La mogliere fedele

La mogliere fedele, Napoli, A spese de lo Mpresario, 1724

a cura di Emanuela Esposito

paratesto Prologo ATTO PRIMO ATTO SECONDO ATTO TERZO Apparato

ATTO PRIMMO

SCENA PRIMMA

TITTA, che da coppa no barcone tene mente a mmare.

TITTA

Quanto trica a spontare sta falluca,

Che porta Lella mia; ed Io cca stento

Già la raggia me zuca,

Pocca n’anno me pare ogne momento.

Fosse chesta, che bota, e nterra sta?

Me pare, ch’essa sia

O Titta allegramente, chesta è essa,

Va scontra Lella toja, curre a la mpressa.

SCENA II

MEO, LELLA, e SCONCIGLIO, che benono co na falluca.

MEO

Arrieje, arrieje, sepponta sso vracciullo,

Zompa nterra Nardullo,

Mantiene la falluca. Scinne Lella,

Sta attiento, zompa chiano.

SCONCIGLIO

Che non cadite, dateme la mano.

LELLA

Non c’è paura, che so’ peccerella?

SCONCIGLIO

(O bene mio, che mano tennerella.)

MEO

Fegliule jatevenne: ed allestite

Ssa falluca pe fare la recatta,

Attiente, ca, mo’ venco;

Faciteme trovà la cosa fatta.

LELLA

Ne Zi Meo, che bo’ di’, ca no nc’è Titta?

MEO

Mo’ steva a lo barcone.

Mme credo, ca mo’ scenne. Oh teccotillo.

SCONCIGLIO

Cordola mia, mo’ vene lo cardillo.

SCENA III

TITTA, e li stisse.

TITTA

Sinche la bemmenuta

Stella Dejana mia.

LELLA

Tu ben trovato,

Schiecco de st’uocchie mieie.

TITTA

Comm’haje trecato?

LELLA

Mamma sta poco bona, e io so’ benuta.

Pe darte gusto cchiù, che pe la festa;

Ma se fa la recatta?

TITTA

E comme? È lesta.

MEO

Pe te dare sto spasso

Facimmo sta pazzia.

SCONCIGLIO

E tu sia Lella mia,

Nce volive pe fare la cchiù bella,

Perché nne si’ lo sciore, e la mortella.

LELLA

Ah a, staje bravo alliegro stammatina.

SCONCIGLIO

Saje perché? c’haggio visto

La Fata mmeriana;

L’addore de na femmena me sana.

MEO

Orsù fegliola, saglietenne ncoppa,

Ca mo’ venco; Nardullo jammoncenne

A fa le ccose noste; apparecchiammo

Quanto nce vo’ pe sta recatta.

SCONCIGLIO

Jammo eh sia Lella, sia Le’.

LELLA

Che buo’ Nardullo?

SCONCIGLIO

Vuoglieme bene a Titta; già lo ssaie

Ca me ll’ haggio cresciuto a cetrolella.

TITTA

Va pazzo, va t’aggiusta le ccerevella.

Lella mia.

LELLA

Titta caro.

TITTA

Che dice mamma toja? Quanno vole

Che nguadejammo?

LELLA

Quanno vo’ Zi Meo.

TITTA

Ma Zieto no la sbriga, ed Io me struio,

E quanto cchiù l’appretto, fa cchiù ppeo.

LELLA

Ma che buo’, che nce faccia?

Parlà non me commene,

Tu, che si’ ommo, parla tu pe mmene.

TITTA

Fenuta chesta festa, io lo metto

Co le spalle a lo muro, azzò nce sbriga.

LELLA

Fa chello, che te pare.

TITTA

Saglietenne; e chi t’ama sacce amare.

LELLA

Sì ca t’amo speranza mia bella

Quanto pote sto core cchiù amà.

TITTA

Sì ca pato belleza mia cara,

Quanto pozzo patì cchiù pe te.

LELLA

Tu si’ l’arma, e la vita de Lella,

Senza l’arma pò Lella campà?

TITTA

Tu lo sole, che st’uocchie reschiara,

100

Senza Sole pò Titta vedè?

SCENA IV

CIULLA, e NTREJANA mmocca la porta.

NTREANA

E ghiesce no tantillo, che cos’haje?

Piglia no poco d’aria

Ciulla mia, non t’addà tanta a li guaje.

CIULLA

Ah Ntrejana mia cara, mamma mia,

105

Lassame sta, pozz’esse canosciuta.

