Opera Buffa Napoli 1797 - 1750
  
  
 Lo simmele, Napole, [s.e.], 1724
 a cura di Paologiovanni Maione
 
 
 
paratesto ATTO PRIMO ATTO SECONDO ATTO TERZO Apparato
 
 ATTO SECONDO
 
 SCENA I
 
 D. PEPPO, e LUCCIO.
 
 D. PEPPO
 Và buono sì; mò parlo à Teresella.
 LUCCIO
 Sì pigliammonce gusto
590Co ste ’segnore.
 D. PEPPO
                                Cierto.
 LUCCIO
                                               Lloro ponno
 Coffejarence à nuje,
 E non potimmo nuje coffejà lloro?
 D. PEPPO
 Volimmo birbejare.
 E pe gusto, e pe spasso
595Schitto, non pè patè, volimmo amare.
 LUCCIO
 Via chiamma Teresella,
 Ca io t’aspetto ccà. (D. Peppo và à tozzolare.)
 D. PEPPO
                                      Vo’ esse bella.
 Vide, che spassolillo!
 LUCCIO
 L’aveamo da fà primmo.
 D. PEPPO
600Meglio tarde, che maje deceva chillo.
 
 SCENA II
 
 TERESELLA, D. PEPPO, e LUCCIO da parte.
 
 TERESELLA
 Chi è lloco?
 D. PEPPO
                        Songo io sia Teresella.
 T’aggio da dì nà cosa, che ’me ’mporta.
 TERESELLA
 Vi’ buono, che nn’avisse
 Vattuto chesta ccà, pe chella porta. (e mostra chella de Palomma.)
 D. PEPPO
605E sempe llà! siente parlammo sodo.
 Nsi’ à mò t’è parzo, ca non t’aggio amato.
 Mà non’è bero; è stato
 Pe non desgustà Luccio,
 Che speresce pè ttè: S’isso te cede
610A mmè, te piglio, e te ne do la fede.
 TERESELLA
 Veramente D. Peppo; o ’me coffie.
 D. PEPPO
 Fanne la prova.
 TERESELLA
                               Ogge te servo.
 
 SCENA III
 
 PALOMMA, e li stisse.
 
 PALOMMA
 Oh’ bravo!
 TERESELLA
                       (Oh malatenca scumpela.)
 D. PEPPO
 Che nc’è Palomma?
 PALOMMA
                                       A lo commanno.
 TERESELLA
                                                                       Mammeta
615Mme pare ca te chiamma.
 PALOMMA
 T’aggio ntesa, sì ’tune,
 Che buo’, che ’me ne vaa, ca non è mamma.
 D. PEPPO
 (Ajemmè, ca mò s’allumma no gran fuoco!
 Ma mò lo stuto io.)
620Palomma, Teresella, io ve so’ cuoco. (trase.)
 PALOMMA
 E mbè?
 TERESELLA
                  A mmè propio non ’me mporta niente.
 PALOMMA
 E si mbè te ’mportasse, che pretienne?
 D. Peppo, è cosa mia:
 Lo ’meglio, che può fare scordatenne.
 
625   Scordate de st’ammore
 Nò nce penzare cchiù:
 Saccio, ca nn’aje dolore,
 Mà, che nce pozzo fà?
 
    Sente stò core mio
630Nà gran pietà de te;
 Ma commo pozzo, ò Dio!
 L’affetto mio lassà!
 
 SCENA IV
 
 LUCCIO, e TERESELLA.
 
 TERESELLA
 E chesta non se sà da me, che ’bole...
 Oh’ si Luccio avarria
635Da pregarete, una, e doje parole.
 LUCCIO
 Patrona, dinne quatto.
 TERESELLA
 Saccio, ca si ncappato co Palomma:
 Si a mmè vole D. Peppo te contiente?
 LUCCIO
 S’io sapesse, ca isso
640Pretennennote io, me te cedesse;
 Cierto ca lo ’farria.
 TERESELLA
 Sì, lo ’face, ca chillo,
 Vencere non se fà de cortesia.
 LUCCIO
 E la cosa è scomputa.
645Ma si maje piglie chillo;
 A mmè ’pè canoscenzia
 P’aosanza (mò nce vò) ’me vorraje bene?
 TERESELLA
 Nò, chesto non commene.
 LUCCIO
 Perche?
 TERESELLA
                  So’ maretata,
650E buo’, che boglia bene a ttè!
 LUCCIO
                                                       Che mporta.
 TERESELLA
 Si n’è porta, è fenesta.
 LUCCIO
 Chesto se sole fare.
 TERESELLA
 Ma nò lo fà la femmena modesta.
 LUCCIO
 Non nc’è niente de male, e te lo ghiuro.
 TERESELLA
655Io pe ’mè no lo ntenno sto latino.
 LUCCIO
 Tù no lo ntienne, e ’puro
 Lo Munno ne stà chino!
 TERESELLA
 Eh! ca staje ’narrore:
 Non se pò ammare maje
660Lo Marito, cò n’auto into à lo core:
 E si ncè chi lo ffà, dice Nardillo,
 Ca si amma chillo, nganna lo Marito.
 E s’amma lo Marito gabba chillo!
 
    Chi hà no bello sciore,
665E à duje lo vo’ donà;
 Lo guasta, e nò nne stà
 Nullo contento.
 
