Lisa pontegliosa

Lisa pontegliosa, Napoli, Francisco Ricciardo, 1719

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO SECUNNO

SCENA PRIMMA

TONNILLO, e CIANNIELLO.

TONNILLO

Non zerve, statte zitto.

CIANNIELLO

E comme si’ pechiechia,

635

C’apprimmo te derrupe,

E te jette pe muorto; aspetta, aspetta,

Ca ll’arvolo non cade a primma botta.

TONNILLO

Nò nn’haggio, c’aspettare, maromene,

La speranza è fenuta,

640

La vita mia pe ll’acqu’abbascio è ghiuta.

CIANNIELLO

Bon’ora si’ ncocciuso

Chiù, che n’era Carella; e che cos’haje?

Parlale nata vota,

Ca fuorze non sarrà comme tu dice.

TONNILLO

645

Le parlo, comme vuoje, s’essa me sente;

Ma saccio buono, ca non faccio niente.

CIANNIELLO

Te, videla, ca scenne

Da llà ncoppa ccà bascio; e bene sola;

Io vao pe trovà Rita,

650

Tu annascunnete ccà; jescele nnante,

Parla, sospira, chiagne, sacce fare,

Ca lo core me dice, ca l’apprache.

TONNILLO

Ed io dico de nò, ca be’ la saccio

Comm’è creccosa; e quanno mette cuollo,

655

Sette para de vuoie no la moveno.

CIANNIELLO

Vi’ ca sgharre a li mise;

Can a Fegliola, quanno è nnammorata,

Si t’odia fegne, p’essere pregata.

Lo sdigno de chi amma

660

Lo buo’ sapè

Comm’è?

È comm’a lo chiantillo,

Che fà lo peccerillo,

Quann’è caduto.

665

Nchè subbeto la Mamma

Lo vasa, e l’accarezza,

E dice, tè bellezza,

Tè zuca la mennella;

Le passa la ncozzella,

670

Lo chianto, co la bua è già scomputo.

TONNILLO

Veccola, ca mo’ vene;

Me tremmano le gamme, ah maro mene. (s’annasconne.)

SCENA II

LISA, e TONNIELLO.

LISA

Nò mme pozzo levà da nant’all’uocchie

Lo trademiento che m’hà fatto Rita;

675

Ma po da nata banna

La scuso, e ddico; chella è nnammorata,

Ammore ceca tutte

E cerc’agnuno fà lo fatto sujo;

Ma chillo tradetore de Tonnillo

680

Nò mmereta piatate, e manco scusa,

Pocca sapea lo sgrato

Quanto l’havev’amato...

TONNILLO

E si piatà nò mmereto, e no scusa, (ccà esce.)

Che faje, che no mm’accide? eccome ccane.

LISA

685

Puro me viene attuorno facce storto?

Levamette da nante, squaglia, abbia.

TONNILLO

Ah Lisa, Lisa mia...

LISA

Che Llisa toja, vegliacco?

Rita, Rita vuo’ di’, chell’è la toja.

TONNILLO

690

Nò cchiù, fenisce mo’, comme si’ ccana,

Che no mmuo’ perdonare na parola,

Che m’è sciuta da vocca a primmo moto?

LISA

Nò mmereta perduono

Uno, ch’è tradetore.

TONNILLO

695

Io tradetore? ah Lisa.

Tè spaccame stò pietto, e bide, vide,

Si nce stà ncuorp’a mme malizia, ò inganno.

Non so’ chianchera, o boja,

Che t’aggio da squartare;

700

T’haggio ntiso parlare, chesto vasta.

TONNILLO

Ma non decea lo core,

Comme decea la lengua.

LISA

Che so’ zincara,

Che pozz’annevenare sta ventura?

TONNILLO

Nò nce vole annevino, vasta sulo;

705

Che m’auze st’uocche nfacce,

Tè vide sto colore,

Comm’a no nzolarcato,

Vide, ca so’ scolato; e chiste signe

Te lo ddiceno chiatto,

710

Ca d’ammore, e ddolore io moro, e schiatto.

LISA

Nò nzerve sto fastidio, già te saccio;

Nò mme ’nfettare chiù, sfratta, vattenne,

Non te pozzo vedere, e no nzentire.

TONNILLO

Lisa non chiù, ca te ne puo’ pentire.

LISA

715

Chest’appriesso de cchiù? vi lo schefienza;

Me vo’ piglià de filo? oh tè, che sento?

TONNILLO

Non te piglio de filo,

Ma si ttu che te cride

De pigliareme a famma, e l’haje sgarrata,

720

Nò nce mancano femmene a lo munno.

LISA

Lo ssaccio; e nce so’ uommene porzine;

Famme lo ppeo, che puoje;

Vasta, che non sonc’io, trova chi vuoje. (se ne va pe fare la spia.)

TONNILLO

Se n’è ghiuta! vi’ che cana?

725

A bedereme sperire,

E ncocciare, e nò nzentire

Nò tantillo de piatà?

Oh mmalora, e che d’è stato?

Che so’ fuorze affattorato?

730

C’ammo puro sta vellana,

E no mmeo de la lassà?

SCENA III

LISA sola.

LISA

A chesto so’ arrevata?

Che so’ traduta, e appriesso ngioriata?

E llo sopporto? Ed ammo sto schefienza,

735

Che me chiamma vellana? Ah Lisa, Lisa,

Tu te mmierete peo; ca non haje core

De castecà sto zanno tradetore:

N’haggio core? Si ca ll’haggio,

È stò core, ch’è lo mio

740

Hà da fà comme vogl’io.

Si tè aveste da crepà.

Ma che boglio? che farraggio?...

Sù, che benca lo despietto,

Pe sfrattare da sto pietto

745

Chi n’è digno de nce stà. (resta penzosa.)

SCENA IV

CIANNIELLO, e LISA.

CIANNIELLO

Vi’ c’auto mbruoglio è chisto!

Tonnillo pe despietto

Se vo’ attaccà co Rita... oh Lisa attiempo.

LISA

Che d’è Cianniello?

CIANNIELLO

T’haggio da parlare.

LISA

750

No mme parlà de Tonno, e di’, che buoje.

CIANNIELLO

E che d’haje, sore mia? fatt’a correjere.

LISA

Tu vuo’ parlà de chisto, e no mme sona,

Si è chesto, vavattenne, no mme sierve.

CIANNIELLO

Eh siente... uh fatte ccà, ca vene Rita.

LISA

755

Nce voleva pe ghionta ssa stampita. (se metteno de banna, e parlano zitto.)

SCENA V

RITA, e li stisse.

RITA

Tonno vo’ c’amma Cianno,

Che non penza chiù ad isso; ed io che faccio

Ca m’accido, e m’adaccio

Pe chillo renegato, senza core,

760

Non faccio niente, e st’arma me consummo,

Comme ll’uocchie a lo fummo. (ccà penza, e chiagne.)

LISA

E chesto, che me mporta?

Che boglia bene a Rita, chi lo tene?

CIANNIELLO

Ma siente, Lisa mia,

765

È na grossa schiattiglia lo bedere

Lo nammorato tujo,

Che pe despietto te festeggia n’auta.

LISA

Me ne rido de chesto,

Che festeggia chi vo’, ll’haggio a li bene,

770

Farraggio io puro quanto me commene.

RITA

Orsù Rita quietate,

Lassa sto sgrato, e pocca isso vole,

C’amme Cianniello, non ce perde tiempo;

Penzace, fà che puoje; e si lo core

775

Se resente, e nò mmole, tu lo sforza;

Si pe genio non puo’, amma pe forza.

Si sapesse de morire

Nzallanuta, nghiettecuta,

Hà da scire

780

Da sto pietto;

Lo despietto ll’ha da fà.

Comm’all’acqua, quanno sbotta,

C’una vene, e ll’auta votta.

Accossì da chisto core

785

Un’ammore n’aut’ammore

Pe menetta hà da caccià.

CIANNIELLO

T’haggio ntesa vattenne,

Lassa fare a sto fusto,

Ca ll’uno, e ll’auta, Lisa mia t’agghiusto. (se ne va Lisa.)

SCENA VI

RITA, e CIANNIELLO.

RITA

790

Vecco Cianniell’attiempo.

CIANNIELLO

Oh, schiavo Rita.

RITA

Cianniello da do’ viene?

CIANNIELLO

So’ ghiuto tozzolanno ste ppagliare,

Pe trovà quà lemmosena d’ammore

Pocca tu già ll’haje fatta.

RITA

E ll’hai trovata?

CIANNIELLO

795

Pò essere ca sì.

RITA

Chi te l’ha data?

CIANNIELLO

Chest’a te che te mporta? è na fegliola

Che te credive Rita,

Ca voleva mpazzire appriess’attene?

RITA

Ma dimmella chi è, si me vuo’ bene.

CIANNIELLO

800

Vi’ ca po te dispiace.

RITA

E che te mporta?

CIANNIELLO

La vuo’ sapere? è Llisa.

RITA

E comme si papurchio; tu te cride,

Ca chella te vo’ ammare? non t’adduone,

Ca lo fface pe dà martello a Tonno?

CIANNIELLO

805

Dice buono, è lo vero, e mbe che buoje?

RITA

Saccio ca ntienne, tu si’ attiemp’ancora.

CIANNIELLO

A, à comme si’ bona, e tu non mmide,

Ca già te pesco affunno,

Me faje sta facce bella,

810

Ca Tonnillo t’ha data la cartella.

E che mme saje pe guitto

Che servo p’arrepiezzo?

Chiù priesto me scapezzo,

Che darete sso gusto;

815

No mme nce cuoglie nò.

Non pienze ca mm’haje ditto,

C’a tardo so’ benuto;

Te torno sto saluto,

E bi’ comme và justo;

820

Tu non si’ a tiempo mo’. (se ne va.)

RITA

Ah ddesperata mene, e che d’è stato?

Nce volea sta refosa de dolore

E chisto scuorno, pe schiattà sto Core.

Addo’ stò? che m’è socciesso?

825

Sonco io? che d’è chesso?

Core mio straziato

Vaje p’ammare, e si’ cacciato,

Vide mo che s’hà da fà.

Nzò ddo’ vavo pe contiento

830

Llà nce trovo lo trommiento,

Cianno, e Tonno nò mme vonno,

Iammoncenne a derropà.

SCENA VII

COLONNA, e SOSCA.

COLONNA

Vorria sapè, c’haje fatto

De lo negozio mio co Pascale?

SOSCA

835

Uh, che caudo che tiene, adaso adaso;

Besogna trovà primmo quacche mpeca,

P’accojetare lo Viecchio, ca mo nnante

M’hà trovat’a parlare co Nannella,

E me volev’accidere bon’ora.

COLONNA

840

E comme faje?

SOSCA

Te vide

Sto rammaglietto d’erva, e de sciorille;

Mo nce lo manna Figlieta, e l’accordo.

COLONNA

Tu che malanne dice?

Ca chillo se lo crede, e se nce ncarna;

845

E po le ccose meje comme l’agghiuste?

SOSCA

E chesto vao cercanno, che lo creda,

Ca po la gabbo; ajutame tu puro,

Di’ à Nannella, che fegna co lo Viecchio,

Po lassa fare a mmene,

850

E bide, che nne vene.

COLONNA

Vi’, ca tu mme faje dà de musso nterra.

SOSCA

E non saccio che dice; che te pare,

Che boglia stroppejà lo fatto mio?

COLONNA

Haggio paura...

SOSCA

E fà comme dich’io.

855

O, veccolo, va trase, e quanno sisco,

Fà scire la fegliola. (corre a scontà lo Viecchio.)

COLONNA

(A, ca staje frisco.)

SCENA VIII

COLONNA sola.

COLONNA

Bene mio, comm’è llocco,

Se lo ccrede addavero,

Ca le voglio dà figliema; temente

860

Bella cosa p’appenner’a no crocco;

Haggio ditt’accossine pe bedere,

Si pe mme po fà niente co Pascale;

E po lo chianto comm’a n’animale.

Si ll’Uommene so’ fauze,

865

Pecché po se lamentano,

Ca nuje non simmo scalze,

C’avimmo comm’a lloro la malizia?

Pe nce arrevare stentano,

Po quanno sonco sazie,

870

Nce fanno mille strazie,

Nce sbeffano, nce truffano;

All’utemo nce chiantano,

Pe riesto nce sbregognano;

E trova chi te fà po ssa jostiza.

SCENA IX

PASCALE, e SOSCA.

PASCALE

875

Fa cunto, ca si’ bivo

Pe chisto rammaglietto,

Che m’hà mannato chella bella fata;

Ca si nò te voleva

Fà magnà da li cane; a coffejareme,

880

Co portà chella Vecchia a sconcecareme?

SOSCA

E nata vota mo’ tuorne da capo?

Haggio ditt’accossine a la fegliola,

Pe darele partito, che cos’haje?

PASCALE

E li gatte felippe, che facive?

SOSCA

885

L’haggio posta mmerizze p’ancapparela.

PASCALE

E la prommessa de lo matremmonio?

SOSCA

Haggio fatta sta merra co la mamma,

Pe faremella ammica; e no chiù mone,

Ca la scompimm’a tardo;

890

Non saje, ca sempe fegne nò bosciardo?

PASCALE

E pecché si’ bosciardo, non te creo,

Ca Nannella me manna chiste sciure,

Chest’è qua mbroglia toja.

SOSCA

Mo lo bbide. (sesca.)

PASCALE

A chi sische?

SOSCA

A Nannella; ed essa stessa

895

Te dirrà, si è lo vero, o si è boscia

Mannaggia, a chesto simmo? mbroglia mia?

SCENA X

NANNELLA mocc’a la Porta, PASCALE, e SOSCA.

NANNELLA

Sosca, che baje facenno?

Vuo’ niente?

SOSCA

Che fà mammeta?

NANNELLA

St’all’Uorto.

SOSCA

Messere te vo’ di’ na parolella.

NANNELLA

900

Patrone; di’ ch’aspetta, quanto veo,

Che fà mamma, e mo’ torno. (se ne trase.)

SOSCA

Ch’aggio ditto? (a Pascale.)

PASCALE

Che singhe beneditto,

Uh che prejezza sento, io squaglio, io moro.

Sosca viat’attè quanno me nzoro.

SOSCA

905

Apparecchiame lo vagno,

Ca la cosa è llesta, è llesta.

PASCALE

Bene mio, ca rido, e chiagno

Pe lo gusto, e sà che festa

Quanno nguadio, voglio fà.

SOSCA

910

(Quando schiatte voglio fà.)

Io dic’arre, e tu te cucche;

Lo realo t’haggio ditto.

PASCALE

Te lo donco, zitto, zitto.

SOSCA

Tu me gabbe, tu me mmucche

915

Quanno, quanno? non se sà?

PASCALE

Nò chiù mo’, nò mme nfettà.

NANNELLA

Veccome ccà Pascale,

Che t’aggio da servire.

PASCALE

O Regenella mia, a me servire?

920

Sonch’io lo schiavo tujo pe nzi’ che campo.

SOSCA

Accortammo le chiacchiare, Messere,

Ca po vene la mamma.

NANNELLA

Dice buono; (a Sosca.)

Sù di’ che mme commanne? (a Pascale.)

PASCALE

Core mio, so’ benuto

925

Pe ngreziarte de sto rammaglietto.

NANNELLA

Uh, ch’è chesto, che ddice? havria voluto

Mannarete lo core, e tutt’a mmene.

PASCALE

Ah Sosca curre ccane.

SOSCA

Che d’è Messere?

PASCALE

Tieneme, ca cado;

930

Che pparole so’ chesse, che mme dice?

Tu mme vuo’ fà morire.

NANNELLA

Ah bene mio,

Mo’ sì ca me zannie.

PASCALE

Mannaggia Crapa,

Io zanneiarete, che me saje pe guitto?

Sosca curre a la mantra,

935

Và piglia n’ainello

Lo chiù gruosso, e chiù bello,

Portal’a Nenna mia pe caparro,

Ca quanno me la piglio, la farraggio

Patrona de le ppecore, e quant’haggio.

SOSCA

940

Mo te servo; ma nnante che me scorda,

Sta fegliola m’hà ditto, ca vorria,

Che facisso l’ammore co la mamma,

E che le disse chiacchiare nzi’ a tanto,

Che se pozza scoprire sta matassa,

945

Ca si chella lo ssape, l’arroina.

NANNELLA

Sì famme sto piacere

Bell’ommo mio.

PASCALE

Sì core, è fatto, è lesto;

Và Sosca, piglia l’aieno, e biene priesto.

SCENA XI

PASCALE, e NANNELLA.

PASCALE

E ccossì, fata mia, dimme na cosa,

950

Tu mme vuo’ pe marito?

NANNELLA

Sì, te voglio.

PASCALE

E pecché vegliacchella, pe nzi’ a mmone

Haje ditto none, none?

NANNELLA

Cà me pigliava scuorno,

E po t’haggio voluto scanagliare,

955

Si decive addavero.

PASCALE

Che mannaggia lo scuorno, e lo scanaglio;

M’haje puosto mpunto de me fà crepare.

NANNELLA

Accossì le zetelle hanno da fare.

Io sonco scornosa,

960

E credo ca saje

Le baje, che nce fanno,

Si apprimmo decimmo,

Te voglio gnorsì.

E po nc’è na cosa,

965

C’Ammore vo’ stiento,

Pe dà chiù contiento;

Si penne, chiù renne,

È doce chiù tanno,

Chiù bell’è accossì.

970

Mannaggia vene mamma, schiavo, schiavo. (fuje dinto.)

SCENA XII

COLONNA, e PASCALE.

PASCALE

Oh malatenca scumpela na vota,

Sempe sto Cano nigro attuorn’a mmene,

Che nò mme fà gaudè no po’ de bene.

COLONNA

Pascale mio, che buoje? m’hà ditto figliema,

975

Ca m’haje chiammata.

PASCALE

(Vi’, che ghioia è chesta,

C’haggio da dire mo’ pe la gabbare?)

COLONNA

Staje penzuso? pecché?

PASCALE

(Uh, na boscia

La pagarria sejrana.)

COLONNA

Tu te raspe?

E parla, che ccos’haje?

PASCALE

980

(Decimmol’accossì) vorria sapere,

Si t’haje pigliato collera mo nnante,

C’haggio parlato sparo no tantillo.

COLONNA

Si vuo’ sapè lo vero,

Me so’ corza no poco, ca m’assienne

985

Senza ragione.

PASCALE

Scusame Colonna

Ca tanno steva tropp’ammojenato,

Ma tu saje si te prezzo, e quanto t’ammo.

COLONNA

Bosciardo, si m’ammasse

Scomparisse sta baja.

PASCALE

E quale baja?

COLONNA

990

Tieme’, ca fà lo nzemprece.

Pasca’, nuje nce sapimmo,

Ca mbraccia m’haje portata peccerella.

PASCALE

Non t’allecuorde buono,

Tu m’hai portat’a mammar’, e nocella.

COLONNA

995

No nne sia chiù de chesto,

Ca non potimmo dire,

Fatte nnillà caudara, ca me tigne;

Parlammo d’auto; me vuo’ di’ na cosa?

PASCALE

Pecché nò, và decenno.

COLONNA

1000

Quanno te nzure?

PASCALE

Haje nulla pe le mmano?

COLONNA

È llesta.

PASCALE

E di’, chi è.

COLONNA

Songh’io.

PASCALE

Tu propio?

COLONNA

Io propio sì.

PASCALE

(Fegnimmo) e ment’è chesto,

Lassamence penzare,

Voglio vedè potereme mmarcare.

COLONNA

1005

Pensace, ca tu faje no buon’accatteto;

Io tengo ciento crape,

Sta casa, n’orteciello,

Lo fatteciello mio stace acconciato;

Tu po non si’ fegliulo,

1010

Io manco sonco Vecchia, jammo juste;

Non cercare fegliole, ca la sgarre.

PASCALE

Io mme voglio coccare, e tu dice arre.

COLONNA

Vi’ che faje? non pigliare

Na mogliere fegliolella,

1015

Ca te fà grattà la zella;

Non te sape covernare,

E nsospetto te fà stà.

Pigliatella, comm’a mmene,

Ca vo’ bene

1020

A lo marito,

Lo fà ì sempe polito,

Le st’attuorno

Nott’e ghiuorno,

E lo sape contentà.

SCENA XIII

PASCALE sulo.

PASCALE

1025

Và lavate le mmano,

Ca po faje ssa menesta,

Che te venca la pesta, tu non saje,

C’uosso sporpato non te sazia maje.

Va’ chiù no squasillo,

1030

Che fa na fegliola,

Che quanta carizze

Na Vecchia te fà.

Si fà no resillo,

Te scippa na mola;

1035

Co quatto vertizze

Te face squaglià.

SCENA XIV

LISA sola.

LISA

Addo’ vao? addo’ corro? ahimmè, che faccio

Pe scrastà da sto pietto,

Chi mme leva lo suonno, e lo recietto?

1040

So’ ghiut’a caccia ncopp’a ste montagne.

Me sonco arreventata

Pe secotà na vorpa a rumpe cuollo;

E mente che correva,

Me secotav’Ammore, e me fereva;

1045

Non pozzo chiù, sedimmoce no poco;

Ahie Tonno, Tonno famm’arreposare,

Va’ trova Rita toja, lassame stare.

Nò mm’havisse maje traduta,

Ca sto core mo’ sarria

1050

Tutto tuio;

E nò starria

Nott’e ghiuorno a sosperà.

Mara me, ca so’ mpazzuta,

Ca mo’ t’ammo, e mo’ te fujo,

1055

Mo’ te chiammo, e dico viene;

E si po staie rente a mmene,

Non te pozzo padià. (s’addorme.)

SCENA XV

TONNILLO, RITA, e LISA, che dorme.

RITA

Si no mmenive a ttiempo

Tonnillo mio, cierto, ch’a chest’ora

1060

Me sarria derropata;

Ma po, che m’haje sarvata,

E nata vota me prommiett’ammore,

Non te sbotare chiù, non cagnà core.

TONNILLO

Rita mia statt’allegra,

1065

Ca non te lasso chiù, n’havè appaura,

Ca mo’ trovo Pascale,

O le faccio parlà da Colambruoso,

Pe fà lo matremmonio nfra nuje duje.

RITA

Dice accossì, ma po me gabbe, e fuje.

TONNILLO

1070

E pe cchi Rita mia vuo’ che te lassa?

RITA

Pe Llisa, che te tene ncatenato.

TONNILLO

Oh, ch’è rotta la funa, e so’ scappato.

RITA

Tu mo’ dice accossì, ca staje marfuso,

Pe chello, che t’ha ditto.

TONNILLO

E che m’ha fatto.

RITA

1075

Ma si na vota sulo

Te fà na bona cera,

Tu tuorne a mmertecare, e bona sera. (restano tutte duie penzuse, mente parla Lisa, che se sceta.)

LISA

Chiste che fanno ccà? fortuna mia,

Ca so’ scetat’attiempo pe sentire;

1080

Chello c’hanno da dire.

TONNILLO

Gioja cara de sto pietto.

RITA

Speranzella de sto core.

TONNILLO

(Non avere sto sospetto.)

RITA

(No mme dare chiù sospetto.)

TONNILLO

1085

(Ca te lasso, e cagn’ammore;

So’ lo tujo non dobbetà.)

RITA

(Ca me lasse, e cagn’ammore;

Sinche mio, nò mme gabbà.)

Schiecco bello de chist’uocchie;

1090

Non tradì stà sbentorata.

TONNILLO

Sì, sbrannore de chist’uocchie

Nò la faccio stà zannata.

RITA

Si pe Llisa me mpapuocchie,

Io me vao a dderopà.

TONNILLO

1095

È scartata chesta sgrata

Se pò ire a dderopà.

SCENA XVI

LISA, RITA, e TONNILLO.

LISA

Va te derrupa tu guitto, forfante,

E si non haie chist’armo, tradetore,

Io te voglio caccià ll’arma, e lo core. (Le và nante co lo spontone, e Tonno resta stordito.)

TONNILLO

1100

Aimmè, che bedo! ah Lisa.

RITA

Ah sore mia che faje, lassalo ire,

Ca non ce corpa; accid’a mm epe isso,

Ca ll’haggio mmeziato.

TONNILLO

Nò Lisa, accide a me, ca io so’ stato,

1105

Io so’ chillo scontento,

Che sulo no momento te tradette;

Te so’ benut’appriesso pecceianno

Cercannote perduono; e tu chiù tosta

De na preta, n’ancunia, no metallo

1110

Non haje vuto fà carta;

E mo si ammo Rita,

Quale corpa è la mia, si mm’haje lassato?

Si mme vuo’ muorto, eccome ccane accideme,

Sù sfocate ssa rraggia, chi te tene?

RITA

1115

Nò Lisa, accide a mmene.

LISA

Ah fauza, menzognera, si t’accido

E poco, è niente a chello, che m’haje fatto;

Io voglio, che lo chiagne nzi’, che so’ biva,

Ma tu lo chiagnarraie pecché mo’ more,

1120

Io lo chiagno, ch’è sgrato, e tradetore.

Sù muore cano...

RITA

Elà, che non te muove (scicca no cortiello a Tonno, e se mett’a defennerlo.)

Ca te spercio lo core, presentosa.

TONNILLO

Ah Rita vi’, che faje? posa posa.

LISA

Chesto de cchiù schefienza?

TONNILLO

O Cianno ajuta.

SCENA XVII

CIANNIELLO, e li stisse.

CIANNIELLO

1125

Che rommore nc’è lloco.

RITA

Io so’ feruta.

CIANNIELLO

Oh bonora, ch’è chesto? tiene Tonno,

Portate Rita, ca me porto Lisa.

LISA

T’accio appriesso, si non t’haggio accisa,

Và zanno

CIANNIELLO

Và cana.

LISA

1130

Và scigna trammera.

RITA

Schiattosa sprovera.

LISA - RITA

Te voglio agghiustare.

TONNILLO - CIANNIELLO

Rita

Nò chiù mia.

Lisa

TONNILLO

Ccà stonco pe ttene.

CIANNIELLO

1135

Tu lassa f’a mmene

A QUATTRO

Be’ saccio che fà.

LISA

Si non te recatto

Pe chello, ch’haje fatto,

Che pozza cioncare.

RITA

1140

Sto stanco, che ghietto,

Da dinto a sto pietto

Te voglio cacciare.

LISA

Verruta.

RITA

Pacchiana.

LISA - RITA

Mo mmo’ nce vedimme.

TONNILLO - CIANNIELLO

1145

E nuje quanto primmo

Volimmo parlà.

A QUATTRO

Vattenne và và. (Tonno se porta Rita, e Cianniello Lisa.)

SCENA XVIII

COLONNA da na via, PASCALE da nata via, e po SOSCA co no piecoro ncuollo.

COLONNA

Haggio visto Pascale

Venire a chesta via,

1150

Ed io so’ corza pe le fà la spia. (s’annasconne.)

PASCALE

Chillo mpiso de Sosca

Pe scagno de pigliare n’ajeniello,

Ha pigliato lo piecoro chiù gruosso,

Che nce stace a la mantra, e mo ccà bene,

1155

Voglio vedè che face; oh marattene. (s’annasconne.)

SOSCA

Ora sì, mo tu mponta, o criepe, o schiatte,

Haje da venì sio piecoro mio bello,

E si nò de scervecchie te spestello.

Mannaggia so’ sodato, e comme pesa!

1160

So lo Viecchio vedesse

Sta mbroglia, ch’aggio fatta,

Se ppe mo’ me darria la caffia tratta. (sisca a Nannella.)

SCENA XIX

NANNELLA, e SOSCA.

NANNELLA

Sosca mio.

SOSCA

Vide ccà, che bella caccia,

Haggio fatto pe ttene

NANNELLA

Uh, comm’è bello.

SOSCA

1165

Te piace?

NANNELLA

Sine, sine.

SOSCA

Io già lo ssaccio,

C ape fà pazziare na fegliola,

Lo meglio spassetiello

E nò crapitto, o puro n’ajenello.

NANNELLA

Lassamillo vasare; uh gioja mia.

SOSCA

1170

Vi’ ca tu nce le ppierde sti carizze,

Falle a chi le canosce.

NANNELLA

Che nn’haje mmidia?

SOSCA

Nce ll’haggio, e ch’è lo ppeo, ca non so’ sulo.

NANNELLA

Non parlà a lo sproposeto fegliulo.

Viene ccà, Sosca mio,

1175

Zezzammoce a sto pizzo,

Ca lo voglio annoccare.

SOSCA

Tu si’ pazza,

Ca chisto te l’allorda.

NANNELLA

Che me mporta?

Te martino tè tè.

SOSCA

Io responso pe d’isso, mbè, mbè, mbè. (Nannella mette la nocca ncapo a lo piecoro.)

NANNELLA

1180

Vi’ comm’è bello mo’: uh che prejezza.

SOSCA

Chisto la nocca, e Sosca na capezza.

NANNELLA

Te martino saporito, (lo tira pe na fonecella.)

Spassolillo de Nannella.

SOSCA

Tu si’ pazza, fraschettella,

1185

Lassamence pazziare.

A DUE

Sù martino fà, mbè mbè.

NANNELLA

Vien’appriesso a nenna toja.

SOSCA

Vi’ che ghioja!

Non ce vene.

NANNELLA

1190

E perchene.

SOSCA

Ca hà creanza,

Co la mmorra semp’avanza.

NANNELLA

E si nò fallo tozzare.

SOSCA

Manco chesto lo ssà fare

1195

Scumpe mo’.

NANNELLA

Che buo’ da me.

SCENA XX

PASCALE, e li stisse.

PASCALE

Te nc’haggio cuoveto mpiso (le dà na mazzata.)

SOSCA

Che te rumpe lo cuollo, fusse acciso. (fuje.)

PASCALE

E be’ stà buono chesto?

A pazzià co ll’uommene?

NANNELLA

Gnorsine

1200

Ca so’fegliol’ancora, gioja mia.

PASCALE

Ma non saje, che bo’ di’ la gelosia.

NANNELLA

Che d’è sta gelosia? nò la canosco.

PASCALE

Si nò la saje, manco la sapere,

Chesto sulo te dico,

1205

Ca si vuo’ pazzejà, pazzea co mmico.

NANNELLA

E pazzeammo mone.

PASCALE

Pazziammo.

NANNELLA

Famme lo pecoriello.

PASCALE

Oh chesto none,

Pocca è no mal’aurio a chi se nzora.

NANNELLA

E che pazzia vuo’ fà?

PASCALE

Và trase dinto

1210

Sto piecoro, e po viene, vroccolosa,

Ca te voglio mparare n’ata cosa.

NANNELLA

Ll’haggio trasuto, che buo’ fà?

PASCALE

Cantammo, (trase lo piecoro, & esce subeto.)

Tu faje la Pollastrella,

Io faccio lo galluccio.

NANNELLA

È bella, è bella.

SCENA URDEMA

COLONNA, ch’esce da dereto a PASCALE, e li stisse.

PASCALE

1215

Nnanze iuorno matino mati’,

Lo galluccio se mett’a cantà.

NANNELLA

Comme face?

PASCALE

Fà chicherechì.

COLONNA

La gallina responne cà; cà.

PASCALE

Oh mala tenca stoccolà,

1220

Vi’ che bella gallina? tu si boccola.

NANNELLA - COLONNA

A gallo viecchio nce volea sta voccola.