NTREANA

E chi te vo’ canoscere fegliola?

S’io che t’aggio cresciuta,

Quanno te vidde, non sapea chi jere?

E po cca nce credimmo, ca si’ morta

CIULLA

110

Lo bolesse la Sciorte,

Che fosse vero, ca non patarria

Chesto che pato.

NTREANA

Non te sconfedare,

Lo Cielo sempe ajuta la nnocenza,

Ma nce vonno a li guaje tiempo, e pacienza.

CIULLA

115

Che tiempo vuoje c’aspetta,

Si ll’acqua è ncanna; e Titta mio se nzora

Nfra poche juorne, comme tu m’haje ditto.

NTREANA

Chesto, soccedarria, s’io non sapesse,

Ca tu si’ biva, e Titta t’è marito.

CIULLA

120

E ca lo ssaie, che pe chesto?

NTREANA

Eh zitto;

Lassa fa a chi sa fare; haggio penzato,

Comm s’hà da guastare sto pegnato.

Nch’è benuta la Zita

Pe bedere la festa,

125

Io mm’appresento lesta,

Le canzonejo lo tutto,

E chiarimmo accossine sto frabutta.

CIULLA

Ntrejana non faje niente, e tu m’accide;

Ca me scoprisce a Lella, che guadagne?

130

Farraje che non se nguadia Titta mio;

Ma Titta si lo ssape, ca so’ biva,

Trovarrà n’auta via pe me scannare.

NTREANA

Oh, ca mo’ staje a Napole, e no a mmare:

Sautammo chisto fuosso

135

Co ffa, che non soccea sta parentezza;

Ca po dell’auto lassa fa a la Sciorte,

Tu staje co mmico, e lloco sta la corte.

SCENA V

TENZELLA, e le stesse.

TENZELLA

Mamma ma’

NTREANA

Tu si’ scesa, o cana perra

Io non t’haggio mannata,

140

Ch’aspettasse la Zita, e po venisse?

TENZELLA

E la Zita è benuta, ed io so’ scesa.

NTREANA

È benuta.

TENZELLA

Mo’ nnante.

NTREANA

E chi nc’è ncoppa?

TENZELLA

La Vava, e la crejata.

NTREANA

Buono, buono

Non perdimmo lo tiempo, trasetenne

145

Ciulla mia, statt’allegra.

CIULLA

E pe che fine.

NTREANA

Ca mo’ saglio, te servo,

E t’ammaturo chisto suorvo aciervo.

So’ ppassara vecchia,

E faccio lo nido

150

Nche muodo se fa;

No cchiù sosperà

Ca be’ mme confido

De farte gaudè.

Me prode st’aurecchia

155

A a, chist’è signo,

Ca venco lo mpigno

T’agghiusto quatt’ova,

Mo’ vide che prova

Farraggio pe tte.

SCENA VI

CIULLA, e TENZELLA.

CIULLA

160

Tenza che ddice? Trovarraggio maje

Remmedio a tanta guaje?

TENZELLA

Non dobetà sia Ciulla, ca nc’è mamma

Mmescata a ssa facenna; ed essa sape,

A cuoppo cupo quanto pepe cape.

CIULLA

165

Haje ditto niente a Lella,

Ca so’ biva?

TENZELLA

Ah maramene, none.

CIULLA

Ne lo di’ a nullo.

TENZELLA

Guarda, che so’ pazza?

CIULLA

Di’, ca te so’ commare a chi te spia.

TENZELLA

Non me mparare a dire la boscia.

CIULLA

170

Dimme, la Zita è bella?

TENZELLA

È bella, e aggraziata,

E comme na signora sta parata.

CIULLA

Sciorta chesto de cchiù? Tanta nnemice

Haje nzerretato contra st’arma mia

175

Sdigno, amore, bellezza, e gelosia.

Povera pecorella

Sto mmiezo a tanta lupe;

Cca sciumme, e cca scarrupe;

Che cosa pozzo fa.

180

Oddio, ed a qua’ stella

Si’ nnata sbentorata

Che bide, chat’accide

Chi t’ave da sarvà. (Saglie desperata.)

SCENA VII

TENZELLA, e po SCONCIGLIO.

TENZELLA

Ora vide a che mbruoglio

185

Se trova chesta scura,

E no mmore de collera, e paura!

SCONCIGLIO

È llesto, è llesto; lassa fare a mene. (da dinto.)