    Puro accossì
 Lo core
670Si a duje lo vuo’ spartì;
 Nnè viene, justo a dà
 All’acqua la mmetà,
 Ll’aut’à lo viento.
 
 SCENA V
 
 LUCCIO, e NARDILLO.
 
 LUCCIO
 Che umore defferente
675Che hà chesta, de Palomma!
 NARDILLO
 Votta si Luccio: nzomma
 Semp’attuorno a lo mmele và la mosca.
 LUCCIO
 Oh nquanto à chesto ’mele te lo ’dono.
 NARDILLO
 Ch’aje cagnato penziero?
 LUCCIO
680Volimmo de conzierto co D. Peppo
 Ammà, pe nce spassare,
 E non p’avè desguste, e pe schiattare.
 NARDILLO
 Veramente la mpresa
 È famosa; ma figliemo
685Non saccio si de chesta se nne spesa.
 LUCCIO
 Nò, fatte cunto, ca se nn’è spesato.
 NARDILLO
 (Oh Nardillo viato.)
 LUCCIO
                                       (Che gusto nn’hà!)
 NARDILLO
 (Chesta sarrà la via,
 Che Palomma è la mia;)
690Ma vuje già state ’miezo à na tempesta:
 Aggio appaura.
 LUCCIO
                               È beretà ncè simmo:
 Mà co no pò de ngiegno,
 E no pò de fatica n’esciarrimmo.
 
    Quanno vace lo Mare à li Ciele;
695Lo Peloto nfrà chella ’borrasca
 Sà che fà? stace accuorto à le ’bele!
 E le ’tira; l’astregne: l’allasca,
 Nzi’ che nterra la varca fà ì.
 
    Accossì chi à lo mare d’Ammore
700La tempesta se trova provanno,
 Pe se mettere nzarvo lo core,
 Faticanno
 Hà da ire accossì.
 
 SCENA VI
 
 NARDILLO, MARZIA e pò MASILLO, che, tornato da fora, esce leggenno na lettera.
 
 NARDILLO
 Ah, ah si chiste diceno addavero
705Io la voglio fà negra.
 MARZIA
                                        Oh sì Nardillo
 Aje avuta cchiù nova de Masillo? (esce Masillo.)
 NARDILLO
 Nò.
 MARZIA
           Pover’ommo n’aggio compassione
 MASILLO
 Saluto vostro figlio! (legge la lettera.)
 Bonora chesta vace
710Al Signor Masillo Scognamiglio
 Ed io songo Masillo Scognamiglio;
 Mà n’aggio figlie: chisto stà mbrejaco
 Stipammoncella... O tè Nardillo, e Marzia!
 Sì Nardillo, Sia Marzia, Io me n’allegro
715De trovarve buone, che facite?
 V’aggio mpeduto fuorze?
 Scusateme... che d’è? non responnite?
 Tù t’arrasse. (à Nardillo.) Tu fuje. (à Marzia.)
 Che d’è songo mpestato?
 NARDILLO
720Vorria sapere comme si scappato?
 MASILLO
 Da do’?
 NARDILLO
                  Dall’Incurabele.
 MASILLO
 A mmè? (Masillo maravigliannose le tene mente.)
 MARZIA
                    Chi t’hà mprestato ssò vestito?
 MASILLO
 Quale vestito?
 MARZIA
                             Chisto.
 NARDILLO
 Addo’ te si provisto?
 MARZIA
725Vi’ ch’uocchie stralunate!
 NARDILLO
 Vi’ comme stà mpenziero!
 MASILLO
 Vuje decite addavero; ò m’abburlate!
 MARZIA
 Di’ mò si cchiù Masillo?
 NARDILLO
                                              Haje debbete?
 MARZIA
 Haje Mogliere?
 NARDILLO
730Nce canosce cchiù à nuje?
 MASILLO
 Bonora. Io ncè scommetto
 Ca vuje site mpazzute tutte duje!
 NARDILLO - MARZIA
 Ah, ah, ah, chest’è bella: ncè delleggia.
 Ah, ah ah, ah.
 MASILLO
                            Accossì è; so’ pazze: seggia, seggia.
 NARDILLO
735Ah, ah, ah benemio ca mo crepo.
 MARZIA
                                                              Io so’ schiattata.
 MASILLO
 E bà ch’avimmo fatta la frettata.
 
    Cellevrelle poverelle!
 
 MARZIA - NARDILLO
 
 Isso à nuje! che te nne pare!
 
 MASILLO
 
 Chi s’abbusca ste cient’ova?
 
 MARZIA
 
740Seggettare.
 
 NARDILLO
 
 Seggettare.
 
 MASILLO
 
 Va le ’pesca!
 
 MARZIA
 
 Va lo trova!
 
 NARDILLO
 
 Bello pazzo ah, ah, ah!
 
 MASILLO
 
745Vi’ che pazze ah ah, ah.
    Fracetumma, coccovaja.
 
 NARDILLO
 
 Vide vi’, nce fà l’abbaja!
 
 MARZIA
 
 Haje mogliere?
 
 NARDILLO
 
 Vuo’ pagà?
 
 MASILLO
 
750State belle mmeretà.
 
 SCENA VII
 
 D. PEPPO, e RECHIPPO.
 
 D. PEPPO
 Io voglio à ’poco à ’poco
 Spassareme co’ chesta,
 Che nfi à mò m’hà tenuto into à lo ’fuoco.
 E ntramente s’affaccia a lo barcone,
755Pigliammo lò cafè.
 RECHIPPO
                                     Ccà simmo nuje.
 Avimmo da fà niente sì D. Peppo?
 Ahù, lo Rrè dell’Uommene!
 D. PEPPO
                                                    Ch’Arefece! (caccia la tabbacchera D. Peppo.)
 Se ’ne ponno fà gnuoccole de cagliera:
 Damme cafè.
 RECHIPPO
                            Portate lo cafeo.
760È bana?
 D. PEPPO
                   Nò, è seviglia.
 RECHIPPO
 Sarrà robba de Prencepe!
 D. PEPPO
 Sempe cò lo partito.
 RECHIPPO
                                       A mmè?
 D. PEPPO
                                                         Via piglia! (le dà tabacco. vedenno venì lo cafè.)
 Che d’è ssò cocchiariello?
 RECHIPPO
                                                 Senza zuccaro
 Lò bo’ D. Peppo: cagnalo:
765Servite à spacca strommola
 Sempe li meglio accunte.
 D. PEPPO
 Rechi’: ssi taglie mò fanne de manco
 Ca non t’abbusche niente.
 Besogna, che te scuoste;
770Ca mò esce Palomma.
 RECHIPPO
                                           À piede vuoste. (parte.)
 
 SCENA VIII
 
 PALOMMA, e lo stisso.
 
 PALOMMA
 À chest’ora cafè, Signor Milordo?
 D. PEPPO
 Non pè piglià cafè
 Ma pè bedere a ttè, ccà so’ benuto.
 PALOMMA
 Ncè vo’ non pò d’ajuto
775À credere stà cosa.
 D. PEPPO
 Credere è cortesia,
 E si uscìa non nce crede,
 Che pozzo fà? sarrà desgrazia mia. (è portato lo cafè.)
 Nne commanne?
 PALOMMA
                                  Obrecata. (Palomma ride nfacce à D. Peppo.)
 D. PEPPO
780Che bo’ dì sta resella?
 PALOMMA
 Che d’è? non vuo’, che rida? (turbata.)
 D. PEPPO
 Nò, ride à gusto tujo.
 (Pazzo, chi se nne fida.)
 PALOMMA
 Eh’ D. Peppo D. Peppo!
785Saje perche mmè faje chesto?
 D. PEPPO
 Perche?
 PALOMMA
                  Ca te si accuorto
 De la catena mia;
 Ca non me pozzo sciogliere; aggio tuorto.
 D. PEPPO
 Già te daje pe reposta,
790Già vuo’ jettà le carte?
 PALOMMA
 Signornò, faccio apposta:
 Cheste so’ ’tutte smorfie:
 Io te le do à rentennere
 Pe te gabbare.
 D. PEPPO
                             E, che...
 PALOMMA
795E che! Nò juorno, tù mm’haje da fà mpennere;
 Che lo puozze provare:
 Sciorte, perche me nc’haje fatta ncappare!
 D. PEPPO
 À che serve stò chiagnere?
 Comme maje s’hà da credere,
800Che tù te puozze fragnere
 E pe Luccio, e pe mme! non pò succedere.
 
 SCENA IX
 
 TERESELLA, e li stisse.
 
 TERESELLA
 Palomma mia; che d’è? Tù staje chiagnenno!
 D. PEPPO
 Mà io già bao cedenno.
 (E chesta ’me la fà.)
 TERESELLA
                                       D. Peppo via;
805Accordala.
 PALOMMA
                      Te nganne Sore mia
 Ca non chiagneva. (Palomma se piglia scuorno, che Teresella l’aggia vista chiagnere.)
 D. PEPPO
                                     Ò bravo! Tù si’ chella,
 Che non dice buscie?
 PALOMMA
 Siente...
 D. PEPPO
                   Nò chiagne, ca te faje cchiù bella.
 
    Se fà cchiù bello
810Lo sciummetiello
 Quanno à lo Mare
 Chiagnenno và.
 
 E Palommella
 Quanno peccea,
815Se fà cchiù bella,
 Na Ddea
 Se fà.
 
 SCENA X
 
 TERESELLA, e PALOMMA.
 
 TERESELLA
 Che d’è stata la cosa?
 PALOMMA
 Ora non ghì sapenno:
820Che mme voglio ammalire?
 TERESELLA
 Tù non me la vuo’ dire; e io te ntenno.
 PALOMMA
 A Teresella: oh’ Dio!
 Perche non pozzo amare à muodo mio?
 TERESELLA
 Comme vorrisse ammare?
 PALOMMA
825Vorria tenè st’Ammore,
 Ppropio sott’à li piede;
 E vorria, che sto core
 Non sapesse, che d’è; Legge, nè Fede.
 TERESELLA
 Na cosella de nania:
830Io tutto lo contrario.
 PALOMMA
                                       E ’comme, di’?
 TERESELLA
 Vorria tenere mpietto
 Lo core à mme soggetto;
 Non pè farelo amare à genio mio,
 Ca chello ll’hà da fare, anca le pesa:
835Mà vorria, che potesse
 Odejà chi mm’hà genio,
 Chi ’me pejace, e non me vole ammare;
 Ca chesto è chello, che ncè fà schiattare!
 
    Amare, e non potere
840Cacciare da lo core
 Chi non te pò vedere;
 È lo cchiù peo dolore,
 Ch’Ammore nce pò dà.
 
    À gusto nuosto amare
845Potimmo
 Chi volimmo;
 Mà nquanto all’odejare
 N’avimmo libertà.
 
 SCENA XI
 
 PALOMMA, TERESELLA, che torna; e pò NARDILLO.
 
 PALOMMA
 Siente sie Teresella,
850Vedo venì Nardillo;
 Io già stò co li flate,
 E tù porzì; spassammonce tantillo.
 NARDILLO
 Oh che bell’Ambo tè: vi’ che fortuna;
 Ch’ave stà strata oje,
855Che lo Sole, e la Luna
 Le fanno luce nziemo.
 PALOMMA
 Si avessemo si Nardo nnommenate
 Mille docate ’l’avarriamo avute:
 Mò parlava de tè, non è lo vero? (à Teresella.)
 TERESELLA
860Anze aveva penziero,
 De te mannà à chiammà.
 PALOMMA
                                                 Lo siente?
 NARDILLO
                                                                      Uh gioja
 E che grazie so’ cheste ncontratiempo!
 PALOMMA
 Quanno lo saparraje.
 TERESELLA
 (Comme la sape fà.)
 PALOMMA
                                        (Mme vene à ridere.)
 NARDILLO
865E bammello decenno Fata bella.
 PALOMMA
 Dincello Teresella;
 Via non te piglià scuorno.
 TERESELLA
 Nò, nò; dicimmoncello n’auto juorno.
 NARDILLO
 Uh mò, sta cosa vosta!
870Dimmello core mio.
 PALOMMA
 Ora voglio fà io; stà facce tosta.
 La vi’ chesta? Pe ttè...
 TERESELLA
                                          Non nce so dire. (à Palomma.)
 NARDILLO
 Di’, di’.
 PALOMMA
                 Dice, ca tù la faje morire.
 TERESELLA
 Uh’ negra mè.
 NARDILLO
                             Dà vero, ò m’abburlate?
 TERESELLA
875Ora già, che ll’aje ditto. (à Palomma.)
 Non te dic’auto: agge de mè piatate.
 Ca spanteco pe ttè; pe ttè me strujo.
 NARDILLO
 (Oh’ mmalora!) Palomma, che nne dice?
 PALOMMA
 Tù si ’patrone de lo core tujo.
 TERESELLA
880Parla ccà, mò co ’mico.
 NARDILLO
 Gnorasi, non mè movo.
 PALOMMA
 Sgrato; l’ammore antico
 Vuo’ lassà pe lo nuovo?
 TERESELLA
 Tienememente sulo.
 PALOMMA
885Tù saje sì t’aggio amato.
 TERESELLA
 Io non te cagnarria pe no fegliulo.
 PALOMMA
 Core mio?
 TERESELLA
                       Fato bello?
 NARDILLO
                                             Io so’ mbrogliato.
 
    Mmiezo à buje fatelle belle
 So’ nò fierro già nfocato;
890E buje site li martielle,
 Che battite à buonnecchiù.
 
    Ma non date tanto forte;
 Ca tù m’aje già sdellommato: (à Teresella.)
 E la morte
895Mia si tù. (Palomma.)
 
 SCENA XII
 
 PALOMMA, e TERESELLA.
 
 PALOMMA
 Ah, ah, ah, nc’aggio avuto proprio gusto.
 TERESELLA
 Iusto commo faje tù, volea fà isso.
 PALOMMA
 E comme?
 TERESELLA
                       Nce voleva à tutte doje.
 Iusto comme vuo’ tù D. Peppo, e Luccio.
 PALOMMA
900Che non faceva buono?
 TERESELLA
 Ora lloco mò scusame: stà cosa,
 Commo se pozza fà no la ntenn’io.
 PALOMMA
 Quanno la vuo’ sapere,
 Tù spiancello à chisto core mio.
 TERESELLA
905Donca ssò core tujo
 Sarrà na carta janca,
 Che ogn’uno nce pò fà lo nomme sujo!
 PALOMMA
 Ogn’uno! sti duje schitto.
 TERESELLA
 Ma commo stanno nzieme?
 PALOMMA
910Io no lo saccio; Ammore ncè ll’hà scritto.
 TERESELLA
 Ma chille non nè stanno
 Contiente de st’ammore.
 PALOMMA
 Io già lo bedo; e chisto è lo malanno!
 TERESELLA
 E tu ntanto ame chisto, ed ame chillo!
915Comme foss’uno?
 PALOMMA
                                    Cierto.
 TERESELLA
 E comme faje?
 PALOMMA
                               Lo buo’ sapè?
 TERESELLA
                                                          Sì dillo.
 PALOMMA
 
    Comme ride
 Lo sciorillo
 Si lo vide
920Co duje viente
 Miezo all’erva pazzeja.
 
    Accossì stò core mio
 Stace miezo à li contiente
 Quanno chisto, e quanno chillo
925Me lo fanno sosperà.
 
 SCENA XIII
 
 TERESELLA sola.
 
 TERESELLA
 St’ammore de Palomma, è na Commedia
 Ma D. Peppo, né Luccio
 Se vedono venire:
 Troppo vanno tricanno;
930Lassamenne trasire,
 Ca si veneno pò, ’me chiammarranno. (trase.)
 
 SCENA XIV
 
 D. PEPPO, e MASILLO.
 
 D. PEPPO
 Lassammo la pazzia:
 Ccà propio te le dette.
 MASILLO
 Mme faccio maraveglia d’ussoria!
935Uscìa mm’hà dato quatto doppie?
 D. PEPPO
                                                                E sette.
 MASILLO
 Bonora vi ca simmo galantuommene.
 D. PEPPO
 E perche simmo tale
 Mme faje scì da li panne:
 Ccà propejo te le dette nnanze à ’soreta.
 MASILLO
940À ’sorema! ò dejavolo!
 Io sorema non ll’aggio vista ancora!
 D. PEPPO
 Ancora non ll’aje vista?
 MASILLO
 Nò.
 D. PEPPO
           Vattenne Masillo à la bonora;
 Ca tù mmè faje venire
945Lo mmale de la luna.
 MASILLO
                                         E tù mme faje
 Venì li flate.
 D. PEPPO
                          Ora vi’ che lotano!
 MASILLO
 Ccà non ncè vonno lotane D. Peppo.
 Io songh’Ommo ’norato:
 Si mme l’avisse dato
950Non te le ’negarria.
 D. PEPPO
                                      Siente; se sape
 Chi si tù, chi so’ io.
 MASILLO
                                      Mmalora! oje
 Perdo la libertà.
 D. PEPPO
                                ’N’auzà la voce.
 MASILLO
 All’utemo; sì è bona
 Ò nò; s’ave da rompere stà noce.
 D. PEPPO
 
955   A mmè sti sbaratte?
 A mmè ste scarole?
 Masillo: cchiù ’fatte,
 E manco parole
 Nce vonno; lo ssà?
 
960   Ssò teneremente,
 Che d’è? che bo’ dire?
 Di’; parla; vuo’ niente?
 Ca pè te servire
 So’ llesto, so’ ccà.
 
 SCENA XV
 
 MASILLO sulo, pò TERESELLA, che s’affaccia.
 
 MASILLO
965Ora vi’ si la gliannola
 Pò ntricà n’arravuoglio
 Cchiù mbrogliato de chisto? Teresella
 Dice ca nnè stà ntesa: tozzolammo (tic.toc.)
 Si ncè pensasse potarria mpazzire:
970E chesta manco non nce vo’ sentire (tic.toc.)
 Io doppie? vide vi’, che betoperio!
 TERESELLA
 Ih scura mè Masillo. (s’affaccia, e se retira.)
 MASILLO
 Nò, oje ll’aggio da fà quarche streverio.
 TERESELLA
 Streverio! E bà ca mo saglie ccà ncoppa
975Mo ’me varrejo bona, e non responno. (trase.)
 MASILLO
 Mmalora! chesta fosse morta? oje suonno (tic.toc.)
 E manco? sarrà sciuta.
 Mala tenca quernuta;
 Chesta nò ncè! lo sì Nardillo, e Marzia
980Diceno, ca so’ pazzo:
 D. Peppo, ca mm’hà dato quatto doppie!
 Chesto, che d’è? n’aggrisso
 Nc’avarrà da soccedere:
 Io vao mpazzia stò fora de me stisso!
 
985   Stò comm’à nò ncantato,
 Storduto,
 Nzallanuto!
 Chesto che d’è? ch’è stato?
 Sciorte, che buo’ da mè?
 
990   Non saccio commo fare!
 Stà cosa m’arroina.
 Mà chesto non pò stare,
 Si è porvera, ò farina
 Mò mò s’hà da vedè!
 
 SCENA XVI
 
 LUCCIO, MARZIA, e pò D. PEPPO.
 
 LUCCIO
995Veramente D. Peppo, è no gran cano!
 Si avess’io la fortura
 D’essere tanto animato
 Da la sia Marziella
 Me stemmarria vejato.
 MARZIA
1000M’abburle mò?
 LUCCIO
                               Vecco D. Peppo à tiempo.
 D. PEPPO
 Oh, ddi ve guarde nzieme.
 LUCCIO
 Che d’è? nn’aje gelosia?
 Siente ammè: collicenzia d’ussoria: (parla con D. Peppo da parte.)
 Primma de ncè spassà cò ssè fegliole
1005Dammo à chesta no poco de cottura:
 Spassammoce.
 D. PEPPO
                              So’ llesto.
 Chesta propio è nà birba à derettura.
 
 SCENA XVII
 
 RECHIPPO, e li stisse.
 
 RECHIPPO
 Volite lloco nnante
 Le seggie?
 D. PEPPO
                       Nò Rechippo
1010Siente à mmè: priesto, priesto.
 Repassance ssà Vecchia.
 RECHIPPO
                                               È fatto: è llesto.
 MARZIA
 Che d’è? nc’è rota agghionta?
 D. PEPPO
 Gnornò.
 LUCCIO
                   Ccà simmo nuje. (Se la mettano mmiezo.)
 MARZIA
 Belle piezze d’annecchia senza jonta.
 RECHIPPO
1015Sia Mà: quà bona nova
 Stammatina aje avuta.
 MARZIA
 Perche?
 RECHIPPO
                  Staje de Ciardino.
 MARZIA
 Che bello fantoppino!
 LUCCIO
 Nò sia Marzia, non dice là boscia.
 MARZIA
1020Nce vole repassà porzì ussuria?
 D. PEPPO
 Che ncè vo’ repassare,
 Quann’è lo vero.
 RECHIPPO
                                 E chesto manco, è niente
 Abbesogna sentire
 D’essa mò, che nne diceno le gente.
 
1025   Nò Todisco, che ccà bene, e
 Quann’ajere te vedette,
 Sà che disse? Ey Was schön heit
 Dringt mir das hertz
 Und ist mein freüt!
 
1030   E no cierto spagnolicco,
 Che se chiamma D. Pericco
 Se mettette ngravetà,
 E pò disse: Ay cosa hermosa!
 Es un pasmo mira allà!
 
1035   Nò Franzese, che lo ntese,
 Se votaje, e responnette:
 Ah’ Mondieù qu’elle est jollie. (ridendo tutte se nnè trase.)
 
 MARZIA
 Vuje redite, e nfratanto
 N’aggio ntiso, ch’hà ditto.
 D. PEPPO
1040Diceno tutte ca tu si n’incanto.
 LUCCIO
 Ora via, nuje già simmo resolute
 Fenitela stà baja:
 Ò daje ammè Palomma.
 E te piglie D. Peppo;
1045Ò à D. Peppo daje chella
 E io me piglio a tte, ca si cchiù bella.
 MARZIA
 È beretà stà cosa? (à D. Peppo.)
 D. PEPPO
 Facimmone la prova.
 MARZIA
 E te contiente tù vocc’amorosa? (a D. Peppo.)
 D. PEPPO
1050Veramente lo core
 Mme dice, ca non vole.
 MARZIA
 E chi te vo’ lassà facce de sole!
 D. PEPPO
 Sia Palomma la toja, (à Luccio miezo ridendo.)
 Ca io non pozzo abbannonà stà gioja. (ridenno da parte.)
 LUCCIO
1055Oh’ potta! Io pe te dicere lo vero
 Puro avea sto pensiero.
 D. PEPPO
 No ncè vò auto! addove
 Aje tù maje mmeretata
 Sta bella sciorte de sposà na Fata?
 LUCCIO
1060Oh’ Dio, non dì accossì, ca tù m’accide!
 MARZIA
 D. Peppo tù m’abburle! E chisto ride!
 D. PEPPO
 Vi che fronte!
 LUCCIO
                            Che uocchie!
 D. PEPPO
 Che facce!
 LUCCIO
                      Che Mmossillo!
 D. PEPPO
 Che bocca!
 LUCCIO
                       Che Nasillo!
 D. PEPPO
1065(Oh’ che birba solenne!)
 MARZIA
 Volite fà na cosa? Jatevenne. (S’addona ca la burlano.)
 D. PEPPO
 Jatevenne? Ah crudele!
 Mò proprio, ccà mm’aje data nà stoccata.
 LUCCIO
 Ah tu ncè vuo’ vedè ccà nterra stise?
 MARZIA
1070N’aggio abbesuogno, d’essere abburlata,
 Jatevenne à Mmalora, siate accise.
 D. PEPPO - LUCCIO
 Ah, ah, ah, ah.
 MARZIA
                             Pedale: Spilacite:
 Milorde arrojenate:
 À Marzia coffejate?
 D. PEPPO
1075E tù te lo credive!
 LUCCIO
 Comme non te n’adduone, ca si lotano!
 MARZIA
 Site lotane Vuje
 Schefenzuse; briccune, maienate.
 Vedite ccà, che belle Cavaliere!
1080Pagate chi hà d’avere,
 Che ve venga la gliannola, chiattille!
 E non mè state à fà li D. Chisciotte.
 Te’ ccà, vediteville:
 Che frange! che gallune!
1085Che cappielle à la ngresa!
 Bello paro de quatre! À chi fà spesa.
 
    Vuje facite nott’e ghiuorno
 Li milord’, e li Segnure!
 Mà pò state à li callure,
1090E facite pe ghì attuorno
 Co’ Carrozze, e galesselle;
 Truffe, e Zelle
 Nquantetà.
 
    Scura Chella
1095Poverella
 Che ncè mmatte mano a buje;
 Ca se struje
 S’arrojna
 E pò comm’à nà mappina
1100Negra, e strutt’hà da restà.
 
 SCENA XVIII
 
 D. PEPPO, LUCCIO, pò TERESELLA, e PALOMMA.
 
 LUCCIO
 Ah ah, ah: poverella
 S’è corza sà!
 D. PEPPO
                          Che nne volimmo fare?
 Vasta, che nce spassammo;
 Volimmo fà lo riesto
1105Mò co ste Segnorelle?
 LUCCIO
                                          Sì, chiammammo.
 D. PEPPO
 Oh’ bella birba! ò vecco Teresella.
 LUCCIO
 E Palomma: te attiempo site asciute.
 TERESELLA
 Addio D. Peppo.
 PALOMMA
                                 Schiavo.
 Belle fegliu’: siate li ben venute.
 LUCCIO
1110Ora mo che nce simmo
 Aonite tutte quatto,
 Potimmo stabelire
 Le’cose noste.
 TERESELLA
                            Comme vuo’.
 PALOMMA
                                                       Sia fatto.
 LUCCIO
 Siente D. Peppo; Io vedo
1115Cà t’amma Teresella;
 E pe dà gusto à essa, io te la cedo.
 PALOMMA
 Che sento!
 TERESELLA
                       E biva Luccio.
 D. PEPPO
 Tu vencere mme vuo’ de cortesia,
 Ma siente Luccio, io
1120Che saccio cà pe essa puorte mpietto
 Lo core frezzejato,
 Pe nò ntè dà desgusto; no l’accetto.
 TERESELLA
 Commo?
 PALOMMA
                    E biva D. Peppo.
 D. PEPPO
 Chesto è dovere.
 PALOMMA
                                 Ò Povera fegliola!
1125Mme despejace assaje, ca rieste sola. (Coffeanno à Teresella.)
 LUCCIO
 (Chi pò tenè lo’ridere.)
 À chi tocca Palomma
 Resta mo da decidere.
 D. PEPPO
 Aje raggione: Si Luccio io già m’addono;
1130Ca muore pe Palomma;
 Veccola, pigliatella, io te la dono.
 LUCCIO
 Tu mò me la vuo’ rennere,
 Pe nò me restà obbreco.
 Ma nò; Cò tutto c’ammo assaje Palomma;
1135Perche saccio ca essa
 More pe ttè; me spoglio
 De lo passio che nc’aggio
 E te la torno à dare: io nò la voglio.
 PALOMMA
 Ma chisto non è muodo...
 LUCCIO
1140Chest’è ragione.
 TERESELLA
                                 Oh Povera fegliola:
 Mme despejace assaje, ca rieste sola!
 D. PEPPO
 Ve so’ schiavo; scusateme
 Ch’aggio da fà: Si pozzo
 Servireve à nient’auto commannateme.
 LUCCIO
1145Io non saccio, che dire!
 Si à nient’auto so’ abbele:
 Commannate ca stò pe ve servire.
 PALOMMA
 
 Cano perro tradetore.
 
 TERESELLA
 
 Cano perro ngannatore.
 
 PALOMMA - TERESELLA
 
1150Co ste Mmano.
 
 PALOMMA
 
 Te vorria scippa ssò Core.
 
 TERESELLA
 
 Te vorria straccia ssò pietto.
 
 D. PEPPO - LUCCIO
 
 Chiano, chiano
 E pecche tanto despietto!
1155Ch’aggio fatto, ch’aggio ditto?
 
 TERESELLA - PALOMMA
 
 Zitto, zitto
 Non parlà.
 
 D. PEPPO - LUCCIO
 
 E ca uscìa vo’ pazzeà.
 Pecche chiagne?
 
 PALOMMA - TERESELLA
 
1160Vavattenne
 Morte, morte levamenne
 Ca non voglio cchiù campà.
 
 D. PEPPO - LUCCIO
 
 Non chiagnite per pietà.
 
 SCENA XIX
 
 MASILLO, e pò TERESELLA da la fenesta.
 
 MASILLO
 Stò’corrivo cò’chesta,
1165Che non s’abbasta à credere! (Mostranno la casa de Teresella.)
 Ora vide a sta chiazza;
 Che nc’ave da soccedere! (Tic.toc.)
 TERESELLA
 Chi è lloco?
 MASILLO
                        Ò manco male.
 TERESELLA
 Bonora me nc’ha cota!
1170Vi commo stà stezzato!
 MASILLO
 Apre.
 TERESELLA
              Apre?... Và, e torna n’auta vota.
 MASILLO
 Fremma... Aspetta... Mmalora. (Se nne và, e chiude la fenesta.)
 Và, e torna n’auta vota!
 Ammè? à Masillo? à Frateto? À briccona!
1175Voglio scassà stà porta.
 E si nce saglio tienete pe’ morta. (dà cauce à la porta.)
 
 SCENA XX
 
 LUCCIO, e MASILLO non canosciuto da Luccio.
 
 LUCCIO
 Uh! te! Cuoppo nfumato!
 E bestuto de gala!
 Chiano, che d’è, ch’è stato?
 MASILLO
1180E uscìa, che nne vo’ fà?
 LUCCIO
                                             So’ cose cheste?
 Scassà la porta à chesta poverella?
 MASILLO
 Chest’è la casa mia vi ch’auto accunto.
 LUCCIO
 La casa toja chesta? ah, ah, ah, ah.
 Vi si ride lo Lazzaro!
1185Vi commo stace tuosto!
 MASILLO
 Uscìa chi è? da me che bo’?
 LUCCIO
                                                     Addavero.
 Fusse juto npazzia?
 MASILLO
 So’ ghiuto lo malan che dì te dia.
 LUCCIO
 (Oh Cuoppo s’è fatt’Ommo!)
1190Siente ammè Lazzarone.
 Sà perche non te chiavo nò schiaffone?
 MASILLO
 Ammè!
 LUCCIO
                  Sì, attè briccone.
 MASILLO
 Porzì? potta de nnico! miette mano.
 LUCCIO
 Si guappo puro? oh Cuoppo!
 MASILLO
1195Scippa, ò te do!
 LUCCIO
                               Bonora.
 
 SCENA XXI
 
 MARZIA, e li stisse.
 
 MARZIA
                                                Jate chiano,
 Masillo via forniscela, ch’è troppo. (se mette miezo.)
 LUCCIO
 Che Masillo, ca chisto è nò birbante.
 MASILLO
 N’auta vota?
 MARZIA
                          Mò passe troppo nnante.
 MASILLO
 Siente non voglio fà ccà na chiazzata
1200Nfrà n’aut’ora t’aspetto à la nfrascata.
 
 SCENA XXII
 
 LUCCIO, MARZIA, e pò NARDILLO.
 
 LUCCIO
 Ah ah ah, vi che pazzo!
 MARZIA
 È sopierchio bonora, è galant’Ommo.
 LUCCIO
 Chi mò? chist’è nò pazzo.
 MARZIA
 E si è pazzo, ussoria, che nne vo’ fare?
1205Attenna à coffejare
 Mò chesta, e mò chell’auta,
 Cò chillo si D. Cuorno;
 Ca ve ne pentarrite
 De chesto, che facite quarche ghiuorno.
 NARDILLO
1210(Bonora! chisto manco
 Ncè vo’ lassà sta vecchia;
 Che nvederela schitto
 Te fà venì lo vuommeco.)
 Si Luccio me n’allegro, aje buono stommeco.
 MARZIA
1215Che bo’ dì stà scarola?
 NARDILLO
 Fruscia ca mò la ncappe ssa fegliola.
 LUCCIO
 
    Fegliola, ò sfegliola
 Attè, che te mporta?
 Nn’aje, mmidia! sopporta:
1220N’è cosa
 Pe ttè.
 
    Te fà cannaola?
 Te pare callosa?
 Te tocca e lo vè?
 
 SCENA XXIII
 
 NARDILLO, MARZIA, e pò LUCCIO.
 
 MARZIA
1225Che dice mò, mesesca affummecata!
 Marrone, maro muorto; sacco d’ossa.
 NARDILLO
 Male juorno aggio fatto!
 MARZIA
 Ascio spennato, arvoro caduto.
 Lemmonciello spremmuto:
1230Travo fraceto, mosta de Taverna.
 Smorfeja...
 LUCCIO
                        Nò cchiù sia Marzia.
 
 SCENA XXIV
 
 CUOPPO vestuto da Pazzo, ch’è scappato dall’Incurabele, e li stisse.
 
 CUOPPO
 Mmalora, io non so’ pazzo, e à l’Incurabbele,
 Li Pazze mme facevano mpazzire;
 E nn’aggio fatto poco, pè foire;
1235Tè tè, vecco l’ammice
 Le boglio fà stà frische
 Che se fà lloco? ben trovate nzemmora (Li viecchie vonno fuì.)
 Segnure mieje... Nò, non foi, trattienete (à Nardillo.)
 Tenga ussoria chest’autra. (à Luccio.)
 NARDILLO
1240Lassa, ca ncè so cierte, che mmè vonno.
 CUOPPO
 Statte: Bella scappata,
 Ch’aggio fatto si Luccio.
 LUCCIO
 Comme? pò non si chiuto a la nfrascata?
 CUOPPO
 A chi?
 LUCCIO
               Attè, t’è passata
1245La voglia de mm’accidere?
 CUOPPO
 À chi?
 LUCCIO
               Attè, chesta porta
 Nò la vvo’ cchiù scassare?
 CUOPPO
 À chi?
 LUCCIO
               Attè. Teresella
 Nò la vvo’ cchiù scannare?
 CUOPPO
1250À chi?
 LUCCIO
               Attè.
 CUOPPO
                           Aspe’ và chiano
 Ajuta ccà nà mano. (Dice à lo viecchio, che l’ajuta à levà la veste de Pazzo.)
 MARZIA
 Vi’ ca chisto nc’arrefila.
 NARDILLO
                                             Che buo’ fà?
 CUOPPO
 Agge pacienzia, piglia; nfila, nfila: (vo’ mettere la veste soja à Luccio.)
 Ca te stà meglio attè, che a mme. Nfrascata!
1255Accidere! scannare! oh poveriello!
 Io vao vestuto janco, e tu si pazzo, ah, ah, ah.
 LUCCIO
 Sell’hà ghioquato già lo cellevriello!
 Schiavo, ch’aggio da fare. (se ne vo’ ire.)
 CUOPPO
 Aspe’ n’auto tantillo.
 LUCCIO
1260Nò, nò: te può spassare
 Co la sia Marziella, e co’ Nardillo. (Luccio se nne và, e li viecchie pure se ne vonno ire, mà isso le tene.)
 CUOPPO
 Non ve partite vuje. (auza la mazza.)
 Ca ve spacco la Capo a tutte duje.
 (Già, che so’ pazzo; voglio
1265Fà da pazzo;) accostateve.
 MARZIA
 Nigre nuje sfortonate. (s’accostano.)
 NARDILLO
 Che buo’?
 MARZIA
                      Che nce commanne?
 CUOPPO
 Io ve voglio contà ciento mazzate.
 
 Attè primmo vecchiummone.
 
 MARZIA
 
1270Si Masillo compassione!
 
 CUOPPO
 
 E pò appriesso attè Nardillo.
 
 NARDILLO
 
 Compassione si Masillo.
 
 CUOPPO
 
 (Si Masillo! che spassetto!)
 Leva leva... ncapo... mpietto.
 
 MARZIA - NARDILLO
 
1275Nò non fare pe pietà.
 
 CUOPPO
 
 Io ve voglio sdellommà.
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional