Lo Spellecchia

Lo Spellecchia, Napoli, pe Mechele Loise Muzio, 1709

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO I

SCENA PRIMMA

Padula addove è lo nciegno de dare ll’acqua, quacche pagliaro co canto d’aucielle continuo.

PORZIA, e SAPATELLA colle Zappe mmano, e zappano.

Aria a la stesa.

A DUE

O quanto è meglio a sta, co sciure, e aucielle,

Che prattecà co scuffie, e Perocchine

So’ li confiette nuoste l’aglietielle,

Lo zuccaro de Cannia li lopine.

SAPATELLA

Nnanze che bene Mamma sore mia,

Scompimmo d’acchianare sto terreno,

Ca nzanetate nosta arrassosia.

Se vene, e no lo bede: ch’è zappato,

Nuje nce potimmo fa na casa ncielo.

Tu saje comm’è arraggiata,

Abbasta di’, che Tata,

Da na ventina d’anne, e fuorze cchiune,

Pe causa soja, se n’è ghiuto fora,

E non se n’è saputa maje chiù nova,

E mo’ che lo vorria, cchiù no lo trova.

PORZIA

Veramente è accossì, priesto zappammo,

Ca se mme nzonno sulo che mme chiamma,

Mme ne vao doce doce,

Auto no l’è restato

Che spireto, soperbia, voce, e sciato.

Sarria tiempo de stareme a spasso,

E abbesogna che passo,

Sta vita a zappà.

Da na Mamma so’ nnata, a lo Munno,

Ch’arzeneca a funno,

Maje penza a scialà.

SCENA II

FONZILLO, e RIENZO co le scoppette, e li Cane, che banno caccianno, e le stisse.

FONZILLO

Se da cca non trovammo porzì quaglie,

Nce nne potimmo ire zitto zitto,

Ca la caccia pe nuje è juta a mmitto.

RIENZO

Da cca sempe nc’è stata quaccosella.

PORZIA

Mare nuje poverelle!

SAPATELLA

Se vene Mamma vide, che bo’ essere!

PORZIA

La mala sciorta quanto sape tessere!

FONZILLO

Addio belle fegliole.

RIENZO

Addio: Decite

Nce songo aucielle, o no da sto contuorno?

SAPATELLA

Ch’aucielle, vuje ch’avite?

PORZIA

Passate nnanze, e no nce delleggiate.

RIENZO

Bene mio ch’aggio ditto!

Potta d’oje, e che quaglie. (a parte.)

FONZILLO

No v’arraggiate tanto.

Ora vide destino (a parte.)

So’ motate le cose, e quanno mprimmo

Le quaglie erano accise;

Da le quaglie so’ mo’ li cacciature

Ferute a morte, e cagnano natura.

PORZIA

Hanno no zierto che, de bona grazia.

SAPATELLA

Mme parono galante.

Nce vorria parlà na sghizza.

Ma de Mamma aggio paura

Ca se vene, e mme nc’appizza

Io no stongo cchiù secura.

FONZILLO

Ora cheste so quaglie,

E non chelle che jevamo trovanno. (a parte.)

RIENZO

Non parlo cchiù de quaglie,

Se d’una de ste quaglie io so’ patrone.

FONZILLO

Mme nce voglio chiantare a sto pontone.

Mamma bella damme ajuto,

Pocca ammore mm’hà feruto,

E la botta è propeo cca.

Cca mme pogne aimmè lo core,

Va crescendo lo dolore,

Si mme sano, chi lo ssa.

PORZIA

E manco ve nne jate?

RIENZO

Non t’arraggiare no Bella de tata.

Sango doce,

Co ssa voce,

M’haje feruto,

Damme ajuto,

No strellare

Siente cca.

Cianciosella,

Facce bella,

Vi’ lo core,

Che se more

Non zappare

Pe pietà.

SCENA III

LESENA da dinto, e li stisse.

LESENA

Porzia? Sapatella?

