| | |
| | |
| | La mogliere fedele, Napoli, A spese de lo Mpresario, 1724 |
| | a cura di Emanuela Esposito |
| |
| |
| |
|
| |
| | No morzillo de prolaco fatto da la Serena de Napole, che bene pe mmare ncopp’a no Carro tirato da duje Cavalle Marine, accompagnata da quatto Uommene Marine. |
| |
| | SERENA |
| | Fermammoce a st’arena |
| | Viecchie mieje graziuse, e ghiammo nterra; |
| | Ogge, che sto de vena |
| | De passiare Napole no poco, |
| 5 | Vogl’j a bedè no luoco, addo’ s’è fatto |
| | No Teatro noviello |
| | Pe farece cantà Commeddie nove; |
| | Ntrezzarce abballe, ed aute belle prove: |
| | Chillo è lo Tempio de la Pace, e chillo |
| 10 | È lo nuovo Teatro; io llà bogl’ire |
| | Pe gaudere, e sentire |
| | La Poesia de Napole, e la Museca |
| | Competere coll’aute de gusto; |
| | Io, che so’ la Serena de sto mare, |
| 15 | Tutto l’ajuto mio lo voglio dare. |
| | Vuje nfratanto pescate |
| | Ddo’ meglio le ttrovate, |
| | Perne, e coralle pe guarnì la connola |
| | Da parte mia a chella bella Nenna, |
| 20 | Che lo Cielo ng’hà data; |
| | A la Figlia, ch’è nnata a Carlo Sesto, |
| | Chillo, ch’è Giove nterra, e a Lisabetta, |
| | Che fa scuorno a Gionone; |
| | Io canto, e buje ballate a sto pontone. |
| |
| 25 | Bella Nenna, che si’ sciuta |
| | Comme Stella |
| | Chiara, e bella |
| | Sinche Tu la bemmenuta, |
| | Pe lo Munno conzolà. |
| 30 | Comm’all’Arba puozze fare, |
| | Che lo Sole |
| | Dà nce sole; |
| | Tu no Ninno haje da portare, |
| | Che la Gnora ng’hà da fa. (Serena se nne trase, e l’Uommene abballano, po se jettano dinto mare.) |
| |
| |
| |
| |
