Opera Buffa Napoli 1797 - 1750
  
  
 Lo simmele, Napole, [s.e.], 1724
 a cura di Paologiovanni Maione
 
 
 
paratesto ATTO PRIMO ATTO SECONDO ATTO TERZO Apparato
 
 ATTO TERZO
 
 SCENA I
 
 D. PEPPO, LUCCIO, e pò MARZIA.
 
 D. PEPPO
 Non poteva ghi meglio
 Là burla.
 LUCCIO
                    Veramente.
 D. PEPPO
 Oh ca volimmo stare allegramente.
 LUCCIO
1280Femmene poverelle!
 Nce restajeno corrive le scuresse.
 D. PEPPO
 Chesto nce vo’ cò chesse;
 Ca si vaje co lò buono;
 Ò te fanno Giovanne, ò si cappotto!
 MARZIA
1285(Oh che duje brave accunte!
 Se nne pò fare agniento pe lò’cuotto.)
 LUCCIO
 Facimmonce li cunte,
 Ca cheste nce la fanno, e nce so’ guaje!
 D. PEPPO
 Pe la fare à D. Peppo nce vo’ assaje!
 MARZIA
1290Nè? de cchiù? E ment’è chesto:
 Ve voglio conzolare;
 Mò ve faccio vedè, che saccio fare:
 Uh! figlia sfortunata poverella.
 Uh! negrecata, e scura Teresella.
 D. PEPPO
1295Ch’è stato?
 LUCCIO
                        Ch’è socciesso?
 MARZIA
                                                      Ah cane perre
 Lloco state! Justizia:
 Abbesognante mette mano à fierre.
 D. PEPPO
 Ll’aje co’ nuje?
 LUCCIO
                               Via spapura.
 MARZIA
 È morta negra mè Palomma scura,
1300E Teresella!
 D. PEPPO - LUCCIO
                         E comme?
 MARZIA
 Cane arraggiate, pe l’ammore vuosto.
 D. PEPPO
 Bonora!
 LUCCIO
                  E de che muodo?
 MARZIA
 Dice, cà che sacc’io,
 Che ’contratiempo, che l’avvite fatto;
1305E lloro desperate
 Tutte doje nnitto nfatto,
 Dinto à lo puzzo mio se so’ ghiettate.
 
 Frabutte, Malenate, Malarazza!
 Pè bolere venire appriesso à buje
1310So’, morte le doje fate de stà chiazza.
 (Ah, ah, comme so’ llocche tutte duje!)
 
 SCENA II
 
 D. PEPPO, e LUCCIO.
 
 D. PEPPO
 Aje ntiso?
 LUCCIO
                      Aje fatto assaje!
 D. PEPPO
 Te pare poco guaje?
 LUCCIO
 E che nce corpo io?
 D. PEPPO
1315Sì, tù fuste lo primmo, che mettiste
 Ncampo, stà cosa de le coffejare.
 LUCCIO
 E tu perche mmè diste
 Lo capo de lò’fare?
 D. PEPPO
 Luccio: stò desperato;
1320Non chiammà viento a’mare.
 LUCCIO
 Io non saccio, che biento vaje vennenno!
 Mmalora...
 D. PEPPO
                       Statte Luccio,
 Ca sà quanto mme pare mò? na mosca.
 LUCCIO
 E tù ammè no moschillo.
 D. PEPPO
1325Ora chesto mò è troppo, e ment’è chesto,
 Miette mano a stà spata.
 LUCCIO
                                               Eccome lesto. (Se vatteno.)
 
 SCENA III
 
 PALOMMA, TERESELLA, e li stisse.
 