SAPATELLA

Mare nuje!

LESENA

Addove state, addove?

PORZIA

Eccoce cca.

FONZILLO

Chi è chesta che ve chiamma?

PORZIA

È Mamma: e se nce trova co buje sole:

Nuje simmo scorze. Priesto appalorciate.

RIENZO

Ma nuje che ve facimmo?

SAPATELLA

Cammenate. (fora Lesena.)

LESENA

Accossì bene mio! Voleva dicere

Pecché no ve vedeva a lo pagliaro?

E mbe’ che cosa è chesta?

Bell’Uommene da cca vuje che bolite?

Passate nnanze; e jate cammenanno,

Non jate mmezzianno,

Le fegliole de Mamma.

FONZILLO

Patrona mia, non t’arraggiare tanto,

Ca nuje stavamo cca pe cacciare.

LESENA

Va buono; Ma nzi’ a mo’ se n’è benuto,

Auciello ancora; manco venarrà.

SAPATELLA

Sacciate

LESENA

Zitto tu, non parlà cchiune.

PORZIA

Ch’avevamo da dicere?

LESENA

Fenisce.

RIENZO

Sentiteme na cosa

LESENA

E manco mone?

Saccio io co prattecare

Chi è l’Ommo, e quanno è Ommo, che pò fare;

E mbe’, che s’è zappato?

SAPATELLA

100

Tre moja, e meze.

LESENA

Bravo;

Mo’ sì ca so’ arrevata,

A casa de Barone;

Lesena annegrecata;

Pe na pagliuca pierde na nzalata.

FONZILLO

105

Patrona te so’ cuoco.

RIENZO

Bella femmena addio.

LESENA

Bell’Ommo co le scarpe,

Te puorte miezo lo terreno mio,

E accossì se nne va sto po’ de terra;

110

Scauzate e po vattenne;

E tu co lo vestito,

T’haje pegliata na sarma de rostine;

Levatelle da cuollo,

Ca tu non pierde niente, & io le secco. (Va l’uno a scauzarese, e pigliare lo terreno, l’autro a levarese le restine da cuollo.)

FONZILLO

115

Mo’ te servo.

RIENZO

So’ lesto.

LESENA

Haje vuocchio, o non haje vuocchio?

Aduna chelle frecole de paglia,

Ca nce servono a fare la colata;

Caccia tu chelle mosche,

120

Ca se mangiano meza la semmenta?

Vedite chillo è vuosso;

Stepatelo ca serve,

A pastenare quann’è tiempo pone.

FONZILLO

Rienzo lo siente o none?

RIENZO

125

Non saccio addove stongo,

SAPATELLA

Mare nuje sbregognate.

PORZIA

N’arzeneca pe Mamma chi nc’ha data?

LESENA

Na pagliuca, n’uuosto sicco,

Na fronnella, no palicco,

130

Pare niente, ne lo ve’?

E no juuorno che no l’haje,

Neccia mene, uh quanto faje,

Nauta vota pe l’havè.

FONZILLO

Chesta è la Terra. (Fonzo le dà la Terra.)

RIENZO

Cheste le restine. (Rienzo le dà le restine.)

FONZILLO

135

Addove le derrupo?

RIENZO

Addo’ le mecco?

LESENA

Iettatele a sso pizzo.

SAPATELLA

Mare nuje che bregogna!

PORZIA

Uh facce mia!

FONZILLO

T’accorre niente cchiù?

RIENZO

Si’ contentata?

LESENA

Sto sodisfatta, jate a la bon’ora.

FONZILLO

140

Che becchia allesenuta!

RIENZO

Che spezeca! (partono.)

LESENA

Iatevenne vuje puro, ch’io mme resto,

Pe caccià quacche mosca da sta Terra,

E jateve a accattare,

Na panella de Pane pe mangiare.

PORZIA

145

E Lesena, e da Lesena vo’ fare.

SCENA IV

LESENA sola, e po TUFOLO.

LESENA

Bene mio, che ncapasse n’aucielluzzo

Ca propio propio craie, (Se vedono mute aucielle pe l’aria.)

Mme ne farria na bella jelatina;

E nce porria campà pe na matina.

TUFOLO

150

Co la presenzia,

De chisto fusto,

Te paro justo,

La quintassenzia,

Dell’Arsenale,

155

De sta Cettà?

Co le terzette,

Co le cortelle,

Te spacco a felle,

No scuoglio a Niseta,

160

No monte a Proceta,

Dint’a ste sacche,

De tricche tracche,

Ne tengo tanta,

Ch’ogn’uno spanta,

165

De mme parlà?

LESENA

Bene mio quanta cose! (da sé.)

Chisto sarrà pe zierto,

Quacche spacca montagne,

Che revotanno va pe sse Campagne.

TUFOLO

170

Bella femmena mia (Mentre Tufolo afferra Lesena fuje.)

LESENA

Mara me

TUFOLO

Siente cca.

LESENA

Ogn’uno spanta,

De ve parlà!

TUFOLO

Non havere a pavura,

175

Vide chesta fegura,

Tremenna mprimmo capete!

Chesta schitto se vanta,

D’avè acciso perzune nquantetà.

LESENA

Ogn’uno spanta

180

De ve parlà!

TUFOLO

Sì, ma po colle femmene,

Dovento justo piecoro:

Mperzò statte secura,

Siente, sienteme, e lassa la paura.

LESENA

185

Che mm’avite da dicere?

TUFOLO

Avisse visto un quanquo

LESENA

Gnornò, no ll’aggio visto.

TUFOLO

A Chine?

LESENA

A lo sio quanquo.

TUFOLO

Bella femmena mia, già che non siente,

190

Lo parlare ntoscano,

Sienteme, avisse visto,

Passà duje Cacciature?

LESENA

Gnorsì; ma da no piezzo

Se nne so’ ghiute senza fare Caccia.

195

(Mme pare aggrazejato, sto smargasso.) (da parte.)

TUFOLO

Mo’ m’assetto cca nterra,

E quanno arrecettato,

Mme senco da la capo nzi’ a le mmano

Mme ne torno a la Casa chiano chiano.

LESENA

200

Bell’Ommo tu chi si’?

TUFOLO

Lo buoje sapere?

N’haje golio propio propio?

Ora mente e accossì,

Spaparanza ss’aurecchie, e sta a sentì.

Mme chiammo Tufolo,

205

So’ nato a Napole,

So’ d’anne tridece,

So’ figlio a Patremo,

Nascie da Mammema,

So’ miezo fiseco,

210

Copeta, e Museco,

Nn’haggio rettorie,

Joquo a lo strummolo,

Saccio abballà.

Spacco no Cecere!

215

Mangio a bezzeffia,

Mme mecco nguardia,

Cammino tiseco,

Vevo a duje guoffole

Sto sano, e libero,

220

N’aggio maje pimmece,

Non tengo pulice,

S’ascio na femmena

Mme nzoro già.

LESENA

Che grazia mm’ave st’Ommo!

225

Te nzorarrisse addonca?

TUFOLO

Segnorzì.

LESENA

Io te voglio nzorare.

TUFOLO

E tu chi si’?

LESENA

Mme chiammo Lesena

So’ nata a Napole,

So’ d’anne tridece,

230

So’ figlia a Patremo,

Nasceie da Mammama

So’ meza fiseca,

Copeta, e Museca,

Nn’aggio rettorie,

235

Joquo a lo strummolo

Saccio abballà.

Spacco no Cecere,

Mangio a bezzeffia,

Mme mecco nguardia,

240

Cammino teseca,

Vevo a duje guoffole,

Sto sana, e libera,

Nn’aggio maje pimmece,

Non tengo pulece,

245

S’ascio no Mascolo

M’accaso già.

TUFOLO

(La Vecchia m’ha jettate l’vuocchie ncuollo.) (da parte.)

Mme nce voglio spassare.

Addove nce vedimmo?

LESENA

250

A lo Ullo mo’ mo’.

TUFOLO

Songo venuto,

Fatte cunto ca nnanze,

Che tu arrive a lo Ullo, io so’ arrivato.

LESENA

Llà t’aspetto.

TUFOLO

Bonnì.

LESENA

Figlio ammoruso,

Quanto è bello, galante, e grazejuso.

SCENA V

SPELLECCHIA finto Razullo, che scenne a la Marina de la Conciaria dinto a no Vuzzo, vestuto a la Marenaresca.

SPELLECCHIA

255

Simmo a lo Torrione,

Auza Cienzo li Rimme,

E accosta nterra a la Cetate mia;

Arrecettate e bia, panza mia bella,

Non vi’ ca si’ arrevata,

260

Nauta vota a bedere, e no lo creo,

Napole, addo’ si’ nata?

Nauto Napole a lo Munno,

Se lo vvoje zierto no nc’è;

Addo’ so’ li Maccarune,

265

Co lo Zuco, li Pastune,

Le Sfogliate,

Le Nnzalate,

Le Torzella,

Le Melella,

270

L’Ajeniello, che fa bè.

Orzù venimmo a nuje,

Io saccio ca Moglierema,

Se non faccio sgarrone,

Da tanno che partiette,

275

Steva de Casa propejo,

A lo Ullo, azzoè Porta Nolana,

Vecino a Cecca Nasca,

Chella che benne arucole la sera;

Io creo che nce stia puro,

280

La voglio ì a trovare,

Ca da ccane a lo Ullo no nc’è niente;

Fegnere ca so’ artista,

Sferrato da le mmano,

De li Turche marditte, e poveriello,

285

Vao trovanno patrone.

Se mme piglia, e de mme non s’allecorda,

Uh quanto voglio fare,

Mme voglio cagnà nomme,

Chiammateme Razullo pe Spellecchia,

290

Scanagliatela buono,

E se la trovo zita de costumme,

Direle, co no muodo,

De viecchio, ch’arde peo de Peccerillo,

Ca se vo’ lo Marito, io songo chillo.

SCENA VI

Porta Nolana co le Case, e lo Ullo.

FONZILLO, e RIENZO.

FONZILLO

295

Io n’arrecetto cchiù.

RIENZO

Crideme Fonzo

Ca so’ fatto na Cicola

Penzanno sulo sulo a chella facce.

FONZILLO

Io no la lasso cchiù se be’ m’adacce!

RIENZO

A quale vuoje Tu bene?

FONZILLO

300

A chella chiattolella.

RIENZO

Uono ca sconzertammo de capricce.

FONZILLO

Et io vorria morire

Nzanetate pozz’essere a lo Munno,

Pe cchella c’have n’uuocchio nigro, e tunno.

305

N’uocchio tinto,

Scuro mene,

Già sta pinto,

D’into a st’arma a cchisto pietto!

Isso schitto

310

Pò sanà sto Core affritto

Mme pò dà quacch’arricietto.

RIENZO

Mo’ sì ca no starraggio cchiù cojeto.

Ammore, ammore cano,

Che nne volive fare

315

De sperciareme l’arma, e nnammorare?

So’ caduto a lo fuosso d’Ammore,

No chiuuovo a lo Core

Mme senco passà.

La Parrella è ncappata a la rezza

320

Nesciuna allegrezza

Pe mme cchiù se dà.

SCENA VII

SAPATELLA, PORZIA da lo Barcone mangianno Mela, e li stisse.

PORZIA

Nnanze che bene Mamma,

Sapatella mangiammoce ste Mela.

SAPATELLA

Chisto propio è assaje doce.

PORZIA

325

Maramene, e che beo?

SAPATELLA

Song’io, o non song’io, comm’è stato?

PORZIA

Lo core mme fa mpietto tippe tappe?

SAPATELLA

Mo’ sì ca l’arma mia,

Da le frezze d’Ammore cchiù no scappa.

FONZILLO

330

Ora chesta è fortuna!

RIENZO

Chest’è sciorte.

FONZILLO

Che beo?

RIENZO

So’ nzallanuto,

Chella propejo è assaje bella.

FONZILLO

Lo core de Fonzillo è propejo chella.

RIENZO

Chest’è la casa vosta.

SAPATELLA

Chesta propejo.

FONZILLO

335

A la bonora sia.

RIENZO

Ve nce pozzate fa quanto io vorria.

FONZILLO

Sapatella lo saje ca pe te moro!

RIENZO

Lo saje ca pe te scolo Porzia mia!

SAPATELLA

Maramene, e che dice?

PORZIA

Uh facce mia!

FONZILLO

340

Non te pegliare scuorno.

RIENZO

Non t’arraggiare tanto.

PORZIA

Tiene le mano a tte.

SAPATELLA

Mo’ nce la canto.

È bero Fonzo è bero,

Ch’aje l’uuocchie comm’a zero

345

Si’ janco comme caso,

Aje vocca, cchiù che naso,

Si’ curto, e tonnolillo?

Ma che nne voglio fare,

Se vao pe te mmerare,

350

E ammore ch’è no guitto,

Mme dice zitto zitto

Lo core tujo è chillo.

FONZILLO

L’aggio sgarrata tonna de colata!

RIENZO

E tu core de st’arma,

355

De li guaje de st’affritto che nne dice?

FONZILLO

Vao p’accattare treglie, e accatto alice.

PORZIA

Rienzo mio dico lo vero

Tu mme pare Caaliero,

No fegliulo senza virre,

360

Capetanejo co li sbirre,

No Cavallo mmezzarria;

Ma pe te che pozzo fare,

Quanno vao pe te mmerare,

E mme dice fora, e dinto

365

Chillo cano de Copinto,

S’haje da ammare chillo sia. (via. Resta Fonzillo, e Rienzo pe no poco sospise, e po dicono.)

RIENZO

E una, e una doje!

FONZILLO

So’ mmescate le bacche, co li vuoje!

RIENZO

Fonzillo.

FONZILLO

Rienzo.

RIENZO

Aje ntiso?

FONZILLO

Aggio caputo!

RIENZO

370

So’ asciuto da li panne!

FONZILLO

Io so’ mpazzuto.

A DUE

Votta fortuna mia,

Malan che di te dia,

Quanno la scumpe;

Che nne volive fare,

375

De fareme nchiajare,

E po mme rumpe.

SCENA VIII

LESENA sola.

LESENA

Da capo nzi’ a lo pede,

Sto largo aggio votato,

E ancora non compare

380

Tufolo: chillo, ch’io

Vedie mo nnanze a la Padula mia.

Mara me se nne fosse già scordato!

Ma non creo, ch’era n’Ommo de jodizio

Fegliulo de creanza, e senza vizio.

385

La scoppetta s’allesta Ammore

Pe sparareme ncuorpo Bu.

E accommenza a sentì lo core

La Trommetta, che fa tu tu.

SCENA IX

SCIADDEO, che ba trovanno monnezza, e LESENA.

SCIADDEO

Monnezza, ahje la mondezza. (da dinto.)

LESENA

390

Chisto è Sciaddeo securo. (esce.)

SCIADDEO

Stammo a no Munno propejo de scarzezza,

Che manco se la vuoje, truove monnezza.

LESENA

Sciaddeo, la sarma ancora,

N’aje chiena, e da mez’ora che si’ asciuto:

395

Povero Ciuccio mio,

Mmano a te, che si’ propejo nzallanuto.

SCIADDEO

A no povero fegliulo,

Che fatica sulo sulo,

Ste parole n’è lo ve’?

400

Se no juorno voto vico,

Vedarraje s’è fronna, o fico,

Quanto dice mo’ de me.

LESENA

Che buoje che dica frate, tu aje raggione,

Non te movere tanto Caperrone,

405

Ch’a no muro de chisse mo’ te sbatto;

Tieme’ de lo vestito, che n’ha fatto?

SCIADDEO

Facimmoce lo ’ncienzo.

LESENA

Lo ’ncienzo, sì lo ’ncienzo;

Ente quanta loquera;

410

E puro freccechie?

SCIADDEO

Che brutta sera. (a parte.)

SCENA X

TUFOLO, e li stisse.

TUFOLO

Aggio lassate li Patrune, e chella,

So’ benuto a trovare che mme disse,

Ch’a lo Ullo Ma zitto eccola ccane,

Patrona mia te vaso li tallune.

LESENA

415

Te dia lo buono juuorno la fortuna.

SCIADDEO

Chi è chisto?

LESENA

Zitto tu ca po lo saje.

TUFOLO

Comme state!

LESENA

Sto arquanto appannatella.

TUFOLO

Comm’a dicere mone?

LESENA

Vedeva chiù mo’ nnanze, che no mone.

TUFOLO

420

Se perdissevo l’vuocchie,

Sarria na mala cosa nzanetate.

LESENA

Non sia maje.

TUFOLO

D’appetito comme jate.

LESENA

Accosì, meza bona, e meza trista,

E buje?

TUFOLO

Sto miezo miezo pe mpazzire.

LESENA

425

Sta zitto, ca mme faje priesto morire.

TUFOLO

Chesso è niente, e tutt’uno;

Sore mia co nuje aute smargiassune,

La nfermetà non troppo nce fa bene.

SCIADDEO

Che belle zeremonie;

430

Bene mio ca mo’ schiatto de lo riso,

Sta nziemmo lo pennono co lo mpiso!

Che na Giovane cerca marito,

E jostizia, e se deve sentì;

Ma na vecchia, ch’è meza vavosa,

435

N’arrecetta pe fare la Sposa,

È na cosa da fare stordì.

SCENA XI

RAZULLO, e li stisse.

SPELLECCHIA

Chisto è lo Ullo zierto,

Da cca lassaje la casa de moglierema,

Ma zitto, chi so’ chiste?

SCIADDEO

440

Co troppo confedenzia

Parlano a sulo a sulo,

Se non fanno l’Ammore, songo trapole,

Mar’essa, e lo Marito; fosse a Napole.

SPELLECCHIA

E ba ch’è essa propejo;

445

S’a sta varva a posticcio,

No m’arriva a canoscere,

Pe no piezzo la voglio scanagliare,

Ajutame fortuna.

LESENA

Pigliate quacche spasso.

TUFOLO

450

Quanno mme vene fatta no lo lasso.

SPELLECCHIA

A no povero annegrecato,

Da le mmano, che mo’ è sferrato,

De li Turche, na caretà;

N’aggio pizzo de cuorpo sano,

455

Da li piede, pe nzi’ a le mano,

A sciomare lo sango va.

LESENA

Mme ne vene piatate!

TUFOLO

N’aggio no zierto cche de passione!

SCIADDEO

Sarria buono, e abboscasse qua patrone.

LESENA

460

Viene cca Poveriello,

S’asciasse de servire, nce jarrisse?

SPELLECCHIA

Chesso è chello, che bao propejo trovanno.

LESENA

Non te partì da lloco,

Ch’io te voglio pegliare pe creato.

SPELLECCHIA

465

Ve rengratio.

SCIADDEO

Mme pare accrejanzato.

LESENA

Lo nomme tujo qual’è?

SPELLECCHIA

Razullo.

LESENA

Bravo.

SCIADDEO

A la facce, che tene pare schiavo. (Lesena tira da parte a Tufolo.)

LESENA

Orsù parlammo a nuje,

De chello che te disse, che buoje fare?

TUFOLO

470

Sia presto ca mme voglio già nzorare.

Ca n’è cosa da perdere

La jenimma de Tufulo,

Ch’io lo stisso che di’, ne cchiù manco

La Schiatta de l’antiche smargiassune.

SPELLECCHIA

475

La Gelosia mme roseca:

Annevina de che parlano zitto,

Mo mme nce mecco mmiezo,

E co scusa de fare lo gnorante

Le boglio allontanare tutte duje,

480

Chist’è lo primmo mbruoglio.

SCIADDEO

Mme pare tanto buono, e tanto tanto

Ch’all’aseniello mio s’arresommeglia,

Ch’aggio lassato a chillo pizzo llane

M’ajutarrà s’è bero a qua servitio. (e mette mmiezo Razullo.)

LESENA

485

Mparate de crejanza, e quando vide,

Bell’Ommo mio ca duje parlano ncocchia,

Non te mettere mmiezo, ch’è bregogna.

SPELLECCHIA

Scosateme ca songo n’anemale.

TUFOLO

E abbesuogno che lieje lo catameo

490

S’haje golio de sta ncorte a sta Cetate.

SCIADDEO

S’è puosto ngravetate,

Vi’ chi parla de Corte.

SPELLECCHIA

Razullo agge pacienzia, e statte forte. (da sé. Tira de nuovo Lesena Tufolo pe parlare a sulo a sulo.)

LESENA

E accossì: Tu mme dice ca si’ lesto?

TUFOLO

495

So’ lesto: e lo farria mo’ priesto priesto? (Se mette Razullo de canto.)

LESENA

E nauta vota mo’?

TUFOLO

Che muodo è chisto,

De trattà, mascauzone, aggie crejanza,

O te assetto na chiechiera a lo stommaco.

SPELLECCHIA

No nce ncappo cchiù mone.

SCIADDEO

500

È propejo n’asenone,

Fatte llà piezzo d’anchione.

O te assesto no mmoccone,

E te mparo de creanza.

Vi’ ca parle tu co Attorro

505

Quanno vollo tutto scorro,

Aggio vocca, e meglio panza.

LESENA

Ora su va vattenne a lo pagliaro,

Sciaddeo tu va co isso, e statte attiento,

Che non venga quarchuno,

510

E se coglia l’arucole a la sepa.

SPELLECCHIA

Mo’ ve servo.

SCIADDEO

Abbiammo.

SPELLECCHIA

Sciorte mia (da parte.)

Moreraggio si a ffe pe gelosia.

SCENA UTEMA

LESENA, e TUFOLO.

LESENA

Tufolo mio te juro

Tant’è la passeone, ch’aggio ncuorpo,

515

Pensanno a ssa bellezza,

Che non dormo, né magno, (Lesena chiagne.)

Trevolejo, mm’affrio, mme scicco, e chiagno?

TUFOLO

Chesto, che faje, ch’ d’è?

LESENA

Manco vuoje, che spapura

520

Co lo chianto l’ammore

De chisto core affritto?

TUFOLO

Ora vi’ lo diaschenge mmarditto! (Tufolo chiagne.)

Lesena mia te, te.

LESENA

Tufolo mio, pecché

525

Tu chiagne! dillo a mme.

TUFOLO

Chiagno, ca chiagne tu.

A DUE

Bellezza mia, uh, uh!

TUFOLO

Dimme pe caretà.

LESENA

Parla pe caretà.

A DUE

530

Pecché t’affrie accossì.

TUFOLO

Dimmello gioja di’.

LESENA

Parlame nveretà.

TUFOLO

Pe mme tu chiagne. aibò.

LESENA

Pe mme t’affrie. aibò.

TUFOLO

535

Lesena adonca mo’.

LESENA

Tufolo adonca mo’.

A DUE

Sto trivolo se fa,

E non se sa pe cchi?

Si è chesto, priesto su

540

Non chiagnere no cchiù.