiso buono, haje fatt’arrore.

LISA

Haje fatto tu sgarrone,

Si pienze coffejareme Zannuottolo,

Haje facce de parlareme?

De tenereme mente, e de pregareme?

TONNILLO

Ah core mio perdoname; tu saje

Quanto Rita è berruta, e parlettera;

M’ascette da la vocca a primmo lanzo:

Te ne cerco perduono; tè ste llagreme,

Che mm’esceno da ll’uocchie,

Ghist’è sango, che m’esce da lo core,

Lisa pietà, perdoname st’arrore.

LISA

Poveriello, che piatate,

Quanta lagreme che ghietta!

Piglia ccà, te priesto annetta,

Nò chiù mo’, ca puo’ morì.

Che pparole nzoccarate,

Che m’hà ditto, arrasso sia;

Ah forfante sfratta, abbia,

Non te voglio chiù sentì.

SCENA II

TONNILLO, e po RITA.

TONNILLO

Aimmè, che m’è socciesso?

Addo’ stonco? ch’è stato? ah Tonno, Tonno

Tu nce curpe a lo mmale, che mo’ pate;

Si tu non dive arecchia, e non parlave

A Rita, che sia accisa,

Non chiagnarrisse, e perdarrisse Lisa. (resta pensuso.)

RITA

Vecco lo Fato mio; Tonnillo schiavo...

Che d’è? no mme respunne? tu sospire?

Che d’haje bellezza mia?

TONNILLO

Non te voglio sentire, sfratta, abbia.

RITA

A chi dice?

TONNILLO

Sù, abbia? e do’ vogl’ire;

Si nò mmao a morire?

RITA

Tonni’ Tonni’, che d’haje? (lo scotola.)

TONNILLO

Oh Rita, tu ccà staie?

Haje visto Lisa? saje, che m’have ditto?

RITA

Non saccio niente; e quanno t’hà parlato?

TONNILLO

Aimmè, so’ consomato.

RITA

E perché gioja mia?

TONNILLO

Perché hà saputo

Quanto dissemo nziemo ll’auto juorno

Sott’a la teglia, quanno freschiavamo.

RITA

Che schiatta, che te mporta? nò mm’haje ditto

Ca tu la vuo’ chiantà co quarche scusa?

E qua’ scusa è chiù bella, e chiù polita,

Ca te porta lo musso? eh ntienn’a Rita.

TONNILLO

Ma nò mmoglio, che ddica,

Ca la mancanza è mia; n’haggio stò core,

Che mme tenca, e me chiamma tradetore.

RITA

Uh, lloco si’ arrevato, e tu si’ pazzo;

Vasta, che benca buono

Lo fatto tujo, e chi nò mmo’, che crepa...

Nò stare accossì affritto,

No mme strudere chiù st’amara vita;

Ca si Lisa non t’amma, t’amma Rita;

Che dice? no respunne, ah sgrato, sgrato.

TONNILLO

So’ sgrato è lo vero,

Ammà non te pozzo,

Tu lassame ire;

Che spiere da me?

Non cagno pensiero,

Chiù priesto me sbozzo;

Te voglio chiarire,

Non sonco pe ttè. (se ne và.)

SCENA III

RITA, e po CIANNO.

RITA

Ah Cano, ah Turco Moro,

Chesto me dice nfacce? e de ch’è fatto?

100

Sto pietto, che non ponno tanto, quanto

Sperciarlo sti sospire, e chisto chianto? (chiagne.)

CIANNIELLO

Veccote cca lo Sole,

Ch’è sciuto be’ mmatino a da’ sbrannore

A st’uocchie, a cheste serve, a ste mmontagne

105

Ritella mia che faje?... che d’è? tu chiagne?

RITA

Cianniello vavattenne,

Lassame stare sola a sgoliareme

De sospire, de trivole, e de lareme.

CIANNIELLO

E perché Rita mia? che t’è socciesso?

RITA

110

Chillo sgrato de Tonno,

Da po che ll’auto juorno

Me deze no tantillo de speranza,

Mo’ nnitto fatto m’hà chiaruta tutto.

CIANNIELLO

E che bbuo’, che te dica? te lo mmierete;

115

Quanta vote haggio ditto: Rita, Rita,

Nò mmattere stà preta,

Ca nò nne cacce fuoco; trova n’auto,

Che t’amma, che te prega, e che speresca;

E tu chiù tosta de na preta marmora,

120

Comm’a ruospo haje ncocciato;

Chello, che t’haggio ditto l’haje trovato?