 PALOMMA
 (Bonora, che d’è chesto?)
 TERESELLA
 (Ih’ cacciata de mano!)
 PALOMMA
 Fremmate.
 TERESELLA
                        Jate chiano. (Le tratteneno, e loro restano maravegliate.)
 PALOMMA
1330Che d’è?
 TERESELLA
                    Che’cera storta!
 LUCCIO
 Si biva?
 D. PEPPO
                   Non si morta?
 PALOMMA - TERESELLA
 E buje non site state accise ancora!
 D. PEPPO
 Nc’abburlato la vecchia.
 LUCCIO
                                              Accossì è stato.
 PALOMMA
 E che v’aveva ditto?
 D. PEPPO
1335Cà pe l’ammore nuosto
 Jerevo tutte doje già ghiute à mitto.
 PALOMMA - TERESELLA
 Ah, ah, ah, ah.
 PALOMMA
 E duje giuvene mò tanto aggarbate,
 Se fanno coffejare? Ih, che breogna!
 D. PEPPO
1340Che ncè vuo’ fà? so’ cose
 Ordenarie.
 PALOMMA
                        N’è chesto,
 Chi jetta spine n’arrecoglie rose.
 TERESELLA
 Via sù facite pace.
 LUCCIO
 Veramente, io vorria
1345Si à D. Peppo pejace,
 Termenà stà pazzia.
 D. PEPPO
 Non può dì meglio: Belle perdonatece,
 Ca nuje volimmo, si ve contentate,
 Fornì sse ghioje, e stare
1350Tutte quatto contiente; e conzolate.
 TERESELLA
 Ora buono: abbracciateve;
 Palomma siente ammè.
 LUCCIO
 Lo passato è passato.
 D. PEPPO
 Lassamm’ì sti taluorne.
1355Io la vorria fornire stà chiazzata.
 PALOMMA
 Ora via già la cosa è accomodata.
 Teresella è de Luccio; io de D. Peppo.
 LUCCIO
 Accossì priesto: priesto?
 PALOMMA
 E tu non saje, ca ll’ore
1360De la vita so’ corte.
 TERESELLA
 Chi sà che bene appriesso?
 D. PEPPO - LUCCIO
                                                    O bella sciorte.
 PALOMMA - TERESELLA
 
 Mò che stongo atte becino.
 
 PALOMMA
 
 La fortuna.
 
 TERESELLA
 
                        Lo destino.
 
 PALOMMA - TERESELLA
 
 Cchiù non sape, che mmè fà.
 
 D. PEPPO
1365Te nnè vvo’ ire.
 LUCCIO
                               Addove?
 PALOMMA
                                                  Mò mmò torno.
 TERESELLA
 Lo riesto lo fornimmo n’auto juorno.
 LUCCIO
 No belle, pe pietà non nc’abburlate.
 D. PEPPO
 Veccoce addenocchiate.
 LUCCIO
 Io da ccà non me soso.
 D. PEPPO
                                           Io non me levo.
 LUCCIO - D. PEPPO
1370Si la fede de sposo io non recevo.
 PALOMMA
 Terese’ che nnè dice?
 TERESELLA
                                          Che sacc’io.
 PALOMMA
 Mme pare no peccato!
 TERESELLA
 Mò torno, ca mme chiamma gnore Zio.
 PALOMMA
 Mò mò vengo, cà Mamma m’hà chiammato. (traseno tutte doje, e le lassano addenocchiate.)
 
 SCENA IV
 
 NARDILLO, pò PALOMMA, e TERESELLA e li stisse.
 
 NARDILLO
1375Che d’è belle fegliule?
 Che scavate rapeste lloco nterra?
 D. PEPPO
 Bonora si non fosse. (Se sose.)
 NARDILLO
                                        Che d’è stato?
 LUCCIO
 Ste Segnorelle nc’anno coffejato. (Se sose.)
 NARDILLO
 Ah, ah, ah, ah, n’anno potuto
1380Fà meglio affè, cierto ncè l’hà boluto.
 TERESELLA - PALOMMA (Da li barcune.)
 Ah, ah, ah, ah.
 Oh’benemio, cà ve l’avimmo fatta.
 D. PEPPO
 Stirateve lo vraccio,
 Ch’avite fatto cierto na gran prova!
 PALOMMA
1385Essere da le femmene
 Abburlate accossì n’è cosa nova.
 TERESELLA
 Mà chiste mò, che so’ li Rrì dell’uommene,
 Non ncè ponno passà pe ssà carrera.
 PALOMMA
 Ncè passano aute barve de le lloro.
 NARDILLO
1390Ma non cheste d’argiento.
 TERESELLA
 E ca fossero d’oro!
 LUCCIO
 Cheste so’ tutte chiacchiare à lo viento.
 Lo Giardino d’Ammore
 Sole dà chiste frutte.
 D. PEPPO
1395Via leva ssò remmore,
 Cà na vota ped’uno attocca à tutte.
 LUCCIO - D. PEPPO
 
 Si lo sdigno cchiù nce dura.
 