Vi’, che golio le vene a Patro’ Meo (fora.)

De farme fare a me lo roffeano!

TENZELLA

190

(Uh veccote Sconciglio.)

SCONCIGLIO

E che è lo ppeo,

S’è nnammorato de Tenzella mia;

Va ca staje frisco, già la cosa è fatta.

Tu faje guardà lo pesce da la gatta. (ride.)

TENZELLA

Sconciglio pecché ride?

SCONCIGLIO

Oh, cca tu staje

195

Porpessa de sto core? non saje niente?

TENZELLA

Che cosa?

SCONCIGLIO

Cartafauza m’ave ditto,

Ca te vo’ pe mogliere,

E bo’, che parla a mammeta.

TENZELLA

Addavero?

SCONCIGLIO

Ncoscienzia.

TENZELLA

200

Cartafauza a mme bole?

Ah a, che risa.

SCONCIGLIO

Tu mo’ ride, ed io schiatto.

TENZELLA

E pecché Ninno mio?

SCONCIGLIO

Uh chi lo ssape,

Che fa pe te pigliare.

TENZELLA

Co ccarte fauze no mmogl’io jocare.

SCONCIGLIO

205

E si mammeta vole?

TENZELLA

Non mmogl’io.

SCONCIGLIO

Mo’ se vede, che faje?

TENZELLA

Statt’a bedere.

Di’; che me venc’attuorno, ca ng’hà gusto,

Ca le nchierchio le ddoghe de lo fusto.

SCONCIGLIO

Ed io pe l’agghiustare la cocozza,

210

Lo porto all’Incorabole ncarrozza.

TENZELLA

Ora dimme na cosa?

SCONCIGLIO

Va dicenno.

TENZELLA

Chi voca a la recatta?

SCONCIGLIO

So’ pparicchie.

Nc’è Titta, c’hà sparmata la falluca,

E Fonzillo la soja; nce so’ ciert’aute,

215

Cartafauza mo’ è ghiuto

Pe s’allestire, c’have na speranza

De guadagnà lo palio, e darlo a ttene.

TENZELLA

A mme lo palio a mene?

SCONCIGLIO

A ttene, a ttene.

Che d’è? n’è faccie chessa

220

D’avere ciento palie?

TENZELLA

Uh che scheressa!

SCONCIGLIO

Scheressa? manna crapa, ed oje lo bide,

Si ll’haje; e te lo dà Sconciglio tuo.

TENZELLA

Comme? Tu puro vaje a la recatta?

SCONCIGLIO

Tanto bello; Nuje simmo seje compagne

225

Ncoppa a na castaudella,

Ch’ng’havimmo affettata; e tutte seje

Simmo tanta leiune, che scapammo

Co lo sciato sto mare,

E lo palio volimmo guadagnare.

TENZELLA

230

Tieme’, che bella cosa! E staje securo

Ca lo vince?

SCONCIGLIO

Pe cierto, è cuotto, è fritto

Ed a tte lo regalo, t’haggio ditto.

TENZELLA

Sinche lo bemmenuto co sta nova,

E cchiù meglio menuto po sarraje!

235

Si puorte lo presiento;

SCONCIGLIO

E cche me daje?

TENZELLA

So’ ppovera fegliola,

Non haggio, che te dare:

Tenco sto core sulo,

Si tu lo vuoje fegliulo,

240

Stienne sta mano cca;

Te pigliatillo.

SCONCIGLIO

Oh bon ora, e che chiappo, che me mette!

TENZELLA

Ma damme sta parola

De no lo strapazzare,

245

Ch’è troppo tenneriello;

St’attiento cacciottiello,

Non me fa desperà,

Covernamillo.

SCONCIGLIO

E ba scappa si puoie da sto mastrillo.

250

Seppe mo’ so’ barato;

Chesta m’hà già ncroccato

Co li squasille suoie; Mo’ m’abbesogna,

P’attennè la promesa

O che benca lo palio, o faccia spesa

255

Le femmene so’ fatte

Comm’a lo grattacaso,

Che quanto cchiù nce gratte

La provola, lo ccaso,

Cchiù te lo ba strodenno;

260

Ad essa la mollica,

E a te la scorza.

Così fa na fegliola,

Che quanno tu nce tratte

O criepe, o abbutte, o schiatte,

265

T’ha da sciccà na mola,

Né la puo’ ì foienno,

Ca quanto cchiù se trica,

Se fa cchiù afforza.

SCENA VIII

NTREANA, e LELLA mmocca la porta soja.

NTREANA

Tu mo’ m’haie ntiso chello, c’haie da fare?

LELLA

270

T’haggio ntiso, no cchiù; ma resto pazza.

Titta hà mogliere, e me vo’ zanneiare.

NTREANA

Se crede, che sia morta.

LELLA

Tu comme saie, ch’è biva?

NTREANA

Che te mporta?

Vasta, che lo sacc’io.

LELLA

Aimmè che sento

275

Quanno me credo d’esse mmaretata

Me vedo coffeiata.

Ma chi vo’ comparire pe lo munno?

NTREANA

C’haie fatto qua sbreguogno? O si tu sola

Che faie l’ammore, e po la parentezza

280

Quanno se stregne, sciosciala ca vola?

LELLA

Ma comm’haggio da fa, ca mpiett’a mmene

Titta se nc’è nchiovato?

NTREANA

Te manca nnammorato?

No chiuovo caccia ll’auto; nc’è Fonzillo

285

Che mpazzesce pe ttene.

LELLA

E sempre chisto

Me vruociole pe nnante, t’haggio ntesa:

Pe l’aiutà, sta bella rezza haje stesa.

NTREANA

Che rezza? co chi ll’haje? Tu parle sparo

Ciulla tu la canusce?

LELLA

La canosco.

NTREANA

290

Ed io nnante sta sera,

To nce faccio parlare, e tanto vide,

Si è biva, o morta, pocca no mme cride

Ah zitto ca mo’ vene, st’a sentire

Comm’haje da dire, e chello, ch’haje da fare.

LELLA

295

Ntreana iammo dinto si te pare.

SCENA IX

TITTA, che scenne da la falluca, e le stesse, ch’esceno fenuta la mez’aria de Titta.

TITTA

Bella sciamma de sto core.

Esco mo’ da dinto mare.

P’abbrusciare nnante a te. (esce Lella co Ntreana.)

Oh vecco Lella mia.

300

Schiavo bellezza co la compagnia.

NTREANA

Sio Titta mio benvenuto.

LELLA

Addio. (de mala grazia.)

TITTA

Addio! che bo’ di’ chesto? m’haie trovato

Che stea scocchiarejanno lo pegnato? (Lella fegne iresenne, e Ntreana la tene.)

NTREANA

Chesto non sia pe ditto

305

Vi’ ch’è mala creanza figlia mia.

LELLA

E lassame Ntreana, hagg’auto ncapo.

TITTA

Gioia mia, che d’è chesto? ch’aggio fatto,

C’accossì me recive?

NTREANA

Non è niente.

È na chiomera, che s’ha posta ncapo.

TITTA

310

E che d’è sta chiomera, va decenno. (a Ntreana.)

NTREANA

Dincello tu sia Lella!

LELLA

Aimmè lo core;

E lassamenne ì, lassa.

TITTA

Sia Lella,

Non so’ ommo, che mmereto sti ncuntre;

Se pò sapè che d’è, che staie schiattosa?

315

Priesto mo’, comm’è tosta! Vi’ che cosa!

LELLA

Vi’ che ccosa? ne forfante,

Co ssa faccie fresca fresca

Tu mme viene pe da nante

Pe tornarme a coffià?

320

Co che bella mmesca pesca

Si’ benuto tradetore?

Arma, vita, gioia, core

No ng’abballo cchiù a ssa danza,

Va te mpara de creanza,

325

E po vieneme a parlà.

SCENA X

NTREANA, e TITTA.

TITTA

Ntreana mia, che è chesto?

Sonch’io, o non sonch’io? e chesta è ella?

NTREANA

È ella, chi vo’ essere?

TITTA

E che have.

NTREANA

Non saccio chi l’ha ditto

330

Ca mogliereta è biva

TITTA

Oh chest’è bella:

Chella è già fatta terra, ha chiù de n’anno;

No m’hà visto portà porzì lo lutto?

NTREANA

Nce ll’haggio ditto, ed essa m’ha respuosto,

Ch’è bivo, e tu te cride, che sia morta.

TITTA

335

Comm’è biva? si quanno iette a Spagna,

Me la portaie co mmico, e morze a Genoa.

NTREANA

E la vediste morta?

TITTA

Io l’atterraie.

NTREANA

(Ah mbroglione bosciardo) e Lella dice,

Ca nc’è chi l’ha veduta, e ng’hà parlato.

TITTA

340

Chisto starrà mpazzuto; o chesta è scusa.

NTREANA

È scusa, è scusa, me ne so’ addonata.

Ma chesto poco mporta, io tenco mmano

N’auta quaglia pe tte.

TITTA

Po se ne parla:

Voglio vedè ch’è chesto; e si quarcuno

345

L’ha ditto pe mme fare n’ancarella,

O marisso, ch’è nato,

E peo la mamma soia, che l’ha fegliato.

NTREANA

Figlio mio vi’ che faje.

TITTA

Che m’è socciesso!

Va Ntreana.

NTREANA

Haggio posta già na zeppa,

350

E mo’ vago a mpeca n’aute rechieppa.

TITTA

Che faccio, addo’ me voto, e qua è lo capo

Pe sbrogliare sto gliuommaro guastato?

Quanto cchiù penzo, cchiù me veo mbrogliato.

Mo’ so’ fatto no vasciello,

355

Che no piezzo ha veleiato,

Ma po mmeste, e se sfracassa

Nche lo puorto vo’ piglià,

Quanto tiempo sto cerviello,

P’havè Lella, ha navecato,

360

E la Sciorte me n’arrassa,

Mo’, che stea pe l’abbraccià.

SCENA XI

FONSILLO, e NTREANA, e duje Marenare appriesso.

FONZILLO

E lassateme j, ca mo’ mmo’ torno (da dinto.)

Addove si’ Ceccone:

Mietteme lo tennale a la falluca

365

Co la bannera a poppa: E tu va piglia

Li rimme nuove, e miettece li struoppole

Gagliarde, e nuove fatte; sta ncerviello,

Si non mmuo’, che t’ammacco sso scartiello

Ntreana stamm’a nue, scumpe sso riesto.

NTREANA

370

Fortuna toja, che t’haggio mo’ trovato;

Non perdere cchiù tiempo, parla a Lella,

Dille, ca Ciulla è biva; e accossì Titta

Se pò annettà li diente.

FONZILLO

Io le vao a parlà, ma no mme sente.

NTREANA

375

Oh ca la truove mo’ d’autra manera;

Veccola llà, va curre, (Compare Lella a la porta.)

Sacce di’, sacce fare

Po vieneme a trovare. (Fegne j a la casa soja.)

SCENA XII

LELLA, e li stisse.

LELLA

Ah Ntreana, Ntreana?

NTREANA

Che nc’è Lella?

LELLA

380

Sienteme na parola.

NTREANA

Mo’ mmo’ venco,

Ca vao de pressa, vi’ che bo’ Fonzillo. (trase.)

FONZILLO

Sia Lella, ve so’ schiavo.

LELLA

Benvenuto

Che v’haggio da servire?

FONZILLO

A me servire?

M’havite da fa grazia.

LELLA

Che bolite?

FONZILLO

385

Ah, ca troppo vorria,

Ma sonco sfortonato, e tremmo tutto,

Che no mme dice no.

LELLA

Si se pò fare,

Ve servo, pecché no; jate decenno.

FONZILLO

Sia Lella è quase n’anno

390

Che me strudo pe tte, comme se squaglia

La catramma a lo ffuoco, e sale all’acqua,

Te so’ benuto appriesso,

Comme no cacciottiello a la patrona,

E tu sempe stizzata

395

M’haje coll’uocchie chest’arma ntossecata.

LELLA

Me potive scosare,

Perché sto core ll’haggio dato a Titta.

FONZILLO

Ma si Titta è nzorato,

No nce pierde sso core?

400

Lella mo’ che lo ssaje, cagna st’amore.

LELLA

Comme nzorato? Non se sa ch’è bidolo.

FONZILLO

Accossì nce credeamo,

Ma la mogliere è biva.

LELLA

E chi l’hà ditto

E si chesso è boscia.

FONZILLO

405

Quanno passo da cca dimme, che buoje,

Famme scannare nnante a sso pontone;

Te perdono da mo’, ca n’haje raggion.

LELLA

Lassamenne nformare, e si è lo vero,

Prometto d’esse toja; si no, cojetate,

410

Ca nce pierde lo tiempo, e le pparole;

Io voglio Titta, ed isso Lella vole.

FONZILLO

Me contento, e lo ssaje?

LELLA

Te lo pprometto

Da fegliola norata,

E si te manco mora sbregognata.

FONZILLO

415

Fra li sciure de chesta speranza

Io m’addormo ciardino d’amore,

E lo core, che suonno se fa.

Nch’è lo tiempo, e stascione s’avanza,

Da li sciure a li frutte venimmo;

420

E starrimmo contiente a scialà. (Se ne va.)

LELLA

Tu terzie na primera.

O chiagne a Bierno, o ride a Primmavera.

SCENA XIII

MEO, e TITTA pe strata.

MEO

Aspettame cca mmocca, ca mo’ saglio,

E bedo ch’è sto mbruoglio.

TITTA

Scinne priesto,

425

E sacce di’ a Nepoteta.

MEO

Mo’ venco,

Ma statte allegramente, ca n’è niente;

Sarrà qua scherebizzo de figliola,

Ca le vene, e le passa nduje momente

Ma tu che cosa haje fatto?

TITTA

Niente, niente.

MEO

430

Havisse sgargeato da cca ttuorno

Qua ffegliola de chesse?

TITTA

Chi nnà biste?

MEO

E ba, ca sta fraschetta

Te vo’ dà qua mmartiello pe pazzia.

TITTA

Ma chisto non è muodo d’abburlare,

435

Chesta è la via de mme fa crepare.

MEO

Tu si’ fegliulo ancora, Titta mio

E non saje ca le zzite so’ schiattose;

Co la fremma s’agghiustano ste cose.

Na jommenta polletrella

440

Sempe sta co l’arbascia;

N’abbesogna, che te stizze,

Si te fa qua’ mpertenenza;

Ca lo tiempo, e la pacienza,

Le ffrunnelle, e li carizze

445

Te la fanno po addomà

Accossì fa na zetella,

Ch’hà la zzirria, e la pazzia;

Ncronna, ncoccia; fa despiette,

Te fa sta dint’a lo ffuoco;

450

Tu va chiano, a ppoco, a ppoco,

Nche a la sella po t’assiette,

Tanno fruscia a speronà.

SCENA XIV

TITTA, e TENZELLA co CIULLA a lo barcone.

TITTA

Vi’ che scajenza è chesta? sa do’ è sciuto,

Ca moglierema è biva?

455

E no l’accidarria tremilia vote?

A me, che non haveva

Aut’uocchie, che li suoje, sto mancamiento?

TENZELLA

No fa cchiù sto spremiento,

Fa comme dice mamma, jesce fora.

CIULLA

460

Facimmo comme vole;

Tieme’ che baja è chesta,

Adacquammo ssa testa.

SCENA XV

NTREANA abbascio, e li stisse.

NTREANA

Già stanno a la loggietta,

Voglio vedè de fa na machenella.

TITTA

465

Quanto trica zi Meo!... Uh te, chi è chella?

NTREANA

(Già l’hà vista) si Titta

Che nova nc’è?

TITTA

Me sonno,

O sto scetato? chella pare Ciulla

O Ntreana, chi è chella?

CIULLA

(Ah Titta mio.)

NTREANA

470

È na commare mia.

TITTA

Pare Moglierema.

NTREANA

Tu n’haje ditto, ch’è morta?

TITTA

Si non fosse

Che è macelente, ed hà le ttrezze negre,

Mo’ deciarria, ch’è essa.

NTREANA

Lo bolesse lo Cielo.

TITTA

(Non sia maje.)

CIULLA

475

(Si mme vuo’ morta, tu m’accidarraje.)

NTREANA

Chesta è chella fegliola, c’haggio ditto,

Che pe tte sarria bona,

Tanto cchiù, ch’assemmeglia a Ciulla toja.

TITTA

E pecché l’assemeglia, no mme piace.

NTREANA

480

Comm’a di’? n’era bella Ciulla toja?

TITTA

Lassammo sta li muorte; mettarria

Nova refosa a la schiattiglia mia.

SCENA XVI

MEO, e li stisse.

MEO

Ntreana viene cca.

NTREANA

Che nc’è zi Meo

MEO

Viene co mmico, t’haggio da parlare,

TITTA

485

E la resposta mia?

MEO

Tu già la saje.

Me mmaraveglio assaje de fatte tuoje,

Ca si’ nzorato, e faje le guattarelle,

Pe ghire zannejanno le zitelle.

TITTA

Viene cca, viene cca

MEO

Vatte connio,

490

Ca si niente me vota lo senapo,

Piglio no rimmo, e te lo rompo ncapo.

Jammoncenne Ntreana.

NTREANA

Collecienza

TITTA

Va fa chello che buoje.

NTREANA

Haggie pacienza.

TITTA

E una, e una doje, scumpe Fortuna,

495

E che sonco de lota, che me piglie

A zeffonnà co tanta crepantiglie?

SCENA XVII

TENZELLA, e CIULLA da la porta.

TENZELLA

Se ne so’ ghiute tutte, jesce, jesce.

CIULLA

C’haggio da scire a fa? fuorze ca trovo

Maritemo accojetato; o nc’è quarcuno,

500

Che me derrupa a mare,

Pe fareme accojetare?

TENZELLA

E che cos’haje co desperarte tanto?

Ssi guaje, e sse scajenze

No durarranno no, comme te pienze.

CIULLA

505

Comme vonno scompì, Tenzella mia,

Si stanno a frisco a frisco pe sguigliare?

Haje ntiso Meo, ch’hà ditto a Titta mio?

TENZELLA

Chesto è buono pe tte, ca de sto muodo

Se scompono ste baje,

510

E co Tittillo tujo scialarraje.

CIULLA

Se scompono ste baje? Ah sore mia,

Titta è ncocciuso, ne vorrà bedere

La fine; e senza sanco non fenesce

Sta cosa, cride a mmene;

515

Ed io sempe starraggio into a le ppene.

So’ n’affritto rescegnuolo

Da la vipera nciarmato,

Che restato senza vuolo,

Se lamenta,

520

Zompa, e stenta

Pe sarvarse; ma non pò.

Accossì è chest’arma mia,

Da la Sciorte percantata,

Vo’ foì la negrecata,

525

Ma non pote; o ddo’ s’abbia,

Trova chello, che no mmo’.

SCENA XVIII

TENZELLA, e SCONCIGLIO da viecchio co no capo purpo, na cannuccia, e stromiente da pescare.

TENZELLA

Maressa che piatate, che ne sento;

Sempe a fa no lamiento?

Ma chi è chisto che bene arravogliato?

530

Havarrà la terzana lo sguajato.

SCONCIGLIO

Pe fa meglio la spia a Cartafauza

Che benarrà pe festeggià Tenzella,

So’ benuto accossì; Mo’ cca me chianto,

E me metto a pescare. Uh cca sta essa

535

No me voglio scoprì, ca co sta spoglia

Pozzo vedere, si me fa qua mbroglia.

TENZELLA

Cca se mette a pescare sto sciaddeo!

Ddo’ sempe nc’è l’allanca;

Qua pperchia, o qua bavosa no le manca.

SCENA XIX

MEO, e li stisse.

MEO

540

Ora già l’haggio fatta, o bona, o trista

Lo ffuoco se l’ha bista,

Ntreana m’ha promisso

De dareme Tenzella;

Ed io pe d’essa donco a Fonzo Lella,

545

Ah a, cca sta la gioja, mo’ nc’è la festa.

Schiavo tujo ceceniello de sto core.

TENZELLA

Sinche lo bemmenuto affoca gatte.

MEO

Comme? accosì me chiamme cacciottella.

TENZELLA

Io non te faccio tuorto,

550

Perché si’ tutto spine, e sicco, e stuorto.

SCONCIGLIO

(Chisto è lo primmo ntinno dell’alluorgio

Trotta canzirro, ca mo’ vene ll’uorgio.)

MEO

Tenzella, sempe t’ascio de sto muodo,

Co ss’uocchie carestuse? e cche cos’haje?

555

Votate ccane tremmolella mia,

Seccetella addorosa.

TENZELLA

Tu si’ na raja petrosa,

Né faje pe mmene, ammarcia pe sso tuosto.

MEO

Quanto cchiù me descaccie, io cchiù m’accosto.

TENZELLA

560

Ah bene mio, che frusciamiento è chisto

Se pò sapè che buoje?

SCONCIGLIO

(Bravo Tenzella,

Te strodarria de vase ssa manella.)

MEO

E che boglio volè? ssa bella grazia,

Tregliozza cannaruta.

TENZELLA

565

Che grazia vaje cercanno?

C’haje da essere mpiso

Cestunia mia de mare?

MEO

E no cchiù m’affocare co sse nciurie

Core de pesce cane; tu non saje

570

Ca me sarraje mogliere, quanto primma.

TENZELLA

Addavero?

MEO

Addavero.

TENZELLA

E chi l’ha ditto?

MEO

La mammarella toja.

TENZELLA

L’aggio a gusto.

MEO

Eh, siente n’auta cosa; la recatta

La faccio fa pe ttene; ca lo palio

575

Ha da esse lo tujo, perché tu puorte

Lo palio de le belle,

E farrimmo schiattà sse moccoselle.

TENZELLA

Bene mio quanta cose! ed io sciaurata,

Non ne sapeva niente; e giacch’è chesso,

580

Mejuccio mio, statte allegramente,

Ca volimmo fa ridere la gente.

MEO

Uh preziosa mia, musso affatato,

E me vuo’ bene?

TENZELLA

Sine.

MEO

E perché mo’ m’haje ditto

585

Tanta brutte parole?

TENZELLA

Me credeva,

Ca m’abborlasse.

MEO

Arrasso sia, che dice,

Io pe tte dint’all’acqua piglio fuoco.

SCONCIGLIO

(Vi’ comme lo carrea a ppoco, a ppoco).

TENZELLA

Orsù vattenne mo’, c’haggio da fare.

MEO

590

Ma nnante, che te parte

Dimme quatto parole nzoccarate.

TENZELLA

Quanta ne vuoje.

SCONCIGLIO

(Che llocco nzanetate.)

TENZELLA

Cianciuso bello bello

595

Nennillo aggraziatiello,

Si’ pproprio accuonciolillo

Pe stroppejare Ammore

Ah mamma mia lo core,

Co ss’uocchie me frezzije,

600

No cchiù, votate llà.

MEO

Bene mio comm’è doce! torn’a dire.

SCONCIGLIO

(Tutta la storia proprio vo’ sentire.)

TENZELLA

O scuoglio de lo ssale,

E comme non haje scuorno,

605

De farme sto taluorno?

Va miettete l’acchiale.

Va mmirate a lo specchio,

No mi’ ca tu sbarije?

Vi’ che se vo’ nzorà.

SCONCIGLIO

610

Cu, cu, curubbà,

E lo viecchio, che face l’ammore

Quanta buffe, che bol’abbuscà.

MEO

Co cchi parle tun’auto?

SCONCIGLIO

Parlo sulo.

MEO

Vavattenne da lloco

SCONCIGLIO

Cca sto buono.

MEO

615

Vuo’ che nce venco lloco.

SCONCIGLIO

Cca sto buono.

MEO

Va pesca a n’auta banna.

SCONCIGLIO

Cca sto buono.

MEO

Ah lazzaro briccone, aspetta, aspetta.

SCONCIGLIO

Va viene ca t’aspetto, e cca sto buono.

MEO

E manco te nne vaje, o t’ammasono. (Cca Meo afferra Sconciglio, e chillo se lo strascina a mmaro, ddove se secutano ngioriannose, e Tenzella ch’esce decenno.)

TENZELLA

620

Oh bene mio che botte! Ah, a, che riso.

MEO

Si non te scanno, che pozz’esse acciso.

SCONCIGLIO

Oh, oh, oh, Cartafauza fa l’ammore.

MEO

Eh sì ca non t’arrivo caparrone,

E te ne faccio sauza.

SCONCIGLIO

625

Curre cca, curre cca, oje Cartafauza.

TENZELLA

Chesta sì, ch’è commeddia,

E se pote pagare no docato;

O Cartafauza mio nce si’ ncappato.

MEO

Lazzarone.

SCONCIGLIO

Patro’ mio.

MEO

630

Va connio.

SCONCIGLIO

Mo’ mme ne vavo.

MEO

Haje raggione.

SCONCIGLIO

Schiavo, schiavo.

MEO

Ma si saccio tu chi si’.

SCONCIGLIO

Io sto cca pe te servì.

MEO

Nce vedimmo appriesso po.

SCONCIGLIO

635

E mme chiammo schiatta mo’.

TENZELLA

Che breogna, che schefienza,

Va t’asciutta, hagge pacienza. (a Meo.)

(Oh che gusto, nce lo bo’.)

MEO

Si’ ng’attuppe frabuttone.

SCONCIGLIO

640

Cartafauza va te scauza

Ca te vene l’antecore

E l’ammore fa non puo’.

MEO

Male juorne io te do.

TENZELLA

N’auta vota, ssò,ssò,ssò.