RITA

Ma chi voglio trovà, si a mme non trovo,

Ca so’ perduta appriesso a chillo Cano?

CIANNIELLO

Vasta, che buoje ca già lo tiene mmano.

125

Siente Rita, nzi’ a mo so’ stato zitto,

Pe non te dà desgusto, ca squagliave

Pe Tonno, e mo’ che ddice

Ca chillo t’hà chiaruta, mo’ è lo tiempo,

Che mme pozzo scoprire,

130

Co ddi’, ca moro e tu mme faje morire.

RITA

A mme ddice?

CIANNIELLO

A ttè ddico.

RITA

Non si’ a ttiempo:

Si a primmo lo ddecive,

Havarrisse trovato

Chi te sentiva, e chi t’havesse ammato.

CIANNIELLO

135

E perché non so’ attiempo.

RITA

N’haggio core,

Tonno lo tene, e nce lo deze Ammore.

Tropp’a curto si’ benuto,

La lemmosena è già fatta,

Non te serve a tozzolà.

140

Chisto pietto è già bennuto

Non è casa, che se sfratta,

C’uno vene, e n’auto và.

SCENA IV

CIANNO sulo.

CIANNIELLO

Oh c’haje da fà co mmico,

145

Puo’ fuì quanto vuoie, ca be’ t’arrivo

Smargiassa mia, e sà che pede tenco;

Agguattate si puoie,

Comme face la quaglia a lo ppanico,

So’ no cano, che t’osemo, e te mmocco;

150

Si tu si llesta, io de valestra scrocco.

Zincarella mariola,

Comm’a borpa a la tagliola

Te nce coglio, crid’a mme.

Nò mme scappa sto lenzulo,

155

Haje da fà c ostò Fegliulo;

Belle cose vuoie vedè.

SCENA V

PASCALE, e SOSCA.

PASCALE

Ntanto, che tu mme dice,

Ca Nannella stà tosta?

SOSCA

E de che muodo.

PASCALE

E perché?

SOSCA

Che nne saccio.

PASCALE

160

E comme nò lo ssaje; nò ll’haje parlato?

Essa comme t’hà ditto?

SOSCA

Non te lo pozzo dicere,

Ca tu te piglie collera, e ghiastimme.

PASCALE

E di’ che fuss’acciso.

SOSCA

C’aggio ditto?

165

N’haggio parlat’ancora, e tu accommienze.

PASCALE

Ma si tu fiete d’aseno; nò mmide,

Ca vollo, e squaglio, e tu staie zitto, e rride?

SOSCA

Mo’ parlo, ma si niente auze la voce,

Vi’ ca fujo.

PASCALE

Mmalora, e sbotta, sbotta

170

Nò mmi’, ca me stò zitto?

SOSCA

Oh chesta è bella,

Tu strille comm’a cuotto,

E dice ca staie zitto?

PASCALE

Eh che sinche mmarditto,

Vuo’ propio, che ghiastemma, mpiso, mpiso,

175

Vi’ ca te sciacco?

SOSCA

(Bene mio, che riso.)

Si vuo’ bene da me, vascia le mmano;

Io so’ guarzone, e non so’ roffiano.

PASCALE

(Mo’ m’hà sorta lo perro; a luoco, e a tiempo

Nce vedimmo frabrutto) Sosca mio,

180

Nò mme schiattà chiù ncuorpo, và decenno.

SOSCA

Damme ccà stà saglioccola.

PASCALE

Perchene?

SOSCA

Ch’aggio paura.

PASCALE

Teccotella.

SOSCA

Hà ditto,

Ca Colonna la mamma

De te s’è ncrapecciata; e nò mmorria,

185

Ch’essa le desse guaje pe gelosia.

PASCALE

E si è chesso, n’è niente, io nc’arremedio.

SOSCA

Ma nc’è no guajo chiù gruosso.

PASCALE

E ch’è sso guaio?

SOSCA

Arrassate no poco.

PASCALE

So’ arrassato.

SOSCA

Non te vo’, ca si’ Biecchio scarcagnato.

PASCALE

190

Ah guitto caparrone, aspetta aspetta,

Oh trovasse na preta.

SOSCA

Vi’ che ghioja?

Tu vuoje fa pe le ccose, e po te ncricche.

PASCALE

Passa ccà tu c’haje ditto?

SOSCA

Ca n’è bero;

Ca si’ n’Ommo gagliardo, e n’Ommo fatto.

PASCALE

195

Si ll’haje ditt’accossine, buono haje fatto.

SOSCA

Ma Nanna m’hà respuosto

Ca vo’ no fegliulillo, comm’ad essa,

Che se lo faccia, e cresca a mmano soja,

Ca quanno l’Ommo è fatto,

200

E nc’hà no vullo, se fà Ommo sfatto.

PASCALE

Se face lo descenzo, che te vatta.

SOSCA

Ora sentite, io che nce corpo a chesto;

Accossì mm’have ditto.

PASCALE

E ba’ a mmalanne.

Damme ccà sta saglioccola, e battenne,

205

Le voglio parlà io, mo’ che la veo.

SOSCA

(Oh potesse troffarele carcosa.)

Lo pparlà non te serve,

Nce vonno li regale, e li presiente,

Tu si’ stritto de mano, e non saje niente.

210

Non nce resce

A fà l’ammore

Sacca rotta, e limpio core;

Chi non dà, se pò grattà.

È la femmena no pesce,

215

Che se ncappa, quanno mmocca;

Ll’oro è l’ammo, che la ncrocca,

Mena chisto, e bi’ che fà.

PASCALE

Ah cano fuje, fuje, ca mo’ vene.

SOSCA

E nc’è la Mamma puro.

PASCALE

220

Agguattammoce ccane; oh che desdetta,

Me sconceca lo juoco sta mmardetta.

SCENA VI

COLONNA, e NANNELLA.

COLONNA

E pe ddespietto tujo,

Me voglio mmaretare nata vota.

NANNELLA

E chesto che mme mporta?

225

Arrecettam’a mme, po fà che buoje.

COLONNA

Arrecettam’a mme? và ca staje fresca,

M’haje da fà la Vajassa nzi’ che campo;

E chello, ch’è lo ppeo,

Si lo Cielo me manna quarche figlio,

230

Tu mme nc’haje da penzare,

A nfasciarlo, a tenerlo, ed a bocare.

NANNELLA

A chesto l’haje sgarrata;

Chi se face li figlie, se le cresca;

Otra cche non ce stace sta paura,

235

Si’ passata de punto mamma mia,

Te puo’ menà la striglia,

Ca non truove no cano, che te piglia.

COLONNA

A llenghuta mmardetta, chest’a mmammeta?

Che fusse accossì tune, brutta fatta,

240

Nnonnatura de crapa; io stò chiù fresca,

Che n’era quanno mme pigliaje à Patreto;

Tè vi’ stè carne tè, pastose, e belle,

Fresche, comm’a la rosa, e tennerelle.

NANNELLA

(Mara me, comm’è pazza.)

245

Da me che ccosa vuoje? và te mmarita;

Damme lo mmio che me lassaje Patremo,

Ca me stonco co Zia, e la fenimmo.

COLONNA

E che t’have lassato? doje foscelle,

Na cocchiara, ch’è rotta, e no stainato,

250

Ch’è già miezo scassato.

NANNELLA

E lo Ciuccio, e le Crape?

COLONNA

È stiento mio,

È robba fatta co la dota mia.

NANNELLA

E si è chesto, covernate, mo’ vao

Sperta, e demerta pe lo fino Munno,

255

Nzi’ che trovo n’affritto, che me voglia;

Lo ppane mme l’abbusco, io saccio fare

Caso, nnatte, manteca, e recottelle;

E quanno auto non fosse, so’ fegliola,

Non so’ trist’a bedere,

260

Agn’uno m’arecetta pe piatate,

E nò sopporto chiù sta canetate.

COLONNA

Ah porca chesto dice?

Te voglio carosare; trase dinto,

Apparecchia li stiglie, e fà lo ffuoco

265

Pe fare le recotte.

NANNELLA

E addo’ è lo latto?

COLONNA

Mo’ lo bao a pigliare addò Pascale.

NANNELLA

E bà ca t’aggio ntesa.

COLONNA

Pecché rride?

NANNELLA

Rido pe gusto mio; non pozzo ridere?

COLONNA

Pecché rride te dico?

NANNELLA

E nò mmuo’ dire,

270

Ca vuo’ ire a bedè lo gioja tujo,

Chillo Viecchio guattascio.

COLONNA

Schiatta, schiatta,

Che nn’haje mmidia? schefienza?

NANNELLA

E non è muorto?

COLONNA

Che puozze morì tune, mala lengua,

Ca chillo t’hà da rompere chest’ossa,

275

Quanno se fà patrone de la Casa.

NANNELLA

O mamma mia, ca Marzo te n’hà rafa.

Te la faccio sta vota pe mmano.

COLONNA

Nnanze muore, che bide stò juorno.

NANNELLA

Chiano chiano.

COLONNA

Na zubba, no cuorno.

NANNELLA

280

Mme mmarito chiù priesto de tè.

COLONNA

Puo’ morì nò nne pruove si asse.

NANNELLA

Nche tu pienze trovare marito,

Io lo tenco, e nce faccio no figlio.

COLONNA

Crepa, e schiatta, mo mmo’ me lo piglio,

285

È già llesto l’aniello a lo dito,

Mo lo bbide.

NANNELLA

E tu statt’a bedè. (Se ne và Colonna.)

Vi’ che Becchia mmardetta! nò le vastano

Di marite, c’havute, vo’ lo tierzo;

Mmala sciaura sbottala, e che d’have?

290

E quanno la scommatte la scajenza;

Ad essa penza schitto, e a mme non penza.

Vorria sapè na vota

Che ccosa è sto marito,

Si è tanto saporito,

295

Comme se fà contà.

Agnuna vace mmota,

S’accide, e se tenaglia

P’haverne na retaglia;

Sta cosa comme và?

SCENA VII

PASCALE, e SOSCA.

PASCALE

300

Ascimmo da ccà ddinto; addo’ si’ Sosca,

Curre, staglia la via, e bà a la mantra,

Dà chiacchiarea la Vecchia ca mo venco;

Quanto parlo a la figlia.

SOSCA

È lesto, è lesto

(Mo te la faccio.) ma tu viene priesto. (se ne va.)

PASCALE

305

Oh maro me ch’è stato? io squaglio, io moro,

Pe sto mossillo d’oro; ma sta Cana

De me non hà piatate;

Ah Nanna vi’, ch’è troppo canetate,

Ma che? mo che la Mamma

310

L’hà pigliata nzavuorio, e la trommenta,

Essa p’ascì da guaje, e pe despietto

De chella brutta Vecchia gliannolosa,

M’hà da venire mmano: ll’haggio ntesa;

A te Pascale, secota la mpresa.

315

Tu che d’haje? pecché te sconfide?

Si’ bell’Ommo; si’ rricco, si’ fforte;

Chesta sciorte

Pecché vo’ mancà?

Sù datt’armo, nò nziente, nò mmide,

320

Ca speranza t’allarga lo core,

Ed Ammore

Te vole ajotà?

SCENA VIII

PASCALE, e NANNELLA.

PASCALE

Oh veccola, ca esce; a ttè Pascale.

NANNELLA

Io non saccio che fuoco aggio da fare,

325

Ccà non ce sonco legna; e manco frasche.

PASCALE

Si vaje cercanno fuoco, Nenna mia,

Azzeccat’a sto pietto,

Ca nce nné na carcara, pigliatenne

Na pala, na vrasera, quanto vuoje;

330

Ma tù vuo’ fuoco, ed haje chist’uocchie tuoje?

NANNELLA

Da dov’è sciuto st’Ascio pe frusciareme?

PASCALE

Nò mme respunne ne?

NANNELLA

Tu co chi ll’haje?

Vattenne zi Pasca’, c’haggio da fare;

E po si vene Mamma me carosa.

PASCALE

335

O mmeriana mia, n’havè appaura,

C’haggio mannato Sosca a darle chiacchiare.

NANNELLA

Ghe pe chesso, che buoje

Co sti gatte felippe, che mme faje?

PASCALE

O facce de joncata tennerella,

340

Tu già lo ssaje, che boglio,

Cerco sta grazia toja; tieneme mente

Co na cera piatosa,

Dimme na parolella de confuorto,

Nò lo bi’, c ape ttè so’ miezo muorto?

SCENA IX

COLONNA, e SOSCA de banna, e li stisse.

SOSCA

345

Te videtillo tè.

COLONNA

Stamm’a sentire. (s’annasconneno.)

PASCALE

Tu pienze, e nò respunne?

NANNELLA

Pe sta vota

Te voglio dà sso gusto, ma co patto,

Che t’arreciette, e chiù nò mme trommiente;

Tu da me che pretienne? già lo ssaje

350

Ca mamma mia te vole, e me fà stare

Dint’a lo ffuoco pe la gelosia.

PASCALE

Che le venca la pesta; vi’ c’Arpia?

E tu si mme vuo’ bene,

Pe farela schiattà, amma Pascale,

355

Ca te nguadio, e te faccio

Patrona d’agne ccosa;

Dimme sì, dimme sì vocc’addorosa.

NANNELLA

Pasca’... tù mme faje ridere,

Me puo’ essere Vavo con zalute,

360

E mme vuo’ pe Mogliere, che si’ pazzo?

PASCALE

Comme so’ pazzo? vi’ ca faje sgarrone,

Te cride ca so’ Biecchio, e n’è accossine;

So’ li guaje, le ffattiche, è lo gran caudo,

Che mme fà jancheiare li capille;

365

Ma po si tu sapisse... eh lengua nninto.

NANNELLA

Nò mmoglio sapè niente.

PASCALE

Eh nò, ca tu nò mmide.

NANNELLA

Nò nn’haggio che bedè...

PASCALE

Ma n’haje provato.

NANNELLA

Ch’è recotta? ch’è caso? statte zitto.

PASCALE

370

Me stò zitto, ma crideme, Nannella,

Ca si tu me vuo’ bene,

Nc’haje gusto; e bedarraje, che te nne vene.

Vi’ ca n’uosso de presutto

Te fà grasso lo pegnato,

375

E le ddeta fà alleccà.

NANNELLA

Quanto dice, è bero tutto,

Ma si è troppo carolato,

La menesta fà jettà.

PASCALE

Nanna mia, si nò mme cride,

380

Fà la prova, ca lo bbide;

O dimmann’a chi lo ssà.

NANNELLA

Tata mio hagge pacienzia

Ca sta bella sperienzia

Ncuoll’a mme non mmoglio fà.

SCENA X

COLONNA, PASCALE, e NANNELLA.

COLONNA

385

È fenuta stà joja?

NANNELLA

Ah mara mene.

COLONNA

Fegliola trase dinto; e be’ Pascale

Stà buono fatto chesto?

PASCALE

E ch’aggio fatto?

COLONNA

Si’ Ommo de jodizio, mannaggia,

E me miette mmerrizze sta fraschetta?

390

Si lo ffacess’a figlieta, a nepoteta,

Comme te saparria?

PASCALE

Siente, Colonna mia, nò ll’haggio ditto...

COLONNA

Non serve, t’aggio ntiso;

Nò la facimmo lonca, vasta vasta

395

Te voglio troppo bene, ca si none.

PASCALE

Io te rest’obbrecato de sto bene,

Ma tu dimme, c’haje ntiso?

COLONNA

Niente, niente.

PASCALE

Ll’haggio ditto, si affe, si mme vo’ fare

Quatto recotte, ca le do lo latto,

400

Ca ll’haggio da mannare a no Segnore.

COLONNA

Potive sparagnare st’addemmanna,

Io sonco la Patrona.

PASCALE

E tu non sierve,

Voglio cose appontute, e tennerelle.

COLONNA

Veramente haje na vocca de Segnore.

PASCALE

405

Te darria la resposta, ma nò mmoglio,

C’haggi’auto ncapo; schiavo.

COLONNA

Schiavo tujo.

PASCALE

(Si me sconceco chesta, vao male.)

COLONNA

(Si chisto ammossa, non arrivo a chiunzo.)

PASCALE

(Me la voglio accordare.)

COLONNA

(Voglio fegnere.)

PASCALE

410

Eh, di’ Colonna?

COLONNA

Che t’accorre?

PASCALE

Siente,

Haggio ntiso na nova, ca mmarite

Nannella toja; chi le daje, si è lizeto?

COLONNA

Che boglio mmaretà, sarrà mpazzuto,

Chi hà cacciato stà nfammia.

PASCALE

Comm’è nfammia

415

Mmaretare na Figlia?

COLONNA

È peo de nfammia,

Ca mme vonno levare a mme la sciorta;

Che d’è me tiene mente?

Te nne faje maraveglia?

PASCALE

Niente, niente.

COLONNA

Ma parla.

PASCALE

Vuo’, che ddica?

COLONNA

Ll’aggi’a gusto.

PASCALE

420

Colonna, haggio appaura, che nò rieste

Co la semmenta ncuorpo,

Comm’a cocozza pazza.

COLONNA

Chesto, che ddice a mmene,

Tu penzalo pe ttene.

PASCALE

425

Ntanto che buo’ marito?

COLONNA

Tanto bello.

PASCALE

Pigliate na lanterna, e ba lo trova.

COLONNA

Ll’haggio trovato, e tu si’ isso; ah cano,

E nò mme fà sperì; te si’ addonato,

Ca t’ammo, e ca te voglio; e quanno, quanno

430

Me dice sì, me lieve da st’affanno?

Cardillo d’ammore

Allegra sto core,

Sù canta na vota,

E famme zì, zì.

435

Tè vi’ sta cardella,

Pe ttè se martella,

Speresce, va mmota,

Cojetela sì.

PASCALE

Che cardella mmalora? si’ cornacchia,

440

Si’ ppeo de na cevettola; vattenne,

Accattate na funa, e ba te mpienne. (Pascale fuje, e Colonna le va appriesso.)

SCENA XI

TONNILLO, e CIANNIELLO.

TONNILLO

Nò nnego, c’haggio tuorto; ma Cianniello

Nò mme fà desperà; vi’ ca me mpenno

A n’arvolo de chiste, e la fenesco?

CIANNIELLO

445

Chi vo’, che te despiere? tu si’ pazzo?

Pe chesto t’haggio ditto,

Che terammo sto carro tutte duje,

Io parlo a Llisa, e beo de l’appracare;

Tu pe mme parl’a Rita, e famm’ammare.

TONNILLO

450

Pe Rita è piso mio.

CIANNIELLO

Damme la mano.

TONNILLO

Teccotella.

CIANNIELLO

A nnuje,

Agguattammoce ccà, vi’ ca mo’ veneno.

TONNILLO

Ah core bello mio t’haggio perduto.

CIANNIELLO

E priesto, nò cchiù mo’, ca m’haje storduto.

SCENA XII

LISA, e RITA.

LISA

455

Chist’è sospetto tujo.

RITA

Comm’è sospetto?

Si ve oca da tre ghiuorne nò mme parle,

E me staje con a cera tanto brutta,

Che mme faje tremmà tutta.

LISA

Chist’è signo Ritella, ca lo stommaco

460

Te dice, ca m’haje fatto quarche cosa;

E pe chesto haje sospetto, e te janchie

Quanno me vide; vasta io te sopporto,

Ca simmo tutte doje de no sanco...

RITA

Me soppuorte? e de che? che t’haggio fatto?

LISA

465

Llecordate la Teglia.

RITA

Uh sore mia,

E pe chesto mme staje tant’ammossata?

Si saccio chi t’hà detta ssa postecca

Pe mmettere mmecidia ntra de nuje,

Le voglio caccià ll’uocchie;

470

Lisa nò stare chiune nfantasia,

C’haggio voluto scanaglià Tonnillo;

Chi te lo leva? è tujo; va pigliatillo.

LISA

L’haje scanagliato buono, e de che muodo;

E pocc’haje visto quanto pesa, e traje,

475

Va pigliatillo tu, ca no mme serve;

Cchiù meglio cocchia non pò fare Ammore,

Tu si’ trammera, e chillo è tradetore.

RITA

Vi’ ca tu parle sparo sta mmatina?

LISA

E non te vuo’ stà zitto facce storta?

RITA

480

Facce storta si’ ttune, presentosa.

LISA

Ah scirpia, malenata, si te piglio,

T’ammasono ccà nterra, e la fenesco.

RITA

Non t’accostà, ca te straviso tutta.

LISA

A mme vuo’ stravesà, scigna, schefienza?

RITA

485

So’ chiù bella de tene, schiatta, schiatta.

LISA

Uh tè tè le bbellizze de Dognanna!

Che puozz’essere accisa, e te pretienne?

RITA

E pretenniete tu cuofono mio.

LISA

O mummia.

RITA

Matresciana...

LISA

Aspett’aspetta. (le va ncuollo.)

RITA

490

E manco te nne vaje? ah zio, ah zio. (fuje.)

LISA

Fuje, fuje Janara, ca t’arrivo

Con a pret’a li lumme, e t’ammasono. (va cercanno prete.)

SCENA XIII

CIANNIELLO, TONNIELLO, e le stesse.

CIANNIELLO

Ah Lisa vi’, che faje?

LISA

Ca faccio buono.

TONNILLO

Rita, Rita fuje ccane.

495

Tienela Cianno, nò le fà menare, (se nne trase co Rita.)

LISA

Nò mme tenè, la voglio sdellommare.

SCENA XIV

LISA, e CIANNO.

CIANNIELLO

Ah Lisa, ch’è bregogna.

LISA

Che mme mporta?

Me voglio mennecà.

CIANNIELLO

Sienteme primmo,

E po fà nzò, che buoje.

LISA

Sù, va decenno.

CIANNIELLO

500

Saccio, ca chesta baja è prevenuta,

P’ammore de Tonnillo; ed io te dico

Da parte soja, che t’accojete, e cride,

Ca t’amma, e bo’ morì schitto pe ttene.

LISA

Chesto t’hà ditto?

CIANNIELLO

Sine.

LISA

Bene, bene.

CIANNIELLO

505

Vo’ fà pace co ttico.

LISA

Ll’haggio a gusto.

CIANNIELLO

Te vo’ venì a trovare.

LISA

Di’, che benca.

CIANNIELLO

Pe cercarte perduono.

LISA

Nce lo donco.

CIANNIELLO

Non te partì da ccane.

LISA

Ccà mme stonco.

LISA

Curre priesto, e di’ a sto zanno,

510

Ca pe mmente è berde, è bivo,

Chisto nganno,

E sto corrivo

Co lo sanco hà da scontà.

Le sarraggio nzi’ che more

515

No cortiello a chillo core;

E s’io moro primmo d’isso;

Oh marisso,

Nott’e ghiuorno

Le staraggio semp’attuorno,

520

Pe poterlo trommentà. (se nne va.)

CIANNIELLO

Mannaggia, e comme stace,

Chesta è na bella via de fà la pace. (le va appriesso.)

SCENA XV

TONNILLO, e RITA.

TONNILLO

Ora chist’è lo signo

De farem’abedè si mme vuo’ bene,

525

Ama Cianno pe mmene.

RITA

Dice addavero, o abburle?

TONNILLO

E sì, ca venn’allesse?

RITA

Ah Tonnillo...

TONNILLO

Nò nzerve, non c’è auto;

O chest’, o t’accojeta,

530

E nò sperà da me na cera bona.

RITA

Siente Tonnillo.

TONNILLO

E mo’ tu canta, e sona.

RITA

Chesto mme dice nè?

Tu chesto vuoje da me?

E comme lo ppuo’ dire?

535

Comme lo pozzo fà?

O cano sgrato, sgrato

N’abbasta quanto pato?

Pe fareme morire

Sta jonta mme vuo’ dà.

SCENA XVI

TONNILLO sulo.

TONNILLO

540

Se n’è ghiuta a malanno? foss’accisa,

Pocca è la causa de lo mmale mio;

Vedimm’addov’è Cianno,

Pe sentire c’ha fatto;

Ma c’hà voluto fà? n’hà fatto niente,

545

Ca si nò ccà starria;

O sciorta, o sciorta mia,

Potesse a lo mmacaro,

Levarme chella Cana da sto core,

Pe nò mmederme tanto trommentato;

550

Leva, che buo’ levà? so’ desperato.

Vi’ no Toro, che ten’afferrate

A l’arecchia li cane arraggiate,

Sbruffa, zompa, se vota, s’abbia,

Vo’ foire, e non pote scappà.

555

Io so’ ppeo ca tenc’a sto core

Quanta cane hà lo cano d’ammore;

Voto, e giro, scappare vorria;

Ma non pozzo, e me sento magnà.

SCENA XVII

PASCALE, e po SOSCA.

PASCALE

Nce venca la Fortuna,

560

Chesta è mpeca de Sosca;

Venir’attiempo chella brutta Vecchia

Pe sconcecarme! Ah ccano si m’addono,

Ca tu si’ stato, te puo’ dà pe muorto;

Uh ca vene redenno a chesta via;

565

Agguattamoce ccà pe fà la spia. (s’annasconne.)

SOSCA

Oh bene mio, non pozzo

So’ scosute li scianche pe la risa:

E che burla, e che burla, ch’aggio fatta

A lo Viecchio forfante;

570

Volea fà le rrecotte lo quernuto;

Io scagno de dà chiacchiar’a Colonna,

L’haggio fatta tornare

Semp’a carrera, pe lo sconcecare.

Lo bboglio di’ a Nannella; uh te ca esce.

SCENA XVIII

NANNELLA, e SOSCA.

NANNELLA

575

O Sosca, tu staje ccà?

SOSCA

Pe te servire.

NANNELLA

Haje visto mamma mia?

SOSCA

Mo’, mmo’ vene.

NANNELLA

Tu ride? pecché causa? che d’è stato?

SOSCA

Oh ca puro li muorte redarriano;

Mente Pascale steva ccà co ttico,

580

Nc’haggio portato mammata.

NANNELLA

Uh, c’haje fatto?

Mo’ che bene la sento, e che bo’ fare.

SOSCA

N’havè appaura, sà ca no nce curpe;

Anze me t’hà mpromessa,

Si faccio quarche mbroglia

585

Pe farla nguadiare co lo Viecchio;

E la mbroglia è già llesta.

NANNELLA

O core mio, che bella nova, e chesta,

Dice lo vero? vi’ ca tu mme gabbe.

SOSCA

Non te gabbo si affè.

NANNELLA

Cierto?

SOSCA

Securo.

NANNELLA

590

Uh, che prejezza nn’haggio.

SOSCA

Damme lo veveraggio.

NANNELLA

Non tengo che te dà, so’ poverella.

SOSCA

Damme na mozzarella. (fà zinno a la poteca.)

NANNELLA

Non so’ benut’ancora.

SOSCA

595

E n’haje nulla stepata?

NANNELLA

None, ca la poteca stà scopata.

SOSCA

Ah cana, be’ facc’io, ca tu le ttiene. (trase a la poteca.)

NANNELLA

Te voglio rialà, lassa f’a mmene.

Te voglio dà na cosa

600

Chiù bella de la rosa;

Ma non è tiempo mo’,

Lassal’ammaturà.

È sciore, e non è sciore

N’è frutto, e hà sapore;

605

E quanto chiù nne vuo’,

Chiù te nne voglio dà.

SOSCA

Saporitella mia, vocca de Fata

Và decenno, ch’è chesto

Ch’è sciore, e non è sciore.

NANNELLA

È na joncata.

610

Orsù vattenne, ca po vene mamma.

SOSCA

E chi se vo’ scrastà da nnanz’attene,

Si co ciento capezze, me nce tiene.

NANNELLA

Vattenne, core mio.

SOSCA

Mo’ me nne vao;

Ma dimme, me vuo’ bene?

NANNELLA

Gnorezzine,

615

E tu vuo’ mbene a me?

SOSCA

Quant’a lo tore.

NANNELLA

Oh che gusto.

SOSCA

O che spasso.

A DUE

È fà l’ammore.

SOSCA

Fata bella gioja gioja

Dimme, dimme di chi si’?

NANNELLA

620

Zò la toia, zò la toia.

SOSCA

Si’ la mia?

NANNELLA

Gnorezzì.

SOSCA

Oh vocchella cianciosella

Famme, famme no resillo.

NANNELLA

Teccotillo, a, a, a. (ride.)

SOSCA

625

Bene mio, ca tutto squaglio.

NANNELLA

Ntoppa ntoppa me ne saglio.

SOSCA

Che prejezza!

NANNELLA

Che docezza!

SOSCA

Palommella.

NANNELLA

Palommiello.

SOSCA

Famme mo’ nò sosperiello.

NANNELLA

630

Fà tu puro.

A DUE

Ah lo core, ah ah à. (sospirano.)

PASCALE

Ah cano tradetore.

SOSCA

Aimmè so’ ghiuto.

PASCALE

Mo’ te voglio scannare.

A TRE

Aiuto aiuto. (Pascale afferra Sosca da dereto, e chillo fà forza pe foire, e lo fà cadere nterra.)