| | |
| | |
| | La Locinna, Napoli, A Spese de lo Mpressareo, 1723 |
| | a cura di Ginevra Del Vacchio |
| |
| |
| |
|
| |
| | ATTO II |
| |
| | SCENA PRIMMA |
| |
| | VEJOLA, e SARVAGGIO. |
| |
| | VEJOLA |
| | Haje visto comme ncoccia? |
| | SARVAGGIO |
| | Sto fusto te l’assoccia. |
| | VEJOLA |
| | Quant’arrive, e l’accuorde! |
| | SARVAGGIO |
| | A chi vo’ assemmegliare? |
| 565 | A la mamma, bon’arma! |
| | VEJOLA |
| | T’allecuorde? |
| | Che nne puoje sapè tune! |
| | Chesta mm’ha fatto stare int’a li guaje. |
| | Mmiezo a lo fuoco da duje anne, e cchiune, |
| | Ch’a mme quanno morette, la lassaje. |
| |
| | SCENA II |
| |
| | DORINA, CERVONE, e li stisse. |
| |
| | DORINA |
| 570 | Leva, le’! |
| | CERVONE |
| | Gioja bella |
| | DORINA |
| | Haje fatto arrore. |
| | CERVONE |
| | Tu si’ lo speretillo de sto core. |
| | DORINA |
| | Torna mone! |
| | SARVAGGIO |
| | Oje campierchio, |
| | Tu da chessa che buoje? |
| | DORINA |
| | Mo’ si’ sopierchio! |
| | VEJOLA |
| | Puro attuorno? |
| | CERVONE |
| | E ch’è stato? |
| | SARVAGGIO |
| 575 | Vi’ bello nnammorato! |
| | CERVONE |
| | Che mme manca? che d’è? |
| | DORINA |
| | Che frusciamiento! |
| | VEJOLA |
| | Tu co chella? uh! nzertone! |
| | SARVAGGIO |
| | E po le fa spaviento |
| | No Lupo muorto! |
| | VEJOLA |
| | Haje visto? |
| | DORINA |
| | E si è potrone. |
| | CERVONE |
| 580 | Che spaviento mme nnuommene! |
| | Bonora! a mme? chesto a lo Rre dell’uommene? |
| | DORINA |
| | Vi’, ca se fa corrivo! |
| | CERVONE |
| | Vuje non site fojute ncopp’a ll’arvore? |
| | SARVAGGIO |
| | Vuoje mettere lo muorto co lo vivo? |
| | DORINA |
| 585 | Si’ Rre de li potrune, |
| | E dalle, ca te spriemme! |
| | Rre de ll’uommene tune, e ancora triemme! |
| | CERVONE |
| | Che bipara si’ tu! |
| | DORINA |
| |
| | Tagliammo, via: |
| 590 | Siente sto suono. |
| | O mamma mia, |
| | Ca muorto, e buono, |
| | Mme fa tremmà |
| | shiù, shiù, shiù, shiù! |
| |
| | SARVAGGIO - VEJOLA |
| |
| 595 | Ah, ah, ah, ah! |
| |
| | CERVONE |
| | Non ciascheià, Dorina. |
| | DORINA |
| | Ah, ah, ah, ah! sso schiacco, |
| | Mo’ co na botta fina, |
| | Pe mmiezo te lo spacco, |
| 600 | E po morette cessa! |
| | VEJOLA |
| | E da na botta nne sguigliaje na vessa. |
| | SARVAGGIO |
| | Ah, ah, ah, ah! e tu mone |
| | Vuoje, che Dorina t’amme! e ch’è schierchiata? |
| | Vozzacchio! e de raggione, |
| 605 | Che boglia bene a mme sta bella fata. |
| | DORINA |
| | (Mo’ ncigna st’autro ruseco!) |
| | SARVAGGIO |
| | Chesta pe mmene spasema. |
| | CERVONE |
| | Pe mme se nne va nziecolo. |
| | SARVAGGIO |
| | Eh! lo guajo, che te stocca! |
| 610 | Co mmico vuoje tozzà? |
| | CERVONE |
| | No sbravejammo |
| | SARVAGGIO |
| | Ammafara ssa vocca: |
| | Va chiamma li Pasture; e nguadejammo |
| | Locinna co Serpillo; ca de chesto |
| | Po se nne parla. Priesto. |
| | CERVONE |
| 615 | Mo’ vao. (Ah! biecchio fauzo! |
| | Cca sto a sentì: no mm’haje trovato scauzo.) |
| |
| | SCENA III |
| |
| | SARVAGGIO, VEJOLA, DORINA, e CERVONE annascuso. |
| |
| | SARVAGGIO |
| | Io so’ pe tene: haje ntiso gioja mia, |
| | Nenna mia nzuccarata? |
| | VEJOLA |
| | Uh! che pazzia! |
| | SARVAGGIO |
| | Tune pe mme si’ nata, |
| 620 | Pe mme sta sempe nzino. |
| | DORINA |
| | (Che smorfeia!) |
| | VEJOLA |
| | (È bella chesta!) |
| | CERVONE |
| | (Ah! lo chiappino!) |
| | SARVAGGIO |
| | Respunneme, che d’haje? |
| | Parla fatella bella |
| | Vejola ajuta tu, benaggia craje. |
| | VEJOLA |
| 625 | Non vi’ ch’è scornosella? |
| | SARVAGGIO |
| | Cara (a Dorina.) Dincello tune (a Bejola.) |
| | Ca so’ arzo pe d’essa pe nfi’ a ll’ossa. |
| | VEJOLA |
| | Che dice!... |
| | CERVONE |
| | (Uh! secozzune!) |
| | VEJOLA |
| | Ih! ca ll’haje fatta fare rossa rossa! |
| | SARVAGGIO |
| 630 | Dille, ca senza d’essa, |
| | Cchiù campare non pozzo. |
| | VEJOLA |
| | (Ah, ah!) |
| | DORINA |
| | (Che berneia è chessa!) |
| | SARVAGGIO |
| | Siente, che dice Zia. (a Dorina.) |
| | CERVONE |
| | (Mo’ nce l’annozzo.) |
| |
| | Vejo’; dille porzì, |
| 635 | Dille, c’aggia piatà |
| | Dori’; siente tu puro: |
| | Zzoè |
| | Piatà de me: |
| | No scuro |
| 640 | Nnammorato, |
| | Che lo vo fa morì? (a Bejola.) |
| | Che lo vuoje fa morì? (a Dorina.) |
| | Ah! guitto malenato, |
| | Ancora cca si’ tu? |
| 645 | Abbìa; sfratta da cca. (a Cervone che fa nnante.) |
| | Vejo’; compasseione: |
| | Dori’; scumpela mo’. |
| | Vejo’; |
| | Dori’; no cchiù: |
| 650 | Piatà de sto fraciello, |
| | Ch’è fatto no cravone |
| | Sto core poveriello; |
| | E nfummo se nne va. |
| |
| | SCENA IV |
| |
| | DORINA, e BEJOLA. |
| |
| | DORINA |
| | Che sfizio! ll’haje sentuto? |
| | VEJOLA |
| 655 | Vi’ quanto face Ammore! |
| | N’ommo tanto saputo. |
| | Lo cchiù biecchio Pastore se cchiù flemmato, |
| | Ll’ha fatto mmertecà de cellevriello, |
| | Pe fa lo gaglionciello nnammorato! |
| |
| | SCENA V |
| |
| | CERVONE, e le stesse. |
| |
| | CERVONE |
| 660 | (E arrivame si’ puoje. |
| | So’ ancora cca.) |
| | DORINA |
| | Vi’ mo’, si sto voccone |
| | Te pare cosa pe li diente suoje! (a Bejola.) |
| | CERVONE |
| | Veccote cca Cervone: |
| | Sso bello vocconciello |
| 665 | A chisto fusto attocca. |
| | VEJOLA |
| | E ba, ca vuoje sta bello? |
| | DORINA |
| | Sì; bene mio; va sciacquate la vocca. |
| | CERVONE |
| | Bonora! e sempe staje |
| | Cchiù arraggiata de n’orza! |
| | DORINA |
| 670 | Fegliu’ co mmico ll’haje? |
| | VEJOLA |
| | Sto voccone te ntorza. |
| | CERVONE |
| | Allucco, chiagno: |
| | Mme sfrecolejo: mme fragno, |
| | E tu; cana; mme pare che nc’haje gusto. |
| | DORINA |
| | A; Zi; mo te l’agghiusto. |
| 675 | Cervone mio; n’è niente: |
| | Leva sta fantasia: |
| | Fora chiante, e lamiente; |
| | Ca n’è comme te pienze. |
| | CERVONE |
| | O bella mia! |
| | DORINA |
| |
| | Tu mme vuoje bene? |
| 680 | Bravo! e porzì |
| | Vorrisse a mmene, |
| | Non è accossì? |
| | Isce lo bello |
| | Nnammoratiello! |
| 685 | Ah,ah, ah, ah! |
| | Zia; tieme’ |
| | Videlo cca! |
| | Aggio abborlato, |
| | N’è bero, no: |
| 690 | Tu si’ no fato |
| | Saporetiello, |
| | Grazejusiello; |
| | Vuoje sentì cchiune? |
| | T’abbasta mo’? |
| 695 | Ajemmè! ca tune, |
| | Mme faje squaglià. |
| |
| | SCENA VI |
| |
| | VEJOLA, e CERVONE. |
| |
| | VEJOLA |
| | Nc’è ghiuto propeio a siesto: |
| | Vi’ comme te l’hà fatto? |
| | CERVONE |
| | Uh! benaggia oje! |
| | VEJOLA |
| 700 | Mmierete peo de chesto: |
| | Nce lo bo’; crepa, schiatta. |
| | CERVONE |
| | Uh! tu che buoje? |
| | VEJOLA |
| | No la faje, te puje vattere. |
| | CERVONE |
| | Torna! |
| | VEJOLA |
| | Cano; haje a mmene |
| | CERVONE |
| | Che mme t’aggio da sbattere? |
| | VEJOLA |
| 705 | C’aggio porpa, aggio zuco, |
| | E t’ammo, e boglio bene |
| | Quanto cchiù nce nne cape. |
| | CERVONE |
| | (Uh! che frosciuco!) |
| | VEJOLA |
| | De pecore, e de capre, |
| | Saje, ca nne sto provista, e da guarzone, |
| 710 | Te farraggio ommo granne: |
| | Ddeventarraje patrone. |
| | CERVONE |
| | Guarzone pe mmill’anne... |
| | VEJOLA |
| | Maro te! che pazzia! |
| | CERVONE |
| | Manco Rre de corona |
| 715 | Co no taluorno accanto. Arrassosia! |
| | VEJOLA |
| | Crodele |
| | CERVONE |
| | Ora mo’ sona. |
| | VEJOLA |
| | Te: che mme manca? speretosa, bella, |
| | Polita, aggrazejata. |
| | CERVONE |
| | E do’ Vejola: |
| | Tu no la spunte co ssa chiacchiarella: |
| 720 | Si’ becchia, e nnuje volimmo la fegliola. (A la pastorale redicola.) |
| | VEJOLA |
| | Ajemmè! ca mo’ sconocchio! |
| | Perro, chesto mme faje? |
| | CERVONE |
| | (Mmo’ la mpapocchio.) |
| | Non chiagnere, che d’haje? |
| | Vejola mia, sta zitto, |
| 725 | C’aggio abboriato. |
| | VEJOLA |
| | È sfatta ssa scheressa. |
| | CERVONE |
| | De quanto t’aggio ditto |
| | Nné mento mille vote. |
| | VEJOLA |
| | O gioja! |
| | CERVONE |
| | O fata mia! (mo’ renno ad essa |
| | Chello, c’hà fatto a mene la Nepote.) |
| |
| 730 | Ddonca vuoje bene a mme? |
| |
| | VEJOLA |
| |
| | Sì; fato bello; sì. |
| |
| | CERVONE |
| |
| | E buoje, che piglie a te, |
| | E lasse chella lla? |
| |
| | VEJOLA |
| |
| | Sì; caro. |
| |
| | CERVONE |
| |
| | N’è accossì? |
| 735 | Vi’ l’uocchie de carnumma... |
| |
| | VEJOLA |
| |
| | Frostato, |
| | Malenato |
| |
| | CERVONE |
| |
| | La jolla, la vecchiumma, |
| | Ca se vo’ mmaretà! |
| |
| | VEJOLA |
| |
| 740 | Guettone, |
| | Frabbuttone, |
| | T’aggio da stravesà. |
| |
| | CERVONE |
| |
| | No, bella |
| | Popatella, |
| 745 | Lo core mio si’ tu. |
| |
| | VEJOLA |
| |
| | Mme gabbe n’è lo vero. |
| |
| | CERVONE |
| |
| | È fauzo sso penziero, |
| | Ca chesta è beretà. |
| |
| | VEJOLA |
| |
| | O schiecco mio, no cchiù, |
| 750 | Ca tu mme faje squaglià. |
| |
| | CERVONE |
| |
| | Tu mme faje pazzejà. |
| |
| | SCENA VII |
| |
| | SARVAGGIO, e SERPILLO, co quatto Pastore de comparza. |
| |
| | SARVAGGIO |
| | Via, zompa de prejezza: |
| | Allegro: ca mo’ mone |
| | Nne: scervicchie no shiore de bellezza. |
| | SERPILLO |
| 755 | Sì, ma l’apprenzejone |
| | Mme roseca lo core. |
| | SARVAGGIO |
| | E puro! |
| | SERPILLO |
| | È poco chesso, |
| | Ca ll’hà da fa pe forza, e non ammore? |
| | SARVAGGIO |
| | L’ammore ven’appriesso: |
| 760 | Nguadeiala mo’, ca quanno t’è mogliere |
| | La faje comm’a na fico. |
| |
| | SCENA VIII |
| |
| | CERVONE, co quatt’autre Pasture, e li stisse. |
| |
| | CERVONE |
| | Vecconce cca, Messere. |
| | SARVAGGIO |
| | O! addio, mercantela, c’haje da fa commico. |
| | CERVONE |
| | Che d’è?... |
| |
| | SCENA IX |
| |
| | VEJOLA DORINA, e li stisse. |
| |
| | VEJOLA |
| | Cca simmo nuje. |
| | SARVAGGIO |
| 765 | O bravo! a tiempo justo (A Bejola, e Dorina.) |
| | Te voglio fa non fuje? (A Cervone.) |
| | DORINA |
| | O bene mio, che gusto! |
| | VEJOLA |
| | Crepa: nce lo bolimmo. (A Cervone.) |
| | SARVAGGIO |
| | Va ca po a la capanna nce vedimmo. |
| 770 | Su faciteve nnante. (A lo stisso.) |
| | Addo’ è Locinna? |
| | DORINA |
| | E chi ll’ha bista? |
| | SERPILLO |
| | Ajemmene! |
| | Addo’ stace? Addo’ è ghiuta? |
| | VEJOLA |
| | Che cos’è? tu te schiante! |
| | SARVAGGIO |
| | Sta zitto, ca mo’ vene. |
| | SERPILLO |
| 775 | Maro me! |
| | SARVAGGIO |
| | Fatte cunto, ch’è benuta. |
| | E ntra tanto spassammonce no poco: |
| | Leva ssa fantasia: |
| | Facimmo de l’Aracolo lo juoco. |
| | VEJOLA |
| | A nnuje. (S’assettano tutte quante.) |
| | SARVAGGIO |
| | Addemmannato |
| 780 | L’Aracolo qua sia |
| | La vita de no scuro nnammorato; |
| | Responnette Zampogna. |
| | SERPILLO |
| | Ha ditto buono |
| | L’Aracolo, e lo vero. |
| | Have lo stisso tuono |
| 785 | D’Ammore la speranza, abbotta, e sbotta; |
| | Io, che contiente spero, |
| | Le beo da cca, e da llà |
| | E no nne pozzo assaporà na gliotta! |
| | SARVAGGIO |
| | O buono, di’ tu mone. |
| | VEJOLA |
| 790 | L’Aracolo ha raggione: |
| | Te sona la Zampogna spisso spisso |
| | Lo nnammorato quanno |
| | Ammore a lo scur’isso, lo ncotogna, |
| | Ca sempe sosperanno, |
| 795 | Abbotta, e sbotta peo de na Zampogna. |
| | SERPILLO |
| | Ah! |
| | SARVAGGIO |
| | E biva! da majestà! |
| | Dorina vienetenne: |
| | A te. |
| | DORINA |
| | Veccome lesta. |
| | La Zampogna s’appenne, |
| 800 | Quann’uno de sonare è già straqquato; |
| | Ccossì lo nnammorato, |
| | Quanno stace a la scesa s’ammasona, |
| | Ch’è na Zampogna appesa, che non sona. |
| | CERVONE |
| | Non se pò fa cchiù bella! |
| | SARVAGGIO |
| 805 | Ne lo ve’ cicciottella? |
| | CERVONE |
| | Meglio, meglio. L’Aracolo |
| | De fesca l’ha nzertata. |
| | N’ammante, che n’è giovene, |
| | È ghiusto na zanpogna spertosata, |
| 810 | Che mmatola se shioscia, |
| | Ca vaje pe l’abbottare, e cchiù s’ammoscia. |
| | VEJOLA - DORINA |
| | Ah, ah, ah! |
| | SARVAGGIO |
| | Viva isso! |
| | E biva lo vozzacchio! |
| | Tiemente lo scarfisso |
| 815 | Quanta nne face! |
| | CERVONE |
| | E che mme faje pe racchio? |
| | SARVAGGIO |
| | Nce la voglio sta jonta, |
| | Ca po tutto scontammo. |
| | SERPILLO |
| | E quanno sponta? |
| |
| | Comm’aspetta la Rosata |
| | Pe s’aprì la bella Rosa; |
| 820 | Ccossì st’arma nnammorata |
| | N’arreposa |
| | P’aspettà la gioja bella. |
| | Jate priesto (o Dio!) cercatela |
| | Vuje trovatela addo’ sta; |
| 825 | Pe piatà portatemella. |
| |
| | SARVAGGIO |
| | È forte l’aspettare te lo creo. |
| |
| | SCENA X |
| |
| | LOCINNA, SIRVEIA, e ARMILLO lo quale portarrà ncapo la jorlanna, che SERPILLO deze a Locinna; e li stisse. |
| |
| | LOCINNA |
| | Lassate parlà a mmene. (A Sirveia, e Armillo.) |
| | SERPILLO |
| | Ajemmè! che beo! |
| | Ah, cano! ssa jorlanna, |
| | Che ncintre a portà tu? |
| | SARVAGGIO |
| | Fremma; ch’è chesto! |
| | CERVONE |
| 830 | Va chia’... |
| | SERPILLO |
| | Te nzagno ncanna. |
| | SARVAGGIO |
| | Via levatella priesto. |
| | LOCINNA |
| | Che bo’ levà? |
| | SERPILLO |
| | Lassate. |
| | VEJOLA |
| | (Uh! che senapo!) |
| | DORINA |
| | (Comme s’è fatto acito!) |
| | SERPILLO |
| | Levala da ssa capo. |
| | LOCINNA |
| 835 | Sta bona llà; ca chisto m’è marito. |
| | SARVAGGIO |
| | Che marito |
| | LOCINNA |
| | E chi maje, |
| | O sia no uommene, o Ddieje, pò comportare |
| | Sta forza, che mme faje? |
| | E chi maje pò sforzare |
| 840 | La volontate mia. |
| | Che n’hav’autro patrone |
| | De me, che la commanna? |
| | ARMILLO |
| | E n’è boscia. |
| | VEJOLA |
| | Figlia; cca s’è trattato |
| | Pe lo bene commone; e te se deva |
| 845 | No bello, aggrazejato |
| | SARVAGGIO |
| | Ricco, valente... |
| | LOCINNA |
| | Or io |
| | A chisto non lo voglio: leva, leva. |
| | SERPILLO |
| | E a chisso mo’ l’accio. |
| | ARMILLO |
| | A mme chesto? potrone. |
| | LOCINNA |
| 850 | Non te movere tune! |
| | SARVAGGIO |
| | Scumpela mo’. |
| | VEJOLA |
| | No cchiune. |
| | SARVAGGIO |
| | (Chella llane ha raggione: |
| | Chesto se porria fare.) |
| | Levammo sto contrasto: |
| 855 | Via posa ssa jorlanna. Io mo’ v’agghiusto. |
| | Chi vence a mprovesare |
| | Se pegliarrà Locinna. |
| | LOCINNA |
| | Io ll’aggio a gusto. |
| | SIRVEIA |
| | Sì c’Armillo nn’è masto. (a Locinna.) |
| | ARMILLO |
| | So’ lesto: eccome ccane |
| | SERPILLO |
| | Io so’ no nzierto. |
| 860 | Non troppo mme nne ntenno. |
| | ARMILLO |
| | (Mo’ attocca a mmè.) |
| | SERPILLO |
| | (Mo’ no mme scappa cierto.) |
| | SARVAGGIO |
| | Su, che mme vaje vennenno! |
| | A nnuje: frosciammo, via. |
| | SERPILLO |
| | Ah! ca pe mmene è ghiuta |
| 865 | Locinna, ll’arma mia. |
| | SARVAGGIO |
| | Che d’haje? priesto, armo, e core. |
| | SERPILLO |
| | È già perduta. |
| | SARVAGGIO |
| | Ora ssu, jammo chiano: |
| | Azzò, che non soccèa |
| | Quacch’autro frosciamiento; |
| 870 | Jura nnanze a sta Ddea |
| | De te peglià chi vence. |
| | LOCINNA |
| | A quatto mano |
| | Faccio lo juramiento. |
| | SARVAGGIO |
| | Accommenza a ghiorare. |
| | LOCINNA |
| | Nnante a sta Ddea lo ghiuro |
| 875 | De mm’havè da pegliare |
| | Chi vence a mprovesà. |
| | SERPILLO |
| | Chesta la toja sarrà: perdo securo. |
| | LOCINNA |
| |
| | Se sconfida, sta confuso |
| | No Pastore, ch’è balente, |
| 880 | Ch’è fammuso |
| | Comm’a te! |
| | Venciarraie, non dubbetà. (a Serpillo.) |
| | Mo’ si’ mio, non pò mano. (ad Armillo.) |
| | Va cantanno allegramente |
| 885 | Ca mo’ mmo’ te piglie a mme. (a Serpillo.) |
| | Quanto avimmo da scialà. (ad Armillo.) |
| |
| | SARVAGGIO |
| | No nte nne ghire. (a Locinna.) Armillo ncigna tune. |
| | SIRVEIA |
| | Mo’ sarrimmo vejate. (a Locinna.) |
| | SARVAGGIO |
| | Nterza rimma cantate, |
| 890 | Co gusto, e co allegrezza: |
| | Via, ca Locinna gaudarrà chi cchiune |
| | Sa laudà de Locinna la bellezza. |
| | ARMILLO |
| |
| | Bella da coppa a bascio: haje tu le grazeie |
| | Ch’a chiss’uocchie, e a ssa vocca nce pernejano |
| 895 | E llarme de docezza abbutte, e sazeie. |
| |
| | SERPILLO |
| |
| | Anze so’ stelle ss’uocchie, che shiammejano; |
| | E sse lavra coralle, che shioresceno, |
| | Che parle, o tienemente t’addecrejano. |
| |
| | ARMILLO |
| |
| | Pe fare anore a te, tutte nverdesceno, |
| 900 | Sirve, e campagne, e nove frunne figliano: |
| | Spontano shiure nfrotta, ed erve cresceno. |
| |
| | SERPILLO |
| |
| | Anze chesse da te l’anore pigliano, |
| | Ch’addo’ scarpise; o bella Primmavera; |
| | Nasceno frunne, e shiure, ed erve sguigliano. |
| |
| | ARMILLO |
| |
| 905 | Tu de le belle puorte la bannera; |
| | E la stella de Vennere fammosa, |
| | Non luce comm’a te matina, e sera. |
| |
| | SERPILLO |
| |
| | Ssa stella se starria sempe annascosa, |
| | Si n’avesse da te lumme, e sbrannore, |
| 910 | Che si’ cchiù de lo Sole lummenosa. |
| |
| | SARVAGGIO |
| |
| | E tu lo schiecco si’ d’ogne Pastore! (s’assettano tutte ll’autre ntra tanto se canta.) |
| |
| | Vasta. E biva Serpillo |
| | LOCINNA |
| | (O speranze perdute!) |
| | SARVAGGIO |
| | Serpillo, ch’è no mostro de Vertute. |
| | VEJOLA |
| 915 | Agge pacienzeia Armillo. |
| | SARVAGGIO |
| | Da valente haje cantato; |
| | Ma chisto, a piede chiuppe, t’ha appassato. |
| | Compagne n’è accossì? |
| | CERVONE |
| | Scazza! |
| | DORINA |
| | Securo! |
| | SARVAGGIO |
| | E facive lo gniognio? (a Serpillo.) |
| | LOCINNA |
| 920 | (O sciorte! e chesto puro!) |
| | SIRVEIA |
| | (O Sirveia desperata!) |
| | ARMILLO |
| | (Uh! che sbrenogno!) |
| | SARVAGGIO |
| | Via su; Locinna; a tene: |
| | Chisto è lo tujo. |
| | ARMILLO |
| | (Ch’affanno!) |
| | SIRVEIA |
| | (Uh! che trommiento!) |
| | SERPILLO |
| | Giojuzza bella |
| | LOCINNA |
| | A mmene? |
| | SARVAGGIO |
| 925 | Haje jorato a la Ddea. |
| | LOCINNA |
| | Io? fuoco, fuoco! |
| | Che Ddea? che ghioramiento?... |
| | VEJOLA |
| | Uh, uh! |
| | SARVAGGIO |
| | Zitto no poco. |
| | LOCINNA |
| | Reneo la Ddea, li Ddieje, |
| | La sciorte, lo Destino, |
| 930 | Che so’ la caosa de le pene meje. |
| | SARVAGGIO |
| | Ah! cana! Che te scappa! |
| | SIRVEIA |
| | (Uh! che benino!) |
| | LOCINNA |
| |
| | Pe despietto de chi vo’, |
| | Ch’io mme piglie a chisto cca |
| | (Siano ll’uommene, o li Ddieje) |
| 935 | Io derraggio sempe no; |
| | Né sperà, |
| | Ch’io dica sì. |
| | Si mbe’ nnante a ll’uocchie mieje |
| | Veo la morte apparecchiata. |
| 940 | La cchiù brutta, e cchiù stentata, |
| | Sempe none aggio da di’. |
| |
| | SCENA XI |
| |
| | SARVAGGIO, VEJOLA, ARMILLO, SERPILLO, SIRVEIA, DORINA, CERVONE, e Pasture. |
| |
| | SARVAGGIO |
| | Chesta è mpazzuta propeio! |
| | E ba, ca vuoje sta bella. |
| | VEJOLA |
| | Jammo; Dori’; accojetammola, |
| 945 | Ca si no more accisa. |
| | DORINA |
| | Uh poverella! |
| |
| | SCENA XII |
| |
| | SARVAGGIO, SERPILLO, ARMILLO, SIRVEIA, CERVONE, e Pasture. |
| |
| | SARVAGGIO |
| | È fatta la frettata: |
| | Locinna hà da morire |
| | SERPILLO - ARMILLO |
| | Ajemmene! |
| | SARVAGGIO |
| | A chesta Ddea sagrefecata, |
| | No nc’è autro, che dire. |
| | CERVONE |
| 950 | (Mo’ songo li delure.) |
| | SARVAGGIO |
| | Abbìa; Cervo’; co chisse; e aduna priesto |
| | Tutte ll’autre Pasture, |
| | Ca s’hà da fa conziglio. |
| | CERVONE |
| | Eccome lesto. |
| |
| | SCENA XIII |
| |
| | SARVAGGIO, SERPILLO, ARMILLO, e SIRVEIA. |
| |
| | SARVAGGIO |
| | Che ncuoccio! E de le toste! |
| | SERPILLO |
| 955 | Morire! e comme maje? |
| | ARMILLO |
| | Mori! |
| | SARVAGGIO |
| | Le ligge noste |
| | Chisto cca no le sa; ma tu le saje. |
| | È antico lo decreto: |
| | Chi jura pe sta Ddea, |
| 960 | E dapo’ non attenne, morejeto. |
| | ARMILLO |
| | Non sia maje, che soccea. |
| | SARVAGGIO |
| | Non sarrà, quanno vene, |
| | E se nguadeia co chisto. |
| | ARMILLO |
| | Ah! no: non voglio, |
| | Ch’essa mora pe mmene. |
| 965 | Se la nguadeie Serpillo |
| | SIRVEIA |
| | (Ajemmè? c’ha ditto chillo!) |
| | ARMILLO |
| | Io mme nne spoglio. |
| |
| | Pocca mperrata, e storta |
| | La sciorta |
| 970 | Va pe mme; |
| | Si mbe’, che lo delore |
| | Mm’aggia da fa crepà; |
| | Sia toja, la ceo a te. |
| | Sia toja, e chesta sia |
| 975 | Prova de vero ammore. |
| | Sarvà |
| | Locinna mia |
| | Co dà la morte a mme. |
| |
| | SCENA XIV |
| |
| | SARVAGGIO, SIRVEIA, e SERPILLO. |
| |
| | SARVAGGIO |
| | Mo’ sì, ca pò soccedere, |
| 980 | Ch’essa non mora; e tu, che sciale. |
| | SIRVEIA |
| | (O Dio!) |
| | SERPILLO |
| | E chesto se pò credere? |
| | SARVAGGIO |
| | Lo creo pe cierto. |
| | SIRVEIA |
| | (O affritto core mio!) |
| | Ne; Tata; ne, crodele, |
| | Na figlia; una, che t’amma avite a gusto; |
| 985 | Che bommeche lo fele? è buono? è ghiusto? |
| | SARVAGGIO |
| | Chisto non fa pe tene. |
| | SERPILLO |
| | Che nce faje, si sto core |
| | Non sta cchiù mpietto a mmene? |
| | SARVAGGIO |
| | Lo siente? |
| | SERPILLO |
| | N’è cchiù mio. |
| | SIRVEIA |
| | Ne? tradetore! |
| 990 | E mme puoje fa sto tuorto? |
| | Va, ca spero a sta Ddea, spero a li Ddieje, |
| | Che n’agge maje confuorto. |
| | Ch’agge a chiagnere tu l’affanne mieje, |
| |
| | Si’, crodele, si’ perro, si’ sgrato; |
| 995 | Sì, ca spero, che maje n’aggia Ammore |
| | Piatà de sso core; |
| | Comme tu n’haje piatate de me. |
| | Sì; core mperrato; |
| | Mancare non pò; |
| 1000 | Ca chesto nce vo’; |
| | Pecché sdigne chi more pe te. |
| |
| | SCENA XV |
| |
| | SARVAGGIO, e SERPILLO. |
| |
| | SARVAGGIO |
| | Lassame ghì co d’essa. |
| | Po nce vedimo. (E che scajenza è chessa.) |
| |
| | SCENA XVI |
| |
| | SERPILLO sulo. |
| |
| | SERPILLO |
| | Tu che nne dice, o Ammore? |
| 1005 | Sciorte, e tu, che respunne? ah! vao sentenno |
| | Cchiù buce int’a sto core, |
| | Che mme stanno a parlà; ma no le ntenno! |
| |
| | Sento, che banno, e beneno. |
| | La doglia e l’allegrezza, |
| 1010 | Che teneno |
| | Sto Core, |
| | Mo’ chino de docezza; |
| | E mo’ d’affanno! |
| | Cielo, c’hà da soccedere! |
| 1015 | Sto ntra la sciorte, e Ammore, |
| | Né saccio a chi cchù credere, |
| | Ma saccio qua delore |
| | Io sto scardanno. |
| |
| | SCENA XVII |
| |
| | VEJOLA, e DORINA. |
| |
| | VEJOLA |
| | Io creo, che no nce sia |
| 1020 | Cchiù ncocciosa de chessa! è no sciamarro! |
| | DORINA |
| | Haje visto, Zia mia! |
| | Haje visto, che catarro |
| | S’hà puosto ncapo? |
| | VEJOLA |
| | E ba, ca vo’ sta pace. |
| 1025 | Lo cortiello l’aspetta. |
| | DORINA |
| | Uh! mme despiace! |
| | E sarria male fatto, |
| | Ch’essa è bella e gentile |
| |
| | SCENA XVIII |
| |
| | SARVAGGIO, CERVONE e le stesse. |
| |
| | SARVAGGIO |
| | Io resto stopafatto! |
| | CERVONE |
| | Bonora! e nn’havè tanto a lo sottile! |
| | DORINA |
| 1030 | Vi’ Sarvaggio, e Cervone. |
| | VEJOLA |
| | Sarva’? |
| | SARVAGGIO |
| | Cca state vuje? Io so’ stonato! |
| | CERVONE |
| | Potta! e che tavolone! |
| | VEJOLA |
| | Chi? Locinna? |
| | SARVAGGIO |
| | È no cuorno speccecato! |
| | DORINA |
| | Chesto steamo decenno! |
| | VEJOLA |
| 1035 | Cierto, ch’essa è mpazzuta! |
| | SARVAGGIO |
| | Nc’è de cchiù; va sentenno, |
| | Ch’Armillo già a Serpillo ll’hà ceduta. |
| | VEJOLA |
| | Ne? ed essa |
| | SARVAGGIO |
| | Co na scorza |
| | Tanto doppeia e ncocciata! |
| | CERVONE |
| 1040 | È peo d’Ancuneia! |
| | DORINA |
| | E bo’ morì pe forza! |
| | VEJOLA |
| | Vi’ comme sta cecata! |
| | DORINA |
| | Nce penzo, e mm’assottiglio! |
| | CERVONE |
| | Nc’hà fatto schiattà ncuorpo a tutte duje! |
| | SARVAGGIO |
| | Mo’ se farrà consiglio, |
| 1045 | E quanno è morta po, salute a nuje. |
| | Mme stia bona Dorina, |
| | Sta popatella d’oro. |
| | CERVONE |
| | E pe mill’anne. |
| | DORINA |
| | (Mo’ torna st’ammoina!) |
| | SARVAGGIO |
| | Tu mo’ che ncintre a chesto? varvajanne! |
| | VEJOLA |
| 1050 | (Sempe llà lo guettone!) |
| | CERVONE |
| | Ncentro, pecché nce capo. |
| | SARVAGGIO |
| | Ah, brutto lazzarone. |
| | Tu te la vuoje sentì n’aperta ncapo. |
| | VEJOLA |
| | Via, Sarva’, fremma lloco. |
| | SARVAGGIO |
| 1055 | Comme vuje tu. |
| | DORINA |
| | (Che pazzo de catena!) |
| | Zia; redimmo no poco, |
| | Ch’a tutte duje le voglio da la mena. |
| | CERVONE |
| | Bonora! |
| | VEJOLA |
| | Nce lo bole. |
| | CERVONE |
| | Fuss’accisa. |
| | DORINA |
| | Levammo sto remmore, |
| 1060 | E chi meglio mprovisa, |
| | Sarrà lo popatiello de sto core. |
| | CERVONE |
| | So llesto. |
| | SARVAGGIO |
| | E co sso smocco |
| | Aggio da mprovesà? |
| | CERVONE |
| | Lo bedarraje. |
| | DORINA |
| | Meglio è, ca cierto haje vinto. |
| | CERVONE |
| 1065 | Mme mprovesejo na mola pe nsi a craje. |
| | SARVAGGIO |
| | Ora via, dammo dinto, |
| | Si’, bella; ca lo ciocco |
| | Si’ tu, che mme strascina; Oje: si’ poveto; |
| | Le Cetole addo’ so’? valle peglianno. |
| | CERVONE |
| 1070 | Stanno appese cca arreto. |
| | SARVAGGIO |
| | Curre; portale cca. |
| | CERVONE |
| | Mo’ vao volanno. |
| |
| | SCENA XIX |
| |
| | SARVAGGIO, DORINA, e BEJOLA. |
| |
| | SARVAGGIO |
| | Vi’, si è ommo, che pozza |
| | Mprovesà co sto fusto! |
| | VEJOLA |
| | Che bo’ fa? na cocozza! |
| | SARVAGGIO |
| 1075 | Aggio da fare cchiù pe te da gusto? |
| |
| | SCENA XX |
| |
| | CERVONE, co le Cetole; e li stisse. |
| |
| | CERVONE |
| | Vecco, ca so benuto; |
| | Chesta è la toja. |
| | SARVAGGIO |
| | Da’ ccane. |
| | CERVONE |
| | E tiene pede. |
| | SARVAGGIO |
| | Te te, ca mm’è resciuto! |
| | DORINA |
| | Via su, jammo sbrecanno. |
| | SARVAGGIO |
| 1080 | So lesto. |
| | CERVONE |
| | Mo’ se vede |
| | Chi meglio l’annevina. |
| | SARVAGGIO |
| | E laudammo, cantanno, |
| | La fammosa bellezza de Dorina. |
| |
| | Quanta cchiù nce nne so’ pe nsi’ a l’Antripete; |
| 1085 | Che de grazeja, e bellezza cchiù s’avatano |
| | Vecino a te so’ mascarune, e nzipete. |
| |
| | CERVONE |
| |
| | Bellizze so’ so’ ss’uocchie, che percantano: |
| | La grazeia e no prusutta, e mpietto sgottano |
| | Sempe shiamme nfocate, e frizze sparano. |
| |
| | SARVAGGIO |
| 1090 | Chiano: ssa rimma è fauza: |
| | Quanto haie ditto è sconniesso. |
| | VEJOLA |
| | Ah, ah! |
| | DORINA |
| | Che gusto! |
| | CERVONE |
| | Chesta a pilo nce cauza: |
| | Tutto quanto va justo. |
| | SARVAGGIO |
| | Lo guajo, che te stencina. |
| | CERVONE |
| 1095 | Portammola a l’arefece, |
| | E facimmo vedè si è fauza, o fina. |
| | DORINA |
| | (O! che spasso!) via su, jate cantanno. |
| | SARVAGGIO |
| | A sgottano e restato. |
| | CERVONE |
| | E ba joquanno. |
| | SARVAGGIO |
| |
| | Addove puose sso pedillo, sbottano |
| 1100 | Fontanelle ammorose, e mele sghizzano, |
| | E nce vanno li core, e se nn’abbottano. |
| |
| | CERVONE |
| |
| | Tu si’ tutta sbrannore, addo’ s’attizzano |
| | L’arme, ed a buonecchiune se nce sbozzano |
| | Li core ammante, e de docezza sghizzano. |
| |
| | SARVAGGIO |
| 1105 | Sghizzano, aggio ditt’io: |
| | Non puoje di’ comm’a mmene. |
| | DORINA |
| | (Che sfizeio bene mio!) |
| | VEJOLA |
| | È lo vero, gnorsine. |
| | SARVAGGIO |
| | Lo siente? |
| | CERVONE |
| | E chi mme tene, |
| 1110 | Che no lo pozzo dicere io porzine? |
| | SARVAGGIO |
| | Via, levammo sto nfietto |
| | DORINA |
| | No, no: n’antro tantillo |
| | SARVAGGIO |
| | E non siente, ca chillo |
| | Canta, e responne a ghietto? |
| | DORINA |
| 1115 | Meglio è pe te (che spasso!) |
| | CERVONE |
| | Le prode, ca l’appasso. |
| | SARVAGGIO |
| | Io mme lo nzonno, |
| | Ca le scasso sta Cetola a lo suonno |
| | Addove stammo? |
| | CERVONE |
| | A sbozzano. |
| | VEJOLA |
| | Via, susso. |
| | CERVONE |
| | A chesta rimma nc’haje da dà de musso. |
| | SARVAGGIO |
| |
| 1120 | Co tico; o bella Ddea, manco nce tozzano |
| | Le Ddee cchiù belle, e strevellate sbruffano |
| | E de raggia, e de mideia se smenozzano. |
| |
| | CERVONE |
| |
| | Pe te, da cca, e da llà le stelle abbuffano, |
| | E de la Luna, che se torce, e scotola, |
| 1125 | Vide pe te, che ncielo, e nterra fummano. |
| |
| | SARVAGGIO |
| | E la mmala sciaura, che te cotola! |
| | E bavattenne a cancaro. |
| | DORINA |
| | O Zia mia, che senzo nc’aggio avuto! |
| | VEJOLA |
| | Chisto è no spasso propeio! |
| | CERVONE |
| 1130 | Ne? mo’, c’aggio venciuto, |
| | Mme faje la lefrecaglia? |
| | SARVAGGIO |
| | Va t’abbotta de paglia, anemalone |
| | DORINA |
| | Che smorfeie corejose! |
| | SARVAGGIO |
| | Mme vuoje fa lo poveto, e si’ n’anchione! |
| | CERVONE |
| 1135 | Parlate vuje |
| | SARVAGGIO |
| | Ste cose |
| | Ncapo a te no nce traseno, |
| | Ca si’ no vozzacchione, ca si’ n’aseno. |
| | CERVONE |
| | A mme chesto |
| | DORINA |
| |
| | Via jateve a stojà |
| | Ch’io voglio pe marito |
| 1140 | Lo meglio pastoriello, |
| | Lo cchiù pulito |
| | E bello, |
| | Che stace pe dda cca; |
| | E lo voglio ì sceglienno, |
| 1145 | A gusto mio. |
| | Non voglio viecchie, e smocche: |
| | Sto suono no lo ntenno; |
| | Trovateve duje crocche |
| | Pe ve potè spassà: |
| 1150 | Ch’io aggio da scialà |
| | Co chi vogli’io. |
| |
| | SCENA XXI |
| |
| | SARVAGGIO VEJOLA, e CERVONE. |
| |
| | SARVAGGIO |
| | Vejo’! e mbe’? ch’è stato! |
| | VEJOLA |
| | Vecco cca chi nce corpa. |
| | SARVAGGIO |
| | Io già lo saccio. |
| | CERVONE |
| | Chella pe te ha parlato. |
| | SARVAGGIO |
| 1155 | Che buoje che te scafaccio; |
| | Lazzarone frustato? |
| | VEJOLA |
| | Ha parlato pe tene, |
| | Ch’a chisto le vo’ bene. |
| | SARVAGGIO |
| | Siente lloco? |
| | Si te veo n’autra vota |
| 1160 | Mpettoleià co chella, io te strafoco. |
| | CERVONE |
| | N’è lo ve’? (a Bejola.) |
| | VEJOLA |
| | Datte vota. |
| | SARVAGGIO |
| | T’aggio da zeffonnare. |
| | CERVONE |
| | Chiano li cuorpe |
| | VEJOLA |
| | Ad isso. |
| | Chella s’ha da pegliare, |
| 1165 | E nce penz’io. |
| | CERVONE |
| | Che nne vo’ fa de chisso! |
| | VEJOLA |
| |
| | A lo mmanco è speretuso, |
| | Saporito, |
| | Aggrazejato; |
| | Ma tu si’ no trevoluso, |
| 1170 | Spilacito, |
| | Sciaurato, |
| | Si’ no piezzo de ntò ntò. |
| | Chisto cca s’ha da gaudere; |
| | E tu muore, crepa schiatta: |
| 1175 | Va te piglia pe mogliere |
| | Na scajenza, che te vatta; |
| | Ca pe te chessa nce vo’. |
| |
| | SARVAGGIO |
| | Ll’haje sentuto; campierchio! |
| | CERVONE |
| | E ba, ca vuoje sta bello. |
| | SARVAGGIO |
| | E puro? ah! potta! |
| 1180 | Tu mm’appriette soperchio! |
| | VEJOLA |
| | Lassalo di’. |
| | CERVONE |
| | Tu no la faje ssa botta. |
| | VEJOLA |
| | È fatta; cride a mmene. |
| | CERVONE |
| | No nce vo’ cchiune. |
| | SARVAGGIO |
| | E porzì parle? |
| | VEJOLA |
| | E lesta: |
| | Chella stace pe tene. |
| | SARVAGGIO |
| 1185 | O bene mio! che contentezza è chesta! |
| |
| | O bella gioja, |
| | O nenna cara; |
| | Quanno sarrà? |
| |
| | VEJOLA |
| |
| | Chella è la toja, |
| 1190 | Cridelo a mme. |
| |
| | CERVONE |
| |
| | Brutta janara, |
| | Nc’haje gusto, ne? |
| | Niente nne cacce. |
| |
| | VEJOLA |
| |
| | Mo’ puoje crepà. |
| |
| | SARVAGGIO |
| |
| 1195 | Tu puoje crepà. |
| |
| | SARVAGGIO |
| |
| | Uh! quant’abbracce, |
| | Quanta vasille |
| | Le voglio dà! |
| |
| | CERVONE |
| |
| | Te ngarzapille: |
| 1200 | E sta vecchiumma |
| | Te vo’ abburlà. |
| |
| | SARVAGGIO - VEJOLA |
| |
| | Mo’ fa la scumma, |
| | Mo’ puoie schiattà. |
| |
| | CERVONE |
| |
| | Chesta se nzonna: |
| 1205 | Te fa mpastone; |
| | Te vo’ gabbà. |
| |
| | SARVAGGIO |
| |
| | Oie, pappa, e nonna |
| |
| | VEJOLA |
| |
| | Oie vessecone |
| |
| | A DUE |
| |
| | Sfratta da cca. |
| |
| |
| |
| |
