La mogliere fedele

La mogliere fedele, Napoli, A spese de lo Mpresario, 1724

a cura di Emanuela Esposito

paratesto Prologo ATTO PRIMO ATTO SECONDO ATTO TERZO Apparato

ATTO III

SCENA PRIMMA

NTREANA, e CIULLA da zincara mmocca a la Porta, e LELLA.

NTREANA

Lasseme primmo tozzolare; aspetta.

LELLA

1215

Chi tozzola?

NTREANA

Sonch’io.

LELLA

Che nc’è Ntreana?

NTREANA

Te voglio fa vedè na bella zincara,

E farte annevenare la ventura.

LELLA

Mo sì c’haggio le chiocche a sta pazzia.

NTREANA

E sientela, ched’è? ca te nce spasse;

1220

Viene cca bella giovane.

LELLA

Chi è chesta?

Me pare de conoscerla.

NTREANA

Annevina.

LELLA

Ha na nfanzia de Ciulla.

CIULLA

E chi vogl’essere?

Chesta sonco, sia Lella.

LELLA

Oh sore mia,

Sinche la bemmenuta; Oddio che gusto

1225

C’haggio de te vedere!

CIULLA

È grazia toja.

LELLA

Comme staie Core mio? uh ianca tene,

Si’ fatta meza, e cchiù non pare ad essa!

CIULLA

E puro e assaje ca sonco viva, o sore,

Ca me mantenco schitto de dolore.

NTREANA

1230

Collecienza fegliole io vavo dinto

Pe no servizio, iatevenne ncoppa,

Ca mo’ mmo’ nce vedimmo.

LELLA

All’ora bona.

NTREANA

Haggio sbiata Ciulla pe no poco,

Me voglio sgoliare co Tenzella,

1235

E farele passare la ncozzella.

SCENA II

CIULLA, e LELLA.

LELLA

Tu c’haje fatto a mariteto

Che te vo’ morta, quann’isso t’amava

Cchiù assaie, e dell’uocchie suoje.

CIULLA

Che bolea fare?

Si non c’amarlo io puro cchiù de mene.

LELLA

1240

E n’haie nullo sospetto?

CIULLA

Troppo ll’haggio,

Isso er’amico de no Messenese,

Chiammato Tonno, e lo tenea da frate;

Cchiù de na vota chisto me tentaje,

Ma perché no mmolette

1245

Mancà a l’anore mio, m’ammenacciaie.

LELLA

Amice de sti tiempe? e fidatenne.

CIULLA

Io creo, c’havesse mmottonato Titta,

Pecché sempe me stea de mala Cera.

LELLA

Non pò esse de manco.

CIULLA

Mo’ fa ll’anno

1250

Partije pe Spagna, me portaie cod’isso

Ncoppa no bastemiento; e rente Genoa

Na sera, mente io steva poco bona,

Me fece scenne nterra co no sghiffo,

Addo’ nce steva Tonno co lo frate.

LELLA

1255

Negra te poverella ntra li lupe.

CIULLA

Ah Lella jammo ncoppa,

Ca me scappa lo chianto.

LELLA

Comme vuoie.

Io sto p’aiuto a li travaglie tuoie.

CIULLA

Me conzola no penziero,

1260

Ca nnocente è chisto core;

E lo cielo perch’è ghiusto,

Sta tempesta ha da carmà.

Si defenne, comm’è bero;

La iostizia, e l’anore,

1265

Spero sì d’havè sso gusto

De vedereme quietà.

SCENA III

MEO, e FONZO.

MEO

Jammoncenne a mmarcare,

Ch’è tardo, e già so’ lleste tutte quante.

FONZILLO

Comme vuoie, ma zi Meo famme na grazia,

1270

Nnante che ghiammo, vorria vedè Lella

Azzò coll’uocchie suoje speretuse

Me dà cchiù forza, e quanno nuie vocammo

Me faccia signo co lo moccaturo,

Che baga alliegro, e benca cchiù ssecuro.

MEO

1275

Ma vi’, ca m’ha prommiso

De dareme lo palio, si vince.

FONZILLO

No manco de parola.

MEO

Mo’ la chiammo.

SCENA IV

LELLA, li stisse, e po NTREANA, e TENZELLA.

LELLA

Bene mio, ch’è sta porta?... ah tu si’ Zio?

Che buo’?

MEO

Sienteme Lella;

1280

Già t’haggio mmaretata co Fonzillo;

Eccolo ccane, te vorria parlare.

LELLA

Comme vuo’ tu, che benca.

MEO

Si Fonzillo,

Accostate.

FONZILLO

Sia Lella, ve so’ schiavo.

LELLA

Bemmenut’Ossoria.

MEO

Mente parlate,

1285

Pur io na parolella

Voglio dire a Tenzella.

FONZILLO

Cca t’aspetta.

Sia Lella, io so’ restato assaie confuso.

LELLA

De che?

FONZILLO

De lo descurso de mo’ nnante.

NTREANA

Chi tozzola?

MEO

Sonch’io.

NTREANA

Che me commanne.

MEO

1290

Mo’ jammo a la Recatta,

Vorria pregà Tenzella, che se stia

A la fenesta quann’io passo, e beda

Lo maretiello suio, che ba a pegliare

Lo palio pe d’essa.

NTREANA

Mo’ la chiammo.

FONZILLO

1295

Ntanto che sto securo,

Speranza bella, del’affetto tuio?

LELLA

Si Fonzo m’havvarraie mogliere, e schiava.

TENZELLA

C’haggio da scire a fa?

NTREANA

Siente che ddice

Patro’ Meo.

MEO

Zita mia.

TENZELLA

Che zita, e bedola

1300

Me vaie vennenno, Viecchio nzallanuto,

Meglio farria, che pienze a lo Tauto.

MEO

E be’, chesto che d’eie?

NTREANA

Hà pazziato.

MEO

Mmalora che pazzia? ca m’hà scannato.

NTREANA

Aspe’, ca mo’ l’afferro, e te la porto.

MEO

1305

Aie Fonzo?

FONZILLO

Che nc’è zio?

MEO

Leva mano,

Saglietenne fegliola.

FONZILLO

Che d’è stato?

NTREANA

Veccola ccane.

MEO

Testemmonia Vosta,

Sentite tutte quante, haggio prommisso

A Ntreana de dare Lella a Fonzo,

1310

Co patto, ch’essa desse a me la figlia,

Mo’ chesta no mme vole, è gia guastato

Tutto lo Parentato. Saglie Lella.

FONZILLO

Aie zi Meo, Vi’ che faie?

MEO

Chianto puorre.

FONZILLO

Vi’ che sconquasso mette sta fegliola.

LELLA

1315

Ma Lella non te manca de parola.

NTREANA

Ah cana tu me miette a le rrasora.

TENZELLA

O rasora, o Cortielle, no lo voglio,

Chi se vo’ scotenà nfacce a sso scuoglio?

MEO

Ntrea’, covernamette.

NTREANA

Siente, siente.

MEO

1320

No nc’è cchiù che sentire,

Si non haggio Tenzella,

Io me revoco, e no ve donco Lella.

FONZILLO

Ntreana, che facimmo? aiemmè so’ perzo.

NTREANA

Va, va, ca ch’è piso mio d’agghiustà Tenza

1325

E si no lo mazzuoccolo nce penza.

FONZILLO

Che d’è chesto? che m’e dato?

Che cos’hà sta sciorte mia?

O me votta a ghì mpazzia;

O me tira a fa morì.

1330

Mo’ me veo ncielo auzato,

Mo’ me trovo sottaterra

Mo’ sto a mmare, mo’ sto nterra

Quanno quanno ha da scompì.

SCENA V

TITTA spogliato da schiavo.

TITTA

O sbenturato me, c’addo’ m’accosto,

1335

Sento di’, ca moglierema sia viva;

E cchiù d’ogn’uno m’have spaventato

La Zincara, che m’have annevenato,

Comme scioglio sto mbruoglio? addo’ me voto?

Tonno, che l’affocaie, stace a Messina,

1340

Ca chisso me porria

Levà sta fantasia. Vogl’j a bedere,

Chi sa fosse venuto

Ca se stace aspettanno nn’ora, nn’ora?

SCENA VI

TENZELLA, che fuje, NTREANA, che la secuta co na cocchiara, e TITTA.

TENZELLA

Aiutateme gente,

1345

Ca chesta me carosa.

NTREANA

Passa ccane,

Porcella, presentosa. (se secutano.)

TITTA

Tenzella che cos’è? che d’haie Ntreana?

TENZELLA

Tenitela si Titta, ma m’accide.

NTREANA

Non me tenè, si Titta, ca me scanno.

1350

Te voglio magn’a muorze malenata;

Trase dint’a la casa.

TENZELLA

Vavattenne,

Vi’ ca me jetto a mmare.

TITTA

Che t’ha fatto?

NTREANA

Niente niente.

TITTA

Ma puro?

NTREANA

Passa dinto

Eh lassame si Titta.

TITTA

Scumpe mone.

1355

La vuo’ fa desperà la poverella,

Che se derrup’a mmare? che t’hà fatto?

TENZELLA

Me vole mmaretare a Cartafauza.

NTREANA

Ah llencuta, lencuta, zitto, zitto.

TITTA

Comme comme? vuo’ dà sta palommella

1360

A chill’ascio pecuso? che si’ pazza?

TENZELLA

Vuie lo bedite mo’, che cosa è chesta?

Chi nce l’ha puosto sto demmonio adduosso;

N’onza de carne a no cantaro d’uosso.

TITTA

Haie ragione, haie raggione, saglietenne

1365

Ncoppa a la casa mia statte co sorema;

Ca po venco, ed agghiusto ste zampogne.

NTREANA

Viene cca, viene cca.

TITTA

Lassala ire,

Ca si’ troppo ncocciosa.

NTREANA

Vavattenne

Ca nce vedimmo appriesso; maratene,

1370

Si non te piglie Patro’ Meo, t’arrappo.

TENZELLA

Comme la vuo’ sentire? no lo voglio.

NTREANA

Ah berruta, verruta, te nce coglio.

TENZELLA

A me biecchie? vuo’ sta bella,

No m’ancappe a sta tagliola;

1375

So’ ffegliola peccioncella,

E becino a no sciamarro

Io me voglio nghiettechì?

Di’ che benca, gnorezzì.

NTREANA

Vi’, si la vo’ scompire.

TITTA

1380

Chesta me fa morì, lassela dire.

TENZELLA

Ntra la tossa, e lo catarro,

Li dolure, e la cionchia

Starria fresca comm’a rrosa;

E de cchiù la gelosia,

1385

Co li strille pe rrefosa,

Me farria priesto morì.

SCENA VII

Se sente apprimmo sparà na botta, po comparesceno 4. falluche, che vocano addoje addoje; una nc’è FONZO, a n’autra Patro’ MMEO, ed a n’autra SCONCIGLIO, a la quarta, che ba nnanze a tutte, e la falluca de Titta, che sta nterra co NTREANA.

NTREANA

Che botta è chesta?

TITTA

Ah a, ca mo’ se partono

Pe la recatta le fallucche, jammo

A bedè chi va nnante.

NTREANA

Eccole ccane,

1390

Ca veneno.

TITTA

E la mia va nnante a tutte.

NTREANA

Addo’ vanno?

TITTA

A passare lo cavallo,

A botà lo fortino, e po so’ ccane.

Oie Ciommo Ciommo, appuggia a la lenterna

St’attiento cane, magnete sto mare.

FONZILLO

1395

Date leiune mieie, mmestimmo a chesta,

Che nce va nnante; ah cano, tira fora

Appuggia a lo fortino, via frusciate.

MEO

Belle giuvene mieie date stregnite,

Vencimmolo sto palio, ca tenco

1400

Stipato tutto chello, che bolite.

SCONCIGLIO

Ah canaglia, canaglia date suoccie.

Mmalora, che facite.

TITTA

Ai che risa,

Lo viecchio vace ad orza.

NTREANA

Vide chisto,

Ca vota lo centimmolo cca nnante.

MEO

1405

Oie Sconciglio, Sconciglio, viene arreto.

SCONCIGLIO

Sorca guallecchia, ca venimmo affieto

O manna craje, ah figlie de na scrofa.

TITTA

L’ha pigliato lo purpo; Addio Ntreana.

NTREANA

Si Titta, addo’ t’abbie?

TITTA

Mo’, mmo’ torno.

NTREANA

1410

Si accorre niente, vi’ ca sto cca ttuorno.

SCENA VIII

SCONCIGLIO ch’esce da mare, e Ntreana.

SCONCIGLIO

Che ve venca lo cancaro birbante

Lazzaro, mbreacone,

Iate a mmalora a carrejà craune.

NTREANA

Hagge pacienza; è Stata, e baje cchiù frisco.

SCONCIGLIO

1415

E battenne tu n’ante,

No me zocà lo verme.

NTREANA

Che cos’haje?

Ca t’arrappe, e t’accide, che nce faje?

SCONCIGLIO

O descenzo mmarditto, che la scanna,

Vonn’ire a la recatta, e se mbreacano;

1420

Si n’havessero visto maie vocare,

Sbotà la varca, e farme ire a mmare?

NTREANA

Tu mo’ che nce farrisse, so’ desgrazie.

SCONCIGLIO

Tiemente, che caozone arroienato!

E m’è stato mprestato; mo’ mmo’ siente

1425

Ca lo patrone lo vo’ nuovo; ed io

Lo guadagno nce scotolo,

C’haggio fatto a crastà sei onze a rruotolo.

NTREANA

Haggie salute, a n’auta accasione,

Che bince n’auto palio, te renfarche;

1430

Voca ngalera, e no a falluche, o varche.

SCONCIGLIO

Ntrea’ tu mme repasse, ma non saje

Ca sogra me farraie nfra quatto juorne.

NTREANA

Addavero?

SCONCIGLIO

Ncoscienza.

NTREANA

Ah a, che spasso?

E si’ ommo pe figliema, nzertone?

SCONCIGLIO

1435

Ched’è, non fosse buono

A tenerla contenta notte, e juorno?

NTREANA

È lo vero, ma ll’aggio mmaretata.

SCONCIGLIO

Saccio, ca ll’haje promessa a Cartafauza,

Ma no nne prova affè da chesta fauza,

1440

Lasseme ì a mmotà, ca po parlammo.

Ma pe mo’ te la dico.

No viecchio, e na fegliola è brutto ntrico.

Tu sgarre a li mise;

Marito, e mogliere

1445

Vonn’essere pare;

Chi vo’ mmaretare

C’agghiusta li pise,

Si no vo’ vedere

Lo cane, e la gatta

1450

Pe ncoppa, e pe sotta

Stracciarse, e strillà.

Lo viecchio è geluso,

La giovane è pazza,

Vo’ chillo mpertuso

1455

La scura nzerrare;

Vo’ chesta scialare

Pe ccasa, e pe chiazza

E sa, che recatta

Nce nasce de botta;

1460

Fa chillo bò bò, e chesta mià mià.

SCENA IX

NTREANA sola.

NTREANA

Chisto dice quarcosa, ma che serve

Lo nteresse a nuie femmene nce scanna

Ca simmo cannarute, e li denare

Sa quanto assaje cchiù ppeo nce fanno fare.

1465

Si la femmena jesse spogliata,

Non farria pe denare l’ammore;

Se farria da lo genio terà.

Ma perchene ha da ire aparata,

Si be’ crepa, e ne schiatta lo core,

1470

Co chi ha zuco se ll’have da fa.

SCENA X

LELLA, e CIULLA.

LELLA

Sia Ciulla mia, vattenne allegramente,

Ca quanta te sapimmo,

Te farrimmo nfaore, e po lo Cielo

Non t’hà d’abbannonà, ca si’ nnozente,

1475

E pate pe l’anore attortamente.

CIULLA

Accossì spero, ed isso, che me sape,

Hà da scoprire la nnocenza mia;

Chesto sulo vorria, che metta ncore

A Titta, ca so’ femmena d’anore.

LELLA

1480

Non dobbetare no, ca già ne veo

Lo capo de se sciogliere sto mbruoglio;

Chi te sarvaie da mano a l’assassine,

Farrà vedere a Titta tuio crodele,

Ca mogliere le si’ tanto fedele.

CIULLA

1485

Vocca de sciure mia te rengrazio

De lo confuorto, che me daie, e cride

Ca me ne traso tutta conzolata

Che te veda contenta, e mmaretata.

LELLA

Che pietà, che ne sento, poverella,

1490

Comme n’havette core chillo cano

De darla a l’assassine,

C’a mmare l’affocassero? e si chille

No n’haveano pietate, no mmoreva

Comme n’ajeniello, senza fare niente?

1495

Marite? Va te fida; dice mamma?

Ca la magliere pe ddi juorne è amata,

Po vene nfieto; è accisa, o straziata.

Chi se fa na scarpa nova

Pe di juorne la mantene

1500

Stace attiento, che non chiova,

La polizza, la fa netta;

Po se stufa, te la ietta,

O scarpone se ne fa.

Accossì fa chi se nzora,

1505

Pe no mese vole bene

A la zita, se l’adora;

Po se stracqua, la strapazza,

Nfra la terra, e nfra la mazza

La scuressa la fa sta.

SCENA XI

SCONCIGLIO, e MEO.

SCONCIGLIO

1510

Mo’ vene a chesta via Cartafauza,

Ed è tornat’arreto la falluca,

Chi sa ch’è stato? Voglio cca sentire.

MEO

Po dice ca si’ acciso

Pe fa lo guappo; guitte, caparrune,

1515

Si stissevo cca nterra

Adaccià ve vorria co na sferra.

SCONCIGLIO

Va sacce, co chi ll’ha?

MEO

Vi’, che breogna;

S’hà da dire pe Nnapole sta storia,

Che quatto mbreacune

1520

M’hanno mmestuto a mmare,

Rutto li rimme, e fattome tornare?

SCONCIGLIO

(Ah a, ca non so’ sulo, mo’ le donco

No morzillo de quatra) oh Patro’ Meo

Che d’è? tu si’ benuto,

1525

Havisse tu lo palio venciuto?

MEO

Haggio vinto la peste, che ve roseca

A ttene, e a chille birbe malenate,

Che ghievano cottico.

SCONCIGLIO

C’hanno fatto?

MEO

M’hanno mmestute nfacce a lo cavallo,

1530

Nce simmo sfracassate rimme, e barche;

E so’ tornat’arreto.

SCONCIGLIO

E si lo ddico,

Ca stanno a feccia nzino a li capille,

M’hanno fatto a me puro semmozzare,

A piglià cannolicchie;

1535

Tu c’haie pigliato? ancine?

MEO

E ba a malanno

O vuoie, che me scapriccio mo’ cottico?

SCONCIGLIO

E perché? tu lo ssaie, ca te so’ ammico.

MEO

E manco te ne vaie?

SCONCIGLIO

Dimm’a lo mmanco

Chi va primmo de tutte?

MEO

La falluca de Titta,

1540

Ma Fonzo le sta appriesso proda, e poppa;

Vuo’ sapere nient’auto, si’ squagliato?

SCONCIGLIO

Mo’ mme ne vao?

MEO

Aimmè so’ sbreognato,

Si Fonzo non guadagna, me despero,

Perché me vene sfallo lo penziero.

SCONCIGLIO

1545

Io lo voglio fa dare a la fortuna.

Ne patro’ Mmeo comme faie co Tenza?

L’haie prommiso lo palio, nce lo daie?

MEO

E battenne a mmalora, fuss’acciso,

Da me che buoie.

SCONCIGLIO

Si’ ghiuto già a l’allecchia,

1550

E fora guallecchia, e fora guallecchia.

MEO

Chisto vo’ che l’accia, ma non guastammo

Li fatte nuoste, c’agne tiempo vene,

Nzomma so’ sfortunato ad ogne cosa

Né serve, ca me strudo, e me spellecchio;

1555

Chesto soccede all’ommo, quann’è biecchio.

Ammore me votta,

Fortuna me caccia,

Speranza m’abbotta,

Lo sdigno me straccia;

1560

So’ tutto crepato

Né saccio che fa.

La mamma promette,

La figlia no mmole;

Porzì li fraschette,

1565

Perché so’ mmecchiato,

Co fatte, e parole

Me vonno abborlà.

SCENA XII

TITTA co na lettera mmano, e po NTREANA.

TITTA

O munno nfamo, amice tradeture,

O nigro chi se fida, e chi ve crede;

1570

Ahi lettera scontente, e quanta guaje,

Patire me farraie. (Tozzola a Ntreiana.)

NTREANA

Chi è lloco?

TITTA

Aiuto,

Ntreana mia, ca so’ desperato;

Haje veduto la Zincara?

NTREANA

Gnornone,

Perché? che t’è socciesso.

TITTA

Ah maromene

1575

Ca so’ ghiuto a lo Muolo pe bedere

S’era venuto Patro’ Tonno.

NTREANA

Quale?

TITTA

Lo Messenese chill’amico mio;

No lo saie?

NTREANA

Sì lo saccio, e be’, ch’è stato?

TITTA

M’hà mannata sta lettera lo cane.

1580

O sciorte, e fosse cca, pe lo scannare.

NTREANA

Che t’ha fatto? perché? che nc’è a sta lettera.

TITTA

Ah Ciulla mia traduta, o amico fauzo,

O Titta sbentorato, o Cielo, ahi sciorte;

Dateme Ciulla, o dateme la morte.

NTREANA

1585

Tu che dice? sbarije, che fusse pazzo?

TITTA

Si non moro mpazzesco siente, siente.

(LETTERA)

Titta mio già che sto nfunno de lietto,

Io te cerco perduono de n’arrore,

C’haggio fatto p’amore.

1590

Sacce ca n’è lo vero,

Ca Ciulla toia te faceva tuorto;

Comm’io te disse; fu despietto mio.

Quanno po me la diste p’annegarla,

Pe pietà la sarvaie; si tu la truove

1595

Abbracciatella, tienetella cara,

Ch’è Mogliere Fedele, ed è norata.

De chisto trademiente n’hà dolore

Tonno spenna, che scrive, e se tu more.

NTREANA

Ah iance me, che sento! comme Ciulla

1600

No morette de freve, comm’haje ditto?

TITTA

None, Ntreana, none; io Turco cano

Senza nformarme buono, ll’haggio accisa,

Si è morta; ed aggio perzo pe n’arrore

Lo schiecco d’onestate, e de l’amore.

1605

Me resta na speranza, ca la zincara,

M’have ditto, ch’è biva; oddio trovammola,

E sentimmo, che dice.

NTREANA

Va la cerca,

Ca starrà da cc’attuorno, e io cca l’aspettto.

TITTA

Mo’ vago, ah sciorte mia damme recietto?

1610

Ciulla cara, Ciulla bella,

Poverella, mara te;

Chi lo ssape addove staie,

Si si’ biva, sì o no?

Fata mia, stannardo d’oro,

1615

Si non moro gran cos’è

Si non t’ascio p’oje, o craie,

Io m’annego, e nce lo bo’.

SCENA XIII

NTREANA, CIULLA da zincara, e po LELLA, e Patro’ MMEO.

NTREANA

Bene mio, c’haggio ntiso Ciulla, Ciulla

Mo’ si’ asciuta de guaie, allegramente.

CIULLA

1620

Ntreana mia che buoie?

NTREANA

Lo veveraggio,

Allegrezza, allegrezza.

CIULLA

De che cosa?

MEO

No nne voglio fa niente.

LELLA

Ma è breogna.

MEO

Si è breogna, è la mia; Tu cca che nc’intre?

LELLA

Ma tu non haie prommisso darme a Fonzo?

MEO

1625

E si Fonzo moresse non c’è auto?

NTREANA

Uh Lella, è patro’ Mmeo; attiempo, attiempo.

LELLA

Che nc’è Ntreana?

NTREANA

Mo’ è lo punto iusto,

D’ajutà sta nnozente.

MEO

Che l’accorre?

Sta zincara chi è?

LELLA

Zi Meo è Ciulla,

1630

La mogliere de Titta.

MEO

Tu si’ Ciulla?

CIULLA

Pe te servire.

MEO

O quanto ll’haggio a gusto,

De vederete viva.

NTREANA

Ciulla mia,

Non perdimmo lo tiempo a zeremonia

Jate dinto, e le conta

1635

Chello, che t’aggio ditto de mariteto;

Conzurdate le ccose, e quanno tosso,

Jesce pe sta portella da dereto

Uh cca mo’ torna, priesto iatevenne,

E meglio la descorra chi cchiù ntenne.

1640

O Cielo mprosecallo sto designo,

Ca de l’aiuto tuio me pare digno.

SCENA XIV

TITTA, NTREANA, e po CIULLA.

TITTA

Ntreana mia, non trovo cchiù la zincara

Ll’haie vista tu?

NTREANA

No ll’haggio vista, none;

Uh che d’have sta pica, che me schiatta?

TITTA

1645

E che facimmo?

NTREANA

Aspettala commico.

Ca vene pe ssecuro addo’ vuo’ ire

Trovanno ova de Lupo.

TITTA

Aimmè ca stonco.

Comme stesse a la corda, e a la stanchetta.

CIULLA

Aie chi vo’ la Paletta.

NTREANA

1650

Zi’ ca la sento strellà, vide si è essa.

TITTA

O sciorte! è chella stessa chiamma, chiamma.

NTREANA

Ahie zincarella viene cca.

CIULLA

Che buoie.

NTREANA

Dimme na cosa tu canusce chisto?

CIULLA

No lo saccio; chi si’?

TITTA

So’ chillo schiavo

1655

A chi haie ditto, ch’è biva la mogliere.

CIULLA

A sì, mo’ m’allecordo, tu si’ chillo,

E mbe’ che buoie?

TITTA

Dimmi lo vero è biva Ciulla mia.

CIULLA

È biva, ma fa cunto, che sia morta.

TITTA

1660

Comme morta? perché?

CIULLA

Perché ha saputo,

Ca te vuoie nzorare.

E pe farete nzorà se vo’ annegare.

TITTA

A Cielo non sia maie, zincara mia.

CIULLA

Suse, suse, che faie? vi’ ch’è breogna.

TITTA

1665

No mme soso da cca, si no mme dice,

Adov’è Ciulla mia.

CIULLA

Che la vuo’ accidere.

TITTA

Me la voglio mpizzà dint’a lo core.

CIULLA

E chella non è porca, e non è guitta?

TITTA

Non è lo vero no, ca fuie traduto.

CIULLA

1670

Tu comme ll’haio saputo?

TITTA

N’amico fauzo che me l’accossaie

M’ha scritto ch’è nnozente.

CIULLA

E a n’ommo fauzo

Cride chesto?

TITTA

Lo credo perché Ciulla

Morea pe mmene.

CIULLA

Chesto tu sapive,

1675

E po Crediste ca t’havea gabbato?

TITTA

Aimmè la gelosia m’havea cecato.

NTREANA

(Cielo vatte sto fierro mo’, ch’è caudo.)

CIULLA

(Mo’ si non bozzo cchiù) Titta se vede

Ca si’ cecato si pocca m’haie nnante

1680

E non mmide, e non saie

Ca sonco Ciulla, che cercanno vaie.

TITTA

Ciulla mia, tu si’ essa?

CIULLA

Io sonch’essa, Titta mio

Si tu accidere me vuoie

1685

Mmano a tte me trovo già.

NTREANA

Ah negramene chesta more aiuto.

SCENA XV

LELLA, MEO, e li stisse.

LELLA

Ched’è Ntreana?

NTREANA

Porta cca na seggia

Ch’è addeboluta?

NTREANA

Sine piglia ll’acqua.

TITTA

Fortuna nce n’è cchiù, sarraie mo’ stracqua?

1690

Sciorte cana, scumpa oddio

Apre Ciulla st’uocchie tuoie

Si mme vuoie vedè campà.

CIULLA

So’ biva ancora?

NTREANA

Zitto ca revene.

CIULLA

Addo’ sta Titta mio?

LELLA

Sta rente a tene.

TITTA

1695

O sciato de sta vita eccome ccane.

MEO

Ciu’ statte bona, e fa crepà li cane.

CIULLA

Io so Viva Titta mio.

TITTA

Sciorte cana scumpe oddio.

SCENA XVI

SCONCIGLIO zompanno, TENZELLA, la falluca de TITTA, FONZO co la falluca soia, e li stisse.

SCONCIGLIO

Vettoria, vettoria.

LELLA

Che nc’è Nardo?

SCONCIGLIO

1700

Mo’ vene la recatta.

MEO

Chi va nnante?

SCONCIGLIO

La falluca de Titta, e Fonzo appriesso.

TENZELLA

Voglio vedè chi vence.

MEO

E io resto ciesso.

SCONCIGLIO

Vecco cca la falluca, Titta haie vinto.

CIULLA

Che d’è chesto che sento!

TITTA

Core mio

1705

Strillano c’aggio vinto io lo palio.

FONZILLO

Jammo nterra a malanno

Ca già l’havimmo fatta la frettata.

TENZELLA

Zi Meo damme lo palio, ch’haie vinto.

MEO

Nce vo’ n’auta refosa.

NTREANA

1710

E non te vuo’ sta zitto presentosa.

SCONCIGLIO

Titta ha vinto, nc’havite che nce dire?

FONZILLO

Hà vinto lo cconcedo.

SCONCIGLIO

Le pozzo dà lo palio?

MEO

Sì dancillo.

SCONCIGLIO

Titta lo veveraggio; pigliatillo.

TITTA

1715

Dallo cca Ciulla cara a tte lo donco

Perché vince de fede, e de costanza

Ogne mogliere.

CIULLA

Ed io lo donco a Lella

Perché de le ffegliole, è la cchiù bella.

FONZILLO

Che sento chesta è Ciulla?

NTREANA

Chest’è e d’essa.

FONZILLO

1720

O che preiezza c’haggio, e comm’è biva?

NTREANA

Mo’ jammo ncoppa, llà decimmo tutto,

Chist’aute matremonie nc’agghiustammo

E mo’ co Ciulla nosta ng’allegrammo.

TUTTE

Già la sciorte ha votate le bele.

TITTA - CIULLA

1725

Ciulla/Titta mia mo’ jammo a gaudè

Tu si’ stata mogliere Fedele

E lo Cielo haie havuto pe tte.