 LUCCIO
 
 Lo Destino.
 
 D. PEPPO
 
                        La Fortura.
 
 LUCCIO - D. PEPPO
 
 Vedarraje, che chiù sà fà.
 
 SCENA V
 
 NARDILLO PALOMMA e TERESELLA.
 
 NARDILLO
1400Sia Palomma te prego scinne abbascio
 Quanto te dico una, e’doje parole.
 PALOMMA
 Sarrà quarche freddura.
 TERESELLA
 Via mò scinnece via:
 Vi si agg’io stà fortura?
 PALOMMA
1405Che buo’ fà? lo si Nardo è cosa mia.
 TERESELLA
 Lo Cielo te lo guarde.
 NARDILLO
 Che d’è sia Teresella; allegramente.
 TERESELLA
 Da do’ vuo’ che mme venga st’allegrezza?
 Io stongo, che mmè roseco la rezza.
 NARDILLO
1410Perche?
 TERESELLA
                  Te pare poco?... Vasta, vasta.
 NARDILLO
 Comm’à dì?
 TERESELLA
                          Vedo chella
 Pazzeja mò co ttico:
 E io m’aggio dà stà sola solella?
 NARDILLO
 Uscìa porzì nnè vole de la quaglia?
 TERESELLA
1415Voglio la Mmala pasca, che te vatta.
 NARDILLO
 Comme decite?
 TERESELLA
                                Niente,
 Aggio nà mmidia granne.
 Cà Palomma hà d’avè tanta contiente.
 
 SCENA VI
 
 PALOMMA, e NARDILLO.
 
 PALOMMA
 Eccome si Nardillo.
 NARDILLO
                                      O Fata mia!
1420Me te vedo vecino, e no lo credo.
 PALOMMA
 Priesto ch’aggio da fare. (Palomma le passea pè nnante.)
 NARDILLO
                                               Io moro ciesso,
 Quanno non veo ssà bella facce.
 PALOMMA
                                                           Appriesso.
 NARDILLO
 Aggio perza la pace.
 N’aggio arrecietto cchiù.
 PALOMMA
                                               Me despiace.
 NARDILLO
1425Tu si no gran fraciello. (pure accossì.)
 De st’arma, e de stò core.
 PALOMMA
                                                Oh poveriello!
 NARDILLO
 Io mme sento morire. (pure accossì.)
 Doce, doce pe ttè.
 PALOMMA
                                   Ncè cchiù che dire?
 NARDILLO
 E che buo’ che te dica? Tu no juorno (puro accossì.)
1430Cierto mm’aje da fà mpennere.
 PALOMMA
 E tu mm’aje fatto scennere
 Apposta pe mmè dì sse belle cose?
 
 SCENA VII
 
 MARZIA, e li stisse.
 
 MARZIA
 Palomma?
 PALOMMA
                       Mamma mia.
 Che gusto, ch’aggio avuto
1435De la burla ch’aje fatto a ssi Segnure.
 NARDILLO
 (E sempe ntuppe.)
 MARZIA
                                      E si ncè ll’hà boluto.
 NARDILLO
 Schiavo sia Marzia.
 MARZIA
                                      Schiavo si Nardillo.
 NARDILLO
 Mannala ncoppa. (à Palomma.)
 PALOMMA
                                   Mò.
 NARDILLO
                                             Vi ca pò è tardo.
 MARZIA
 Che gusto bene mio.
 NARDILLO
1440Ora io mò...
 MARZIA
                         Ncè steva lo si Nardo?
 PALOMMA
 Nò.
 NARDILLO
           Te voleva schitto,
 Dire, ca st’arma...
 MARZIA
                                   E lloro ch’anno ditto?
 PALOMMA
 Considera.
 NARDILLO
                       Fà ll’ascio. (à Palomma.)
 Si tu vedisse... (Nardillo fà atte de mpacienzia ca non pò parlare.)
 MARZIA
                               Stive ncoppa, ò abbascio?
 PALOMMA
1445Abbascio.
 NARDILLO
                     Io t’assecuro
 Ca n’auto Nardo...
 MARZIA
                                    E Teresella puro?
 PALOMMA
 Cierto.
 MARZIA
                Che sfazione!
 NARDILLO
 (Mò se rompe la strenga a lo Cauzone.)
 PALOMMA
 È accossì? (à Nardillo.)
 NARDILLO
                       Voglio dire...
 MARZIA
                                                 È chiuso ncoppa?
 PALOMMA
1450Gnorsì.
 NARDILLO
                 (Che fuss’accisa.)
 Si Tù...
 MARZIA
                 Nnè staje contenta?
 NARDILLO
 (Oh mmalora ammutiscela.)
 PALOMMA
                                                       (Che risa.)
 MARZIA
 Si Nardo mio, che gusto: ssi Milorde
 So’ benute pe grano,
1455E nc’anno pò lassato
 Li sacche.
 NARDILLO
                     Cierto, è stato gran servizio.
 Or’io... (à Palomma.)
 MARZIA
                 Siente si Nardo.
 NARDILLO
 (Oh Dejavolo tuorcela.)
 PALOMMA
                                             Che sfizio.
 MARZIA
 
    Scarfaseggie negrecate!
1460Lloro vanno pè tosare,
 E po restano arrappate:
 Ch’abburlare
 Non se pò
 Co le femmene de mò,
1465Ca la fanno tutt’affè?
 
    Ncè lo bole, e gran servizio
 Coffejà ssi Segnorielle;
 Ch’anno mò nò brutto vizejo
 De ngannà le poverelle,
1470Schette, e bone comm’ammè.
 
 SCENA VIII
 
 NARDILLO, e PALOMMA.
 
 NARDILLO
 Mò pò esse, che pozza...
 PALOMMA
 Or’io te parlo chiaro.
 Si tu vuo’ ì ncarozza
 Comme ncè vanno ss’autre’nammorate,
1475Si lo patrone; ma è breogna frate!
 NARDILLO
 E tu portame mbraccie.
 PALOMMA
                                              Pise troppo.
 NARDILLO
 Portame pe la mano.
 PALOMMA
                                         Ih, che Nennillo!
 NARDILLO
 E tu fà n’auta cosa:
 Afferrame, te ccà, pe stò detillo.
 PALOMMA
1480Oh benemio! Si Nardo si nzostuse.
 NARDILLO
 Io nè?
 PALOMMA
               Cierto, gnorsine:
 Si’ propio no moschillo tedejuso.
 NARDILLO
 
    Eh! s’io fosse nò moschillo!
 Propejo mmiezo a ssa faccella
1485Te darria no mozzechillo!
 E pò ncoppa à ssa manella
 Quanta vase vorria dà.
 
    E la notte Nenna mia
 Co le’granfe, e co le scelle
1490Te vorria
 Chiss’uocchie belle
 Sempe, sempe trommentà.
 
 SCENA IX
 
 PALOMMA sola.
 
 PALOMMA
 Ll’erva che non vorria, me nasce all’uorto.
 Chisto da mè vo’ ajuto,
1495Quann’io vorria, nè pozzo avè confuorto.
 Luccio, Luccio: D. Peppo:
 Perche ve ne redite,
 De chesta sciamma mia?
 Perche l’avite posta, vuje mpazzia?
1500Che raggia! che despietto!
 Che tormiento! che nfierno!
 Tengo dinto à sto pietto.
 Sì vuje furie, vuje mostre,
 Stracciateme stò core,
1505Sbranateme... ma nò!
 Mora lo tradetore
 Che mm’hà ngannato... chi D. Peppo? ò Luccio?
 Sì, tutte duje: ma comme pozzo farlo!
 Ah me sento morire:
1510Stò fora de me stessa, io co chi parlo?
 
    Stò, scura me, sperduta
 Dinto
 A no laborinto!
 Da dove so’ trasuta;
1515Qual’è la via p’ascì?
 
   La strata, non se vede:
 Lo filo no lo trovo:
 Lo pede
 Si lo movo;
1520Non saccio addove ì.
 
