La mogliere fedele

La mogliere fedele, Napoli, A spese de lo Mpresario, 1724

a cura di Emanuela Esposito

paratesto Prologo ATTO PRIMO ATTO SECONDO ATTO TERZO Apparato

LA MOGLIERE FEDELE

Commeddia pe mmuseca. Da rappresentarese a lo Teatro Nuovo de la Pace a Primmavera de chist’Anno 1724. Addedecata a l’Accellentissemo Segnore lo Sio Conte Carlo-Manuele d’Altann nepote de S. Emeneza lo Sì Cardenale Michele Federico d’Altann Vecerré, e Capetanio Generale de sto Regno de Napole, &c.

Napole MDCCXXIV. A spese de lo Mpresario.

Accellentissemo Segnore.

Avennose d’aprire sto Teatriello p’agghiognere spassatiempo a sta Cetate, mo’ che stammo mpace pe grazia de lo Cielo, e pe prodenza de lo Mperatore, e Rre nuosto, che Dio nce lo sarva, e mantenca mill’anne; azzò che nuje non haggiammo frusciamiento da cierte dessutele, che non havenno né arte, né pparte se scriveno a la guerra, venimmo a li piede de V. Accell. a sopprecareve de protezzione, pe potè campà cojete, comme desederammo, havenno fatto apposta sto Teatriello a la Pace. Segnore Accellentissemo sta grazia nuje la sperammo da la Benegnetate Vosta, pocca ne site tanto leberale co tutte, e b’appresentammo sta primma Commeddiella, che nce facimmo, ch’è lo retratto de na povera Mogliere Fedele persecotata attuorto. Le femmene, e massema le nnorate, e nnocente meretano compassione, e favore a li travaglie lloro, e pe chesto tenimmo pe cierto, che da no Segnore tanto compassionevole, e ghiusto, comm’è V. Accellenzia sarrà compatura, ed ajutata co na tenutamente cortese, e graziosa. Degnateve sentì chello, che ddice de li guaje suoje, ca po essere, che ve piaciarrà, e nfra tanto nuje restammo co fareve omelissema reverenza. Napole li 15. Maggio 1724.

D.V.Accell.

Umelisseme, e Devotiss. Serv. Obbreg.

Pietro Farina, e Gnazio Manfrede.

A chi me fa piacere de leggere

Ciulla, mogliere de Titta, patrone de falluche, essenno tentata cchiù bote da no Messenese, chiammato Tonno Spenna, perché no mmoze maje acconzentire, sì perché era norata, comme pure perché amava tanto lo marito; chillo pe despietto le fece na mpostura a Titta, de lo quale era amico scorporato, decennole, ca la mogliere; le faceva mancamento co n’auto; pe la quale cosa Titta, che tanno haveva da ire a Spagna ncoppa a no bastemiento, se portaje co isso la mogliere; e quanno fuje rente Genoa co scusa, ca chella se senteva poco bona, mmiero sera la fece scennere dinto a no sghiffo pe farla ire nterra, consegnannola a lo stisso Tonno, azzò l’ammazzarasse a mmare. Tonno havutala mmano, le dette n’ato assauto spotestato, co dirle, ca lo marito la mannava a morire, ma che isso l’havarria sarvata, si lo contentava; e bolenno essa cchiù priesto morire, che mancare a l’anore sujo, tanto seppe fare co le ppregarie, e co lo chianto, che chillo sperato da lo Cielo, totore de la nnocenza, le deze la vita co patto, che maje cchiù comparesse a Nnapole, c’havarria isso ditto a lo marito d’haverela annegata, conforme fece. Titta tornato da Spagna a Nnapole, sparze voce, ca la mogliere ll’era morta a Genoa, e se nnammoraje de na fegliola chiammata Lella, nepote de Meo patrone de falluche, e da po quarche mmese se concrodie lo trattato de lo matremmonio, nfra tanto Ciulla, ch’era restata a Genoa, dapo’ na lonca malatia, c’happe pe la paura, e pe lo dolore, le venne voglia de tornare a Nnapole, pe bedè lo marito, e pe sapere, c’haveva fatto, che isso l’haveva voluto fa morire; e postase mmiaggio, se reteraje ncasa de na Vedola temporesca, che l’haveva allattata, e cresciuta, e da chessa sentije, ca Titta se steva nzoranno; e da cca accommenza la Commeddia, addove p’apesodio se ne’è nzertata na festa, che se sole fa a Nnapole, chiammata la Recatta ch’è na desfida de falluche a chi guadagna lo palio vocanno cchiù priesto. Lettore mio, si sto nzierto te dà frutte de gusto, spartimmoncille nziemo; caso che no, la collera sia la mia, e la pacienza sia la toja, senza che te mpigne a ghiodecarme, ch’è soperchia terannia affrijere cchiù chi stace affritto. Nquanto a le pparole Sciorte destino &c. tu già lo ssaje, ca portano scritto nfronte: Cchiacchiere de Pojete, e no sentemiento de Crestiano, comme io me protesto d’haverele; e co chesto covernamette, ed arrevederece, si la filannara de la vita non se fa cadè lo fuso, e me spezza lo capo.

LE PPERZUNE

MEO, Viecchio, Patrone de Falluche.

Lo Sio Francisco Ciampi.

CIULLA, Mogliere de Titta, creduta morta.

La Sia Giovanna Magnacaso.

TITTA, Patrone de Falluche, nnammorato de Lella.

La Sia Prizeta Alifiero.

LELLA, Nepote de Meo, promessa a Titta.

FONZILLO, Marenaro commeto, nnammorato de Lella.

NTREANA, Vedola jodiziosa, Mamma de Tenzella.

Lo Sio Carmeno d’Ambrosio.

TENZELLA, fegliola speretosa.

NARDULLO, alias SCONCIGLIO, Marenaro.

Lo Sio Giovanne Romaniello.

Coro de Marenare, c’abballano, e che bocano.

La Scena se fegne na Marina de Napole.

Museca de lo Sio Lonardo Vince, Mastro de Cappella Napoletano