Lisa pontegliosa

Lisa pontegliosa, Napoli, Francisco Ricciardo, 1719

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO TERZO

SCENA I

PASCALE, TONNILLO, CIANNIELLO, SOSCA co no frascone ncuollo aparato de ziarelle, e CORO de Pecorare, che beneno sonanno.

PASCALE

Addove si’ fegliulo,

Mpizza ccà sta mortella,

Ed attaccace po sta palommella.

1225

E buje guagnune co lo llero llere

Mo’ facit’assapere a ssi pasture,

Ca Cianniello se piglia Lisa mia,

E Tonno nguadia Rita.

TUTTI

E accossì sia.

SOSCA

È puosto lo frascone, nc’è nient’auto?

PASCALE

1230

Non ncè auto de chesto; Orsù fegliule, (A Tonno, e Cianno.)

Jatev’apparecchianno pe sta sera;

Facimmo sta mmarcata,

Ca po volimmo fà n’auta nfornata.

CIANNIELLO

E che cosa, messere?

TONNILLO

È cosa bona?

PASCALE

1235

Po lo ssapite appriesso, vasta, vasta,

E buje me nc’haverrite d’ajutare.

SOSCA

E dillo ppriesto, ca te vuoje nzorare.

PASCALE

E sempe parle tu sciosciamm’arreto;

Che puozz’esser’acciso, statte zitto;

1240

Se ppe no juorno scancareo sto guitto.

SOSCA

Llossoria non se nfada, ca pazzeio.

PASCALE

Pazzeio ste bbrache, è tiempo de pazzia?

Via sù se metta mmiezo ll’Ossoria.

SOSCA

Che d’è non fosse Ommo

1245

De rompere na lanza a chessa jostra?

Orsù fegliule dateve da fare, (a li sonature.)

Esca chi vo’ ccà mmiezo p’abballare (li sonature sonano, e Sosca abballa.)

CORO

Viene Ammore allora bona

Canta, e sona,

1250

E fà ssa festa;

Sti fegliule, e ste zetelle

Viene priesto a consolà.

Pe fà grazia chiù compite,

Fà na bella

1255

Chioppetella

De sciorille de jenesta,

De papagne, e campanielle;

E lo lietto de li zite

Miettetence a sciorejà. (non si replica la prima parte.)

SOSCA

1260

Che te pare messere?

TONNILLO - CIANNIELLO

E biva Sosca.

SOSCA

Chesto Sosca te fà, quanno se nfosca

Sempe lo ragno se magna la Mosca. (torna a zompà.)

PASCALE

Feniscela nò chiù, ca nc’haje nfettato;

Ammarcia a la pagliara,

1265

Accide no crastato,

E facimmo sguazzà lo parentato.

SOSCA

Mo’ te servo messere,

E te faccio vedè ca so’ bbalente

Quanno nc’è rrobba da jocà li diente. (se nne và.)

SCENA II

PASCALE, TONNILLO, e CIANNIELLO.

PASCALE

1270

Tonnillo mio, che d’haje?

Tu me staje penzeruso, che nc’è niente?

TONNILLO

Stò nò poco storduto co la capo,

Ca no nn’haggio dormuto chesta notte.

CIANNIELLO

(Oh ca so’ aute botte.)

PASCALE

1275

E statte allegramente,

Ca faje no mal’aurio a la Zita.

TONNILLO

Farraggio quanto pozzo,

(Aimmè ca crepo, e schiatto;

O Tonnillo, e c’haje fatto?)

PASCALE

1280

Ccà non ncè chiù che fà.

CIANNIELLO

Iammo connio.

PASCALE

Commetate l’ammice, e li pariente,

Venc’agnuno, che bole a lo festino;

Ca non nce manca pane, caso, e bino.

TONNILLO

(O quanto meglio diciarrisse, o quanto,

1285

Can ò scompe ssa festa senza chianto.) (se nne vanno cantanno lo ripieno.)

Vien’Ammore all’ora bona, &c.

SCENA III

LISA sola.

LISA

Tonno se nzora, e già se piglia Rita,

E tu Lisa che faje? sospire, e chiagne,

E de trivole nfiette ste Montagne,

1290

Ah negra me, che bedo, è già chiantato (s’addona de lo frascone.)

Lo rammo de mortella, lo nzegnale

De chisto nguadio, già pe mme s’è puosto

Lo pennone scontento

De la jostizia; ed io no mme resento?

1295

Ah tradetore, ah nfammo, non penzare

De vedè stà jornata mente campo,

Già me joco la vita,

Si non si’ mio, manco sarraje de Rita.

Mpiett’a mme so’ scatenate

1300

Li demmuonie tutte quante;

E me vedon’ombra nnante,

Che m’avvisa.

Lisa, Lisa

Tu già muore,

1305

E non haje core

De poterete mennecà?

Sù che serve chisto chianto?

Non è tiempo de piatate,

Scicca st’arvolo mmarditto; (ccà scicca la frasca, e la sbalanza dint’a la Scena.)

1310

Po và trova chillo guitto,

Chella scigna; falle quanto

Lo despietto te dirrà.

SCENA IV

COLONNA, SOSCA.

SOSCA

Di’ priesto c’haje da di’, c’haggio da fare.

COLONNA

Tu l’haje pegliata troppo menotella,

1315

E Pascale me pare

Ca nò nce dorme niente,

Pe fà lo fatto sujo nziemo co figliema,

Sempe le stace attuorno,

La po’ gabbà, e facimmo qua’ ttaluorno.

SOSCA

1320

A mme puro me vace pe la capo

Sto sospetto mmarditto; orsù Colonna

Dammo dinto, e st’attiento;

Nc’abbroca, vavattenne guatta guatta

Dint’a sta grottecella ccà dereto.

COLONNA

1325

E che nce vago a fare?

SOSCA

Te nce manno lo Viecchio co la scusa

De trovarece figlieta, me ntienne,

Quanno site a la scura zitto, e mutto,

Saccio, ca te saje movere,

1330

Agghiostateve vuje, ca faccio chiovere.

COLONNA

E la forca t’appicca porciglione,

E tu vuo’, che mme faccia sta vregogna?

SOSCA

E si nò, non te sane maje stà rogna.

Si non fosse pe ste mbroglie,

1335

Quanta femmene scontente

Morarriano Vecchie zite;

Ca non provano marite

D’auto muodo, e crid’a mme.

Chi è na jolla, chi è pezzente,

1340

Chi è becchiumma, chi è storciata,

E chiù d’una s’è acconciata

Co sti mbruoglie, e st’arravvoglie,

E mo’ sciala, e stà a gaudè.

COLONNA

Ma si chillo s’addona, ca sonc’io,

1345

E la mpeca non resce,

Nò resto sbreognata?

SOSCA

Sient’a mmene,

Io venco retomano accompagnato.

E tu vasta, che ghiesce

Da llà dinto strellanno,

1350

Ca si be’ non te tocca a ritto, e storto,

Nce mettimmo a gredà, nguadia, c’haje tuorto.

COLONNA

Orsù, và parla ad isso,

Ca si tu nce lo cuoglie, io sonco lesta.

SOSCA

Mo’ vavo, e torno; e faccio ssa menesta.

COLONNA

1355

Si mme resce chesta mpeca,

Vi’ che bella zannaria

Nnce vo’ esse gioja mia.

A DUE

E che ghioja se vo’ fà... aaa. (ridono.)

COLONNA

Venarrà seca molleca

1360

P’arrobbare scarolelle,

Ma che torza tennerelle.

A DUE

Lo sciaddeo nce vo’ trovà... aaa. (Colonna trase a la casa, e Sosca se nne và.)

SCENA V

RITA, e TONNILLO.

RITA

Tonnillo mio, che d’haje

Co chesta facce scura?

1365

Tu scagno de st’alliegro,

Ca mo mmo’ nguadiammo all’ora bona,

Staje penzuso, colereco, e fetente?

Aimmè già me lo nzonno,

Ca tu te si’ pentuto; e si è lo vero,

1370

Accideme Tonni’, ca so’ contenta;

Parla chiaro, e non fà la facce nfenta.

TONNILLO

Lassame stà, si mme vuo’ bene, Rita,

Nò mmettere chiù ddosa a lo dolore,

Che me squarta sto core.

RITA

1375

È puro na gran cosa,

Che non pozzo sapè, pecché t’affrie?

Dimmelo fato mio...

TONNILLO

Che buo’, che ddica.

Lo mmale, che me schiatta, e me sbodella?

Vasta mo’, ca te nguadio pe sta sera,

1380

Non ghì sapenno chiù.

RITA

Chi s’accojeta,

Si non dice, che d’haje.

TONNILLO

Mo mmo’ ne votto craje; e priesto scumpe,

Che regnola che si’; lo buo’ sapere?

Me vace pe la capo no sospetto

1385

Ca Lisa morarrà quanno te nguadio,

E chesto me fà stà scontento, e scuro,

Ca s’essa more, schiattarraggio io puro.

RITA

Vi’ s’è comme dich’io, ca si’ pentuto?

E non te può scordà propio de chella.

TONNILLO

1390

Pentuto nò, ma penzo,

Ca simmo state nziemo anem’e core,

E mo simmo nnemmice; e ch’è lo ppeo,

Ca sarrimmo pariente,

E n’haggio facce de tenerle mente.

RITA

1395

O, ca lo tiempo tanta cose aggiusta.

TONNILLO

Ma si chella nfra tanto se dispera,

E fà quarche pazzia.

RITA

N’havè appaura,

Ca se nguadia essa puro, e s’arrecetta;

TONNILLO

Ma non sapimm’ancora

1400

C’hà ditto nò a lo Patre... ah Rita, Rita,

Me lo ddice lo core,

C ape l’ammore nuosto Lisa more.

RITA

E c’havimmo da fà pe l’accojetare;

E pe darete gusto,

1405

Azzò, che non te veda tant’affritto?

TONNILLO

Vorria, che tu... ma no... stammoce zitto.

RITA

Parla core, di’ che buoje,

Ca si avesse da morire,

Mo te voglio contentà.

1410

Tè lo pietto, squarta, straccia.

De sto core fà venaccia,

Famme chello, che chiù puoje,

Che non t’amma nò mme dire,

Chesto si non pozzo fà.

TONNILLO

1415

Oh, ca no mmoglio chesto; vorria schitto

Fare pace cod’essa; e si tu vuoie,

Che mme torna lo sciato, fa de muodo,

Che le parlammo nziemo, l’appracammo,

Ca tanno m’accojeto, e nguadiammo.

RITA

1420

E bà ca t’haggio ntiso; tu mo vuoje

Fà la pace co Llisa pe guastare

Lo matremmonio nuosto; che te pare?

TONNILLO

E che boglio guastà? tu si’ mpazzuta,

So’ ddate le pparole.

RITA

Ste pparole

1425

Se le porta lo viento; statte zitto.

TONNILLO

Si faccio chesto, trattame da guitto.

RITA

Orsù pe t’arrevare;

Pe farete vedere quanto t’ammo,

Mo la trovo, e le parlo; tu nfra tanto

1430

Vieneme retomano a la pedata,

Ca vego d’asciottare sta colata. (se nne và.)

SCENA VI

TONNILLO sulo.

TONNILLO

Abbiate ca venco; ah sciorte mia,

Damme sso gusto sulo,

Che Llisa me perdona,

1435

E me faccia vedè na vota schitto

Asserenate li bell’uocchie suoje,

E po famme lo ppeo, che fà me puoje.

Facce bella de rosa tomasca,

Si te vedo na vota, che ride,

1440

O piatosa allommanco me vide,

Tu mme sane, e me faie sorzetà.

Maro me ca me vene l’abbasca

Quanno penzo ca ll’haggio traduta;

Mo’ la chiagno ca ll’haggio perduta,

1445

Mo’ la cerco, e pe mme non ce stà.

SCENA VII

NANNELLA, e CIANNIELLO.

NANNELLA

Tu me staje tropp’alliegro, che d’è stato?

CIANNIELLO

E no mmuo’ che pazzeia, me so’ nzorato.

NANNELLA

Si’ nzorato, e co chi?

CIANNIELLO

Co Llisa.

NANNELLA

E bia,

Chesta è n’auta pazzia,

1450

Chell’hà fatto l’ammore co Tonnillo

Passa di anne, se nc’ha strutto ll’uocchie;

E mo’ se piglia a ttè? vi’ che papocchie.

CIANNIELLO

E cheste so’ le cose, ca vuje femmene

Tenite le ccervella.

1455

Che bann’attuorno, comm’a n’argatella.

O non sapit’ammare, o non sapite

Mantenerve chi v’amma;

Tantillo, che bedite

No poveriello, che pe buje speresce

1460

Ve mettite l’ascelle, e state ntuono.

NANNELLA

Accossì s’hà da fà, piezzo d’antuono.

CIANNIELLO

E ca nò, site propio

De la mala manera, hagge pacienza,

Sempe ve pretennite;

1465

Ma po sà che facite?

Co tanta jacovelle

Vuje lo schiattate ncuorpo lo scurisso,

Che non potenno sopportarne tanta,

All’utemo ve chianta.

NANNELLA

1470

Ed a nnuje, che nce mporta?

Un’esce, e n’auto trase,

Uno và, n’auto vene,

Agne femmena ciento ne mantene.

CIANNIELLO

È la femmena, comm’a la gatta,

1475

Si la piglie t’allorda, e te nfoca;

Si l’allisce, de coda te joca;

Si n’abburle, già t’ha da sceccà.

Co lo buono nesciuno nce mpatta,

Co lo tristo se fà chiù mmardetta;

1480

Co la lengua, e li strille te nfetta:

Che d’avite? pozzate squaglià.

NANNELLA

Chesto dice froffante? aspetta aspetta,

Ca parlo a Llisa, e chella te carfetta.

CIANNIELLO

Ah cana, vi’ che faje, c’haggio abburlato,

1485

Ca vuje femmene site

Lo bene, e l’allegrezza de sto munno;

E chi nò v’amma, o poco ve canosce,

O sarra qua’ nzertone,

Che bo’ stare pe cippo a no pontone.

NANNELLA

1490

Mo’ m’accuorde frabutto? a luoco, e tiempo

Te la renno sta botta.

CIANNIELLO

Si’ la patrona, fruscia si m’haie sotta.

NANNELLA

Ora di’ comme passa chisto mbruoglio?

CIANNIELLO

Lisa pe gelosia, ca Tonnillo

1495

Facea le guattarelle co Rritella

L’hà botate le spalle, e pe despietto

Mo se nguadia co mmico,

Tonno co Rita, e accossì bà lo ntrico...

NANNELLA

E po dice ca nuje

1500

Votammo l’argatella? bella cosa!

A sto juoco se joca? e bà te fida

A nnamorate và? è na sciaurata

Chi ve crede; e chi v’amma è na frostata.

Di’ che bencan’a sso fusto,

1505

Bello gusto

Vonn’havè;

Io me voglio nnamorà?

Marra mia,

E sà che d’è.

1510

Che nce torza

A cheste mmano,

Te lo spenno chiano chiano;

Poveriello, poveriello,

C’ha da fà lo lemmonciello,

1515

Che se spremme, e po la scorza

Serve sulo a pallià.

Nnamorà? te piglia te. (le fà le ffico.)

CIANNIELLO

Bon’ora la saje tutta.

NANNELLA

E che te cride.

Ca mme vide fegliola?

1520

Ca mamma mia m’ha dato bona scola.

CIANNIELLO

Orsù covernamette.

NANNELLA

Và connio.

CIANNIELLO

Vi’ ca mo te commito

A lo nguadio, nce viene?

NANNELLA

Tanto bello,

E si nò mmiene?

A DUE

T’esca lo scartiello.

SCENA VIII

NANNELLA, e PASCALE.

NANNELLA

1525

Vorria dare no zumpo

Pe trovà ste fegliole, e rallegrareme.

Uh malanne chi vene? sto guattascio

Addove no lo semmeno, nce ll’ascio.

PASCALE

Oh rennenella mia a ttiemp’a ttiempo;

1530

Sà che nnova te porto?

NANNELLA

È nova bona?

PASCALE

Chiù de lo buono juorno.

NANNELLA

(Non pò mancà quà ghioja, o quà taluorno.)

Và decenno che nc’è.

PASCALE

Che mme regale?

NANNELLA

Te donco di nocelle.

PASCALE

1535

Chiù prode me farria na castagnella,

O gnoccolosa mia quanno te vedo,

Uh, che cosa me vene... aimmè che caudo. (la vo’ piglià pe la mano.)

NANNELLA

Eilà vascia le mmano, e statte saudo.

SCENA IX

SOSCA che fà la spia, e li stisse.

PASCALE

Non te pigliare scuorno, che cos’haie?

1540

Ca no passa pescraie

Che me sarraie mogliere.

NANNELLA

E quann’è tiempo,

Se ne parla de chesto, di’ la nova.

PASCALE

Sta sera nguadio Rita co Tonnillo,

E pò esse che Llisa co Cianniello.

NANNELLA

1545

Ll’haggio a gusto; ma chesto, che me mporta

Mporta chiù a tte, c’ammene.

PASCALE

Oh, ca lloco è lo ccaso,

Quanco sonco sfrattate Lisa, e Rita,

Io farraggio lo Zito, e tu la Zita. (mente lo Viecchio canta, Sosca zennea a Nannella che se ne va, e che ddica a lo Viecchio, che parla co isso.)

1550

Siente nenna, mo Copinto

Sta facenno na foscella

Nova nova, bella bella;

Po nce spremme a nnuje llà dinto,

E che caso, che bo’ fà.

NANNELLA

1555

Si Copinto fà sta botta,

Che farzata m’apparecchio,

Io sarraggio na recotta,

Tu riesce a caso viecchio,

Vi’, che zorbia che farrà.

SOSCA

1560

Saccio ca tu pazzie.

NANNELLA

Già te n’adduone?

PASCALE

E no mme lo ffà chiù, bellezza mia,

Speranzella de st’arma,

Ca me miett’a no guajo,

De fareme morì schitto de jajo.

NANNELLA

1565

Non te lo ffaccio chiù; sà che buo’ fare,

Haggio paura, che non mmenca mamma,

Và trova Sosca, e fà chello, che ddice.

PASCALE

Sì gioja mia, mo’ corro.

NANNELLA

(Semp’a sto cippo formecuso mmorrò.) (trase a la Casa soia.)

SCENA X

PASCALE, e SOSCA da dinto, e po fora.

PASCALE

1570

Sapesse addove ire

Pe trovà sto froffante;

Nche me serve me squaglia pe da nante. (s’abbia, e Sosca lo chiamma da dereto.)

SOSCA

Oje Messere, Messere.

PASCALE

O mancomale,

Che t’ha ditto Nannella?

SOSCA

Jammoncenne,

1575

E cagnammonce nziemo li vestite...

PASCALE

C’havimmo da fà mascare?

SOSCA

Accommenza?

PASCALE

Ma chesto pecché serve?

SOSCA

St’a sentire,

Nannella già s’è accorta

Ca non c’è bia poterete pigliare,

1580

Ca la mamma nò mmole; e perzò essa

T’aspetta quann’è bruoco

Dint’a sta grottecella; priesto priesto,

Ca pe la via te conto po lo riesto.

PASCALE

Oh Sosca mia, che nova;

1585

Tè piglia ccà sta prubeca, e bà sciala.

SOSCA

E che te vuo’ scasà? (vi’ che breogna.)

PASCALE

Piglia, e dimmanna; havisse na zampogna.

SOSCA

Tenco na ciaramella; a che te serve?

PASCALE

Pe l’allegrezza de sta bella nova

1590

Voglio abballà, e cantare pe la via.

SOSCA

(Chist’è mpazzuto pe lo juorno d’Oje.)

Uh te tè no vaccaio

Co na zampogna sott’a chella chianta,

Mo’ lo chiammo, e co isso zompa, e canta.

1595

Oje Cola, Cola, abbuscate na meza

Viene ccà viene ccà, sona co nnuje. (ccà esce no pastore co no stormiento de sciato.)

PASCALE

Canta, e abballa tu puro; che si’ cieffo?

SOSCA

Abbiate nnante, ca te venc’appriesso. (ccà lo Pastore accommenza a sonà a la pastorale, e chill’abballano, e po diceno.)

PASCALE

O bene mio, che nova, e che contiento.

1600

Sto core no lo ppote sopportare.

SOSCA

O bene mio, che spasso, e che contiento,

Ammore t’accommenza a fà schierchiare.

PASCALE

Io zompo, vollo, squaglio, e n’haggio abbiento,

E nenna mia me vole addefrescare.

SOSCA

1605

Tu zumpe, vulle, squaglie, e n’haje abbiento,

E masto Ciorgio te vene a pigliare.

PASCALE

E Nannella mia Nannella.

SOSCA

Vroccolosa, e cianciosella.

PASCALE

Viene viene a la grottecella.

SOSCA

1610

Ca facimmo la pazziarella.

PASCALE

Io mo venco chiano chiano.

SOSCA

Curre cu’, fruscia ste mmano.

PASCALE

Core mio sto ffuoco stuta.

SOSCA

Vien’a ffà passera muta.

PASCALE

1615

Vien’a ffà gatta cecata.

SOSCA

Ca po faie la spallata.

PASCALE

Fruscia Sosca, dalle, dalle.

SOSCA

No tornese, e no quattecalle.

A DUE

E ddo’ viola.

PASCALE

Viene bellezza mia, e bola, vola.

SOSCA

1620

E biene masto Giorgio, e fà la scola. (se nne trasono abballanno.)

SCENA XI

LISA, e RITA.

LISA

Già, che la cosa è fatta

Non se ne parla chiù.

RITA

Sore mia cara,

Nò mm’accoieto maie, si nò mm’accierte

Ca propio me perduone, e ca me tuorne,

1625

All’ammore de primmo.

LISA

(Ah fauza, fauza.)

E che signo ne vuoie?

RITA

Che facce pace

Co Tonnillo porzì, ca t’è parente,

LISA

(C’auta schiattiglia è chesta?) nche lo vedo,

Le parlo, vuo’ nient’auto?

RITA

Che l’aspiette

1630

No pocorillo ccà, ca mo lo vide...

Uh te ch’è già benuto; e stà co isso

Cianniello puro.

LISA

Stiace chi vole,

Che benca ll’haggio a gusto, azzò che beda

Chello, che saccio fare,

1635

E lo ppozza contare.

SCENA XII

TONNILLO, CIANNIELLO, e le stesse.

TONNILLO

Pocca t’haggio trovato pe la via

Ajutame tu puro a coietarla.

CIANNIELLO

Sì ca t’ajuto, và t’accosta, e parla.

TONNILLO

Me tremmano le gamme.

CIANNIELLO

E comme sine? (la vo’ tenere.)

RITA

1640

Ah sore mia, che d’haie? tu tutta triemme?

LISA

Nò mme tenere ca n’à niente, Rita,

Vattenne rente a Tonno, e llà decite,

Senz’accostareve ccà, nzo’ che bolite. (Lisa da na banna, e ll’aute da nata banna.)

TONNILLO

Lisa si mpiett’a ttene nc’è rommasa

1645

Na fajella d’ammore, voglio dire

Na sghizza de piatate.

LISA

Qua’ piatate

Chella c’haie tu de me?

TONNILLO

Tropp’è lo vero,

Ca t’haggio fatto tuorto.

LISA

E mo che buoje?

TONNILLO

Che me perduone.

LISA

T’haggio perdonato;

1650

E pocca si’ affidato

Co Rita, nguadiatella, ca mo vide

Chi haie lassato, e chi piglie;

Non te mmidio sta sciorte,

Ca bene, e male scompe co la morte.

1655

Già scompe lo dolore,

Che pate chisto core;

Appriesso scomparrà

Sso gusto, che sentite;

Non pò durare nò.

1660

Ah tradeture, sgrate

Redite

Mo’, scialate,

C’appriesso po la sciorte

Ve scontarrà

1665

Sta morte,

Che faccio pe buie mo’.

TONNILLO

Ah sore mia che ddice?

LISA

Aimmè che sento?

CIANNIELLO

Non t’affriere chiù Lisa mia cara... (vanno pe s’accostare tutte.)

LISA

Arrassateve tutte; siente Cianno,

1670

T’haggio dato parola d’esse toia,

Mo’ te l’attenno, comme meglio pozzo;

Perzò te prego pe compassione

Vieneme piglia morta a sto vallone. (ccà piglia na corza comme se jesse a dderopà dinto na Scena.)

CIANNIELLO

Ah Lisa fremma; ahimmè ca s’è ghiettata.

RITA

1675

Oh Rita negrecata.

TONNILLO

Ah Lisa core mio aspetta, aspetta,

Ca de la morte toia faccio mennetta. (và pe se jettà, ed esce Cianniello, che lo tene.)

CIANNIELLO

Ah cano si’ mpazzuto priesto jammo

Ca n’è cadut’abbascio;

1680

Ma la gonnella la mantene appesa

A certe frasche; priesto sù volammo,

Pe ssa strettola ccane, e ll’ajutammo.

SCENA XIII

COLONNA, e NANNELLA.

COLONNA

Siente buono, io mo traso into la grotta (prenzipio de notte.)

Tu statte da ccà tuorno, e quanno vide

1685

Venì lo viecchio, trasece tu puro;

Miettet’a mano manca a lo recuoncolo,

Subeto, ch’isso è ntrato, jescetenne,

Senza fart’a ssentire, e bienetenne.

NANNELLA

Ma che serve, ch’io venca.

COLONNA

Zitto, ciota,

1690

Si chillo chiamm’a tte, chi le responne?

S’io parlo me canosce.

NANNELLA

Priesto trase

Ca vedo venì gente.

COLONNA

Statt’a tte, ca si none te ne piente.

SCENA XIV

NANNELLA sola.

NANNELLA

È isso, o non è isso? isso me pare

1695

E nc’è Sosca porzì, che mo’ s’agguatta

Dereto a chella fratta; jammo dinto,

E bedimmo de fà sto cuccopinto.

SCENA XV

SOSCA nfinto Pascale.

SOSCA

Bon’ora, che bedo! non è chella

Nanna, che trase mo a la grottecella?

1700

E chesto, che bo’ di’? scagnode irece

La mamma, nce và essa; o potta d’oje

Qua’ mbroglia co lo Viecchio nce stà sotta,

O Sosca, luoco luoco

Mpizzate dinto, e sconceca lo juoco.

SCENA XVI

PASCALE nfinto Sosca, duie Crapare, e po NANNELLA da la grotta.)

PASCALE

1705

Mettiteve ccà rrente, e nche sentite,

Ca dico haje tuorto, subbeto strellate,

Nguadia c’haje tuorto, e a mme raggione date. (S’annasconnono li Crapare.)

NANNELLA

O che rrisa, o che risa già lo Viecchio

De carrera è trasuto, e nò m’ha bisto,

1710

Mo se sconta co mamma; atta d’aguanno,

Che te farrà, scopierto c’hà lo inganno.

PASCALE

Ma non è Nanna chesta? è essa cierto

Nannella?

NANNELLA

Sosca mio.

PASCALE

Non si’ trasuta? (fegne la voce.)

NANNELLA

So’ trasuta, e so’ sciuta, ca lo viecchio

1715

Già stà dinto co mamma,

E crede ca sonc’io.

PASCALE

(Manna’ che sento?

Ah guitto, ca la mpeca

Cadeva ncuoll’a mme.)

NANNELLA

Che berve sie?

PASCALE

Niente, lassale stare,

1720

Ca n’auta mbroglia nuje volimmo fare.

Fegliule addove site? ascite fora (ccà tornano ad ascire li due pecorare.)

Nannella, tu già bide,

Ca mammeta co chillo se mmarita,

Nzorammoce nuje puro.

NANNELLA

Comme vuoie.

PASCALE

1725

Ccà sso’ le destemmonia;

Damme la mano, e dimme, si mme vuoje.

NANNELLA

Te voglio.

PASCALE

Ed io te voglio all’ora bona;

Di’ che mammeta toja, mo canta, e sona.

NANNELLA

Lassame Sosca mio, ca vedo gente

1730

Con a sciaccola mmano.

PASCALE

E chi so’ chisse?

NANNELLA

È Tonnillo, e Cianniello

Nc’è Rita, e Lisa puro, ch’è appojata

Ncuoll’a la sore.

PASCALE

Aimmè che ccosa è stata?

SCENA XVII

LISA appoiata à RITA, e TONNILLO, CIANNIELLO con a Sciaccola, e li stisse.

RITA

Datt’armo sore mia, ca non è niente,

1735

Si nò poco sceccata, e mo te sane;

Tanto chiù ca Tonnillo è già lo tuio;

PASCALE

Chi è lloco?

TONNILLO

O tè, messere attiemp’a ttiempo.

CIANNIELLO

Simmo nuje zi Pascale.

PASCALE

E che d’è stato?

LISA

Tata so’ scioliata a no scarrupo.

PASCALE

1740

Ah figlia, e comm’è stato?

T’haje fatto male assaje? comme te siente?

LISA

Po te lo ddico appriesso, non è niente. (ccà tutte se metteno a tuorn’a Lisa, e parlano nfra de lloro mente Nannella dice l’aria.)

NANNELLA

Ah marame ca chisto non è Sosca,

E lo Viecchio mmarditto de Pascale;

1745

Mo’ è cotta la menesta senza sale.

Me nc’haggio fatto cogliere;

Sto Viecchio pettemuso

M’ha buono ferrettata,

E no me pozzo sciogliere,

1750

Mo’ si pozzo cantà.

Nannella sbentorata

Tu si’ na fraschetella;

Stò cippo è nnodecuso.

No cippo, e na fraschella,

1755

Che fuoco ponno fà?

SCENA URDEMA

COLONNA, SOSCA, e tutte ll’aute.

COLONNA

Ah guitto malantrino me l’haje fatta. (da dinto.)

CIANNIELLO

Che strille sonco chiste?

NANNELLA

Aimmè, ch’è mamma?

SOSCA

Tu che mmalora vuoje fuss’accisa. (esce foienno.)

COLONNA

Chest’appriesso de chiù gente, jostizia,

1760

Chisto m’h’arroienata.

SOSCA

M’haje consumato tu, Vecchia mmardetta,

Ca pe na quaglia trovo na Cevetta.

TONNILLO

Ch’è socciesso Colonna?

COLONNA

Uh maramene,

Sto guitto co no nganno, vasta vasta,

1765

M’hà nguadiata dint’a chella grotta.

CIANNIELLO

E sto nganno qual’è?

COLONNA

Io me credeva,

Ch’era Pascale.

SOSCA

Io me credeva figlieta.

PASCALE

Ve site nguadiate? (la Vecchia azzenna de sì.)

TONNILLO - CIANNIELLO

E bon prode ve faccia, e sanetate.

PASCALE

1770

Io puro Gnora mia co Nenna toja

Me so’ nzorato.

COLONNA

Ah cana, chest’haje fatto?

NANNELLA

Me so’ gabbata, ll’haggio criso Sosca.

SOSCA

Sosca da ragno è deventato mosca.

TONNILLO

Già che la cosa è fatta, fatta sia;

1775

Nuje puro pe la via

Nnce simmo nguadiate a boglia nosta

Io co Llisa, e Cianniello co Retella.

PASCALE

Si ve sit’accordate,

Che sia coll’ora bona, e nzanetate.

1780

E tu Cardella mia nò stà colereca, (à Nannella.)

Damme sta mano ca vorraje vedere,

Ca nziemo me sarraje figlia, e mogliere.

COLONNA

T’haje saputo, acconcia lo fatteciello.

SOSCA

A gatto viecchio sorece tenneriello.

PASCALE

1785

Tu haje fatto meglio prova;

A casa vecchia na sopponta nova.

SOSCA

E na cosa de chiù, me cresce anore,

Da mo na nante m’haje da dire Gnore.

TONNILLO

È lo vero.

CIANNIELLO

Hà ragione.

PASCALE

E ment’è chesto;

1790

O Gnore mio commanna tu sse feste.

SOSCA

A buie fegliu’, co le zampogne leste.

Su scialammo

Grelliammo.

TUTTE

Mo c’havimmo viento mpoppa

1795

Attennimmo a belejà.

SOSCA

Stammo tutte allegramente.

PASCALE

Non sia nullo, che se pente.

TUTTE

Nzò che bbene da llà ncoppa

Tutt’è bello, e buono stà.