 SCENA X
 
 D. PEPPO, e CUOPPO.
 
 D. PEPPO
 Ma tu si corejuso, mo te vieste
 De na manera, e mo de n’auta!
 CUOPPO
                                                           E uscìa
 Ha fatto arrore cierto.
 D. PEPPO
 E lo parlà ch’aje fatto à lo sproposeto?
 CUOPPO
1525Co chi?
 D. PEPPO
                 Commico.
 CUOPPO
                                      Quanno?
 D. PEPPO
                                                         Ccà mo nnante.
 CUOPPO
 Ah, ah, ah, ah, levate la pazzia.
 D. PEPPO
 Eh... mo sà che schiaffone te darria?
 CUOPPO
 Ammè? mme so’ favure li trapazze,
 Che me face D. Peppo;
1530Eccome ccà; reventame de mazze.
 D. PEPPO
 Ora vi’ che parlare defferente
 A chello de mò nnante!
 Tu mm’aje negato mò le quattro doppie?
 CUOPPO
 Ammene? e uscìa non se vo’ fà capace:
1535Scompimmolo sso lotano
 Damme quatt’aute doppie, e stammo pace.
 D. PEPPO
 Io te le do; mà siente;
 Si tu pò mme le nieghe?
 CUOPPO
 Tanno famme zompà tutte li diente.
 
1540   Si cchiù t’addimanno
 Tu pigliame à schiaffe:
 (De riffe, e de raffe
 Besogna campà.)
 
    (si dura sto nganno
1545Mme faccio Barone.)
 Uscìa mmè patrone
 Segnore, e se sà.
 
 SCENA XI
 
 D. PEPPO, e TERESELLA.
 
 D. PEPPO
 Chisto mme fà mpazzì. Sia Teresella
 Mò stammo parapatta:
1550Scompimmola stà baja
 Lò passato, è passato,
 Ca dinto all’arma sento,
 De non t’avere ammato.
 TERESELLA
 À che te serve mò ssò pentemiento?
 D. PEPPO
1555Serve perche te voglio
 Da mo nnè nnanze ammare, anze servire.
 TERESELLA
 Donca, vuo’ da sto core
 Quanno te pare à tte, trasire, e scire!
 D. PEPPO
 Sì; perche me n’aje dato lo possesso.
 TERESELLA
1560Ma tù non ll’aje voluto.
 D. PEPPO
 È beretà; ma mò, me so’ pentuto.
 TERESELLA
 Eh! si lo pentemiento
 Vastasse a placà ll’ira
 De chi offesa se sente;
1565Lo fà bricconarie, non farria niente!
 Siente a mmè.
 D. PEPPO
                              Và decenno.
 TERESELLA
 Quann’io D. Peppo amaje,
 E D. Peppo fojeva;
 Io stò core sforzaje
1570Pe te potè odejare, e non poteva:
 Ma mò che t’odio già; si st’arma mia
 Sforzasse pe t’amà, non potarria.
 
    Quanno
 Tiranno
1575Sgrato
 Aggio
 pregato
 E chianto
 Non’mme volive Tù?
1580E mò che tù mmè vuo’,
 No’nte vogl’Io.
 
    Si Tù pretienne ntanto
 De dare legge a mmè,
 Te nganne nigro Tè:
1585Non ncè penzare cchiù;
 Ca Legg’io schitto do’
 À lo core mio!
 
 SCENA XII
 
 RECHIPPO, e D. PEPPO.
 
 RECHIPPO
 Si D. Peppo, me faccio maraveglia
 D’ussoria, che sopporta
1590Chesso da stà segnora:
 Chi sà, che nne dirranno le becine?
 D. PEPPO
 Che ncè vuo’ fà, so’ Femmene a la fine.
 RECHIPPO
 Ma che pastiggio dette a la sia Marzia.
 D. PEPPO
 Sì, mme faciste ridere.
 RECHIPPO
1595Che pazza, poverella:
 Ha na facce d’Aloja,
 E tenuta vo’ essere pe bella.
 Mà che! Io ve servette co le mmaneche.
 D. PEPPO
 T’aggio ntiso! Vi comme si chiappino
1600Te ccà.
 RECHIPPO
                Non è pe chesso...
 Non serve ajebò...
 D. PEPPO
                                    Te ccà stò lioncino.
 Che d’è tù faje lo musso stuorto?
 RECHIPPO
                                                              Io?
 D. PEPPO
 Siente Rechippo mio,
 Aje no vizio, che sempe cercarrisse:
1605Te ccà st’auto pezzotto.
 RECHIPPO
 Vi si è comme dich’io? vuje ncè corpate;
 Perche senza cercà, me regalate.
 D. PEPPO
 È bero, ma tù si’ troppo nzostuso.
 RECHIPPO
 Compatiteme lloco
1610Vuje sempe date, e nc’aggio fatto ll’uso.
 
    Lo cacciottiello
 Quanno receve
 No carezziello;
 Non te lo lieve
1615Da tuorno cchiù.
 
    Vuje mò jettate
 E j faccio ll’ascio:
 Pecche le’date
 A bottafascio,
1620À buonnecchiù.
 
 SCENA XIII
 
 D. PEPPO, e pò MASILLO.
 
 D. PEPPO
 Non dice male, comme stò corrivo!
 Potta so’ Io no ruonto, (esce Masillo.)
 Che do grannezza à brenzole,
 Che prego ssà cajotola;
1625Oh’ te, tè! Teresella!
 Mappina posta mperteca!
 MASILLO
 A si D. Peppo, non aje meglio termene
 Quanno nnuommene sorema?
 D. PEPPO
 E battenne a diaschence
1630Nn’aggio golio de smorfie;
 Tù vaje facenno maschere
 Cagnannote vestite; e io mme roseco.
 MASILLO
 Ora ccà no ncè vonno tanta lotane;
 Uscìa, che bole da la casa mia?
1635Uscìa, me vo’ pagare;
 Ò jammo nvecaria?
 D. PEPPO
 (Chisto vo’ ch’accommenza a schiaffejare!)
 Quanta schiaffune vuo’? parla? tu stisso
 T’aje fatta ssà connanna
1640Mò che quatt’aute doppie t’aggio dato.
 MASILLO
 A mme quatt’aute doppie?
 A mmè? vi s’aje sciacquato,
 Và vommeca D. Peppo.
 D. PEPPO
 De cchiù! mò mm’aje frusciato lo cauzone:
1645Che aggio da servire
 Pe spassatiempo tujo?
 Tè... (va pe le dare no schiaffo, e Masillo caccia no stelletto.)
 MASILLO
             Mmalora, la voglio mò fornire.
 D. PEPPO
 Ah’ cano. (se fa arreto.)
 
 SCENA XIV
 
 NARDILLO, e li stisse.
 
 NARDILLO
                     (Ajemmè lo pazzo
 Ncuollo a figliemo!) fremma. (afferra Masillo.)
 MASILLO
1650Levate si Nardillo;
 Lassammillo scannare.
 D. PEPPO
 Levate Gnore.
 NARDILLO
                             Nfodera ssà spata
 Tanto poco respetto
 Nnanze ammè? stipa Mase ssò stelletto:
1655Vattenne và, fa comme te dich’io.
 MASILLO
 Siente a mmè nnanze notte
 Te voglio fà vedere chi songh’io.
 
 SCENA XV
 
 D. PEPPO, e NARDILLO.
 
 NARDILLO
 E tù vaje a mmettere
 Co chisso, ch’è mpazzuto?
 D. PEPPO
1660Chello ch’è socceduto
 N’è niente a chello, ch’ave da succedere.
 Negarme nfacce? chisto
 Mmè porta a precipizejo.
 NARDILLO
 Bell’ommo de jodizeio;
1665À contrastà co uno, che ll’ha perzo!
 D. PEPPO
 Ah’ca io ll’aggio perzo assaje cchiù d’isso.
 NARDILLO
 Eh’ st’ammore... st’ammore...
 D. PEPPO
 St’amore, malannaggia
 Chi non nce stà soggetto.
 NARDILLO
1670(A mmè bene stà botta.)
 E tù fuje l’appretto.
 D. PEPPO
 Che’buo’ foj; quann’isso te ncè votta?
 
    Ah’cà st’Ammore,
 Gnore
1675Tutte soggette vo’:
 Chesto lò sacc’io mò,
 Lò ssà ussoria.
 
    Isso pè no squasillo
 Nò chianto, nò resillo,
1680Pe no sospiro, sà
 Tutte ncè fa schierchià
 Jammo mpazzia.
 
 SCENA XVI
 
 LUCCIO, CUOPPO, e NARDILLO.
 
 LUCCIO
 Vattenne Cuoppo, ca tù oje’mè faje
 Votà lo mmale, e può passare guaje:
1685Tù te vuo’ peglià gusto
 Co chella sciammerghella, che t’haje fatto:
 E nò nte resce.
 CUOPPO
                              Quà sciammerga?
 LUCCIO
                                                                 E sidece. (Nardillo tenemente chino de maraviglia à Cuoppo dice nfrà se stisso.)
 CUOPPO
 Siente si Luccio mio.
 NARDILLO
 (Songh’io, o non songh’io!)
1690Chisto non è sagliuto mò ccà ncoppa!
 Co’n’auta sciammerghella! nò quà sbaglio
 Cierto ncè ccà. Masi’ famme favore
 Tù mò non si sagliuto ccà?
 CUOPPO
                                                  Tù staje
 Zì viecchio mio mpeciato
1695Dà stammatina.
 NARDILLO
                                 Io nè? schiavo obbrecato.
 CUOPPO
 Si Luccio, io me nne vao: uscìa mme spenna
 Pe quanto vaglio. (se nnè và.)
 NARDILLO
                                   E io.
 Mò mme voglio chiarì de sta facenna. (se nne và appriesso a Cuoppo.)
 
 SCENA XVII
 
 LUCCIO sulo.
 
 LUCCIO
 Abbesognante, che sto si Masillo
1700Sia quarc’uno, che tutto
 S’arresemeglia a Cuoppo;
 Perche sta cosa ccà, me pare troppo!
 Cierto, ca stà jornata
 S’ave da tenè a’mente pe no piezzo,
1705Cossì pe’chisto; commo
 Pe stè belle fegliole
 Che già co la pazzia
 Nesciuna cchiù nce vole:
 Autro nzomma, che pene, autro ch’affanno
1710Non sente chi vo’ ire
 Co ste belle fegliole pazzejanno.
 
    Chi pazzeja co lè rose,
 S’ha da pognere à la fine,
 Co le spine,
1715Che nce so’.
 
    E chi troppo pazzejanno
 Co le femmene vo’ ire
 Quarche danno
 Hà da soffrire;
1720Pate chello che non vo’.
 
 SCENA XVIII
 
 LUCCIO MARZIA; NARDILLO, e MASILLO.
 
 LUCCIO
 Oh! non vi Cuoppo! mà che Cuoppo? chillo
 Se nne ghiuto da ccà. (vedenno Mase, che s’affaccia à la fenesta.)
 MARZIA
                                          Tè, tè Masillo.
 Ncopp’à la Casa! e io
 Ll’aggio visto ccà nnante!
 MASILLO
                                                Oh Patron mio (à Luccio. Esce lo viecchio, e stà à sentire.)
1725Bell’Ommo puntuale,
 Comme lesto veniste à la nfrascata!
 NARDILLO
 Ah, ah, ah.
 MARZIA
                       Che ncè si Nardo?
 NARDILLO
                                                          Oh Dio
 Lassatemenne fare na resata ah, ah, ah,
 Sentiteme, sentite. (se mette mmiezo.)
 MASILLO
1730Mò volimmo chiarire ste partite. (trase dinto.)
 NARDILLO
 Ccà nc’è no cierto Lazzaro...
 LUCCIO
 Si che se chiamma Cuoppo,
 E tutt’à Mase ccà s’arresemeglia.
 MASILLO
 Tu addonca lo sapive...
 LUCCIO
1735Chest’è la maraveglia!
 Ca io sapeva Cuoppo
 Mà stò Masillo no lo canosceva.
 MASILLO
 Sì, mà fratanto chillo pover’Ommo
 Già ghiette all’Incurabole.
 LUCCIO
1740E abbuscaje cierte bacole.
 MARZIA
 Nn’aggio piatà; mà me nne vene à ridere.
 
 SCENA XIX
 
 D. PEPPO co na mazza vattenno CUOPPO che lo crede Masillo, pò PALOMMA, e pò TERESELLA.
 
 CUOPPO
 Gente ajuto sarvateme... (se mette miezo a li viecchie.)
 D. PEPPO
 Levateve da lloco.
 Lassatemenne sazejà de mazze.
 CUOPPO
1745M’acciso bene mio. (fuje dinto à lo Cafè.)
 NARDILLO
 Vide ch’aje fatto arrore.
 PALOMMA
 Che d’è? sempe remmore.
 D. PEPPO
 Lassamillo scompire. (Vedendolo dinto à lo Cafè.)
 CUOPPO
 Tenitelo bonora. (Strillanno da dinto.)
 NARDILLO
1750E stà à sentire. (à D. Peppo e lo tene.)
 TERESELLA
                               Che nc’è D. Peppo?
 D. PEPPO
                                                                    Aggio
 Scotolato li panne
 A lo si frate tujo.
 TERESELLA
 Quanno?
 D. PEPPO
                    Mò propio.
 TERESELLA
                                           Ah, ah, ah, chillo stace ncoppa.
 NARDILLO - MARZIA
 Ah, ah, ah.
 LUCCIO
1755Mò quanto vedo ccà, che bo’ st’Ammico
 E be vengo à contà tutto lo ntrico. (trase.)
 
 SCENA ULTEMA
 
 Tutte, e esce MASE cò la spata mmano contra à LUCCIO.
 
 MASILLO
 Addov’è sto si guappo? (và trovanno Luccio.)
 NARDILLO
 Fremma. (à D. Peppo che bo’ dare à Mase, credennolo Cuoppo.)
 MASILLO
                      Oh! ca fuje! potrone! (vedenno Luccio che và dinto.)
 D. PEPPO
 Mmalora mme coffeja.
1760Mò co ll’auto vestito! (tenenno mente à Mase.)
 MASILLO
 Io lo voglio arrevare...
 TERESELLA
                                          Nò Masillo.
 D. PEPPO
 Or’io... (Vo’ ire appriesso à Masillo e Palomma lo tene.)
 PALOMMA
                 Addo vo’ ire.
 NARDILLO
 Fremma lloco te dico, e stà sentire (à D. Peppo.)
 Chillo ch’aje mazzejato (mostra Cuoppo dinto lo Cafè, e tutte lo mirano co maraviglia.)
1765No lo vide llà dinto.
 D. PEPPO
 Mà commo.
 TUTTI
                         Oh chest’è bella!
 TERESELLA
                                                         Oh! chist’è chillo,
 Che pareva Masillo.
 MARZIA
 Appunto.
 NARDILLO
                     Lo sapive?
 TERESELLA
                                           Me lo mmaceno
 Da le parole de Masillo stisso.
 NARDILLO
1770Ora chisto... aggio ntiso,
 È simmele à Masillo, e pe stà cosa
 So’ socciesse sti sbaglie.
 LUCCIO
                                              Vuo’ vedere (Esce parlanno con Masillo.)
 Masillo speccecato (mostra Cuoppo, che stà dinto à lo Cafè.)
 Eccolo llà!
 MASILLO
                      Cierto no ncè che dire.
 PALOMMA
1775Oh! s’è puosto à foire. (fegne vedè Cuoppo che fuje.)
 MASILLO
 E perche?
 D. PEPPO
                      Ch’hà paura
 De mme restetoire l’otto doppie,
 Che l’aveva già dato,
 Nce le dono.
 TERESELLA
                          Nigr’isso sfortunato!
 TUTTI
1780Ah, ah, ah.
 LUCCIO
                       Ora già si Masillo
 Che stà cosa è chiaruta,
 Volimmo essere Ammice, anze pariente?
 MASILLO
 Tutto chello, che buo’.
 LUCCIO
                                          Si te contiente
 Fà, che Soreta sia
1785Ogge mogliere mia.
 D. PEPPO
 Chiano, ca tutte quante
 Nc’avimmo d’acquietà. Sia Marziella
 Si non ll’aje à desgusto
 Io Palomma vorria:
1790Mperò, si vo’ lo Gnore.
 MARZIA
                                            Io ll’aggio à gusto.
 LUCCIO
 Teresella, che dice?
 TERESELLA
                                      Si lo Cielo
 Ll’hà destenato io so’ contenta.
 LUCCIO
                                                          O Cara!
 D. PEPPO
 E tu Palomma?
 PALOMMA
                               Io puro
 Dico lo stisso.
 NARDILLO
                            E io resto à lo scuro.
 D. PEPPO
1795La sia Marzia se sà, ch’è de Masillo.
 NARDILLO
 Nzomma sempe li Viecchie
 Vanno pe sotta, ò restano da fora.
 TUTTI
 
    A godere, à godere à la bonora,
 Jammo tutte à godè allegramente
1800Li contiente
 Che Ammore ncè dà.
 
    E cò feste, co suone, e co cante
 Tutte quante
 Via jammo à scialà.
 
 Scompetura.
 
 
 
 
 
 
 
 
 
 
 
 
 
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional