Opera Buffa Napoli 1797 - 1750
  
  
 La Locinna, Napoli, A Spese de lo Mpressareo, 1723
 a cura di Ginevra Del Vacchio
 
 
 
paratesto ATTO PRIMO ATTO SECONDO ATTO TERZO Apparato
 
 ATTO PRIMMO
 
 SCENA PRIMMA
 
 Arba.
 SERPILLO, dinto a na Grottecella coccato, tenenno nterra lo Dardo, ll’Arco, e lo Torcasso co le Frizze.
 
 SERPILLO
 Ajemmè! duorme si puoje!
 Va trova suonno cchiù! penejo, mme fragnio:
 Strillo sempe a li gruoje;
 E, ncagnio de dormì, sospiro, e ’chiagnio.
5Che ’buoje dormì, si Ammore,
 Quanno mme vede appapagnà na stizza,
 Tanno a sto nigro core
 Cchiù frizze spara, e cchiù lo ’fuoco attizza!
 Va resiste a ste botte!
 
 SCENA II
 
 SIRVEIA, e lo stisso.
 
 SIRVEIA
10(Cca sta lo bello mio.)
 SERPILLO
 (Veo, che l’arba, e la notte,
 Ll’una va, l’autra vene)
 SIRVEIA
 (Ih! comme stace!)
 SERPILLO
                                      (Ed io
 Provo sulo pe mmene;
15Sbentorato nfi’ mponta;
 Ch’è sempe notte; e ll’arba maje no sponta!)
 SIRVEIA
 Serpi’?
 SERPILLO
                 (Chesta, che bo’! d’addo’ è ’comparza!)
 SIRVEIA
 Vi’ Sirveia poverella,
 Che sta tutta pe ’te feruta, ed arza.
20Videme, ch’io so’ chella,
 Che pe ’te n’aggio abbiento.
 SERPILLO
 Sirveia parle a lo viento.
 SIRVEIA
 N’haje piatà de la pena.
 SERPILLO
 Ll’haje sentuto cchiù bote, e già lo ’saje,
25Ca simmene a l’arena:
 Ca zappe a ll’acqua; e no la scumpe maje!
 SIRVEIA
 E puoje di’ chesto? ajemmene!
 Sacc’io, che d’è.
 SERPILLO
                                (Che nfietto!)
 SIRVEIA
 Canosco d’addo’ vene:
30Pe ’Locinna mme scarte.
 SERPILLO
                                               (Auh! ch’appietto!) (cca se sose.)
 E si chesto canusce;
 Tu pecché tatanje?
 Pecché mme perolje? pecché mme frusce?
 SIRVEIA
 Ddonca pe cchi te fuje,
35Lasse chi te secuta?
 SERPILLO
 È destino accossì pe ’tutte duje.
 SIRVEIA
 E ’buoje, ch’ashievoluta
 Mora Sirveia pe ’te, ne, core sgrato?
 SERPILLO
 No cchiù; Sirveia; no cchiù, ca mm’haje zucato. (se torna ad assettare.)
 SIRVEIA
 
40   Ne, caro perro; ne?
 A mme
 Cchesto puoje di’:
 A chi
 Pe te già more
45Puoje fa
 Sta canetà;
 Ne; core
 Sgrato?
    Ma si te struje,
50Te fragne
 Pe chella, che te fuje,
 Nce vo’; cano; nce vo’,
 Azzò,
 Ch’accossì chiagne
55Sto peccato.
 
 SCENA III
 
 SERPILLO sulo.
 
 SERPILLO
 Ah! Locinna; pe ’tene
 De scajenze, e de pene io so’ mpastato!
 Haje pe d’uocchie doje stelle;
 Ma, pe mme sfortunato,
60Songo doje fureie, armate de fracielle!
 Te conzola, te sazeia
 Ssa bella facce; ed io nne sto speruto!
 Si’ no shiumme de razeia;
 E mme faje fa no trivolo vattuto!
65Ed attocca sto ’bene
 A chi? a no Pastoriello schefenzuso!
 E puoje scartare a mmene;
 Pastore bravo, e ’ricco? io so’ confuso!
 O Cielo! e addo’ s’è bisto
70No trommiento cchiù peo?
 
 SCENA IV
 
 CERVONE, da dinto, co d’autre Pasture, che sonano lo cuorno; e po esceno, CERVONE armato de dardo, arco, e frizze, e ll’autre Pasture, de dardo sulo; e uno de chiste portarrà mponta a no Palo na jorlanna de shiure; e lo stisso.
 
 SERPILLO
                                                   Che suono è chisto! (Cca se torna a sosere.)
 CERVONE
 
 A lo lupo, o cacciature,
 Ch’è comparzo a sto contuorno.
 
 SERPILLO
 Lo lupo! mm’armo; e ’corro. O Sciorte cana
 Stizzalo; ch’è piatà s’isso mme sbrana. (s’accommenza ad armare.)
 CERVONE
 
75Priesto armateve, o Pasture.
 Pe le dà lo mmale juorno.
 
 SERPILLO
 Cervone addo’ è lo Lupo?
 CERVONE
                                                 Priesto muovete:
 Armate, e ’curre; sbricate,
 Ch’è comparzo sta notte
80Mmiero lo shiummetiello;
 E ha ’fatto nquatto botte,
 De Pecore, e de Crape no maciello.
 SERPILLO
 Mo’ vao (azzò lo faccia
 De sta vita porzì.)
 CERVONE
                                    C’haje ditto?
 SERPILLO
                                                              Niente.
 CERVONE
85Curre, ch’a’ fa sta caccia
 Nc’è causa de nce ghire allegramente.
 SERPILLO
 Comme?
 CERVONE
                    Sarvaggio nuosto;
 Lo vecchiariello tanto respettato;
 Saje, che ’premmeio nc’hà puosto?
 SERPILLO
90Che ’premmeio?
 CERVONE
                                  Scazza! e ’muorzo sceroppato?
 SERPILLO
 Zzoè?
 CERVONE
              Isso commanna,
 Che chi lo Lupo accide, aggia d’avere
 Pe ’premmeio sta jorlanna;
 E la ’bella Locinna pe ’mogliere.
 SERPILLO
95Locinna?
 CERVONE
                    Chessa lloco.
 SERPILLO
 Pe ’mogliere?
 CERVONE
                            Gnorsì. Che ’pienze?
 SERPILLO
                                                                    Io penzo,
 Si chesto se pò fa.
 CERVONE
                                   Chiano no poco:
 Nc’è stato lo conzenzo
 De tutte li Pasture;
100E sta zizza pe ’ghionta se nc’è ’mesa,
 Azzò li Cacciature
 Corrano co cchiù armo a ’fa sta mpresa.
 SERPILLO
 E Locinna a sto patto
 Nc’hà da sta?
 CERVONE
105Tanto bello, e co ’raggione
 Pocca chesto s’è fatto
 Pe lo ’bene commone.
 SERPILLO
                                           È ntesa: è ’bero:
 Mm’haje tutto conzolato.
 CERVONE
 Tu mo’, che si’ frostiero,
110E hà poco che staje cca, non si’ nformato
 De le chellete noste.
 SERPILLO
                                       O juorno bello!
 CERVONE
 (Ccossì attoccasse a mme de fa st’appiello.)
 Su, priesto, abbrevejammo:
 Va te miette de posta.
 SERPILLO
                                           So’ lesto.
 CERVONE
                                                              Ca sperammo,
115Che Pala, la Ddea nosta,
 Nce faccia fa sta Testa, azzò de ciappa
 S’aggia da fa la festa
 Oje, ch’è lo juorno sujo. (Mo’ se chianta lo palo co la jorlanna ncuosto a l’Autaro de la Ddea.)
 SERPILLO
                                               Creo, ca no scappa.
 Già bao: doce trasoro:
120O a ’bencere, o a ’morì: la stessa sciorte
 Sarrà s’io venco, o moro,
 Ca morenno pe ’te, cara è la morte.
 E quale vita è chella
 Ddo’ sta morte cchiù bella:
125Locinna mia, si de morì mm’attocca
 Co chisso bello, e ’doce nomme mmocca?
 
    None: o cara, ca la Morte
 Non pò havè
 Forza pe mme,
130Si la stella, si la Sciorte,
 Si la vita mia si’ tu.
    Pe ’bertù de ssa ’bellezza,
 A sto core la fortezza
 La sent’io tanto de cchiù.
 
 SCENA V
 
 CERVONE, e Pasture.
 
 CERVONE
135E che ’Lupo marvaso!
 Pare, che ’ghietta fuoco
 Da ll’uocchie, da la vocca, e da lo naso!
 Ma da cca a n’autro ’poco,
 Sperammo, c’a l’autaro
140De chesta bella Ddea, mmiezo a li shiure,
 La Capo fe nce vea
 De sto Lupo arraggiato, accedetaro
 De Pecore, de Crape, e de Pasture;
 Azzò, che cchiù fammosa
145Se nne faccia la festa, e cchiù gostosa.
 Via susso, allegramente:
 Secotejamo a ghire da cca attuorno
 Scetanno ss’autre gente. A ’buje: lo cuorno.
 
 A lo Lupo, o cacciature
150Ch’è comparzo a sto contuorno.
 
 SCENA VI
 
 ARMILLO, armato de Dardo, arco, e frizze, e LOCINNA.
 
 ARMILLO
 So’ storduto, so’ muorto!
 Ajemmè!
 LOCINNA
                     Datte confuorto.
 La piglie troppo a ’forte!
 Che d’haje che te despiere?
 ARMILLO
155Addonca chi ha la sciorte.
 D’accidere lo Lupo, hà la gaudere
 Ssa ’bellezza, ssa ’gioja?
 LOCINNA
                                              Sienteme
 ARMILLO
                                                                  E nnanze
 No mme sarrà cchiù azzietto,
 Che lo Lupo mme squarte, e mme sdellanze?
 LOCINNA
160No, arma de sto pietto,
 Non t’affrjere tanto.
 ARMILLO
                                       Ajemmene!
 LOCINNA
                                                               O Dio!
 Penza, ca chisso chianto è ’sango mio.
 Siente, stanne securo;
 Agge creddeto a mmene.
165Nnante a sta Ddea te juro
 Ad autro non peglià: pe mme ssi’ nato:
 Io nasciette pe ’tene.
 T’abbasta?
 ARMILLO
                       O cara mia! mm’haje forzetato!
 LOCINNA
 E ’si llà ncoppa è scritto,
170Ch’a sta caccia, addo’ vaje, quacche sbentura
 (A li cane sia ditto)
 T’avesse ad attoccà
 ARMILLO
                                     Che ’baje decenno!
 LOCINNA
 O sempe affritta, e scura,
 Vedola sconzolata aggio da stare,
175Sosperanno, e chiagnenno
 La negra Sciorte mia;
 O mme vao a mpizzare
 Mmocca a lo stisso Lupo, azzò mm’accia.
 ARMILLO
 O vocca grazejosa,
180Canale de docezza, e ’de confuorto!
 No, fatella ammorosa;
 Si commatto pe ’te, lo Lupo è muorto.
 LOCINNA
 Cielo; fa, che ’soccea
 ARMILLO
 Securo nne songh’io.
 LOCINNA
185Fallo tu, bella Ddea:
 Tu mme lo puoje sarvà lo bello mio.
 ARMILLO
 
    No, bella
 Fatella,
 Non credere, no,
190Co ’tico a lo core.
 Ch’io pozza morì.
    Sta cocchia d’ammore,
 No, cara, non pò
 La sciorte spartì.
 
 SCENA VII
 
 LOCINNA sola.
 
 LOCINNA
195Armillo mio che schianto mm’è benuto!
 Bella Ddea, dalle ajuto:
 Tu lo seccurre, o Cielo.
 Marame sfortonata,
 Ca no piezzo de jelo io so’ ’restata!
 
 SCENA VIII
 
 SARVAGGIO, VEJOLA, DORINA; e la stessa, nzallanuta a no pontone.
 
 SARVAGGIO
200Uh! che brutto sconquasso
 Pe sto Lupo mmarditto! uh che sbentura!
 VEJOLA
 Marame! che fracasso!
 DORINA
 Io sto, che tremmo tutta de paura!
 LOCINNA
 (O Armillo! o negramene!)
 SARVAGGIO
205Chi da cca se confonne:
 Da llà, chi va chi vene:
 Chi fuje, chi s’annasconne;
 Chi lo Lupo secuta!
 Uh!
 LOCINNA
           (Da qua negra stella
210Sta scajenza è benuta!)
 DORINA
 Locinna stace llane.
 SARVAGGIO
                                      O! veccotella!
 VEJOLA
 Figlia mia benedetta
 SARVAGGIO
 O schiecco de bellezza, o gioja, o fata
 VEJOLA
 Bella sciorte t’aspetta!
 SARVAGGIO
215Sarraje contenta, e ghianca.
 DORINA
                                                     E mmaretata.
 VEJOLA
 Mo’ s’accide lo Lupo, e chi l’accide,
 A te s’ha da pegliare.
 LOCINNA
 Ne?
 SARVAGGIO
            Mo’ mmone te vide
 Co lo marito accanto.
 DORINA
                                         E puoje scialare.
 SARVAGGIO
220Quanta laude, ed anure
 Te daranno, nconzierto,
 Abballanno, e cantanno,
 Le Ninfe, e li Pasture!
 VEJOLA
                                           E chesto è cierto.
 LOCINNA
 Sine?
 SARVAGGIO
              E te chiammarranno
225La bella pace nosta, pocca tune
 Daje ll’armo a fa sta caccia.
 VEJOLA
 Ed hanno da fornì le costejune
 Li nnammorate tuoje.
 DORINA
                                           Prode te faccia.
 Comme te vanno a siesto!
 SARVAGGIO
230Bella fortura!
 LOCINNA
                            Ne? nc’è tutto chesto?
 VEJOLA
 Sì; bella fatta; sine.
 SARVAGGIO
 Tutto chesto sperammo.
 LOCINNA
 O buono! e si è accossine,
 Quanno è muorto lo Lupo nne parlammo.
 
235   Chillo è sano, è bivo ancora,
 E decite chesto mo’!
 Aspettammolo, che mora
 E dapo’
 Se parlarrà.
240   Vuje sto cunto
 Ve facite;
 Ma lo punto
 Non sapite
 Addove sta.
 
 SCENA IX
 
 SARVAGGIO, VEJOLA, e DORINA.
 
 SARVAGGIO
245Vejo’; che d’è sta cosa?
 Chella non parla a tuono!
 VEJOLA
 Che nce faje? è scornosa.
 DORINA
 Si n’è muorto lo Lupo: hà ditto buono.
 Ah, ah!
 SARVAGGIO
                 Tu puro ride?
 DORINA
250Ma si hà raggione: è troppo ssa schiattiglia:
 Vo’ vedè chi l’accide;
 E dapo’ si le piace, se lo piglia.
 SARVAGGIO
 Te te! siente a nepoteta!
 Or essa hà d’accosciare
255Co chi l’accide.
 VEJOLA
                              St’ordene
 Ll’hà dato chi poteva.
 DORINA
 E chella hà da pegliare
 Uno, che no le sona? leva, leva!
 
    Ve pare cosa chessa?
260Chella è na bella fata,
 Gentile, aggrazejata;
 E bole, comm’ad essa,
 No bello
 Maretiello
265Cianciuso,
 Grazejuso;
 E si attoccasse a mme,
 Pur’io farria accossi.
    No core
270Non s’appretta:
 È libbero l’ammore,
 Libbero lo gaudè;
 Io ve la dico netta:
 Avite, che nce di’?
 
 SCENA X
 
 SARVAGGIO, e BEJOLA.
 
 SARVAGGIO
275Chiano: fremma no poco:
 (Chesta cchiù mme nnammora! auh! che fuoco!)
 VEJOLA
 Vide, ch’è fatta femmena!
 SARVAGGIO
 Lassa fa, ca n’è niente,
 VEJOLA
                                            Ora aspettammo,
 Che lo Lupo se smafare;
280E dapo’ nne parlammo.
 SARVAGGIO
 Vecco cca: chesta è chella,
 Che pò fa fa la botta; azzò se sciala.
 
 Chesta razeia, o bella Pala
 
 VEJOLA
 
 Chesta razeia, o Pala bella
 
 A DUE
 
285Nce puoie fare schitto tu
 
 SARVAGGIO
 
 Si’ sfarzosa
 
 VEJOLA
 
                        Si’ fammosa
 
 A DUE
 
 Vuoje la festa a buonnecchù.
 
 SCENA XI
 
 ARMILLO, e CERVONE, che secutano lo Lupo, da dinto; e po fera: cod’autre Pasture; e li stisse. Se senteno mprimmo suone de cuorne.
 
 VEJOLA
 Che d’è!
 SARVAGGIO
                   Suono cca rente!
 CERVONE
 A lo Lupo, a lo Lupo: allerta; a buje.
 SARVAGGIO
290Eccolo llà; tiemente.
 VEJOLA
 Lo Lupo! mare nuje!
 SARVAGGIO
 Mo nc’è ncuollo: sfelammo.
 VEJOLA
 Addove nce sarvammo? Addo’ foimmo?
 Negra me.
 SARVAGGIO
                       Ncopp’a st’arvore saglimmo. (Saglieno ncoppa a duje Arvere.)
 CERVONE
295Fegliu’; dammole adduosso.
 ARMILLO
 No scappe da ste mano.
 SARVAGGIO
 Nzanetà! comm’è brutto!
 VEJOLA
                                                Uh! com’è gruosso!
 SARVAGGIO
 Dalle Armillo; a sso cano.
 VEJOLA
 Nfilalo a sso ciaferro.
 CERVONE
300Se defenne lo perro!
 VEJOLA
                                        Uh! che fraciello!
 SARVAGGIO
 Armillo; statte forte.
 VEJOLA
                                        Uh! poveriello!
 Uh! marisso è caduto! (Cca Armillo ven’a cadere for’a la scena, secutato da lo Lupo.)
 SARVAGGIO
 Cane; tenite pede.
 ARMILLO
                                     Ajuto, ajuto.
 
 SCENA XII
 
 SERPILLO, e li stisse.
 
 SERPILLO
 Cca songh’io: mo’ se vede,
305Si sfierre da sto vraccio.
 SARVAGGIO
                                              A te Serpillo.
 VEJOLA
 Chisto non coglie stuorto.
 SERPILLO
 No scappe.
 SARVAGGIO
                       Frusciannillo.
 CERVONE
 O bravo!
 SARVAGGIO
                    O bella botta!
 SERPILLO
                                               Ecco, ch’è muorto!
 SARVAGGIO
 Via su: scennimmo. (Scenneno Sarvaggio, e Bejola da ll’arvore; e Armillo, strangosciato, se vace ad assettare a no Puojo.)
 CERVONE
                                       O buono!
310Propeio arriesto ll’haje fatto!
 Mme nn’allegro.
 ARMILLO
                                 (Uh! che truono!
 O vreogna d’Armillo! uh! ca mo’ schiatto!)
 SARVAGGIO
 Viene cca: valentone;
 Lassamette abbracciare astrinto; astrinto.
 VEJOLA
315Tanto vo’ la raggione:
 Io porzine t’abbraccio.
 ARMILLO
                                            (E chillo ha binto!)
 SARVAGGIO
 No Marte mme si’ parzo!
 VEJOLA
 Da bravo cacciatore ll’haje acciso.
 CERVONE
 Co bezzarria, co sfarzo!
 SERPILLO
320Chesta è bertù d’Ammore.
 VEJOLA
                                                   T’aggio ntiso.
 SERPILLO
 E po, porzì la Ddea, che tutto pote,
 Tanta forza m’hà data.
 SERPILLO - VEJOLA - CERVONE
 Che sia dengrazejata mille vote.
 ARMILLO
 (Ajemmè! ca già so’ ghiuto!)
 SARVAGGIO
325Vuoje vedè si è meracolo?
 Pocca essa hà boluto
 Nnante a l’Autaro sujo chisto spettacolo.
 Su, nconzierto cantanno,
 E Serpillo, e la Ddea jammo laudanno
 SERPILLO - VEJOLA - CERVONE
 
330   Viva la bella Ddea:
 Viva Serpillo puro,
 Che, chine de contiento,
 Nce fanno grellejà.
    E avimmo pe securo,
335Ch’appriesso nce soccea
 No bello scialamiento,
 Pe farence sguazzà.
 
 VEJOLA
 Uh! vide Armillo llane!
 SARVAGGIO
 Oje Armi’, che te siente?
 ARMILLO
340No mm’haje visto cadè?
 SARVAGGIO
                                               Via, ca n’è niente.
 
 SCENA XIII
 
 LOCINNA, SIRVEIA, DORINA; e li stisse.
 
 LOCINNA
 Quanta gente so’ ccane!
 VEJOLA
 Sirveia, Locinna, a buje:
 Allegrezza, allegrezza.
 SERPILLO
                                          (Ecco la bella.)
 SARVAGGIO
 A scialare co nnuje.
 VEJOLA
345È tiempo de prejezza.
 ARMILLO
                                           (O negra stella!)
 CERVONE
 Tiempo de festa, e riso.
 SARVAGGIO
 Vecco lo Lupo muorto.
 LOCINNA
                                           E chi ll’hà acciso?
 VEJOLA
 Chisto hà fatto pe ciento.
 DORINA
 T’è benuta colata. (A Locinna.)
 SIRVEIA
350(O Sirveia negrecata!)
 LOCINNA
                                            (Ajemmè! che sento!)
 SARVAGGIO
 Addo’ si’ tu? Cervone:
 Viene da chesta vanna;
 Zompa.
 CERVONE
                  So cca patrone.
 SARVAGGIO
 Piglia chella jorlanna;
355E dammola a chi attocca.
 CERVONE
                                                Mo’ se piglia.
 ARMILLO
 (O raggia!)
 SIRVEIA
                        (O gelosia!)
 LOCINNA
                                                (Uh! che schiattiglia!)
 SARVAGGIO
 Che d’è? tu staje marfosa! (A Locinna.)
 LOCINNA
 (Mo’ mme crepa l’affanno.)
 SARVAGGIO
 Sacc’io, che d’è la cosa,
360Ma pacienzeia nce vo’.
 LOCINNA
                                            (Nnanze mme scanno.)
 CERVONE
 Veccola: cca song’io.
 SARVAGGIO
 Piglia tu chesta. Viene, (Leva la Coppola a Serpillo, e la dace a Cervone; e po mette la jorlanna ncapo a lo stisso Serpillo.)
 Viene cca, figlio mio,
 Ca chesta a te commene,
365Ca tu t’haje fatto anore:
 Ed haje tanto valore,
 Che nesciuno t’arriva.
 E biva n’auta vota.
 VEJOLA - CERVONE
 E biva, e biva.
 SARVAGGIO
                             Pe mmo pigliate chesto:
370E po Locinna è toja.
 SERPILLO
 Sarrà pe mme na gioja.
 SIRVEIA
 (Marame! ca mo’ schiatto?)
 LOCINNA
                                                     (E ba, ch’è lesto?
 N’è carne pe ssi diente.)
 ARMILLO
 Locinna mia (Ntra di lloro.)
 LOCINNA
                           Non dubbetà de niente.
 SARVAGGIO
375Su: dammo a lo de chiune,
 P’accommenzà la festa.
 CERVONE
                                             A nnuje, c’aspiette?
 SARVAGGIO
 Cervone taglia tune
 La capo a chillo lupo; e po la miette
 Pe n’aterna mammoreia
380De sta bella vettoreia;
 Mponta a lo palo stisso
 Addo’ stea la jorlanna
 VEJOLA
                                          Manco te muove?
 CERVONE
 (O vi’, che mbruoglio è chisso!)
 SARVAGGIO
 Po curre a la capanna,
385E piglia la varrecchia, e lo vastone,
 Pe premmeio a chi guadagna
 A l’allotta, e a lo schiacco.
 VEJOLA
                                                A te, Cervone.
 DORINA
 Vi’ ca chillo te magna:
 Fuje, fuje.
 CERVONE
                      Tu mo’ n’haje sfizeio.
390Mm’abburle cacciottella?
 DORINA
 Mm’allegro de l’affizeio.
 CERVONE
 Mo’ vide, che sa fa chesta cortella.
 Comm’è brutto bonora!
 Che brutta ncornatura!
 SARVAGGIO
395E no nte sbriche ancora?
 DORINA
 Ah, ah, ah! chillo è muorto de paura.
 CERVONE
 
 Tagliammo, via:
 Siente sto suono.
 O! mamma mia,
400Ca muorto è buono
 Mme fa tremmà!
 
 DORINA
 
 Shiù, schiù, shiù, shiù!
 
 SARVAGGIO - VEJOLA
 
 Ah, ah, ah, ah! (Tagliata la capo a lo Lupo, la mette mponta a lo palo addo’ stea la jorlanna, e po ll’auza, e lo chianta nterra.)
 
 CERVONE
 
    Male te vatta,
405Te ll’aggio fatta;
 Miettete cca.
 Veditevella,
 Veccola llà.
    Che tarantella
410Mme fa lo core!
 Uh! che remmore
 Fanno li diente!
 Bu, bu, bu, bu!
 Già stongo rente
415Pe speretà.
 
 DORINA
 
 Shiù, shiù, shiù, shiù!
 
 SARVAGGIO - VEJOLA
 
 Ah, ah, ah, ah! (Non se lebbreca.)
 
 SCENA XIV
 
 SARVAGGIO, VEJOLA, SERPILLO, LOCINNA, ARMILLO, DORINA, e SIRVEIA.
 
 DORINA
 Chisto è no gusto pazzo!
 VEJOLA
 Comme va! Videtillo!
 SARVAGGIO
420Che bello potronazzo! Dammo a nnuje:
 Levate duje de vuje da cca sto Lupo;
 E ghiettatelo dinto a sso derupo.
 Via su; Locinna, Armillo,
 Non serve a sta marfusse
 VEJOLA
425Ogn’uno a la raggione s’hà d’arrennere.
 SARVAGGIO
 Non ce vonno sti musse.
 Chesto è concruso, e a chesto s’ha d’attennere.
 SERPILLO
 (O Serpillo vejato!)
 SIRVEIA
                                      (Aiemmè!)
 LOCINNA
                                                             (No resce.)
 ARMILLO
 (O Armillo desperato!)
 SARVAGGIO
430Mo’ la festa sbrecammo
 Co fa li juoche; e appriesso,
 Serpillo co Locinna nguadejammo.
 SERPILLO
 (O bella mia!)
 LOCINNA
                             (Ma ancora n’è socciesso.)
 SIRVEIA
 Ed io resto chiaruta, io sconzolata?
435La Ddea pò fa sto tuorto!
 Mm’assomma già na fureia desperata.
 SARVAGGIO
 Ah! cana; zitto llà!
 SERPILLO
                                    Ncielo porzine,
 Se prommette lo stuorto?
 VEJOLA
 Uh, che te scappa!
 SIRVEIA
                                    Sine,
440Ca lo Cielo, e la Ddea so confarfate
 Pe strazejà l’affritte nnammorate.
 
    Ccossì chiaruta
 Hà da restà
 Na poverella,
445Ch’ashievoluta,
 More
 P’ammore!
 E chella
 Ddea
450Chesto pò fa!
    Fa, che se vea
 Secca lo jelo
 De la speranza,
 Lo bello shiore
455Che cchiù nc’avanza,
 Si manco ncielo
 No nc’è piatà.
 
 SCENA XV
 
 SARVAGGIO, VEJOLA, LOCINNA, SERPILLO, ARMILLO, e DORINA.
 
 VEJOLA
 C’hà ditto nzanetà!
 DORINA
                                      Vi’ comme trotta!
 SARVAGGIO
 Essa se pò fa negra
460Cchiù de la pece, e ghiuta già la botta,
 Orsù: stammo a l’allegra
 
 SCENA XVI
 
 CERVONE, e li Stisse.
 
 CERVONE
 Cca so’ li priemmeie.
 SARVAGGIO
                                          A nnuie:
 Via, faciteve sotta,
 Correbbo, Arcone a buje, e da valiente
465Frosciate a fa l’allotta:
 E nuje zezzammo cca pe tenè mente. (Se fa l’allotta.)
 SARVAGGIO - SERPILLO - VEJOLA - DORINA - CERVONE
 Viva! Arcone ll’ha benta!
 CERVONE
                                                O! che sollazzo!
 SARVAGGIO
 O povero Corebbo! uh! che mmallazzo!
 A groleia toia sia chesto,
470O bella Ddea; su vienetenne, Arcone.
 CERVONE
 Eccolo: ca sta lesto.
 SARVAGGIO
 Piglia cca, c’a te attocca sto vastone.
 Via, su: coll’arco. A tene,
 Cervo’, lo schiacco.
 CERVONE
                                     E cca; mo’ lo mettimmo.
 SARVAGGIO
475Lloco. (vace a mettere lo sciacco dinto a na quinta.)
 CERVONE
              Mparalo a mmene.
 SARVAGGIO
 Armillo viene cca: tira tu primmo.
 ARMILLO
 (Che fusta!)
 SARVAGGIO
                          Stammo forte:
 Fatt’anore, che d’haje? miettete ntuono.
 ARMILLO
 A nomme de la sciorte,
480C’accossì me strazeja, mo’ tiro.
 SARVAGGIO
                                                          O buono!
 Cervone, a te.
 CERVONE
                            Sso’ schiacco
 Mo’, con a botta fina;
 Pe mmiezo te lo spacco. A groleia toia
 Tiro, o bella Dorina.
 DORINA
485Ah, ah nc’haie cuoveto iusto. Va te stoia.
 LOCINNA
 (Mme roseco la rezza!)
 SARVAGGIO
 E sempe si’ sciasciucco!
 CERVONE
 E che buoie si la frezza
 Have pigliato viento?
 DORINA
                                          Uh zuca mucco!
 SARVAGGIO
490Serpillo a te t’aspetta:
 Tira tu mone, votta.
 SERPILLO
 Sparo chesta sajetta
 A nomme tujo bella Locinna.
 SIRVEIA
                                                       O bravo!
 E ghiuta mmiezo iusto! o bella botta!
 VEJOLA
495Bbotta, che ba no schiavo!
 DORINA
 Lo bide anemalone?
 LOCINNA - ARMILLO
 (Porzì chesto! o sbentura!)
 SIRVEIA
 O gioia mia?
 SARVAGGIO
                           N’arcevalentone!
 Si’ Rre de li valiente!
 VEJOLA
                                         E n’è boscia!
 SARVAGGIO
500Che ommo! vide lloco:
 Co chisto cca se sciala.
 LOCINNA
 (Va, ca mo’ nce la cuoglie.)
 SARVAGGIO
                                                   È chisto juoco
 Puro a te l’afferimmo, o bella Pala.
 Chisto è lo premmeio: e chesta
505Vorria, che fosse d’oro;
 Pocca tu si’ l’anore de sta festa. (Le dà la varrecchia.)
 SERPILLO
 Vasta Locinna mia pe no trasoro.
 SARVAGGIO
 Stasera non te manca
 Sto bello scialacore.
 CERVONE
510Chisto sta, che nn’allanca.
 SERPILLO
 E pecchene è stat’essa
 La sciorte mia, la forza, e lo valore:
 Chesta jorlanna stessa
 De raggione l’attocca
 DORINA
                                         (O bello mbruoglio!)
 SERPILLO
515E a te la metto, o bella.
 LOCINNA
                                            Io no la voglio.
 SARVAGGIO
 No la puoje refocare.
 VEJOLA
 Ah! cana! pegliatella.
 ARMILLO
 (Uh! che boccune amare!)
 LOCINNA
 Comme volite vuje: mettitemella. (Le mette Serpillo la jorlanna ncapo.)
 ARMILLO
520(Io so’ fatto no jaccio.)
 SERPILLO
 E co chesta te faccio:
 Bella gioja d’ammore:
 Reggina de chest’arma, e de sto core.
 
 Bellezza mia,
525Fata ammorosa
 
 ARMILLO
 
 O gelosia!
 
 LOCINNA
 
 Io so’ confosa!
 
 ARMILLO
 
 Ah! che delore!
 
 LOCINNA
 
 Ma non te resce. (A Serpillo.)
 
 SERPILLO
 
530Zompa lo core:
 Bella: pe te.
 
 ARMILLO
 
 Chi vo’ campare!
 Ll’arma addov’è?
 
 LOCINNA
 
 Non dobbetare:
535Lassa fa a mme. (Ad Armillo.)
 
 A TRE
 
 Uh comme cresce
 
 SERPILLO
 
 Lo fuoco mpietto
 
 ARMILLO
 
 L’aciervo affanno
 
 LOCINNA
 
 Cchiù lo despietto
 
 ARMILLO - LOCINNA
 
540Cielo; e pecché?
 
 SERPILLO
 
 O cara; e quanno
 S’ha da gaudè?
 
 SCENA XVI
 
 SARVAGGIO, VEJOLA, DORINA, e CERVONE.
 
 DORINA
 Comme vanno nfummato
 Locinna, e Armillo!
 CERVONE
545Haje visto? tutte duje
 Stanno chine de frate.
 VEJOLA
 Lassele fare.
 SARVAGGIO
                          Or isse se le ponno
 Fa passà quanno vonno, Ammice; a nnuie;
 La festa seggellammo:
550Vuje facite l’abballo; e nuje cantammo.
 A QUATTRO
 
 Ddea famosa, (s’abballa, e se canta.)
 St’abballo, sto canto
 
 SARVAGGIO
 
 Groleia
 
 VEJOLA
 
                 E banto
 
 CERVONE
 
 Trejunfo
 
 DORINA
 
                    Ed anore
 
 A QUATTRO
 
555Grannezza, e sbrannore
 Sia sempe pe te.
 
 SARVAGGIO - VEJOLA
 
 Te preammo, che sempe ammorosa...
 
 CERVONE - DORINA
 
 Chiena sempe de razeie, e faure
 
 VEJOLA - DORINA
 
 Pe Ninfe
 
 SARVAGGIO - CERVONE
 
                    E Pasture
 
 A QUATTRO
 
560Te facce a bedè.
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional